روبوعامنىڭ اكەسى سۇلەيمەن يسرايلدە 40 جىل پاتشا بولدى (‏پاتشالار 1-‏جازبا 11:‏42‏)‏.‏ اكەسى قايتىس بولعان سوڭ،‏ روبوعام پاتشا بولۋ ٷشىن يەرۋساليمنەن شىعىپ،‏ سيحەمگە باردى (‏شەجىرەلەر 2-‏جازبا 10:‏1‏)‏.‏ ول اكەسىنەن كەيىنگى پاتشا بولاتىنىن ويلاپ ۋايىمدادى ما؟‏ سۇلەيمەن جۇرتقا وزىنىڭ اسقان دانالىعىمەن تانىمال ەدى.‏ كوپ ۇزاماي روبوعامنىڭ دانالىعىن سىنعا العان ٴ‌بىر كۇردەلى ماسەلە تۋىندادى.‏

وزدەرىن ەزگىدە جۇرگەندەي سەزىنگەن يسرايلدىكتەر روبوعامعا وكىلدەرىن جىبەرىپ،‏ مىناداي ٶتىنىش ٴ‌بىلدىردى:‏ «اكەڭىزدىڭ بىزگە ارتقان جۇگى تىم اۋىر.‏ ەگەر ونىڭ موينىمىزعا ارتقان اۋىر جۇمىسى مەن زىلدەي جۇگىن جەڭىلدەتسەڭىز،‏ ٴ‌سىزگە قىزمەت ەتەمىز» (‏شەجىرەلەر 2-‏جازبا 10:‏3،‏ 4‏)‏.‏

روبوعام قيىن شەشىم الدىندا تۇردى.‏ ەگەر حالىقتىڭ تىلەگىن ورىنداسا،‏ ٶزى مەن وتباسى جانە سارايىنداعى ادامدار بۇرىنعىداي شالقىپ ٶمىر سۇرە الماس ەدى.‏ ال ەگەر حالىقتىڭ ايتقانىن ورىنداماسا،‏ ولار قارسى شىعۋى ابدەن م‍ۇمكىن ەدى.‏ سوندا ول نە ىستەدى؟‏ الدىمەن ول اكەسىنىڭ كەڭەسشىلەرى بولعان اقساقالدارمەن اقىلداستى.‏ ولار جۇرتتىڭ ۇنىنە قۇلاق اسۋعا شاقىردى.‏ ٴ‌بىراق سوسىن روبوعام وزىنىڭ قۇرداستارىمەن اقىلداستى دا،‏ حالىقپەن قاتاڭ بولۋدى شەشتى.‏ ول حالىققا:‏ «مەن سەندەردىڭ جۇكتەرىڭدى ودان بەتەر اۋىرلاتامىن.‏ اكەم سەندەردى جاي قامشىمەن ساباعان بولسا،‏ مەن دويىر قامشىمەن سابايمىن!‏»—‏ دەدى (‏شەجىرەلەر 2-‏جازبا 10:‏6—‏14‏)‏.‏

بايقاساڭىز،‏ بۇل وقيعادان ٴ‌بىز ساباق الا الامىز.‏ ارامىزدا ەحوباعا تالاي جىل قىزمەت ەتىپ كەلە جاتقان ۇلكەن كىسىلەر بارشىلىق.‏ ولار بىزگە دۇرىس شەشىم قابىلداۋعا كومەكتەسە الادى.‏ دانا بولىپ،‏ سولاردىڭ ايتقانىنا قۇلاق تۇرەيىك!‏ (‏ٵيۇپ 12:‏12‏)‏.‏

بۇدان كەيىن روبوعام اسكەرىن جيناپ،‏ بۇلىك شىعارعان رۋلارمەن شايقاسپاقشى بولدى.‏ ٴ‌بىراق ەحوبا شەماياح پايعامبارىن جىبەرىپ بىلاي دەدى:‏ «يسرايلدىك باۋىرلارىڭمەن سوعىسۋعا بارماڭدار.‏ بارلىعىڭ ٷيدى-‏ۇيلەرىڭە قايتىڭدار.‏  سەبەبى بۇل مەنىڭ ەركىممەن بولدى» (‏پاتشالار 1-‏جازبا 12:‏21—‏24‏)‏ *‏.‏

ەحوبانىڭ ٴ‌تىلىن الۋ روبوعام ٷشىن وڭاي بولدى ما؟‏ حالىق ەندى جاڭا پاتشاسى جايلى نە ويلاپ قالادى؟‏ «دويىر قامشىمەن سابايمىن!‏» دەگەن پاتشانىڭ وسىنداي سۇمدىق بۇلىك شىعارعان حالىققا ەشقانداي شارا قولدانباعانى قالاي؟‏!‏ (‏شەجىرەلەر 2-‏جازبا 13:‏7 سالىستىرىڭىز)‏.‏ الايدا حالىق ٶزى جايلى نە ويلاماسىن،‏ روبوعام اسكەرىمەن بىرگە «ەحوبانىڭ سوزىنە قۇلاق اسىپ،‏ ەحوبانىڭ ايتۋى بويىنشا ۇيلەرىنە تاراستى».‏

بۇدان قانداي ساباق الا الامىز؟‏ قۇدايدىڭ ٴ‌تىلىن الۋ ٵرقاشان دا،‏ ٴ‌تىپتى ادامدار سول ٷشىن كۇلكى ەتسە دە،‏ دانالىقتىڭ بەلگىسى بولىپ قالا بەرمەك.‏ ٴ‌تىلالعىش بولىپ جۇرسەك،‏ قۇداي ٵرقاشان باتاسىن بەرەدى (‏مۇسانىڭ 5-‏جازباسى 28:‏2‏)‏.‏

مويىنسۇنعانى ٷشىن روبوعام جارىلقاندى ما؟‏ ول ياھۋدا مەن بەنيامين رۋلارىنا ٵرى قاراي دا بيلىك ەتە بەردى جانە سول ايماقتا جاڭا قالالار تۇرعىزۋدى شەشتى.‏ ال كەيبىر قالالاردى كۇشەيتىپ،‏ «بارىنشا بەكىتتى» (‏شەجىرەلەر 2-‏جازبا 11:‏5—‏12‏)‏.‏ بۇدان دا ماڭىزدى ٴ‌بىر جايت بار:‏ روبوعام ٴ‌بىرشاما ۋاقىتقا ەحوبانىڭ زاڭدارىمەن ٴ‌جۇردى.‏ ون رۋلى پاتشالىق پۇتتارعا تابىنا باستاعاندىقتان،‏ كوپ ادام روبوعام مەن شىنايى عيباداتتى قولداۋ ٷشىن يەرۋساليمگە كەلدى (‏شەجىرەلەر 2-‏جازبا 11:‏16،‏ 17‏)‏.‏ سونىمەن،‏ روبوعام ەحوبانىڭ ٴ‌تىلىن العاندىقتان،‏ ونىڭ پاتشالىعى كۇشەيە ٴ‌تۇستى.‏

پاتشالىعى نىعايعان سوڭ،‏ روبوعام وعاش ٴ‌بىر نارسە ىستەدى.‏ ول ەحوبانىڭ زاڭدارىمەن ٴ‌جۇرۋدى قويىپ،‏ جالعان تاڭىرلەرگە قۇلشىلىق ەتە باستادى.‏ نە سەبەپتى؟‏ امموندىق بولعان اناسى وعان تەرىس ىقپال ەتتى مە؟‏ (‏پاتشالار 1-‏جازبا 14:‏21‏)‏.‏ ٴ‌بىز بىلمەيمىز،‏ ٴ‌بىراق حالىق ونىڭ جامان ۇلگىسىنە ەلىكتەپ كەتتى.‏ سوندىقتان ەحوبا مىسىر پاتشاسى شۇشاقتىڭ ياھۋدا پاتشالىعىنداعى كوپ قالانى باسىپ الۋىنا جول بەردى.‏ روبوعامنىڭ بۇل قالالاردى جاقسىلاپ بەكىتكەنى دە كومەكتەسپەدى (‏پاتشالار 1-‏جازبا 14:‏22—‏24؛‏ شەجىرەلەر 2-‏جازبا 12:‏1—‏4‏)‏.‏

شۇشاق اسكەرىمەن بىرگە يەرۋساليمگە قاراي ات باسىن بۇرعاندا،‏ جاعداي ودان بەتەر ۋشىعا ٴ‌تۇستى.‏ سول كەزدە شەماياح پايعامبار روبوعام مەن بەكزادالارعا:‏ «سەندەر مەنى تاستاپ كەتتىڭدەر،‏ سوندىقتان مەن دە سەندەردەن باس تارتىپ،‏ شۇشاقتىڭ قولىنا تاپسىرامىن»،‏—‏ دەگەن قۇدايدىڭ حابارىن جەتكىزدى.‏ روبوعام بۇل تۇزەتۋدى وتە جاقسى قابىلدادى!‏ كيەلى كىتاپتا بىلاي دەلىنگەن:‏ «مۇنى ەستىگەن يسرايل بەكزادالارى مەن پاتشا:‏ «ەحوبا ٵدىل!‏»—‏ دەپ،‏ كىشىپەيىلدىلىكپەن كۇنالارىن مويىندادى».‏ سوندىقتان ەحوبا روبوعامدى قۇتقارىپ،‏ يەرۋساليم جويىلعان جوق (‏شەجىرەلەر 2-‏جازبا 12:‏5—‏7،‏ 12‏)‏.‏

بۇدان كەيىن روبوعامنىڭ ياھۋدا پاتشالىعىنداعى بيلىگى جالعاسا بەردى.‏ ولەر الدىندا ول بالالارىنا كوپ سىيلىقتار جاسادى.‏ بالكىم،‏ بۇنى وزىنەن كەيىن پاتشا ەتىپ قالدىرعىسى كەلگەن ٵبياحقا باۋىرلارى قارسى بۇلىك شىعارماسىن دەپ ىستەگەن شىعار (‏شەجىرەلەر 2-‏جازبا 11:‏21—‏23‏)‏.‏ وسىلايشا ول جاس كەزىنە قاراعاندا اقىلدىلىقپەن ارەكەت ەتتى.‏

روبوعامنىڭ جاساعان كەيبىر جاقسى ىستەرىنە قاراماستان،‏ كيەلى كىتاپتا ونىڭ قالاي بيلىك ەتكەنى جايلى:‏ «روبوعام جامان ىستەر جاسادى»،‏—‏ دەلىنگەن.‏ نەگە؟‏ «ويتكەنى ول ەحوبانى ىزدەۋ ٷشىن جۇرەگىندە بەرىك شەشىم قابىلداماعان ەدى».‏ سوندىقتان ول ەحوبانىڭ الدىندا ۇنامسىز بولدى (‏شەجىرەلەر 2-‏جازبا 12:‏14‏)‏.‏

سونىمەن،‏ روبوعامنىڭ ومىرىنەن نە بىلەمىز؟‏ ول كەيدە قۇدايدىڭ ٴ‌تىلىن العان.‏ ەحوبانىڭ حالقىنا جاساعان كەيبىر جاقسى ىستەرى دە بار.‏ ٴ‌بىراق ول ەحوبامەن تىعىز قارىم-‏قاتىناستا بولعان جوق،‏ قۇدايعا ۇناۋعا دەگەن ىستىق ىقىلاسى دا بولمادى.‏ سوندىقتان دۇرىس نارسەنى ىستەۋدى دوعارىپ،‏ جالعان تاڭىرلەرگە تابىنىپ كەتتى.‏ بالكىم،‏ ٴ‌سىز:‏ «روبوعام ەحوبانىڭ تۇزەتۋىن قابىل العاندا،‏ ول مۇنى قاتەلىگىنە قاتتى وكىنىپ،‏ قۇدايعا ۇناۋعا تىرىسقاندىقتان جاسادى ما؟‏ جوق الدە باسقالار «سولاي ىستەۋ كەرەك» دەگەندىكتەن عانا ما؟‏»—‏ دەپ ويلاناتىن شىعارسىز (‏شەجىرەلەر 2-‏جازبا 11:‏3،‏ 4؛‏ 12:‏6‏)‏.‏ كەيىن ول تاعى دا جامان ٸس ىستەدى.‏ ول ارعى اتاسى ٴ‌داۋىت پاتشاعا م‍ۇلدەم ۇقسامادى!‏ راس،‏ ٴ‌داۋىت تە شالىس قادام باسقان.‏ ٴ‌بىراق ول جاساعان اۋىر كۇناسىنا شىن وكىندى.‏  سونداي-‏اق ەحوبانى جانە شىنايى عيباداتتى ٶمىر باقي جاقسى كورىپ ٶتتى (‏پاتشالار 1-‏جازبا 14:‏8؛‏ ٴ‌زابۇر 51:‏1،‏ 17؛‏ 63:‏1‏)‏.‏

كيەلى كىتاپتىڭ وسى كەيىپكەرىنەن كوپ ساباق الامىز.‏ ادامداردىڭ ٶز وتباسىلارىنىڭ قاجەتتىلىگىن قامتاماسىز ەتىپ،‏ باسقالارعا جاقسىلىق جاساعانى وتە جاقسى.‏ ٴ‌بىراق ەحوبانىڭ ىقىلاسىنا بولەنۋ ٷشىن،‏ وعان ۇنامدى تۇردە عيبادات ەتىپ،‏ ونىمەن مىقتى قارىم-‏قاتىناس دامىتۋىمىز كەرەك.‏

بۇل ٷشىن ٴ‌بىز ەحوبانى قاتتى جاقسى كورۋىمىز قاجەت.‏ وت سونبەۋ ٷشىن وتىن سالىپ وتىراتىنىمىزداي،‏ قۇدايعا دەگەن سۇيىسپەنشىلىگىمىز جالىنداپ تۇرۋ ٷشىن ونىڭ ٴ‌سوزىن جۇيەلى تۇردە زەرتتەپ،‏ سول جايلى وي جۇگىرتۋىمىز جانە ۇدايى دۇعا ەتۋىمىز كەرەك (‏ٴ‌زابۇر 1:‏2؛‏ ريمدىكتەرگە 12:‏12‏)‏.‏ سوندا وسىنداي سۇيىسپەنشىلىگىمىز ٵربىر ىستە ەحوباعا ۇنامدى بولۋعا تالپىندىرادى.‏ سونداي-‏اق قاتەلىك جاساپ قويعان كەزدەرى شىن وكىنىپ،‏ ەحوبادان كەشىرىم سۇراۋعا تالپىنامىز.‏ سوندا روبوعام سياقتى بولماي،‏ شىنايى عيباداتتا ادال بولىپ قالامىز (‏ياھۋدا 20،‏ 21‏)‏.‏