اتا-انا، بالاڭىزعا شومىلدىرۋ راسىمىنە دايىن بولۋعا كومەكتەسىپ ٴجۇرسىز بە؟
«نەگە كىدىرىپ تۇرسىڭ؟ بار دا، شومىلدىرۋ راسىمىنەن ٶت» (ەلشىلەردىڭ ىستەرى 22:16).
اندەر: 59، 89
1. بالالارى شومىلدىرۋ راسىمىنەن وتپەس بۇرىن، ٴماسىحشى اتا-انالار نە نارسەگە كوز جەتكىزگىلەرى كەلەدى؟
«اتا-اناما شومىلدىرۋ راسىمىنەن وتكىم كەلەتىنىن ايلار بويى ايتىپ ٴجۇردىم. ولار مەنىمەن بۇل تاقىرىپتا ٴجيى سويلەسەتىن. ويتكەنى بۇنىڭ قانشالىقتى ماڭىزدى شەشىم ەكەنىن تۇسىنەتىنىمە كوز جەتكىزگىلەرى كەلدى. ٴسۇيتىپ، 1934-جىلدىڭ 31-جەلتوقسانىندا مەن ومىرىمدەگى وسى ماڭىزدى قادامدى جاسادىم». بلوسسوم براندت باۋىرلاس شومىلدىرۋ راسىمىنەن ٶتۋدى شەشكەندە نە بولعانىن وسىلاي باياندادى. بۇگىندە دە اتا-انالار بالالارىنا دۇرىس شەشىمدەر قابىلداۋعا كومەكتەسكىلەرى كەلەدى. ەگەر بالا ەش كەلەلى سەبەپسىز شومىلدىرۋ راسىمىنەن ٶتۋدى كەيىنگە ىسىرىپ جۇرسە، بۇل ونىڭ ەحوبامەن قارىم-قاتىناسىنا نۇقسان كەلتىرۋى مۇمكىن (جاقىپ 4:17). بالالارى شومىلدىرۋ راسىمىنەن وتپەس بۇرىن، پاراساتتى اتا-انالار ولاردىڭ ٴماسىحتىڭ شاكىرتى بولۋعا دايىن ەكەنىنە سەنىمدى بولعىسى كەلەدى.
2. ا) كەيبىر اۋداندىق باقىلاۋشىلار قانداي جايتتى بايقاعان؟ ٵ) بۇل ماقالادا ٴبىز نە جايلى قاراستىرامىز؟
2 كەيبىر اۋداندىق باقىلاۋشىلار 20 جاستىڭ ار جاق، بەر جاعىندا جۇرگەن جاستار شىندىقتا وسسە دە، ٵلى شومىلدىرۋ راسىمىنەن وتپەگەنىن بايقاعان. ولاردىڭ كوبىسى قاۋىم كەزدەسۋلەرىنە بارادى، ۋاعىزعا شىعادى جانە وزدەرىن ەحوبا كۋاگەرى سانايدى. ٴبىراق قانداي دا ٴبىر سەبەپتەرمەن وزدەرىن ەحوباعا باعىشتاپ، شومىلدىرۋ راسىمىنەن وتپەگەن. كەي جاعدايلاردا بۇعان اتا-انا سەبەپشى بولىپ جاتادى. ولار بالاسى شومىلدىرۋ راسىمىنەن وتۋگە ٵلى دايىن ەمەس دەپ ويلايدى. بۇل ماقالادا ٴبىز اتا-اناعا بالاسىن شومىلدىرۋ راسىمىنەن وتۋگە تالپىندىرۋعا كەدەرگى جاسايتىن ٴتورت جايتتى قاراستىرامىز.
بالاما ٵلى ەرتە ەمەس پە؟
3. بلوسسومنىڭ اتا-اناسى نەنى ۋايىمداعان؟
3 ٴبىرىنشى ابزاستا ايتىلىپ كەتكەن بلوسسومنىڭ اتا-اناسى قىزىمىز شومىلدىرۋ راسىمىنەن وتۋدىڭ نە ەكەنىن جانە ونىڭ قانشالىقتى جاۋاپتى قادام ەكەنىن تۇسىنەتىندەي جاستا ما دەپ ۋايىمداعان. اتا-انالار بالاسىنىڭ ەحوباعا باعىشتالۋعا دايىن ەكەنىن قالاي بىلە الادى؟
4. ماتاي 28:19، 20 داعى يسانىڭ بۇيرىعى بۇگىندە اتا-انالارعا قالاي كومەكتەسە الادى؟
4 ماتاي 28:19، 20 وقىڭىز. كيەلى كىتاپتا شومىلدىرۋ راسىمىنەن ناقتى قاي جاستا ٶتۋ كەرەكتىگى ايتىلماعان. ٴبىراق اتا-انالار شاكىرت دايىنداۋدىڭ نەنى بىلدىرەتىنى جايلى جاقسىلاپ ويلانعاندارى ٴجون. ماتاي 28:19 داعى «شاكىرت دايىنداۋ» دەگەن تىركەس گرەك تىلىندە بىرەۋگە شاكىرت بولۋعا كومەكتەسۋ ماقساتىمەن ٴتالىم بەرۋ دەگەندى بىلدىرەدى. ال شاكىرت دەپ يسانىڭ تالىمدەرىن بىلەتىن، تۇسىنەتىن جانە يساعا مويىنسۇنعىسى كەلەتىن ادامدى ايتادى. اتا-انالار بالالارىنا تۋىلعان كەزدەن باستاپ ٴتالىم بەرىپ، ولارعا ەحوباعا باعىشتالۋعا جانە يسانىڭ شاكىرتى بولۋعا كومەكتەسۋدى ماقسات ەتۋلەرى قاجەت. ارينە، سابيلەر شومىلدىرۋ راسىمىنەن وتۋگە دايىن بولا المايدى. دەسە دە كيەلى كىتاپتان بىلەتىنىمىزدەي، ٴتىپتى كىشكەنتاي بالالاردىڭ ٶزى قۇداي سوزىندەگى شىندىقتى ٴتۇسىنىپ، جاقسى كورە الادى.
5، 6. ا) كيەلى كىتاپتاعى تىموتە جايلى سوزدەردەن ونىڭ شومىلدىرۋ ٴراسىمى تۋرالى قانداي تۇجىرىم جاساۋعا بولادى؟ ٵ) اتا-انا ٷشىن بالالارىنا كومەكتەسۋدىڭ ەڭ جاقسى جولى قانداي؟
5 تىموتە — جاستايىنان ەحوباعا قىزمەت ەتۋدى شەشكەن شاكىرت. ەلشى پاۋىل ونىڭ قۇداي سوزىندەگى شىندىقتى «نارەستە كەزىنەن-اق» بىلە باستاعانىن ايتقان. تىموتەنىڭ اكەسى ەحوباعا عيبادات ەتپەگەن. ٴبىراق اناسى مەن اجەسىنىڭ كومەگىمەن ول قۇداي سوزىنە دەگەن سۇيىسپەنشىلىكتى بويىنا ٴسىڭىرىپ ٶستى. سونىڭ ارقاسىندا بەرىك سەنىم دامىتتى (تىموتەگە 2-حات 1:5؛ 3:14، 15). قاۋىمدا ارنايى تاپسىرمالار الۋعا لايىقتى بولعان كەزدە تىموتە 20 جاستىڭ ار جاق، بەر جاعىندا بولعان بولۋى مۇمكىن (ەلشىلەردىڭ ىستەرى 16:1—3).
6 ٵر بالا وزىنشە ەرەكشە. ولاردىڭ ٴبارى بىردەي ۋاقىتتا ەسەيمەيدى. كەيبىرى ەرتە جاستان شىندىقتى تۇسىنەدى، دۇرىس شەشىمدەر قابىلدايدى جانە شومىلدىرۋ راسىمىنەن وتكىسى كەلەدى. ال كەيبىرەۋلەرى ٴسال ەسەيمەيىنشە شومىلدىرۋ راسىمىنەن وتۋگە دايىن بولماۋى مۇمكىن. پاراساتتى اتا-انا بالالارىنا قىسىم جاساپ، شومىلدىرۋ راسىمىنەن وتۋگە قىسامايدى. ونىڭ ورنىنا، ٵر بالاعا ٶز قارقىنىمەن العا باسا بەرۋگە كومەكتەسەدى. بالا ناقىل سوزدەر 27:11 دەگى (وقىڭىز) سوزدەرگە ساي ارەكەت ەتكەندە، اتا-اناسى قۋانادى. ٴبىراق ولار ماقساتتارى بالالارىنا شاكىرت بولۋعا كومەكتەسۋ ەكەنىن ەستەن شىعارماۋلارى كەرەك. وسىنى ەستە تۇتىپ: «قۇدايعا باعىشتالىپ، شومىلدىرۋ راسىمىنەن ٶتۋ ٷشىن بالامنىڭ ٴبىلىمى جەتكىلىكتى مە؟»— دەپ ويلانعاندارى ٴجون.
بالامنىڭ ٴبىلىمى جەتكىلىكتى مە؟
7. شومىلدىرۋ راسىمىنەن وتپەس بۇرىن ادام كيەلى كىتاپتاعى ٵربىر ٸلىمدى ەگجەي-تەگجەيىنە دەيىن ٴبىلۋ كەرەك پە؟ ٴتۇسىندىرىڭىز.
7 اتا-انالار بالالارىنا ٴتالىم بەرگەندە، ولارعا شىندىقتى جاقسى بىلۋگە كومەكتەسەدى. مۇنداي ٴبىلىم بالانى قۇدايعا باعىشتالۋعا تالپىندىرادى. ٴبىراق بۇل باعىشتالىپ، شومىلدىرۋ راسىمىنەن وتپەس بۇرىن بالا كيەلى كىتاپتاعى ٵربىر ٸلىمدى بۇگە-شىگەسىنە دەيىن ٴبىلۋ كەرەك دەگەن ٴسوز ەمەس. ٴماسىحتىڭ ٵربىر شاكىرتى شومىلدىرۋ راسىمىنەن وتكەننەن كەيىن دە ٴبىلىم الۋىن توقتاتپاۋ كەرەك (قولوستىقتارعا 1:9، 10 وقىڭىز). ولاي بولسا، شومىلدىرۋ راسىمىنەن وتپەس بۇرىن ادام قانشالىقتى ٴبىلىم الۋى قاجەت؟
8، 9. ٴفىلىپى قالاسىندا تۇرمە باستىعىمەن قانداي جاعداي بولدى جانە بۇل وقيعادان نە نارسەگە ۇيرەنە الامىز؟
8 بۇگىندە اتا-انالارعا 1-عاسىردا ٶمىر سۇرگەن ٴبىر وتباسىنىڭ وقيعاسى جاقسى كومەك بولا الادى (ەلشىلەردىڭ ىستەرى 16:25—33). 50-جىلى پاۋىل ەكىنشى ميسسيونەرلىك ساپارىمەن ٴفىلىپى قالاسىنا كەلگەن. سول كەزدە جۇرت سىيلاس ەكەۋىنە جالعان ايىپ تاعىپ، تۇتقىنداپ، تۇرمەگە جاپقان. تۇندە جەر قاتتى سىلكىنىپ، تۇرمەنىڭ ەسىكتەرى تۇگەلدەي اشىلىپ قالادى. سوندا تۇتقىنداردىڭ ٴبارى قاشىپ كەتتى دەپ ويلاعان تۇرمە باستىعى وزىنە قول جۇمساماقشى بولادى. ٴبىراق پاۋىل ونى توقتاتىپ ۇلگەرەدى. سودان كەيىن پاۋىل مەن سىيلاس وعان جانە ونىڭ وتباسىنا يسا جايلى شىندىقتى ايتىپ بەرەدى. ولار يسا جايلى ەستىگەندەرىنە سەنىپ، وعان مويىنسۇنۋدىڭ قانشالىقتى ماڭىزدى ەكەنىن تۇسىنەدى. ٴسۇيتىپ، ەش كىدىرمەستەن شومىلدىرۋ راسىمىنەن وتەدى. بۇل جاعدايدان ٴبىز نە نارسەگە ۇيرەنە الامىز؟
9 تۇرمە باستىعى بۇرىن ريم ساربازى بولعان بولۋى مۇمكىن. ول بۇعان دەيىن قۇداي سوزىمەن تانىس بولماعان. سول سەبەپتى ٴماسىحشى بولۋ ٷشىن ول كيەلى كىتاپتاعى نەگىزگى شىندىقتاردى ٴبىلىپ، ەحوبانىڭ ٶز قىزمەتشىلەرىنەن نە تالاپ ەتەتىنىن ٴتۇسىنىپ، يسانىڭ تالىمدەرىنە مويىنسۇنۋعا ىقىلاستى بولۋ كەرەك ەدى. سول قىسقا ۋاقىت ىشىندە العان ٴبىلىمى ونى شومىلدىرۋ راسىمىنەن وتۋگە تالپىندىردى. ارينە، شومىلدىرۋ راسىمىنەن وتكەننەن كەيىن دە ونىڭ ٴبىلىم الا بەرۋى قاجەت ەدى. ەگەر بالاڭىز ەحوبانى جاقسى كورگەندىكتەن جانە وعان مويىنسۇنعىسى كەلگەندىكتەن شومىلدىرۋ راسىمىنەن وتكىسى كەلەتىنىن ايتسا، نە ىستەي الاسىز؟ مۇندايدا ونىڭ اقساقالدارمەن سويلەسكەنى ٴجون دەپ ۇيعارارسىز. بالاڭىزدىڭ شومىلدىرۋ راسىمىنەن وتۋگە دايىن، دايىن ەمەس ەكەنىن سولار انىقتاي الادى *. شومىلدىرۋ راسىمىنەن وتكەن بارلىق ماسىحشىلەر سياقتى، ولار دا ٶمىرىنىڭ سوڭىنا دەيىن، ٴتىپتى ماڭگىلىك بويى ەحوبا جايلى بىلگەن ۇستىنە بىلە بەرەتىن بولادى (ريمدىكتەرگە 11:33، 34).
بالام ٷشىن ەڭ جاقسى ٴبىلىم قانداي؟
10، 11. ا) كەيبىر اتا-انالار نە دەپ ويلايدى؟ ٵ) بالا ٷشىن ەڭ مىقتى قورعانىش نە؟
10 كەي اتا-انالار بالانىڭ جوعارى ٴبىلىم الىپ، تابىستى جۇمىسقا ورنالاسىپ العاننان كەيىن عانا شومىلدىرۋ راسىمىنەن وتكەنى دۇرىس دەپ ويلايدى. مۇنداي اتا-انالاردىڭ نيەتى جاقسى بولۋى مۇمكىن، ٴبىراق ولاردىڭ بىلاي دەپ ويلانىپ كورگەندەرى ٴجون: «بۇدان بالام ناعىز تابىسقا جەتە مە؟ بۇل كيەلى كىتاپتان بىلگەندەرىمىزگە ساي كەلە مە؟ ەحوبا ٴبىزدىڭ ٶز ٶمىرىمىزدى قالاي قولدانعانىمىزدى قالايدى؟» (ۋاعىزداۋشى 12:1 وقىڭىز).
11 وسى دۇنيە مەن ونداعى نارسەلەر ەحوبانىڭ ويلارى مەن قالاۋلارىنا قايشى كەلەتىنىن ەستەن شىعارماعان دۇرىس (جاقىپ 4:7، 8؛ جوحاننىڭ 1-حاتى 2:15—17؛ 5:19). بالانى شايتاننان، وسى دۇنيە مەن ونىڭ تەرىس ويلارىنان ساقتايتىن ەڭ مىقتى قورعانىش — ەحوبامەن تىعىز قارىم-قاتىناس. اتا-انا جوعارى ٴبىلىم مەن تابىستى جۇمىستى ومىردە باستى ورىنعا قوياتىن بولسا، بالا وسى دۇنيەدەگى نارسەلەر ەحوبامەن تىعىز قارىم-قاتىناستا بولۋدان ماڭىزدىراق دەپ ويلاۋى مۇمكىن. بۇل وتە قاۋىپتى. ٴسۇيۋشى اتا-انا رەتىندە وسى دۇنيەنىڭ بالاڭىزعا باقىتقا قاتىستى ٶز كوزقاراسىن ۇيرەتكەنىن شىنىمەن قالايسىز با؟ تابىس پەن ناعىز باقىتقا جەتۋدىڭ جالعىز جولى — ەحوبانى ومىرىمىزدە ٴبىرىنشى ورىنعا قويۋ (ٴزابۇر 1:2، 3 وقىڭىز).
بالام كۇنا جاساپ قويسا شى؟
12. نەگە كەيبىر اتا-انالار بالاسىنىڭ شومىلدىرۋ راسىمىنەن ٶتۋدى قويا تۇرعانى دۇرىس دەپ ويلايدى؟
12 ٴبىر انا نەلىكتەن قىزىنىڭ شومىلدىرۋ راسىمىنەن وتكەنىن قالاماعانىن ٴتۇسىندىردى. «بۇنىڭ نەگىزگى سەبەبى قاۋىمنان شىعارىلۋ شاراسى ەدى»،— دەپ مويىندادى ول. وسى باۋىرلاس سياقتى، كەيبىر اتا-انالار بالالارى اقىماقتىق جاسامايتىن جاسقا جەتكەنشە شومىلدىرۋ راسىمىنەن ٶتۋدى قويا تۇرعانى دۇرىس دەپ ەسەپتەيدى (مۇسانىڭ 1-جازباسى 8:21؛ ناقىل سوزدەر 22:15). ولار بالام شومىلدىرۋ راسىمىنەن وتپەگەن بولسا، قاۋىمنان شىعارىلمايدى دەپ پايىمداۋى مۇمكىن. ٴبىراق بۇلاي ويلاۋ دۇرىس پا؟ (جاقىپ 1:22).
13. بىرەۋ شومىلدىرۋ راسىمىنەن وتپەسە، بۇل ونىڭ ەحوبانىڭ الدىندا جاۋاپقا تارتىلمايتىنىن بىلدىرە مە؟ ٴتۇسىندىرىڭىز.
13 ارينە، اتا-انا بالاسىنىڭ ەحوباعا باعىشتالۋعا دايىن بولماي تۇرىپ شومىلدىرۋ راسىمىنەن وتكەنىن قالامايدى. ٴبىراق بالا شومىلدىرۋ راسىمىنەن وتپەسە، ەحوبانىڭ الدىندا جاۋاپقا تارتىلمايدى دەپ ويلاۋ دۇرىس ەمەس. ەحوبانىڭ نەنى دۇرىس، نەنى بۇرىس دەپ سانايتىنىن بىلگەننەن باستاپ بالا ونىڭ الدىندا جاۋاپتى بولادى (جاقىپ 4:17 وقىڭىز). دانالىقپەن ارەكەت ەتەتىن اتا-انا بالاسىن شومىلدىرۋ راسىمىنەن وتۋدەن اينىتۋعا تىرىسپايدى. ولار بالاسىنا ٴتىپتى كىشكەنتاي كەزىنەن ەحوبا دۇرىس دەيتىن نارسەلەردى وزدەرى سياقتى جاقسى كورۋدى، ال بۇرىس دەپ سانايتىن نارسەلەردى جەك كورۋدى ۇيرەتەدى (لۇقا 6:40). بالاڭىزدىڭ ەحوباعا دەگەن سۇيىسپەنشىلىگى ونى اۋىر كۇنا جاساۋدان ساقتايدى. ويتكەنى ول ەحوبانىڭ كوزىندە دۇرىس سانالاتىن نارسەلەردى ىستەگىسى كەلەتىن بولادى (يشايا 35:8).
وزگەلەر دە كومەكتەسە الادى
14. اقساقالدار اتا-انالارعا قالاي قولعابىس ەتە الادى؟
14 اقساقالدار رۋحاني ماقساتتار جايلى ايتقاندا جاعىمدى مانەرمەن سويلەيتىن بولسا، اتا-انالارعا قولعابىس ەتە الادى. ٴبىر ايەل باۋىرلاس التى جاسىندا راسسەلل باۋىرلاسپەن اڭگىمەلەسكەنىن ەسىنە الدى. «ول مەنىمەن رۋحاني ماقساتتارىم تۋرالى سويلەسۋ ٷشىن 15 مينۋت ۋاقىتىن ٴبولدى»،— دەيدى ول. بۇل قانداي جەمىس اكەلدى؟ ول كەيىنىرەك ٸزاشار بولىپ قىزمەت ەتۋدى باستاپ، سول قىزمەتتى 70 جىلدان اسا ۋاقىت بويى اتقارعان! راسىندا دا، جىلى ٵرى جىگەرلى سوزدەر ادامنىڭ بۇكىل ومىرىنە اسەر ەتۋى مۇمكىن (ناقىل سوزدەر 25:11). سونداي-اق اقساقالدار اتا-انالار مەن بالالاردى پاتشالىق سارايىنداعى جۇمىستارعا اتسالىسۋعا شاقىرا الادى. بالالارعا جاستارىنا، قابىلەتتەرىنە ساي كەلەتىن تاپسىرمالار بەرىپ قويسا بولادى.
15. قاۋىمداعى باسقا باۋىرلاستار جاستارعا قالاي كومەكتەسە الادى؟
15 ال قاۋىمداعى باسقا باۋىرلاستار قالاي كومەكتەسە الادى؟ جاستارعا ورىندى تۇردە جەكە كوڭىل ٴبولۋ ارقىلى. مىسالى، ولاردىڭ ەحوباعا جاقىنداي ٴتۇسىپ جاتقاندارىن كورسەتەتىن بەلگىلەردى بايقاۋعا تىرىسىڭىز. ولار قاۋىمدا تۇسىنىكتەمە بەردى مە؟ اپتا ىشىندەگى كەزدەسۋدە تاپسىرمامەن شىقتى ما؟ مەكتەپتە بىرەۋگە كۋالىك بەردى مە؟ يا بولماسا جامان نارسەنى ىستەۋگە ازعىرىلعاندا، دۇرىس نارسەنى ىستەدى مە؟ سولاي ەتكەن بولسا، ولاردى ماقتاۋعا اسىق بولىڭىز! قاۋىمعا دەيىن جانە قاۋىمنان كەيىن جاستارمەن سويلەسۋدى ماقسات ەتىڭىز. سوندا بالالار وزدەرىن «ۇلكەن قاۋىمنىڭ» ٴبىر مۇشەسىندەي سەزىنەدى (ٴزابۇر 35:18).
بالاڭىزعا شومىلدىرۋ راسىمىنەن وتۋگە دايىن بولۋعا كومەكتەسىڭىز
16، 17. ا) بالانىڭ شومىلدىرۋ راسىمىنەن وتكەنى نەگە ماڭىزدى؟ ٵ) ٴماسىحشى اتا-انالار قانداي قۋانىشقا بولەنە الادى؟ (ماقالانىڭ باسىنداعى سۋرەتتى قاراڭىز.)
16 بالاعا ەحوبانى جاقسى كورۋدى ۇيرەتۋ — اتا-اناعا بەرىلگەن زور مارتەبە (ٴزابۇر 127:3؛ ەفەستىكتەرگە 6:4). يسرايل حالقىندا بالالار تۋىلا سالا ەحوباعا باعىشتالاتىن بولعان. ال ٴبىزدىڭ بالالارىمىزبەن ولاي ەمەس. اتا-انانىڭ ەحوبانى جانە شىندىقتى جاقسى كورگەنى بالالارىنىڭ دا جاقسى كورىپ كەتەتىنىن بىلدىرمەيدى. اتا-انا بالاسى تۋىلعان كۇننەن باستاپ وعان شاكىرت بولۋعا، قۇدايعا باعىشتالۋعا جانە شومىلدىرۋ راسىمىنەن وتۋگە كومەكتەسۋدى ماقسات ەتىپ قويۋى ٴتيىس. بۇدان ماڭىزدى نە بار؟! ادام قۇدايعا باعىشتالىپ، شومىلدىرۋ راسىمىنەن ٶتىپ، ەحوباعا ادال قىزمەت ەتكەنىنىڭ ارقاسىندا زور الاپات كەزىندە قۇتقارىلا الادى (ماتاي 24:13).
اتا-انالار بالالارىنا شاكىرت بولۋعا كومەكتەسۋدى ماقسات ەتۋى ٴتيىس (16، 17-ابزاستى قاراڭىز)
17 بلوسسوم براندت باۋىرلاس شومىلدىرۋ راسىمىنەن وتكىسى كەلگەندە، اتا-اناسى ونىڭ دايىن ەكەنىنە سەنىمدى بولعىسى كەلگەن. ولار قىزدارىنىڭ دايىن ەكەنىنە كوزدەرى جەتكەندە، ونىڭ شەشىمىن قولداعان. شومىلدىرۋ راسىمىنەن وتەر الدىنداعى ٴتۇنى اكەسىنىڭ نە ىستەگەنىن بلوسسوم باۋىرلاس بىلاي دەپ باياندادى: «ول ٴبارىمىزدى تىزەرلەپ وتىرعىزىپ، دۇعا ەتتى. كىشكەنتاي قىزىنىڭ ٶز ٶمىرىن ەحوباعا باعىشتاۋدى شەشكەنىنە شەكسىز ريزا ەكەنىن ايتتى». 60 جىلدان اسا ۋاقىت وتكەننەن كەيىن بلوسسوم باۋىرلاس بىلاي دەدى: «مەن سول ٴتۇندى ماڭگىلىك بويى ۇمىتپايمىن!» اتا-انا، بالاڭىز ەحوبانىڭ باعىشتالعان ٵرى شومىلدىرۋ راسىمىنەن وتكەن قىزمەتشىسى بولعاندا، ٴسىزدىڭ دە قۋانىش پەن قاناعاتقا بولەنۋىڭىزگە تىلەكتەسپىز!
^ 9-ابزاس اتا-انالار بالالارىمەن كەلەسى پايدالى مالىمەتتەردى قاراستىرسا بولادى: «جاستاردىڭ ساۋالدارى. پايدالى كەڭەستەر» (حانزۋشا)، 2-توم، 304—310 بەتتەر؛ «ٴبىزدىڭ قاسيەتتى قىزمەتىمىز»، 2011 جىل، ٴساۋىر، 2-بەت، «ساۋالدار جاشىگى».
