جونگە سالۋ — ەحوبانىڭ سۇيىسپەنشىلىگىنىڭ دالەلى
«ەحوبا كىمدى جاقسى كورسە، سونى جونگە سالادى» (ەۆرەيلەرگە 12:6).
اندەر: 125، 117
1. كيەلى كىتاپتا جونگە سالۋ ٴجيى قالاي سيپاتتالادى؟
«جونگە سالۋ» دەگەن سوزدى ەستىگەندە ويىڭىزعا نە كەلەدى؟ كوپ ادام بىردەن جازالاۋ جايلى ويلايدى. ٴبىراق جونگە سالۋ تەك بۇنى عانا بىلدىرمەيدى. كيەلى كىتاپتا ول ٴبىلىم، دانالىق، سۇيىسپەنشىلىك پەن ٶمىر دەگەن سوزدەرمەن بايلانىستىرىلادى. سونداي-اق وندا جونگە سالىنىپ، تاربيەلەنگەنىمىز ٶزىمىز ٷشىن پايدالى ەكەنى ايتىلادى (ناقىل سوزدەر 1:2—7؛ 4:11—13). ويتكەنى قۇدايدىڭ جونگە سالعانى ونىڭ ٴبىزدى جاقسى كورەتىنىن جانە ماڭگىلىك ٶمىر سۇرگەنىمىزدى قالايتىنىن كورسەتەدى (ەۆرەيلەرگە 12:6). ەحوبا جونگە سالۋ ٷشىن كەيدە ٴبىزدى جازالاۋى مۇمكىن، ٴبىراق ونىڭ جازاسى ەشقاشان قاتىگەز نە زياندى بولمايدى. نەگىزىنەن «جونگە سالۋ» ٴسوزىنىڭ ەڭ باستى ماعىناسى ٴتالىم بەرۋمەن بايلانىستى. بۇل اتا-انانىڭ جاقسى كورەتىن بالاسىنا بەرەتىن ٴتالىم-تاربيەسىنە ۇقسايدى.
2، 3. جونگە سالۋ قالايشا ٴتالىم بەرۋدى دە، جازالاۋدى دا قامتۋى مۇمكىن؟ (ماقالانىڭ باسىنداعى سۋرەتتى قاراڭىز.)
2 مىناداي مىسالدى قاراستىرىپ كورەيىك. كىشكەنتاي داني ٷيدىڭ ىشىندە دوپپەن ويناپ جۇرەدى. وعان اناسى: «بالام، ۇيدە دوپپەن ويناۋعا بولمايتىنىن بىلەسىڭ عوي! بىردەڭەنى سىندىرىپ قوياسىڭ!»— دەيدى. ٴبىراق ول اناسىنىڭ ٴتىلىن الماي، ارى قاراي ويناي بەرەدى. ٴبىر كەزدە دوپ گۇل قۇمىراسىنا تيەدى. گۇل قۇمىراسى قۇلاپ، سىنىپ قالادى! دانيدى جونگە سالۋ ٷشىن اناسى نە ىستەدى؟ بالاسىنا ىستەگەن قىلىعىنىڭ نەگە دۇرىس ەمەس ەكەنىن ٴتۇسىندىرىپ، ٴتالىم بەردى. ول اتا-اناعا مويىنسۇنعانى وزىنە جاقسى ەكەنىن جانە ولاردىڭ ورناتقان ەرەجەلەرى قاجەت ٵرى قيىن ەمەس ەكەنىن تۇسىنسە ەكەن دەدى. وسىنى ساناسىنا ٴتۇيىپ الۋى ٷشىن اناسى ونى جازالاۋدى شەشىپ، دوبىن ۋاقىتشا الىپ قويدى. بۇل دانيگە ۇناعان جوق، ارينە. ٴبىراق وسىنىڭ ارقاسىندا ول اتا-اناسىنىڭ ٴتىلىن الماسا، سالدارىن تارتاتىنىن كوكەيىنە ساقتادى.
3 ماسىحشىلەر رەتىندە ٴبىز قۇداي وتباسىنىڭ ٴبىر مۇشەسىمىز (تىموتەگە 1-حات 3:15). اكەمىز ەحوبا نەنىڭ دۇرىس، نەنىڭ بۇرىس ەكەنىن شەشۋگە جانە مويىنسۇنباعان جاعدايدا ٴبىزدى جازالاۋعا قۇقىلى. ەگەر ارەكەتتەرىمىزدىڭ سالدارى جاعىمسىز بولىپ جاتسا، ەحوبانىڭ سۇيىسپەنشىلىكپەن جونگە سالۋى وعان مويىنسۇنۋدىڭ قانشالىقتى ماڭىزدى ەكەنىن ەستە ۇستاۋعا كومەكتەسەدى (عالاتتىقتارعا 6:7). قۇداي ٴبىزدى قاتتى جاقسى كورەدى جانە زارداپ شەكپەسە ەكەن دەيدى (پەتىردىڭ 1-حاتى 5:6، 7).
4. ا) ەحوبا ٴبىزدىڭ باسقالارعا قالاي ٴتالىم بەرگەنىمىزدى قالايدى؟ ٵ) بۇل ماقالادا ٴبىز نە قاراستىرامىز؟
4 ٴبىز بالانى نە كيەلى كىتاپتى زەرتتەپ جۇرگەن ادامدى قۇداي سوزىنە نەگىزدەپ جونگە سالعاندا، ولارعا ٴماسىحتىڭ ٸزباسارى بولۋعا كومەكتەسەمىز. ٴبىز كيەلى كىتاپتى قولدانىپ، زەرتتەۋشىلەرگە نەنىڭ دۇرىس ەكەنىن ۇيرەتەمىز جانە يسا «بۇيىرعانداردىڭ ٴبارىن» تۇسىنۋگە ٵرى ۇستانۋعا كومەكتەسەمىز (ماتاي 28:19، 20؛ تىموتەگە 2-حات 3:16). ەحوبا ولاردىڭ وسىنداي جولمەن ٴتالىم العانىن قالايدى. سوندا ولار دا باسقالارعا ٴماسىحتىڭ ٸزباسارى بولۋعا كومەكتەسە الاتىن بولادى (تيتكە 2:11—14 وقىڭىز). قازىر ماڭىزدى ٷش سۇراقتى قاراستىرايىق: 1) قالايشا قۇدايدىڭ جونگە سالۋى ونىڭ ٴبىزدى جاقسى كورەتىنىن دالەلدەيدى؟ 2) قۇداي جونگە سالعان ادامداردىڭ مىسالىنان قانداي ساباق الامىز؟ 3) بىرەۋدى جونگە سالعاندا قالاي ەحوبا مەن يساعا ەلىكتەي الامىز؟
قۇداي سۇيىسپەنشىلىكپەن جونگە سالادى
5. ەحوبانىڭ جونگە سالۋى ونىڭ ٴبىزدى جاقسى كورەتىنىن قالاي دالەلدەيدى؟
5 ەحوبا ٴبىزدى جاقسى كورگەندىكتەن تۇزەتەدى، ٴتالىم بەرەدى، ۇيرەتەدى. ٴبىزدىڭ وزىمەن جاقىن قارىم-قاتىناس ساقتاعانىمىزدى جانە ماڭگىلىك ٶمىر سۇرگەنىمىزدى قالايدى (جوحاننىڭ 1-حاتى 4:16). ەحوبا ٴبىزدى ەشقاشان قورلامايدى جانە ٶزىمىزدى تۇككە تۇرعىسىز سانايتىنداي سەزىم تۋعىزبايدى (ناقىل سوزدەر 12:18). كەرىسىنشە، ول بويىمىزداعى جاقسى قاسيەتتەرگە نازار اۋدارادى، سونداي-اق بىزگە تاڭداۋ جاساۋعا ەرىك بەرەدى. كيەلى كىتاپ، ادەبيەتتەر، اتا-اناڭىز نە اقساقالدار ارقىلى جونگە سالىنعاندا، بۇنى ەحوبانىڭ سۇيىسپەنشىلىگىنىڭ دالەلى دەپ بىلەسىز بە؟ ٶزىمىزدىڭ قاي جاعىنان ٴمۇلت كەتكەنىمىزدى ٵلى اڭعارماي تۇرىپ-اق، اقساقالدار جۇمساقتىقپەن، سۇيىسپەنشىلىكپەن تۇزەتۋگە تىرىسىپ جاتسا، بۇل ولاردىڭ ەحوبانىڭ سۇيىسپەنشىلىگىنە ەلىكتەپ جاتقانىن كورسەتەدى (عالاتتىقتارعا 6:1).
6. جونگە سالۋدىڭ ناتيجەسىندە ادام قاۋىمداعى مىندەتتەرىنەن ايىرىلىپ قالسا دا، قالاي بۇل ەحوبانىڭ سۇيىسپەنشىلىگىن كورسەتەدى؟
6 كەي جاعدايلاردا جونگە سالۋ كەڭەسپەن عانا شەكتەلمەيدى. قاۋىمدا بىرەۋ اۋىر كۇنا جاساسا، ول ەندى كەيبىر جاۋاپكەرشىلىكتەردى اتقارۋعا لايىقتى بولمايدى. ٴتىپتى وسىنداي جاعدايدا دا ەحوبانىڭ جونگە سالۋى ونىڭ سول ادامدى جاقسى كورەتىنىن دالەلدەيدى. مىسالى، ول كيەلى كىتاپتى زەرتتەۋگە كوبىرەك ۋاقىت ٴبولۋدىڭ، وي جۇگىرتىپ، دۇعا ەتۋدىڭ قانشالىقتى ماڭىزدى ەكەنىن ٴتۇسىنۋى مۇمكىن. وسى ىستەردى قولعا العانى وعان ەحوبامەن قارىم-قاتىناسىن نىعايتۋعا كومەكتەسەدى (ٴزابۇر 19:7). ۋاقىت وتە ول ايىرىلىپ قالعان مىندەتتەرىنە قايتا يە بولۋى مۇمكىن. ٴتىپتى بىرەۋ قاۋىمنان شىعارىلعان كۇندە دە، بۇل ەحوبانىڭ سۇيىسپەنشىلىگىن كورسەتەدى. ويتكەنى ەحوبا وسىلايشا قاۋىمدى جامان ىقپالدان قورعايدى (قورىنتتىقتارعا 1-حات 5:6، 7، 11). ونىڭ جونگە سالۋى قاشاندا ٵدىل بولعاندىقتان، بۇل قاۋىمنان شىعارىلعان ادامعا كۇناسىنىڭ قانشالىقتى اۋىر ەكەنىن تۇسىنۋگە كومەكتەسەدى. بۇل ونىڭ ٶز ىسىنە وكىنۋىنە تۇرتكى بولۋى مۇمكىن (ەلشىلەردىڭ ىستەرى 3:19).
ەحوبانىڭ جونگە سالۋى ٴبىز ٷشىن پايدالى
7. شەبنا دەگەن كىم جانە ول بويىندا قانداي جامان قاسيەتتى دامىتتى؟
7 جونگە سالۋدىڭ ماڭىزدىلىعىن ٴتۇسىنۋ ٷشىن ەحوبا تۇزەتكەن ەكى ادامنىڭ مىسالىن قاراستىرايىق. ٴبىرىنشىسى — ەزەكيا پاتشانىڭ تۇسىندا ٶمىر سۇرگەن شەبنا ەسىمدى يسرايلدىك كىسى. ال ەكىنشىسى — ٴبىزدىڭ كۇنىمىزدە ٶمىر ٴسۇرىپ جاتقان گرەم باۋىرلاسىمىز. شەبنا ەزەكيا پاتشانىڭ سارايىندا «ٷي باسقارۋشىسى» مىندەتىن اتقارعان. ونىڭ قولىندا اجەپتاۋىر بيلىك بولعان (يشايا 22:15). ٴبىراق ول كوكىرەكتەنىپ كەتىپ، ادامداردىڭ كوزىندە ماڭىزدى كورىنگىسى كەلگەن. ول ٴتىپتى وزىنە قىمبات مازار جاساعان ارى «سالتاناتتى كۇيمەلەرمەن» جۇرگەن (يشايا 22:16—18).
ەگەر ٴبىز كىشىپەيىل ٵرى كوزقاراسىمىزدى وزگەرتۋگە دايىن بولساق، قۇداي باتاسىن بەرەدى (8—10 ابزاستاردى قاراڭىز)
8. ەحوبا شەبنانى قالاي جونگە سالدى جانە ناتيجەسىندە نە بولدى؟
8 شەبنا اتاق-داڭققا بولەنۋدى كوكسەگەندىكتەن، قۇداي ونىڭ مىندەتىن الىپ قويدى دا، ەلياكىم دەگەن كىسىگە بەردى (يشايا 22:19—21). بۇل جاعداي اسسيريا پاتشاسى سەنناحيريم يەرۋساليمگە شابۋىلداماقشى بولعاندا ورىن الدى. كەيىنىرەك سەنناحيريم ياھۋديلەردى قورقىتىپ، ەزەكيا پاتشانى بەرىلۋگە كوندىرۋ ٷشىن ٶزىنىڭ بەدەلدى ادامدارى مەن قالىڭ اسكەرىن جىبەردى (پاتشالار 2-جازبا 18:17—25). سوندا ەزەكيا ولارمەن كەزدەسۋگە ەلياكىم مەن تاعى ەكى ادامدى جىبەردى. سول ەكى ادامنىڭ ٴبىرى شەبنا ەدى. ەندى ول حاتشىنىڭ مىندەتىن اتقاراتىن. وسىدان كورىنەتىندەي، شەبنا كىشىپەيىل بولۋدى ۇيرەنگەن، ارى بولعان جاعدايعا رەنجىپ، نارازىلىق بىلدىرمەگەن بولسا كەرەك. ول دارەجەسى تومەندەۋ قىزمەتتى اتقارۋعا دايىن بولعان. شىبنانىڭ جاعدايىنان ٴبىز ٷش ساباق الامىز.
9—11. ا) شەبنانىڭ جاعدايىنان قانداي ساباق الامىز؟ ٵ) ەحوبانىڭ شەبناعا قالاي قاراعانى جونىندە نە ويلايسىز؟
9 بىرىنشىدەن، شەبنانىڭ ٶز مىندەتىنەن ايىرىلىپ قالعانى «كوكىرەكتىك — كۇيرەۋدىڭ باسى» ەكەنىن دالەلدەيدى (ناقىل سوزدەر 16:18). قاۋىمدا ٴبىز جاۋاپتى مىندەتتەر اتقارۋىمىز مۇمكىن جانە بۇل ٷشىن باسقالار ٴبىزدى ماڭىزدى ساناي باستايتىن شىعار. سونداي كەزدە كىشىپەيىل بولىپ قالامىز با؟ بارلىق قابىلەتتەرىمىز بەن جاساپ جاتقان كەز كەلگەن يگى ٸسىمىز تەك ەحوبانىڭ ارقاسىندا ەكەنىن ەستە ۇستايمىز با؟ (قورىنتتىقتارعا 1-حات 4:7). ەلشى پاۋىل بىلاي دەپ ەسكەرتكەن: «اربىرىڭە مىنانى ايتامىن: وزدەرىڭ تۋرالى تيىستىسىنەن ارتىق ويلاماڭدار. قايتا، ەستى بولىڭدار» (ريمدىكتەرگە 12:3).
10 ەكىنشىدەن، شەبناعا قاتاڭ ەسكەرتۋ جاساعانىنا قاراعاندا، ەحوبا ونىڭ وزگەرە الاتىنىنا سەنگەن بولۋى مۇمكىن (ناقىل سوزدەر 3:11، 12). قاۋىمداعى جاۋاپتى مىندەتتەرىنەن ايىرىلىپ قالعان باۋىرلاستار وسىدان ساباق السا بولادى. اشۋلانىپ، رەنجۋدىڭ ورنىنا، ولار ارى قاراي دا ەحوباعا بار جاقسىلارىن بەرە الادى. ولار مۇنداي تۇزەتۋدى ەحوبانىڭ سۇيىسپەنشىلىگىنىڭ كورىنىسى دەپ قاراستىرسا بولادى. ەستەن شىعارمايىق، كوكتەگى اكەمىز كىشىپەيىل بولىپ قالعان ادامعا اقىرىندا ٶز باتاسىن توگەدى (پەتىردىڭ 1-حاتى 5:6، 7 وقىڭىز). ەحوبا ٴبىزدى سۇيىسپەنشىلىكپەن جونگە سالىپ، قالىپتاستىرا الۋى ٷشىن كىشىپەيىلدىلىك تانىتىپ، جۇمساق بالشىق ىسپەتتى بولۋىمىز قاجەت.
11 ۇشىنشىدەن، ەحوبانىڭ شەبناعا قالاي قاراعانىنان قۇندى ساباق الامىز. ەحوبانىڭ قالاي جونگە سالاتىنى ونىڭ كۇنانى جەك كورەتىنىن كورسەتەدى. ٴبىراق بۇدان ونىڭ كۇنا جاساعان ادامدى جاقسى كورەتىنىن دە كورەمىز. ەحوبا ادامداردىڭ بويىنان جاقسى قاسيەتتەر ىزدەيدى. اتا-انا نە اقساقال بولساڭىز، ەحوبانىڭ قالاي جونگە سالاتىنىنان ۇلگى الاسىز با؟ (ياھۋدا 22، 23).
12—14. ا) كەيبىر ادامدار ەحوبانىڭ جونگە سالۋىن قالاي قابىلدايدى؟ ٵ) ٴبىر ەر باۋىرلاسقا كوزقاراسىن تۇزەتۋگە قۇداي ٴسوزى قالاي كومەكتەستى جانە ناتيجەسىندە نە بولدى؟
12 وكىنىشكە قاراي، كەيبىر ادامدارعا جونگە سالىنۋدىڭ اۋىر تيەتىنى سونشا — قۇدايدان الىستاپ، قاۋىمنان كەتىپ جاتادى (ەۆرەيلەرگە 3:12، 13). بۇل ەندى ولارعا ەشكىم كومەكتەسە المايدى دەگەندى بىلدىرە مە؟ جوق، ارينە! مىسالى، گرەم باۋىرلاستى الايىق. ول قاۋىمنان شىعارىلىپ، كەيىن قايتا قابىلدانعان. الايدا ول كەيىننەن ۋاعىزعا دا، قاۋىمعا دا بارماي قويادى. ٴبىر اقساقال ونىمەن دوستاسۋعا تىرىسادى. اقىرىندا، گرەم ودان وزىمەن كيەلى كىتاپتى زەرتتەۋ ساباعىن ٶتۋدى سۇرايدى.
13 سول اقساقال بىلاي دەدى: «گرەمنىڭ وركوكىرەكتىگى بار ەدى. ول ٶزىنىڭ قاۋىمنان شىعارىلعانىنا قاتىسى بار اقساقالداردى سىناپ-مىنەپ، نارازىلىعىن بىلدىرەتىن. سودان ٴبىز بىرنەشە زەرتتەۋ ساباعىندا وركوكىرەكتىك پەن ونىڭ سالدارى جايلى تارماقتاردى قاراستىردىق. گرەم قۇداي ٴسوزىنىڭ ايناسىنان ٶزىنىڭ قانداي ەكەنىن انىق كورە باستاعاندا، كوڭىلى ٴتۇسىپ كەتتى. بۇدان كەيىن تاڭعالدىرارلىق جايت بولدى! ول وركوكىرەكتىك دەگەن «بورەنە» كوزىن تۇمشالاپ تاستاعانىن جانە ٶزىنىڭ كوزقاراسىن وزگەرتۋ كەرەك ەكەنىن تۇسىنگەن سوڭ، جاقسى جاققا قاراي تەز وزگەرە باستادى. ول قاۋىم كەزدەسۋلەرىنە جۇيەلى تۇردە بارىپ، قۇداي ٴسوزىن تىڭعىلىقتى زەرتتەيتىن بولدى جانە كۇن سايىن دۇعا ەتۋدى داعدىعا اينالدىردى. سونداي-اق گرەم وتاعاسى رەتىندە رۋحاني ىستەردى قايتادان قولعا الىپ، ايەلى مەن بالالارىن زور قۋانىشقا بولەدى» (لۇقا 6:41، 42؛ جاقىپ 1:23—25).
14 بۇل اقساقال بىلاي دەپ قوستى: «بىردە گرەمنىڭ ايتقان ٴسوزى جۇرەگىمدى تولقىتىپ جىبەردى. «مەن شىندىقتى كوپ جىلدان بەرى بىلەمىن. ٴتىپتى ٸزاشار بولىپ تا قىزمەت ەتتىم. ٴبىراق ەندى عانا ەحوبانى جاقسى كورەمىن دەپ شىنداپ ايتا الامىن»،— دەدى ول». كوپ ۇزاماي گرەم قاۋىمدا ميكروفونمەن قىزمەت كورسەتۋگە تاعايىندالدى. ول بۇل مىندەتتى قۋانا قابىلدادى. اقساقال تاعى بىلاي دەدى: «ونىڭ جاعدايىنان تۇسىنگەنىم، ادام قۇدايدىڭ الدىندا كىشىرەيىپ، جونگە سالۋدى قابىلداسا، باتا دەگەن توگىلەدى ەكەن!»
جونگە سالعاندا قۇداي مەن ماسىحكە ەلىكتەيىك
15. جونگە سالۋدىڭ ناتيجەسىن كورۋ ٷشىن نە ىستەۋىمىز كەرەك؟
15 جاقسى تالىمگەر بولۋ ٷشىن، الدىمەن ٶزىمىز جاقسىلاپ ۇيرەنىپ الۋىمىز قاجەت (تىموتەگە 1-حات 4:15، 16). ەگەر باسقالاردى جونگە سالۋ ٷشىن ەحوبا ٴسىزدى قولدانىپ جاتقان بولسا، ٶزىڭىزدىڭ كىشىپەيىل بولىپ، ومىرىڭىزدە ەحوبانىڭ باسشىلىعىنا جۇگىنگەنىڭىز ماڭىزدى. كىشىپەيىل ەكەنىڭىزدى كورگەندە، وزگەلەرگە ٴسىزدى قۇرمەتتەۋ جانە بەرگەن كەڭەسىڭىز بەن ەسكەرتۋىڭىزدى قابىلداۋ الدەقايدا جەڭىل بولادى. وسى جاعىنان يسانىڭ ۇلگىسىنەن ۇيرەنە الامىز.
16. ٴتيىمدى تۇردە جونگە سالۋ مەن ٴتالىم بەرۋگە قاتىستى يسادان نە نارسەگە ۇيرەنەمىز؟
16 يسا ٵرقاشان، ٴتىپتى وتە قيىن بولعان كەزدەردە دە، اكەسىنە مويىنسۇنعان (ماتاي 26:39). ول ادامدارعا تالىمدەرى مەن دانالىعى ەحوبادان ەكەنىن ايتىپ وتىرعان (جوحان 5:19، 30). كىشىپەيىل دە مويىنسۇنعىش بولعانى يساعا جاناشىر ۇستاز بولۋعا كومەكتەسكەن. اقجۇرەك ادامدار ونىڭ قاسىندا جۇرۋگە قۇمار ەدى (لۇقا 4:22 وقىڭىز). يسانىڭ مەيىرىممەن ايتقان سوزدەرى ۇنجىرعاسى تۇسكەن، ٵلسىز ادامداردىڭ بويىنا جىگەر قۇيدى (ماتاي 12:20). ونىڭ ەلشىلەرى ارالارىندا كىم ۇلى ەكەنى جايلى داۋلاسقاندا، يسا اشۋلانۋعا سەبەپ بولسا دا، ولاردى جۇمساقتىقپەن، سۇيىسپەنشىلىكپەن تۇزەتتى (مارقا 9:33—37؛ لۇقا 22:24—27).
17. قاۋىمدى جاقسى قامقورلاۋ ٷشىن اقساقالدارعا قانداي قاسيەتتەر قاجەت؟
17 اقساقالدار كيەلى كىتاپ پرينسيپتەرىنە نەگىزدەپ جونگە سالعان كەزدە، ٵردايىم ماسىحكە ەلىكتەۋلەرى كەرەك. وسىلايشا ولار قۇداي مەن ونىڭ ۇلىنىڭ باسشىلىعىمەن جۇرگىسى كەلەتىنىن كورسەتەدى. ەلشى پەتىر بىلاي دەپ جازعان: «باقىلاۋشىلار رەتىندە وزدەرىڭە تاپسىرىلعان قۇدايدىڭ وتارىن ىقتيارسىز ەمەس، شىن كوڭىلمەن، قانداي دا ٴبىر پايدا كوزدەپ ەمەس، بار ىنتا-جىگەرمەن باعىڭدار؛ سونداي-اق قۇدايدىڭ مەنشىگىنە وكتەمدىك ەتپەي، قايتا، وتارعا ۇلگى-ونەگە بولىڭدار!» (پەتىردىڭ 1-حاتى 5:2—4). اقساقالداردىڭ قۇداي مەن ماسىحكە قۋانا مويىنسۇنعاندارى وزدەرىنە دە، قامقورلىعىندا جۇرگەندەرگە دە پايدالى (يشايا 32:1، 2، 17، 18).
18. ا) ەحوبا اتا-انالاردان نەنى تالاپ ەتەدى؟ ٵ) ەحوبا اتا-انالارعا قالاي كومەكتەسەدى؟
18 وتباسىندا جونگە سالۋ مەن ٴتالىم بەرۋ جايلى نە دەۋگە بولادى؟ ەحوبا وتاعالارعا: «بالالارىڭدى ىزالاندىرماڭدار، كەرىسىنشە، ەحوبا ايتقانداي تاربيەلەپ، ونىڭ اقىل-كەڭەسىن بەرىپ وسىرىڭدەر»،— دەگەن (ەفەستىكتەرگە 6:4). تاربيەلەۋ مەن جونگە سالۋ قانشالىقتى ماڭىزدى؟ ناقىل سوزدەر 19:18 دە مىناداي سوزدەر جازىلعان: «ٷمىت باردا جونگە سال بالاڭدى، بولما ونىڭ ولىمىنە جاۋاپتى». ەحوبا اتا-انالارعا بالانى جونگە سالۋ جاۋاپكەرشىلىگىن جۇكتەگەن. ولار وسى مىندەتتەرىن اتقارماسا، قۇداي الدىندا جاۋاپ بەرەدى! (سامۋيلدىڭ 1-جازباسى 3:12—14). ٴبىراق اتا-انالار دۇعا ەتىپ كومەك سۇراعاندا جانە قۇداي ٴسوزى مەن كيەلى رۋح جەتەلەيتىنىنە سەنىم ارتقاندا، ەحوبا ولارعا قاجەتتى دانالىق پەن كۇش بەرەدى (جاقىپ 1:5 وقىڭىز).
ماڭگىلىك بويى تىنىشتىقتا ٶمىر ٴسۇرۋدى ۇيرەنۋ
19، 20. ا) قۇدايدىڭ جونگە سالۋىن قابىلداساق، قانداي باتالارعا كەنەلەمىز؟ ٵ) كەلەسى ماقالادا نە قاراستىرامىز؟
19 ٶزىمىز قۇدايدىڭ تۇزەتۋىن قابىلداساق جانە وزگەلەردى جونگە سالعاندا ەحوبا مەن يساعا ەلىكتەيتىن بولساق، كوپتەگەن باتالارعا كەنەلەمىز! وتباسىلارىمىز بەن قاۋىمدارىمىزدا تىنىشتىق بولادى. ٵربىر ادام ٶزىنىڭ سۇيىكتى ەكەنىن، باعالى ارى قاۋىپسىزدىكتە ەكەنىن سەزىنەدى. بۇل — بولاشاقتا بولاتىن تىنىشتىق پەن باقىتتى ٶمىردىڭ ۇشقىنى عانا (ٴزابۇر 72:7). ەحوبانىڭ ٴتالىم-تاربيەسى ٴبىزدى بەيبىت تە بىرلىگى جاراسقان وتباسى بولىپ ماڭگى ٶمىر سۇرۋگە دايىنداپ جاتىر. سول كەزدە ەحوبا ٴبىزدىڭ اكەمىز بولادى (يشايا 11:9 وقىڭىز). وسىنى ەستە تۇتساق، جونگە سالۋدىڭ شىن مانىندە نە ەكەنىن تۇسىنەمىز. بۇل — ەحوبانىڭ بىزگە دەگەن سۇيىسپەنشىلىگىن پاش ەتەتىن كەرەمەت شارا.
20 كەلەسى ماقالادا ٴبىز وتباسى مەن قاۋىمداعى جونگە سالۋ تۋرالى كوبىرەك بىلەتىن بولامىز. وندا ٶزىمىزدى قالاي تۇزەتە الاتىنىمىز جايلى دا ٴسوز قوزعالادى. سونداي-اق جونگە سالۋدان دا اۋىر تيەتىن جاعدايدان قالاي اۋلاق بولا الاتىنىمىزدى قاراستىرامىز.
