شومىلدىرۋ راسىمىنەن ٶتۋ — ماسىحشىلەرگە قويىلاتىن تالاپ
«قازىر سەندەردى... قۇتقارىپ جاتقان... شومىلدىرۋ ٴراسىمى» (پەتىردىڭ 1-حاتى 3:21).
اندەر: 7، 56
1، 2. ا) بالالارى شومىلدىرۋ راسىمىنەن وتكىسى كەلگەندە، كەيبىر اتا-انالار نە سەزىنەدى؟ ٵ) نەگە شومىلدىرۋ راسىمىنەن وتۋشىلەردەن ەحوباعا باعىشتالدىڭىز با دەپ سۇرايدى؟ (ماقالانىڭ باسىنداعى سۋرەتتى قاراڭىز.)
اتا-اناسى قىزدارى ٴمارياعا قارادى. ول شومىلدىرۋ راسىمىنەن وتەيىن دەپ جاتقاندارمەن بىرگە ورنىنان تۇردى. ساحناداعى باۋىرلاس ەكى سۇراق قويدى. ٴماريا قاتتى داۋىسپەن ناقتى جاۋاپ بەردى. وسىدان كەيىن ول شومىلدىرۋ راسىمىنەن ٶتتى.
2 ٴماريانىڭ ەحوباعا ٶمىرىن باعىشتاپ، شومىلدىرۋ راسىمىنەن وتكەنى ٷشىن اتا-اناسىنىڭ كەۋدەسىن قۋانىش كەرنەدى. ٴبىراق بۇعان دەيىن ٴماريانىڭ اناسى كىشكەنە ۋايىمداعان ەدى. «قىزىما شومىلدىرۋ راسىمىنەن وتۋگە تىم ەرتە ەمەس پە ەكەن؟ ول ەحوباعا باعىشتالۋدىڭ قانشالىقتى جاۋاپتى قادام ەكەنىن جاقسى تۇسىنە مە؟ الدە ٴسال كۇتە تۇرعانى دۇرىس پا؟»— دەپ ويلاندى. بالالارى شومىلدىرۋ راسىمىنەن وتكىسى كەلگەندە، كوپ قامقور اتا-انالار وسىلاي ۋايىمداي باستايدى (ۋاعىزداۋشى 5:5). ويتكەنى ەحوباعا باعىشتالىپ، شومىلدىرۋ راسىمىنەن ٶتۋ — ادامنىڭ ومىردە قابىلدايتىن ەڭ ماڭىزدى شەشىمى. (« ٴسىز ەحوباعا باعىشتالدىڭىز با؟» دەگەن قورشاۋدى قاراڭىز.)
3، 4. ا) شومىلدىرۋ راسىمىنەن وتۋدىڭ اسا ماڭىزدى ەكەنىن پەتىر قالاي كورسەتتى؟ ٵ) نەگە پەتىر شومىلدىرۋ راسىمىنەن ٶتۋدى نۇحتىڭ كەمە سوعۋىمەن سالىستىرعان؟
3 ەلشى پەتىر شومىلدىرۋ راسىمىنەن ٶتۋدى نۇحتىڭ كەمە سوعۋىمەن سالىستىرعان. ول بىلاي دەگەن: «بۇل جايت — قازىر سەندەردى... قۇتقارىپ جاتقان نارسەنىڭ، ياعني شومىلدىرۋ راسىمىنىڭ بەلگىسى» (پەتىردىڭ 1-حاتى 3:20، 21 وقىڭىز). كەمە نۇحتىڭ قۇداي ەركىن ورىنداۋدى شىن جۇرەكتەن قالايتىنىن وزگەلەرگە دالەلدەپ تۇردى. نۇح ەحوبانىڭ تاپسىرعان ٸسىن ادال ورىندادى. بەرىك سەنىمى ٷشىن ەحوبا ونىڭ ٶزىن جانە وتباسىن توپان سۋدان امان الىپ قالدى. سوندا پەتىردىڭ ايتقان ٴسوزىنىڭ ٴمانى نەدە؟
4 ادامدار كەمەگە قاراپ، نۇحتىڭ قۇدايعا سەنەتىنىن انىق كوردى. سول سياقتى، وزگەلەر بىرەۋدىڭ شومىلدىرۋ راسىمىنەن وتكەلى جاتقانىن كورگەندە، ول يسانىڭ تولەم قۇرباندىعىنا جانە ونىڭ قايتا تىرىلگەنىنە سەنگەندىكتەن ٶمىرىن قۇدايعا باعىشتاعانىن تۇسىنەدى. نۇح ىسپەتتى، شومىلدىرۋ راسىمىنەن وتكەندەر قۇدايعا مويىنسۇنادى جانە ونىڭ تاپسىرعان ٸسىن ورىندايدى. نۇحتى توپان سۋ كەزىندە قۇتقارعانىنداي، ەحوبا زۇلىم دۇنيە جويىلعاندا شومىلدىرۋ راسىمىنەن وتكەن ادال قىزمەتشىلەرىن امان ساقتاپ قالادى (مارقا 13:10؛ ايان 7:9، 10). دەمەك، ەحوباعا ٶمىرىمىزدى باعىشتاپ، شومىلدىرۋ راسىمىنەن ٶتۋ اسا ماڭىزدى. بۇنى كەيىنگە ىسىرا بەرەتىن بولساق، ماڭگى ٶمىر ٴسۇرۋ مۇمكىندىگىنەن ايىرىلىپ قالۋىمىز ىقتيمال.
5. بۇل ماقالادا ٴبىز نە قاراستىرامىز؟
5 ٴبىز شومىلدىرۋ راسىمىنەن ٶتۋدىڭ قانشالىقتى ماڭىزدى ەكەنىن بىلدىك. ەندى كەلەسى ٷش سۇراقتىڭ جاۋابىن قاراستىرايىق: كيەلى كىتاپتا شومىلدىرۋ ٴراسىمى جايلى نە دەلىنگەن؟ شومىلدىرۋ راسىمىنەن وتپەس بۇرىن ادام قانداي قادامدار جاساۋ كەرەك؟ كيەلى كىتاپتى زەرتتەپ جۇرگەندەرگە نە بالالارىمىزعا ٴتالىم بەرگەندە، نەگە شومىلدىرۋ راسىمىنىڭ ماڭىزدىلىعىن ۇنەمى ەستە ۇستاۋىمىز قاجەت؟
كيەلى كىتاپ شومىلدىرۋ ٴراسىمى جايلى نە ۇيرەتەدى؟
6، 7. ا) جاقيا جاساعان شومىلدىرۋ ٴراسىمى نەنى بىلدىرگەن؟ ٵ) كىمنىڭ شومىلدىرۋ راسىمىنەن وتكەنى بارىنىكىنەن ەرەكشە بولدى جانە نەگە؟
6 كيەلى كىتاپتا شومىلدىرۋ ٴراسىمىن جاساعانى جايلى ايتىلعان العاشقى ادام — جاقيا (ماتاي 3:1—6). نەگە ادامدار وعان كەلىپ شومىلدىرۋ راسىمىنەن وتكەن؟ ويتكەنى ولار مۇسا زاڭىن بۇزعاندارىن مويىنداپ، كۇنالارى ٷشىن قاتتى وكىنەتىندەرىن كورسەتكىسى كەلگەن. ٴبىراق جاقيا جاساعان ەڭ ماڭىزدى شومىلدىرۋ ٴراسىمى بۇدان مۇلدەم ەرەكشە ەدى. ول قۇدايدىڭ كەمەلدى ۇلى يسانى شومىلدىرۋ راسىمىنەن وتكىزۋ مارتەبەسىنە يە بولدى (ماتاي 3:13—17). ٴبىراق يسا ەشقاشان كۇنا جاساماعاندىقتان، وعان وكىنۋدىڭ ەش قاجەتى جوق ەدى (پەتىردىڭ 1-حاتى 2:22). وندا ول نەگە شومىلدىرۋ راسىمىنەن ٶتتى؟ ٶمىرىن قۇدايدىڭ ەركىن ورىنداۋعا ارنايتىنىن كورسەتۋ ٷشىن (ەۆرەيلەرگە 10:7).
7 يسا ۋاعىزداۋدى باستاعاننان كەيىن، شاكىرتتەرى ادامداردى شومىلدىرۋ راسىمىنەن وتكىزە باستادى (جوحان 3:22؛ 4:1، 2). بۇل ادامدار دا شومىلدىرۋ راسىمىنەن مۇسا زاڭىنا قارسى كۇنا جاساعانىنا وكىنگەندىكتەن وتكەن. ٴبىراق يسا قايتىس بولىپ، قايتا تىرىلگەننەن كەيىن، ونىڭ شاكىرتى بولعىسى كەلەتىندەر باسقا سەبەپپەن شومىلدىرۋ راسىمىنەن وتەتىن بولدى.
8. ا) قايتا تىرىلگەننەن كەيىن يسا قانداي بۇيرىق بەردى؟ ٵ) نەلىكتەن ماسىحشىلەرگە شومىلدىرۋ راسىمىنەن ٶتۋ قاجەت؟
8 ب.ز. 33-جىلى، قايتا تىرىلگەننەن كەيىن كوپ ۇزاماي يسا 500 دەن اسا ادامعا سويلەگەن. ولاردىڭ ىشىندە ەرلەر مەن ايەلدەر، مۇمكىن بالالار دا بولعان. يسا مىنا سوزدەرىن سول كەزدە ايتقان شىعار: «بارىڭدار دا، بارلىق حالىقتاردان شاكىرتتەر دايىنداپ، ولاردى اكەنىڭ، ۇلدىڭ جانە كيەلى رۋحتىڭ اتىنان شومىلدىرۋ راسىمىنەن وتكىزىڭدەر، ٵرى مەن سەندەرگە بۇيىرعانداردىڭ ٴبارىن ۇستانۋدى ۇيرەتىڭدەر» (ماتاي 28:19، 20؛ قورىنتتىقتارعا 1-حات 15:6). يسا ٶزىنىڭ ٸزباسارلارىنا شاكىرتتەر دايىنداۋدى بۇيىرعان. ونىڭ شاكىرتى بولۋدى، ياكي «مويىنتۇرىعىن» الىپ ٴجۇرۋدى قالايتىن ادام شومىلدىرۋ راسىمىنەن ٶتۋ كەرەك (ماتاي 11:29، 30). ادام قۇدايعا ۇنامدى جولمەن قىزمەت ەتكىسى كەلسە، قۇداي ٶزىنىڭ ەركىن يسا ارقىلى جۇزەگە اسىراتىنىن مويىنداۋ قاجەت. سودان كەيىن ول قۇدايدىڭ ماقۇلداۋىمەن شومىلدىرۋ راسىمىنەن وتە الادى. كيەلى كىتاپتا يسانىڭ ەرتەدەگى شاكىرتتەرى بۇل راسىمنىڭ اسا ماڭىزدى ەكەنىن تۇسىنگەنىنە ايعاق كوپ. ولار شومىلدىرۋ راسىمىنەن ٶتۋدى قويا تۇرۋ كەرەك دەپ ويلاپ، كەيىنگە قالدىرماعان (ەلشىلەردىڭ ىستەرى 2:41؛ 9:18؛ 16:14، 15، 32، 33).
شومىلدىرۋ راسىمىنەن ٶتۋدى كەيىنگە قالدىرماڭىز
9، 10. ەفيوپيالىق كىسى مەن ساۋلدىڭ وقيعاسىنان نە نارسەگە ۇيرەنەمىز؟
9 ەلشىلەردىڭ ىستەرى 8:35، 36 وقىڭىز. بىردە ياھۋدي ٴدىنىن قابىلداعان ەفيوپيالىق ٴبىر كىسى يەرۋساليمدەگى عيباداتحانادان شىعىپ، ۇيىنە قايتىپ كەلە جاتادى. ەحوبانىڭ پەرىشتەسى بۇل كىسىگە ٴفىلىپتى جىبەرىپ، ول وعان «يسا تۋرالى ىزگى حاباردى ۋاعىزدايدى». سوندا ەفيوپيالىق كىسى نە ىستەدى؟ ول يسانى يە دەپ مويىنداۋدىڭ قانشالىقتى ماڭىزدى ەكەنىن ٴتۇسىندى. ەحوبانىڭ ماسىحشىلەرگە قويعان تالاپتارىن ورىنداعىسى كەلگەن ول ەش كىدىرمەستەن شومىلدىرۋ راسىمىنەن ٶتتى.
10 ەندى ساۋل دەگەن ياھۋديلىك كىسىنىڭ وقيعاسىن الايىق. نەگىزىنەن ياھۋدي حالقى تۇگەلىمەن قۇدايعا باعىشتالعان حالىق بولاتىن. ٴبىراق ولار مويىنسۇنباۋشىلىق تانىتقاندىقتان، ەحوبا ولاردان باس تارتقان. ساۋل ياھۋديلەر ٵلى دە قۇدايعا دۇرىس جولمەن عيبادات ەتىپ ٴجۇر دەپ ويلاپ، يسانىڭ ٸزباسارلارىن قۋدالاعان. ول كەزدە ساۋل يسانى ٶلدى دەپ جۇرگەن ەدى. ٴبىراق قايتا تىرىلگەن يسا ٴبىر كۇنى كوكتەن تىكەلەي ساۋلدىڭ وزىنە سويلەدى. سوندا ساۋل نە ىستەدى؟ ول ٴماسىحشى انانيدىڭ كومەگىن قۋانا قابىلدادى. كيەلى كىتاپتا: «سوسىن ول شومىلدىرۋ راسىمىنەن ٶتتى»،— دەلىنگەن (ەلشىلەردىڭ ىستەرى 9:17، 18؛ عالاتتىقتارعا 1:14). كەيىنىرەك ساۋل ەلشى پاۋىل دەگەن اتپەن تانىلدى. بايقاساق، ول قۇداي ٶزىنىڭ ەركىن يسا ارقىلى جۇزەگە اسىراتىنىن تۇسىنگەندە، ەش كىدىرمەستەن شومىلدىرۋ راسىمىنەن وتكەن (ەلشىلەردىڭ ىستەرى 22:12—16 وقىڭىز).
11. ا) بۇگىندە كيەلى كىتاپتى زەرتتەۋشىلەردى شومىلدىرۋ راسىمىنەن وتۋگە نە تالپىندىرادى؟ ٵ) بىرەۋ شومىلدىرۋ راسىمىنەن وتكەندە ٴبىز قانداي سەزىمگە بولەنەمىز؟
11 بۇگىندە دە قارت نە جاس دەمەي، كوپتەگەن كيەلى كىتاپتى زەرتتەۋشىلەر وسىلاي ەتۋدە. ولار كيەلى كىتاپتا ايتىلعانداردى جاقسى كورىپ، سەنگەندىكتەن، ومىرلەرىن ەحوباعا باعىشتاپ، شومىلدىرۋ راسىمىنەن وتۋگە اسىق. كونگرەستەردە ايتىلاتىن شومىلدىرۋ راسىمىنەن وتۋشىلەرگە ارنالعان بايانداما — ەرەكشە تولعاندىرارلىق ٴسات. كيەلى كىتاپتى زەرتتەۋشىلەر شىندىقتى قابىلداپ، شومىلدىرۋ راسىمىنەن ٶتىپ جاتسا، ەحوبا كۋاگەرلەرى قاتتى قۋانادى. ال بالالارى ٶتىپ جاتقاندا اتا-انالار ٴماز-مايرام بولادى. 2017 قىزمەت جىلىندا 284 000 نان اسا ادام شومىلدىرۋ راسىمىنەن ٶتىپ، ومىرلەرىن ەحوباعا باعىشتاعاندارىن پاش ەتتى (ەلشىلەردىڭ ىستەرى 13:48). وسىدان ولاردىڭ شومىلدىرۋ راسىمىنەن ٶتۋ ماسىحشىلەر ٷشىن ماڭىزدى تالاپ ەكەنىن تۇسىنەتىندەرى كورىنەدى. ٴبىراق شومىلدىرۋ راسىمىنەن وتپەس بۇرىن ولار قانداي قادامدار جاساعان؟
12. كيەلى كىتاپتى زەرتتەۋشىلەر شومىلدىرۋ راسىمىنەن وتپەس بۇرىن قانداي قادامدار جاساۋ كەرەك؟
12 كيەلى كىتاپتى زەرتتەۋشىلەر شومىلدىرۋ راسىمىنەن وتپەس بۇرىن، قۇداي تۋرالى شىندىقتى، ونىڭ جەر مەن ادامدارعا قاتىستى نيەتىن جانە ادامزاتتى قۇتقارۋ ٷشىن نە ىستەگەنىن ٴبىلۋ كەرەك (تىموتەگە 1-حات 2:3—6). سوسىن ولارعا سەنىم دامىتۋ قاجەت. سەنىم ولاردى قۇدايدىڭ زاڭدارىنا مويىنسۇنۋعا جانە قۇداي جەك كورەتىن نارسەلەردى بۇدان بىلاي ىستەمەۋگە تالپىندىرادى (ەلشىلەردىڭ ىستەرى 3:19). بۇنىڭ ماڭىزى زور، ويتكەنى ەحوبا ٶزى جەك كورەتىن نارسەلەردى ىستەي بەرەتىن ادامداردىڭ باعىشتالۋىن قابىلدامايدى (قورىنتتىقتارعا 1-حات 6:9، 10). قاجەتتى قادامدار بۇل عانا ەمەس. ٶمىرىن ەحوباعا باعىشتاعىسى كەلەتىن ادامدار قاۋىم كەزدەسۋلەرىنە بارىپ تۇرۋى جانە ىزگى حاباردى ۇنەمى ۋاعىزداپ، وزگەلەرگە ٴتالىم بەرۋى كەرەك. بۇل — ٴماسىحتىڭ سوڭىنان ەرگىسى كەلەتىن كەز كەلگەن ادامعا قويىلاتىن تالاپ (ەلشىلەردىڭ ىستەرى 1:8). كيەلى كىتاپتى زەرتتەۋشى الدىمەن وسىنىڭ ٴبارىن ىستەۋى قاجەت. سودان كەيىن ول جەكە دۇعادا ەحوباعا ٶمىرىن باعىشتاپ، شومىلدىرۋ راسىمىنەن وتە الادى.
كيەلى كىتاپتى زەرتتەۋشىلەر قويۋ كەرەك ماقسات
ادامدارعا ٴتالىم بەرگەندە، شومىلدىرۋ راسىمىنەن ٶتۋدىڭ ماڭىزدىلىعىن تۇسىندىرۋدىڭ مۇمكىندىگىن ىزدەيسىز بە؟ (13-ابزاستى قاراڭىز)
13. وزگەلەرگە ٴتالىم بەرگەندە، ولاردىڭ شىنايى ٴماسىحشى بولۋ ٷشىن شومىلدىرۋ راسىمىنەن وتۋگە ٴتيىس ەكەنىن نەگە ەستە ۇستاۋىمىز قاجەت؟
13 بالالارىمىزعا جانە باسقا دا كيەلى كىتاپتى زەرتتەۋشىلەرگە وسى ماڭىزدى قادامداردى جاساۋعا كومەكتەسكەندە، مىنانى ەستە ۇستايىق: يسانىڭ شىنايى ٸزباسارى بولعىسى كەلەتىن ادام شومىلدىرۋ راسىمىنەن ٶتۋى ٴتيىس. وسىنى ەستە تۇتساق، وڭتايلى ساتتەر تۋعاندا، باعىشتالۋ مەن شومىلدىرۋ ٴراسىمىنىڭ ماڭىزدىلىعى جايلى ايتۋدان تارتىنبايمىز. ٴبىز بالالارىمىزدىڭ جانە كيەلى كىتاپتى زەرتتەۋشىلەردىڭ رۋحاني ٶسىپ، شومىلدىرۋ راسىمىنەن وتكەنىن قالايمىز عوي!
14. نەگە ٴبىز ەشكىمگە شومىلدىرۋ راسىمىنەن ٶت دەپ قىسىم جاسامايمىز؟
14 ارينە، ەشكىم دە بالانى نە كيەلى كىتاپتى زەرتتەۋشىنى شومىلدىرۋ راسىمىنەن وتۋگە قىساپ، ماجبۇرلەمەۋ كەرەك. ويتكەنى ەحوبا ەشقايسىسىمىزدى وزىنە قىزمەت ەتۋگە ماجبۇرلەمەيدى (جوحاننىڭ 1-حاتى 4:8). باسقالارعا ٴتالىم بەرگەندە، ولارعا ەحوبامەن جەكە قارىم-قاتىناس دامىتۋدىڭ قانشالىقتى ماڭىزدى ەكەنىن تۇسىنۋگە كومەكتەسۋىمىز قاجەت. ەگەر كيەلى كىتاپتى زەرتتەۋشى قۇداي جايلى شىندىقتى بىلگەنىنە شىن جۇرەكتەن ريزا بولسا، ٵرى شىنايى ماسىحشىلەرگە قويىلاتىن تالاپتاردىڭ ٴبارىن ورىنداعىسى كەلسە، شومىلدىرۋ راسىمىنەن وتۋگە دەگەن ىقىلاسى ٶزى-اق پايدا بولادى (قورىنتتىقتارعا 2-حات 5:14، 15).
15، 16. ا) شومىلدىرۋ راسىمىنەن ٶتۋ ٷشىن ادامنىڭ بەلگىلى ٴبىر جاستا بولۋى شارت پا؟ ٴتۇسىندىرىڭىز. ٵ) باسقا دىندە شومىلدىرۋ راسىمىنەن ٶتىپ قويسا دا، كيەلى كىتاپتى زەرتتەۋشى نەگە ەحوبا كۋاگەرى رەتىندە شومىلدىرۋ راسىمىنەن ٶتۋى ٴتيىس؟
15 شومىلدىرۋ راسىمىنەن ٶتۋ ٷشىن بەلگىلى ٴبىر جاستا بولۋ شارت ەمەس. اركىم ٵرتۇرلى بولعاندىقتان، كەيبىر زەرتتەۋشىلەر وزگەلەرىنەن تەزىرەك رۋحاني وسەدى. كوبىسى جاس كەزىندە شومىلدىرۋ راسىمىنەن ٶتىپ، ەسەيگەندە دە ەحوباعا ادال بولىپ قالادى. ال كەيبىرى ەرەسەك شاعىندا كيەلى كىتاپتاعى شىندىقتى ٴبىلىپ، شومىلدىرۋ راسىمىنەن وتەدى. ولاردىڭ اراسىندا ٴتىپتى 100 جاستان اسقاندارى دا كەزدەسەدى!
16 كيەلى كىتاپتى زەرتتەپ جۇرگەن ٴبىر ايەل وسىعان دەيىن بىرنەشە دىندە شومىلدىرۋ راسىمىنەن وتكەن. سول سەبەپتى ول وزىمەن زەرتتەپ جۇرگەن باۋىرلاستان قايتادان شومىلدىرۋ راسىمىنەن وتۋدىڭ قاجەتى بار-جوعىن سۇرايدى. بۇل سۇراعىنا جاۋاپ بەرۋ ٷشىن باۋىرلاس بىرنەشە جازبا ورنىن كورسەتەدى. كيەلى كىتاپتاعى تالاپتاردى تۇسىنگەن سوڭ، الگى ايەل، 80 گە تاياپ قالسا دا، شومىلدىرۋ راسىمىنەن وتەدى. وسى وقيعادان نە بىلەمىز؟ ەحوبانىڭ ەركى جايلى شىندىقتى بىلسەك قانا، ول ٴبىزدىڭ شومىلدىرۋ ٴراسىمىمىزدى قابىل الادى. سوندىقتان باسقا دىندە شومىلدىرۋ راسىمىنەن ٶتىپ قويعان كۇندە دە، ادام ەحوبا كۋاگەرى رەتىندە شومىلدىرۋ راسىمىنەن ٶتۋى ٴتيىس (ەلشىلەردىڭ ىستەرى 19:3—5 وقىڭىز).
17. شومىلدىرۋ راسىمىنەن وتەتىن كۇنى ادام نە جايلى ويلانۋ كەرەك؟
17 شومىلدىرۋ راسىمىنەن وتەتىن كۇن — باقىتقا تولى كۇن. سونداي-اق بۇل — باعىشتالۋ مەن شومىلدىرۋ راسىمىنىڭ ٴمانى جايلى جاقسىلاپ ويلاناتىن ۋاقىت. شىنايى ماسىحشىلەرگە قويىلاتىن بارلىق تالاپتى ورىنداۋ ٷشىن كوپ كۇش سالۋ كەرەك. يسانىڭ شاكىرتتەرى «ەندى وزدەرى ٷشىن ەمەس، وزدەرىنىڭ يگىلىگى ٷشىن ولگەن ٵرى قايتا تىرىلگەن ٴماسىح ٷشىن ٶمىر سۇرۋلەرى» قاجەت (قورىنتتىقتارعا 2-حات 5:15؛ ماتاي 16:24).
18. كەلەسى ماقالادا قانداي سۇراقتار تالقىلانادى؟
18 وسى ماقالادان كورگەنىمىزدەي، شىنايى ٴماسىحشى بولۋ وتە جاۋاپتى قادام بولىپ تابىلادى. ماقالانىڭ باسىندا ايتىلعان ٴماريانىڭ اناسىنىڭ كىشكەنە ۋايىمداعانى دا سودان ەدى. بالالارىڭىز بار بولسا، ٴسىز دە بىلاي ويلاعان شىعارسىز: «بالام شومىلدىرۋ راسىمىنەن وتۋگە راسىندا دا دايىن با؟ ٶزىن ەحوباعا باعىشتاۋ ٷشىن ونى جاقسى تانىپ-ٴبىلدى مە؟ شومىلدىرۋ راسىمىنەن وتپەس بۇرىن، بالامنىڭ جاقسى ٴبىلىم الىپ، جۇمىسقا تۇرىپ العانى ٴجون بە؟ شومىلدىرۋ راسىمىنەن وتكەن سوڭ بالام اۋىر كۇنا جاساپ قويسا شى؟» وسى سۇراقتاردى كەلەسى ماقالادا تالقىلاپ، ٴماسىحشى اتا-انالار شومىلدىرۋ راسىمىنە قاتىستى قالاي دۇرىس كوزقاراس تانىتا الاتىنىن بىلەمىز.
