كوڭىلدى حوش ەتەتىن قوناقجايلىلىق اسا قاجەت!
«ٴبىر-بىرىڭە نارازىلىقسىز قوناقجايلىلىق كورسەتىڭدەر» (پەتىردىڭ 1-حاتى 4:9).
اندەر: 124، 119
1. 1-عاسىرداعى ماسىحشىلەر قانداي قيىندىقتارعا ۇشىرادى؟
شامامەن ب.ز. 62-جىلى مەن 64-جىلىنىڭ ارالىعىندا ەلشى پەتىر «پونت، عالاتيا، كاپادوكيا، ازيا مەن ٴبۇتىنيا ايماقتارىنا شاشىراپ كەتىپ، سوندا ۋاقىتشا تۇرىپ جاتقان» باۋىرلاستارعا حات جازعان (پەتىردىڭ 1-حاتى 1:1). ولار ٵرتۇرلى ورتادان شىققان باۋىرلاستار بولاتىن. «وتتاي جانىپ تۇرعان قيىندىقتارعا»، ياعني قۋعىن-سۇرگىنگە، كەزىگىپ جۇرگەن ولار جىگەر مەن باسشىلىققا ٴزارۋ ەدى. ونىڭ ۇستىنە، ولار اسا قاۋىپتى كەزەڭدە ٶمىر ٴسۇرىپ جاتتى. پەتىر ولارعا: «بارلىق نارسەنىڭ سوڭى تاياپ قالدى»،— دەپ جازعان. ول كەزدە يەرۋساليمنىڭ جويىلۋىنا ون جىلدان از ۋاقىت قالعان ەدى. جان-جاقتاعى ماسىحشىلەرگە وسى قيىن-قىستاۋ كەزەڭنەن امان وتۋگە نە كومەكتەسپەك ەدى؟ (پەتىردىڭ 1-حاتى 4:4، 7، 12).
2، 3. پەتىر نەگە باۋىرلاستارىن قوناقجاي بولۋعا تالپىندىرعان؟ (ماقالانىڭ باسىنداعى سۋرەتتى قاراڭىز.)
2 پەتىردىڭ باۋىرلاستارعا بەرگەن كەڭەستەرىنىڭ ٴبىرى: «ٴبىر-بىرىڭە... قوناقجايلىلىق كورسەتىڭدەر» (پەتىردىڭ 1-حاتى 4:9). «قوناقجايلىلىق» دەپ اۋدارىلعان گرەك ٴسوزى ٴسوزبە-ٴسوز «بەيتانىس ادامدارعا سۇيىسپەنشىلىك، مەيىرىمدىلىك كورسەتۋ» دەگەندى بىلدىرەدى. ٴبىر قىزىعى، باۋىرلاستار ٶزارا ارالاسىپ جۇرگەن تانىستار بولسا دا، پەتىر ولاردى «ٴبىر-بىرىنە» قوناقجاي بولۋعا تالپىندىرعان. بۇنىڭ ولارعا قانداي پايداسى تيمەك ەدى؟
3 قوناقجايلىلىقتىڭ ارقاسىندا باۋىرلاستار توننىڭ ىشكى باۋىنداي جاقىن بولماق ەدى. ال ٴسىز جايلى نە دەۋگە بولادى؟ قوناققا بارىپ ٴبىر مارقايىپ قالعانىڭىز ەسىڭىزدە بولار. ٶزىڭىز دە بىرەۋدى قوناق قىلىپ، ٴبىر-ٴبىرىڭىزدى جاقىن تارتىپ كەتكەن بولارسىزدار. قوناقجاي بولۋ — باۋىرلاستارىمىزبەن جاقىنىراق تانىسۋدىڭ جاقسى مۇمكىندىگى. پەتىردىڭ كۇندەرىندەگى ماسىحشىلەرگە قيىندىقتارى ۋشىققان سايىن، ٶزارا تىعىز قارىم-قاتىناستا بولۋ اسا ماڭىزدى ەدى. وسى «سوڭعى كۇندەرى» ٴبىزدىڭ دە سولاي ەتكەنىمىز قاجەت-اق (تىموتەگە 2-حات 3:1).
4. وسى ماقالادا قانداي سۇراقتاردى تالقىلايمىز؟
4 «ٴبىر-بىرىمىزگە» قوناقجاي بولۋدىڭ جولدارى قانداي؟ قوناقجايلىلىق كورسەتۋگە نە كەدەرگى جاساۋى مۇمكىن؟ ولاردى قالاي جەڭە الامىز؟ ٶزىمىز قالاي جاقسى قوناق بولا الامىز؟
قوناقجايلىلىق كورسەتۋدىڭ مۇمكىندىكتەرى
5. قاۋىم كەزدەسۋلەرىندە قالاي قوناقجاي بولا الامىز؟
5 قاۋىم كەزدەسۋلەرىندە. ەحوبا مەن ونىڭ ۇيىمى ٴبارىمىزدى قاۋىم كەزدەسۋلەرىنە شاقىرادى. ٴبىز قاۋىمعا كەلگەن اركىمدى، اسىرەسە جاڭادان كەلگەندەردى، جىلى قارسى العىمىز كەلەدى (ريمدىكتەرگە 15:7). ولار ەحوبانىڭ دا قوناقتارى بولعاندىقتان، ٴتۇر-كەلبەتى مەن كيىمى قانداي بولماسىن، وزدەرىن جايلى سەزىنۋىنە جاعداي جاساۋىمىز كەرەك (جاقىپ 2:1—4). بىرەۋدىڭ جالعىز كەلگەنىن بايقاساڭىز، قاسىڭىزعا وتىرعىزا الاسىز با؟ باعدارلاما قالاي وتەتىنىن تۇسىندىرسەڭىز جانە وقىلىپ جاتقان جازبا ورىندارىن تابۋعا كومەكتەسسەڭىز، ول ريزا بولىپ قالادى. بۇل — «قوناقجاي بولۋدىڭ» كەرەمەت جولى (ريمدىكتەرگە 12:13).
6. اسىرەسە كىمدەرگە قوناقجاي بولۋىمىز كەرەك؟
6 شايعا نە تاماققا شاقىرۋ. كيەلى كىتاپ جازىلعان زاماندا ادامدار ٴجيى ۇيلەرىنە قوناق شاقىرىپ، اس دايىندايتىن بولعان. وسىلايشا ولارمەن دوستاسىپ، بەيبىت قارىم-قاتىناستا بولعىسى كەلەتىنىن كورسەتكەن (مۇسانىڭ 1-جازباسى 18:1—8؛ بيلەر 13:15؛ لۇقا 24:28—30). ٴبىزدىڭ اسىرەسە كىمدەرگە قوناقجاي بولعانىمىز ٴجون؟ قاۋىمداعى باۋىرلاستارعا. مىنا دۇنيەدەگى جاعداي ۋشىققان سايىن، ٴبىز باۋىرلاستارىمىزعا ارقا سۇيەپ، ولاردىڭ ادال دوسى بولۋىمىز قاجەت. 2011-جىلى باسقارۋشى كەڭەس قۇراما شتاتتارداعى بەتەل وتباسىنىڭ «كۇزەت مۇناراسىن» زەرتتەۋ كەزدەسۋىنىڭ ۋاقىتىن 18:45 تەن 18:15 كە اۋىستىردى. نەگە؟ حابارلاندىرۋدا كەزدەسۋ ەرتە اياقتالسا، بەتەلدىكتەردىڭ قوناق شاقىرۋعا، قوناققا بارۋعا كوبىرەك مۇمكىندىگى بولاتىنى ايتىلدى. باسقا فيليالداردا دا وسىنداي وزگەرىس جاسالدى. سونىڭ ارقاسىندا بەتەل وتباسى ٷشىن ٴبىر-ٴبىرىن جاقسىراق تانىپ-بىلۋدىڭ تاماشا ورايى تۋدى.
7، 8. قاۋىمىمىزعا كەلگەن بايانداماشىلارعا قالاي قوناقجايلىلىق كورسەتسەك بولادى؟
7 كەيدە باسقا قاۋىمنان كەلگەن ەر باۋىرلاستار، اۋداندىق باقىلاۋشىلار، بەتەلدەن كەلگەن وكىلدەر قاۋىمىمىزعا كەلىپ بايانداما ايتىپ تۇرادى. وسى باۋىرلاستارعا قوناقجايلىلىق كورسەتۋدىڭ مۇمكىندىگىن پايدالاناسىز با؟ (جوحاننىڭ 3-حاتى 5—8 وقىڭىز). مۇنىڭ ٴبىر جولى — ولاردى ۇيىمىزگە شايعا نە تاماققا شاقىرۋ.
8 قۇراما شتاتتارداعى ٴبىر ايەل باۋىرلاس بىلاي دەيدى: «جىلدار بويى كۇيەۋىم ەكەۋمىز كوپتەگەن بايانداماشىلار مەن ولاردىڭ ايەلدەرىن قوناققا شاقىرىپ جۇردىك». ونىڭ ايتۋىنشا، ٵربىر قوناق كەلگەن سايىن، ولاردىڭ سەنىمدەرى نىعايعان ٵرى كوڭىلدى ۋاقىت وتكىزگەن. «بۇعان ەش وكىنبەيمىز»،— دەيدى ول.
9، 10. ا) ۇزاعىراق توقتايتىن باسپاناعا كىمدەر مۇقتاج بولۋى مۇمكىن؟ ٵ) ۇيلەرى شاعىن باۋىرلاستار ٶز كومەگىن ۇسىنا الا ما؟ مىسال كەلتىرىڭىز.
9 ۇزاققا توقتايتىن قوناقتار. ەجەلگى زاماندا كەيبىر قوناقتارعا توقتايتىن ورىن بەرۋ قالىپتى جايت بولعان (ٵيۇپ 31:32؛ فىلىمونعا 22). مۇنداي قاجەتتىلىك بۇگىندە دە بار. قاۋىمعا ساپارمەن كەلگەن اۋداندىق باقىلاۋشىلارعا ٴجيى ۋاقىتشا تۇراقتايتىن باسپانا قاجەت. ٵرتۇرلى تەوكراتيالىق مەكتەپتە وقۋعا كەلەتىن باۋىرلاستار مەن قۇرىلىسقا قاتىساتىن ەرىكتى قىزمەتشىلەر دە باسپاناعا مۇقتاج بولۋى مۇمكىن. تابيعي اپاتتىڭ كەسىرىنەن ٷيسىز قالعان باۋىرلاستارىمىزعا دا ۇيلەرى قايتا سوعىلعانشا، پانالايتىن جەر قاجەت. ولاردى ٷيى كەڭ باۋىرلاستار عانا قابىلداي الادى دەپ ويلامايىق. ولار ونسىز دا تالاي رەت سولاي ەتكەن شىعار. ەندەشە، ٷيىڭىز كىشكەنتاي بولسا دا، بىرەۋگە ۇيىڭىزدە توقتاۋدى ۇسىنا الاسىز با؟
10 وڭتۇستىك كورەيادا تۇراتىن ەر باۋىرلاس تەوكراتيالىق مەكتەپكە كەلگەن باۋىرلاستاردى قوناق ەتكەنىن ەسىنە الىپ، بىلاي دەدى: «جاقىندا ۇيلەنىپ، كىشكەنتاي ۇيدە تۇرىپ جاتقاندىقتان، العاشىندا قوناق شاقىرۋعا قىسىلدىم. ٴبىراق مەكتەپكە كەلگەن باۋىرلاستاردى قوناق قىلۋ بىزگە راسىندا دا كوپ قۋانىش سىيلادى. جاڭادان وتاۋ قۇرعان ٴبىز ەحوباعا قوساقتاسىپ قىزمەت ەتكەندە جانە رۋحاني ماقساتتارعا بىرگە ۇمتىلعاندا ەرلى-زايىپتىلاردىڭ قانشالىقتى باقىتتى بولاتىنىن تۇسىندىك».
11. قاۋىمىڭىزعا جاڭادان اۋىسىپ كەلگەندەرگە نەگە قوناقجايلىلىق تانىتقان ماڭىزدى؟
11 قاۋىمىڭىزعا اۋىسىپ كەلگەن باۋىرلاستار. ٴسىزدىڭ قاۋىمىڭىزعا باسقا قاۋىمنان قانداي دا ٴبىر باۋىرلاس نە وتباسى اۋىسىپ كەلۋى مۇمكىن. بالكىم، ولار قاۋىمىڭىزدا قاجەتتىلىك بولعاندىقتان كەلگەن شىعار، يا بولماسا قاۋىمىڭىزعا تاعايىندالعان ٸزاشارلار بولار. البەتتە، بۇل ولار ٷشىن ۇلكەن وزگەرىس. ولارعا جاڭا جەرگە، جاڭا قاۋىمعا، بالكىم ٴتىپتى جاڭا ٴتىل مەن مادەنيەتكە ۇيرەنۋ كەرەك بولادى. سول باۋىرلاستارعا بىرگە تاماقتانۋدى نە ٴبىر جەرگە بارىپ قايتۋدى ۇسىنا الاسىز با؟ سوندا ولارعا جاڭا دوستار تاۋىپ، جاڭا جاعدايعا بەيىمدەلۋ وڭاي بولادى.
12. قوناقجاي بولۋ ٷشىن كوپ نارسە قاجەت ەمەس ەكەنى قانداي وقيعادان كورىنەدى؟
12 قوناقجاي بولۋ ٷشىن كوپ نارسەنىڭ قاجەتى جوق (لۇقا 10:41، 42 وقىڭىز). ايەلىمەن ەندى عانا ميسسيونەرلىك قىزمەتتى باستاعان كەزدەرىن ەسكە الىپ، ٴبىر ەر باۋىرلاس بىلاي دەدى: «ٴبىز جاس بولدىق، تاجىريبەمىز دە جوق ەدى، ٷيىمىزدى ساعىنىپ جۇردىك. ٴبىر كۇنى كەشكە ايەلىمدى قاتتى ساعىنىش كەرنەپ، مەن ونى ەش جۇباتا المادىم. سوسىن ساعات جەتى جارىمدا بىرەۋ ەسىكتى قاقتى. ول كيەلى كىتاپتى زەرتتەپ جۇرگەن ايەل ەكەن. قولىندا ٷش اپەلسينى بار. ول جاڭادان كەلگەن ميسسيونەرلەرمەن تانىسۋعا كەلىپتى. ٴبىز ونى ىشكە كىرگىزىپ، ٴبىر ستاقان سۋ بەردىك. كەيىن شاي مەن ىستىق شوكولاد دايىندادىق. ٴبىز سۋاحيلي ٴتىلىن ٵلى بىلمەيتىنبىز، ال ول اعىلشىنشا بىلمەيدى ەكەن». بۇل ەر باۋىرلاس وسى وقيعانىڭ ولارعا جەرگىلىكتى باۋىرلاستارمەن دوستاسىپ، قۋانىشتارىن ارتتىرۋعا كومەكتەسكەنىن ايتىپ ٶتتى.
قوناقجاي بولۋىڭىزعا ەش نارسە بوگەت بولماسىن
13. قوناقجاي بولعاننىڭ قانداي پايداسى بار؟
13 قوناق شاقىرۋعا تارتىنعان كەزىڭىز بولعان با؟ سويتكەن بولساڭىز، قىزىقتى ۋاقىت وتكىزىپ، ماڭگىلىككە ۇلاساتىن دوستىققا يە بولۋدىڭ مۇمكىندىگىن جىبەرىپ العان سياقتىسىز. قوناقجاي بولۋ — جالعىزدىقتان ارىلۋدىڭ كەرەمەت جولى. ەندەشە، نەگە كەيبىرەۋلەر قوناق شاقىرۋدان تارتىنادى؟ بۇنىڭ بىرنەشە سەبەبى بار.
14. قوناق شاقىرۋعا نە قوناققا بارۋعا ۋاقىتىمىز بەن كۇشىمىز جەتپەسە، نە ىستەي الامىز؟
14 ۋاقىت پەن كۇش. ەحوبانىڭ قىزمەتشىلەرىنىڭ بوس ۋاقىتى از ٵرى مىندەتتەرى كوپ. كەيبىرى قوناقجاي بولۋعا ۋاقىتىم نە كۇشىم جەتپەيدى دەپ ويلاۋى مۇمكىن. ٴسىز دە سولاي ويلاساڭىز، قوناق شاقىرۋ نە قوناققا بارۋ ٷشىن سىزگە كۇن ٴتارتىبىڭىزدى وزگەرتۋ كەرەك شىعار. بۇلاي ەتكەنىڭىز ماڭىزدى، سەبەبى كيەلى كىتاپ ٴبىزدى قوناقجاي بولۋدى ۇمىتپاۋعا شاقىرادى (ەۆرەيلەرگە 13:2). سوندىقتان قوناقجاي بولۋ وتە دۇرىس. بالكىم، قوناق شاقىرۋ ٷشىن سىزگە اسا ماڭىزسىز ىستەرگە ازىراق ۋاقىت جۇمساۋ كەرەك شىعار.
15. كەيبىرەۋلەر نەگە قوناق كۇتە المايمىن دەپ ويلاۋى مۇمكىن؟
15 وزىڭىزگە قاتىستى ويىڭىز. شاقىرعىم-اق كەلەدى، ٴبىراق قوناق كۇتۋ قولىمنان كەلمەيدى دەپ ويلاعان كەزىڭىز بولعان با؟ ٶزىڭىز ۇيالشاق بولعاندىقتان، قوناقتارىڭىزدىڭ ٸشى پىسىپ كەتەدى دەپ ۋايىمدايتىن شىعارسىز. يا بولماسا، اقشام كوپ ەمەس، باسقا باۋىرلاستار سياقتى قوناقتارىمنىڭ بار جاعدايىن جاساي المايمىن دەپ ويلارسىز. ٷيىڭىزدىڭ قاراپايىم نە تار بولعانىنا قىسىلاتىن شىعارسىز. ەسىڭىزدە بولسىن، ٷيىڭىزدىڭ كەرەمەت بولۋى ماڭىزدى ەمەس. ٷيىڭىز تازا دا ۇقىپتى بولسا، ٶزىڭىز اشىق-جارقىن بولساڭىز، قوناقتارىڭىز سوعان ٴماز بولادى.
16، 17. قوناق كۇتكەندە ٴبىراز ۋايىمداساڭىز، نە ىستەي الاسىز؟
16 قوناق كۇتكەندە ٴبىراز ۋايىمدايتىن بولساڭىز، بۇنداي كۇيدى ٴسىز عانا كەشپەيسىز. بريتانيادا تۇراتىن ٴبىر اقساقال بىلاي دەيدى: «قوناقتاردىڭ كەلۋىنە دايىندالعان كەزدە كىشكەنە ابىرجۋىمىز مۇمكىن. ٴبىراق ەحوباعا دەگەن قىزمەتپەن بايلانىستى كەز كەلگەن ٸس سياقتى، بۇنىڭ دا پايداسى مەن اكەلەتىن قاناعات سەزىمى بارلىق ۋايىمنان اسىپ تۇسەدى. ماعان كەيدە قوناقتارمەن جاي عانا كوفە ٸشىپ، اڭگىمە-دۇكەن قۇرعان ۇنايدى». قوناقتارعا جەكە كوڭىل ٴبولۋ قاشان دا پايدالى (فىلىپىلىكتەرگە 2:4). كوبىسى ٶز باستارىنان وتكەن وقيعالارىن ايتىپ بەرگەندى ۇناتادى. بىرگە باس قوسقاندا عانا وسىنداي وقيعالاردى ەستۋدىڭ مۇمكىندىگى تۋادى. تاعى ٴبىر اقساقال بىلاي دەيدى: «قاۋىمداعى دوستارىمدى ۇيگە شاقىرعانىمنىڭ ارقاسىندا ولاردى جاقسىراق تۇسىنە الامىن جانە ولاردى جاقىننان تانىپ، اسىرەسە شىندىققا قالاي كەلگەندەرىن بىلە الامىن». قوناقتارىڭىزعا جەكە كوڭىل بولەر بولساڭىز، بارلىعىنىڭ جاقسى ۋاقىت وتكىزەتىنى ٴسوزسىز.
17 ٴتۇرلى تەوكراتيالىق مەكتەپتەرگە وقۋعا كەلگەن باۋىرلاستاردى ٴجيى قوناق ەتەتىن ٴبىر ٸزاشار ايەل بىلاي دەيدى: «باسىندا ٴسال ۋايىمدادىم. ويتكەنى ٷيىم تىم قاراپايىم، جيھازىم دا بىرەۋلەردەن قالعان. ٴبىراق ٴبىر وقىتۋشى باۋىرلاستىڭ ايەلى كوڭىلىمدى ورنىقتىردى. ول كۇيەۋى ەكەۋى ارالاۋشىلىق قىزمەتتە جۇرگەندەرى جايلى ايتىپ: «كەيبىر باۋىرلاستار اسا داۋلەتتى تۇرمايتىن شىعار، ٴبىراق ٶزىمىز سياقتى قاراپايىم ٶمىر كەشىپ، ەحوباعا قىزمەت ەتۋدى كوزدەگەن باۋىرلاستاردىڭ ۇيىندە ەڭ كەرەمەت كۇندەرىمىز ٶتتى»،— دەدى. بۇل ماعان انامنىڭ كىشكەنتاي كەزىمىزدە: «سۇيىسپەنشىلىك بار جەردە كوكونىس جەگەن ارتىق»،— دەيتىن ٴسوزدەرىن ەسىمە سالدى» (ناقىل سوزدەر 15:17). ەڭ باستىسى، قوناقتارىمىزعا سۇيىسپەنشىلىك كورسەتۋىمىز كەرەك، سوندىقتان ۋايىمداۋدىڭ ەش قاجەتى جوق.
18، 19. قوناقجاي بولۋ ادامعا دەگەن جاعىمسىز سەزىمدەرىڭىزدى جەڭۋگە قالاي سەپتىگىن تيگىزە الادى؟
18 وزگەلەر جايلى ويىڭىز. قاۋىمدا قيتىعىڭىزعا تيەتىن قانداي دا ٴبىر باۋىرلاس بار ما؟ وسى جاعىمسىز سەزىمىڭىزدى جەڭۋگە كۇش سالماساڭىز، ودان ارىلا المايسىز. بالكىم، ٴسىز مىنەزى ونشا ۇنامايتىن ادامدى قوناققا شاقىرعىڭىز كەلمەيتىن شىعار. نە بولماسا كەزىندە ٴسىزدى رەنجىتكەنى ٵلى ەسىڭىزدەن كەتپەي جۇرگەن ادام بار بولار.
19 كيەلى كىتاپ قوناقجاي بولعانىمىز وزگەلەرمەن، ٴتىپتى جاۋلارىمىزبەن قارىم-قاتىناسىمىزدى جاقسارتاتىنىن ايتادى (ناقىل سوزدەر 25:21، 22 وقىڭىز). ۇيگە بىرەۋدى قوناققا شاقىرساڭىز، ٴسىز سول ادامعا دەگەن جاعىمسىز سەزىمدەرىڭىزدى جەڭىپ، ونىمەن جاقسىراق ٴتىل تابىسىپ كەتۋىڭىز مۇمكىن. سوندا ەحوبا شىندىققا جاقىنداتىپ تارتقان كەزدە سول ادامنىڭ بويىنان بايقاعان جاقسى قاسيەتتەردى ٴسىز دە كورە باستايسىز (جوحان 6:44). سۇيىسپەنشىلىك سىزگە قوزعاۋ سالىپ، شاقىرادى دەپ كۇتپەگەن ادامدى قوناققا شاقىرساڭىز، جاقسى دوستىققا جول اشىلۋى مۇمكىن. سىزگە شىنىمەن سۇيىسپەنشىلىك قوزعاۋ سالۋ ٷشىن نە ىستەي الاسىز؟ مۇنىڭ ٴبىر جولى — فىلىپىلىكتەرگە 2:3 تەگى كەڭەسكە قۇلاق اسۋ. وندا: «كىشىپەيىلدىلىكپەن باسقالاردى وزدەرىڭنەن جوعارى قويىڭدار»،— دەلىنگەن. باۋىرلاستارىمىزدىڭ بىزدەن قاي جاعىنان شىنىندا دا جوعارى ەكەنى جايلى ويلانۋىمىز كەرەك. بالكىم، ولاردىڭ سەنىمى، تاباندىلىعى نەمەسە قانداي دا ٴبىر ماسىحشىلىك قاسيەتى ەلىكتەۋگە تۇرارلىق شىعار. ولاردىڭ جاقسى قاسيەتتەرى جايلى ويلانساق، ولاردى كوبىرەك جاقسى كورەتىن بولامىز ٵرى قوناقجاي بولۋ وڭايىراق بولادى.
جاقسى قوناق بولا ٴبىلىڭىز
ٷي يەسى ادەتتە قوناق كۇتۋ ٷشىن جاقسىلاپ دايىندالادى (20-ابزاستى قاراڭىز)
20. شاقىرۋدى قابىل العان سوڭ، سەنىمدى ادام ەكەنىمىزدى قالاي كورسەتەمىز جانە نەگە بۇلاي ەتۋىمىز كەرەك؟
20 ٴزابۇر جىرشىسى ٴداۋىت: «ۋا، ەحوبا، سەنىڭ شاتىرىڭدا كىم قوناق بولا الادى؟»— دەپ سۇراعان (ٴزابۇر 15:1). سودان كەيىن ەحوبا قوناقتارىنىڭ بويىنان قانداي قاسيەتتەردى كورگىسى كەلەتىنىن سيپاتتاپ وتكەن. سول قاسيەتتەردىڭ ٴبىرى — «وزىنە زالال كەلسە دە، ۋادەسىنەن تايمايتىن» سەنىمدى ادام بولۋ (ٴزابۇر 15:4). شاقىرۋدى قابىل الىپ قويساق، اسا كەلەلى سەبەپ بولماسا، قوناققا بارۋدان باس تارتپاعانىمىز ٴجون. ٴبىزدى شاقىرعان ادام قوناق كەلەدى دەپ دايىندالىپ قويعان بولۋى مۇمكىن. ەگەر ٴبىز باس تارتساق، ونىڭ بار ەڭبەگى زايا كەتەدى (ماتاي 5:37). كەيبىرەۋلەر وزىنە كوبىرەك ۇنايتىن جەرگە قوناققا بارۋ ٷشىن، بۇعان دەيىن كەلىسىپ قويعان جەرىنە بارۋدان باس تارتىپ جاتادى. بۇل سۇيىسپەنشىلىك پەن قۇرمەتكە جاتا ما؟ ٷي يەسى نە ۇسىنسا دا، ريزاشىلىقپەن قابىلداۋىمىز كەرەك (لۇقا 10:7). ال ەگەر قوناققا بارۋدان باس تارتۋعا ٴماجبۇر بولساق، ٷي يەسىن مۇمكىندىگىنشە ەرتەرەك ەسكەرتكەنىمىز ٴجون. سوندا سۇيىسپەنشىلىگىمىز بەن سىپايىلىعىمىزدى كورسەتەمىز.
21. جەرگىلىكتى مادەنيەتتى قۇرمەتتەگەنىمىز قالاي جاقسى قوناق بولۋعا كومەكتەسەدى؟
21 جەرگىلىكتى مادەنيەتتى دە سىيلاعان ماڭىزدى. كەيبىر مادەنيەتتە كۇتپەگەن جەردەن كەلگەن قوناقتى قۇشاق جايا قارسى الادى. ال باسقا جەردە بىرەۋدىڭ ۇيىنە كەلمەس بۇرىن، الدىن الا كەلىسكەن دۇرىس. كەيبىر ەلدە ٷي يەسى قوناعىنىڭ الدىنا بار جاقسىسىن قويادى، ال ٷي ىشىندەگىلەرى سودان كەيىن تاماقتانادى. ال باسقا ەلدەردە ٴبارى داستارقان باسىندا بىرگە وتىرادى. تاعى ٴبىر جەرلەردە قوناقتار ادەتتە ۇستەلگە قوياتىن بىردەڭە الا كەلەدى. ال باسقا جەرلەردە قوناقتاردىڭ ەشتەڭە اكەلمەگەنىن ٴجون كورەدى. كەيبىر مادەنيەتكە ساي، ادام قوناققا ٴبىر نە بىرنەشە رەت شاقىرىلسا دا، سىپايى تۇردە باس تارتادى. ٴبىراق وزگە مادەنيەتتە العاش شاقىرىلعاندا باس تارتۋ قۇرمەتكە جاتپايدى. ٷي يەسى ٴبىزدى قوناققا شاقىرعانىنا قۋانىشتى بولۋى ٷشىن ٵردايىم بارىمىزدى سالۋىمىز قاجەت.
22. ٴبىر-بىرىمىزگە قوناقجاي بولۋ نەگە وتە ماڭىزدى؟
22 پەتىر بىلاي دەگەن: «بارلىق نارسەنىڭ سوڭى تاياپ قالدى» (پەتىردىڭ 1-حاتى 4:7). الدىمىزدا مىنا الەم ەشقاشان كورمەگەن ەڭ زور الاپات كۇتىپ تۇر. وسى دۇنيە جاماندىققا باتقان سايىن، بىزگە باۋىرلاستارعا دەگەن سۇيىسپەنشىلىگىمىزدى ارتتىرا بەرۋ كەرەك بولادى. ەندەشە، پەتىردىڭ «ٴبىر-بىرىڭە... قوناقجايلىلىق كورسەتىڭدەر» دەگەن كەڭەسىن قازىر قولدانۋ وتە ماڭىزدى (پەتىردىڭ 1-حاتى 4:9). قوناقجايلىلىق قازىر جانە ماڭگىلىك بويى قۋانىشقا كەنەلتەتىن ٵرى اسا قاجەتتى قاسيەت بولىپ قالا بەرمەك!
