«تۇزەتۋدى قابىلدا، سوندا دانا بولارسىڭ»
«تۇزەتۋدى قابىلدا، سوندا دانا بولارسىڭ» (ناقىل سوزدەر 19:20).
اندەر: 64، 120
1. دانالىققا قالاي يە بولا الامىز جانە مۇنىڭ قانداي پايداسى بار؟
ەحوبا — دانالىقتىڭ قاينار كوزى. ول ونى وزگەلەرگە جومارتتىقپەن بەرەدى. جاقىپ 1:5 تە بىلاي دەلىنگەن: «قايسىبىرەۋىڭە دانالىق جەتپەي جاتسا، جومارتتىقپەن ٵرى ەش جازعىرماي بەرە سالاتىن قۇدايدان سۇراي بەرسىن». دانالىققا يە بولۋدىڭ ٴبىر جولى — قۇدايدىڭ تۇزەتۋىن قابىلداۋ. بۇل ٴبىزدى تەرىس قىلىقتان ساقتايدى ٵرى ەحوبامەن جاقىن قارىم-قاتىناستا بولىپ قالۋىمىزعا سەپتىگىن تيگىزەدى (ناقىل سوزدەر 2:10—12). بۇعان قوسا، ماڭگىلىك ٶمىر سۇرۋگە دەگەن كەرەمەت ٷمىتىمىز بولادى (ياھۋدا 21).
2. قۇدايدىڭ تۇزەتۋىن جاقسى كورۋدى قالاي ۇيرەنە الامىز؟
2 كەمەلسىزدىگىمىزدىڭ نە كورگەن تاربيەمىزدىڭ اسەرىنەن كەيدە تۇزەتۋدى قابىلداۋ نەمەسە بۇعان وڭ كوزبەن قاراۋ قيىن بولىپ جاتادى. ايتسە دە قۇدايدىڭ تۇزەتۋىنىڭ يگىلىگىن كورگەندە، ونىڭ ٴبىزدى قانشالىقتى سۇيەتىنىن ۇعامىز. ناقىل سوزدەر 3:11، 12 دە: «بالام، ەحوبا جونگە سالعاندا، باس تارتپا... ەحوبا كىمدى جاقسى كورسە، سونى تۇزەتەدى»،— دەپ جازىلعان. ەحوبا بىزگە بار جاقسىنى تىلەيتىنىنە سەنىمدى بولساق بولادى (ەۆرەيلەرگە 12:5—11 وقىڭىز). قۇداي ٴبىزدى وتە جاقسى بىلەدى، سوندىقتان ٵرقاشان دا ورىندى ٵرى تيىسىنشە تۇزەتەدى. بۇل ماقالادا ٴبىز تۇزەتۋگە قاتىستى ٴتورت جايتتى قاراستىرامىز: 1) ٶز-ٶزىمىزدى تۇزەتۋ، 2) اتا-انانىڭ بالانى جونگە سالۋى، 3) قاۋىمدا بەرىلەتىن تۇزەتۋ، 4) جونگە سالۋدان دا اۋىر تيەتىن جايت.
ٶز-ٶزىمىزدى تۇزەتۋ — دانالىقتىڭ بەلگىسى
3. قالاي بالا ٶز-ٶزىن تۇزەتۋدى ۇيرەنەدى؟ مىسال كەلتىرىڭىز.
3 ٶز-ٶزىمىزدى تۇزەتۋ ٴجۇرىس-تۇرىسىمىز بەن وي-سانامىزدى قاداعالاۋدى بىلدىرەدى. ٶز-ٶزىمىزدى تۇزەتە ٴبىلۋ قاسيەتى تۋا بىتپەيدى، الايدا وعان ۇيرەنۋىمىز كەرەك. مىسالى، كىشكەنتاي بالا ۆەلوسيپەد ايداۋدى ۇيرەنىپ جاتقاندا، اكەسى نە اناسى ۆەلوسيپەدتى قۇلامايتىنداي ەتىپ ۇستاپ جۇرەدى. ۋاقىت وتە كەلە بالاسى تەپە-تەڭدىك ساقتاۋدى ۇيرەنگەندە، اتا-اناسى ونى اراسىندا بىرەر ساتكە جىبەرىپ تۇرادى. ال بالاسى ٶزى ايداي الاتىنىنا كوز جەتكىزگەن سوڭ، ونى ٴبىرجولا جىبەرەدى. سول سياقتى، اتا-انالار بالالارىن شىدامدىلىقپەن «ەحوبا ايتقانداي تاربيەلەپ، ونىڭ اقىل-كەڭەسىن بەرىپ» وسىرسە، ولاردى ٶز-ٶزىن تۇزەتە بىلۋگە جانە دانالىققا باۋليدى (ەفەستىكتەرگە 6:4).
4، 5. ا) نەگە ٶز-ٶزىمىزدى تۇزەتە ٴبىلۋ «جاڭا بولمىستىڭ» ماڭىزدى قىرى؟ ٵ) قاتەلىك جاساعان كۇندە دە، نەگە سالىمىز سۋعا كەتپەۋ كەرەك؟
4 ەرەسەك شاعىندا ەحوبانى تانىپ-بىلە باستاعان ادامدارمەن دە سولاي. ولار قانداي ٴبىر شامادا ٶز-وزدەرىن تاربيەلەگەن بولسا دا، ٵلى تولىسقان ٴماسىحشى ەمەس. ٴبىراق «جاڭا بولمىسقا» يە بولا باستاعاندا جانە ماسىحكە ۇقساۋعا تىرىسقاندا، ولار تولىسا تۇسەدى (ەفەستىكتەرگە 4:23، 24). ٶز-ٶزىمىزدى تۇزەتە بىلگەنىمىزدىڭ ارقاسىندا قۇدايعا «ۇنامسىز ٴجۇرىس-تۇرىستان جانە وسى دۇنيەلىك قۇمارلىقتاردان باس تارتۋعا، سونداي-اق وسى زاماندا ەستى، ٵدىل ٵرى وعان شىن بەرىلىپ ٶمىر سۇرۋگە ۇيرەنەمىز» (تيتكە 2:12).
5 نە دەگەنمەن ٴبارىمىز دە كۇناكارمىز (ۋاعىزداۋشى 7:20). ەگەر قاتەلىك جاساپ قويساق، بۇل ٶز-ٶزىمىزدى جەتكىلىكتى شامادا تۇزەتپەي جاتقانىمىزدى نە مۇلدە تۇزەتپەگەنىمىزدى بىلدىرە مە؟ ولاي بولماۋى مۇمكىن. ناقىل سوزدەر 24:16 دا: «ٵدىل جان جەتى رەت قۇلاسا دا، قايتىپ تۇرار»،— دەلىنگەن. بىزگە «قايتىپ تۇرۋعا» نە كومەكتەسەدى؟ ٶز كۇشىمىز ەمەس، قۇداي رۋحى (فىلىپىلىكتەرگە 4:13 وقىڭىز). بۇل رۋحتىڭ جەمىسىنە ۇستامدىلىق قاسيەتى كىرەدى. ول ٶزىن-ٶزى تۇزەتۋ قاسيەتىنە وتە ۇقسايدى.
6. قۇداي ٴسوزىن جاقسىراق وقىپ-زەرتتەۋدى قالاي ۇيرەنسەك بولادى؟ (ماقالانىڭ باسىنداعى سۋرەتتى قاراڭىز.)
6 دۇعا ەتۋ، كيەلى كىتاپتى زەرتتەۋ مەن وي جۇگىرتۋ دە ٶز-ٶزىمىزدى تۇزەتۋدى ۇيرەنۋگە كومەكتەسەدى. ال كيەلى كىتاپتى وقىپ-زەرتتەۋ ٴسىز ٷشىن قيىن بولسا نەمەسە زەرتتەۋ جۇرگىزۋدى ۇناتپايتىن بولساڭىز شى؟ ەڭسەڭىز تۇسپەسىن. ەگەر ٶزىڭىز جول بەرسەڭىز، ەحوبا ٶز سوزىنە «قۇشتار بولۋعا» جاردەمدەسەدى (پەتىردىڭ 1-حاتى 2:2). كيەلى كىتاپتى وقىپ-زەرتتەۋگە ۋاقىت ٴبولۋ ٷشىن ەحوبادان ٶز-ٶزىڭىزدى تارتىپكە سالۋعا كومەك سۇراڭىز. مۇمكىن باسىندا زەرتتەۋگە بىرەر مينۋت بولە الاتىن شىعارسىز. بىرتە-بىرتە زەرتتەۋ جۇرگىزۋ وڭايىراق ٵرى قىزىقتى بولا باستايدى. تىنىش جەردە وتىرىپ، ەحوبانىڭ اسا قۇندى ويلارى جايلى وي جۇگىرتۋدى ٵلى-اق جاقسى كورىپ كەتەسىز (تىموتەگە 1-حات 4:15).
7. ٶز-ٶزىمىزدى تۇزەتە بىلگەنىمىز رۋحاني ماقساتتارعا جەتۋگە قالاي كومەكتەسەدى؟
7 ٶز-ٶزىمىزدى تۇزەتە بىلگەنىمىز ەحوباعا دەگەن قىزمەتىمىزبەن بايلانىستى ماقساتتارعا قول جەتكىزۋگە كومەكتەسەدى. مىسالى، وتباسىلى ٴبىر ەر باۋىرلاس قىزمەتتەگى قۇلشىنىسى باسەڭدەپ بارا جاتقانىن بايقاپ، تۇراقتى ٸزاشار بولۋدى ماقسات ەتەدى. ٶز-ٶزىن جونگە سالعانى وعان قالاي كومەكتەستى؟ ول جۋرنالدارىمىزدان ٸزاشارلىق قىزمەت جايلى ماقالالاردى وقىپ، وسى جايىندا دۇعا ەتەدى. وسىنىڭ ارقاسىندا ەحوبامەن قارىم-قاتىناسى نىعايادى. سونداي-اق جاعدايى كەلگەندە قوسالقى ٸزاشار رەتىندە قىزمەت ەتىپ تۇرادى. ول ەشتەڭەنىڭ وزىنە بوگەت بولۋىنا جول بەرمەي، قويعان ماقساتىنان ەش اينىمايدى. ٴبىراز ۋاقىتتان سوڭ ول تۇراقتى ٸزاشارلىق قىزمەتتى باستايدى.
بالالارىڭىزدى ەحوبا ايتقانداي جونگە سالىڭىز
بالالار جاقسى مەن جاماننىڭ نە ەكەنىن ٴبىلىپ تۋىلمايدى، سوندىقتان ولارعا ٴتالىم-تاربيە بەرىپ، ۇيرەتۋ كەرەك (8-ابزاستى قاراڭىز)
8—10. اتا-انالارعا بالالارىن ەحوبانىڭ قىزمەتشىسى بولاتىنداي ەتىپ تاربيەلەۋگە نە كومەكتەسەدى؟ مىسال كەلتىرىڭىز.
8 ەحوبا اتا-اناعا بالاسىن ٶزى «ايتقانداي تاربيەلەپ، ٶزىنىڭ اقىل-كەڭەسىن بەرىپ ٶسىرۋ» مىندەتىن جۇكتەگەن (ەفەستىكتەرگە 6:4). الايدا قازىرگى دۇنيەدە بۇل وتە قيىن (تىموتەگە 2-حات 3:1—5). بالالار جاقسى مەن جاماننىڭ نە ەكەنىن ٴبىلىپ تۋىلمايدى، ٵرى ار-ۇجداندارى دا ماشىقتانباعان. بۇل ٷشىن ولارعا تاربيە مەن تۇزەتۋ قاجەت (ريمدىكتەرگە 2:14، 15). كيەلى كىتاپتى زەرتتەيتىن ٴبىر عالىم تۇسىندىرگەندەي، «تۇزەتۋ» نە «جونگە سالۋ» دەپ اۋدارىلعان گرەك ٴسوزىنىڭ ماعىناسى «بالانى جەتىلدىرۋدى» نەمەسە بالانى جاۋاپكەرشىلىگى مول ادام ەتىپ ٶسىرۋدى قامتيدى.
9 ەگەر اتا-انا سۇيىسپەنشىلىكپەن تۇزەتسە، بالا قورعانىش سەزىنەدى. ولار ەركىندىكتىڭ دە ٶز شىگى بار ەكەنىن، سونداي-اق جاساعان ٵربىر ارەكەتىنىڭ سالدارى بولاتىنىن بىلەدى. سوندىقتان ٴماسىحشى اتا-انالاردىڭ بالا تاربيەسىندە ەحوبانىڭ دانالىعىنا جۇگىنگەندەرى وتە ماڭىزدى. تۇراتىن جەرىمىزگە قاراي، بالانى تاربيەلەۋگە قاتىستى پىكىرلەر ٵرتۇرلى بولىپ كەلەدى ارى ولار وزگەرىپ تۇرادى. دەگەنمەن قۇدايعا قۇلاق اساتىن اتا-انالارعا بالامدى قالاي تاربيەلەسەم ەكەن دەپ دال بولۋدىڭ نە ادامداردىڭ پىكىرلەرى مەن تاجىريبەلەرىنە سۇيەنۋدىڭ قاجەتى جوق.
10 بۇل رەتتە نۇحتان ۇيرەنسەك بولادى. ەحوبا وعان كەمە سوعۋدى ايتقاندا، ول كەمەنى قالاي سوعاتىنىن بىلمەدى. وعان ەحوبانىڭ كومەگىنە جۇگىنۋ قاجەت ەدى. ٴسۇيتىپ، ەحوبا قالاي ايتسا، ول «ٴدال سولاي» ىستەدى (مۇسانىڭ 1-جازباسى 6:22). ناتيجەسى قانداي بولدى؟ كەمەنىڭ ارقاسىندا نۇح وتباسىمەن بىرگە امان قالدى! سونىمەن قاتار نۇح جاقسى اكە بولعان، ويتكەنى قۇداي دانالىعىنا سەنىم ارتقان. توپان سۋدىڭ الدىنداعى زۇلىم زاماندا بالا تاربيەسى قيىنعا سوقسا دا، نۇح بالالارىنا جاقسى ٴتالىم-تاربيە بەرىپ، ٶزى دە ولارعا ۇلگى-ونەگە بولعان (مۇسانىڭ 1-جازباسى 6:5).
11. نەگە اتا-انا بالاسىنا ٴتالىم-تاربيە بەرۋ ٷشىن بار كۇشىن سالۋ كەرەك؟
11 ٴسىزدىڭ دە بالالارىڭىز بار بولسا، «ٴدال سولاي» ىستەۋ ٷشىن سىزگە نە قاجەت؟ ەحوباعا قۇلاق اسۋ. بالالارىڭىزدى تاربيەلەۋدە ونىڭ كومەگىنە جۇگىنىڭىز. قۇدايدىڭ ٴسوزى مەن ۇيىمىندا بەرىلەتىن كەڭەستەرگە ساي ارەكەت ەتىڭىز. ٴسىرا، بۇل ٷشىن بالالارىڭىز كەيىن سىزگە العىسىن جاۋدىرادى! ٴبىر ەر باۋىرلاس: «اتا-انامنىڭ بەرگەن تاربيەسىنە ريزاشىلىعىم شەكسىز. جۇرەگىمە اسەر ەتۋ ٷشىن ولار قولدارىنان كەلگەن بار جاقسىنى ايامادى»،— دەپ جازدى. ٶزى ايتقانداي، وعان ەحوباعا جاقىنداي تۇسۋگە كومەكتەسكەن — اكە-شەشەسى. ٴبىراق اتا-اناسى قانشا ٴتالىم-تاربيە بەرسە دە، بالاسى ٴبارىبىر ەحوبانى تاستاپ كەتۋى مۇمكىن. وندايدا قولىنان كەلگەننىڭ ٴبارىن جاساعان اتا-انا ار-ۇجدانى تازا بولىپ، بالالارى ايتەۋىر ٴبىر كۇنى ەحوباعا ورالاتىنىنا ٷمىت ارتسا بولادى.
12، 13. ا) بالالارى قاۋىمنان شىعارىلعان اتا-انالار قۇدايعا مويىنسۇناتىندارىن قالاي كورسەتەدى؟ ٵ) ٴبىر اتا-انانىڭ ەحوباعا مويىنسۇنعانى ولاردىڭ وتباسىنا قانداي پايداسىن تيگىزدى؟
12 بالاسى قاۋىمنان شىعارىلعاندا، كەيبىر اتا-انا ٷشىن مويىنسۇنۋشىلىق تانىتۋ قيىننىڭ قيىنى. قاۋىمنان شىعارىلىپ، ۇيىنەن كەتكەن ٴبىر قىزدىڭ اناسى: «قىزىممەن جانە نەمەرەممەن ۋاقىت وتكىزە الۋىم ٷشىن باسىلىمداردان ٸلىپ الار سىلتاۋ ىزدەيتىنمىن»،— دەپ مويىندادى. ٴبىراق كۇيەۋى وعان ەندى قىزدارى ٷشىن وزدەرىنىڭ جاۋاپتى ەمەس ەكەنىن جانە ەحوباعا ادال بولۋلارى كەرەكتىگىن تۇسىنۋگە مەيىرىمدىلىكپەن كومەكتەستى.
13 بىرنەشە جىلدان سوڭ، قىزدارى قاۋىمعا قايتا قابىلداندى. اناسى بىلاي دەيدى: «قازىر ول ماعان كۇندە-كۇندە قوڭىراۋ شالىپ نە حابارلاما جازىپ تۇرادى! قۇدايعا مويىنسۇنىپ كەلگەنىمىز ٷشىن ول ٴبىزدى قاتتى قۇرمەتتەيدى. قازىرگى قارىم-قاتىناسىمىز تاماشا». ەگەر ۇلىڭىز نە قىزىڭىز قاۋىمنان شىعارىلعان بولسا، «ەحوباعا بار جۇرەگىڭىزبەن سەنىم ارتاسىز» با؟ وعان «ٶز اقىلىڭىزعا سۇيەنبەيتىنىڭىزدى» كورسەتەسىز بە؟ (ناقىل سوزدەر 3:5، 6). ەسىڭىزدە بولسىن، ەحوبانىڭ جونگە سالۋى ونىڭ زور دانالىعى مەن سۇيىسپەنشىلىگىن دالەلدەيدى. ول ٶز ۇلىن كۇللى ادامزات ٷشىن، ونىڭ ىشىندە ٴسىزدىڭ بالاڭىز ٷشىن دە، قۇربان ەتكەنىن ەش ۇمىتپاڭىز! قۇداي ٵربىر ادامنىڭ ماڭگىلىك ٶمىر سۇرگەنىن قالايدى (پەتىردىڭ 2-حاتى 3:9 وقىڭىز). ەندەشە، اتا-انالار، مويىنسۇنعىش بولۋ اۋىر تيسە دە، ەحوبانىڭ تۇزەتۋى مەن باسشىلىعى دۇرىس ەكەنىنە سەنىم ارتا بەرىڭىزدەر. قۇدايدىڭ تۇزەتۋىنە قارسى شىقپاي، قايتا ونى قابىلداي بىلگەيسىزدەر.
قاۋىمدا بەرىلەتىن تۇزەتۋ
14. ەحوبانىڭ «ادال باسقارۋشى» ارقىلى بەرەتىن نۇسقاۋىنىڭ قانداي پايداسىن كورەمىز؟
14 ەحوبا ماسىحشىلىك قاۋىمدى قامقورلاۋدى، قورعاۋدى جانە ٴتالىم بەرۋدى ۋادە ەتكەن. ول مۇنى بىرنەشە جولمەن ىستەيدى. مىسالى، ول قاۋىمعا قامقورلىق ەتۋ ٷشىن ۇلىن تاعايىندادى. ال يسا «ادال باسقارۋشىنى» تاعايىنداپ، وعان بىزگە ادالدىق ساقتاۋعا كومەكتەسەتىن رۋحاني اس-سۋمەن قامتاماسىز ەتۋدى تاپسىردى (لۇقا 12:42). بۇل «باسقارۋشى» بىزگە وتە قۇندى نۇسقاۋ بەرەدى ياكي تۇزەتەدى. تىڭداعان قانداي دا ٴبىر بايانداما نە جۋرنالدارىمىزدان وقىعان ماقالا ويىڭىزدى يا ٸس-ارەكەتىڭىزدى وزگەرتۋگە قوزعاۋ سالعانى ەسىڭىزدە بولار. سوعان ساي وزگەرىس جاساعان بولساڭىز، قۋانىڭىز! سەبەبى ەحوبانىڭ ٴسىزدى جونگە سالۋىنا جول بەرىپ جاتىرسىز (ناقىل سوزدەر 2:1—5).
15، 16. ا) اقساقالدار اتقاراتىن قىزمەتتىڭ پايداسىن كورۋ ٷشىن نە ىستەي الامىز؟ ٵ) اقساقالدار ٶز جۇمىسىن قۋانا اتقارۋ ٷشىن ٶز تاراپىمىزدان نە ىستەسەك بولادى؟
15 سونداي-اق ٴماسىح قاۋىمعا قامقور بولسىن دەپ اقساقالداردى بەرگەن. كيەلى كىتاپتا ولار «سىي رەتىندە بەرىلگەن ادامدار» دەپ اتالعان (ەفەستىكتەرگە 4:8، 11—13). اقساقالدار اتقاراتىن قىزمەتتىڭ پايداسىن كورۋ ٷشىن نە ىستەي الامىز؟ ٴبىز ولاردىڭ سەنىمى مەن ۇلگىسىنە ەلىكتەي الامىز، ارى كيەلى كىتاپتان بەرگەن اقىل-كەڭەستەرىنە قۇلاق اسساق بولادى (ەۆرەيلەرگە 13:7، 17 وقىڭىز). اقساقالدار ٴبىزدى جاقسى كورەدى جانە قۇدايمەن جاقىن قارىم-قاتىناستا بولعانىمىزدى قالايدى. ەگەر قاۋىمنان قالىپ جۇرگەنىمىزدى نە قۇلشىنىسىمىزدىڭ باسەڭدەگەنىن بايقاسا، ولار بىردەن كومەكتەسۋگە تىرىسادى. مۇندايدا ولار ٴبىزدى قۇلاق قويىپ تىڭدايدى، سوسىن سۇيىسپەنشىلىكپەن جىگەرلەندىرىپ، كيەلى كىتاپتان دانا كەڭەس بەرەدى. ولاردىڭ كورسەتكەن كومەگىن ەحوبانىڭ ٴسىزدى جاقسى كورەتىنىنىڭ بەلگىسى دەپ قاراستىراسىز با؟
16 اقساقالدارعا بىزگە كەڭەس بەرۋ وڭاي بولماۋى مۇمكىن ەكەنىن ۇمىتپايىق. قالاي ويلايسىز، اۋىر كۇناسىن جاسىرۋعا تىرىسقان ٴداۋىت پاتشامەن سويلەسۋ كەرەك بولعاندا، ناتان پايعامبار ٶزىن قالاي سەزىندى؟ (سامۋيلدىڭ 2-جازباسى 12:1—14). ال ەلشى پاۋىل شى؟ 12 ەلشىنىڭ ٴبىرى بولعان پەتىرگە ياھۋدي ماسىحشىلەردى وزگە ۇلتتان شىققان ماسىحشىلەردەن ارتىق كورگەنى ٷشىن كەڭەس بەرۋ وعان وڭايعا سوقتى ما؟ پاۋىلعا باتىلدىق كەرەك بولعانى ٴشۇباسىز (عالاتتىقتارعا 2:11—14). ولاي بولسا، اقساقالدارعا سىزگە كەڭەس بەرۋ وڭايىراق بولۋ ٷشىن ٶز تاراپىڭىزدان نە ىستەي الاسىز؟ كىشىپەيىل، ريزاشىل جانە تىڭداۋعا اسىق بولىڭىز. ولاردىڭ كومەگىنە قۇداي سۇيىسپەنشىلىگىنىڭ بەلگىسى دەپ قاراڭىز. سوندا ٴسىز دە پايداسىن كورەسىز، اقساقالدار دا ٶز جۇمىسىن قۋانا اتقارادى.
17. اقساقالدار ٴبىر ايەل باۋىرلاسقا قالاي كومەكتەستى؟
17 ٴبىر ايەل باۋىرلاستىڭ ايتۋىنشا، بۇعان دەيىن باسىنان وتكەن جايتتاردىڭ كەسىرىنەن وعان ەحوبانى جاقسى كورۋ قيىن بولعان ارى جانى قاتتى كۇيزەلگەن. ول بىلاي دەيدى: «اقساقالدارمەن سويلەسۋىم كەرەكتىگىن ٴتۇسىندىم. ولار مەنى سوگىپ نە سىناپ-مىنەگەن جوق، قايتا جىگەرلەندىرىپ، نىعايتتى. ٵربىر قاۋىم كەزدەسۋى بىتكەن سوڭ، ىستەرى قانشا كوپ بولسا دا، ولاردىڭ كەم دەگەندە بىرەۋى كەلىپ، حالىمدى سۇراپ تۇراتىن. وتكەن ٶمىرىمنىڭ كەسىرىنەن ٶزىمدى قۇدايدىڭ سۇيىسپەنشىلىگىنە لايىقسىز سەزىندىم. ٴبىراق ەحوبا قاۋىم مەن اقساقالدار ارقىلى ماعان دەگەن سۇيىسپەنشىلىگىن قايتا-قايتا دالەلدەپ وتىردى. ەحوبا سەنى ەشقاشان تاستاپ كەتپەيىنشى دەپ جالبارىنامىن».
جونگە سالۋدان دا اۋىر تيەتىن جاعداي
18، 19. قانداي جاعداي جونگە سالۋدان دا اۋىر تيەدى؟ مىسال كەلتىرىڭىز.
18 جونگە سالۋ اۋىر تيەتىن شىعار، ٴبىراق ونى قابىلداماۋدىڭ سالدارى ودان دا اۋىر تيەدى (ەۆرەيلەرگە 12:11). ٴبىز قابىل مەن سەدەكيا پاتشانىڭ وقيعاسىنان ساباق الساق بولادى. قۇداي قابىلدىڭ ىنىسىنە دەگەن جەككورىنىشىن ارى ونى ولتىرگىسى كەلەتىنىن كورگەندە، وعان بىلاي دەپ ەسكەرتتى: «نەگە سونشا اشۋلانىپ، تۇرىڭ بۇزىلدى؟ ەگەر جاقسىلىققا بەت بۇرساڭ، مەنىڭ ىقىلاسىما يە بولاسىڭ عوي. ال جاقسىلىققا بەت بۇرماساڭ، وندا ٴبىلىپ قوي، بوساعاڭدى كۇنا جاعالاپ ٴجۇر، ول سەنى يەمدەنۋدى كوكسەيدى. ٴبىراق ودان ۇستەم بولار ما ەكەنسىڭ؟!» (مۇسانىڭ 1-جازباسى 4:6، 7). قابىل ەحوبانىڭ تۇزەتۋىن قابىلداماي، باۋىرىنىڭ قانىن توكتى، سوسىن بۇنىڭ اۋىر زاردابىن ٶمىرىنىڭ سوڭىنا دەيىن تارتتى (مۇسانىڭ 1-جازباسى 4:11، 12). قۇدايدىڭ ٴتىلىن العاندا، قابىل سونشالىقتى ازاپ كورمەس ەدى.
19 سەدەكيا جىگەرسىز دە زۇلىم پاتشا بولعان. ونىڭ بيلىگى تۇسىندا يەرۋساليم مۇشكىل كۇيدە ەدى. ەرەميا پايعامبار وعان ٴجۇرىس-تۇرىسىن وزگەرتۋ كەرەكتىگىن قايتا-قايتا ەسكەرتۋمەن بولدى. ٴبىراق ول ەحوبانىڭ تۇزەتۋىن قابىلداماي قويدى. سودان ول مۇنىڭ وتە قايعىلى سالدارىن كوردى (ەرەميا 52:8—11). راسىندا دا، ەحوبا ٴبىزدىڭ بوستان-بوسقا ازاپ شىككەنىمىزدى ەش قالامايدى! (يشايا 48:17، 18 وقىڭىز).
20. قۇدايدىڭ تۇزەتۋىن قابىلدايتىندارمەن نە بولادى، ال قابىلدامايتىندارمەن شى؟
20 بۇگىندە مىنا الەمدەگى كوپ ادام قۇدايدىڭ تۇزەتۋىن كەلەكە-مازاق ەتىپ، نەمقۇرايدى قارايدى. ٴبىراق جۋىق ارادا قۇدايدىڭ تۇزەتۋىن قابىلدامايتىنداردىڭ ٴبارى مۇنىڭ اشتى زاردابىن تارتادى (ناقىل سوزدەر 1:24—31). سوندىقتان «تۇزەتۋدى قابىلدايىق، سوندا دانا بولامىز». ناقىل سوزدەر 4:13 تە ايتىلعانداي، «ٴتالىم-تاربيەنى بەرىك ۇستاپ، ودان اجىرامايىق. ونى ساقتايىق، ول — ٴبىزدىڭ ٶمىرىمىز»!
