ازاتتىقتىڭ قۇدايى ەحوباعا قىزمەت ەتەيىك
«ەحوبانىڭ رۋحى بار جەردە ازاتتىق بار» (قورىنتتىقتارعا 2-حات 3:17).
اندەر: 11، 137
1، 2. ا) نەگە ەلشى پاۋىلدىڭ كۇندەرىندە قۇلدىق پەن ازاتتىق وزەكتى ماسەلە بولعان؟ ٵ) ەلشى پاۋىل ناعىز ازاتتىقتىڭ قاينار كوزى دەپ كىمدى اتادى؟
العاشقى ماسىحشىلەر ريم يمپەرياسىندا ٶمىر سۇرگەن. ونداعى ادامدار زاڭدارىن، ٵدىل سوت جۇيەسى مەن ەركىندىكتەرىن قاتتى ماقتان تۇتاتىن. دەگەنمەن اۋىر جۇمىستىڭ باسىم بولىگىن قۇلدار اتقاراتىن. ٴبىر كەزدەرى وسى مىقتى يمپەريانىڭ قول استىنداعى ٵر 3 ادامنىڭ بىر ەۋى قۇل بولعان. سوندىقتان حالىق اراسىندا، سونىڭ ىشىندە ماسىحشىلەر ٷشىن دە، قۇلدىق پەن ازاتتىق وزەكتى ماسەلە بولاتىن.
2 ەلشى پاۋىل ازاتتىق جايلى ٴجيى جازعان. ٴبىراق ول سول كەزدەگى كوپشىلىك سياقتى وسى دۇنيەنىڭ ماسەلەلەرىن شەشۋگە تىرىسپاعان. ونىڭ ورنىنا، پاۋىل مەن باسقا دا ماسىحشىلەر كوپ تەر توگىپ، ادامدارعا قۇداي پاتشالىعى جايلى ىزگى حاباردى جەتكىزگەن جانە يسا ٴماسىحتىڭ تولەم قۇرباندىعىنىڭ قانشالىقتى باعالى ەكەنىن تۇسىنۋگە كومەكتەسكەن. پاۋىل ماسىحشىلەرگە ناعىز ازاتتىقتىڭ قاينار كوزى كىم ەكەنىن ايتقان. ول: «ەحوبا — رۋح. ەحوبانىڭ رۋحى بار جەردە ازاتتىق بار»،— دەپ جازعان (قورىنتتىقتارعا 2-حات 3:17).
3، 4. ا) قورىنتتىقتارعا 2-حات 3:17 نىڭ الدىنداعى تارماقتاردا پاۋىل نە تۋرالى ايتقان؟ ٵ) ەحوبادان كەلەتىن ازاتتىققا يە بولۋ ٷشىن نە ىستەۋىمىز قاجەت؟
3 پاۋىل قورىنتتىقتارعا ارنالعان ەكىنشى حاتىندا مۇسا ەحوبانىڭ پەرىشتەسىنىڭ الدىنان كەتىپ، سيناي تاۋىنان تۇسكەندە نە بولعانىن ايتتى. مۇسانىڭ بەت-ٴجۇزى نۇر شاشىپ جارقىراپ تۇرعان ەدى! يسرايلدىكتەر مۇنى كورىپ قورقىپ كەتكەندىكتەن، مۇسا بەتىن پەردەمەن جاۋىپ قويدى (مۇسانىڭ 2-جازباسى 34:29، 30، 33؛ قورىنتتىقتارعا 2-حات 3:7، 13). پاۋىل: «ال ادام ەحوباعا بەت بۇرسا، بۇل پەردە الىنىپ تاستالادى»،— دەگەن (قورىنتتىقتارعا 2-حات 3:16). ونىڭ سوزدەرى نەنى بىلدىرەدى؟
4 الدىڭعى ماقالادان بىلگەنىمىزدەي، ٴبارىن جاراتقان ەحوبا قۇداي عانا شەكسىز، تولىق ەركىندىككە يە. دەمەك، «ەحوبانىڭ رۋحى بار جەردە» ازاتتىق بار. ەگەر ٴبىز وسى ازاتتىققا جەتكىمىز كەلسە، پاۋىل ايتقانداي، ەحوباعا بەت بۇرۋىمىز قاجەت. بۇل دەگەنىمىز ونىمەن تىعىز قارىم-قاتىناستا بولۋدى بىلدىرەدى. ٴشول دالادا جۇرگەندە يسرايلدىكتەر ەحوبانىكىندەي كوزقاراس تانىتپاي، تەك ادامي كوزقاراس تانىتقان. ولاردىڭ سانالارى مەن جۇرەكتەرىن پەردە جاۋىپ تۇرعانداي ەدى. ولار ەندى عانا قول جەتكىزگەن ازاتتىقتارىن قارا باستارىنىڭ قالاۋىن قاناعاتتاندىرۋ ٷشىن قولدانعىسى كەلدى (ەۆرەيلەرگە 3:8—10).
ٴتىپتى تۇرمەدە وتىرعان ادام ازاتتىققا يە بولا الادى
5. ا) ەحوبانىڭ رۋحى ٴبىزدى قانداي ازاتتىققا جەتكىزەدى؟ ٵ) بىرەۋ قۇلدىقتا نە تۇرمەدە بولسا دا، ەحوبا بەرەتىن ازاتتىقتان ايىرىلمايتىنىن قايدان بىلەمىز؟ ب) قانداي سۇراقتاردىڭ جاۋابىن قاراستىرامىز؟
5 ەحوبانىڭ رۋحى بەرەتىن ازاتتىق قۇلدىقتان ازات ەتىلۋدەن دە كەرەمەت. بۇل رۋح ادامزاتتىڭ قولى ەشقاشان جەتپەگەن ازاتتىققا جەتكىزەدى. ول ٴبىزدى كۇنا مەن ٶلىمنىڭ قۇلدىعىنان جانە جالعان عيبادات پەن سوعان قاتىسى بار داستۇرلەردىڭ قۇلدىعىنان ازات ەتە الادى (ريمدىكتەرگە 6:23؛ 8:2). نەتكەن تاماشا ازاتتىق دەسەڭىزشى! ٴتىپتى قۇلدىقتا جۇرگەن نە تۇرمەدە وتىرعان ادامنىڭ ٶزى بۇل ازاتتىققا يە بولا الادى (مۇسانىڭ 1-جازباسى 39:20—23). نەنسي يۋەن مەن حارولد كينك باۋىرلاستارىمىز سەنىمدەرى ٷشىن ٴبىرتالاي جىل اباقتىدا وتىرسا دا، ولاردا وسىنداي ازاتتىق بولدى. ولاردىڭ ٶز وقيعاسىن قالاي بايانداعانىن JW Broadcasting ارناسىنان كورە الاسىز (سۇحباتتار مەن ومىردە بولعان وقيعالار تار جول تايعاق كەشۋ دەگەن جەرگە كىرىڭىز). قازىر ەكى سۇراقتىڭ جاۋابىن قاراستىرىپ كورەيىك: ازاتتىعىمىز ٴبىز ٷشىن اسا باعالى ەكەنىن قالاي دالەلدەي الامىز؟ ەركىندىگىمىزدى قالاي دانالىقپەن قولدانا الامىز؟
ەحوبا بەرەتىن ازاتتىق وتە باعالى
6. يسرايلدىكتەر ەحوبا بەرگەن ازاتتىقتىڭ قادىرىن بىلمەگەنى نەدەن كورىنەدى؟
6 بىرەۋدەن باعالى سىيلىق العاندا، ٴبىز سول ادامعا ريزا بولامىز. ال يسرايلدىكتەر ەحوبا بەرگەن ازاتتىقتىڭ قادىرىن بىلمەدى. مىسىردىڭ قۇلدىعىنان بوساعاندارىنا نە ٴبارى بىرنەشە اي بولعاندا، ولار سونداعى ٸشىپ-جەگەن تاماقتارىن اڭساي باستادى. حالىق ەحوبا ازىق ەتىپ بەرگەن ماننانى جاقتىرماي، نارازىلىق ٴبىلدىردى. ٴتىپتى مىسىرعا قايتقىسى كەلدى! ولار ٷشىن ەحوباعا عيبادات ەتۋگە مۇمكىندىك بەرەتىن ازاتتىقتان گورى، «بالىق، قيار، قاربىز، جۋا، پياز، سارىمساق» باعالى بولدى. ەحوبانىڭ ولارعا نەلىكتەن اشۋلانعانى تۇسىنىكتى-اق (مۇسانىڭ 4-جازباسى 11:5، 6، 10؛ 14:3، 4). بۇل ٴبىز ٷشىن ماڭىزدى ساباق بولىپ تابىلادى.
7. قورىنتتىقتارعا 2-حات 6:1 دەگى كەڭەسىن پاۋىل ٶزى قالاي قولداندى جانە بۇل كەڭەستى ٴبىز قالاي قولدانا الامىز؟
7 پاۋىل بارلىق ماسىحشىلەرگە ەسكەرتىپ، ەحوبانىڭ ۇلى يسا ٴماسىح ارقىلى بەرگەن ازاتتىعىن باعالاماي كەتۋدەن اۋلاق بولۋدى ايتقان (قورىنتتىقتارعا 2-حات 6:1 وقىڭىز). پاۋىل كەمەلسىز، كۇنا مەن ٶلىمنىڭ قۇلى بولعان، ٵرى سول ٷشىن وتە جامان كۇي كەشكەن. ٴبىراق ول: «يەمىز يسا ٴماسىح ارقىلى مەنى قۇتقارىپ الاتىن قۇدايعا راحىمەت!»— دەگەن. ول نەگە بۇلاي ايتقان؟ پاۋىل مۇنى باۋىرلاستارىنا بىلاي ٴتۇسىندىردى: «سەبەبى ٴماسىح يسامەن بىرلىكتەگىلەرگە ٶمىر بەرەتىن رۋح زاڭى سەنى كۇنا مەن ٶلىمنىڭ زاڭىنان بوساتتى» (ريمدىكتەرگە 7:24، 25؛ 8:2). ٴبىز دە پاۋىل سياقتى، ەحوبانىڭ ٴبىزدى كۇنا مەن ٶلىمنىڭ قۇلدىعىنان ازات ەتكەنىن ەشقاشان ۇمىتپاۋىمىز كەرەك. تولەمنىڭ ارقاسىندا ٴبىز قۇدايىمىزعا تازا ار-ۇجدانمەن قىزمەت ەتە الامىز، ٵرى بۇل ٴبىزدى شىنىمەن قۋانىشقا بولەيدى (ٴزابۇر 40:8).
تاڭداۋ ەركىڭىزدى ەحوبانىڭ قالاۋىن ورىنداۋ ٷشىن قولداناسىز با، الدە ٶز قالاۋىڭىزدى ورىنداۋ ٷشىن بە؟ (8—10 ابزاستاردى قاراڭىز)
8، 9. ا) ەركىندىگىمىزدى قالاي قولدانۋىمىز كەرەكتىگىنە قاتىستى ەلشى پەتىر قانداي ەسكەرتۋ ايتقان؟ ٵ) ادام ٶزىنىڭ ەركىندىگىن قالاي بۇرىس قولدانىپ كەتۋى مۇمكىن؟
8 ٴبىز ەحوباعا العىس ايتىپ قانا قويماي، ەركىندىگىمىزدى بۇرىس قولدانىپ كەتۋدەن اۋلاق بولۋىمىز كەرەك. مىسالى، ەلشى پەتىر ەركىندىگىمىزدى جامان ىستەرىمىزدى اقتاۋ ٷشىن قولدانباۋ كەرەكتىگىن ەسكەرتكەن (پەتىردىڭ 1-حاتى 2:16 وقىڭىز). بۇل ەسكەرتۋ ٴشول دالادا يسرايلدىكتەرمەن نە بولعانىن ەسىمىزگە سالادى. بۇگىندە ٴبىز ٷشىن بۇل ەسكەرتۋدىڭ ماڭىزدىلىعى بۇرىنعىدان دا زور سياقتى. ويتكەنى شايتان مەن ونىڭ دۇنيەسى بىزگە كيەتىن، ٸشىپ-جەيتىن، كوڭىل كوتەرەتىن كوپتەگەن تارتىمدى نارسەلەردى ۇسىنۋدا. جارناما جاساۋدىڭ قاس شەبەرلەرى كەلبەتتى ادامداردى قولدانىپ، قانداي دا ٴبىر زاتتى، شىن مانىندە قاجەت ەتپەسەك تە، ساتىپ الۋىمىز كەرەك دەگەن ويعا يلاندىرادى. وسى دۇنيەنىڭ ارباۋىنا بەرىلىپ، ەركىندىگىمىزدى بۇرىس قولدانىپ كەتۋ وپ-وڭاي بولۋى مۇمكىن.
9 پەتىردىڭ كەڭەسىن ومىردەگى الدەقايدا ۇلكەن ماسەلەلەردە دە قولدانۋعا بولادى. مىسالى، ٴبىلىم الۋ، جۇمىس ىستەۋ نە ٴمانساپ قۋۋعا قاتىستى تاڭداۋ جاساعاندا. بۇگىندە جاستارعا ەڭ جاقسى جوعارى وقۋ ورنىنا ٴتۇسۋ ٷشىن بارىنشا تىرمىسۋ كەرەك دەپ، جان-جاقتى قىسىم كورسەتىلەدى. كوبىسى ولارعا جوعارى ٴبىلىم السا، جاقسى جۇمىسقا تۇرىپ، داۋلەتتى جانە قۇرمەتتى ادام بولاتىنىن ايتىپ جاتادى. ولار ورتا بىلىمدىلەرگە قاراعاندا، جوعارى وقۋ ورنىن بىتىرگەندەر كوبىرەك اقشا تاباتىنىن دالەلدەيتىندەي كورىنەتىن مالىمەتتەر كەلتىرۋى مۇمكىن. بۇكىل ومىرلەرىنە اسەر ەتەتىن شەشىم قابىلدار كەزدە، جاستارعا جوعارى ٴبىلىم الۋ تابىلعان اقىل بولىپ كورىنەتىن شىعار. ٴبىراق ولاردىڭ وزدەرى جانە اتا-انالارى نەنى ەستەن شىعارماۋ كەرەك؟
10. جەكە ماسەلەگە قاتىستى شەشىم قابىلداعاندا نەنى ۇمىتپاۋىمىز قاجەت؟
10 كەيبىرى: «بۇل اركىمنىڭ جەكە ماسەلەسى عوي، ار-ۇجدانى مازالامايتىن بولسا، ادام ٶز قالاعانىن تاڭداۋعا ەرىكتى»،— دەپ ويلاۋى مۇمكىن. ولار پاۋىلدىڭ: «باسقا بىرەۋدىڭ ار-ۇجدانىنىڭ مەنىڭ ەركىندىگىمدى ايىپتاعانىن قالامايمىن»،— دەگەن سوزدەرىن كەلتىرەتىن شىعار (قورىنتتىقتارعا 1-حات 10:29). قانداي ٴبىلىم الىپ، قانداي جۇمىسقا تۇراتىنىمىزدى تاڭداۋعا ەرىكتى بولعانىمىزبەن، ەركىندىگىمىزدىڭ شەكتەۋلى ەكەنىن جانە ٵر شەشىمىمىزدىڭ سالدارى بولاتىنىن ۇمىتپاۋىمىز قاجەت. سول سەبەپتەن دە پاۋىل بىلاي دەگەن: «ٴبارىن ىستەۋگە بولادى، ٴبىراق ٴبارى بىردەي پايدالى ەمەس. ٴبارىن ىستەۋگە بولادى، ٴبىراق ٴبارى بىردەي رۋحاني نىعايتپايدى» (قورىنتتىقتارعا 1-حات 10:23). دەمەك، جەكە ماسەلەلەردە تاڭداۋ ەركىمىزدىڭ بولعانى قالاۋىمىز ەڭ باستى ورىندا تۇرۋ كەرەك دەگەندى بىلدىرمەيدى.
ەحوباعا قىزمەت ەتسەك، ەركىندىگىمىزدى دانالىقپەن قولدانامىز
11. ەحوبا ٴبىزدى نە ٷشىن ازات ەتتى؟
11 پەتىر ەركىندىگىمىزدى بۇرىس قولدانباۋدى ەسكەرتكەن كەزدە، ونى دۇرىس قولدانۋدىڭ جولى «قۇدايدىڭ قۇلدارى رەتىندە» پايدالانۋ ەكەنىن ايتقان. ٴبىز بۇكىل عۇمىرىمىزدى ەحوباعا قىزمەت ەتۋگە ارناي الامىز. ەحوبا ٴبىزدى يسا ارقىلى كۇنا مەن ٶلىمنىڭ قۇلدىعىنان سول ٷشىن ازات ەتكەن.
ەركىندىگىمىزدى قولدانۋدىڭ ەڭ دۇرىس جولى — ۋاقىتىمىز بەن كۇشىمىزدى ەحوباعا تولىقتاي قىزمەت ەتۋگە ارناۋ
12. نۇح پەن ونىڭ وتباسى بىزگە قاي جاعىنان ۇلگى قالدىردى؟
12 ەركىندىگىمىزدى قولدانۋدىڭ ەڭ دۇرىس جولى — ۋاقىتىمىز بەن كۇشىمىزدى ەحوباعا تولىقتاي قىزمەت ەتۋگە ارناۋ. سولاي ەتسەك، وسى دۇنيەلىك ماقساتتار مەن جەكە باسىمىزدىڭ قالاۋلارى ومىرىمىزدە ەڭ باستى ورىنعا شىعىپ كەتپەيدى (عالاتتىقتارعا 5:16). نۇح پەن ونىڭ وتباسىن ەسكە الايىقشى. ولار زورلىق-زومبىلىق پەن ازعىندىق جايلاعان الەمدە ٶمىر سۇرسە دە، اينالاسىنداعى ادامداردىڭ ماقساتتارى مەن ىستەرىنە ەش قاتىسى بولمادى. ولار ەحوبا تاپسىرعان ٸستى باس الماي اتقارۋدى شەشتى. ولار كەمە جاسادى، وزدەرىنە جانە جانۋارلارعا ازىق جينادى، سونداي-اق جۇرتقا توپان سۋ جايلى ەسكەرتتى. «نۇح ٴبارىن قۇدايدىڭ بۇيىرعانى بويىنشا جاسادى. قۇداي قالاي ايتسا، ٴدال سولاي ىستەدى» (مۇسانىڭ 1-جازباسى 6:22). ال ناتيجەسىندە، سول دۇنيە جويىلعاندا نۇح وتباسىمەن بىرگە امان قالدى (ەۆرەيلەرگە 11:7).
13. ەحوبا بىزگە نە ىستەۋدى بۇيىردى؟
13 ال بۇگىنگى كۇنى ەحوبا بىزگە نە تاپسىردى؟ يسانىڭ شاكىرتتەرى بولعاندىقتان، قۇداي بىزگە ۋاعىزداۋدى بۇيىرعانىن بىلەمىز (لۇقا 4:18، 19 وقىڭىز). بۇگىندە شايتان ادامداردىڭ باسىم كوپشىلىگىنىڭ ساناسىن سوقىر قىلىپ قويعان. سول سەبەپتەن دە ولار جالعان دىنگە، دۇنيە-مۇلىككە، ساياسي جۇيەگە قۇل بولىپ جۇرگەندەرىن اڭعارمايدى (قورىنتتىقتارعا 2-حات 4:4). يسا سياقتى، ٴبىز دە ادامدارعا ازاتتىقتىڭ قۇدايى ەحوبانى تانىپ-ٴبىلىپ، وعان عيبادات ەتۋگە كومەكتەسۋ مارتەبەسىنە يەمىز (ماتاي 28:19، 20). ادامدارعا ۋاعىزداۋ وڭاي ەمەس، ارينە. كەيبىر جەرلەردە ادامدار قۇداي جايلى بىلگىسى كەلمەيدى، ال كەيبىرى ٴتىپتى اشۋلانىپ جاتادى. ٴبىراق ەحوبا بىزگە ۋاعىزداۋدى بۇيىرعاندىقتان: «ەركىندىگىمدى ەحوباعا كوبىرەك قىزمەت ەتۋ ٷشىن قولدانا الامىن با؟»— دەپ ويلانعانىمىز ٴجون.
14، 15. ەحوبانىڭ كوپ قىزمەتشىسى قانداي شەشىم قابىلداعان؟ (ماقالانىڭ باسىنداعى سۋرەتتى قاراڭىز.)
14 ٴبىر قۋانتارلىق جايت، ەحوبانىڭ كوپ قىزمەتشىسى وسى دۇنيەنىڭ اقىرى وتە جاقىن قالعانىن ٴتۇسىنىپ، قاراپايىم ٶمىر ٴسۇرۋدى جانە ٸزاشار بولىپ قىزمەت ەتۋدى تاڭداپ جاتىر (قورىنتتىقتارعا 1-حات 9:19، 23). ولاردىڭ كەيبىرى ٶزى تۇراتىن جەردە ٸزاشار بولىپ قىزمەت ەتسە، باسقالارى كومەككە مۇقتاج قاۋىمدارعا كوشىپ بارۋدا. سوڭعى بەس جىل ىشىندە 250 000 نان استام باۋىرلاس ٸزاشارلىق قىزمەتتى باستادى، قازىر تۇراقتى ٸزاشارلاردىڭ سانى 1 100 000 نان اسادى. سونشاما ادامنىڭ ٶز ەركىندىكتەرىن ەحوباعا قىزمەت ەتۋ ٷشىن وسىلاي قولدانىپ جاتقانى نەتكەن كەرەمەت! (ٴزابۇر 110:3).
15 ەركىندىگىن دانالىقپەن قولدانۋعا ولارعا نە كومەكتەستى؟ سوڭعى 30 جىل ىشىندە بىرنەشە ەلدە قىزمەت ەتكەن جون مەن جۋديتتى الايىق. ولاردىڭ ايتۋىنشا، 1977-جىلى ٸزاشارلىق قىزمەت مەكتەبى باستالعاندا، وقۋشىلار قاجەتتىلىك بار جەرلەرگە كوشىپ، سوندا قىزمەت ەتۋگە تالپىندىرىلعان. وسىلاي ەتۋ ٷشىن جون مەن جۋديتكە قاراپايىم ٶمىر كەشۋ ماڭىزدى ەدى. سوندىقتان جون جۇمىسىن ٴجيى اۋىستىرعان. ٴسويتىپ ٴجۇرىپ، ەكەۋى ۋاعىزداۋ ماقساتىمەن شەتەلگە كوشىپ بارادى. ولارعا جاڭا ٴتىلدى يگەرۋ، وزگە مادەنيەت پەن اۋا رايىنا ۇيرەنۋ سەكىلدى قيىندىقتاردى جەڭۋگە نە كومەكتەستى؟ ولار ەحوباعا دۇعا ەتىپ، ونىڭ كومەگىنە ارقا سۇيەدى. كوپ جىل بويى ەحوباعا وسىلاي قىزمەت ەتىپ كەلە جاتقاندارى ولاردى قانداي سەزىمگە بولەيدى؟ جون بىلاي دەدى: «بۇل ومىرىمدەگى بەرىلە اتقارعان ەڭ كەرەمەت ٸس بولدى دەپ ويلايمىن. ەحوبانىڭ شىنىندا دا بار ەكەنىنە كوزىم جەتە ٴتۇستى، ول ماعان تۋرا ٴبىر مەيىرىمدى اكەدەي بولىپ كەتتى. جاقىپ 4:8 دەگى: «قۇدايعا جاقىنداڭدار، سوندا ول دا سەندەرگە جاقىندايدى»،— دەگەن سوزدەردى تەرەڭ تۇسىنەتىن بولدىم. ومىردە قاناعات سىيلايتىن ٴمان-ماعىنانى ىزدەگەن ەدىم، سونى تاپقانىمدى ٴتۇسىندىم».
16. مىڭداعان باۋىرلاس ەركىندىكتەرىن قالاي دانالىقپەن قولدانۋدا؟
16 كەيبىرەۋلەر جون مەن جۋديت سياقتى ۇزاق ۋاقىت ٸزاشار بولىپ قىزمەت ەتە الادى. ال كەيبىرى جاعدايعا بايلانىستى ٸزاشارلىق قىزمەتتى شامالى ۋاقىت قانا اتقارا الادى. دەسە دە كوپ باۋىرلاستار دۇنيە جۇزىلىك قۇرىلىس جوبالارىنا ەرىكتى قىزمەتشى بولىپ بارۋدا. مىسالى، ۋورۆيكتەگى (نيۋ-يورك) دۇنيە جۇزىلىك باس باسقارمانى سوعۋعا 27 000 عا جۋىق باۋىرلاس اتسالىستى. كەيبىرى ەكى اپتاعا كەلسە، وزگەلەرى بىرنەشە ايعا، ال باسقالارى ٴبىر نە ودان دا كوپ جىلعا كەلگەن. بۇل باۋىرلاستاردىڭ كوبى ۋورۆيكتە قىزمەت ەتۋ ٷشىن قۇرباندىقتارعا بارعان. ولار ەركىندىكتەرىن ازاتتىقتىڭ قۇدايى ەحوبانى ماداقتاپ، دارىپتەۋ ٷشىن قولدانۋدىڭ تاماشا ۇلگىسىن كورسەتتى!
17. قازىردىڭ وزىندە ازاتتىعىمىزدى دانالىقپەن پايدالاناتىن بولساق، بولاشاقتان نە كۇتە الامىز؟
17 ەحوبانى تانىپ-بىلە العانىمىز ٷشىن جانە وعان عيبادات ەتۋ ارقىلى يە بولعان ازاتتىق ٷشىن العىسىمىز شەكسىز. قابىلداعان شەشىمدەرىمىزبەن وسى ازاتتىعىمىزدى ايرىقشا باعالايتىنىمىزدى كورسەتە بەرەيىك. ونى بۇرىس قولدانۋدىڭ ورنىنا، ەحوباعا مۇمكىندىگىنشە تولىقتاي قىزمەت ەتۋگە قولدانايىق. سوندا ەحوبانىڭ كەلەسى پايعامبارلىعى ورىندالعان كەزدە توگىلەتىن باتالارعا كەنەلە الامىز: «جاراتىلىستىڭ دا كۇنا مەن ٶلىمنىڭ قۇلدىعىنان بوساپ، قۇداي بالالارىنىڭ سالتاناتتى بوستاندىعىنا جەتۋگە ٷمىتى بار» (ريمدىكتەرگە 8:21).
