جاستار، رۋحاني ماقساتتاردى كوزدەيسىڭدەر مە؟
«بار ٸسىڭدى ەحوباعا سەنىپ تاپسىر، سوندا جوسپارلارىڭ ىسكە اسار» (ناقىل سوزدەر 16:3).
اندەر: 89، 24
1—3. ا) جاستاردىڭ بارلىعىنا نە ىستەۋ كەرەك جانە مۇنى نەمەن سالىستىرۋعا بولادى؟ (ماقالانىڭ باسىنداعى سۋرەتتى قارا.) ٵ) مۇنداي جاعدايدا جاس ماسىحشىلەرگە نە كومەكتەسەدى؟
ەلەستەتىپ كورشى. سەن الىستاعى ٴبىر قالادا وتەتىن ەرەكشە جيىنعا بارعالى جاتىرسىڭ دەلىك. ول جاققا جەتۋ ٷشىن اۆتوبۋسقا وتىرۋىڭ كەرەك. جولاۋشىلار بەكەتىنە كەلگەندە، قاپتاعان ادامدار مەن اۆتوبۋستاردى كورىپ، ٴبىراز ابىرجىپ قالاسىڭ. ٴبىراق، قۋانىشقا وراي، سەن قايدا باراتىنىڭدى، قاي اۆتوبۋسقا وتىراتىنىڭدى ناقتى بىلەسىڭ. باسقا ەشقانداي اۆتوبۋسقا وتىرمايسىڭ، ويتكەنى ولار سەنى مۇلدەم باسقا جاققا اپارىپ تاستايتىنىن بىلەسىڭ.
2 ٶمىر دە ساياحات سياقتى. ال سەندەر، جاستار، جولاۋشىلار بەكەتىندە تۇرعان ادامدارعا ۇقسايسىڭدار. كەيدە ومىردە شەشىمدەر مەن تاڭداۋلاردىڭ كوپ بولاتىنى سونشا — ابدىراپ قالۋىڭ مۇمكىن. ٴبىراق قايدا بارعىڭ كەلەتىنىن ناقتى بىلسەڭ، دۇرىس شەشىم قابىلداۋ وڭايىراق بولادى. ەندەشە، سەنىڭ قاي باعىتتا جۇرگەنىڭ دۇرىس؟
3 بۇل ماقالا وسى سۇراققا جاۋاپ بەرەدى. سونداي-اق سەنى ەحوباعا ۇنامدى بولۋدى كوزدەۋگە تالپىندىرادى. بۇل دەگەنىمىز ٴبىلىم الۋ، جۇمىسقا تۇرۋ، نەكە قۇرۋ جانە بالالى بولۋ سياقتى كەز كەلگەن ماسەلەدە ەحوبانىڭ اقىل-كەڭەسىنە جۇگىنە وتىرىپ شەشىم قابىلداۋدى بىلدىرەدى. بۇعان قوسا، رۋحاني ماقساتتارعا، ياعني ەحوباعا جاقىنداي تۇسۋگە كومەكتەسەتىن ماقساتتارعا ۇمتىلۋدى دا قامتيدى. نازارىڭدى ەحوباعا قىزمەت ەتۋدەن تايدىرماساڭ، ول ساعان باتاسىن بەرىپ، تابىسقا جەتۋگە كومەكتەسەتىنىنە كۇماندانباساڭ بولادى (ناقىل سوزدەر 16:3 وقى).
نەگە رۋحاني ماقساتتار قويۋ كەرەك؟
4. بۇل ماقالادا ٴبىز نە قاراستىرامىز؟
4 رۋحاني ماقساتتار قويعاننىڭ پايداسى زور. نەگە؟ مۇنىڭ ٷش سەبەبىن قاراستىراتىن بولامىز. ٴبىرىنشى جانە ەكىنشى سەبەبىنەن رۋحاني ماقساتتارعا ۇمتىلۋ ەحوبامەن دوستىعىڭدى ودان بەتەر نىعايتاتىنىن كورەسىڭ. ال ٷشىنشى سەبەبىنەن وسىنداي ماقساتتارعا جاستايىڭنان ۇمتىلعانىڭ نەلىكتەن پايدالى ەكەنىن كورە الاسىڭ.
5. رۋحاني ماقساتتار قويۋدىڭ ەڭ باستى سەبەبى قانداي؟
5 رۋحاني ماقساتتار قويۋدىڭ ەڭ باستى سەبەبى — ەحوبانىڭ سۇيىسپەنشىلىگىنە جانە ونىڭ ٴبىز ٷشىن جاساعان يگىلىكتەرىنە ريزاشىلىق ٴبىلدىرۋ. ٴزابۇر جىرشىلارىنىڭ ٴبىرى: «ەحوباعا العىس ايتقان جاقسى... ويتكەنى، ۋا، ەحوبا، ىستەرىڭمەن مەنى قۋانتاسىڭ؛ قولىڭمەن جاساعان ىستەردى كورىپ، شاتتانا ٵن سالامىن»،— دەگەن (ٴزابۇر 92:1، 4). ەحوبانىڭ ساعان قانشاما نارسە بەرگەنىن ويلاشى. ول ساعان ٶمىر، سەنىم، كيەلى كىتاپ، قاۋىم جانە جۇماقتا ماڭگى ٶمىر ٴسۇرۋ ٷمىتىن بەردى. الدىڭا رۋحاني ماقساتتار قويار بولساڭ، ەحوباعا بارلىق جاقسىلىعى ٷشىن ريزا ەكەنىڭدى كورسەتەسىڭ جانە وعان جاقىنداي تۇسەسىڭ.
6. ا) رۋحاني ماقساتتار ەحوبامەن قارىم-قاتىناسىڭا قالاي اسەر ەتەدى؟ ٵ) جاس كەزىڭدە قانداي ماقساتتار قويۋىڭا بولادى؟
6 ەكىنشى سەبەبىن الساق، رۋحاني ماقساتتارعا جەتۋ ٷشىن ارەكەتتەنگەن كەزدە، سەن ەحوباعا ۇنامدى ىستەر ىستەيسىڭ. بۇل دا سەنى وعان جاقىنداتا تۇسەدى. ەلشى پاۋىل بىلاي دەپ ۋادە ەتكەن: «قۇداي ادىلەتسىز ەمەس. ول... ٶزىنىڭ ەسىمىنە دەگەن سۇيىسپەنشىلىكتەرىڭ مەن ەڭبەكتەرىڭدى ۇمىتپايدى» (ەۆرەيلەرگە 6:10). ماقساتتار قويۋعا ەشقاشان ەرتە ەمەس. مىسالى، كريستين 10 جاسىندا ادال باۋىرلاستاردىڭ ٶمىر باياندارىن جۇيەلى تۇردە وقۋدى ماقسات ەتكەن. توبي شومىلدىرۋ راسىمىنەن وتپەس بۇرىن كيەلى كىتاپتى تولىق وقىپ شىعۋدى ۇيعارعاندا 12 جاستا بولعان. ماكسيم 11 جاسىندا، ال قارىنداسى نوەمي 10 جاسىندا شومىلدىرۋ راسىمىنەن وتكەن. ەكەۋى دە بەتەلدە قىزمەت ەتۋدى ماقسات ەتكەن. وسى ماقساتتارىن كوز الدارىندا ۇستاۋ ٷشىن ولار بەتەلدە قىزمەت ەتۋگە ارنالعان ٶتىنىش قاعازىن ۇيلەرىندەگى قابىرعاعا ٸلىپ قويعان. ال سەن جايلى نە دەۋگە بولادى؟ سەنىڭ قانداي ماقساتتارىڭ بار؟ ولارعا قول جەتكىزۋ ٷشىن نە ىستەي الاسىڭ؟ (فىلىپىلىكتەرگە 1:10، 11 وقى).
7، 8. ا) نەگە ماقساتتار قويساڭ، شەشىمدەر قابىلداۋ وڭايىراق بولادى؟ ٵ) نەگە ٴبىر باۋىرلاس جاس ٶسپىرىم كەزىندە ۋنيۆەرسيتەتكە تۇسپەۋدى شەشكەن؟
7 جاستايىڭنان ماقساتتار قويۋدىڭ نەلىكتەن پايدالى ەكەنىنە ٷشىنشى سەبەپ كەلتىرەيىك. جاس بولعاندىقتان، سەنىڭ كوپ شەشىمدەر قابىلداۋىڭ قاجەت. مىسالى، قانداي ٴبىلىم الاتىنىڭدى، قانداي جۇمىسقا تۇراتىنىڭدى جانە باسقا دا كوپ جايتتاردى شەشىپ الۋىڭ كەرەك. ومىردەگى مۇنداي شەشىمدەر ساپار كەزىندە الدىڭنان شىعاتىن جولايرىققا ۇقسايدى. قايدا بارا جاتقانىڭدى بىلسەڭ، قاي جولمەن جۇرەتىنىڭدى شەشۋ وڭاي بولادى. سول سياقتى، ماقساتتارىڭنىڭ قانداي ەكەنىن بىلسەڭ، دانا شەشىمدەر قابىلداۋ وڭايىراق بولادى. ناقىل سوزدەر 21:5 تە: «ىنتالىنىڭ جوسپارلارى تابىسقا جەتەلەر»،— دەلىنگەن. نەعۇرلىم ەرتەرەك جاقسى ماقساتتار قويىپ، جوسپار قۇرساڭ، سوعۇرلىم تەزىرەك تابىسقا جەتەسىڭ. داماريستىڭ جاعدايىندا سولاي بولعان. جاس ٶسپىرىم كەزىندە ول ماڭىزدى ٴبىر شەشىم قابىلداعان.
8 داماريس مەكتەپتى وتە جاقسى باعامەن بىتىرگەن. سوندىقتان ۋنيۆەرسيتەتتىڭ زاڭ فاكۋلتەتىنە تەگىن تۇسە الاتىن. ٴبىراق ول مۇنىڭ ورنىنا، قاراپايىم جۇمىسقا تۇرۋدى شەشتى. نەگە؟ ويتكەنى ول كىشكەنتايىنان ٸزاشار بولۋدى ماقسات ەتىپ قويعان. ول بىلاي دەيدى: «بۇل ٷشىن كوپ ۋاقىت المايتىن جۇمىسقا تۇرۋىم كەرەكتىگىن ٴتۇسىندىم. ارينە، ۋنيۆەرسيتەت ديپلومىمەن كوپ اقشا تابار ەدىم، ٴبىراق جارتىلاي ۋاقىتتى جۇمىس تابۋىم قيىن بولار ەدى». داماريس 20 جىلدان بەرى ٸزاشار بولىپ كەلەدى. ول قويعان ماقساتى مەن جاس ٶسپىرىم كەزىندە قابىلداعان شەشىمى تۋرالى نە ويلايدى؟ ول دۇرىس تاڭداۋ جاسادىم دەپ سانايدى. جۇمىسىندا ول كوپتەگەن زاڭگەرلەردى كەزدەستىرەدى ەكەن. ٶزى دە ۋنيۆەرسيتەتتە وقىپ شىققاندا، سولار سياقتى جۇمىس ىستەر ەدى. ونىڭ ايتۋىنشا، ولاردىڭ كوبىسىنىڭ ٶز جۇمىستارىنا مۇلدەم كوڭىلدەرى تولمايدى. داماريس ٸزاشارلىق قىزمەت وزىنە جىلدار بويى كوپ قۋانىش سىيلاعانىن جانە سول ادامدار سياقتى باقىتسىز بولۋدان ساقتاپ قالعانىن ايتادى.
9. نەگە ٴبىز جاستارىمىزدى ماقتان تۇتامىز؟
9 دۇنيە جۇزى بويىنشا مىڭداعان جاستار دۇرىس ارەكەت ەتىپ ٴجۇر. ولار ماقتاۋعا ابدەن لايىق. ەحوبامەن دوستىق قارىم-قاتىناستارى جانە رۋحاني ماقساتتارى ولاردىڭ ومىرىندە باستى ورىندا تۇر. بۇل جاستار ومىردەن ناعىز قۋانىش الىپ ٴجۇر. سونداي-اق ولار ٴبىلىم، جۇمىس نە وتباسى ٶمىرى سياقتى ماسەلەلەردىڭ بارىندە ەحوبانىڭ نۇسقاۋلارىنا قۇلاق اسۋدى ۇيرەنۋدە. سۇلەيمەن پاتشا بىلاي دەگەن: «ەحوباعا بار جۇرەگىڭمەن سەنىم ارت... بارلىق ىسىڭدە ونى ەسكەر، سوندا ول جولىڭدى تەگىستەر» (ناقىل سوزدەر 3:5، 6). جاستار، ەحوبا سەندەردى قاتتى جاقسى كورەدى! سەندەر ول ٷشىن وتە باعالىسىڭدار. ول سەندەردى قورعايدى، باسشىلىعى مەن باتاسىن بەرەدى.
وزگەلەرگە ەحوبا تۋرالى ايتۋ ٷشىن جاقسىلاپ دايىندال
10. ا) نەگە ۋاعىز ٸسى ٴبىز ٷشىن ەڭ ماڭىزدى ىستەردىڭ قاتارىندا بولۋ كەرەك؟ ٵ) نانىمدارىڭدى جاقسىراق ٴتۇسىندىرۋ ٷشىن نە ىستەي الاسىڭ؟
10 ەحوباعا ۇنامدى بولۋدى كوزدەسەڭ، ول جايلى باسقالارعا ايتقىڭ كەلەرى ٴسوزسىز. يسا ٴماسىح «الدىمەن بارلىق حالىقتارعا ىزگى حابار ۋاعىزدالۋ كەرەكتىگىن» ايتقان (مارقا 13:10). ۋاعىز ٸسى شۇعىل بولعاندىقتان، ٴبىز ٷشىن ول ەڭ ماڭىزدى ىستەردىڭ قاتارىندا بولۋ كەرەك. سەن ادەتتەگىدەن كوبىرەك ۋاعىزداۋدى ماقسات ەتە الاسىڭ با؟ ٸزاشار بولا الار ما ەدىڭ؟ ال ەگەر ۋاعىزداۋدى ونشا ۇناتپاساڭ شى؟ وزگەلەرگە نانىمدارىڭدى جاقسىراق ٴتۇسىندىرۋ ٷشىن نە ىستەي الاسىڭ؟ ساعان ەكى نارسە كومەكتەسەدى: بىرىنشىدەن، جاقسىلاپ دايىندال، ەكىنشىدەن، ەش بەرىلمەي، ەحوبا تۋرالى بىلگەندەرىڭدى ايتا بەر. سوندا ۋاعىزداۋدىڭ قانشالىقتى كوپ قۋانىش اكەلەتىنىن كورىپ، تاڭعالۋىڭ مۇمكىن.
وزگەلەرگە ەحوبا تۋرالى ايتۋ ٷشىن قالاي دايىندالاسىڭ؟ (11، 12-ابزاستى قارا)
11، 12. ا) وزگەلەرگە ەحوبا تۋرالى ايتۋ ٷشىن قالاي دايىندالا الاسىڭ؟ ٵ) ٴبىر جاس باۋىرلاس مەكتەپتە ەحوبا تۋرالى ايتۋدىڭ مۇمكىندىگىن قالاي پايدالاندى؟
11 ەڭ الدىمەن، سىنىپتاستارىڭ قويۋى مۇمكىن سۇراقتاردىڭ جاۋابىن دايىندا. ولار: «سەن نە ٷشىن قۇدايعا سەنەسىڭ؟»— دەپ سۇراۋى مۇمكىن. ٴبىزدىڭ jw.org تور بەكەتىمىزدە ساعان بۇل سۇراققا جاۋاپ بەرۋگە كومەكتەسەتىن ماقالالار بار. كيەلى كىتاپ تالىمدەرى / جاستار دەگەن جەرگە كىرسەڭ، «مەن نەگە قۇدايدىڭ بارىنا سەنەمىن؟» دەگەن جۇمىس پاراعىن كورەسىڭ. وزىڭنىڭ جەكە جاۋابىڭدى دايىنداۋ ٷشىن جۇمىس پاراعىنداعى ٵر قادامدى ورىنداپ شىق. سول جەردەن قولدانۋىڭا بولاتىن ٷش تارماقتى كورەسىڭ: ەۆرەيلەرگە 3:4، ريمدىكتەرگە 1:20 جانە ٴزابۇر 139:14. تور بەكەتتە كوپتەگەن سۇراقتارعا جاۋاپتار دايىنداۋعا كومەكتەسەتىن بۇدان باسقا دا جۇمىس پاراقتارى بار (پەتىردىڭ 1-حاتى 3:15 وقى).
12 سىنىپتاستارىڭا jw.org تور بەكەتىنە وزدەرى كىرىپ كورە الاتىندارىن ايت. لۋكا سولاي ەتكەن. بىردە سىنىبىندا ٴتۇرلى دىندەر تۋرالى قاراستىرىلعاندا، ول وقۋلىعىندا ەحوبا كۋاگەرلەرى تۋرالى قاتە مالىمەت جازىلعانىن كورەدى. سوندا لۋكا قوبالجىپ تۇرسا دا، مۇعالىمىنەن جازىلعان مالىمەتتىڭ نەگە قاتە ەكەنىن سىنىپقا ٴتۇسىندىرىپ بەرۋگە رۇقسات سۇرايدى. مۇعالىمى وعان رۇقسات بەرگەندە، ول بۇكىل سىنىپقا نانىمى جايلى ايتادى جانە jw.org تور بەكەتىن كورسەتەدى. سوندا مۇعالىمى وقۋشىلارعا ٷي جۇمىسى رەتىندە «بۇزاقىلاردى جۇدىرىقسىز جەڭە ٴبىل!» دەگەن بەينە كەسكىندى كورىپ كەلۋدى تاپسىرادى. لۋكا مەكتەپتە ەحوبا تۋرالى ايتقانى ٷشىن قالاي قۋانعانىن ەلەستەتە الاسىڭ با؟
13. نەگە قيىندىققا كەزىككەن كەزدە ەش بەرىلمەۋىمىز كەرەك؟
13 قيىندىققا كەزىككەن كەزدە ۇنجىرعاڭدى تۇسىرمەي، ماقساتتارىڭا ارى قاراي ۇمتىلا بەر (تىموتەگە 2-حات 4:2). كاتارينا سولاي ەتكەن. 17 جاسىندا ول ارىپتەستەرىنىڭ بارىنە ۋاعىزداۋدى ماقسات ەتىپ قويعان. سوندا ٴبىر ارىپتەسى اۋىر سوزدەر ايتىپ، ونى بىرنەشە رەت رەنجىتەدى. ٴبىراق كاتارينا ٶز ماقساتىن ەستەن شىعارمايدى. ونىڭ ادەپتى ٴجۇرىس-تۇرىسى حانس دەگەن باسقا ٴبىر ارىپتەسىنە قاتتى اسەر ەتەدى. سودان ول ادەبيەتتەرىمىزدى وقي باستايدى، كيەلى كىتاپتى زەرتتەيدى، شومىلدىرۋ راسىمىنەن وتەدى. كاتارينا ول كەزدە باسقا جاققا كوشىپ كەتكەندىكتەن، مۇنىڭ ەشقايسىسىن بىلمەيدى. ارادا 13 جىل وتكەندە، كاتارينا تاڭعالارلىق جاعدايدىڭ كۋاسى بولادى. ول وتباسىمەن قاۋىمعا كەلگەندە، كوپشىلىككە ارنالعان باياندامانى ايتاتىن باۋىرلاستىڭ حانس ەكەنىن بىلەدى! ول كەزىندە ارىپتەستەرىنە ۋاعىزدايمىن دەگەن ماقساتىنان ەش تايماعانىنا شەكسىز قۋانىشتى بولدى.
ماقساتتارىڭدى ەستەن شىعارما
14، 15. ا) قىسىمعا كەزىككەندە نەنى ەستە ۇستاۋىڭ كەرەك؟ ٵ) وزگەلەردىڭ قىسىمىنا بەرىلىپ قالماۋ ٷشىن نە ىستەي الاسىڭ؟
14 كورگەنىمىزدەي، بۇل ماقالا سەنى ەحوباعا ۇنامدى بولۋدى كوزدەۋگە جانە رۋحاني ماقساتتار قويۋعا تالپىندىرۋدا. ٴبىراق سەن قاتارلى جاستاردىڭ كوبىسى تەك كوڭىل كوتەرۋدى عانا ويلايدى. بالكىم، ولار سەنىڭ دە سولاي ەتكەنىڭدى قالايتىن شىعار. ماقساتتارىڭا قول جەتكىزۋدىڭ سەن ٷشىن قانشالىقتى ماڭىزدى ەكەنىن ەرتەلى-كەش وزگەلەرگە كورسەتۋىڭ كەرەك بولادى. ەشكىمنىڭ وزىڭە قىسىم جاساپ، ماقساتتارىڭدى ۇمىتتىرۋىنا جول بەرمە. ماقالانىڭ باسىندا ايتىلىپ كەتكەن جولاۋشىلار بەكەتىندە تۇرساڭ، ىشىندەگى ادامدار جاقسى ۋاقىت وتكىزىپ جاتىر ەكەن دەپ، كەز كەلگەن اۆتوبۋسقا وتىرا كەتەر مە ەدىڭ؟ ارينە، جوق!
15 باسقالار سەنى وزدەرىنە ەرۋگە قىساعان كەزدە، بەرىلىپ قالماۋ ٷشىن نە ىستەي الاسىڭ؟ قىسىمعا قارسى تۇرۋ قيىن بولاتىن جاعدايلاردان اۋلاق ٴجۇر (ناقىل سوزدەر 22:3). جامان ىستەردىڭ ارتى قانداي قايعىلى جاعدايلارعا اكەپ سوعاتىنىن ويلا (عالاتتىقتارعا 6:7). دانا كەڭەسكە مۇقتاج ەكەنىڭدى كىشىپەيىلدىلىكپەن مويىنداي ٴبىل. اتا-اناڭ مەن قاۋىمىڭداعى تاجىريبەلى باۋىرلاستاردىڭ ايتقان اقىلىن تىڭدا (پەتىردىڭ 1-حاتى 5:5، 6 وقى).
16. كىشىپەيىل بولۋدىڭ ماڭىزدىلىعى كريستوفتىڭ جاعدايىنان قالاي كورىنەدى؟
16 كريستوف دەگەن باۋىرلاسقا اقىل-كەڭەستى قابىلداۋعا كىشىپەيىلدىلىك قاسيەتى كومەكتەسكەن. شومىلدىرۋ راسىمىنەن وتكەننەن كەيىن كوپ ۇزاماي ول فيتنەس ورتالىعىنا بارا باستايدى. سول جەردەگى جاستار ونى وزدەرىنىڭ سپورت كلۋبىنا شاقىرادى. كريستوف بۇل جايلى ٴبىر اقساقالمەن سويلەسەدى. ول ونى باسەكەشىل بولىپ كەتۋ سياقتى كەيبىر قاۋىپتى جايتتار تۋرالى ويلانىپ كورۋگە تالپىندىرادى. كريستوف سوندا دا سپورت كلۋبىنا قوسىلادى. ٴبىراق ول ۋاقىت وتە بۇل سپورت تۇرىنىڭ زورلىق-زومبىلىققا تولى، ٴتىپتى قاۋىپتى ەكەنىن كورەدى. سوندا ول قايتادان اقساقالدارمەن سويلەسەدى. اقساقالدار وعان كيەلى كىتاپقا نەگىزدەپ كەڭەس بەرەدى. كريستوف بىلاي دەيدى: «ەحوبا ماعان جاقسى كەڭەسشىلەر جىبەردى. كەڭەستەرىن قابىلداۋىما ٴبىراز ۋاقىت قاجەت بولعانىمەن، مەن وعان قۇلاق استىم». ال سەنىڭ دانا كەڭەستى قابىلداۋعا كىشىپەيىلدىلىگىڭ جەتە مە؟
17، 18. ا) ەحوبا جاستارعا نە تىلەيدى؟ ٵ) ەسەيگەندە شەشىمدەرىڭە وكىنبەس ٷشىن نە ىستەي الاسىڭ؟ مىسال كەلتىر.
17 كيەلى كىتاپتا: «ۋا، بوزبالا [نە بويجەتكەن]، جاستىق شاعىڭدا قۋان؛ جاس كۇنىڭدە جۇرەگىڭ شاتتىققا تولسىن»،— دەلىنگەن (ۋاعىزداۋشى 11:9). ەحوبا سەنىڭ جاستىق شاعىڭنىڭ قۋانىشقا تولى بولعانىن قالايدى. بۇل ماقالادان بىلگەنىڭدەي، باقىتتى بولۋدىڭ ٴبىر جولى — رۋحاني ماقساتتاردى كوزدەۋ جانە جوسپار قۇرىپ، شەشىم قابىلداعاندا ۇنەمى ەحوبانىڭ اقىل-كەڭەسىنە جۇگىنۋ. وسىلاي ەتۋدى نەعۇرلىم ەرتەرەك باستاساڭ، ەحوبانىڭ قورعايتىنىن، باسشىلىعى مەن باتاسىن بەرەتىنىن سوعۇرلىم تەزىرەك كورەسىڭ. ٶزىنىڭ ٴسوزى ارقىلى ەحوبانىڭ ساعان قانشالىقتى كوپ اقىل-كەڭەس بەرگەنى جايلى ويلان جانە مىنا كەڭەسكە قۇلاق اس: «جاستىق شاعىڭدا ۇلى جاراتۋشىڭدى ەستە ۇستا!» (ۋاعىزداۋشى 12:1).
18 جاستار تەز ٶسىپ، تەز ەسەيەدى. وكىنىشكە قاراي، جاستاردىڭ كوبىسى دۇرىس ەمەس ماقساتتارعا ۇمتىلعاندارى ٷشىن نە مۇلدەم ماقسات قويماعاندارى ٷشىن كەيىن وكىنىپ جاتادى. ەگەر سەن رۋحاني ماقساتتارىڭنان اۋىتقىماساڭ، ەسەيگەندە شەشىمدەرىڭە قۋاناتىن بولاسىڭ. ميريانا مۇنىڭ راستىعىنا كوز جەتكىزگەن. جاس ٶسپىرىم كەزىندە ول وتە جاقسى سپورتشى بولعان. ول ٴتىپتى قىسقى وليمپيادا ويىندارىنا شاقىرىلعان. ٴبىراق ول ودان باس تارتىپ، ەحوباعا تولىق ۋاقىت قىزمەت ەتۋدى شەشكەن. سودان بەرى 30 جىلدان اسا ۋاقىت وتسە دە، ول كۇيەۋىمەن بىرگە ٵلى دە تولىق ۋاقىتتى قىزمەت اتقارىپ كەلەدى. ونىڭ ايتۋىنشا، اتاق-داڭققا، بيلىك پەن بايلىققا ۇمتىلعان ادامدار ەشقاشان ناعىز باقىتقا قول جەتكىزە المايدى. سونداي-اق ول قۇدايعا قىزمەت ەتۋ جانە ول جايلى ادامدارعا ايتۋ ومىردەگى ەڭ جاقسى ماقسات ەكەنىن ايتادى.
19. نەگە جاس كەزىڭدە رۋحاني ماقساتتارعا ۇمتىلعانىڭ جاقسى؟
19 جاستار، سەندەر شىنىمەن دە ماقتاۋعا لايىقتىسىڭدار. ويتكەنى كەزىگىپ جاتقان قيىندىقتارىڭا قاراماستان، ەحوباعا قىزمەت ەتۋ ومىرلەرىڭدە باستى ورىندا تۇر. سەندەر رۋحاني ماقساتتار قوياسىڭدار جانە ۋاعىزداۋ ٸسىن ومىرلەرىڭدەگى ەڭ ماڭىزدى ىستەردىڭ ٴبىرى دەپ قاراستىراسىڭدار. سونداي-اق مىنا دۇنيەگە ماقساتتارىڭدى ۇمىتتىرۋعا جول بەرمەيسىڭدەر. اۋىر ەڭبەكتەرىڭنىڭ بەكەر ەمەس ەكەنىنە سەنىمدى بولىڭدار. باۋىرلاستارىڭ سەندەردى جاقسى كورەدى جانە قولداۋعا دايىن. ەندەشە، «بار ىستەرىڭدى ەحوباعا سەنىپ تاپسىرىڭدار، سوندا جوسپارلارىڭ ىسكە اسار».
