جىگەر بەرۋشى قۇداي ەحوباعا ەلىكتەيىك
«قۇداي... ٴبىزدى قيىندىق كورگەن كەزدىڭ بارىندە جىگەرلەندىرەدى» (قورىنتتىقتارعا 2-حات 1:3، 4، سىلتەمە).
اندەر: 23، 152
1. ادام مەن حاۋا بۇلىك شىعارعاندا، ەحوبا قالاي ادامزاتقا جىگەر مەن ٷمىت سىيلادى؟
ەحوبا — جىگەر بەرۋشى قۇداي. ادامزات كۇنا جاساپ، كەمەلسىزدىككە تاپ بولعالى بەرى ەحوبا ولارعا جىگەر بەرىپ كەلەدى. ادام مەن حاۋا وزىنە قارسى شىققاندا-اق، ول بىردەن پايعامبارلىق ايتتى. كەلەر ۇرپاق مۇسانىڭ 1-جازباسى 3:15 تە جازىلعان اتالمىش پايعامبارلىقتى تۇسىنگەن كەزدە، بۇل ولارعا جىگەر مەن ٷمىت بەرمەك ەدى. پايعامبارلىقتا شايتان ٸبىلىستىڭ ٶزى جانە ونىڭ بۇكىل زۇلىمدىعى قۇرىپ جوق بولاتىنى ۋادە ەتىلگەن (جوحاننىڭ 1-حاتى 3:8؛ ايان 12:9).
ەحوبا ەجەلدەگى قىزمەتشىلەرىن جىگەرلەندىرگەن
2. ەحوبا نۇحتى قالاي جىگەرلەندىردى؟
2 ەحوبا نۇح ەسىمدى قىزمەتشىسىن قالاي جىگەرلەندىرگەنىن ەسكە الايىقشى. ونىڭ زامانىنداعى ادامدار زۇلىم ٵرى ازعىن ەدى، تەك نۇح قانا وتباسىمەن ەحوباعا عيبادات ەتەتىن. وسىنداي جاعدايدا ٶمىر سۇرگەن نۇحتىڭ ەڭسەسى تۇسكەن بولۋى مۇمكىن (مۇسانىڭ 1-جازباسى 6:4، 5، 11؛ ياھۋدا 6). الايدا ەحوبا وعان ارى قاراي دا وزىنە عيبادات ەتۋگە جانە دۇرىس ارەكەت ەتۋگە قاجەتتى جىگەر بەردى (مۇسانىڭ 1-جازباسى 6:9). ول نۇحقا سول زۇلىم دۇنيەنى جويماقشى ەكەنىن ايتتى، ٵرى وتباسىمەن بىرگە امان قالۋ ٷشىن وعان نە ىستەۋ كەرەكتىگىن دە ٴتۇسىندىردى (مۇسانىڭ 1-جازباسى 6:13—18). ەحوبا نۇح ٷشىن جىگەر بەرۋشى قۇداي بولدى.
3. ەحوبا ەشۋانى قالاي جىگەرلەندىردى؟ (ماقالانىڭ باسىنداعى سۋرەتتى قاراڭىز.)
3 كەيىنىرەك ەحوبا ٶزىنىڭ قىزمەتشىسى ەشۋانى جىگەرلەندىردى. ونى الدا ۇلكەن تاپسىرما كۇتىپ تۇرعان ەدى. ەشۋا قۇدايدىڭ حالقىن ۋادە ەتىلگەن جەرگە باستاپ ٴجۇرۋ كەرەك-ٴتىن، سونداي-اق وعان سول جەردە تۇرىپ جاتقان حالىقتاردىڭ مىقتى ساربازدارىن جەڭىپ شىعۋ قاجەت ەدى. ەشۋانىڭ بويىنا قورقىنىش ۇيالاتاتىن سەبەپتەردىڭ كوپ ەكەنىن بىلگەن ەحوبا مۇساعا بىلاي دەدى: «ەشۋانى باسشى ەتىپ تاعايىندا دا، نىعايتىپ، جىگەرلەندىر. مىنا حالىقتى ارعى بەتكە باستاپ باراتىن دا، ٶزىڭ كورىپ تۇرعان وسىناۋ جەردى الىپ بەرەتىن دە سول بولماق» (مۇسانىڭ 5-جازباسى 3:28). سودان كەيىن ەحوبا ەشۋانى ٶزى جىگەرلەندىرىپ بىلاي دەدى: «مەن ساعان باتىل دا بەرىك بول دەپ تاعى دا بۇيىرامىن! ەش قورىقپا، شوشىما دا، ويتكەنى قايدا بارساڭ دا، مەن، قۇدايىڭ ەحوبا، ساعان جار بولامىن» (ەشۋا 1:1، 9). بۇل سوزدەر ەشۋانى قانداي سەزىمگە بولەدى دەپ ويلايسىز؟
4، 5. ا) ەجەلدە ەحوبا ٶز حالقىن قالاي جىگەرلەندىرگەن؟ ٵ) ەحوبا ۇلىنا قالاي جىگەر بەردى؟
4 ەحوبا سونداي-اق ٶز حالقىن تۇگەلدەي جىگەرلەندىرگەن. مىسالى، ول بابىل تۇتقىندىعىندا جۇرگەندە ياھۋديلەردىڭ قايرات-جىگەرگە مۇقتاج بولاتىنىن بىلگەن. سوندىقتان ولاردىڭ رۋحىن كوتەرەتىن مىناداي پايعامبارلىق ايتقان: «ەش قورىقپا، مەن ساعان جار بولامىن. ەش ابىرجىما، مەن سەنىڭ قۇدايىڭمىن. مەن سەنى نىعايتامىن، ساعان كومەكتەسەمىن، ادىلدىگىمە ساي، وڭ قولىممەن سۇيەمەلدەيمىن» (يشايا 41:10). كەيىن ەحوبا العاشقى ماسىحشىلەردىڭ بويىنا دا جىگەر قۇيعان. ول قازىرگى تاڭدا ٴبىزدى دە ٴدال سولاي جىگەرلەندىرىپ كەلەدى (قورىنتتىقتارعا 2-حات 1:3، 4 وقىڭىز).
5 ەحوبا ٶز ۇلىنا دا جىگەر بەرگەن. شومىلدىرۋ راسىمىنەن وتكەن سوڭ، يسا كوكتەن: «بۇل — مەنىڭ سۇيىكتى ۇلىم. مەن وعان ريزامىن!»— دەگەن داۋىستى ەستىدى (ماتاي 3:17). جەردە اتقارعان قىزمەتى بارىسىندا بۇل سوزدەردىڭ يساعا كۇش بەرىپ كەلگەنى ٴسوزسىز!
يسا وزگەلەردى جىگەرلەندىرگەن
6. يسانىڭ تالانت تۋرالى استارلى اڭگىمەسى ٴبىزدى قالاي جىگەرلەندىرەدى؟
6 يسا وزگەلەردى ادال بولىپ قالۋعا تالپىندىرىپ، جىگەرلەندىرۋ ارقىلى اكەسىنە ەلىكتەگەن. بۇل ونىڭ تالانت تۋرالى استارلى اڭگىمەسىنەن كورىنەدى. يسا قوجايىننىڭ ٵر ادال قىزمەتشىسىنە بىلاي دەيتىنىن ايتقان: «جارايسىڭ، جاقسى دا ادال قۇل! از ىستە سەنىمدى بولعانىڭ ٷشىن، سەنى كوپ ٸستىڭ باسىنا تاعايىندايمىن. قوجايىنىڭنىڭ قۋانىشىنا ورتاقتاس» (ماتاي 25:21، 23). بۇل سوزدەر شاكىرتتەردىڭ رۋحىن كوتەرىپ، ەحوباعا ادال قىزمەت ەتە بەرۋگە تالپىندىردى!
يسا پەتىرگە جىگەر بەرىپ، وعان ٴتىپتى وزگەلەردى نىعايتۋدى تاپسىردى
7. يسا ەلشىلەرىن، اسىرەسە پەتىردى، قالاي جىگەرلەندىرگەن؟
7 شاكىرتتەرى ارالارىندا قايسىسى ەڭ ۇلى ەكەنى جايلى ٴجيى ٴسوز تالاستىرسا دا، يسا ولارعا ٵرقاشان شىدامدىلىق تانىتقان. ولاردى كىشىپەيىل بولۋعا، باسقالاردىڭ وزدەرىنە قىزمەت ەتكەنىن قالاماي، قايتا، باسقالارعا قىزمەت ەتۋگە تالپىندىرعان (لۇقا 22:24—26). پەتىردى الساق، ول بىرنەشە مارتە قاتەلىك جاساپ، يسانىڭ كوڭىلىن تۇسىرگەن (ماتاي 16:21—23؛ 26:31—35، 75). سويتسە دە يسا ەشقاشان پەتىردەن كۇدەر ۇزبەگەن. كەرىسىنشە، وعان جىگەر بەرىپ، ٴتىپتى وزگەلەردى نىعايتۋدى تاپسىرعان (جوحان 21:16).
جىگەر بەرۋگە قاتىستى ەجەلدەگى وقيعالار
8. ەزەكيا اسكەري باسشىلار مەن ياھۋدالىقتاردى قالاي جىگەرلەندىردى؟
8 يسانىڭ ۇلگىسى بولماي تۇرىپ-اق، ەحوبانىڭ قىزمەتشىلەرى وزگەلەردى جىگەرلەندىرۋ قاجەت ەكەنىن بىلگەن. ەزەكيانى ەسكە الايىقشى. اسسيريالىقتار يەرۋساليمگە شابۋىلداماقشى بولعاندا، ول اسكەري باسشىلار مەن حالىقتى جيناپ، جىگەرلەندىرگەن. ونىڭ «سوزدەرى جۇرتتىڭ رۋحىن كوتەردى» (شەجىرەلەر 2-جازبا 32:6—8 وقىڭىز).
9. باسقالاردى جىگەرلەندىرۋ جاعىنان ايۇپكە قالاي ەلىكتەي الامىز؟
9 باسقالاردى جىگەرلەندىرۋ جاعىنان ايۇپتەن دە ۇيرەنسەك بولادى. ٶزى جىگەرگە ٴزارۋ بولسا دا، ول وزگەلەرگە قالاي جىگەرلەندىرۋ كەرەكتىگىن ۇيرەتكەن. ٵيۇپتىڭ ايتۋىنشا، ول ٶزىن جۇباتۋعا كەلگەندەردىڭ ورنىندا بولسا، اۋزىنان اۋىر تيەتىن سوزدەر ەمەس، نىعايتىپ، جارالارىن جەڭىلدەتەتىن جىلى سوزدەر شىعار ەدى (ٵيۇپ 16:1—5). دەگەنمەن ٵيۇپ اقىرىندا ەليحۋدەن جانە ەحوبانىڭ وزىنەن جىگەرلى سوزدەر ەستىدى (ٵيۇپ 33:24، 25؛ 36:1، 11؛ 42:7، 10).
10، 11. ا) ەفتانىڭ قىزى نەگە جىگەرگە مۇقتاج بولدى؟ ٵ) بۇگىندە ٴبىز كىمدەردى جىگەرلەندىرسەك بولادى؟
10 ەفتانىڭ قىزى دا جىگەرگە مۇقتاج ەدى. بي بولعان اكەسى ەفتا امموندىقتارمەن شايقاسقا شىقپاقشى بولادى. ول ەحوبا شايقاستى جەڭىپ شىعۋعا كومەكتەسسە، ۇيىنە بارعاندا الدىنان ٴبىرىنشى بولىپ شىققان ادامدى كيەلى شاتىردا ەحوباعا قىزمەت ەتۋگە جىبەرەتىنىن ۋادە ەتەدى. سودان يسرايل جەڭىسكە جەتەدى دە، ەفتانىڭ الدىنان ٴبىرىنشى بولىپ جالعىز قىزى شىعادى. بۇنى كورگەندە، ەفتانىڭ جۇرەگى قارس ايىرىلادى. سوندا دا ول ٶز ۋادەسىندە تۇرىپ، قىزىن كيەلى شاتىردا ٶمىر باقي قىزمەت ەتۋگە جىبەرەدى (بيلەر 11:30—35).
11 بۇل ەفتاعا اۋىر سوققانىمەن، قىزىنا ودان بەتەر قيىن بولسا كەرەك. الايدا قىزى اكەسىنىڭ ۋادەسىن ورىنداۋعا دايىن بولدى (بيلەر 11:36، 37). ول ەشقاشان تۇرمىسقا شىعىپ، بالالى بولا المايتىن. دەمەك، اۋلەتتەرىنىڭ شەجىرەسى اياقتالماق ەدى. ەفتانىڭ قىزى زور جىگەر مەن جۇبانىشقا ٴزارۋ بولعانى انىق. كيەلى كىتاپتا بىلاي دەلىنگەن: «جىل سايىن يسرايل قىزدارى عالاقاتتىق ەفتانىڭ قىزىن ماقتاۋعا بارىپ، جىلىنا ٴتورت كۇن ونىڭ قاسىندا بولاتىن» (بيلەر 11:39، 40). ەفتانىڭ قىزىمەن بولعان وقيعا ەحوباعا كوبىرەك قىزمەت ەتۋ ٷشىن سالتباستى بولىپ جۇرگەن باۋىرلاستاردى ەسىمىزگە سالادى. ولاردى ماقتاپ، جىگەرلەندىرىپ ٴجۇرمىز بە؟ (قورىنتتىقتارعا 1-حات 7:32—35).
ەلشىلەر باۋىرلاستاردى جىگەرلەندىرگەن
12، 13. پەتىر قالاي «باۋىرلاستارىنىڭ سەنىمىن نىعايتقان»؟
12 ولەر الدىنداعى ٴتۇنى يسا ەلشى پەتىرگە بىلاي دەگەن: «شيمون، شيمون! شايتان ٴبارىڭدى ٴبيداي ىسپەتتى ەلەكتەن وتكىزۋدى تالاپ ەتتى. ٴبىراق سەنىمىڭ السىرەمەسىن دەپ، سەن ٷشىن جالبارىندىم. ال سەن ىسىڭە وكىنگەن سوڭ، باۋىرلاستارىڭنىڭ سەنىمىن نىعايت» (لۇقا 22:31، 32).
1-عاسىرداعى ماسىحشىلەردى جىگەرلەندىرگەن ەلشىلەردىڭ حاتتارى ٴبىزدى دە كۇنى بۇگىنگە دەيىن جىگەرلەندىرىپ كەلەدى (12—17 ابزاستاردى قاراڭىز)
13 پەتىر العاشقى ماسىحشىلەر قاۋىمىندا باسشىلىقتى قولعا العانداردىڭ ٴبىرى بولعان (عالاتتىقتارعا 2:9). ونىڭ ەلۋىنشى كۇن مەيرامىنداعى جانە سودان كەيىنگى باتىل ىستەرى باۋىرلاستاردى جىگەرلەندىرگەن. كوپ جىل قىزمەت ەتكەننەن كەيىن، ول باۋىرلاستارعا حات جولدادى. حاتتى جازعان سەبەبىن ٴتۇسىندىرىپ ول: «ماقساتىم — سەندەردى جىگەرلەندىرۋ، قۇدايدىڭ شىنايى راقىمى جايلى بار ىنتاممەن كۋالىك ەتۋ. وسى راقىمنان ايىرىلماڭدار!»— دەدى (پەتىردىڭ 1-حاتى 5:12). پەتىردىڭ جازعان حاتتارى سول كەزدەگى ماسىحشىلەردى نىعايتقان. سول حاتتار ەحوبانىڭ ۋادەلەرىنىڭ تولىقتاي ورىندالۋىن كۇتىپ جۇرگەن بىزدەردى ٵلى دە نىعايتىپ كەلەدى! (پەتىردىڭ 2-حاتى 3:13).
14، 15. ەلشى جوحان جازعان كىتاپتار ٴبىزدى قالاي جىگەرلەندىرەدى؟
14 ەلشى جوحان دا ەرتەدەگى ماسىحشىلەر قاۋىمىندا جەتەكشىلىك ەتكەن. ول ٶزى جازعان ىزگى حاباردا يسانىڭ قىزمەتى جايلى كەرەمەت بايانداعان. كيەلى جازبالاردىڭ بۇل كىتابى ماسىحشىلەردى جۇزدەگەن جىلدار بويى جىگەرلەندىرىپ كەلگەن، ٴبىز دە ودان كۇنى بۇگىنگە دەيىن جىگەر الىپ كەلەمىز. مىسالى، شىنايى شاكىرتتەردى سۇيىسپەنشىلىگىنەن انىقتاۋعا بولاتىنى جايلى يسانىڭ سوزدەرىن تەك جوحان عانا جازعان (جوحان 13:34، 35 وقىڭىز).
15 جوحاننىڭ جازعان ٷش حاتىندا دا قۇندى شىندىقتار بار. جاساعان قاتەلىكتەرىمىز ٷشىن سالىمىز سۋعا كەتكەندە، يسانىڭ تولەم قۇرباندىعى «بارلىق كۇنادان تازارتادى» دەگەن سوزدەر جانىمىزدى جايلاندىرادى (جوحاننىڭ 1-حاتى 1:7). ەگەر ٶزىمىزدى ٴبارىبىر دە كىنالى سەزىنە بەرسەك، «قۇداي جۇرەگىمىزدەن جوعارى» دەگەن سوزدەر جۇبانىش بەرەدى (جوحاننىڭ 1-حاتى 3:20). كيەلى كىتاپ جازۋشىلارىنىڭ ىشىندە جوحان عانا «قۇداي — سۇيىسپەنشىلىك» دەپ جازعان (جوحاننىڭ 1-حاتى 4:8، 16). سونداي-اق ول ەكىنشى جانە ٷشىنشى حاتتارىندا «شىندىق جولىندا جۇرگەن» ماسىحشىلەردى ماقتاعان (جوحاننىڭ 2-حاتى 4؛ جوحاننىڭ 3-حاتى 3، 4).
16، 17. ەلشى پاۋىل ەرتەدەگى ماسىحشىلەردى قالاي جىگەرلەندىردى؟
16 ەلشى پاۋىل باۋىرلاستارعا جىگەر بەرۋدىڭ تاماشا ۇلگىسى بولعان. يسانىڭ ولىمىنەن كەيىن كوپ ۇزاماي، ەلشىلەردىڭ كوبىسى يەرۋساليمدە قالدى. باسقارۋشى كەڭەس تە سوندا ەدى (ەلشىلەردىڭ ىستەرى 8:14؛ 15:2). ياھۋدەياداعى ماسىحشىلەر ونسىز دا جالعىز قۇدايعا سەنەتىن ادامدارعا ٴماسىح جايلى ۋاعىزداپ ٴجۇردى. الايدا كيەلى رۋح پاۋىلدى كوپتەگەن قۇدايلارعا تابىناتىن گرەكتەرگە، ريمدىكتەرگە جانە باسقا دا حالىقتارعا ۋاعىزداۋعا جىبەردى (عالاتتىقتارعا 2:7—9؛ تىموتەگە 1-حات 2:7).
17 پاۋىل قازىرگى تۇركيا جەرىن، گرەكيا مەن يتاليا اۋماقتارىن ارالاعان. ول سونداعى ياھۋدي ۇلتىنا جاتپايتىن ادامدارعا ۋاعىزداپ، قاۋىمدار قۇردى. جاڭادان ٴماسىحشى بولعان بۇل باۋىرلاستاردىڭ جاعدايى وڭاي بولعان جوق. ٶز جەرلەستەرىنەن قۋعىن كورگەن ولار جىگەرگە مۇقتاج ەدى (سالونيكالىقتارعا 1-حات 2:14). شامامەن 50- جىلدارى پاۋىل سالونيكاداعى جاڭا قاۋىمعا رۋحتارىن كوتەرەتىن حات جازدى. «ٴبىز ٴبارىڭ ٷشىن دۇعا ەتىپ، قۇدايعا العىس ايتىپ ٴجۇرمىز. ويتكەنى ٴبىز سەندەردىڭ سەنىممەن ىستەگەن ىستەرىڭدى، سۇيىسپەنشىلىكپەن اتقارعان اۋىر ەڭبەكتەرىڭ مەن... تانىتىپ جاتقان تاباندىلىقتارىڭدى قۇداي اكەمىزدىڭ الدىندا ۇنەمى ەسىمىزدە ۇستايمىز»،— دەدى ول (سالونيكالىقتارعا 1-حات 1:2، 3). بۇعان قوسا، پاۋىل ولاردان ٴبىر-ٴبىرىن جىگەرلەندىرىپ وتىرۋدى ٶتىنىپ بىلاي دەپ جازدى: «ٴبىر-ٴبىرىڭدى جۇباتىپ، نىعايتىپ جۇرگەندەرىڭدەي، ارى قاراي دا سولاي ەتە بەرىڭدەر» (سالونيكالىقتارعا 1-حات 5:11).
باسقارۋشى كەڭەس بىزگە جىگەر بەرەدى
18. 1-عاسىرداعى باسقارۋشى كەڭەس ٴفىلىپتى قالاي جىگەرلەندىردى؟
18 1-عاسىردا ەحوبا باسقارۋشى كەڭەس ارقىلى بارلىق ماسىحشىلەردى، سونداي-اق قاۋىمدا جەتەكشىلىك ەتكەندەردى دە، جىگەرلەندىرىپ وتىرعان. مىسالى، ٴفىلىپ ساماريالىقتارعا ٴماسىح جايلى ۋاعىزداعاندا، باسقارۋشى كەڭەس وعان قولعابىس ەتتى. ولار ارالارىنان پەتىر مەن جوحاندى جىبەردى. باسقارۋشى كەڭەستىڭ بۇل ەكى مۇشەسى جاڭادان ٴماسىحشى بولعان باۋىرلاستار ٷشىن كيەلى رۋح سۇراپ دۇعا ەتتى (ەلشىلەردىڭ ىستەرى 8:5، 14—17). باسقارۋشى كەڭەستىڭ قولداۋىن سەزىنگەن ٴفىلىپ پەن جاڭادان ٴماسىحشى بولعان باۋىرلاستاردىڭ قاتتى جىگەرلەنىپ قالعانى ٴسوزسىز!
19. ەرتەدەگى ماسىحشىلەر باسقارۋشى كەڭەستەن كەلگەن حاتتى وقىعاندا قانداي سەزىمدە بولدى؟
19 كەيىنىرەك باسقارۋشى كەڭەسكە ٴبىر ماڭىزدى شەشىم قابىلداۋ قاجەت بولدى: ياھۋدي ەمەس ماسىحشىلەر ياھۋديلەر سياقتى، مۇسا زاڭىنا ساي سۇندەتتەلۋ كەرەك پە؟ (ەلشىلەردىڭ ىستەرى 15:1، 2). باسقارۋشى كەڭەس كيەلى رۋح سۇراپ دۇعا ەتىپ، جازبالاردى قاراستىرعان سوڭ، بۇدان بىلاي سۇندەتتەلۋدىڭ قاجەتى جوق دەپ شەشتى. سوسىن ٶز شەشىمدەرىن ٴتۇسىندىرىپ حات جازدى جانە ونى قاۋىمدارعا جەتكىزۋ ٷشىن ەر باۋىرلاستاردى جىبەردى. ماسىحشىلەر حاتتاعى «جىگەر بەرەتىن سوزدەردى وقىپ، قۋانىپ قالدى» (ەلشىلەردىڭ ىستەرى 15:27—32).
20. ا) بۇگىندە باسقارۋشى كەڭەس بارشامىزدى قالاي جىگەرلەندىرىپ جاتىر؟ ٵ) كەلەسى ماقالادا قانداي سۇراقتى قاراستىرامىز؟
20 بۇگىندە ەحوبا كۋاگەرلەرىنىڭ باسقارۋشى كەڭەسى بەتەلدىكتەرگە، باسقا دا ارنايى تولىق ۋاقىتتى قىزمەتشىلەرگە جانە بارلىق باۋىرلاستارعا جىگەر بەرەدى. 1-عاسىرداعى باۋىرلاستار سياقتى، ٴبىز دە ولاردان جىگەر الىپ، قۋانىپ قالامىز! سونداي-اق باسقارۋشى كەڭەس شىندىقتان كەتىپ قالعانداردى قايتا ورالۋعا تالپىندىرۋ ٷشىن، 2015-جىلى «ەحوباعا قايتا ورال» دەگەن كىتاپشانى شىعاردى. ٴبىراق جەتەكشىلىك ەتەتىن باۋىرلاستار عانا وزگەلەردى جىگەرلەندىرۋ كەرەك پە، الدە ٴبارىمىز دە سولاي ەتۋىمىز قاجەت پە؟ بۇل سۇراقتى كەلەسى ماقالادا تالقىلايمىز.
