17-زەرتتەۋ ماقالاسى
ٴسىز ەحوبا ٷشىن اسا باعالى جانسىز!
«ەحوبا ٶز حالقىنان راقات تابادى» (ٴزاب. 149:4).
108-ٵن قۇدايدىڭ اينىماس سۇيىسپەنشىلىگى
اڭداتپا *
كوكتەگى اكەمىز ٵرقايسىسىمىزدان «راقات تابادى» (1-ابزاستى قاراڭىز)
1. ەحوبا ٶزىنىڭ حالقىنان نە بايقايدى؟
«ەحوبا ٶز حالقىنان راقات تابادى» (ٴزاب. 149:4). قۇدايىمىزدىڭ بىزدەن وسىلاي قۋانىش تاباتىنى كەرەمەت ەمەس پە؟! ول بويىمىزداعى جاقسى قاسيەتتەردى بايقايدى، تاعى قالاي جاقسارا الاتىنىمىزدى كورەدى جانە ٴبىزدى وزىنە جاقىنداتىپ تارتادى. ەحوباعا ادال بولىپ قالساق، ول بىزگە ماڭگى جاقىن بولىپ قالادى! (جوح. 6:44).
2. ەحوبا ولاردى سۇيەتىنىنە كەيبىرەۋلەر نە ٷشىن سەنە المايدى؟
2 كەيبىرەۋلەر «ەحوبا قىزمەتشىلەرىن حالىق رەتىندە جاقسى كورەتىنى تۇسىنىكتى، ٴبىراق ٴدال مەنى جاقسى كورمەيتىن شىعار» دەپ ويلايدى. بۇلاي ويلاۋعا نە سەبەپ بولۋى مۇمكىن؟ وتە اۋىر بالالىق شاقتى باستان وتكەرگەن وكسانا * بىلاي دەيدى: «شومىلدىرۋ راسىمىنەن ٶتىپ، ٸزاشارلىق قىزمەتتى باستاعاندا وتە باقىتتى ەدىم. ٴبىراق 15 جىلدان كەيىن بالا كەزىمدەگى ەستەلىكتەر قايتا ورالىپ، جانىمدى جەگىدەي جەي باستادى. مەن ەحوبانىڭ مەرەيىنەن ايىرىلىپ قالدىم، ونىڭ سۇيىسپەنشىلىگىنە لايىق ەمەسپىن دەپ ويلادىم». يۋيا دەگەن ٸزاشار ايەل باۋىرلاس تا باقىتتى بالالىق شاقتىڭ نە ەكەنىن بىلمەي وسكەن. «ەحوبانى قۋانتقىم كەلگەندىكتەن، وعان ٶمىرىمدى باعىشتادىم. ٴبىراق ول مەنى ەشقاشان سۇيە المايدى دەپ ويلادىم»،— دەيدى يۋيا.
3. بۇل ماقالادا نە تۋرالى بىلەمىز؟
3 وسى ادال باۋىرلاستارىمىز سياقتى ٴسىز دە ەحوبانى جاقسى كورگەنمەن، ونىڭ ٴسىزدى جاقسى كورەتىنىنە كۇمانداناتىن شىعارسىز. ٴبىراق ول ٴسىزدى سۇيەتىنىنە ٵرى قامىڭىزدى ويلايتىنىنا نەلىكتەن سەنىمدى بولعان دۇرىس؟ جاعىمسىز، تەرىس ويلار مازاڭىزدى العاندا نە كومەك بولا الادى؟ قازىر وسى سۇراقتارعا توقتالايىق.
ەحوبانىڭ سۇيىسپەنشىلىگىنە كۇماندانۋدىڭ قاۋپى
4. ەحوبا ٴبىزدى سۇيەتىنىنە كۇماندانۋ نەگە قاۋىپتى؟
4 سۇيىسپەنشىلىكتىڭ قوزعاۋشى كۇشى زور. ەحوبا ٴبىزدى سۇيەتىنىنە، قولداپ-دەمەيتىنىنە سەنىمدى بولساق، ٶمىردىڭ قيىنشىلىقتارىنا قاراماستان وعان بار جۇرەكپەن قىزمەت ەتە بەرەمىز. ال ەگەر سۇيەتىنىنە كۇماندانساق، وندا «كۇش-جىگەرىمىز تاۋسىلادى» (ناق. س. 24:10). وسىلاي ەڭسەمىز ەزىلگەندە جانە قۇداي ٴبىزدى سۇيەتىنىنە سەنبەگەندە، شايتاننىڭ وڭاي ولجاسىنا اينالىپ قالۋىمىز مۇمكىن (ەفەس. 6:16).
5. قۇدايدىڭ سۇيىسپەنشىلىگىنە كۇماندانۋدىڭ اسەرى قانداي؟ مىسال كەلتىرىڭىز.
5 كۇمان كوپتەگەن ٴماسىحشىنىڭ رۋحاني ساۋلىعىنا زاقىم كەلتىرگەن. دجەيمس دەگەن اقساقال بىلاي دەيدى: «بەتەلدە قىزمەت ەتىپ جۇرسەم دە، شەت ٴتىلدى قاۋىمدا قىزمەت ەتسەم دە، وسى قۇرباندىقتارىمدى ەحوبا قابىلداي ما ەكەن دەپ ويلايتىنمىن. ٴتىپتى دۇعالارىمدى شىنىمەن تىڭداي ما ەكەن دەپ كۇماندانعان كەزىم بولدى». ەۆا باۋىرلاس تا تولىق ۋاقىت قىزمەت ەتەدى. ول بىلاي دەيدى: «مەن ەحوبانىڭ سۇيىسپەنشىلىگىنە كۇماندانۋدىڭ قانشالىقتى قاۋىپتى ەكەنىن ٴتۇسىندىم. بۇل ادامدى اياعىنان تومەن قاراي تارتا بەرەتىن باتپاق سياقتى. رۋحاني ىستەرگە ەش زاۋقىڭ سوقپايدى، قىزمەتىڭ دە ەش قۋانىش اكەلمەيدى». مايكل باۋىرلاس بولسا تۇراقتى ٸزاشار ٵرى اقساقال بولىپ قىزمەت ەتەدى. «قۇداي قامىڭدى ويلايتىنىنا كۇماندانساڭ، ودان الىستاپ كەتەدى ەكەنسىڭ»،— دەيدى ول.
6. قۇداي مەنى جاقسى كورمەيدى دەگەن وي كەلگەندە نە ىستەگەنىمىز ٴجون؟
6 جوعارىداعى مىسالداردان تەرىس ويلاردىڭ سەنىمىمىزگە قانداي سوققى بولىپ تيەتىنىن كوردىك. ولاي بولسا، سانامىزعا قۇداي مەنى سۇيمەيدى دەگەن وي كەلە باستاعاندا، ودان تەز ارادا قۇتىلعانىمىز ٴجون! ەحوبادان «مازالايتىن ويلارىڭىزدى» باسىپ، ورنىنا جۇرەگىڭىز بەن وي-ساناڭىزدى ساقتايتىن تىنىشتىق بەرۋىن سۇراڭىز (ٴزاب. 139:23؛ ٴفىلىپ. 4:6، 7). سونداي-اق ۇمىتپاڭىز، بۇل كۇرەستە ٴسىز جالعىز ەمەسسىز. باسقا دا ادال باۋىرلاستارىمىز وسىنداي جاعىمسىز سەزىمدەرمەن ارپالىسىپ ٴجۇر. ەحوبانىڭ بۇرىنعى زامانداعى قىزمەتشىلەرى دە وسىنداي قيىندىقتان وتكەن. قازىر ەلشى پاۋىلدىڭ مىسالىنا كوڭىل بۇرايىق.
ەلشى پاۋىلدىڭ كۇرەسى
7. ەلشى پاۋىلدىڭ قانداي قيىندىقتارى بولدى؟
7 جاۋاپكەرشىلىكتەرىڭىز باستان اساتىندىقتان، ٴبارىن بىرگە الىپ جۇرەمىن دەپ قينالىپ ٴجۇرسىز بە؟ ەلشى پاۋىل دا ٴدال وسىنداي كۇي كەشكەن. ول ٴبىر ەمەس، «بارلىق قاۋىمداردى ويلاپ، كۇندە ۋايىمداعان» (قور. 2-ح. 11:23—28). نەمەسە سوزىلمالى اۋرۋىڭىز جانىڭىزعا باتىپ، قاجىتىپ جىبەرگەن شىعار. پاۋىلدى دا «تانىنە قادالىپ تۇراتىن تىكەن»، ياعني قانداي دا ٴبىر اۋرۋ بولسا كەرەك، تىنباي مازالاعان. ول قينالعانى سونشا — بۇدان تەز ارىلۋدى قالاعان (قور. 2-ح. 12:7—10). يا بولماسا كۇناكار بولمىسىڭىزدىڭ كەسىرىنەن ٴجيى كوڭىلىڭىز تۇسە مە؟ ەلشى پاۋىلعا دا ۇنەمى كەمەلسىزدىكتەرىمەن كۇرەسۋگە تۋرا كەلگەندىكتەن، ول «سورلى باسىم-اي» دەپ كۇيىنگەن (ريم. 7:21—24).
8. قيىندىقتارىمەن كۇرەسۋگە پاۋىلعا نە كۇش بەردى؟
8 باسىنا ٴتۇرلى سىناق تۇسسە دە، قۋانىشىن ۇرلايتىن جاعدايلارعا كەزىكسە دە ەلشى پاۋىل قۇدايعا قىزمەت ەتۋدى دوعارمادى. سوندا وعان نە كۇش بەردى؟ ول ٶزىنىڭ كەمشىلىكتەرىن جاقسى بىلسە دە، ونىڭ تولەمگە دەگەن سەنىمى بەرىك بولعان. پاۋىل يسانىڭ «وعان سەنگەن اركىم ماڭگىلىك ومىرگە يە بولادى» دەگەن ۋادەسىن جاقسى بىلگەن (جوح. 3:16؛ ريم. 6:23). ول ٴتىپتى اۋىر كۇنا جاساعان ادامنىڭ ٶزى شىن وكىنسە، ەحوبا ونى كەشىرەتىنىنە سەنىمدى بولعان (ٴزاب. 86:5).
9. ەلشى پاۋىلدىڭ عالاتتىقتارعا 2:20 دا جازىلعان سوزىنەن نە بىلەمىز؟
9 ەلشى پاۋىل قۇدايدىڭ ول ٷشىن ٴماسىحتى قۇربان ەتكەنىنەن ونىڭ زور سۇيىسپەنشىلىگىن كورگەن (عالاتتىقتارعا 2:20 وقىڭىز). وسى تارماقتىڭ سوڭىنداعى ماڭىزدى سويلەمگە نازار اۋداردىڭىز با؟ پاۋىل: «قۇداي ۇلى... مەنى سۇيگەندىكتەن، مەن ٷشىن ٶمىرىن بەردى»،— دەگەن. ول قۇدايدىڭ سۇيىسپەنشىلىگىنىڭ كۇشىنە شەك كەلتىرمەگەن. بىلايشا ايتقاندا، «باسقا باۋىرلاستار ەحوبانىڭ سۇيىسپەنشىلىگىنە لايىق قوي، ٴبىراق ول مەنى ٴسۇيۋى مۇمكىن ەمەس» دەپ ويلاماعان. پاۋىل ريمدىكتەرگە: «ٵلى دە كۇناكار بولىپ جۇرگەن بىزدەر ٷشىن ٴماسىح ٶمىرىن قيدى»،— دەگەن (ريم. 5:8). قۇدايدىڭ سۇيىسپەنشىلىگىنىڭ راسىندا دا شەگى دە، شەتى دە جوق.
10. ريمدىكتەرگە 8:38، 39 ىنشى تارماقتاردان نە بىلەمىز؟
10 ريمدىكتەرگە 8:38، 39 وقىڭىز. ەحوبانىڭ سۇيىسپەنشىلىگى قانشالىقتى كۇشتى ەكەنىنە پاۋىل ەش كۇماندانبادى. ول قۇدايدىڭ سۇيىسپەنشىلىگىنەن ٴبىزدى ەش نارسە دە ايىرا المايتىنىن ايتقان. مىسالى، پاۋىل ەحوبانىڭ يسرايلدىكتەرگە عاسىرلار بويى شىدامدىلىق تانىتقانىن بىلگەن. ەحوبا جەكە وعان قانداي راقىمدىلىق تانىتقانىن دا جاقسى بىلگەن. پاۋىل «ەحوبا ٶز ۇلىن مەن ٷشىن ولىمگە قيعان بولسا، قالاي عانا ونىڭ سۇيىسپەنشىلىگىنە كۇماندانامىن» دەپ وي تۇزگەنى ٴسوزسىز (ريم. 8:32).
ەحوبا ٷشىن بۇرىنعى قاتەلىكتەرىڭىز ەمەس، قازىر جانە كەيىن نە ىستەيتىنىڭىز ماڭىزدى (11-ابزاستى قاراڭىز) *
11. تىموتەگە 1-حات 1:12—15-تارماقتاردا ايتىلعانداي، پاۋىل بۇرىن كۇنا جاساسا دا ەحوبا ونى جاقسى كورەتىنىنە نەگە سەنىمدى بولدى؟
11 تىموتەگە 1-حات 1:12—15 وقىڭىز. پاۋىلدىڭ وتكەندى ويلاپ جانى قينالعان كەزدەرى بولسا كەرەك. ول ٶزىن كۇناكارلاردىڭ ىشىندەگى «ەڭ كۇناكارى» دەپ ەسەپتەگەن. ول شىندىققا كەلمەس بۇرىن ماسىحشىلەردى قالادان قالاعا قۋدالاپ، ولاردى تۇرمەگە جاۋىپ، ولىمگە كەسۋگە داۋىس بەرگەن (ەل. ٸس. 26:10، 11). كەيىن پاۋىل كەزىندە اتا-اناسىن ولىمگە كەسكىزگەن باۋىرلاستى كەزىكتىرگەندە نە سەزىنگەنىن ەلەستەتىپ كورىڭىزشى. ول كۇنالارى ٷشىن وكىندى، ٴبىراق وتكەندى وزگەرتە المايتىنىن دا ٴتۇسىندى. پاۋىل ٴماسىحتىڭ ول ٷشىن ولگەنىن قابىلداپ: «قۇدايدىڭ راقىمىمەن وسىنداي دارەجەگە يە بولدىم»،— دەپ جازدى (قور. 1-ح. 15:3، 10). ٴبىز بۇدان قانداي ساباق الامىز؟ ٴماسىح ٴسىز ٷشىن ٶلدى، ٵرى ەحوبامەن دوس بولا الۋىڭىز ٷشىن سىزگە جول اشتى. وسىنى قابىلداڭىز (ەل. ٸس. 3:19). كۋاگەر كەزىڭىزدە جاسادىڭىز با، الدە وعان دەيىن بە، ەحوبا ٷشىن بۇرىنعى قاتەلىكتەرىڭىز ماڭىزدى ەمەس، ول ٷشىن ماڭىزدىسى — قازىر جانە كەيىن نە ىستەيتىنىڭىز (يشايا 1:18).
12. ٶزىمىزدى سۇيىسپەنشىلىككە لايىقسىز، تۇككە تۇرعىسىز سەزىنگەندە، جوحاننىڭ 1-حاتى 3:19، 20 داعى سوزدەر قانداي جىگەر بەرەدى؟
12 يسا ٴبىزدى كۇنالارىمىزدان تازارتۋ ٷشىن ولگەنى تۋرالى ويلاعاندا، «مەن مۇنداي جاقسىلىققا ەش تاتىمايمىن» دەيتىن شىعارمىز. نەگە بىزدە وسىنداي سەزىم بولادى؟ ويتكەنى كەمەلسىز جۇرەگىمىز ٴبىزدى قۇدايدىڭ سۇيىسپەنشىلىگىنە لايىقسىز، تۇككە تۇرعىسىز سەزىندىرگىسى كەلەدى (جوحاننىڭ 1-حاتى 3:19، 20 وقىڭىز). ٴبىراق سونداي كەزدە «قۇداي جۇرەگىمىزدەن جوعارى» ەكەنىن ەستە ۇستايىق. ەحوبانىڭ ويلارى مەن سەزىمدەرى ٴبىزدىڭ تەرىس ويلارىمىز بەن سەزىمدەرىمىزدەن الدەقايدا كۇشتى. ول ٴبىزدى سوندا دا سۇيەدى، كەشىرەدى. ٴبىز ٶز ويىمىزدا ەمەس، ەحوبانىڭ ويىندا قانداي ادام ەكەنىمىزدى ٴتۇسىنۋىمىز قاجەت. بۇلاي ەتۋگە قۇدايدىڭ ٴسوزىن ۇنەمى وقىعانىمىز، وعان قايتا-قايتا دۇعا ەتكەنىمىز جانە ونىڭ ادال حالقىمەن ٴجيى ارالاسىپ تۇرعانىمىز كومەكتەسەدى. قازىر وسى ٷش ارەكەتتىڭ قانشالىقتى ماڭىزدى ەكەنىنە نازار اۋدارايىق.
كيەلى كىتاپتى زەرتتەۋدىڭ، دۇعا مەن ادال دوستاردىڭ كومەگى
13. قۇداي ٴسوزىن زەرتتەگەنىمىز بىزگە قالاي كومەكتەسەدى؟ (« ولارعا قۇداي ٴسوزى كومەكتەستى» دەگەن قورشاۋدى دا قاراڭىز.)
13 كيەلى كىتاپى كۇندە وقىپ-زەرتتەسەڭىز، ەحوبانىڭ كوپتەگەن ادەمى قاسيەتتەرى تۋرالى بىلە تۇسەسىز. ونىڭ اكەلىك جىلى الاقانىن سەزىنەسىز. كۇن سايىن تەرەڭ وي جۇگىرتسەڭىز، قۇداي ٴسوزى اقىل-ساناڭىز بەن سەزىمدەرىڭىزدى «تۇزەتەدى»، دۇرىس ويلاۋعا كومەكتەسەدى (ٴتىم. 2-ح. 3:16). كەزىندە ٶزىن تومەن ساناعان كەۆين دەگەن اقساقال بىلاي دەيدى: «103 ٸنشى ٴزابۇر جىرىن وقىپ، ويلانعاننىڭ ارقاسىندا ەسىمدى جيدىم. ەحوبانىڭ مەن تۋرالى شىنىمەن نە ويلايتىنىن ٴتۇسىندىم». ال ەۆا بىلاي دەيدى: «مەن كۇندە كەشكە ەحوبانىڭ ويلارى مەن سەزىمدەرى تۋرالى وي جۇگىرتەمىن. ويتكەنى بۇدان جۇرەگىم تىنىشتىققا تولىپ، سەنىمىم نىعايادى».
14. دۇعانىڭ قانداي كومەگى بار؟
14 ۇدايى دۇعا ەتىڭىز (سال. 1-ح. 5:17). ەكى ادامنىڭ اراسىنداعى دوستىق ٴجيى ارالاسقاننىڭ، اشىق اڭگىمەلەسكەننىڭ ارقاسىندا نىعايادى. دوسىمىز ەحوبامەن دە سولاي. وعان دۇعادا بارلىق ۋايىمىمىزدى، نە سەزىنىپ جاتقانىمىزدى، ويلارىمىزدى ايتامىز. ويتكەنى وعان سەنىم ارتامىز جانە ول ٴبىزدى جاقسى كورەتىنىن بىلەمىز (ٴزاب. 94:17—19؛ جوح. 1-ح. 5:14، 15). يۋيا باۋىرلاسىمىز بىلاي دەيدى: «مەن دۇعادا جاي عانا سول كۇنى نە بولعانىن ٴتىزىپ ايتىپ قويا سالماي، ەحوباعا بارىنشا اشىلىپ، ويلارىم مەن سەزىمدەرىمدى بۇكپەي ايتامىن. وسىلايشا ەحوبانى جۇمىسشىلارىنان ەسەپ الاتىن كومپانيانىڭ باستىعى ەمەس، بالالارىن قاتتى جاقسى كورەتىن اكە رەتىندە تاني ٴتۇستىم» (« وقىپ كوردىڭىز بە؟» دەگەن قورشاۋدى قاراڭىز).
15. ەحوبا ٵرقايسىسىمىزعا قالاي كوڭىل بولەدى؟
15 ادال دوستارىڭىزبەن ارالاسىڭىز (جاق. 1:17). ولار ەحوبانىڭ سىزگە بەرگەن سيى. ٴبىزدى «ٵرقاشان جاقسى كورەتىن» وسى باۋىرلاستار ارقىلى ەحوبا اربىرىمىزگە جەكە كوڭىل بولەدى (ناق. س. 17:17). قولوستىقتارعا جازعان حاتىندا ەلشى پاۋىل وسىنداي دوستارىن «تىرەگىم» دەپ اتاعان (قول. 4:10، 11). يسا ماسىحكە دە دوستارى قيىن شاقتا تىرەك بولعان. ولاردىڭ ىشىندە پەرىشتەلەر دە، ادامدار دا بولدى. يسا ولاردىڭ كومەگىن قاتتى باعالاعان (لۇقا 22:28، 43).
16. ادال دوستارىمىز ەحوباعا جاقىنداي تۇسۋىمىزگە قالاي كومەكتەسەدى؟
16 ەحوبا سيلاعان ادال دوستارىڭىزدىڭ يگىلىگىن تولىق كورىپ ٴجۇرسىز بە؟ رۋحاني تولىسقان دوسىڭىزعا مازالاعان ويلارىڭىز تۋرالى ايتۋعا قىسىلماڭىز. بۇل — السىزدىكتىڭ بەلگىسى ەمەس، كەرىسىنشە، وزىڭىزگە قورعانىش. دجەيمس باۋىرلاستىڭ نە دەگەنىنە نازار اۋدارىڭىزشى: «مەنىڭ رۋحاني تولىسقان دوستارىم — جان ازىعىم. سانامدى جاعىمسىز ويلار تورلاعاندا، ولار مەنى شىداممەن تىڭداپ، مەنى جاقسى كورەتىندەرىن ايتىپ وتىرادى. مەن ولاردان ەحوبانىڭ ماعان دەگەن قامقورلىعىن، سۇيىسپەنشىلىگىن كورەمىن». رۋحاني وتباسىمىزداعى باۋىرلاستارمەن دوستاسىپ، وسى دوستىعىمىزدى ساقتاۋ قانشالىقتى ماڭىزدى دەسەڭىزشى!
ەحوبانىڭ سۇيىسپەنشىلىگىنەن ايىرىلماڭىز
17، 18. ٴبىز كىمدى تىڭداۋىمىز كەرەك جانە نەگە؟
17 شايتان ٴبىزدىڭ كۇرەسپەي قويعانىمىزدى، ٴسۇيتىپ، جەڭىلگەنىمىزدى قالايدى. ول ەحوبا ٴبىزدى جاقسى كورمەيدى، قۇتقارىلۋعا ٴبىز لايىق ەمەسپىز دەگەنگە سەندىرگىسى كەلەدى. ٴبىراق وسى ماقالادا كوز جەتكىزگەنىمىزدەي، بۇل — قىپ-قىزىل وتىرىك.
18 ەحوبا ٴسىزدى جاقسى كورەدى. ٴسىز ەحوبا ٷشىن ارداقتى جانسىز. وعان مويىنسۇنا بەرسەڭىز، يسا سياقتى ٴسىز دە ونىڭ سۇيىسپەنشىلىگىنەن ايىرىلمايسىز (جوح. 15:10). ولاي بولسا، وتىرىكشى شايتاندى دا، الدامشى جۇرەگىڭىزدى دە تىڭداماڭىز. ٵرقايسىسىمىزدىڭ بويىمىزدان جاقسىلىقتى كورە بىلەتىن ەحوبانى عانا تىڭداڭىز. ەحوبا ٶز حالقىنان، سونىڭ ىشىندە سىزدەن دە «راقات تاباتىنىنا» سەنىمدى بولىڭىز!
141-ٵن ٶمىر — قۇدايدان كەلگەن سي
^ 5-ابزاس كەي باۋىرلاستار ەحوبا ولاردى جاقسى كورۋى مۇمكىن ەمەس دەپ ويلايدى. ٴبىراق ول جەكە ٵرقايسىسىمىزدى جاقسى كورەتىنىنە قالاي سەنىمدى بولا الامىز؟ ەحوبا ٴبىزدى سۇيەتىنىنە كۇماندانعاندا، وسى كۇماندى سەيىلتۋگە نە كومەكتەسەدى؟ بۇل ماقالا وسى سۇراقتارعا جاۋاپ بەرەدى.
^ 2-ابزاس كەيبىر ەسىمدەر وزگەرتىلگەن.
^ 67-ابزاس سۋرەت سيپاتتاماسى: ٴماسىحشى بولعانعا دەيىن پاۋىل كوپ باۋىرلاستى تۇرمەگە قاماعان. يسانىڭ ول ٷشىن نە ىستەگەنىن تۇسىنگەننەن كەيىن ول وزگەرىپ، باۋىرلاستارىنا جىگەر بەردى. ولاردىڭ ىشىندە كەزىندە ٶزى قۋدالاعان ادامداردىڭ تۋىستارى دا بولعان بولۋى مۇمكىن.
