26-زەرتتەۋ ماقالاسى
ٴسىز شاكىرت دايىنداپ ٴجۇرسىز بە؟
«قۇدايدىڭ ٶزى بويلارىڭدا ىقىلاس وياتىپ، كۇش بەرىپ وتىر» (ٴفىلىپ. 2:13).
64-ٵن ەگىن جيناۋعا قۋانا اتسالىسۋ
اڭداتپا *
1. ەحوبا ٴسىز ٷشىن نە ىستەدى؟
ٴسىز قالاي ەحوبا كۋاگەرى بولعانىڭىز ەسىڭىزدە مە؟ الدىمەن، ٴسىز ىزگى حاباردى ەستىدىڭىز. ونى اتا-اناڭىزدان، ارىپتەسىڭىزدەن، سىنىپتاسىڭىزدان نەمەسە ۇيىڭىزگە ۋاعىزداپ كەلگەن كۋاگەرلەردەن بىلگەن شىعارسىز (مار. 13:10). كەيىن ٴبىر باۋىرلاس ۋاقىتى مەن كۇشىن اياماي، سىزبەن كيەلى كىتاپتى زەرتتەدى. زەرتتەي كەلە ٴسىز ەحوبانى قاتتى جاقسى كورىپ كەتتىڭىز جانە ونىڭ دا ٴسىزدى جاقسى كورەتىنىن ٴبىلدىڭىز. ەحوبا ٴسىزدى شىندىققا جاقىنداتىپ تارتتى. سونىڭ ارقاسىندا ٴسىز قازىر يسا ٴماسىحتىڭ شاكىرتىسىز جانە ماڭگى ٶمىر سۇرۋگە ۇمىتتەنەسىز (جوح. 6:44). كەزىندە ەحوبا ٴبىر جاريالاۋشىنى تالپىندىرىپ، سىزگە شىندىقتى ۇيرەتكەنىنە جانە ٴسىزدى ٶز قىزمەتشىسى ەتكەنىنە وتە ريزا بولارسىز!
2. بۇل ماقالادا نە قاراستىرامىز؟
2 ٴسىز شىندىقتى بىلگەننەن كەيىن، ەندى وزگەلەرگە دە ٶمىر جولىنا تۇسۋگە كومەكتەسە الاسىز. سىزگە ۇيمە-ٷي ٴجۇرىپ ۋاعىزداۋ وڭاي بولعانمەن، كيەلى كىتاپتى زەرتتەۋ ساباعىن ۇسىنىپ، ونى وتكىزۋ قيىن شىعار. ولاي بولسا، بۇل ماقالاداعى كەڭەستەر سىزگە كومەك بولادى. ٴبىز قازىر شاكىرت دايىنداۋعا ٴبىزدى نە تالپىندىراتىنىن بىلەمىز. سونىمەن قاتار كيەلى كىتاپتى زەرتتەۋ ساباعىن باستاۋعا كەدەرگى بولاتىن قيىندىقتاردى قالاي جەڭەتىنىمىزدى كورەمىز. الدىمەن، نەگە ٴبىز ىزگى حاباردى ۋاعىزداۋشى عانا ەمەس، ۇيرەتۋشى دە بولۋىمىز كەرەكتىگىن قاراستىرايىق.
يسا ۋاعىزداۋمەن قاتار، ۇيرەتۋدى دە بۇيىردى
3. ٴبىز نەگە ۋاعىزدايمىز؟
3 يسا جەردە بولعاندا ٸزباسارلارىنا قوس تاپسىرما بەردى. بىرىنشىدەن، يسا قۇداي پاتشالىعى جايلى ىزگى حاباردى ۋاعىزداۋدى تاپسىردى جانە بۇل ىستە ٶزى ۇلگى كورسەتتى (مات. 10:7؛ لۇقا 8:1). يسا ولارعا ىزگى حاباردى تىڭدايتىن دا، تىڭدامايتىن دا ادامدار بولاتىنىن ەسكەرتتى (لۇقا 9:2—5). سونداي-اق ول ىزگى حاباردىڭ كەڭ تارالىپ، «بارلىق حالىقتارعا» ۋاعىزدالاتىنىن پايعامبارلىق ەتتى (مات. 24:14؛ ەل. ٸس. 1:8). ادامدار حاباردى قالاي قابىلداماسىن، شاكىرتتەر قۇداي پاتشالىعى جايلى جانە ونىڭ نە ىستەيتىنى جايلى ۋاعىزداي بەرۋلەرى كەرەك ەدى.
4. ماتاي 28:18—20-تارماقتارعا ساي، ٴبىز پاتشالىق جايلى ۋاعىزداۋمەن قاتار، نە ىستەۋىمىز كەرەك؟
4 يسا تاپسىرعان ەكىنشى ٸس قانداي؟ بۇل — بولاشاق شاكىرتتەرگە يسانىڭ بۇيىرعاندارىنىڭ ٴبارىن ۇستانۋدى ۇيرەتۋ. كەيبىرەۋلەر يسا ۋاعىزداۋ مەن ۇيرەتۋ ٸسىن I عاسىرداعى ٸزباسارلارىنا عانا تاپسىرعان دەپ جاتادى. ٴبىراق بۇل راسىندا دا سولاي ما؟ جوق. ويتكەنى يسا بۇل ٸستىڭ ٴبىزدىڭ كۇنىمىزگە دەيىن، ياعني «وسى زامان اياقتالعانشا» جالعاساتىنىن ايتقان (ماتاي 28:18—20 وقىڭىز). يسا بۇل تاپسىرمانى 500-دەن استام ٸزباسارىنا كورىنگەن كەزدە ايتسا كەرەك (قور. 1-ح. 15:6). ال كەيىنىرەك ول جوحانعا بەرگەن ايانىندا ماسىحشىلەردىڭ ٴبارى دە وزگەلەرگە ەحوبا جايلى ۇيرەتۋ كەرەكتىگىن انىق كورسەتتى (ايان 22:17).
5. قورىنتتىقتارعا 1-حات 3:6—9-تارماقتاردا پاۋىل ۋاعىزداۋ مەن ۇيرەتۋدىڭ بايلانىسىن قانداي مىسالمەن كورسەتتى؟
5 ەلشى پاۋىل شاكىرت دايىنداۋ ٸسىن ەگىن وسىرۋگە تەڭەگەن. ول قورىنتتىقتارعا: «مەن ەكتىم، اپوللوس سۋاردى، ...سەندەر — قۇدايدىڭ وڭدەپ جاتقان ەگىندىگىسىڭدەر»،— دەگەن (قورىنتتىقتارعا 1-حات 3:6—9 وقىڭىز). قۇدايدىڭ ەگىندىگىندە جۇمىس ىستەپ جۇرگەن بىزدەر تەك دان سەۋىپ قانا، ياعني ۋاعىزداپ قانا قويمايمىز. سونىمەن قاتار سۋارىپ، قالاي ٶسىپ جاتقانىن قاراپ وتىرامىز، ياعني ۇيرەتەمىز (جوح. 4:35). ٴبىراق ٴداندى وسىرەتىن قۇداي ەكەنىن ۇمىتپايمىز.
6. تالىمگەر رەتىندە ٴبىزدىڭ مىندەتىمىزگە نە كىرەدى؟
6 ٴبىز «ماڭگى ومىرگە ىڭعاي تانىتقانداردى» ىزدەيمىز (ەل. ٸس. 13:48). ولار ٴماسىحتىڭ شاكىرتى بولۋى ٷشىن ٴبىز ولارعا كيەلى كىتاپتان بىلگەندەرىن 1) تۇسىنۋگە، 2) قابىلداۋعا جانە 3) ٸس جۇزىندە قولدانۋعا كومەكتەسۋىمىز قاجەت (جوح. 17:3؛ قول. 2:6، 7؛ سال. 1-ح. 2:13). زەرتتەۋشى جالعان نانىم-سەنىمدەرى، ادەت-عۇرىپتارى سياقتى «بەكىنىستەردى تالقانداۋ ٷشىن»، تالىمگەرى وعان كوپ ۋاقىتى مەن كۇشىن جۇمسايتىن شىعار (قور. 2-ح. 10:4، 5). زەرتتەۋشى وسى قادامداردى جاساپ، كەيىن شومىلدىرۋ راسىمىنەن وتۋىنە ٴبىراز ايلار كەتۋى مۇمكىن، ٴبىراق بۇل سوعان تۇرادى. سونداي-اق زەرتتەۋشىگە قاۋىمداعىلاردىڭ بارلىعى دا كومەكتەسە الادى. مىسالى، قاۋىمعا كەلە باستاعاندا ونى جىلى قارسى الىپ، سۇيىسپەنشىلىك تانىتۋ ارقىلى (جوح. 13:35).
سۇيىسپەنشىلىك شاكىرت دايىنداۋعا قوزعاۋ سالادى
7. ۋاعىزداۋ مەن شاكىرت دايىنداۋ ىسىنە قاتىسۋعا ٴبىزدى نە تالپىندىرادى؟
7 ۋاعىزداۋ مەن شاكىرت دايىنداۋ ىسىنە قاتىسۋىمىزدىڭ باستى سەبەبى قانداي؟ ەحوباعا دەگەن سۇيىسپەنشىلىگىمىز. ٴبىز ەحوبانى سۇيگەندىكتەن ىزگى حاباردى ۋاعىزداۋ مەن ۇيرەتۋ ىسىنە بارىمىزدى سالامىز (جوح. 1-ح. 5:3). ٶزىڭىز جايلى ويلاپ كورىڭىزشى. ۇيدەن-ۇيگە ۋاعىزداۋعا ٴسىزدى نە تالپىندىرعان ەدى؟ ەحوباعا دەگەن سۇيىسپەنشىلىگىڭىز. ٴبىراق سىزگە بىردەن ۋاعىزداپ كەتۋ وڭاي بولماعان شىعار. قىزمەتتە العاش رەت بىرەۋدىڭ ەسىگىن قاققاندا، جۇرەگىڭىز تارسىلداپ، قاتتى قوبالجىعان بولارسىز. ٴبىراق بۇل ٸستى سىزگە يسا تاپسىرعاندىقتان، ٴسىز ونى مويىنسۇنا اتقاردىڭىز. قازىر سىزگە ۇيدەن-ۇيگە ۋاعىزداۋ الدەقايدا جەڭىل شىعار. الايدا بىرەۋمەن كيەلى كىتاپتى زەرتتەۋ جايلى نە ويلايسىز؟ بۇلاي ەتۋگە قورقاسىز با؟ ولاي بولسا ۋايىمىڭىزدى ەحوباعا ارتىڭىز. ودان كيەلى كىتاپتى زەرتتەۋ ساباعىن باستاۋعا باتىلدىق سۇراڭىز. سوندا ەحوبا ٴسىزدىڭ شاكىرت دايىنداۋعا دەگەن ىقىلاسىڭىزدى ارتتىرادى.
8. مارقا 6:34 كە ساي، ادامدارعا شىندىقتى ۇيرەتۋگە ٴبىزدى تاعى نە تالپىندىرادى؟
8 وزگەلەرگە شىندىقتى ۇيرەتۋىمىزدىڭ ەكىنشى سەبەبى — ادامدارعا دەگەن سۇيىسپەنشىلىگىمىز. بىردە يسا مەن شاكىرتتەرى كوپ ۋاعىزداپ، قاتتى شارشاپ قالادى دا، ٴبىراز تىنىعىپ الۋ ٷشىن وڭاشا جەرگە بارادى. ٴبىراق قالىڭ جۇرت ولاردى سول جەردەن دە تاۋىپ الادى. يسا حالىقتى اياپ كەتكەندىكتەن، ولاردى «كوپ نارسەگە» ۇيرەتە باستايدى (مارقا 6:34 وقىڭىز). نەگە يسا شارشاپ-شالدىعىپ تۇرسا دا، ٶزىن ايامادى؟ ويتكەنى ول ٶزىن سول ادامداردىڭ ورنىنا قويىپ، قانداي كۇي كەشىپ جۇرگەندەرىن جاقسى ٴتۇسىندى. ولاردىڭ ازاپ شەگىپ، قينالىپ، ٷمىتسىز جۇرگەندەرىن كوردى. قازىرگى ادامدار دا سونداي كۇيدە. ولار سىرت كوزگە باقىتتى بولىپ كورىنگەنمەن، باعۋشىسى جوق، اداسقان بەيشارا قويلارداي. ەلشى پاۋىل بۇنداي ادامدار جايلى: «وسى دۇنيەدە ەش ٷمىتسىز، قۇدايدى بىلمەي ٶمىر كەشتىڭدەر»،— دەگەن (ەفەس. 2:12). سونداي-اق ولار «جويىلۋعا اپاراتىن» داڭعىل جولدا جۇرگەندەرىن بىلمەيدى (مات. 7:13). ەندەشە، اۋماعىمىزدا تۇراتىن ادامداردىڭ رۋحاني كۇيى جايلى كوبىرەك ويلايىق. سوندا سۇيىسپەنشىلىگىمىز ويانىپ، ولارعا جانىمىز اشىپ، قاجەتتى كومەك ۇسىنا الامىز. ال ولارعا كومەكتەسۋدىڭ ەڭ جاقسى جولى — كيەلى كىتاپ زەرتتەۋ ساباعىن ۇسىنۋ.
9. فىلىپىلىكتەرگە 2:13 كە ساي، ەحوبا سىزگە قالاي كومەكتەسەدى؟
9 كيەلى كىتاپتى زەرتتەۋ ساباعىنا دايىندالۋ جانە ونى جۇرگىزۋ كوپ ۋاقىتتى تالاپ ەتەتىندىكتەن، بىرەۋگە زەرتتەۋ ساباعىن ۇسىنۋدان تارتىنشاقتاپ جۇرگەن شىعارسىز. وسى ۋايىمىڭىزدى، سەزىمدەرىڭىزدى ەحوباعا اشىق ايتىڭىز. كيەلى كىتاپ زەرتتەۋ ساباعىن تابۋعا جانە ونى جۇرگىزۋگە ىقىلاس سۇراڭىز (فىلىپىلىكتەرگە 2:13 وقىڭىز). ەلشى جوحان: «ونىڭ ەركىنە ساي نە سۇراساق تا، قۇدايدىڭ بىزگە قۇلاق اساتىنىنا كامىل سەنەمىز»،— دەگەن (جوح. 1-ح. 5:14، 15). سوندىقتان ەحوبا دۇعاڭىزعا جاۋاپ بەرىپ، شاكىرت دايىنداۋعا ىقىلاسىڭىزدى وياتاتىنىنا سەنىمدى بولىڭىز.
وزگە دە قيىندىقتاردى جەڭۋ
10، 11. كەيبىر جاريالاۋشىلارعا كيەلى كىتاپتى زەرتتەۋ ساباعىن باستاۋ نەلىكتەن قيىن؟
10 ٴبىز شاكىرت دايىنداۋ وتە ماڭىزدى ٸس ەكەنىن بىلەمىز. ٴبىراق ونى جان-تانىمىزبەن اتقارۋعا كەيبىر قيىندىقتار كەدەرگى بولىپ جاتادى. قازىر سولاردىڭ تورتەۋىن قاراستىرىپ، ولاردى قالاي جەڭۋگە بولاتىنىن كورەيىك.
11 ٶزىڭىز قالاعانداي قىزمەت ەتە الماعاندا. مىسالى، ٴسىز جاسىڭىز كەلىپ قالعاندىقتان نەمەسە ناشار دەنساۋلىقتىڭ كەسىرىنەن قالاعانىڭىزشا قىزمەت ەتە المايتىن شىعارسىز. ٴبىراق 19-COVID پاندەمياسى كەزىندە ٴبارىمىزدىڭ مىنا نارسەگە كوزىمىز جەتتى: ٴبىز زەرتتەۋ ساباقتارىن ەلەكتروندى قۇرىلعىلار ارقىلى دا ٴتيىمدى وتكىزە الامىز. ٴسىز ۇيىڭىزدە وتىرىپ-اق زەرتتەۋ ساباعىن باستاي الاسىز. بۇنىڭ تاعى ٴبىر ۇتىمدى جاعى بار. كەيبىر ادامدار كيەلى كىتاپتى زەرتتەگىلەرى-اق كەلەدى. ٴبىراق جاريالاۋشىلار ادەتتە ۋاعىزدايتىن ۋاقىتتا ولاردىڭ قولدارى بوس بولمايدى. ولار تەك تاڭەرتەڭ نە كەشكى ۋاقىتتا ۇيلەرىندە بولادى. ٴسىز ولارعا وسىنداي ۋاقىتتا حابارلاسىپ، كيەلى كىتاپ زەرتتەۋ ساباعىن ۇسىنا الاسىز با؟ يسا دا نىكودەمگە ىڭعايلى ۋاقىتتا، ياعني تۇندە ٴتالىم بەرگەن (جوح. 3:1، 2).
12. جاقسى تالىمگەر بولا الاتىنىمىزعا قانداي سەبەپتەر بار؟
12 كيەلى كىتاپتى زەرتتەۋ ساباعىن وتكىزۋ قولىمنان كەلمەيدى دەپ ويلاساڭىز. ٴسىز بىرەۋدى ۇيرەتەتىندەي ٴبىلىمىم كوپ ەمەس، ٴتالىم بەرۋ شەبەرلىگىم دە از دەيتىن شىعارسىز. ٴبىراق سەنىمدىلىگىڭىزدى قاتايتاتىن مىنا ٷش جايتقا نازار اۋدارىڭىز: باسقالاردى ۇيرەتۋگە ٴسىزدى «قۇداي جارامدى ەتتى» (قور. 2-ح. 3:5). ەكىنشىدەن، «كوك پەن جەردەگى بارلىق بيلىكتى» يەمدەنگەن يسا بىزگە ٴتالىم بەرۋگە قۇزىر بەردى (مات. 28:18). ول وسىلاي بىزگە سەنىم ارتادى. ۇشىنشىدەن، باسقا جاريالاۋشىلاردان كومەك سۇراساڭىز بولادى. يسا نە ايتۋ كەرەكتىگىن اكەسىنەن ۇيرەنگەنى سياقتى، ٴسىز دە سولاي ەتە الاسىز (جوح. 8:28؛ 12:49). سونداي-اق توپ باقىلاۋشىڭىزدان، ٸزاشاردان نە تاجىريبەلى جاريالاۋشىدان زەرتتەۋ ساباعىن باستاپ، ونى جۇرگىزۋگە كومەكتەسۋىن سۇراي الاسىز. ٴسىز ولار جۇرگىزەتىن زەرتتەۋ ساباقتارىنا قاتىسۋ ارقىلى دا سەنىمدىلىگىڭىزدى نىعايتساڭىز بولادى.
13. نەلىكتەن بەيىمدەلگىش بولۋىمىز كەرەك؟
13 جاڭا ادىستەر مەن جاڭا قۇرالدارعا ۇيرەنۋ قيىن بولعاندا. قازىر اداممەن كيەلى كىتاپتى زەرتتەۋ ٵدىسى وزگەردى. ٴبىز ەندى زەرتتەۋشىلەرمەن «ماڭگى باقي ٶمىردىڭ راقاتىن كورىڭىز!» كىتابى بويىنشا ساباق وتەمىز. بۇل كىتاپ الدىڭعى زەرتتەۋ قۇرالدارىنان ەرەكشەلەنەتىندىكتەن، ەندى ساباققا دايىندىق تا، ونى وتكىزۋ دە باسقاشا جۇرەدى. وقىلاتىن ابزاستار از بولعاندىقتان، زەرتتەۋ كوبىنەسە اڭگىمە جۇزىندە وتەدى. ساباقتا كوپ ۆيدەو كورسەتەمىز، «®JW Libary سياقتى ەلەكتروندى قوسىمشالاردى قولدانامىز. ولاردى جاقسى قولدانا الماساڭىز، وزگەلەردەن كومەك سۇراڭىز. «اۋرۋ قالسا دا، ادەت قالمايدى» دەمەكشى، ادامنىڭ ۇيرەنىپ قالعان ادەتىنەن ارىلىپ، جاڭا نارسەگە ۇيرەنۋى قيىن. دەسە دە ەحوبانىڭ جانە باۋىرلاستاردىڭ كومەگىمەن وزگەرىستەرگە بەيىمدەلە الاسىز جانە زەرتتەۋ ساباعىن جاڭاشا وتكىزۋدەن دە قۋانىش تابا الاسىز. ٴبىر ٸزاشار جاڭا زەرتتەۋ ادىسىنىڭ تالىمگەرگە دە، زەرتتەۋشىگە دە جاڭا سەرپىن بەرىپ، سەرگىتەتىنىن بايقاپتى.
14. ۋاعىزداۋ قيىن اۋماقتا قىزمەت ەتكەندە نەنى ەستە ۇستاۋىمىز كەرەك جانە قورىنتتىقتارعا 1-حات 3:6، 7 بىزگە قاي جاعىنان جىگەر بەرەدى؟
14 ايماعىڭىزدا زەرتتەۋ ساباعىن باستاۋ قيىن بولسا. ٴسىز تۇراتىن جەردە ادامدار ىزگى حاباردى تىڭداماسا، ٴتىپتى قارسى شىقسا، قۋانىشىڭىزدى جوعالتپاۋعا نە كومەكتەسەدى؟ اۋمالى-توكپەلى مىنا زاماندا ادامداردىڭ جاعدايى كۇرت وزگەرىپ كەتۋى مۇمكىن ەكەنىن ۇمىتپاڭىز. ٴبىر كەزدەرى حابارىمىزدى تىڭداماعان ادام رۋحاني مۇقتاجدىعىن مويىنداي باستاۋى مۇمكىن (مات. 5:3). بۇرىن ادەبيەتتەرىمىزدى الماعان ادامداردىڭ كەيبىرى كەيىننەن كيەلى كىتاپتى زەرتتەۋگە كەلىسكەن. سونداي-اق ەگىننىڭ يەسى ەحوبا ەكەنىن دە ۇمىتپايىق (مات. 9:38). ول ٴبىزدىڭ دان سەۋىپ، سۋارا بەرگەنىمىزدى قالايدى. ال ونى ٶسىرۋدى ەحوبا ٶز موينىنا العان (قور. 1-ح. 3:6، 7). ٴتىپتى بىردە-ٴبىر زەرتتەۋ ساباعى تابىلماسا دا، ەحوبا اكەلگەن جەمىسىمىزگە ەمەس، ەڭبەگىمىزگە قاراي باتاسىن بەرەتىنىن ەستە ۇستايىق *.
شاكىرت دايىنداۋ قۋانىشىنا كەنەلىڭىز!
سۋرەتتەن ۋاعىزداۋ مەن ۇيرەتۋ ٸسى ادامعا قالاي كومەكتەسەتىنىن كورەمىز (15—17 ابزاستاردى قاراڭىز) *
15. بىرەۋ كيەلى كىتاپتى زەرتتەي باستاپ، بىلگەنىن ومىردە قولدانسا، ەحوبا نە سەزىنەدى؟
15 الدەكىم شىندىقتى قابىلداپ، كەيىن ونى باسقالارعا دا ۋاعىزداسا، ەحوبانىڭ جۇرەگى قاتتى قۋانادى (ناق. س. 23:15، 16). 2020 قىزمەت جىلىنا نازار اۋدارساق، جاھاندىق پاندەمياعا قاراماستان، 7705765 ادام كيەلى كىتاپتى زەرتتەگەن، ال سولاردىڭ 241994-ٴى ەحوباعا باعىشتالىپ، شومىلدىرۋ راسىمىنەن وتكەن. بۇل جاڭا شاكىرتتەر كەيىن باسقا ادامدارمەن زەرتتەپ، تاعى دا شاكىرتتەر دايىندايدى (لۇقا 6:40). ٴسوز جوق، ەحوبا ٴبىزدىڭ شاكىرت دايىنداۋ ىسىنە اتسالىسىپ جۇرگەنىمىزگە شات-شادىمان بولادى!
16. ٴسىز قانداي ماقسات قويا الاسىز؟
16 شاكىرت دايىنداۋ وڭاي ٸس ەمەس ەكەنى راس، ٴبىراق ەحوبانىڭ كومەگىمەن زەرتتەۋشىلەردى ەحوبانى جاقسى كورۋگە ۇيرەتە الامىز. ٴسىز كەم دەگەندە ٴبىر كيەلى كىتاپ زەرتتەۋ ساباعىن باستاۋدى ماقسات ەتە الاسىز با؟ بۇل ٷشىن كەزدەستىرگەن بارلىق ادامعا كيەلى كىتاپتى زەرتتەۋ ساباعىن ۇسىنىڭىز. ەحوبا تالپىنىسىڭىزعا باتاسىن بەرىپ، ماقساتىڭىزعا جەتكەندە، ٶزىڭىز تاڭعالىپ قالاسىز.
17. زەرتتەۋ ساباعىن وتكىزۋ ٴبىزدى قانداي سەزىمگە بولەيدى؟
17 ادامدارعا ۋاعىزداۋ دا، شىندىقتى ۇيرەتۋ دە ٴبىز ٷشىن زور مارتەبە! بۇل ٸس ٴبىزدى شىن باقىتتى ەتەدى. ەلشى پاۋىل سالونيكاداعى كوپ باۋىرلاسقا ٴماسىحتىڭ شاكىرتى بولۋعا كومەكتەسكەن. ول بىلاي دەگەن: «يەمىز يسانىڭ... الدىندا ٴبىزدىڭ ٷمىتىمىز، قۋانىشىمىز بەن ماقتانىش ٴتاجىمىز سەندەر بولماعاندا، كىم بولماق؟ ٴيا، ماقتانىشىمىز بەن قۋانىشىمىز وزدەرىڭسىڭدەر» (سال. 1-ح. 2:19، 20؛ ەل. ٸس. 17:1—4). بۇگىندە دە كوبىمىز وسىنداي سەزىمدەمىز. مىسالى، كۇيەۋى ەكەۋى كوپ ادامعا شومىلدىرۋ راسىمىنەن وتۋگە كومەكتەسكەن ستەفاني باۋىرلاس: «ادامدارعا ەحوباعا باعىشتالۋعا كومەكتەسۋدەن ارتىق قۋانىش جوق ەكەن»،— دەيدى.
57-ٵن بارشا جانعا ۋاعىزدايىق
^ 5-ابزاس ەحوبا بىزگە ۋاعىزداۋ مارتەبەسىن بەرۋدەن بولەك، يسانىڭ بۇيىرعاندارىن ۇيرەتۋدى دە تاپسىردى. بۇل ٸستى ىنتا-ىقىلاسپەن اتقارۋعا نە كومەكتەسەدى؟ ۋاعىزداۋ مەن شاكىرت دايىنداۋ ىسىندە قانداي قيىندىقتار بولۋى مۇمكىن؟ ولاردى قالاي جەڭە الامىز؟ بۇل سۇراقتاردىڭ جاۋابىن وسى ماقالادان بىلەمىز.
^ 14-ابزاس قاۋىمداعى ٵربىر باۋىرلاس شاكىرت دايىنداۋعا قالاي ۇلەس قوسا الاتىنى جايلى كوبىرەك ٴبىلۋ ٷشىن، 2021-جىلى ناۋرىزدا شىققان «كۇزەت مۇناراسىنداعى» «زەرتتەۋشىگە شومىلدىرۋ راسىمىنەن وتۋگە قاۋىم بولىپ كومەكتەسەيىك!» دەگەن ماقالانى قاراڭىز.
^ 53-ابزاس سۋرەت سيپاتتاماسى: زەرتتەۋ ساباعى ادامنىڭ ٶمىرىن قالاي وزگەرتە الاتىنىنا نازار اۋدارىڭىز: ەحوبانى بىلمەيتىن ٴبىر ەر كىسى ٴمان-ماعىناسىز ٶمىر كەشتى. كەيىن كۋاگەرلەر وعان ىزگى حاباردى ايتىپ، ول كيەلى كىتاپتى زەرتتەۋگە كەلىستى. كوبىرەك ٴبىلىم العان سوڭ، ەر كىسى باعىشتالىپ، شومىلدىرۋ راسىمىنەن ٶتتى. ۋاقىت وتە ول دا وزگەلەرگە شاكىرت بولۋعا كومەكتەسە باستادى. كەيىن ٴبارى جۇماقتا باقىتتى ٶمىر كەشتى.
