52-زەرتتەۋ ماقالاسى
باۋىرلاستارىڭىزعا الاساپىراندا تىرەك بولىڭىز
«قولىڭنان كەلىپ تۇرعاندا، مۇقتاجدارعا جاقسىلىق جاساۋدان تارتىنبا» (ناق. س. 3:27).
103-ٵن باعۋشىلار — قۇدايدىڭ سيى
اڭداتپا a
1. ەحوبا قىزمەتشىلەرىنىڭ دۇعاسىنا ادەتتە قالاي جاۋاپ بەرەدى؟
بىلەسىز بە، ەحوبا ٴسىزدى قولدانىپ، بىرەۋدىڭ جالبارىنا ايتقان ىستىق دۇعاسىنا جاۋاپ بەرە الادى. ٴسىز قاۋىم اقساقالى، قىزمەت كومەكشىسى، ٸزاشار نە قاۋىمداعى جاريالاۋشى بولىڭىز، جاس نە قاريا، ەر نە ايەل باۋىرلاس بولىڭىز، ەحوبا كەز كەلگەنىمىزدى قولدانا الادى. ەحوبانى سۇيەتىن قىزمەتشىسى ونى كومەككە شاقىرعاندا، ول ادەتتە اقساقالدار نە باسقا دا ادال قىزمەتشىلەرى ارقىلى وعان «تىرەك بولادى» (قول. 4:11). وسىلاي ەحوباعا جانە باۋىرلاستارىمىزعا قىزمەت ەتە الاتىنىمىز ٴبىز ٷشىن ۇلكەن مارتەبە! ٴبىز ولارعا اسىرەسە ىندەت جايلاعاندا، تابيعي اپاتتا جانە قۋعىن-سۇرگىن كەزىندە كومەكتەسكىمىز كەلەدى.
ىندەت كەزىندە تىرەك بولىڭىز
2. ىندەت جايلاعاندا باۋىرلاستارعا كومەكتەسۋ قاي جاعىنان قيىنداپ كەتەدى؟
2 ٴبىز تۇراتىن جەردى ىندەت جايلاسا، ٶزىمىزدى تۇساۋلانىپ قالعانداي سەزىنەتىن شىعارمىز. مىسالى، دوستارىمىزدى بارىپ كورگىمىز كەلەر، ٴبىراق بۇل قاۋىپتى بولۋى مۇمكىن. يا بولماسا جوقشىلىققا ۇشىراعان وتباسىن تاماققا شاقىرعىمىز كەلەر، ٴبىراق بۇل دا مۇمكىن ەمەس. نەمەسە ٶز وتباسىڭىز قينالىپ جاتقاندىقتان، باسقالارعا كومەكتەسە الماۋىڭىز مۇمكىن. ٴبىراق ٴبىز سوندا دا باۋىرلاستارىمىزعا قولدان كەلگەنشە جاقسىلىق جاساي بەرگىمىز كەلەدى، ويتكەنى ەحوباعا بۇل ۇنايدى (ناق. س. 3:27؛ 19:17). ەندەشە، باۋىرلاستارعا قالاي كومەكتەسسەك بولادى؟
3. دەزيدىڭ قاۋىمىنداعى اقساقالداردان نە ۇيرەنەمىز؟ (ەرەميا 23:4)
3 اقساقالداردىڭ كومەگى. اقساقال بولساڭىز، وتارىڭىزداعى قويلاردى جاقسى بىلۋگە كۇش سالىڭىز (ەرەميا 23:4 وقىڭىز). الدىڭعى ماقالادا ايتىلىپ كەتكەن دەزي باۋىرلاس بىلاي دەيدى: «مەنىڭ ۋاعىزداۋ توبىمداعى اقساقالدار بىزبەن ٴجيى قىزمەت ەتىپ تۇراتىن، سونداي-اق جاي وتىرىستاردا دا باس قوسىپ، ارالاسىپ تۇراتىنبىز» b. كەيىن 19-COVID پاندەمياسى باستالىپ، دەزي بىرنەشە تۋىسىنان ايىرىلىپ قالعاندا، وعان قاجەتتى كومەك كورسەتۋ اقساقالدار ٷشىن جەڭىل بولدى.
4. اقساقالدار دەزيگە نەنىڭ ارقاسىندا كومەكتەسە الدى جانە ولاردان قانداي ۇلگى الامىز؟
4 دەزي: «اقساقالدارمەن ارالاسىپ، دوس بولىپ كەتكەندىكتەن، ولارعا مەنى نە مازالاپ جاتقانىن، نە سەزىنىپ جاتقانىمدى ايتۋ جەڭىل بولدى»،— دەيدى. باعۋشىلار بۇدان قانداي ساباق الادى؟ الاپاتتىڭ كەلگەنىن كۇتىپ وتىرماڭىز، باۋىرلاستارعا قازىردەن قامقور بولىڭىز، ولارمەن دوس بولىڭىز. ىندەتتىڭ كەسىرىنەن ولارمەن بەتپە-بەت كورىسە الماساڭىز، بايلانىسۋدىڭ باسقا جولدارىن ىزدەڭىز. «كەيدە ماعان ٴبىر كۇندە بىرنەشە اقساقال تەلەفون شالىپ، حات جازاتىن. ولاردىڭ بولىسكەن تارماقتارىن جاقسى بىلسەم دە، وقىعاندا كوڭىلىم جايلانىپ قالاتىن»،— دەيدى دەزي.
5. باۋىرلاستارعا قانداي كومەك كەرەك ەكەنىن اقساقالدار قالاي بىلە الادى جانە قالاي كومەكتەسە الادى؟
5 باۋىرلاستارعا قانداي كومەك قاجەت ەكەنىن ولاردى ىڭعايسىز جاعدايعا قالدىرمايتىنداي سۇراقتار قويىپ بىلسە بولادى (ناق. س. 20:5). ولاردىڭ جەيتىن تاماعى، ٴدارى-دارمەگى نە باسقا دا قاجەتتى زاتتارى جەتكىلىكتى مە ەكەن؟ جۇمىستارىنان ايىرىلىپ قالۋلارى مۇمكىن بە، جالعا تولەيتىن اقشالارى بار ما؟ مەملەكەتتىك كومەككە جۇگىنىپ جاتسا، جاردەمدەسىپ جىبەرۋ كەرەك پە؟ دەزيگە باۋىرلاستار ماتەريالدىق جاعىنان قول ۇشىن بەردى. ٴبىراق وعان سول قيىن شاقتا اسىرەسە كومەك بولعانى اقساقالداردىڭ ەموسيالىق جانە رۋحاني جاعىنان دەم بەرگەندەرى ەكەن. ول بىلاي دەيدى: «اقساقالدار مەنىمەن بىرگە دۇعا ايتتى. ولاردىڭ ايتقان سوزدەرى ەسىمدە قالماسا دا، ٶزىمدى جاقسى سەزىنىپ قالعانىم ەسىمدە. ولار ارقىلى ەحوبا ماعان «مەن سەنىڭ قاسىڭدامىن» دەگەندەي بولدى» (يشايا 41:10، 13).
6. باۋىرلاستارعا كومەكتەسۋ ٷشىن قاۋىمداعىلاردىڭ ٴبارى نە ىستەي الادى؟ (سۋرەتتى قاراڭىز.)
6 باسقالاردىڭ كومەگى. ارينە، باۋىرلاستارعا تەك اقساقالدار عانا ەمەس، بارلىعىمىز دا كومەكتەسىپ، جىگەر بەرە الامىز. ەحوبا ٴبىزدى وسىعان شاقىرادى (عال. 6:10). توسەك تارتىپ قالعان باۋىرلاسقا تيتتەي دە بولسىن كوڭىل بولگەنىمىزدىڭ ٶزى ۇلكەن جىگەر بەرە الادى. مىسالى، كىشكەنتاي بالا اۋىرىپ جاتقان ەر باۋىرلاسقا سۋرەت سالىپ جىبەرسە نە وتكرىتكا جولداسا بولادى. ال جاستار ايەل باۋىرلاسىمىزدىڭ دۇكەننەن كەرەك-جاراعىن اكەپ بەرسە نە باسقا تىرلىكتەرىن ىستەپ بەرسە بولادى. سونداي-اق تاماق ٴپىسىرىپ، اۋىرىپ قالعان باۋىرلاسىمىزدىڭ ەسىك الدىنا قويىپ كەتسەك بولادى. ەلدە ىندەت جاپپاي تاراپ كەتسە، تەك ناۋقاس باۋىرلاستار عانا ەمەس، قاۋىمداعى بارلىق باۋىرلاستار جىگەرگە مۇقتاج بولادى. مۇنداي كەزدە جۇزبە-ٴجۇز بولسىن نە ۆيدەوكونفەرەنسيا ارقىلى بولسىن، قاۋىم كەزدەسۋىنەن كەيىن ۇزاعىراق قالىپ، باسقالارمەن ارالاسساق بولادى. الاساپىران ۋاقىتتا اقساقالدار دا جىلى سوزگە مۇقتاج بولاتىنىن ۇمىتپايىق. كەيبىر باۋىرلاستار ىندەت كەزىندە كوپ تەر توككەن اقساقالدارعا لەبىزدەرىن ٴبىلدىرىپ، ريزاشىلىق حاتتارىن جولداعان ەكەن. «ٴبىر-ٴبىرىمىزدى جۇباتىپ، نىعايتۋ» ٷشىن ٴارقايسىسىمىز وسىلاي ۇلەس قوسىپ جۇرگەنىمىز قانداي جاقسى! (سال. 1-ح. 5:11).
تابيعي اپاتتا تىرەك بولىڭىز
7. تابيعي اپاتتىڭ سالدارى قانداي بولۋى مۇمكىن؟
7 ٴتىلسىز جاۋ ٴبىر پاستە-اق ادامنىڭ ٶمىرىنىڭ استان-كەستەڭىن شىعارىپ جىبەرەدى. ادام دۇنيە-مۇلكىنەن، ۇيىنەن، ٴتىپتى جاقىندارىنان ايىرىلىپ قالۋى مۇمكىن. مۇنداي تابيعي اپاتتار ٴبىزدىڭ باۋىرلاستاردى دا اينالىپ ٶتىپ جاتقان جوق. تابيعي اپاتتىڭ قۇربانى بولىپ قالعان باۋىرلاستارعا قالاي كومەكتەسسەك بولادى؟
8. اپاتقا الدىن الا دايىن بولۋ ٷشىن اقساقالدار مەن وتاعالارى نە ىستەي الادى؟
8 اقساقالداردىڭ كومەگى. اقساقالدار، قاۋىمداعى باۋىرلاستارعا تابيعي اپاتتارعا الدىن الا دايىن بولۋعا كومەكتەسىڭىزدەر. قالاي ساقتانۋدى، اقساقالدارمەن قالاي بايلانىسۋدى باۋىرلاستاردىڭ بارلىعى بىلەتىنىنە كوز جەتكىزىڭىزدەر. الدىڭعى ماقالادا ايتىلعان مارگارەت باۋىرلاس بىلاي دەيدى: «ٴبىزدىڭ اقساقالدار جەرگىلىكتى قاجەتتىلىكتەر بولىمىندە ورمان ٶرتىنىڭ ٵلى اياقتالماعانىن ايتىپ ەسكەرتتى. ولار بيلىك وكىلدەرى ەۆاكۋاسيالانۋدى بۇيىرسا نەمەسە جاعداي ۋشىعىپ كەتسە، بىردەن ٷيدى تاستاپ قاشۋ كەرەكتىگىن ايتتى». بۇل دەر كەزىندە ايتىلعان ەسكەرتۋ بولدى. ويتكەنى سودان بەس اپتا وتەر-وتپەس سول ايماقتا ٶرت باستالىپ كەتتى. وسىنداي توتەنشە جاعدايدا ٷي ىشىندەگىلەردىڭ ٴارقايسىسى نە ىستەۋ كەرەكتىگىن ٴبىلۋ ٷشىن، وتاعالارى وتباسىلىق عيباداتتا سول جايلى تالقىلاسا بولادى. سوندا وزدەرى دە، بالا-شاعالارى دا ساقاداي ساي تۇرىپ، اپاتتا دۇرلىكپەيتىن بولادى.
9. اقساقالدار اپاتقا دەيىن جانە اپاتتان كەيىن نە ىستەسە بولادى؟
9 توپ باقىلاۋشىسى بولساڭىز، اپاتقا دەيىن باۋىرلاستارىڭىزدىڭ مەكەنجايلارى مەن بايلانىس نومىرلەرىن دۇرىس جازىپ العانىڭىزعا كوز جەتكىزىڭىز. كەيىن بۇل ٴتىزىمدى جاڭارتىپ وتىرىڭىز. سوندا توتەنشە جاعدايدا ولارمەن بايلانىسىپ، نە كومەك كەرەك ەكەنىن بىلە الاسىز. كەيىن سول مالىمەتتى اقساقالدار كەڭەسىنىڭ ۇيلەستىرۋشىسىنە ايتىڭىز، ال ول ٶز كەزەگىندە اۋداندىق باقىلاۋشىعا حابارلايدى. وسىلاي جۇمىلا ارەكەت ەتكەننىڭ ارقاسىندا جاقسى ناتيجەگە قول جەتكىزە الاسىزدار. مارگارەت باۋىرلاس تۇراتىن ايماقتى ٶرت شالعاندا اۋداندىق باقىلاۋشىلارى 36 ساعات بويى كوز ىلمەي، اقساقالداردىڭ ٸسىن ۇيىمداستىرعان ەكەن. وسىلاي الگى اقساقالدار ۇيلەرىن تاستاپ كەتكەن 450 باۋىرلاسپەن حابارلاسىپ، ولارعا قاجەتتى كومەك كورسەتە الدى (قور. 2-ح. 11:27). باۋىرلاستاردىڭ ەشقايسىسى دالادا قالمادى، بارلىعىنا پانا تابىلدى.
10. اقساقالدار باعۋشىلىق ساپار جاساۋدى نەگە ماڭىزدى سانايدى؟ (جوحان 21:15)
10 باۋىرلاستارعا ەموسيالىق جانە رۋحاني كومەك كورسەتۋ — ٴماسىحشى اقساقالدارعا جۇكتەلگەن جاۋاپكەرشىلىك (پەت. 1-ح. 5:2). اپات ورىن العاندا الدىمەن باۋىرلاستاردىڭ اماندىعىنا جانە تاماقتارى، كيىمدەرى مەن پانالارى بار ەكەنىنە كوز جەتكىزۋ كەرەك بولسا، ال كەيىنىرەك ولارعا ٴبىراز ۋاقىت بويى رۋحاني جانە ەموسيالىق كومەك قاجەت بولادى (جوحان 21:15 وقىڭىز). فيليال كوميتەتىندە قىزمەت ەتەتىن جانە تابيعي اپاتتان جاپا شەككەن كوپ باۋىرلاسپەن ارالاسقان حارولد باۋىرلاس بىلاي دەيدى: «اپاتتىڭ قۇرباندارىنا ٶز-وزدەرىنە كەلۋ ٷشىن ٴبىرتالاي ۋاقىت قاجەت بولادى. ولار اقىرىنداپ قالىپتى ومىرگە ورالا باستاعانمەن، جاقىندارىن جوعالتقاندارى، باعالى مۇلىكتەرىنەن ايىرىلعاندارى جانە باستارىنان وتكەن قورقىنىشتى جاعداي ەستەرىنەن كەتپەي قويۋى مۇمكىن. بۇل ەستەلىكتەر ادامدى قايتا-قايتا مۇڭعا باتىرۋى مۇمكىن. الايدا بۇل — قۇدايعا دەگەن سەنىمنىڭ ازدىعىنىڭ بەلگىسى ەمەس، ادامداردىڭ بارىنە ٴتان نارسە».
11. تابيعي اپاتتان كەيىن وتباسىلارعا قانداي كومەك قاجەت بولۋى مۇمكىن؟
11 اقساقالدار «قايعىرعانداردىڭ قايعىسىنا ورتاق بولىڭدار» دەگەن كەڭەسكە ەرەكشە ٴمان بەرەدى (ريم. 12:15). مىسالى، اپاتتان امان قالعان باۋىرلاستاردى ەحوبا دا، باۋىرلاستار دا ٵلى دە سولاي جاقسى كورەتىنىنە سەندىرۋ قاجەت بولۋى مۇمكىن. اقساقالدار وتباسىلارعا دۇعا ايتۋ، زەرتتەۋ، قاۋىمعا جانە ۋاعىز ىسىنە قاتىسۋ سياقتى رۋحاني ادەتتەرىن قالپىنا كەلتىرۋگە كومەكتەسۋدى قالايدى. سونداي-اق اقساقالدار اتا-انالاردى بالالارىنىڭ نازارىن ەشبىر تابيعي اپات جويا المايتىن جايتتارعا اۋدارتۋعا تالپىندىرسا بولادى. قىمباتتى اتا-انالار، ەحوبا قاشاندا بالالارىڭىزدىڭ دوسى بولىپ قالاتىنىن جانە ەشقاشان تاستامايتىنىن ەستەرىنە سالىپ تۇرىڭىزدار. بالاڭىزعا: «بۇكىل الەم بويىنشا ساعان كومەكتەسۋگە دايىن قانشاما دوستارىڭ بار ەكەنىن ۇمىتپا»،— دەپ ايتىپ وتىرىڭىزدار (پەت. 1-ح. 2:17).
12. اپاتتان جاپا شەككەندەرگە باسقالار قالاي كومەكتەسە الادى؟ (سۋرەتتى قاراڭىز.)
12 باسقالاردىڭ كومەگى. تابيعي اپات سىزگە جاقىن ماڭدا ورىن العان بولسا، جاپا شەككەندەرگە قالاي كومەكتەسە الاتىنىڭىزدى اقساقالداردان سۇراڭىز. بالكىم، پاناسىز قالعان باۋىرلاستاردى جانە ولارعا كومەكتەسۋگە كەلگەن ەرىكتىلەردى ۇيىڭىزگە قابىلداي تۇرارسىز. بولماسا، ازىق-تۇلىك پەن باسقا دا قاجەتتى زاتتاردى جەتكىزۋگە جاردەمدەسەرسىز. ال تابيعي اپات شالعاي اۋماقتا ورىن السا، قالاي كومەكتەسسەڭىز بولادى؟ اپاتتان زارداپ شەككەندەر ٷشىن دۇعا ايتىڭىز (قور. 2-ح. 1:8—11). سونداي-اق دۇنيەجۇزىلىك ىسكە ساداقا سالۋ ارقىلى دا ولارعا كومەكتەسە الاسىز (قور. 2-ح. 8:2—5). ال ەگەر سول جەرگە بارىپ جاردەم بەرگىڭىز كەلسە، اقساقالدارىڭىزبەن اقىلداسىڭىز. رۇقسات العاننان كەيىن، ٴسىزدى ارنايى ترەنينگتەن وتكىزۋى مۇمكىن. بۇل اپات بولعان جەردە مۇمكىندىگىنشە ساپالى كومەك ۇسىنا الۋىڭىز ٷشىن قاجەت.
قۋعىن-سۇرگىندە تىرەك بولىڭىز
13. ىسىمىزگە تيىم سالىنعان ەلدە تۇراتىن ەر باۋىرلاستارعا نە نارسە قيىن؟
13 ىسىمىزگە تيىم سالىنعان ەلدەردە تۇراتىن باۋىرلاستار دا قارجىلاي قيىندىقتارعا كەزىگەدى، اۋىرادى، جاقىندارىنان ايىرىلادى. ٴبىراق قۋعىن-سۇرگىن ولاردىڭ ٶمىرىن ودان بەتەر قيىنداتىپ جىبەرەدى. جەرگىلىكتى اقساقالدار ەمىن-ەركىن ٴجۇرىپ-تۇرا الماعاندىقتان، باۋىرلاستارىن بارىپ جىگەرلەندىرە المايدى. الدىڭعى ماقالادا ايتىلعان اندرەي باۋىرلاسپەن وسىلاي بولدى. ونىڭ ۋاعىز توبىنداعى ٴبىر ايەل باۋىرلاس اقشادان قاتتى قينالىپ قالادى. كەيىن كولىك اپاتىنا ۇشىراپ، بىرنەشە وتا جاساتادى، ٴسۇيتىپ ەشقانداي جۇمىسقا جاراماي قالادى. ٴبىراق ەر باۋىرلاستار شەكتەۋلەرگە جانە پاندەمياعا قاراماستان، وعان قولدارىنان كەلگەنشە كومەكتەستى ٵرى بۇل ەحوبانىڭ كوزىنەن تاسا قالعان جوق.
14. اقساقالدار ەحوباعا ارقا سۇيەيتىندەرىن قالاي كورسەتسە بولادى؟
14 اقساقالداردىڭ كومەگى. اندرەي ەحوباعا دۇعا ايتتى دا، قولدان كەلگەنشە ارەكەت ەتتى. ەحوبا وعان قالاي جاۋاپ بەردى؟ ول اياق-قولى بايلانباعان، ەركىندىكتە جۇرگەن باسقا باۋىرلاستاردى جىبەردى. كەيبىرەۋلەرى الگى ايەل باۋىرلاسىمىزدى كولىكپەن اۋرۋحاناعا اپارىپ-اكەلسە، باسقالارى قارجىلاي كومەكتەستى. ەحوبا بارلىعىن شامالارى كەلگەنشە كومەكتەسۋگە تالپىندىردى جانە ۇيىمشىلدىقتارى مەن باتىلدىقتارىنا باتاسىن بەردى (ەۆر. 13:16). قىمباتتى اقساقالدار، ىسىمىزگە تيىم سالىنعان ەلدە تۇرساڭىزدار، باسقالاردان كومەك سۇراۋدان تارتىنباڭىزدار (ەرم. 36:5، 6). ال ەڭ باستىسى، ەحوباعا ارقا سۇيەڭىزدەر. ول سىزدەرگە جار بولىپ، باۋىرلاستارعا قامقورلىق كورسەتۋگە كومەكتەسەدى.
15. قۋعىن-سۇرگىندە ماسىحشىلىك بىرلىگىمىزدى قالاي ساقتاي الامىز؟
15 باسقالاردىڭ كومەگى. ىسىمىزگە تيىم سالىنعاندا، باۋىرلاستار كىشىگىرىم توپتار بولىپ باس قوسادى. وسىنداي كەزدە ٶزارا تاتۋلىق ساقتاۋدىڭ ماڭىزدىلىعى ارتا تۇسەدى. توپتاعىلاردىڭ قاتەلىكتەرىنە كوپ ٴمان بەرمەي، تۋعان كەلىسپەۋشىلىكتەردى تەز شەشىپ وتىرىڭىزدار. ٴبىر-بىرىڭىزبەن ەمەس، شايتانمەن كۇرەسىڭىزدەر (ناق. س. 19:11؛ ەفەس. 4:26). ايتقىزباي ٴبىلىپ، كومەكتى وزدەرىڭىز ۇسىنىڭىزدار (تيت. 3:14). اندرەي باۋىرلاستىڭ توبىنداعى ايەل باۋىرلاسقا جاريالاۋشىلار توپ بولىپ كومەكتەسكەننىڭ ارقاسىندا ٴبىر-بىرىنە ودان سايىن جاقىن بولىپ، ٴبىر وتباسىنداي بولىپ كەتتى (ٴزاب. 133:1).
16. قولوستىقتارعا 4:3، 18 گە ساي، قۋعىن-سۇرگىن كورىپ جۇرگەن باۋىرلاستارعا قالاي كومەكتەسە الامىز؟
16 بۇگىندە ون مىڭداعان باۋىرلاس ۇكىمەتتىڭ تيىم سالعانىنا قاراماستان ەحوباعا قىزمەت ەتىپ ٴجۇر. كەيبىرەۋلەرى ٴتىپتى تۇرمەدە وتىر. ٴبىز ولار جايلى، ولاردىڭ وتباسىلارى جايلى جانە ولارعا رۋحاني كومەك كورسەتۋ ٷشىن، كەرەك-جاراعىن اپارىپ بەرۋ ٷشىن، سوتتا قورعاۋ ٷشىن ٶز ەركىندىكتەرىن قاتەرگە تىگىپ جۇرگەن باۋىرلاستار جايلى دۇعا ايتساق بولادى c (قولوستىقتارعا 4:3، 18 وقىڭىز). دۇعانىڭ كۇشىنە ەشقاشان شەك كەلتىرمەيىك (سال. 2-ح. 3:1، 2؛ ٴتىم. 1-ح. 2:1، 2).
17. قۋعىن-سۇرگىنگە قازىردەن قالاي دايىندالساڭىز بولادى؟
17 ٴسىز دە، وتباسىڭىز دا قۋدالاۋعا قازىردەن دايىن بولا الاسىزدار (ەل. ٸس. 14:22). ٴبىراق قالاي قينالاتىنىڭىزدىڭ ٴبارىن ەلەستەتە بەرمەڭىز. كەرىسىنشە، ەحوبامەن دوستىعىڭىزدى نىعايتىڭىز جانە بالالارىڭىزعا دا سولاي ەتۋگە كومەكتەسىڭىز. ال ەگەر ۋايىمداپ كەتسەڭىز، ەحوباعا ٴبارىن اشىق ايتىڭىز (ٴزاب. 62:7، 8). ەحوبا نەلىكتەن سەنىم ارتۋعا لايىق قۇداي ەكەنىن وتباسىڭىزبەن بىرگە تالقىلاڭىز d. ٷي ىشىڭىزبەن توتەنشە جاعدايعا دايىندالعانداي، قۋعىن-سۇرگىنگە دە دايىندالىپ، ەحوباعا ارقا سۇيەسەڭىزدەر، سول كۇن كەلگەندە بالالارىڭىز ابدىراماي، باتىل بولادى.
18. ٴبىزدى قانداي بولاشاق كۇتىپ تۇر؟
18 قۇدايدىڭ تىنىشتىعىنىڭ ارقاسىندا ٴبىز ٶزىمىزدى قاۋىپسىز سەزىنەمىز (ٴفىلىپ. 4:6، 7). ىندەت كەزىندە، تابيعي اپات پەن قۋعىن-سۇرگىندە ەحوبا سول تىنىشتىعى ارقىلى جۇرەگىمىزدى دۇرلىگۋدەن ساقتايدى. سونداي-اق ول بىزگە ەڭبەكقور باعۋشىلاردى جىبەرەدى. بۇعان قوسا، بارلىعىمىز دا ٴبىر-بىرىمىزگە كومەكتەسە الامىز ٵرى بۇنى مارتەبە سانايمىز. قازىرگى تىنىش ۋاقىتتى ٴتيىمدى پايدالانساق، الداعى ۇلكەن سىناقتارعا، ٴتىپتى «زور الاپاتقا» دا دايىن بولا الامىز (مات. 24:21). سول كەزەڭدە تىنىشتىعىمىزدى ساقتاپ، باۋىرلاستارعا دا سولاي ەتۋگە كومەكتەسۋ كەرەك بولادى. ال زور الاپاتتان كەيىن تىنىشتىعىمىزدى الاتىن ەشقانداي اپات تا، قۋعىن دا، اۋرۋ-سىرقاۋ دا بولمايدى. سەبەبى سول كەزدە ٴبىز ەحوبانىڭ و باستاعى نيەتىنە ساي، ەش سارقىلمايتىن ناعىز تىنىشتىققا كەنەلەمىز (يشايا 26:3، 4).
109-ٵن «ٴبىر-ٴبىرىڭدى بارىنشا جاقسى كورىڭدەر»
a ەحوبا قيىندىققا دۋشار بولعان قىزمەتشىلەرىنە ٶزىنىڭ باسقا ادال قىزمەتشىلەرى ارقىلى كومەكتەسەدى. ول باۋىرلاستاردى جىگەرلەندىرۋ ٷشىن ٴسىزدى دە قولدانا الادى. ونىڭ قولىنداعى قۇرال بولعىڭىز كەلسە، نە ىستەۋگە بولاتىنىن قاراستىرايىق.
b كەيبىر ەسىمدەر وزگەرتىلگەن.
c جەرگىلىكتى فيليال مەن دۇنيەجۇزىلىك باس باسقارما تۇرمەدە وتىرعان باۋىرلاستارعا جولدانعان حاتتاردى جىبەرۋمەن اينالىسپايدى.
d 2019-جىلدىڭ شىلدە ايىندا شىققان «كۇزەت مۇناراسىنداعى» «قۋعىن-سۇرگىنگە قازىردەن دايىن بولىڭىز» دەگەن ماقالانى قاراڭىز.
e سۋرەت سيپاتتاماسى: ەرلى-زايىپتى تابيعي اپاتتان كەيىن شاتىردا تۇرىپ جاتقان ٴبىر وتباسىنا تاماق اكەپ بەردى.