50-زەرتتەۋ ماقالاسى
«مەنىمەن بىرگە جۇماقتا بولاسىڭ»
«بۇگىن ساعان شىندىعىن ايتامىن، مەنىمەن بىرگە جۇماقتا بولاسىڭ» (لۇقا 23:43).
145-ٵن قۇداي ۋادە ەتكەن جۇماق
اڭداتپا a
1. يسا ولەر الدىندا قاسىنداعى قىلمىسكەرگە نە دەدى؟ (لۇقا 23:39—43)
باعاناعا ىلىنگەن يسانىڭ دا، قاسىنداعى ەكى قىلمىسكەردىڭ دە ٶمىرىنىڭ سوڭعى مينۋتتارى ٶتىپ جاتتى (لۇقا 23:32، 33). قىلمىسكەرلەر يسانى كەكەتىپ، تىلدەگەندەرىنە قاراعاندا، ولار ونىڭ شاكىرتى بولماعان (مات. 27:44؛ مار. 15:32). بىراق كەيىن ولاردىڭ بىرەۋى ويىن وزگەرتتى. ول: «يسا، پاتشالىعىڭا كىرگەندە، مەنى ەسىڭە الا كورشى»،— دەدى. يسا بولسا: «بۇگىن ساعان شىندىعىن ايتامىن، مەنىمەن بىرگە جۇماقتا بولاسىڭ»،— دەپ جاۋاپ بەردى (لۇقا 23:39—43 وقىڭىز، ٴسىلت.). بۇل قىلمىسكەر كەزىندە يسانىڭ كوك پاتشالىعى جايلى ۋاعىزىنا قۇلاق اسىپ، ونىڭ شاكىرتى بولعانى جايلى ەش جەردەن وقىمايمىز. بۇعان قوسا، يسا وعان «كوكتەگى پاتشالىققا كىرەسىڭ» دەپ ۋادە ەتپەگەن (مات. 4:17). قايتا، ول جەر بەتىندە بولاتىن جۇماق جايلى ايتقان. بۇلاي دەۋگە قانداي سەبەپ بار؟
يسامەن سويلەسكەن قىلمىسكەر جايلى قانداي تۇجىرىم جاسايمىز جانە ول نە تۋرالى بىلگەن بولۋى مۇمكىن؟ (2، 3-ابزاستاردى قاراڭىز)
2. كۇناسىنا وكىنگەن قىلمىسكەر نەگە ياھۋدي بولعان دەي الامىز؟
2 كۇناسىنا وكىنگەن قىلمىسكەر ياھۋدي بولعان بولسا كەرەك. ويتكەنى ول قاسىنداعى باسقا قىلمىسكەرگە: «قۇدايدان قورىقپايسىڭ با! وزىڭە دە سونىكىندەي ۇكىم شىعارىلدى ەمەس پە؟»— دەگەن ەدى (لۇقا 23:40). ياھۋديلەر جالعىز قۇدايعا عيبادات ەتكەن. ال وزگە ۇلتتىڭ ادامدارى كوپ قۇدايلارعا تابىناتىن (مۇس. 2-ج. 20:2، 3؛ قور. 1-ح. 8:5، 6). ەگەر الگى قىلمىسكەرلەر باسقا ۇلتتىڭ ادامدارى بولسا، ٴبىرىنشىسى ەكىنشىسىنە: «قۇدايلاردان قورىقپايسىڭ با!»— دەپ ايتار ەدى. ونىڭ ۇستىنە، يسا بارلىق حالىقتارعا ەمەس، «تەك يسرايل ٷيىنىڭ جوعالعان قويلارىنا عانا جىبەرىلگەن» ەدى (مات. 15:24). سونداي-اق يسرايلدىكتەر قۇداي مارقۇمداردى قايتا تىرىلتەتىنىن بىلگەن. بۇنى كۇناسىنا وكىنگەن قىلمىسكەر دە بىلسە كەرەك. سونداي-اق ونىڭ سوزىنەن كورىنەتىندەي، ول ەحوبا يسانى قۇداي پاتشالىعىنىڭ پاتشاسى ەتۋ ٷشىن تىرىلتەتىنىنە سەنگەن. ٴتىپتى ٶزى دە تىرىلەتىنىنە ۇمىتتەنگەن.
3. يسا جۇماق جايلى ايتقاندا، قىلمىسكەر نەنى ەلەستەتسە كەرەك؟ ٴتۇسىندىرىڭىز. (مۇسانىڭ 1-جازباسى 2:15)
3 كۇناسىنا وكىنگەن قىلمىسكەر ادام مەن حاۋا جايلى جانە ولار جۇماقتى مەكەن ەتكەنى جايلى بىلگەن بولسا كەرەك. دەمەك، يسا وعان «مەنىمەن بىرگە جۇماقتا بولاسىڭ» دەگەندە، ونىڭ كوز الدىنا تابيعاتتىڭ بار سۇلۋلىعىن جيناپ العان جەردەگى ادەمى باق ەلەستەسە كەرەك (مۇسانىڭ 1-جازباسى 2:15 وقىڭىز).
4. يسانىڭ قىلمىسكەرگە ايتقان سوزدەرى ٴبىزدى نە جايلى ويلانۋعا تالپىندىرادى؟
4 يسانىڭ قىلمىسكەرگە ايتقان سوزدەرى ٴبىزدى جۇماق جايلى ويلانۋعا تالپىندىرۋ كەرەك. وسى ماقالادا سۇلەيمەن پاتشانىڭ تۇسىنداعى بەيبىت ومىرگە توقتالا وتىرىپ، جۇماق تۋرالى ٴبىلىمىمىزدىڭ كوكجيەگىن كەڭەيتەمىز. كەمەلسىز سۇلەيمەننىڭ كەزىندە يسرايلدىكتەر شالقىپ ٶمىر سۇرسە، وندا سۇلەيمەننەن دە زور يسا مەن 144000 بيلەۋشىنىڭ تۇسىندا جەر بەتىندەگى ٶمىر قانداي عاجاپ بولادى دەسەڭىزشى! (مات. 12:42). ەندەشە، «باسقا قويلار» سول جۇماقتا ماڭگى جاساۋعا قايتسە لايىق بولا الاتىندارىن بىلۋگە تىرىسقاندارى ٴجون (جوح. 10:16).
جۇماقتا ٶمىر قانداي بولادى؟
5. جۇماقتاعى ٶمىردى سيپاتتاپ بەرىڭىز.
5 ٴسىز جۇماقتاعى ٶمىردى قالاي ەلەستەتەسىز؟ بالكىم، ەدەم سياقتى جاپ-جاسىل، سۇلۋ باقتى ەلەستەتەتىن شىعارسىز (مۇس. 1-ج. 2:7—9). ويلاپ كورىڭىزشى، ميحا پايعامبار ايتقانداي، «ٶز ٴجۇزىم بۇتاڭىز بەن ٸنجىر اعاشىنىڭ تۇبىندە وتىرسىز» (ميحا 4:3، 4). استىق مول شىعىپ، قىرلار سارى التىن تۇسكە بويالىپ تۇر (ٴزاب. 72:16؛ يشايا 65:21، 22). نە جەيمىن دەسەڭىز دە، داستارقان تاماقتىڭ ٴتۇر-تۇرىنە تولى. سامال ەسكەن سايىن، مۇرىنعا گۇلدەر مەن وسىمدىكتەردىڭ جۇپار ٴيىسى كەلەدى. جايقالعان اعاشتىڭ ساياسىندا وتباسىڭىز، دوستارىڭىز بەن قايتا تىرىلگەن بىرنەشە ادام شۇيىركەلەسىپ، ٴماز-مەيرام بولىپ وتىر. ولاردىڭ قۋانىشتان كۇلگەن داۋىستارى جارقىن-جارقىن ەستىلەدى. بۇل — ٴتۇس ەمەس، جاقىندا شىنىمەن دە جەر بەتىندە ورىن الاتىن جايتتار. سول كەزدە ىستەيتىن جۇمىسىڭىزدىڭ ٶزى جانىڭىزدى سەرگىتىپ، راقات اكەلەتىن بولادى.
ٴبىز قايتا تىرىلگەندەرگە ٴتالىم بەرىپ، وتە ماڭىزدى ىسپەن اينالىساتىن بولامىز (6-ابزاستى قاراڭىز)
6. جۇماقتا ٴبىز نەمەن اينالىسامىز؟ (سۋرەتتى قاراڭىز.)
6 ەحوبا ٴبىزدى ەڭبەگىمىزدەن راقات الاتىنداي ەتىپ جاراتقان (ۋاع. 2:24). ٴماسىحتىڭ مىڭجىلدىق بيلىگى كەزىندە جۇمىس اسىرەسە كوپ بولادى. ويتكەنى زور الاپاتتان امان وتكەندەر مەن قايتا تىرىلگەن ميلليونداعان ادامدارعا تاماق، كيەتىن كيىم مەن باسپانا قاجەت بولادى. ٴبىز بۇنىڭ ٴبارىن قۋانىپ ٴجۇرىپ ىستەيتىن بولامىز! و باستا ادام مەن حاۋاعا بەرىلگەن مارتەبەگە يە بولىپ، جەر بەتىنىڭ ٵر بۇرىشىن اسەم باققا اينالدىرامىز. سونداي-اق ٴبىزدى وتە قىزىقتى ٵرى اۋقىمدى اعارتۋ ٸسى كۇتىپ تۇر. قايتا تىرىلگەن ميلليونداعان ادامعا ەحوبا مەن ونىڭ نيەتى جايلى ٴتالىم بەرەتىن بولامىز. يسانىڭ زامانىنان بۇرىن ٶمىر سۇرگەن ادال ادامدارعا بولسا ٴبىلىم قورجىندارىن تولتىرۋعا كومەكتەسەمىز!
7. ٴبىز نە نارسەگە كۇماندانباساق بولادى جانە نەگە؟
7 بولاشاقتاعى جۇماقتا زامان تىنىش، مولشىلىق پەن ٴتارتىپ بولاتىنىنا تيتتەي دە كۇمان جوق. ويتكەنى ەحوبا ٶزىنىڭ ۇلى بيلىك جۇرگىزگەندە ٶمىر قانداي بولاتىنىن كورسەتىپ قويعان. قالاي دەيسىز بە؟ سۇلەيمەن پاتشانىڭ كەزىندەگى بەيبىت زامان ارقىلى.
سۇلەيمەننىڭ تۇسىنداعى ٶمىردى كور دە، جۇماقتى كور
8. ٴداۋىت پاتشانىڭ ٴزابۇر 37:10، 11، 29 داعى سوزدەرى قالاي ورىندالدى؟ (وسى جۋرنالداعى «وقىرمان ساۋالدارىن» قاراڭىز.)
8 ٴداۋىت كيەلى رۋحتىڭ جەتەلەۋىمەن بولاشاقتا دانا دا ادال پاتشا تاققا وتىرعاندا ٶمىردىڭ قانداي بولاتىنى جايلى پايعامبارلىق ەتىپ كەتكەن (ٴزابۇر 37:10، 11، 29 وقىڭىز). ٴبىز سول سوزدەردى، اسىرەسە ٴزابۇر 37:11 ٴدى، ادامدارمەن جۇماق تۋرالى سويلەسكەندە كوپ قولدانامىز. ويتكەنى يسانىڭ ٶزى دە تاۋداعى ۋاعىزىندا سول تارماقتىڭ بولاشاقتا ورىندالاتىنىن ايتىپ كەتكەن (مات. 5:5). الايدا ٴداۋىتتىڭ سوزدەرى سۇلەيمەن پاتشانىڭ زامانىنا دا قاتىستى ەدى. سۇلەيمەننىڭ تۇسىندا قۇدايدىڭ حالقى تىنىشتىقتا، «اعى مەن بالى اعىل-تەگىل» مول جەردە ٶمىر ٴسۇردى. قۇداي ولارعا: «ەگەر جارلىقتارىما ساي ٶمىر سۇرسەڭدەر... ەلدەرىڭدە تىنىشتىق ورناتامىن، سوندا توسەكتەرىڭدە ەش قورقىنىشسىز جاتاسىڭدار»،— دەدى (مۇس. 3-ج. 20:24؛ 26:3، 6). قۇداي وسى ۋادەسىن سۇلەيمەننىڭ كەزىندە ورىندادى (شەج. 1-ج. 22:9؛ 29:26—28). قۇداي حالقىن زۇلىمدار بولمايتىن بەيبىت ٶمىر كۇتىپ تۇردى (ٴزاب. 37:10). كورگەنىمىزدەي، ٴزابۇر 37:10، 11، 29 داعى سوزدەر ەجەلدە ورىندالعانداي، بولاشاقتا دا ورىندالادى.
9. سۇلەيمەننىڭ پاتشالىعى جايلى شەبا پاتشايىمى نە دەدى؟
9 سۇلەيمەننىڭ تۇسىندا يسرايلدىكتەردىڭ ٶسىپ-وركەندەپ، تىنىشتىقتا ٶمىر ٴسۇرىپ جاتقانى شەبا پاتشايىمىنىڭ قۇلاعىنا دا جەتەدى. ادامداردان ەستىگەنىن ٶز كوزىمەن كورۋ ٷشىن ول الىس جەردەن يەرۋساليمگە جول تارتادى (پات. 1-ج. 10:1). ٶز اياعىمەن سۇلەيمەننىڭ پاتشالىعىن ارالاپ شىققاننان كەيىن ول بىلاي دەدى: «مەن تەك شەت جاعاسىن عانا ەستىپپىن... مىنا ادامدارىڭىز نەتكەن باقىتتى! ۇنەمى الدىڭىزدا ٴجۇرىپ، دانالىعىڭىزدى تىڭداي الاتىن قىزمەتشىلەرىڭىز نەتكەن باقىتتى!» (پات. 1-ج. 10:6—8). بىلايشا ايتقاندا، سۇلەيمەننىڭ بيلىگى تۇسىندا ادامدار يسانىڭ تۇسىندا بولاتىن ٶمىردىڭ تەك ٴدامىن عانا تاتتى.
10. يسا سۇلەيمەننەن قاي جاعىنان اسىپ تۇسەدى؟
10 يسا — سۇلەيمەننەن بارلىق جاعىنان دا اسىپ تۇسەتىن پاتشا. سۇلەيمەن پاتشا اۋىر كۇنالار جاساپ، قۇداي حالقىنىڭ جاعدايىن قيىنداتىپ جىبەردى. ال يسا بولسا — بىردە-ٴبىر قاتەلىك جىبەرمەيتىن كەمەلدى بيلەۋشى (لۇقا 1:32؛ ەۆر. 4:14، 15). ول شايتان جىبەرگەن ادام توزگىسىز سىناقتاردىڭ وزىنەن ادالدىق ساقتاپ ٶتتى. وسىلايشا ەشقاشان كۇناعا بارمايتىنىن جانە ادال ازاماتتارىنا ەش زياندىق اكەلمەيتىنىن دالەلدەدى. وسىنداي پاتشامىزدىڭ بارى ٴبىز ٷشىن ۇلكەن باقىت!
11. يساعا بيلىك ەتۋگە كىمدەر كومەكتەسەدى؟
11 يسا 144000 بيلەۋشىمەن بىرگە ادامزاتتىڭ قامىن جاساپ، ەحوبانىڭ جەرگە قاتىستى نيەتىن ورىندايدى (ايان 14:1—3). بۇل بيلەۋشىلەر كەزىندە جەردە ەر مەن ايەل بولىپ ٶمىر سۇرگەندەرىندە ٴتۇرلى سىناق پەن ازاپتان وتكەن. سوندىقتان ولار ادامدارعا جاناشىر بيلەۋشى بولادى. ناقتىراق ايتاتىن بولساق، ولار قانداي ٸس اتقارادى؟
مايلانعاندار قانداي ٸس اتقارادى؟
12. ەحوبا 144000 بيلەۋشىنى قانداي ىسكە تاعايىندايدى؟
12 سۇلەيمەنگە قاراعاندا يسا مەن ونىڭ قاسىنداعى بيلەۋشىلەرگە اناعۇرلىم ۇلكەن مىندەت تاپسىرىلعان. سۇلەيمەن تەك ٴبىر ەلدە تۇرىپ جاتقان ادامداردىڭ عانا قامىن ويلاعان. ال قۇداي پاتشالىعىنىڭ بيلەۋشىلەرى بولسا بۇكىل دۇنيەدە ٶمىر سۇرەتىن ميللياردتاعان ادامنىڭ قامىن ويلايتىن بولادى. بۇل 144000 بيلەۋشى ٷشىن اسقان مارتەبە!
13. يسامەن بىرگە بيلىك ەتەتىندەر قانداي ەرەكشە ٴرول اتقاراتىن بولادى؟
13 يسا سياقتى 144000 بيلەۋشى دە پاتشا ٵرى ٴدىني قىزمەتكەر بولادى (ايان 5:10). مۇسا زاڭى بويىنشا، ٴدىني قىزمەتكەرلەر، نەگىزىنەن، حالىقتىڭ رۋحاني جانە تاندىك ساۋلىعىنا جاۋاپتى ەدى. مۇسا زاڭى «بولاشاق باتالاردىڭ كولەڭكەسى» بولعاندىقتان، يسامەن بىرگە بيلىك ەتەتىندەر قۇداي حالقىنىڭ رۋحاني دا، تاندىك تە ساۋلىعىن ويلايتىن بولادى دەي الامىز (ەۆر. 10:1). بۇل پاتشالار مەن بيلەۋشىلەر بولاشاقتا قۇداي پاتشالىعىنىڭ جەر بەتىندەگى ازاماتتارىمەن قالاي بايلانىساتىنىن ٵلى كورە جاتارمىز. بۇل شارانى ەحوبا قالاي ۇيىمداستىرماسىن، جۇماقتا ٶمىر سۇرەتىندەر قاجەتتى باسشىلىقتى الىپ وتىراتىنىنا سەنىمدىمىز (ايان 21:3، 4).
«باسقا قويلار» قايتسە جۇماقتاعى ومىرگە لايىق بولا الادى؟
14. ٴماسىحتىڭ باۋىرلارى مەن «باسقا قويلاردىڭ» اراسىندا قانداي بايلانىس بار؟
14 يسا كوكتە وزىمەن بىرگە بيلىك ەتەتىندەردى «كىشكەنە وتار» دەپ اتاعان (لۇقا 12:32). ول سونداي-اق «باسقا قويلار» دەپ اتالاتىن تاعى ٴبىر توپ بار ەكەنىن ايتقان. وسى ەكى توپ ٴبىر وتاردى قۇرايدى (جوح. 10:16). ولار قازىردىڭ وزىندە يىق تىرەسە قىزمەت ەتىپ جاتىر ٵرى جۇماق ورناعاننان كەيىن دە قىزمەتتەسە بەرەتىن بولادى. ارينە، ول ۋاقىتتا «كىشكەنە وتار» كوكتە بولادى. ال «باسقا قويلار» جەر بەتىندە ماڭگى باقىتتى ٶمىر سۇرۋگە مۇمكىندىك الادى. بىراق جۇماقتا ٶمىر سۇرۋگە لايىق بولۋ ٷشىن ولار قازىردەن ىستەۋ كەرەك كەيبىر نارسەلەر بار.
جۇماقتا ٶمىر سۇرۋگە قازىردەن باستاپ دايىندالايىق (15-ابزاستى قاراڭىز) b
15. ا) ٴماسىحتىڭ باۋىرلارى «باسقا قويلارمەن» قالاي قىزمەتتەسەدى؟ ٵ) ٴدارىحاناداعى ەر باۋىرلاستىڭ ۇلگىسىنە ٴسىز قالاي ەلىكتەي الاسىز؟ (سۋرەتتى قاراڭىز.)
15 كۇناسىنا وكىنگەن قىلمىسكەر يسانىڭ جاساعان جاقسىلىعىنا ريزاشىلىعىن بىلدىرە الماي ٶلىپ كەتتى. ال «باسقا قويلاردا» يسانى جاقسى كورەتىندەرىن كورسەتۋدىڭ جولدارى جەتىپ-ارتىلادى. مىسالى، ٴبىز مۇنى ونىڭ مايلانعان باۋىرلارىنا قالاي قارايتىنىمىزبەن كورسەتە الامىز. يسا قويلارىن وسىعان قاراي سوتتايتىنىن ايتقان (مات. 25:31—40). ٴبىز ۋاعىزداۋ مەن ٴتالىم بەرۋ ىسىنە قۇلشىنا اتسالىسۋىمىزبەن يسانىڭ باۋىرلارىن قولداي الامىز (مات. 28:18—20). سول ٷشىن كيەلى كىتاپتى زەرتتەۋگە ارنالعان قۇرالداردى، مىسالى «ماڭگى باقي ٶمىردىڭ راقاتىن كورىڭىز!» كىتابىن شەبەر قولدانعىمىز كەلەدى. ەگەر ازىرشە ەشكىممەن كيەلى كىتاپتى زەرتتەپ جۇرمەسەڭىز، نەلىكتەن مۇمكىندىگىنشە كوپ ادامعا كيەلى كىتاپتى زەرتتەۋ ساباعىن ۇسىنۋدى ماقسات ەتپەسكە؟
16. قۇداي پاتشالىعىنىڭ ازاماتى بولۋعا قازىردىڭ وزىندە قالاي دايىندالا الامىز؟
16 ەحوبا جۇماقتا كورگىسى كەلەتىن ادام بولۋ ٷشىن سول ۋاقىتتىڭ كەلگەنىن كۇتۋدىڭ قاجەتى جوق. قازىردىڭ وزىندە سوزىمىزدە، ىسىمىزدە شىنشىل بولىپ، بارلىق جاعىنان بايسالدى بولۋعا ۇمتىلا الامىز. سونداي-اق ەحوباعا، جارىمىزعا جانە باۋىرلاستارعا ادالدىق ساقتاي الامىز. مىنا زۇلىم دۇنيەنىڭ وزىندە قۇدايدىڭ تالاپتارىمەن ٶمىر ٴسۇرۋدى ۇيرەنەتىن بولساق، جاڭا دۇنيەدە ولاردى ۇستانۋ الدەقايدا جەڭىل بولادى. سونىمەن قاتار قابىلەتتەر مەن قاسيەتتەرىمىزدى شىڭداپ، جۇماقتا ٶمىر سۇرۋگە دايىندالىپ جاتقانىمىزدى كورسەتەيىك. وسى جۋرنالداعى «جەردى مۇرا ەتۋگە دايىنسىز با؟» دەگەن ماقالانى قاراڭىز.
17. بۇرىن جاساعان كۇنالارىمىزدى ويلاپ، ٴتۇڭىلىپ كەتۋىمىز كەرەك پە؟ ٴتۇسىندىرىڭىز.
17 سونىمەن قاتار بۇرىندا جاساعان اۋىر كۇنالارىمىز جايلى ويلاپ، ٶزىمىزدى جەگىدەي جەمەيىك. ارينە، ٴبىز تولەم قۇرباندىعى كۇنالارىمىزدى جابادى دەپ «ادەيى كۇنا جاساۋدان» اۋلاقپىز (ەۆر. 10:26—31). ەگەر جاساعان اۋىر كۇنامىزعا شىن جۇرەكتەن وكىنسەك، ەحوبا مەن اقساقالداردان كومەك ىزدەسەك جانە ٸس-ارەكەتىمىزدى وزگەرتسەك، ەحوبا ٴبىزدى كەڭپەيىلمەن كەشىرەتىنىنە تولىقتاي سەنىمدى بولايىق (يشايا 55:7؛ ەل. ٸس. 3:19). يسانىڭ پارىزشىلدارعا: «مەن ادىلدەردى ەمەس، كۇناكارلاردى وكىنۋگە شاقىرۋ ٷشىن كەلدىم»،— دەگەن سوزدەرىن ۇمىتپايىق (مات. 9:13). تولەم قۇرباندىعى ٴبىزدىڭ بارلىق كۇنالارىمىزدى جابا الاتىنداي كۇشتى!
ٴسىز جۇماقتا ماڭگى جاساي الاسىز!
18. يسامەن بىرگە باعانادا ولگەن قىلمىسكەردى كەزدەستىرگەندە نە جايلى سويلەسكىڭىز كەلەر ەدى؟
18 يسامەن بىرگە سويلەسكەن قىلمىسكەردى جۇماقتا كەزدەستىرگەنىڭىزدى ەلەستەتە الاسىز با؟ ەكەۋىڭىز دە يسانىڭ تولەم قۇرباندىعىنا شەكسىز ريزا بولاتىندارىڭىز ٴسوزسىز! بالكىم، ودان يسانىڭ ولەر الدىنداعى سوڭعى ساعاتتارى جايلى كوبىرەك ايتىپ بەرۋىن نەمەسە يسا ونىڭ سۇراعىنا جاۋاپ بەرگەندە نە سەزىنگەنىن سۇرارسىز. ال ول سىزدەن شايتاننىڭ دۇنيەسىنىڭ سوڭعى كۇندەرىندە ٶمىر قانداي بولعانى جايلى سۇراۋى مۇمكىن. سول كىسى سياقتى ادامدارمەن قۇداي ٴسوزىن زەرتتەۋ نە دەگەن مارتەبە بولماق! (ەفەس. 4:22—24).
ٴماسىحتىڭ مىڭجىلدىق بيلىگى كەزىندە ٴبىر ەر باۋىرلاس بۇرىننان قالاعان قابىلەتىن دامىتۋ ۇستىندە (19-ابزاستى قاراڭىز)
19. جۇماقتاعى ومىردە نەگە ٸشىمىز پىسپايدى؟ (مۇقاباداعى سۋرەتتى قاراڭىز.)
19 جۇماقتا ٶمىر سۇرگەندە ەشقاشان ٸشىمىز پىسپايدى. ٴبىز ۇنەمى جاڭا ادامدارمەن تانىسامىز. اتقاراتىن جۇمىسىمىز دا ٴماندى، ماعىنالى بولادى. ال ەڭ باستىسى، كوكتەگى اكەمىز جايلى كۇن سايىن جاڭا نارسەلەر ٴبىلىپ، ول ۇيىمداستىرعان شارالاردىڭ قىزىعىن كورەتىن بولامىز. ٴبىز ەحوبانىڭ بولمىسىنىڭ قىر-سىرىن ەشقاشان تانىپ بىتپەيمىز. ونىڭ جاراتىلىستارى جايلى دا زەرتتەيتىن نارسەلەر كوپ بولادى. ۇزاق ٶمىر سۇرگەن سايىن ەحوبانى دا كوبىرەك جاقسى كورەتىن بولامىز. جۇماقتا ماڭگى ٶمىر ٴسۇرۋ ٷمىتىن سيلاعانى ٷشىن ەحوبا مەن يساعا ٴبىز شەكسىز ريزامىز!
22-ٵن قۇداي پاتشالىعى كەلسىن!
a جۇماقتاعى ٶمىردى ٴجيى ەلەستەتەسىز بە؟ ەلەستەتكەندە جۇرەگىڭىز قۋانىشقا تولاتىنى ٴسوزسىز! ەحوبا دايىنداپ قويعان جاڭا دۇنيە تۋرالى ويلانعان سايىن، باسقالارعا ول جايلى قۇلشىنا ٴتالىم بەرە باستايمىز. وسى ماقالا يسانىڭ جۇماققا قاتىستى ۋادەسىنە دەگەن سەنىمىمىزدى نىعايتادى.
b سۋرەت سيپاتتاماسى: قايتا تىرىلگەندەرگە ٴبىلىم بەرۋدى كۇتىپ جۇرگەن ەر باۋىرلاس قازىردەن باسقالارعا ٴتالىم بەرىپ جاتىر.
