4-زەرتتەۋ ماقالاسى
ٴبىز ەسكە الۋ كەشىنە نە ٷشىن بارامىز؟
«مەنى ەسكە الۋ ٷشىن وسىلاي ىستەپ تۇرىڭدار» (لۇقا 22:19).
20-ٵن سەن ۇلىڭدى قيدىڭ
اڭداتپا *
1، 2. ا) قايتىس بولعان جاقىندارىمىزدى اسىرەسە قاي كەزدە ەسكە الامىز؟ ٵ) ولەر الدىنداعى ٴتۇنى يسا قانداي كەشتى ەنگىزدى؟
جاقىن ادامىمىزدىڭ دۇنيەدەن وزىپ كەتكەنىنە قانشا جىل بولماسىن، ولار ٴبىزدىڭ جۇرەگىمىزدەن وشپەيدى. ول ادامنىڭ قايتىس بولعان كۇنى اينالىپ كەلگەن سايىن، ونىمەن وتكىزگەن جىلى ساتتەردى ەسكە الامىز.
2 جىل سايىن دۇنيە ٴجۇزى بويىنشا ميلليونداعان ادام وزدەرى ٷشىن وتە قىمبات ٴبىر جاندى ەسكە الادى. ول — ٴبىزدى كۇنا مەن ولىمنەن ازات ەتۋ ٷشىن ٶمىرىن قيعان يسا ٴماسىح (پەت. 1-ح. 1:8؛ مات. 20:28). يسانىڭ ٶزى دە ونىڭ ٶلىمىن ەسكە العانىمىزدى قالاعان. ولەر الدىنداعى ٴتۇنى ول ەلشىلەرىمەن بىرگە ەرەكشە ٴبىر كەش وتكىزىپ: «مەنى ەسكە الۋ ٷشىن وسىلاي ىستەپ تۇرىڭدار»،— دەپ بۇيىرعان (لۇقا 22:19).
3. بۇل ماقالا نە جايىندا؟
3 ٴماسىحتىڭ ٶلىمىن ەسكە الۋ كەشىنە قاتىساتىنداردىڭ شاعىن توبى كوكتە ٶمىر سۇرۋگە ۇمىتتەنەدى. ال قالعان ميلليونداعان ادام جەردە ٶمىر سۇرۋگە ۇمىتتەنەدى. ٴقازىر وسى ەكى توپتىڭ ادامدارى دا ەسكە الۋ كەشىنە نە ٷشىن قاتىساتىنىن جانە بۇنىڭ ولارعا قانداي پايداسى بار ەكەنىن بىلەمىز. الدىمەن، مايلانعان ماسىحشىلەر ەسكە الۋ كەشىن نە ٷشىن اسىعا كۇتەتىنىن كورەيىك.
مايلانعان ماسىحشىلەر نە ٷشىن قاتىسادى؟
4. نەگە مايلانعاندار عانا ەسكە الۋ كەشىندە نان مەن شاراپتان ٴدام تاتادى؟
4 جىل سايىن ەسكە الۋ كەشىنە قاتىسقاندا، مايلانعان ماسىحشىلەر نان مەن شاراپتان ٴدام تاتادى. نەگە ولار عانا ٴدام تاتادى؟ بۇنىڭ جاۋابىن ٴبىلۋ ٷشىن، يسا ولەر الدىنداعى ٴتۇنى وتكىزگەن كەشكە ورالايىق. يسا 11 ادال شاكىرتىمەن بىرگە قۇتقارىلۋ مەيرامىن اتاپ وتكەن سوڭ، «يەمىزدىڭ كەشكى اسى» دەپ اتالاتىن كەشتى ەنگىزدى. ول ەلشىلەرىنە نان مەن شاراپ بەرىپ، سودان ٸشىپ-جەڭدەر دەدى. سول كەشتە يسا ولارعا جاڭا كەلىسىم مەن پاتشالىق كەلىسىمى جايلى ايتتى * (لۇقا 22:19، 20، 28—30). وسى كەلىسىمنىڭ ارقاسىندا ەلشىلەر مەن سانى شەكتەۋلى باسقا دا ادامدار كوكتە پاتشا ٵرى ٴدىني قىزمەتكەر بولماق ەدى (ايان 5:10؛ 14:1). وسى كەلىسىمدەردى جاساسقان مايلانعان تامتىق قانا ەسكە الۋ كەشىندە نان مەن شاراپتان ٴدام تاتا الادى *.
5. مايلانعاندار نەنى جاقسى تۇسىنەدى؟
5 مايلانعانداردىڭ ەسكە الۋ كەشىن اسىعا كۇتەتىندەرىنىڭ تاعى ٴبىر سەبەبى — سول كۇنى ولار كەرەمەت ۇمىتتەرى جايلى ويلانىپ-تولعانادى. ەحوبا ولارعا كوكتە ەش قۇرىمايتىن دەنەمەن ولمەس ٶمىر ٴسۇرۋ، قايتا تىرىلگەن يسامەن جانە مايلانعاندارمەن بىرگە بيلىك ەتۋ جانە ٶزىنىڭ قاسىندا بولۋ ٷمىتىن سيلادى! (قور. 1-ح. 15:51—53؛ جوح. 1-ح. 3:2). كوكتە وسىنداي مارتەبە كۇتىپ تۇرعانىن مايلانعاندار جاقسى تۇسىنەدى. ٴبىراق وعان يە بولۋ ٷشىن ومىرلەرىنىڭ سوڭىنا دەيىن ادالدىق ساقتاۋ كەرەكتىگىن دە ولار جاقسى بىلەدى (ٴتىم. 2-ح. 4:7، 8). مايلانعان ماسىحشىلەر كوكتەگى ۇمىتتەرى جايلى ويلانعاندا، ۇلكەن قۋانىشقا بولەنەدى (تيت. 2:13). ال «باسقا قويلار» جايلى نە دەيمىز؟ (جوح. 10:16) ولار ەسكە الۋ كەشىنە نە سەبەپتى قاتىسادى؟
باسقا قويلار نە ٷشىن قاتىسادى؟
6. باسقا قويلار نەلىكتەن جىل سايىن ەسكە الۋ كەشىنە بارادى؟
6 باسقا قويلار ەسكە الۋ كەشىندە رامىزدەردەن ٴدام تاتپاعانمەن، بۇل كەشكە قۋانا-قۋانا قاتىسادى. ولار ۇيلەنۋ تويىنا كەلىپ، جۇبايلاردىڭ نەكەلەسۋ ٴراسىمىن باقىلاپ، قۋانىشتارىنا ورتاق بولاتىن قوناقتارعا ۇقسايدى. جەردە ٶمىر سۇرۋگە ۇمىتتەنەتىندەر 1938-جىلى ەسكە الۋ كەشىنە ٴبىرىنشى رەت ارنايى شاقىرۋ الدى. سول جىلدىڭ 1-ناۋرىزىندا جارىق كورگەن «كۇزەت مۇناراسىندا» بىلاي دەپ جازىلدى: «باسقا قويلاردىڭ وسى كەشكە كەلىپ، كەشتىڭ ٶتۋىن باقىلاعاندارى وتە دۇرىس ٵرى ورىندى. بۇل — ولار ٷشىن دە قۋانىشقا تولى ٴسات».
7. باسقا قويلار ەسكە الۋ كەشىندە ايتىلاتىن باياندامانى نەلىكتەن اسىعا كۇتەدى؟
7 ەسكە الۋ كەشىندە باسقا قويلار دا ۇمىتتەرى جايلى وي جۇگىرتەدى. ويتكەنى سول كەشتەگى باياندامادا ٴماسىح پەن 144000 مايلانعان پاتشا مىڭجىلدىق بيلىك كەزىندە ادال ادامدار ٷشىن قانداي يگىلىك جاسايتىنى ايتىلادى. ولاردىڭ بيلىگىنىڭ تۇسىندا جەر بەتى جۇماققا اينالىپ، ادامدار كەمەلدىلىككە جەتەدى. دۇنيەجۇزى بويىنشا ميلليونداعان ادام وسى بايانداما بارىسىندا يشايا 35:5، 6؛ 65:21—23، ايان 21:3، 4 سياقتى پايعامبارلىقتاردىڭ ورىندالۋىن ەلەستەتىپ، ەرەكشە قۋانىشقا كەنەلەدى. وسىنىڭ ارقاسىندا ولاردىڭ ۇمىتتەرى جاندانا تۇسەدى جانە ەحوباعا ۇزبەي قىزمەت ەتە بەرۋگە مىقتاپ بەكىنەدى (مات. 24:13؛ عال. 6:9).
8. باسقا قويلاردىڭ ەسكە الۋ كەشىنە قاتىسۋلارىنىڭ تاعى ٴبىر سەبەبى قانداي؟
8 باسقا قويلاردىڭ ەسكە الۋ كەشىنە قاتىسۋلارىنىڭ تاعى ٴبىر سەبەبى — ولار مايلانعانداردى جاقسى كورەدى جانە قولداۋ كورسەتكىلەرى كەلەدى. مايلانعاندار مەن جەردە ٶمىر سۇرۋگە ۇمىتتەنەتىندەردىڭ اراسىندا تىعىز بايلانىس بولاتىنى كيەلى كىتاپتا الدىن الا ايتىلىپ كەتكەن. ٴقازىر سونىڭ بىرەر مىسالىن كورەيىك.
9. زاكاريا 8:23 تە ايتىلعانداي، باسقا قويلار مايلانعاندارعا قالاي قارايدى؟
9 زاكاريا 8:23 وقىڭىز. بۇل پايعامبارلىقتا باسقا قويلار مايلانعان باۋىرلارىنا قانشالىقتى جاقىن ەكەندىگى جاقسى سۋرەتتەلگەن. مۇنداعى «ياھۋدي» جانە «سەنىڭ حالقىڭ» دەگەن سوزدەردىڭ ەكەۋى دە مايلانعان تامتىققا نۇسقايدى (ريم. 2:28، 29). ال «بارلىق حالىقتاردان شىققان ون ادام» دەگەن باسقا قويلاردى بىلدىرەدى. ولار مايلانعاندارعا «جارماسادى»، ياعني ولارعا قوسىلىپ، ەحوباعا بىرگە تازا عيبادات ەتىپ، ولاردان ەش اجىرامايدى. وسىلاي ەرەكشە جاقىن بولعاندىقتان دا، باسقا قويلار مايلانعاندارمەن بىرگە ەسكە الۋ كەشىنە قاتىسادى.
10. ەزەكيەل 37:15—19، 24، 25-تارماقتارداعى پايعامبارلىقتى ەحوبا قالاي ورىندادى؟
10 ەزەكيەل 37:15—19، 24، 25 وقىڭىز. بۇل پايعامبارلىقتا ەكى تاياق جايلى ايتىلعان. «ياھۋداعا» دەگەن تاياق (يسرايلدىڭ پاتشالارى وسى رۋدان تاعايىندالاتىن) كوكتە ٶمىر سۇرۋگە ۇمىتتەنەتىندەردى بىلدىرسە، ال «ەفرەمگە» دەگەن تاياق جەردە ٶمىر سۇرۋگە ۇمىتتەنەتىندەردى بىلدىرەدى *. ەحوبا وسى ەكى توپتىڭ ادامدارىن ٴبىر-بىرىمەن قوسىپ، ٴبىرتۇتاس ەتكەنى نەگە نۇسقايدى؟ ولاردىڭ ٴبىر پاتشانىڭ، يسا ٴٴماسىحتىڭ، قول استىندا مىزعىماس بىرلىكتە قىزمەت ەتەتىندەرىنە نۇسقايدى. مايلانعاندار مەن باسقا قويلار جىل سايىن ەسكە الۋ كەشىندە قاتار وتىرعان كەزدە دە «ٴبىر باعۋشىسى بار ٴبىر وتار» ەكەندەرىن كورسەتەدى (جوح. 10:16).
11. ماتاي 25:31—36، 40-تارماقتاردا ايتىلعان «قويلار» ٴماسىحتىڭ باۋىرلارىن اسىرەسە قانداي ىستە قولدايدى؟
11 ماتاي 25:31—36، 40 وقىڭىز. مۇنداعى يسا ايتقان «قويلار» جەردە ٶمىر سۇرۋگە ۇمىتتەنەتىن سوڭعى كۇندەردەگى ادال ماسىحشىلەردى بىلدىرەدى. بۇل باسقا قويلار ٴماسىحتىڭ جەردە قالعان مايلانعان باۋىرلارىن ادالدىقپەن قولدايدى. اسىرەسە قانداي ىستە قولدايدى؟ ولار مايلانعاندارعا جۇكتەلگەن وتە ۇلكەن جاۋاپكەرشىلىكتى، ياعني دۇنيەجۇزى بويىنشا ۋاعىزداۋ مەن شاكىرت دايىنداۋ ٸسىن اتقارۋعا كومەكتەسەدى (مات. 24:14؛ 28:19، 20).
12، 13. باسقا قويلار ٴماسىحتىڭ باۋىرلارىن تاعى قانداي جولدارمەن قولدايدى؟
12 باسقا قويلار ٴماسىحتىڭ باۋىرلارىن تاعى قالاي قولدايدى؟ ولار جىل سايىن ەسكە الۋ كەشىنىڭ قارساڭىندا وسى كەشكە قىزىعۋشىلاردى شاقىرۋ ناۋقانىنا جان سالا قاتىسادى (« ەسكە الۋ كەشىنە الدىن الا » دەگەن قورشاۋدى قاراڭىز). سونداي-اق ارالارىندا رامىزدەردەن ٴدام تاتاتىندار بولماسا دا، باسقا قويلار الەم بويىنشا ٵربىر قاۋىمدا ەسكە الۋ كەشىنىڭ وتۋىنە قام جاسايدى. ولار مايلانعانداردى وسىلاي قولداعاندارى يسانىڭ ٶزىن قولداۋ ەكەنىن جاقسى تۇسىنەدى ( دايىندالىڭىزمات. 25:37—40).
13 كوكتە نە جەردە ٶمىر سۇرۋگە ۇمىتتەنبەيىك — بارلىعىمىز دا ەسكە الۋ كەشىنە تاعى قانداي سەبەپتەرمەن قاتىسامىز؟
بارلىق ماسىحشىلەر نە ٷشىن قاتىسادى؟
14. ەحوبا مەن يسا بىزگە دەگەن اسقاق سۇيىسپەنشىلىكتەرىن قالاي كورسەتتى؟
14 ەحوبا مەن يسانىڭ سۇيىسپەنشىلىگىنە ريزامىز. ەحوبا بىزگە وتە كوپ جاقسىلىق جاسادى. ٴبىراق سولاردىڭ بىرەۋى بارىنەن دە اسقاق تۇرادى. ول ٶزىنىڭ اياۋلى ۇلىن ٴبىز ٷشىن ازاپ شەگىپ، ولۋگە جىبەردى (جوح. 3:16). يسا دا ٴبىزدى قاتتى جاقسى كورگەندىكتەن، جانىن قيۋعا دايىن بولدى (جوح. 15:13). ەحوبا مەن يسانىڭ كورسەتكەن وسى سۇيىسپەنشىلىگىن ٴبىز ەشقاشان دا وتەي المايمىز. دەسە دە ٴبىز ولارعا دەگەن ريزاشىلىعىمىزدى ٵربىر كۇنىمىزبەن كورسەتە الامىز (قول. 3:15). ەسكە الۋ كەشىنە دە كەلەتىن سەبەبىمىز — ولاردى جاقسى كورەتىنىمىزدى كورسەتۋ جانە ولاردىڭ جاساعان جاقسىلىعىن ۇمىتپاۋ.
15. مايلانعاندار مەن باسقا قويلار ٷشىن تولەم نەلىكتەن وتە قىمبات سي؟
15 تولەم — ٴبىز ٷشىن اسا قىمبات سي (مات. 20:28). مايلانعاندار ٷشىن بۇل سي نەگە قىمبات؟ ويتكەنى سونىڭ ارقاسىندا ولار كەرەمەت ۇمىتكە يە بولدى. ٴماسىحتىڭ قۇرباندىعىنا سەنگەندىكتەن، ەحوبا ولاردى ٵدىل دەپ جاريالادى ٵرى ٶزىنىڭ بالالارى ەتتى (ريم. 5:1؛ 8:15—17، 23). ال باسقا قويلار تولەمدى نە ٷشىن باعالايدى؟ ٴماسىحتىڭ توگىلگەن قانىنا سەنگەنىنىڭ ارقاسىندا ولار ەحوبانىڭ الدىندا تازا بولا الادى، وعان قاسيەتتى قىزمەت اتقارا الادى جانە «زور الاپاتتان امان وتە الادى» (ايان 7:13—15). بۇل ەكى توپ تا تولەمدى باعالايتىندارىن جىل سايىن ەسكە الۋ كەشىنە كەلۋ ارقىلى پاش ەتەدى.
16. ەسكە الۋ كەشىنە تاعى نە سەبەپتى قاتىسامىز؟
16 يسانىڭ بۇيرىعىنا مويىنسۇنعىمىز كەلەدى. ٷمىتىمىز قانداي بولماسىن، يسانىڭ «مەنى ەسكە الۋ ٷشىن وسىلاي ىستەپ تۇرىڭدار» دەگەن سوزدەرىن ٴبىز ٵرقايسىسىمىزعا جەكە ايتىلعان بۇيرىق دەپ قابىلدايمىز (قور. 1-ح. 11:23، 24).
بارلىق ماسىحشىلەرگە تيگىزەر پايداسى
17. قالاي ەسكە الۋ كەشى ٴبىزدى ەحوباعا جاقىنداتا تۇسەدى؟
17 ەحوباعا جاقىنداي تۇسەمىز (جاق. 4:8). الدىندا ايتىپ كەتكەنىمىزدەي، ەسكە الۋ كەشىندە ٴبىز ەحوبانىڭ سيلاعان كەرەمەت ٷمىتى مەن سارقىلماس سۇيىسپەنشىلىگى جايلى تەرەڭ ويعا باتامىز (ەرم. 29:11؛ جوح. 1-ح. 4:8—10). وسى ەكى نارسە جايلى وي جۇگىرتكەندە، ەحوبانى ودان سايىن جاقسى كورەمىز ٵرى ونىمەن دوستىعىمىز دا بەكەم بولا تۇسەدى (ريم. 8:38، 39).
18. يسانىڭ ۇلگىسى بىزگە قالاي اسەر ەتەدى؟
18 يساعا ۇقساۋعا تالپىنامىز (پەت. 1-ح. 2:21). ەسكە الۋ كەشىنىڭ قارساڭىندا ٴبىز يسانىڭ ولەر الدىنداعى سوڭعى اپتاسىندا بولعان وقيعالاردى، ونىڭ ٶلىمى مەن قايتا ٴتىرىلۋى جايلى كيەلى كىتاپ تارماقتارىن وقيمىز. ال ەسكە الۋ كەشىنىڭ بايانداماسىندا يسانىڭ تانىتقان زور سۇيىسپەنشىلىگى جايلى ايتىلادى (ەفەس. 5:2؛ جوح. 1-ح. 3:16). يسانىڭ قانداي جانقيار بولعانى جايلى وقىپ، وي جۇگىرتكەندە، ٴبىز دە «سولاي ٶمىر سۇرۋگە» تالپىنىپ كەتەمىز (جوح. 1-ح. 2:6).
19. قۇدايدىڭ سۇيىسپەنشىلىگىنەن ايىرىلماۋ ٷشىن نە ىستەيمىز؟
19 ەحوبانىڭ سۇيىسپەنشىلىگىنەن ايىرىلماۋعا مىقتاپ بەكىنەمىز (ياھد. 20، 21). ەحوبانىڭ سۇيىسپەنشىلىگىنەن ايىرىلماۋ ٷشىن ٴبىز بارىمىزدى سالىپ وعان مويىنسۇنامىز، ەسىمىن كيەلى تۇتامىز جانە ونىڭ جۇرەگىن قۋانتامىز (ناق. س. 27:11؛ مات. 6:9؛ جوح. 1-ح. 5:3). ال اسىرەسە ەسكە الۋ كەشىن اتاپ وتكەندە، ٴبىز ٵربىر كۇنىمىزدى «ەحوبا، مەن سەنىڭ سۇيىسپەنشىلىگىڭنەن ماڭگى ايىرىلعىم كەلمەيدى!» دەگەن ۇستانىممەن وتكىزۋگە بەكىنەمىز.
20. ەسكە الۋ كەشىنە قاتىسۋعا قانداي سالماقتى سەبەپتەر بار؟
20 كوكتە نە جەردە ٶمىر سۇرۋگە ۇمىتتەنبەيىك، ەسكە الۋ كەشىنە قاتىسۋعا بىزدە كەلەلى سەبەپتەر وتە كوپ. ٴبىز جىل سايىن بۇل كەشكە ٴبىز ٷشىن جانىن قيعان يسا ٴماسىحتى ەسكە الۋ ٷشىن بارامىز. ال ەڭ باستىسى، ٴبىزدىڭ قۇنىمىزدى وتەۋ ٷشىن ٶز ۇلىن قيعان ەحوبا اكەمىزدىڭ تەڭدەسسىز جاقسىلىعى مەن سۇيىسپەنشىلىگىن ەسكە الامىز. ٴبىز ەحوبا مەن يسانى قاتتى جاقسى كورەمىز. سوندىقتان دا ەسكە الۋ كەشى وتەتىن كۇن كەلگەندە، ٴبىز ٷشىن سول جەردە بولۋدان ارتىق ەشتەڭە جوق! ال 2022-جىلى بۇل كەش جۇما كۇنى، 15 ساۋىردە وتكىزىلەدى.
16-ٵن ەحوبانى پاتشالىعى ٷشىن ماداقتاڭدار!
^ كوكتە نە جەردە ٶمىر سۇرۋگە ۇمىتتەنبەيىك، بارلىعىمىز دا ەسكە الۋ كەشىن اسىعا كۇتەمىز. وسى ماقالادا جازبالاردان ەسكە الۋ كەشىن نە ٷشىن اتاپ وتەتىنىمىزدى جانە بۇلاي ەتكەنىمىزدىڭ قانداي پايداسى بار ەكەنىن بىلەمىز.
^ جاڭا كەلىسىم مەن پاتشالىق كەلىسىمى جايلى تولىعىراق ٴبىلۋ ٷشىن، 2014-جىلدىڭ 15-قازانىنداعى «كۇزەت مۇناراسىنىڭ» «سەندەر ٴدىني قىزمەتكەرلەر پاتشالىعى بولاسىڭدار» (15—17-ب.) (حانزۇشا) دەگەن ماقالاسىن قاراڭىز.
^ ٴسوز ٴمانى: مايلانعان تامتىق دەگەن تىركەس مايلانعان ماسىحشىلەردىڭ جەر بەتىندە قالعان توبىن بىلدىرەدى.
^ ەزەكيەل 37-تاراۋداعى ەكى تاياق جايلى پايعامبارلىق تۋرالى تولىعىراق ٴبىلۋ ٷشىن، «ەحوبا تازا عيباداتتى قالپىنا كەلتىردى!» كىتابىنىڭ 130—135-بەتتەرىن، 3—17-ابزاستارىن قاراڭىز.