قايعى-قاسىرەت قۇدايدىڭ جازاسى ما؟
لۋزيا سول اياعىن سىلتىپ باسادى. كىشكەنتاي كەزىندە ول پوليوميەليت اۋرۋىنا شالدىققان. وتە جۇقپالى بۇل اۋرۋ ادام اعزاسىنىڭ جۇيكە جۇيەسىن زاقىمدايدى. لۋزيا 16 جاستا بولعاندا، جۇمىس بەرۋشى ايەل وعان: «اناڭنىڭ ٴتىلىن الماي، وعان كوپ قيىندىق تۋدىرعانىڭ ٷشىن قۇداي سەنى جازالاپ سال ەتتى»،— دەگەن. جىلدار وتسە دە، جۇرەگىنە زىلدەي باتقان بۇل سوزدەر لۋزيانىڭ ٵلى ەسىندە.
داماريس مي قاتەرلى ىسىگىنە شالدىققان. ٴداماريستىڭ اۋرۋى تۋرالى ەستىگەندە اكەسى وعان: «وسىنداي پالەگە دۋشار بولاتىنداي نە ىستەپ قويدىڭ؟ كۇنا جاساعاننان ساۋمىسىڭ؟ قۇداي سەنى سول ٷشىن جازالاپ جاتقان شىعار»،— دەگەن. اكەسىنىڭ بۇل سوزدەرى ٴداماريستىڭ جۇرەگىنە پىشاق سۇققانداي بولدى.
قۇداي اۋرۋ جىبەرىپ جازالايدى دەگەن ۇعىمنىڭ تاريحى تەرەڭدە جاتىر. ٴبىر كىتاپتا ايتىلعانداي، يسا پايعامباردىڭ زامانىندا كوپ ادام «اۋرۋ — ادامنىڭ ٶزىنىڭ نە تۋىسىنىڭ كۇناسى ٷشىن جىبەرىلگەن جازا» دەپ سەنگەن («Manners and Customs of Bible Lands»). تاعى ٴبىر ەڭبەكتە جازىلعانداي، ورتا عاسىرداعى «كەيبىر ادامدار قۇداي ىندەتتەر جىبەرىپ، ادامداردى كۇنالارى ٷشىن جازالايدى دەپ ويلاعان» («Medieval Medicine and the Plague»). سوندا XIV عاسىردا بۇكىل ەۋروپاداعى ميلليونداعان ادامنىڭ ٶمىرىن جالماعان ىندەت قۇدايدىڭ جازاسى بولعانى ما؟ الدە بۇل ىندەت مەديسينالىق زەرتتەۋلەر دالەلدەگەندەي، باكتەريالدى ينفەكسيادان تاراعان با؟ كەيبىرەۋلەر ويلايتىنداي، قۇداي راسىندا دا ادامداردى كۇنالارى ٷشىن اۋرۋعا شالدىقتىرا ما؟ a
ويلانىپ كورىڭىز. قۇداي ادامداردى اۋرۋعا شالدىقتىرىپ، كۇنالارىنا لايىقتى جازاسىن بەرگەن بولسا، وندا نەگە يسا پايعامبار اۋرۋلاردى ساۋىقتىرعان؟ مۇنىسىمەن ول ەحوبانىڭ جازاسىن ادىلەتسىز ەتىپ كورسەتپەس پە ەدى؟ (ماتاي 4:23، 24). يسا پايعامبار ەشقاشان قۇدايدىڭ ىسىنە قارسى شىقپاعان. قايتا، ول: «مەن ارقاشان وعان ۇنايتىندى ىستەيمىن... اكەم نەنى وسيەت ەتسە، سونى ورىندايمىن»،— دەگەن (جوحان 8:29؛ 14:31).
كيەلى كىتاپتا: «قۇداي ەش ادىلەتسىزدىك جاسامايدى»،— دەپ انىق ايتىلعان (مۇسانىڭ 5-جازباسى 32:4). مىسالى، قۇداي ۇشاقتاعى ٴبىر ادامدى جازالاۋ ٷشىن، جۇزدەگەن جازىقسىز ادامنىڭ ٶمىرىن قيىپ ۇشاقتى اپاتقا ۇشىراتپايدى عوي. قۇدايدىڭ ادال قىزمەتشىسى ىبىرايىم پايعامبار ايتقانداي، قۇداي ٵدىل بولعاندىقتان ەشقاشان «ٵدىلدى جاۋىزبەن بىرگە قۇرتپايدى». ول قۇدايدىڭ بۇلاي ارەكەت ەتۋى مۇمكىن ەمەس ەكەنىن دە ايتقان (مۇسانىڭ 1-جازباسى 18:23، 25). سونداي-اق كيەلى كىتاپتا قۇدايدىڭ «زۇلىمدىق جاسامايتىنى» جانە «جاماندىققا بارمايتىنى» ايتىلعان (ٵيۇپ 34:10—12).
كيەلى كىتاپتان بىلەرىمىز
قانداي دا ٴبىر قاسىرەتكە دۋشار بولساق، بۇل قۇداي ٴبىزدى جازالاپ جاتىر دەگەن ٴسوز ەمەس. يسا پايعامباردىڭ ٶزى مۇنى ناقتى ايتقان. بىردە ول شاكىرتتەرىمەن كەلە جاتقاندا، تۋىلعانىنان زاعيپ بولعان ٴبىر كىسىنى كورگەن. سوندا شاكىرتتەرى ودان: «ۇستاز، مىنانىڭ زاعيپ بولىپ تۋىلعانىنا ٶز كۇناسى سەبەپ بولدى ما، الدە اكە-شەشەسىنىكى مە؟»— دەپ سۇراعان. يسا پايعامبار: «ونىڭ ٶزى دە، اكە-شەشەسى دە كۇنا جاساعان جوق»،— دەپ جاۋاپ بەرگەن (جوحان 9:1—3).
سول ۋاقىتتا قاتە پىكىر كەڭ تاراعاندىقتان، يسا پايعامبار الگى كىسىنىڭ زاعيپ بولعانىنا ٶزى دە، اتا-اناسى دا كىنالى ەمەستىگىن ايتقاندا، شاكىرتتەرى تاڭعالسا كەرەك. سوسىن يسا پايعامبار الگى كىسىنى ساۋىقتىرىپ، «قۇداي قايعى-قاسىرەت جىبەرىپ ادامداردى جازالايدى» دەگەن جالعان ۇعىمدى جوققا شىعاردى (جوحان 9:6، 7). بۇگىندە قاتتى ناۋقاستانىپ جۇرگەن ادامدار باستارىنا تۇسكەن قاسىرەتكە قۇدايدىڭ كىنالى ەمەس ەكەنىن ٴبىلىپ جۇبانىش تابا الادى.
قۇداي ادامداردى كۇنالارى ٷشىن جازالاعان بولسا، يسا پايعامبار اۋرۋلاردى نە ٷشىن ساۋىقتىرعان؟
كيەلى كىتاپتىڭ ايتارى...
-
«[قۇداي] ەشكىمدى جاماندىقپەن سىنامايدى» (جاقىپ 1:13). ادامداردى عاسىرلار بويى ازاپتاپ كەلە جاتقان جاماندىق، اتاپ ايتقاندا اۋرۋ، ٶلىم، قايعى-قاسىرەت جاقىندا جوق بولادى.
-
يسا پايعامبار «بارلىق ناۋقاستاردى ساۋىقتىردى» (ماتاي 8:16). يسا پايعامبار ادامداردى ساۋىقتىرۋىمەن قۇدايدىڭ كوكتەگى ۇكىمەتى بيلىك ەتكەندە، دۇنيەجۇزى بويىنشا نەندەي جايت ورىن الاتىنىن كورسەتتى.
-
«قۇداي ولاردىڭ كوزىندەگى ٵربىر جاستى ٴسۇرتىپ تاستايدى، ەندى قايتىپ ٶلىم، جوقتاۋ، زار ەڭىرەۋ مەن اۋرۋ بولمايدى. بۇرىنعى جايتتار قۇرىپ جوق بولدى» (ايان 21:3—5).
كىم كىنالى؟
ادامدار نەگە كوپ قايعى-قاسىرەت شەگۋدە؟ بۇل سۇراق عاسىرلار بويى ٶز جاۋابىن تاپپاي كەلەدى. قايعى-قاسىرەتكە قۇداي كىنالى بولماسا، وندا كىم كىنالى؟ بۇل سۇراقتاردىڭ جاۋابىن كەلەسى ماقالادان بىلەمىز.
a ەجەلدە قۇداي ادامداردى كۇنالارى ٷشىن جازالاعانمەن، بۇگىندە ونىڭ اۋرۋلار مەن اپاتتار جىبەرىپ ادامداردى جازالايتىنى تۋرالى كيەلى كىتاپتا ەشتەڭە ايتىلماعان.
قىزىقتى بولار مالىمەتتەر
كۇزەت مۇناراسى
ادامزاتتىڭ قاسىرەت جەگىپ جاتقانىنا كىم كىنالى؟
كيەلى كىتاپتا ادامزاتتىڭ قاسىرەت شەگۋىنىڭ ٷش نەگىزگى سەبەبى ايتىلعان.
كيەلى كىتاپ. سۇراقتار مەن جاۋاپتار
كيەلى كىتاپتا ىندەتتەر تۋرالى نە ايتىلعان؟
بۇگىندە كەيبىرەۋلەر «قۇداي اۋرۋلار مەن ىندەتتەردى جىبەرىپ، ادامداردى جازالايدى» دەپ ايتادى. ٴبىراق كيەلى كىتاپ مۇنداي ويدى قۇپتامايدى.
