ايەلدەر، نەگە باسشىلىققا مويىنسۇنۋلارىڭ كەرەك؟
ايەلدەر، نەگە باسشىلىققا مويىنسۇنۋلارىڭ كەرەك؟
«ايەلدىڭ باسى — كۇيەۋى» (قور. 1-ح. 11:3).
1، 2. ا) ەلشى پاۋىل ەحوبا ورناتقان باسشىلىق ٴپرينسيپى مەن مويىنسۇنۋشىلىققا قاتىستى نە جازدى؟ ٵ) بۇل ماقالادا قانداي سۇراقتار قاراستىرىلادى؟
«ٵربىر ەركەكتىڭ باسى — ٴماسىح... ٴماسىحتىڭ باسى — قۇداي» (قور. 1-ح. 11:3). بۇل ەحوبا قۇداي ورناتقان ٴتارتىپ. الدىڭعى ماقالادا ٴماسىح ەحوباعا مويىنسۇنۋدى زور مارتەبە ساناعانى ٵرى سولاي ەتۋدەن قۋانىش العانى جانە ول ەر ادامداردىڭ باسى ەكەندىگى ايتىلعان. ٴماسىح ادامدارمەن قارىم-قاتىناسىندا مەيىرىمدى، جۇمساق، جاناشىر جانە رياسىز بولعان. ٴماسىحشى ەر ادامدار دا وزگەلەرمەن، اسىرەسە ايەلدەرىمەن، قارىم-قاتىناسىندا وسىنداي قاسيەتتەر تانىتۋى كەرەك.
2 ال ايەلدەر تۋرالى نە دەۋگە بولادى؟ ولاردىڭ باسى كىم؟ «ايەلدىڭ باسى — كۇيەۋى»،— دەيدى پاۋىل. رۋحتىڭ جەتەلەۋىمەن جازىلعان بۇل سوزدەرگە ٴماسىحشى ايەل قالاي قاراۋ كەرەك؟ بۇل ٴپرينسيپتى كۇيەۋى سەنۋشى بولماعان جاعدايدا دا ۇستانۋعا ٴتيىس پە؟ كۇيەۋىنە مويىنسۇناتىن ايەل وتباسىنا قاتىستى شەشىم قابىلدانعاندا ٶز ويىن ايتپاۋى كەرەك پە؟ ايەل ادام قالاي ماداققا لايىق بولا الادى؟
«مەن وعان وزىنە ساي كومەكشى جاساپ بەرەيىن»
3، 4. نەكەدە باسشىلىق ٴپرينسيپىن ۇستانعان نەگە پايدالى؟
3 وتباسىنداعى باسشىلىق ٴپرينسيپىن ورناتقان جاراتۋشىمىزدىڭ ٶزى بولاتىن. ادام اتانى جاراتقان سوڭ ەحوبا قۇداي بىلاي دەدى: «ادامنىڭ جالعىز بولعانى جاقسى بولماس. مەن وعان وزىنە ساي كومەكشى جاساپ بەرەيىن». حاۋا انا جاراتىلعاننان كەيىن، وزىنە جولداس جانە كومەكشى پايدا بولعانىنا قاتتى قۋانعان ادام: «مىنە، بۇل — ٶز سۇيەگىمنەن شىققان سۇيەك، ٶز ەتىمنەن شىققان ەت!»— دەدى (جار. 2:18—24). ادام مەن حاۋا جۇماققا اينالعان جەردە ماڭگى باقىتتى عۇمىر كەشەتىن كەمەلدى ادامزاتتىڭ اتا-اناسى بولار ەدى. ولاردى قانداي كەرەمەت بولاشاق كۇتىپ تۇردى دەسەڭشى!
4 ٴبىراق ولار بۇلىك شىعارىپ، ەدەم باعىنان قۋىلدى جانە باسشىلىق ٴپرينسيپىن كەمەلدى تۇردە ۇستانا المايتىن بولدى (ريمدىكتەرگە 5:12 وقى). دەگەنمەن باسشىلىق ٴپرينسيپى وزگەرىسسىز قالدى جانە دۇرىس قولدانىلاتىن بولسا، وتباسى ٷشىن وتە پايدالى. ول ەرلى-زايىپتىلاردىڭ باقىتتى بولۋىنا سەپتىگىن تيگىزەدى. ٴسۇيتىپ ولار ٶزىنىڭ باسى ەحوباعا مويىنسۇنۋدان راقات تاپقان يسا سياقتى سەزىمدە بولادى. كوكتە ٶمىر سۇرگەندە ول ‹كۇندە [قۇدايدى] قۋانتىپ، الدىندا شاتتاندى› (ناق. س. 8:30). ارينە، كەمەلسىز بولعاندىقتان ەر ادامدار كەمەلدى تۇردە باسشىلىق ەتە المايدى، ال ايەلدەرى بارىنشا مويىنسۇنۋشىلىق تانىتا المايدى. دەسە دە ەرلى-زايىپتىلار بۇل ٴپرينسيپتى ۇستانۋ ٷشىن قولدارىنان كەلگەننىڭ ٴبارىن ىستەيتىن بولسا، نەكەلىك ومىرلەرى قازىردىڭ وزىندە قاناعات اكەلەتىن بولادى.
5. ەرلى-زايىپتىلار نەگە ريمدىكتەرگە 12:10 داعى كەڭەسكە بارىنشا قۇلاق اسۋلارى كەرەك؟
5 جازبالاردا بارلىق ماسىحشىلەرگە: «ٴبىر-بىرىڭە ٴبىرىنشى بولىپ قۇرمەت كورسەتىڭدەر»،— دەگەن كەڭەس بەرىلگەن (ريم. 12:10). نەكەنىڭ باياندى بولۋى ٷشىن ەرلى-زايىپتىلاردىڭ وسى كەڭەستى ۇستانعاندارى اسىرەسە ماڭىزدى. سونداي-اق ولار ‹ٴبىر-بىرىنە مەيىرىمدى دە جان اشىر، ٶزارا كەشىرىمدى› بولۋعا بارىنشا تىرىسۋلارى قاجەت (ەفەس. 4:32).
جۇبايىڭ سەنۋشى بولماسا
6، 7. ٴماسىحشى ايەلدىڭ سەنۋشى ەمەس كۇيەۋىنىڭ باسشىلىعىنا مويىنسۇنعانى قانداي ناتيجە اكەلۋى مۇمكىن؟
6 ال ەگەر ەرلى-زايىپتىلاردىڭ ٴبىرى ەحوبانىڭ قىزمەتشىسى بولماسا شە؟ كوپ ايەل باۋىرلاستارىمىزدىڭ كۇيەۋلەرى سەنۋشى ەمەس. مۇنداي جاعدايدا ايەل باۋىرلاستار كۇيەۋلەرىنە مويىنسۇنۋلارى كەرەك پە؟ كيەلى كىتاپ بۇل سۇراققا بىلاي دەپ جاۋاپ بەرەدى: «ايەلدەر، كۇيەۋلەرىڭە مويىنسۇنىڭدار. وسىلايشا، كۇيەۋلەرىڭنىڭ كەيبىرەۋلەرى قۇداي سوزىنە قۇلاق اسپاسا دا، ايتقان سوزدەرىڭمەن ەمەس، يگىلىكتى مىنەز-قۇلىقتارىڭمەن ولاردى ٴماسىحتىڭ يەلىگىنە اينالدىرىڭدار. ولار تازا دا ىزەتتى مىنەز-قۇلىقتارىڭدى كورگەندە عانا وسىلاي بولماق» (پەت. 1-ح. 3:1، 2).
7 قۇداي ٴسوزى ايەلدى سەنۋشى ەمەس كۇيەۋىنە مويىنسۇنۋعا شاقىرادى. ايەلدىڭ جاقسى ٴجۇرىس-تۇرىسىن كورىپ، كۇيەۋى ونى وسىلاي ارەكەت ەتۋگە نە تالپىندىراتىنى جايىندا ويلانۋى مۇمكىن. ناتيجەسىندە ول ٴماسىحشى ايەلىنىڭ نە نارسەگە سەنەتىنىن ٴبىلۋدى شەشىپ، اقىرىندا شىندىقتى قابىلداۋى ىقتيمال.
8، 9. ٴماسىحشى ايەلدىڭ جاقسى ٴجۇرىس-تۇرىسى سەنۋشى ەمەس كۇيەۋىنە اسەر ەتپەسە، ول نە ىستەۋ كەرەك؟
8 ال ەگەر ٴماسىحشى ايەلدىڭ جاقسى ٴجۇرىس-تۇرىسى سەنۋشى ەمەس كۇيەۋىنە ەش اسەر ەتپەسە شە؟ جازبالار سەنۋشى ايەلدەردى كەز كەلگەن قيىنشىلىقتارعا قاراماستان، ماسىحشىگە ٴتان قاسيەتتەر تانىتۋعا ۇيرەتەدى. مىسالى، قورىنتتىقتارعا 1-حات 13:4 تە: «سۇيىسپەنشىلىك شىدامدى»،— دەلىنگەن. سوندىقتان ٴماسىحشى ايەلدەر، «بارلىق جاعدايلاردا كىشى پەيىل، ٸلتيپاتتى... ٴتوزىمدى بولىپ، سۇيىسپەنشىلىك كورسەتىڭدەر» (ەفەس. 4:2). قۇداي رۋحىنىڭ كومەگىمەن ٴتىپتى قيىن كەزدەردىڭ وزىندە ماسىحشىگە ٴتان قاسيەتتەر تانىتۋعا بولادى.
9 ەلشى پاۋىل: «ماعان كۇش-قۋات بەرۋشىنىڭ ارقاسىندا بارىنە دە توزە الامىن»،— دەپ جازدى (ٴفىلىپ. 4:13 جد). قۇداي رۋحىنىڭ ارقاسىندا نەكەدەگى ٴماسىحشى باسقالاي مۇمكىن ەمەس كوپتەگەن نارسەلەردى جاساي الادى. مىسالى، ەرلى-زايىپتىلاردىڭ ٴبىرى دورەكىلىك جاساعاندا، ەكىنشىسى دە دورەكىلىكپەن جاۋاپ بەرۋگە ازعىرىلۋى مۇمكىن. الايدا كيەلى كىتاپتا بارلىق ماسىحشىلەرگە ارنالعان كەلەسى سوزدەر بار: «جاماندىققا جاماندىقپەن قايتارماڭدار!.. كيەلى جازبادا جاراتقان يەنىڭ: «كەك الۋ — مەنىڭ ٸسىم، ەسەسىن مەن قايتارامىن» دەگەنى جازىلعان عوي» (ريم. 12:17—19). سونداي-اق سالونيقالىقتارعا 1-حات 5:15 تە مىناداي كەڭەس جازىلعان: «ەشكىم جاماندىققا جاماندىقپەن قايتارماسىن، قايتا، ٴبىر-بىرىڭە جانە باسقالارعا جاقسىلىق جاساۋعا ۇمتىلىڭدار!» ٴيا، ٶزىمىزدىڭ قولىمىزدان كەلمەيتىن نارسەلەردى ەحوبانىڭ كيەلى رۋحىنىڭ كومەگىمەن ىستەي الامىز. ەندەشە، قاجەتتى قاسيەتتەر دامىتا الۋىمىز ٷشىن قۇدايدان كيەلى رۋحىن سۇراعانىمىز ورىندى.
10. وزگەلەر ٴتىل تيگىزگەندە نە جاماندىق جاساعاندا، يسا ٶزىن قالاي ۇستاعان؟
10 بىزگە سوزىمەن نە ىسىمەن جاماندىق جاسايتىندارعا قالاي قاراۋىمىز كەرەكتىگىنە قاتىستى يسا كەرەمەت ۇلگى قالدىردى. پەتىردىڭ 1-حاتى 2:23 تە بىلاي دەلىنگەن: «ٴماسىح وزىنە ٴتىل تيگىزگەندەرگە جامان ٴسوز قايىرمادى، ازاپ كورگەن كەزدە دە ولاردى قورقىتپادى. قايتا، ول ٸسىن ٵدىل سوتتاۋشىعا تاپسىردى». ٴبىز ماسىحكە ەلىكتەۋىمىز كەرەك. وزگەلەردىڭ جاماندىعى جاماندىقپەن قايتارۋعا تۇرتكى بولۋىنا جول بەرمەڭدەر. بارلىق ماسىحشىلەرگە بەرىلەتىن كەڭەسكە ساي، «قايىرىمدى دا كىشى پەيىل بولىڭدار. جاماندىققا جاماندىقپەن، قورلىققا قورلىقپەن ەمەس، اق باتامەن جاۋاپ بەرىڭدەر» (پەت. 1-ح. 3:8، 9).
ۇندەمەس ايەل بولۋ كەرەك پە؟
11. كەيبىر ايەلدەرگە قانداي زور قۇرمەت كورسەتىلگەن؟
11 ەرىنىڭ باسشىلىعىنا مويىنسۇنۋ دەگەنىمىز ايەل ادامنىڭ وتباسىنا جانە وزگە دە ماسەلەلەرگە قاتىستى ٶز ويىن ايتپاۋى كەرەك دەگەندى بىلدىرە مە؟ ارينە، ولاي ەمەس. ەحوبا ەرلەرمەن قاتار ايەلدەرگە دە جاۋاپتى ىستەر سەنىپ تاپسىرعان. مىسالى، بولاشاقتا يسامەن بىرگە ٴدىني قىزمەتكەر جانە پاتشا رەتىندە جەردىڭ ۇستىنەن بيلىك ەتەتىن 144000 ادامعا قانداي زور قۇرمەت كورسەتىلگەنى جايلى ويلانىپ كورشى! ولاردىڭ ىشىندە ايەلدەر دە بار (عال. 3:26—29). ٴيا، ەحوبا ايەلدەردىڭ ۇندەمەس بولعانىن قالامايتىنى انىق.
12، 13. ايەل ادامدار پايعامبارلىق ەتكەندەرىنىڭ مىسالىن كەلتىرىڭدەر.
12 ەجەلگى ۋاقىتتا ايەلدەر پايعامبارلىق ەتكەن. جوەل 2:28، 29 دا الدىن الا بىلاي دەپ ايتىلعان: «ٶز رۋحىمنان كەز كەلگەنگە دارىتامىن، ٴسۇيتىپ، سەندەردىڭ ۇلدارىڭ مەن قىزدارىڭ ساۋەگەيلىك [پايعامبارلىق] ايتاتىن بولادى... سونداي-اق سول كۇندەردە قۇلدارىڭ مەن كۇڭدەرىڭە دە رۋحىمنان دارىتامىن».
13 ب. ز. 33-جىلى يەرۋساليمدە العاشقى ٶنىم مەيرامىن تويلاۋ ٷشىن جوعارعى قاباتتاعى بولمەدە جينالعان شامامەن 120 شاكىرتتىڭ ىشىندە ەرلەر مەن بىرگە ايەلدەر دە بولعان. قۇدايدىڭ رۋحى ولاردىڭ بارىنە بىردەي قوندى. سول سەبەپتى پەتىر جوەلدىڭ الدىن الا ايتقان سوزدەرىن قايتالاپ، ونى ەرلەرگە دە، ايەلدەرگە دە قاتىستى قولداندى. ول بىلاي دەدى: «وسى زاماننىڭ اياعىندا مەن ٶزىمنىڭ رۋحىمدى بۇكىل ادامزاتتىڭ ۇستىنە توگەمىن. ۇل-قىزدارىڭ پايعامبارلىق ٴسوز ايتادى، جاس جىگىتتەرىڭ ايان، قارتتارىڭ ٴتۇس كورەدى. سول كۇندەرى مەن قۇل-كۇڭدەرىمنىڭ ۇستىنە كيەلى رۋحىمدى توگەمىن، ولار دا پايعامبارلىق ٴسوز ايتادى» (ەل. ٸس. 2:16—18).
14. ەجەلدە ماسىحشىلىكتىڭ تارالۋىندا ايەلدەر قانداي ٴرول اتقاردى؟
14 ٴبىرىنشى عاسىردا ماسىحشىلىكتىڭ تارالۋىندا ايەلدەر دە كوپ ەڭبەك ەتتى. ولار وزگەلەرگە قۇداي پاتشالىعى تۋرالى ۋاعىزدادى جانە سوعان بايلانىستى مىندەتتەر اتقاردى (لۇقا 8:1—3). مىسالى، ەلشى پاۋىل فوبە ەسىمدى ايەل باۋىرلاستىڭ «كەنحرەياداعى قاۋىمنىڭ قىزمەتشىسى» بولعانىن ايتقان. سونداي-اق وزىمەن قىزمەتتەس بولعان باۋىرلاستارعا سالەم جولداعان كەزدە ادال ايەل باۋىرلاستاردىڭ دا اتىن اتاعان. ولاردىڭ ىشىندە «يەمىز ٷشىن قۇلشىنا جۇمىس ىستەپ جۇرگەن تريفەنا مەن تريفوزا» بار. سونىمەن قاتار پاۋىل ‹يەمىز ٷشىن كوپ ەڭبەك سىڭىرگەن پەرسيدا› باۋىرلاس تۋرالى دا ايتقان (ريم. 16:1، 12).
15. بۇگىندە ىزگى حاباردىڭ تارالۋىنا ايەلدەر قانداي ۇلەس قوسۋدا؟
15 ٴبىزدىڭ كۇنىمىزدە دۇنيەجۇزى بويىنشا قۇداي پاتشالىعى تۋرالى ىزگى حاباردى ۋاعىزداپ جۇرگەن جەتى ميلليوننان استام جاريالاۋشىنىڭ باسىم كوپشىلىگى ٵرتۇرلى جاستاعى ايەلدەر (مات. 24:14). ولاردىڭ كوبىسى ٸزاشار رەتىندە جانە بەتەلدە تولىق ۋاقىتتى قىزمەت اتقارادى. زابۋر جىرشىسى ٴداۋىت: «جاراتقان يە مىناعان بۇيرىق شىعاردى، كوپتەگەن قىز-كەلىنشەك ونى حابارلادى»،— دەپ جازدى (زاب. 67:12). بۇل سوزدەر بۇگىندە دە ورىندالىپ جاتىر. ەحوبا ايەلدەردىڭ ىزگى حاباردى جاريالاۋ ٸسى مەن ٶز ەركىنىڭ ورىندالۋىنا قوسىپ جاتقان ۇلەستەرىن جوعارى باعالايدى. ونىڭ مويىنسۇنۋشىلىققا قاتىستى ٴپرينسيپى ايەلدەر ۇندەمەي ٴجۇرۋ كەرەك دەگەندى بىلدىرمەيدى.
ٷنسىز قالماعان ەكى ايەل
16، 17. ايەلدەردىڭ ۇندەمەس بولماۋى كەرەك ەكەنى سارانىڭ مىسالىنان قالاي كورىنەدى؟
16 ەحوبا ايەلدەرگە كوپتەگەن مارتەبەلى مىندەتتەر جۇكتەيدى. ولاي بولسا، كۇيەۋلەر دە ماڭىزدى شەشىمدەر قابىلداعاندا ايەلدەرىمەن اقىلداسۋى كەرەك ەمەس پە؟! ولاردىڭ بۇلاي ەتكەندەرى دانالىققا جاتادى. جازبالاردا كۇيەۋلەرى سۇراماسا دا ٶز ويلارىن ايتقان نەمەسە وزدىگىنەن ارەكەت ەتكەن ايەلدەر تۋرالى ٴبىراز وقيعالار جازىلعان. سولاردىڭ ەكەۋىن قاراستىرىپ كورەيىك.
17 ىبىرايىمنىڭ ايەلى سارا كۇڭى مەن ودان تۋعان بالا ٴتيىستى قۇرمەت كورسەتپەگەندىكتەن كۇيەۋىنەن ولاردى قۋىپ جىبەرۋدى سۇراي بەردى. ‹بۇل اڭگىمە... ىبىرايىمعا ەش ۇنامادى›. الايدا ەحوبا بۇل جاعدايعا باسقاشا قارادى. سوندىقتان ول ىبىرايىمعا: «بالا مەن كۇڭگە بولا قامىقپا. سارانىڭ ايتقانىنىڭ بارىنە كون، سەبەبى سەنىڭ ۇرپاعىڭ ىسقاقتان تارايتىن بولادى»،— دەدى (جار. 21:8—12). ىبىرايىم ەحوباعا مويىنسۇنىپ، سارانىڭ ٶتىنىشىن ورىندادى.
18. ابيگەل كۇيەۋىن قۇلاعدار ەتپەستەن قالاي ارەكەت ەتتى؟
18 نابالدىڭ ايەلى ابيگەل تۋرالى دا ويلانىپ كورەيىكشى. ٴداۋىت بويىن قىزعانىش كەرنەگەن ساۋل پاتشادان قاشىپ جۇرگەن كەزىندە ٴبىراز ۋاقىت نابالدىڭ قوسىنىڭ جانىندا جاسىرىنادى. سوندا ٴداۋىت پەن ونىڭ ادامدارى نابالدىڭ بايلىعىنا قول سۇقپاي، قايتا، ونىڭ يەلىگىن قورعاپ جۇرەدى. ٴبىراق نابال «قاتىگەز دە زۇلىم ادام بولاتىن». سونداي-اق ول وڭباعان ٵرى بارىپ تۇرعان اقىماق ەدى. بىردە ٴداۋىت پەن ونىڭ ادامدارى ىزەتپەن كومەك سۇراعاندا، نابال ولاردى ‹بالاعاتتاپ، قايتارىپ جىبەرەدى›. سوندا ابيگەل قالاي ارەكەت ەتەدى؟ نابالعا ايتپاستان، ول «دەرەۋ ەكى ٴجۇز تابا نان، ەكى مەس شاراپ، بەس قويدىڭ ەتىن، ٴبىر قاپ قۋىرىلعان بيداي، ٴجۇز بۋما كەپتىرىلگەن ٸنجىر جەمىستەرىن الىپ، ٴبارىن ەسەكتەرگە تيەپ»، ٴداۋىت پەن ونىڭ ادامدارىنا اپارىپ بەرەدى. ابيگەلدىڭ بۇلاي ەتكەنى دۇرىس بولدى ما؟ كەيىن بولعان وقيعالار ونىڭ ارەكەتى دۇرىس بولعانىن كورسەتەدى. كيەلى كىتاپتا ايتىلعانداي، «جاراتقان يە نابالعا اجال جىبەردى». ال ابيگەل كەيىنىرەك داۋىتكە كۇيەۋگە شىقتى (پات. 1-ج. 25:3، 14—19، 23—25، 38—42).
ماداققا لايىق ايەل
19، 20. ايەلدى شىنىمەن باعالى ەتەتىن نە؟
19 قۇداي سوزىندە ەحوبانىڭ ەركىنە ساي ٴجۇرىپ-تۇراتىن ايەلدەرگە ماقتاۋ سوزدەر جازىلعان. مىسالى، ناقىل سوزدەر كىتابىندا بىلاي دەلىنگەن: «ول ٸنجۋ-مارجاننان دا باعالى بولار! كۇيەۋى وعان تولىقتاي سەنىم ارتادى، ەشبىر يگىلىكتەن ادا قالمايدى. ٶمىر بويى ونىڭ كۇيەۋىنە جاسارى جاماندىق ەمەس، جاقسىلىق قانا بولادى». سونداي-اق «اۋزىنان شىققان ٴسوزى — ناعىز دانالىق، بەرگەن ٴتالىمى — مەيىرىمدى جاقسىلىق. ٷي شارۋاسىن مۇقيات باقىلايدى، نانىن بەكەر جەپ، ەش ماسىل بولمايدى. بالالارى تۇرىپ، ونى دارىپتەيدى، كۇيەۋى دە... قۇرمەتتەيدى» (ناق. س. 31:10—12، 26—28).
20 ايەلدى شىنىمەن باعالى ەتەتىن نە؟ ناقىل سوزدەر 31:30 دا بىلاي دەلىنگەن: «اسەمدىك وتكىنشى، الدامشى سۇلۋلىق تا، ٴتاڭىردى قاستەرلەيتىن ايەل لايىق ماداققا». ٴتاڭىردى قاستەرلەۋ ونىڭ ورناتقان باسشىلىق ٴپرينسيپىن شىن جۇرەكتەن ۇستانۋدى دا بىلدىرەدى. «ٵربىر ەركەكتىڭ باسى — ٴماسىح، ال ٴماسىحتىڭ باسى — قۇداي» بولسا، «ايەلدىڭ باسى — كۇيەۋى» (قور. 1-ح. 11:3).
قۇداي سيىن باعالاڭدار
21، 22. ا) ەرلى-زايىپتى ماسىحشىلەردىڭ نەكە قۇرىلىمى ٷشىن ريزاشىلىق بىلدىرۋىنە قانداي سەبەپتەر بار؟ ٵ) ەحوبا ورناتقان باسشىلىق ٴپرينسيپىن نەلىكتەن قۇرمەتتەۋىمىز كەرەك؟ (17-بەتتەگى قورشاۋدى قاراڭدار).
21 نەكەدەگى ماسىحشىلەردىڭ ەحوباعا ريزاشىلىق بىلدىرۋىنە كوپتەگەن سەبەپتەر بار. اسىرەسە ولاردىڭ بىرگە باقىتتى ٶمىر كەشىپ، جۇپتاسىپ ەحوباعا قىزمەت ەتكەندەرى قانداي تاماشا! (رۋت 1:9؛ ميحا 6:8). وسى قۇرىلىمعا باستاما بەرگەن ەحوبا نەكەدەگى باقىتتىڭ سىرى نەدە ەكەنىن جاقسى بىلەدى. سوندىقتان قيىنشىلىقتار باستان اسىپ جاتسا دا، ٴبارىن دە ەحوبا ۇيرەتكەندەي ىستەسەڭدەر، «جاراتقان يەنىڭ الدىنداعى قۋانىش... سەندەر ٷشىن قۋات بەرەتىن دەمەۋ» بولىپ قالا بەرمەك (نەح. 8:10).
22 ايەلىن وزىندەي سۇيەتىن ٴماسىحشى كۇيەۋ جۇمساقتىقپەن باسشىلىق ەتىپ، قامقورشى بولا بىلەدى. ال اياۋلى ايەلى بولسا، ونى قولداپ، شىن جۇرەكتەن قۇرمەت كورسەتۋ ارقىلى كۇيەۋىنىڭ ماحابباتىنا بولەنەدى. بارىنەن دە ماڭىزدىسى — نەكەلەرىن باقىتتى ەتۋىمەن ولار ەحوبا قۇدايعا ماداق اكەلەدى.
ەستەرىڭدە مە؟
•ەحوبا قانداي باسشىلىق ٴپرينسيپىن ورناتتى؟
•نەلىكتەن ەرلى-زايىپتىلار ٴبىر-ٴبىرىن قۇرمەتتەۋ كەرەك؟
•ٴماسىحشى ايەل سەنۋشى ەمەس كۇيەۋىنە قالاي قاراۋ كەرەك؟
•نەلىكتەن وتاعاسى ماڭىزدى شەشىم قابىلداردا ايەلىمەن اقىلداسقانى ٴجون؟
[زەرتتەۋگە ارنالعان سۇراقتار]
[17-بەتتەگى قورشاۋ]
نەلىكتەن بيلىكتى مويىنداۋ كەرەك؟
ەحوبا سانالى جاراتىلىستارىنىڭ اراسىندا باسشىلىققا قاتىستى ٴتارتىپ ورناتتى. بۇل رۋحاني جاراتىلىستارى ٷشىن دە، ادامزات ٷشىن دە پايدالى. وسىنىڭ ارقاسىندا ولار ەرىك بوستاندىعىن قولدانىپ، بىرلىكتە جانە ۇيىمداسقان تۇردە قىزمەت ەتىپ، قۇدايعا داڭق اكەلە الادى (زاب. 132:1).
مايلانعان ماسىحشىلەردىڭ قاۋىمى يسا ٴماسىحتىڭ باسشىلىعىنا مويىنسۇنادى (ەفەس. 1:22، 23). ال بولاشاقتا «ۇلى دا الەمدى وزىنە باعىندىرىپ بەرگەن اكەسىنە مويىنسۇنادى. وسىلاي قۇداي بۇكىل الەمگە تولىقتاي بيلىك جۇرگىزەتىن بولادى» (قور. 1-ح. 15:27، 28). ولاي بولسا، قۇدايعا وزدەرىن باعىشتاعان ادامداردىڭ قاۋىمدا جانە وتباسىندا باسشىلىق پرينسيپىنە باعىنعاندارى قانشالىقتى ورىندى دەسەڭشى! (قور. 1-ح. 11:3؛ ەۆر. 13:17). بۇلاي ەتكەنىمىز ٶزىمىز ٷشىن پايدالى، ويتكەنى ەحوبانىڭ قولداۋى مەن باتالارىنا يە بولامىز (يشايا 48:17).
[13-بەتتەگى سۋرەت]
ٴماسىحشى ايەل قۇدايعا ۇنامدى قاسيەتتەر تانىتۋ ٷشىن ۇنەمى دۇعا ەتۋى كەرەك
[15-بەتتەگى سۋرەتتەر]
قىز-كەلىنشەكتەردىڭ پاتشالىق ىسىنە قوساتىن ۇلەستەرى ەحوبا ٷشىن اسا باعالى