نەگىزگى تاقىرىپ | قۇدايدان الىستاتاتىن جالعان ۇعىمدار
قۇدايدى قاتىگەز ەتىپ كورسەتەتىن جالعان ۇعىم
كوپ ادام نە نارسەگە سەنەدى؟
«اۋىر كۇنا جاساعاندار ولگەننەن كەيىن بىردەن توزاققا تۇسەدى. وندا ولار توزاق ازابىندا، ياعني ماڭگى جانىپ تۇراتىن وتتا قينالادى» («كاتوليك شىركەۋىنىڭ كاتەحيزيسى»).
كيەلى كىتاپتا جازىلعان شىندىق.
«ولگەندەر ەشتەڭە بىلمەيدى» (ۋاعىزداۋشى 9:5). ەگەر ولىلەر ەشتەڭە بىلمەيتىن بولسا، قالايشا ولار «ماڭگى جانىپ تۇراتىن وتتا» ازاپ شەگەدى؟
كيەلى كىتاپتىڭ كەيبىر اۋدارمالارىندا ٴجيى «توزاق» دەپ اۋدارىلاتىن ەۆرەي جانە گرەك سوزدەرى ادامزاتتىڭ مولاسىن بىلدىرەدى. مىسالى، قۇداي يسا پايعامباردى قايتا تىرىلتپەس بۇرىن، ول ٷش كۇن بويى قابىردە جاتقان ەدى. ونىڭ قايتا تىرىلەتىنى جايلى مىناداي پايعامبارلىق سوزدەر ايتىلعان بولاتىن: «سەن مەنى مولادا [«توزاقتا»، تاۋرات اۋدارماسى] قالدىرمايسىڭ» (ەلشىلەردىڭ ىستەرى 2:27). يسا پايعامبار قۇدايدىڭ ادال قىزمەتشىسى بولعاندىقتان، قايتىس بولعاننان كەيىن ازاپ شەگەتىن ورىندا بولۋى مۇمكىن ەمەس ەدى. ونىڭ ٷش كۇن بويى كادىمگى مولادا بولعانى انىق.
نەگە مۇنى ٴبىلۋ ماڭىزدى؟
قۇدايدى قاتىگەز دەپ قاراستىرعانىمىز ونى جاقسى كورۋگە تالپىندىرمايدى، قايتا، ودان الىستاتادى. مەكسيكادا تۇراتىن روۋسيوۋ بىلاي دەيدى: «بالا كەزىمنەن باستاپ ماعان توزاق بار دەپ ۇيرەتەتىن. قۇدايدان جانۇشىرا قورىققانىم سونشا — ونىڭ جاقسى قاسيەتتەرى بار ەكەنىنە سەنە المايتىنمىن. مەن ونى اشۋشاڭ ٵرى ٴتوزىمسىز قۇداي دەپ ويلايتىنمىن».
كيەلى كىتاپتا قۇدايدىڭ ۇكىمدەرى مەن ولىلەردىڭ كۇيى تۋرالى انىق ەتىپ جازىلعان شىندىقتى بىلگەنى ٴروۋسيوۋدىڭ قۇدايعا دەگەن كوزقاراسىن وزگەرتتى. «مەن ۇلكەن جەڭىلدىك سەزىندىم. يىعىمنان اۋىر جۇك تۇسكەندەي بولدى،— دەيدى ول.— ەندى مەن قۇدايدىڭ بىزگە تەك جاقسىنى تىلەيتىنىنە جانە ٴبىزدى جاقسى كورەتىنىنە سەنە باستادىم. سودان مەن دە ونى جاقسى كورە الاتىن بولدىم. مەن ونى بالالارىنىڭ قولىنان جەتەلەپ جۇرەتىن ٵرى ولاردىڭ يگىلىگىن ويلايتىن اكە رەتىندە قاراستىراتىن بولدىم» (يشايا 41:13).
كوپ ادام توزاقتان قورىققاندىقتان قۇدايشىل ادام بولۋعا تىرىسادى، بىراق قۇداي ٴبىزدىڭ وعان قورىققاندىقتان قىزمەت ەتكەنىمىزدى قالامايدى. يسا پايعامبار: «ەحوبا قۇدايىڭدى شىن جۇرەكتەن... ٴسۇي!»— دەگەن (مارقا 12:29، 30). بۇعان قوسا، قۇدايدىڭ ادىلەتسىز ارەكەت ەتپەيتىنىن تۇسىنگەنىمىز ونىڭ بولاشاقتاعى ۇكىمدەرىنىڭ ٵدىل بولاتىنىنا سەنىمدىلىك بەرەدى. كيەلى كىتاپتا جازىلعانداي، «زۇلىمدىق اتاۋلى قۇدايدان تىم الشاق، ادىلەتسىزدىك اتاۋلى قۇدىرەتى شەكسىز تاڭىردەن ابدەن اۋلاق!» (ٵيۇپ 34:10).
