17-تاراۋ
«ەي، گوگ... مەن ساعان قارسى شىعامىن!»
ويباعدار: «گوگتىڭ» جانە ول شابۋىلدايتىن «ەلدىڭ» ماعىناسى
1، 2. ادامزاتتى الدا قانداي سوعىس كۇتىپ تۇر جانە سوعان بايلانىستى قانداي سۇراقتار تۋىندايدى؟ (تاراۋدىڭ باسىنداعى سۋرەتتى قاراڭىز.)
مىڭداعان جىلدان بەرى جەر بەتى سوعىستاردىڭ، اسىرەسە XX عاسىرداعى دۇنيەجۇزىلىك ەكى سوعىستىڭ كەزىندە سۋداي توگىلگەن قانعا بويالىپ كەلدى. دەگەنمەن ادامزات تاريحىندا ەشقاشان بولىپ كورمەگەن ەڭ ۇلى سوعىس ٵلى الدا. بۇل سوعىس — ٶز پايدالارىن كوزدەگەن حالىقتاردىڭ اراسىندا بولاتىن جاي قاقتىعىس ەمەس. ول — «قۇدىرەتى شەكسىز قۇدايدىڭ ۇلى كۇنى بولاتىن سوعىس» (ايان 16:14). بۇل سوعىستا الەمنىڭ ٵمىرشىسى ەحوبا جەر بەتىندە بۇرىن-سوڭدى ەشكىم كورمەگەن جويقىن كۇشىن پاش ەتەدى. بۇعان ٴبىر مەنمەنسىگەن جاۋدىڭ ونىڭ باعالى ەلىنە شابۋىل جاساۋى سەبەپشى بولادى.
2 وسى ورايدا مىنانداي سۇراقتار تۋىندايدى: بۇل قانداي جاۋ؟ ول قانداي ەلگە شابۋىلدايدى؟ جانە ول قاشان، قالاي، نەلىكتەن شابۋىلدايدى؟ بولاشاقتا بولاتىن وسى وقيعالاردىڭ بىزگە، ياعني جەر بەتىندە ەحوباعا تازا عيبادات ەتەتىندەرگە تىكەلەي قاتىسى بار. سوندىقتان وسى سۇراقتاردىڭ جاۋابىن بىلگەنىمىز ٴجون. ولاردى ٴبىز ەزەكيەل كىتابىنىڭ 38 ٸنشى جانە 39 ىنشى تاراۋىندا جازىلعان پايعامبارلىقتان تابا الامىز.
جاۋ — ماگوگ جەرىندەگى گوگ
3. ەزەكيەلدىڭ ماگوگ جەرىندەگى گوگقا قاتىستى پايعامبارلىعىنىڭ مازمۇنى قانداي؟
3 ەزەكيەل 38:1، 2، 16، 18؛ 39:4، 11 قاراڭىز. پايعامبارلىقتىڭ مازمۇنى كەلەسىدەي: «سوڭعى كۇندەردە» «ماگوگ جەرىندەگى گوگ» دەپ اتالاتىن جاۋ قۇداي حالقى تۇرىپ جاتقان «ەلگە» شابۋىلدايدى. ونىڭ بۇل زۇلىم شابۋىلى ەحوبانىڭ «قاھارىن وتتاي لاۋلاتادى». ول حالقى ٷشىن اراشا ٴتۇسىپ، گوگتى تاس-تالقان ەتەدى *. ەحوبا جەڭىلگەن جاۋىن دا، وعان ەرگەندەردى دە «الۋان ٴتۇرلى قۇستار مەن جابايى اڭدارعا جەم قىلادى». سوڭىندا ول گوگقا «قابىر بولاتىن جەر بەرەدى». بۇل پايعامبارلىقتىڭ جاقىن ارادا قالاي ورىندالاتىنىن ٴبىلۋ ٷشىن، الدىمەن گوگتىڭ كىم ەكەنىن انىقتاپ الايىق.
4. ٴبىز ماگوگ جەرىندەگى گوگ تۋرالى قانداي تۇجىرىمعا كەلدىك؟
4 سونىمەن، ماگوگ جەرىندەگى گوگ دەگەن كىم؟ ەزەكيەلدىڭ سيپاتتاعانىنا قاراپ، گوگ تازا عيبادات ەتۋشىلەردىڭ قاس جاۋى ەكەنىن اڭعارۋعا بولادى. سوندا ول تازا عيباداتتىڭ ەڭ باستى جاۋى شايتاننىڭ باسقاشا اتى ما؟ كوپتەگەن جىلدار بويى ٴبىزدىڭ ادەبيەتتەرىمىزدە سولاي ٴتۇسىندىرىلىپ كەلدى. ٴبىراق ەزەكيەلدىڭ پايعامبارلىعىن تەرەڭىرەك زەرتتەي كەلە، بۇعان قاتىستى تۇسىنىگىمىز وزگەردى. بۇل جايىندا «كۇزەت مۇناراسىندا» تالقىلانىپ، ماگوگ جەرىندەگى گوگ كوزگە كورىنبەيتىن رۋحاني جاراتىلىس ەمەس، كوزگە كورىنەتىن ادامدار، ياعني تازا عيباداتقا قارسى شابۋىلدايتىن وداقتاسقان حالىقتار ەكەنى ايتىلدى *. نە سەبەپتى مۇنداي تۇجىرىمعا كەلگەنىمىزدى تالقىلاماس بۇرىن، الدىمەن ەزەكيەلدىڭ پايعامبارلىعىنان گوگتىڭ رۋحاني جاراتىلىس ەمەس ەكەنىن دالەلدەيتىن ەكى جايتتى قاراستىرايىق.
5، 6. ماگوگ جەرىندەگى گوگتىڭ رۋحاني جاراتىلىس ەمەس ەكەنى ەزەكيەلدىڭ پايعامبارلىعىنان قالاي كورىنەدى؟
5 «سەنى الۋان ٴتۇرلى قۇستارعا... جەم قىلامىن» (ەزەك. 39:4). وسىعان ۇقساس ەسكەرتۋلەر كيەلى جازبالاردا ٴجيى كەزدەسەدى، ٵرى بۇل الدەكىمنىڭ قۇدايدىڭ ۇكىمىنە ۇشىراعانىن بىلدىرەدى. قۇداي مۇنداي ەسكەرتۋلەردى يسرايل حالقىنا دا، وزگە حالىقتارعا دا ايتقان (مۇس. 5-ج. 28:26؛ ەرم. 7:33؛ ەزەك. 29:3، 5). بايقاساق، قۇداي بۇل ەسكەرتۋلەردى رۋحاني جاراتىلىستارعا ەمەس، ەت پەن سۇيەكتەن جارالعان ادامدارعا ايتقان. ونىڭ ۇستىنە، قۇستار مەن اڭدار رۋحتى ەمەس، ٴتاندى جەيدى. سونىمەن، ەزەكيەلدىڭ پايعامبارلىعىندا جازىلعان قۇدايدىڭ ەسكەرتۋىنەن گوگتىڭ رۋحاني جاراتىلىس ەمەس ەكەنىن تۇسىنەمىز.
6 «مەن گوگقا يسرايل ەلىنەن... قابىر بولاتىن جەر بەرەمىن» (ەزەك. 39:11). رۋحاني جاراتىلىستاردىڭ جەر بەتىندەگى قابىرگە قويىلاتىنى جايلى كيەلى كىتاپتىڭ ەش جەرىندە جازىلماعان. ٴبىراق وندا شايتان مەن ونىڭ جىن-پەرىلەرى 1000 جىلعا ٴتۇپسىز تۇڭعيىققا تاستالىپ، كەيىن ماڭگىلىك جويىلۋدى بىلدىرەتىن بەينەلى ماعىناداعى وتتى كولگە لاقتىرىلاتىنى جازىلعان (لۇقا 8:31؛ ايان 20:1—3، 10). ال گوگقا جەر بەتىنەن «قابىر» بەرىلگەنىن ەسكەرسەك، ول رۋحاني جاراتىلىس ەمەس دەپ تۇجىرىمداۋعا بولادى.
7، 8. «سولتۇستىك پاتشاسىنىڭ» جويىلۋى مەن ماگوگ جەرىندەگى گوگتىڭ جويىلۋىنىڭ اراسىندا قانداي ۇقساستىق بار؟
7 تازا عيباداتقا سوڭعى شابۋىل جاسايتىن گوگ رۋحاني جاراتىلىستى بىلدىرمەسە، وندا بۇل جاۋ كىمدى بىلدىرەدى؟ بۇل سۇراقتىڭ جاۋابىن كيەلى كىتاپتىڭ كەلەسى ەكى پايعامبارلىعىنان بىلەمىز.
8 «سولتۇستىك پاتشاسى» (دانيال 11:40—45 وقىڭىز). دانيال پايعامبار ٶزىنىڭ زامانىنان باستاپ ٴبىزدىڭ كۇنىمىزگە دەيىن قانداي دۇنيەجۇزىلىك ۇكىمەتتەر بيلىك ەتەتىنىن پايعامبارلىق ەتىپ كەتكەن. سونداي-اق ونىڭ پايعامبارلىعىندا ٴبىر-بىرىمەن جاۋلاساتىن ەكى ساياسي كۇش — «وڭتۇستىك پاتشاسى» مەن «سولتۇستىك پاتشاسى» — تۋرالى دا ايتىلعان. عاسىرلار بويى حالىقتار بيلىككە تالاسقاندا، ٵرتۇرلى پاتشالار مەن حالىقتار «وڭتۇستىك پاتشاسى» نە «سولتۇستىك پاتشاسى» بولىپ كەلگەن. سولتۇستىك پاتشاسىنىڭ «اقىرعى ۋاقىتتا» جاسايتىن سوڭعى شابۋىلى جايىندا دانيال بىلاي دەگەن: «ول زور قاھارىنا ٴمىنىپ، كوپتىڭ كوزىن قۇرتىپ، جويۋ ٷشىن اتتانادى». سولتۇستىك پاتشاسىنىڭ كوزدەگەن ەڭ باستى نىساناسى — ەحوباعا عيبادات ەتەتىن ادامدار *. ول قۇداي حالقىنا شابۋىل جاساعانمەن، جەڭىلىسكە ۇشىرايدى. سودان كەيىن ماگوگ جەرىندەگى گوگ سياقتى ونىڭ دا «سوڭى جەتەدى».
9. «جەرجۇزىنىڭ پاتشالارىنىڭ» جويىلۋى مەن ماگوگ جەرىندەگى گوگتىڭ جويىلۋىنىڭ اراسىندا قانداي ۇقساستىق بار؟
9 «جەرجۇزىنىڭ پاتشالارى» (ايان 16:14، 16؛ 17:14؛ 19:19، 20 وقىڭىز). ايان كىتابىندا «جەرجۇزىنىڭ پاتشالارى» كوكتەگى «پاتشالاردىڭ پاتشاسى» يساعا قارسى شايقاسقا شىعاتىنى ايتىلعان. ولار كوككە جەتە الماعاندىقتان، يسانىڭ پاتشالىعىن قولداپ جۇرگەن جەردەگى ادامدارعا شابۋىلدايدى. ٴبىراق ارماگەددون شايقاسىندا ولار ويسىراي جەڭىلەدى. بايقاساق، جەرجۇزى پاتشالارىنىڭ سوڭى ەحوبانىڭ حالقىنا شابۋىل جاساعاننان كەيىن عانا جەتەدى. بۇل تۋرا ماگوگ جەرىندەگى گوگپەن بولاتىن جايتتى ەسكە سالادى *.
10. ٴبىز ماگوگ جەرىندەگى گوگ جايىندا قانداي تۇجىرىمعا كەلدىك؟
10 سونىمەن، ٴبىز گوگ جايىندا قانداي تۇجىرىمعا كەلدىك؟ گوگ — رۋحاني جاراتىلىس ەمەس. ول جۋىردا قۇداي حالقىنا شابۋىل جاسايتىن جەردەگى حالىقتاردى بىلدىرەدى. بۇل حالىقتار بىرىگىپ، قانداي دا ٴبىر وداق قۇرادى. نە ٷشىن؟ قۇداي حالقى جەردىڭ تۇكپىر-تۇكپىرىندە ەكەنىن ەسكەرسەك، ولارعا شابۋىل جاساۋ ٷشىن، حالىقتار بىردەي ماقساتتى كوزدەپ، بىردەي ارەكەت ەتۋ كەرەك بولادى (مات. 24:9). بۇل شابۋىل زۇلىم شايتاننىڭ ايداۋىمەن جاسالاتىنىندا داۋ جوق. ول ۇزاق ۋاقىتتان بەرى جەرجۇزىندەگى حالىقتاردى قولدانىپ، تازا عيباداتقا قارسى شىعىپ كەلەدى (جوح. 1-ح. 5:19؛ ايان 12:17). الايدا ەزەكيەلدىڭ ماگوگ جەرىندەگى گوگ جايلى پايعامبارلىعى شايتانعا ەمەس، ەحوبانىڭ حالقىنا شابۋىل جاسايتىن جەر بەتىندەگى حالىقتارعا باسا نازار اۋدارادى *.
گوگ شابۋىلدايتىن «ەل»
11. گوگ شابۋىلدايتىن ەل ەزەكيەلدىڭ پايعامبارلىعىندا قالاي سيپاتتالعان؟
11 وسى تاراۋدىڭ 3-ابزاسىنان بىلگەنىمىزدەي، ماگوگ جەرىندەگى گوگ ەحوبانىڭ باعالى ەلىنە شابۋىل جاساپ، ونىڭ قاھارىن وتتاي لاۋلاتادى. بۇل قانداي ەل؟ مۇنى ٴبىلۋ ٷشىن ەزەكيەلدىڭ پايعامبارلىعىنا ورالايىق (ەزەكيەل 38:8—12 وقىڭىز). پايعامبارلىقتا گوگ شابۋىلدايتىن ەلدىڭ تۇرعىندارى «قالپىنا كەلگەن» ٵرى «حالىقتار اراسىنان جيناپ اكەلىنگەن» حالىق ەكەنى ايتىلعان. نازار اۋدارارلىق تاعى ٴبىر جايت، وسى ەلدە تۇرىپ جاتقان عيبادات ەتۋشىلەر «قاۋىپسىز ٶمىر سۇرەدى»، ولاردىڭ مەكەندەرى «قابىرعامەن قورشالماعان، ىسىرمالى قاقپالارى دا جوق»، سونداي-اق ولار «مول داۋلەتكە يە». بۇل ەلدە ەحوباعا دۇنيەجۇزى بويىنشا تازا عيبادات ەتەتىن ادامدار تۇرادى. سونىمەن، بۇل قانداي ەل؟
12. ەجەلگى يسرايل ەلى قالاي قايتا قالپىنا كەلدى؟
12 الدىمەن، ەجەلگى يسرايلدىڭ — قۇدايدىڭ تاڭداعان حالقى عاسىرلار بويى تۇرىپ، ەڭبەك ەتىپ، عيبادات ەتكەن ەلدىڭ — قالاي قالپىنا كەلگەنىن قاراستىرايىق. يسرايلدىكتەر ادالدىقتان تايعاندا، ەحوبا ەزەكيەل ارقىلى ولاردىڭ ەلدەرى ۇيىندىگە اينالىپ، قاڭىراپ بوس قالاتىنىن ايتتى (ەزەك. 33:27—29). ٴبىراق ەحوبا وكىنگەن تامتىقتىڭ بابىلدان قايتىپ، ٶز ەلدەرىندە تازا عيباداتتى قالپىنا كەلتىرەتىندەرىن دە پايعامبارلىق ەتتى. يسرايل ەلىنە ەحوبانىڭ باتاسى توگىلىپ، ول «ەدەم باعىنداي بولىپ» كوركەيمەك ەدى (ەزەك. 36:34—36). يسرايل ەلىنىڭ قايتا قالپىنا كەلۋى ب.ز.ب. 537-جىلى، ياعني جەر اۋدارىلعان ياھۋديلەر ەلدەرىندە تازا عيباداتتى قالپىنا كەلتىرۋ ٷشىن يەرۋساليم قالاسىنا ورالعاندا باستالدى.
13، 14. ا) رۋحاني ەل دەپ نەنى ايتامىز؟ ٵ) بۇل ەل نەلىكتەن ەحوبا ٷشىن باعالى؟
13 ٴبىزدىڭ كەزىمىزدە دە قۇدايعا تازا عيبادات ەتەتىندەر وسىنداي قايتا قالپىنا كەلتىرۋ ىسىنە كۋا بولدى. وسى باسىلىمنىڭ 9-تاراۋىنان بىلگەنىمىزدەي، ۇزاق جىلدار بويى ۇلى بابىلدىڭ تۇتقىندىعىندا بولعان قۇداي حالقى 1919-جىلى ازات بولدى. سول جىلى ەحوبا ٶزىنىڭ عيبادات ەتۋشىلەرىن رۋحاني ەلگە قونىستاندىردى. بۇل ەل رۋحاني جۇماقتى — ٴبىز شىنايى قۇدايعا عيبادات ەتەتىن قاۋىپسىز ٵرى رۋحاني كوركەيىپ جاتقان ورتانى — بىلدىرەدى. ٴبىز بۇل ەلدە جانتىنىشتىعىنا بولەنىپ، قاۋىپسىز ٶمىر كەشەمىز (ناق. س. 1:33). سونداي-اق استا-توك مول رۋحاني داستارقاننان تاماقتانامىز. قۇداي پاتشالىعىن جاريالاۋ ٷشىن ٴسۇيىپ اتقاراتىن ىستەرىمىز دە كوپ. ٴبىز جازبالارداعى «ەحوبانىڭ باتاسى ادامدى بايىتادى، بۇعان ول ەش قايعى-قاسىرەت قوسپايدى» دەگەن سوزدەردىڭ راستىعىن كورىپ ٴجۇرمىز (ناق. س. 10:22). جەردىڭ قاي بۇرىشىندا تۇرمايىق، ٴبارىمىز وسى ەلدە — رۋحاني جۇماقتا — ٴجۇرمىز. تازا عيباداتتى سوزىمىزبەن دە، ىسىمىزبەن دە بارىنشا قولداي بەرسەك، وسى ەلدە ٵرى قاراي دا جاساي بەرەمىز.
14 بۇل رۋحاني ەل ەحوبا ٷشىن اسا باعالى. ويتكەنى ونىڭ تۇرعىندارى «بارلىق حالىقتاردىڭ باعالى قازىنالارى»، ياعني ەحوبانىڭ ٶزى تازا عيباداتقا جاقىنداتىپ تارتقان جاندار (حاگ. 2:7؛ جوح. 6:44). ولار جاڭا بولمىسقا يە بولىپ، قۇداي تانىتاتىن اسقاق قاسيەتتەردى تانىتۋعا بارىنشا تىرىسادى (ەفەس. 4:23، 24؛ 5:1، 2). تازا عيبادات ەتۋشىلەر رەتىندە ولار قۇدايعا بارىن سالىپ قىزمەت ەتەدى. ولار مۇنى قۇدايدى داڭقتايتىن ٵرى وعان دەگەن سۇيىسپەنشىلىكتەرىن كورسەتەتىن جولمەن اتقارادى (ريم. 12:1، 2؛ جوح. 1-ح. 5:3). رۋحاني ەلدى گۇلدەندىرە ٴتۇسۋ ٷشىن قىزمەتشىلەرىنىڭ ايانباي ەڭبەك ەتىپ جاتقانىن كورگەندە، ەحوبانىڭ جۇرەگى قالاي قۋانادى دەسەڭىزشى! ويلاپ كورىڭىزشى، تازا عيباداتتى ومىرىڭىزدە باستى ورىنعا قويساڭىز، ٴسىز رۋحاني ەلدى كوركەيتىپ قانا قويماي، ەحوبا قۇدايدىڭ جۇرەگىن قۋانىشقا كەنەلتەسىز! (ناق. س. 27:11).
جەردىڭ قاي بۇرىشىندا تۇرمايىق، تازا عيباداتتى بارىنشا قولداي بەرسەك، رۋحاني ەلدە جاساي بەرەمىز (13، 14-ابزاستى قاراڭىز)
گوگ قاشان، نە ٷشىن جانە قالاي شابۋىلدايدى؟
15، 16. ماگوگ جەرىندەگى گوگ قالپىنا كەلگەن رۋحاني ەلگە قاشان شابۋىلدايدى؟
15 جۋىردا جەر بەتىندەگى وداقتاسقان حالىقتار ٴبىزدىڭ كورىكتى رۋحاني ەلىمىزگە شابۋىلدايتىنى قاي-قايسىسىمىزدى دا ەرىكسىز ويعا باتىرادى. بۇل شابۋىلدىڭ ەحوباعا تازا عيبادات ەتەتىندەرگە دە قاتىسى بار بولعاندىقتان، ٴبىز ول جايىندا كوبىرەك بىلگىمىز كەلەدى. قازىر وسى ورايدا تۋىندايتىن ٷش سۇراققا توقتالايىق.
16 ماگوگ جەرىندەگى گوگ قالپىنا كەلگەن رۋحاني ەلگە قاشان شابۋىلدايدى؟ پايعامبارلىقتا: «سوڭعى كۇندەردە مەن سەنى ٶز جەرىمە قارسى شىعارامىن»،— دەلىنگەن (ەزەك. 38:16). دەمەك، بۇل وقيعا وسى دۇنيەنىڭ سوڭعى كۇندەرىندە ورىن الادى. زور الاپات جالعان دىندەر يمپەرياسى ۇلى بابىلدىڭ جويىلۋىمەن باستالاتىنى ەسىمىزدە شىعار. گوگتىڭ تازا عيبادات ەتەتىندەرگە سوڭعى رەت ٵرى جاپپاي جاسايتىن شابۋىلى ٴدال وسى جالعان دىندەر جويىلعاننان كەيىنگى جانە ارماگەددون باستالعانعا دەيىنگى ارالىقتا بولادى.
17، 18. زور الاپات كەزىندە ەحوبا جاعدايدىڭ ٶربۋىن قالاي قاداعالايدى؟
17 گوگ قالپىنا كەلگەن رۋحاني ەلگە نە ٷشىن شابۋىلدايدى؟ ەزەكيەلدىڭ پايعامبارلىعىنان ەكى جايتتى اڭعارۋعا بولادى: 1) جاعداي ەحوبانىڭ قاداعالاۋىمەن ٶربيدى جانە 2) گوگتىڭ زۇلىم نيەتى.
18 جاعداي ەحوبانىڭ قاداعالاۋىمەن ٶربيدى (ەزەكيەل 38:4، 16 وقىڭىز). ەحوبا گوگقا نە دەگەنىنە نازار اۋدارايىق. ول: «مەن... جاق سۇيەگىڭە قارماق سالامىن... سەنى ٶز جەرىمە قارسى شىعارامىن»،— دەگەن. سوندا ەحوبا حالىقتاردى ٶزىنىڭ عيبادات ەتۋشىلەرىنە ٶزى قارسى شىعارا ما؟ ارينە، جوق! ول ەشقاشان حالقىنىڭ جاماندىققا ۇشىراۋىنا سەبەپشى بولمايدى (ٵيۇپ 34:12). الايدا ەحوبا جاۋلارىنىڭ قانداي ەكەنىن وتە جاقسى بىلەدى. الداعى ۋاقىتتا ولار تازا عيبادات ەتەتىندەردى جەك كورەتىنىن جانە ولاردى جەر بەتىنەن قۇرتىپ جىبەرۋدىڭ ورايى تۋعاندا مۇمكىندىكتى قالت جىبەرمەيتىنىن دە ول بىلەدى (جوح. 1-ح. 3:13). گوگتىڭ جاعىنا قارماق سالىپ جەتەكتەيتىنىندەي، ەحوبا وقيعالاردىڭ ٶز ەركى مەن بەلگىلەگەن ۋاقىتىنا ساي ٶربۋىن قاداعالايدى. ۇلى بابىل جويىلعان سوڭ ٴبىرشاما ۋاقىتتان كەيىن ەحوبا قانداي دا ٴبىر جولمەن حالىقتاردى كوكەيلەرىندە بۇرىننان جۇرگەن پيعىلدارىن ىسكە اسىرۋعا ەلىكتىرەدى. وسىلايشا ەحوبا ارماگەددونعا، جەر بەتىندەگى ەڭ ۇلى سوعىسقا، باستايتىن شابۋىلدىڭ جاسالۋىنا جاعداي جاسايدى. سودان كەيىن ول حالقىن قۇتقارىپ الادى، ٵرى ٶزىنىڭ بۇكىلالەمدىك بيلىگىن اسقاقتاتىپ، كيەلى ەسىمىن كيەلى ەتەدى (ەزەك. 38:23).
حالىقتار تازا عيباداتتى توناماق بولادى، سەبەبى ونى دا، ونى ۇستاناتىنداردى دا جەك كورەدى
19. گوگ نە ٷشىن تازا عيباداتتى توناماق بولادى؟
19 گوگتىڭ زۇلىم نيەتى ايان بولادى. حالىقتار «زۇلىم جوسپار قۇرادى». ولار ەحوباعا عيبادات ەتەتىندەرگە كوپتەن بەرى تىستەرىن قايراپ، جەك كورىپ كەلگەندىكتەن، «قابىرعامەن قورشالماعان، ىسىرمالى قاقپالارى دا جوق مەكەندەردە تۇراتىن»، دارمەنسىز بولىپ كورىنگەن ولاردى جويىپ جىبەرۋدىڭ امالىن ىزدەيدى. سونداي-اق ولاردىڭ «مول داۋلەتىن» «توناپ، ولجاعا قارىق بولۋدى» كوكسەيدى (ەزەك. 38:10—12). بۇل قانداي «داۋلەت»؟ بۇل — ەحوبانىڭ حالقىنىڭ رۋحاني داۋلەتى. تازا عيبادات — ٴبىزدىڭ جالعىز ەحوباعا ارنايتىن ەڭ قۇندى بايلىعىمىز. حالىقتار تازا عيباداتتى باعالى ساناعاندىقتان ەمەس، تازا عيباداتتىڭ ٶزىن دە، ونى ۇستاناتىنداردى دا جەك كورگەندىكتەن توناماق بولادى.
گوگتىڭ تازا عيباداتتى جويۋ ٷشىن قۇرعان «زۇلىم جوسپارى» بەكەرشىلىك بولادى (19-ابزاستى قاراڭىز)
20. گوگ رۋحاني ەلگە نەمەسە رۋحاني جۇماققا قالاي شابۋىلدايدى؟
20 گوگ رۋحاني ەلگە نەمەسە رۋحاني جۇماققا قالاي شابۋىلدايدى؟ حالىقتار ٴبىزدىڭ ماسىحشىلىك ٶمىر سالتىمىزدى جانە تازا عيباداتىمىزدى تىيماق بولۋى مۇمكىن. بۇل ٷشىن ولار رۋحاني اس-سۋ الىپ تۇرۋىمىزعا جانە بىرگە جينالۋىمىزعا كەدەرگى جاساۋى، قۇداي حابارىن قۇلشىنىسپەن جاريالاۋىمىزعا توسقاۋىل قويۋى جانە بىرلىگىمىزدى بۇزۋعا تىرىسۋى مۇمكىن. بۇلاردىڭ ٴبارى — رۋحاني جۇماقتى قۇرايتىن جايتتار. شايتاننىڭ ايداۋىمەن حالىقتار ەحوباعا تازا عيبادات ەتەتىندەردى دە، ولارمەن قوسا تازا عيباداتتىڭ ٶزىن دە جەر بەتىنەن قۇرتىپ جىبەرۋگە تىرىساتىن بولادى.
21. نەلىكتەن ٴبىز ەحوباعا الداعى جايتتاردى الدىن الا ەسكەرتكەنى ٷشىن ريزامىز؟
21 ماگوگ جەرىندەگى گوگتىڭ ٴتونىپ كەلە جاتقان شابۋىلى رۋحاني ەلدەگى عيبادات ەتۋشىلەردىڭ ەشقايسىسىن اينالىپ وتپەيدى. ٴبىز الداعى جايتتاردى الدىن الا ەسكەرتكەنى ٷشىن ەحوباعا قانشالىقتى ريزامىز دەسەڭىزشى! زور الاپات كەلگەنشە، تازا عيباداتتى بەرىك ۇستانۋعا ٵرى ونى ومىرىمىزدە باستى ورىنعا قويۋعا بەكىنەيىك. وسىلاي ەتەر بولساق، قايتا قالپىنا كەلگەن ەلىمىزدىڭ كوركەيۋىنە ٶز ۇلەسىمىزدى قوسامىز. سونداي-اق جۋىردا بولاتىن مىنا ٴبىر كەرەمەت جاعدايدىڭ كۋاسى بولامىز: ەحوبا ارماگەددوندا ٶز حالقىن جانە ٶز ەسىمىن قورعايتىن بولادى. بۇل جايىندا كەلەسى تاراۋدا كوبىرەك بىلەمىز.
^ 3-ابزاس وسى باسىلىمنىڭ كەلەسى تاراۋىندا ەحوبا ماگوگ جەرىندەگى گوگقا قاشان جانە قالاي قاھارىن توگەتىنى ٵرى مۇنىڭ تازا عيبادات ەتۋشىلەرگە قالاي اسەر ەتەتىنى قاراستىرىلادى.
^ 4-ابزاس 2015-جىلعى «كۇزەت مۇناراسىنىڭ» (حانزۇشا) 15-مامىرداعى سانىنان «وقىرمان ساۋالدارىن» (29، 30-ب.) قاراڭىز.
^ 8-ابزاس دانيال 11:45 تەن سولتۇستىك پاتشاسى قۇداي حالقىن نىساناعا الاتىندىعىن اڭعارۋعا بولادى. وندا وسى پاتشانىڭ ٶزىنىڭ «شاتىرلارىن ۇلى تەڭىز [جەرورتا تەڭىزى] بەن كورىكتى جەردەگى كيەلى تاۋدىڭ اراسىنا [كەزىندە قۇدايدىڭ عيباداتحاناسى تۇرعان ٵرى قۇداي حالقى عيبادات ەتكەن جەرگە] تىگەتىنى» ايتىلعان.
^ 9-ابزاس كيەلى كىتاپتا قۇداي حالقىن جويىپ جىبەرگىسى كەلەتىن ٴبىزدىڭ كەزىمىزدەگى «اسسيريالىقتار» تۋرالى دا ايتىلادى (ميحا 5:5). قۇداي حالقىنا جاسالاتىن ٴتورت شابۋىل دا، اتاپ ايتقاندا ماگوگ جەرىندەگى گوگ، سولتۇستىك پاتشاسى، جەرجۇزىنىڭ پاتشالارى مەن اسسيريالىقتار جاسايتىن شابۋىلدار ٵرتۇرلى اتپەن اتالعان ٴبىر شابۋىلعا نۇسقاسا كەرەك.
^ 10-ابزاس ايان 20:7—9 تارماقتاردا ايتىلعان «ماگوگ جەرىندەگى گوگتىڭ» كىم ەكەنىن ٴبىلۋ ٷشىن، وسى باسىلىمنىڭ 22-تاراۋىن قاراڭىز.
