باسقارۋشى كەڭەستىڭ حاتى
ەحوبانى سۇيەر قاۋىمعا!
1971-جىل «قۇداي ەسىمى» دەپ اتالاتىن وبلىستىق كونگرەسكە كەلگەندەر ٷشىن ەستەن كەتپەس جىل بولدى. وسى كونگرەستە جارىق كورگەن ادەبيەتتەر «ەشكىمنىڭ ٷش ۇيىقتاسا دا تۇسىنە كىرمەگەن». ٴبىر ەر باۋىرلاس سول باسىلىمداردىڭ بىرىنە قاتىستى بىلاي دەدى: «بولاشاقتا بولاتىن جايتتاردى تاماشا سۋرەتتەيتىن مۇنداي باسىلىم بۇرىن-سوڭدى بولماعان!» ونىڭ ايتقانى قانداي باسىلىم ەدى؟ بۇل — «حالىقتار مەنىڭ ەحوبا ەكەنىمدى بىلەدى. قالاي؟» دەگەن كىتاپ. بۇل كىتاپ نەگە سونشا تاڭ-تاماشا قالدىردى؟ سەبەبى وندا ەزەكيەل كىتابىنداعى بۇكىل ادامزاتتىڭ بولاشاعىنا اسەر ەتەتىن پايعامبارلىقتار جاڭاشا ٴتۇسىندىرىلدى.
«ەحوبا ەكەنىمدى بىلەدى» دەگەن بۇل كىتاپ جارىق كورگەلى بەرى قۇداي حالقىنىڭ سانى 5،1 ميلليوننان 8 ميلليونعا دەيىن قارقىنداپ ٶستى (يشايا 60:22). ەحوبانىڭ ميلليونداعان بۇل قىزمەتشىلەرى 900 دەن استام تىلدە سويلەيدى (زاك. 8:23). ولاردىڭ كوبىسى ەزەكيەل كىتابىنداعى پايعامبارلىقتار ەگجەي-تەگجەيلى تۇسىندىرىلەتىن كىتاپتى ەشقاشان زەرتتەپ كورمەگەن.
بۇعان قوسا، 1971-جىلدان بەرى جارىق جارقىراي تۇسكەندىكتەن، ٴبىزدىڭ كيەلى كىتاپتاعى كوپتەگەن شىندىقتارعا دەگەن تۇسىنىگىمىز كەڭەيە ٴتۇستى (ناق. س. 4:18). مىسالى، 1985-جىلى «باسقا قويلار» قۇدايدىڭ دوستارى رەتىندە ٵدىل دەپ جاريالانعانى انىق كورىنە باستادى (جوح. 10:16؛ ريم. 5:18؛ جاق. 2:23). ال «قويلار» مەن «سەركەلەردى» سوتتاۋ زور الاپاتتىڭ كەزىندە بولاتىنىن تەك 1995-جىلى عانا تۇسىندىك (مات. 24:21؛ 25:31، 32). بۇل جاڭا تۇسىنىكتەر ەزەكيەل كىتابىن الدەقايدا تەرەڭىرەك تۇسىنۋگە كومەكتەستى.
«ادام ۇلى، مەن ساعان كورسەتكەلى جاتقان نارسەلەردىڭ بارىنە مۇقيات قاراپ، ايتقاندارىمدى زەر سالىپ تىڭدا. ويتكەنى سەن مۇندا سول ٷشىن اكەلىندىڭ» (ەزەكيەل 40:4).
سوڭعى جىلدارى جارىق ودان بەتەر جارقىراي ٴتۇستى. مىسالى، يسانىڭ مىسالدارىن الساق، جاڭا تۇسىنىكتەردىڭ ارقاسىندا ولاردىڭ كوبىسى نەنى بىلدىرەتىنىن قازىر ٴبىز انىق تۇسىنەمىز. ٴبىز سول مىسالداردىڭ كەيبىرى قارقىنمەن جاقىنداپ كەلە جاتقان زور الاپاتتىڭ كەزىندە بولاتىن جايتتارعا نۇسقايتىنىن بىلدىك. تۋرا سول سياقتى، ٴبىزدىڭ ەزەكيەل كىتابىنداعى كەيبىر پايعامبارلىقتارعا قاتىستى تۇسىنىگىمىز دە وزگەردى. سولاردىڭ ىشىندە ماگوگ جەرىندەگى گوگ (38، 39-تاراۋ)، سياساۋىتى بار كىسىگە تاپسىرىلعان ٸس (9-تاراۋ)، قۋراپ قالعان سۇيەكتەرگە تولى اڭعار جانە ەكى تاياقتىڭ بىرىگۋى (37-تاراۋ) جايلى پايعامبارلىقتار بار. سوندىقتان ٴبىرتالاي جىل بۇرىن جارىق كورگەن «ەحوبا ەكەنىمدى بىلەدى» كىتابىندا جازىلعان تۇسىنىكتەر سايكەسىنشە وزگەردى.
سول سەبەپتەن دە، ٴسىرا، ەحوبانىڭ كوپتەگەن قىزمەتشىلەرىندە «ەزەكيەلدىڭ پايعامبارلىقتارىنا قاتىستى جاڭا تۇسىنىكتەردى قامتيتىن كىتاپ قاشان شىعادى؟» دەگەن سۇراق تۋىنداعان شىعار. «ەحوبا تازا عيباداتتى قالپىنا كەلتىردى!» دەگەن كىتاپ — ٴدال وسىنداي كىتاپ! جيىرما ەكى تاراۋدان تۇراتىن بۇل كىتاپتىڭ ٵر تاراۋىن وقىپ، ىشىندەگى تاماشا سۋرەتتەرىنە وي جۇگىرتكەن كەزدە، بۇل باسىلىمدى دايىنداۋ ٷشىن قانشاما تىڭعىلىقتى زەرتتەۋلەر جاسالعانىن كورىپ تاڭعالاسىز. ەحوبانىڭ ەزەكيەل كىتابىن نەگە جازدىرىپ قالدىرعانىن ٴتۇسىنۋ ٷشىن ٴبىز كوپ دۇعا ەتتىك، كوپ وي جۇگىرتتىك. اسىرەسە مىناداي سۇراقتارعا ەرەكشە نازار اۋداردىق: ەزەكيەلدىڭ زامانداستارى ەزەكيەل كىتابىنان نە ۇيرەندى؟ ال بۇگىندە ٴبىز نە نارسە ۇيرەنە الامىز؟ بولاشاقتا بولاتىن جايتتارعا قاتىستى قانداي پايعامبارلىقتار بار؟ ەزەكيەلدىڭ پايعامبارلىقتارىن بەينەلەر نە تۇپبەينەلەر دەپ قاراستىرۋىمىز كەرەك پە؟ بۇل سۇراقتاردىڭ جاۋابى ٴبارىمىز ٴسۇيىپ وقيتىن ەزەكيەل كىتابىن انىعىراق تۇسىنۋگە كومەكتەستى.
ەزەكيەل كىتابىن باستان-اياق وقۋ بارىسىندا ەحوبانىڭ ۇيىمىنىڭ كوكتەگى بولىگى ٴسىزدى ەرىكسىز تاڭ-تاماشا ەتەدى! سونداي-اق ۇنامدى تۇردە عيبادات ەتۋدى قالايتىن كوكتەگى جانە جەردەگى جاراتىلىستارى ٷشىن ەحوبانىڭ ورناتقان جوعارى نورمالارى دا ٴسىزدى تاڭعالدىرماي قويمايدى. «تازا عيبادات» كىتابى سىزگە ەحوبانىڭ ٶز حالقىنا جاساعان جانە جاقىن بولاشاقتا جاسايتىن بارلىق يگىلىكتەرىنە دەگەن ريزاشىلىعىڭىزدى ارتتىرادى. ٴسىز بۇل كىتاپتا اسىرەسە ەكى تاقىرىپقا قايتا-قايتا نازار اۋدارىلاتىنىن بايقايسىز. بىرىنشىدەن، ەحوباعا ۇنامدى بولۋ ٷشىن ٴبىز ونىڭ كىم ەكەنىن ٴبىلىپ، ونى الەمنىڭ ٵمىرشىسى رەتىندە مويىنداۋعا ٴتيىسپىز. ەكىنشىدەن، ٴبىز ەحوبانىڭ جوعارى نورمالارىنا ساي ٶمىر ٴسۇرىپ، وعان ۇنامدى تۇردە عيبادات ەتۋىمىز كەرەك.
ٴبىزدىڭ بار تىلەيتىنىمىز، وسى باسىلىم سىزگە ەحوباعا ونىڭ ۇلى دا كيەلى ەسىمى داڭقتالاتىنداي جولمەن عيبادات ەتۋگە دەگەن شەشىمىڭىزدى بەكەمدەي تۇسسە ەكەن! سونداي-اق بۇل كىتاپ ٴسىزدى بارلىق حالىقتار ەحوبانىڭ كىم ەكەنىن بىلەتىن كەزدى تالماي كۇتۋگە تالپىندىرعاي! (ەزەك. 36:23؛ 38:23).
سۇيىسپەنشىلىگى شەكسىز كوكتەگى اكەمىز ەحوبا سىزگە باتاسىن توگىپ، ەزەكيەل پايعامباردىڭ كيەلى رۋحتىڭ جەتەلەۋىمەن جازعان كىتابىن تۇسىنۋگە كومەكتەسە بەرسىن!
باۋىرلاستارىڭىز،
ەحوبا كۋاگەرلەرىنىڭ باسقارۋشى كەڭەسى
