22-تاراۋ
«قۇدايعا عيبادات ەت!»
ويباعدار: ەزەكيەل كىتابىنداعى باستى ويلارعا شولۋ، ٵرى ولاردىڭ بۇگىنگى جانە بولاشاقتاعى قولدانىسى
1، 2. ا) ٴبارىمىز قانداي سۇراقتىڭ الدىندا تۇرمىز؟ ٵ) ەلشى جوحان تابىنباق بولعاندا، ٴبىر پەرىشتە قالاي ارەكەت ەتتى؟
ٴبارىمىز مىنا ٴبىر ماڭىزدى سۇراقتىڭ الدىندا تۇرمىز: «مەن كىمگە عيبادات ەتەمىن؟» بالكىم، كوبىمىز: «ارينە، قۇدايعا. بۇل ايتپاسا دا تۇسىنىكتى عوي»،— دەرمىز. ٴبىراق بۇنى سوزبەن ايتىپ قانا قويۋ جەتكىلىكسىز. ٴبىزدىڭ كىمگە عيبادات ەتەتىنىمىزدى: ەحوبا قۇدايعا ما، جوق الدە شايتان ىبىلىسكە مە — مۇنى ىستەرىمىز كورسەتەدى.
2 شايتاننىڭ بار ەسىل-دەرتى — عيبادات. ونىڭ وسى ارام پيعىلى اسىرەسە يسانى ازعىرعان كەزدە ايان بولدى. وسى باسىلىمنىڭ 1-تاراۋىنان بىلگەنىمىزدەي، شايتان جەرجۇزىندەگى پاتشالىقتاردىڭ ٴبارىن يساعا ۇسىندى. ٴبىراق ٸبىلىس ەسەسىنە نە سۇرادى؟ ول يساعا: «ماعان ٴبىر رەت تابىن»،— دەدى (مات. 4:9). ال ەلشى جوحانعا ايان كورسەتكەن ٴبىر پەرىشتە مۇلدەم باسقاشا ارەكەت ەتتى (ايان 22:8، 9 وقىڭىز). جوحان اياعىنا جىعىلىپ، تابىنباق بولعاندا، قۇدايدىڭ بۇل رۋحاني ۇلى كىشىپەيىلدىلىكپەن: «بۇلاي ىستەمە!... قۇدايعا عيبادات ەت!»— دەدى.
3. ا) قولىمىزداعى باسىلىم قانداي ماقساتپەن شىعارىلعان؟ ٵ) قازىر ٴبىز نە قاراستىرامىز؟
3 پەرىشتەنىڭ جوعارىدا ايتقان سوزدەرىنە ساي، ەحوبا قۇدايعا عانا عيبادات ەتۋگە دەگەن شەشىمىمىزدى بەكەمدەي تۇسەيىك (مۇس. 5-ج. 10:20؛ مات. 4:10). قولىمىزداعى باسىلىم ٴدال وسى ماقساتپەن شىعارىلعان. قازىر وعان قىسقاشا شولۋ جاساپ، ەزەكيەلدىڭ تازا عيباداتقا قاتىستى پايعامبارلىقتارى مەن اياندارىنان نە بىلگەنىمىزگە توقتالايىق. سودان كەيىن جازبالاردىڭ كومەگىمەن بولاشاقتا ٵربىر ادامنىڭ ادالدىعىن سىنعا الاتىن سوڭعى سىناق جايلى قاراستىرامىز. تازا عيبادات تولىقتاي ٵرى ماڭگىلىككە قالپىنا كەلەتىن ۋاقىتتا كىمدەر ٶمىر سۇرەتىنىن وسى شەشۋشى سىناق انىقتايدى.
ەزەكيەل كىتابىنىڭ وزەكتى ٷش تاقىرىبى
4. ەزەكيەل كىتابىنىڭ وزەكتى ٷش تاقىرىبى قانداي؟
4 ەزەكيەل كىتابىنان ٴبىز تازا عيبادات جاي عانا راسىمدەردى ۇستانۋدان تۇرمايتىنىن بىلدىك. تازا عيبادات بىزدەن 1) ەحوباعا قالتقىسىز بەرىلگەندىك تانىتۋدى، 2) تازا عيباداتىمىزدا بىرلىك ساقتاۋدى جانە 3) وزگەلەرگە سۇيىسپەنشىلىك تانىتۋدى تالاپ ەتەدى. وسى باسىلىمدا تالقىلانعان پايعامبارلىقتار مەن اياندار وسى ٷش تاقىرىپقا قالاي باسا نازار اۋداراتىنىنا كوڭىل بۇرايىق.
1-تاقىرىپ: ەحوباعا قالتقىسىز بەرىلگەندىك تانىتۋ
5—9. ٴبىز ەحوباعا قالتقىسىز بەرىلگەندىك تانىتۋ جايلى نە بىلدىك؟
5 3-تاراۋ: * اينالاسىن كەمپىرقوساق قورشاعان جانە قۇدىرەتتى رۋحاني جاراتىلىستاردىڭ ۇستىندە وتىرعان ەحوبا جايلى ەرەكشە ايان مىنا ٴبىر بۇلتارتپاس شىندىقتى ۇعىندىرادى: تەك قۇدىرەتى شەكسىز قۇداي عانا ٴبىزدىڭ عيبادات ەتۋىمىزگە لايىق (ەزەك. 1:4، 15—28).
6 5-تاراۋ: اياندا ەحوبانىڭ عيباداتحاناسىنىڭ ارامدالعانى جاعا ۇستاتادى! بۇل ايان ەحوبانىڭ كوزىنەن ەشتەڭە تاسا ەمەس ەكەنىن انىق كورسەتەدى. حالقى وپاسىزدىق جاساپ، پۇتتارعا تابىنىپ كەتكەن جاعدايدا بۇل ونىڭ نازارىنان تىس قالمايدى. ٴتىپتى بۇنداي ىستەر ادامداردىڭ كوزىنەن تاسا جەردە جاسالسا دا، ەحوبا مۇنىڭ ٴبارىن كورەدى. بۇنداي ىستەر ونىڭ جانىنا باتادى، ٵرى سونىمەن اينالىساتىنداردى ول جازاسىز قالدىرمايدى (ەزەك. 8:1—18).
7 7-تاراۋ: «يسرايل ەلىن تابالاعان» حالىقتارعا شىعارىلعان ۇكىمنەن كورەتىنىمىزدەي، ەحوبا حالقىنا قيانات جاسايتىنداردى مىندەتتى تۇردە جاۋاپقا تارتادى (ەزەك. 25:6). ال يسرايلدىكتەردىڭ سول حالىقتارمەن ارالاسقانىنان مىناداي ماڭىزدى ساباق الامىز: ٴبىز ەحوباعا دەگەن ادالدىعىمىزدى بارىنەن جوعارى قويۋىمىز كەرەك. ەحوباعا عيبادات ەتپەيتىن تۋىستارىمىزعا جاعۋ ٷشىن ٴبىز ۇستانىپ جۇرگەن نورمالارىمىزدى ەشقاشان تومەندەتپەيمىز. سونداي-اق بايلىققا سەنىم ارتپايمىز جانە بەيتاراپتىعىمىزدان تايىپ، ەحوباعا عانا تيەسىلى ادالدىعىمىزدى ادامي ۇكىمەتتەرگە تانىتپايمىز.
8 13، 14-تاراۋ: بيىك تاۋدىڭ باسىندا ورنالاسقان عيباداتحانا تۋرالى اياننان بىلگەنىمىزدەي، ٴبىز ەحوبانىڭ باسقا قۇدايلاردان اسقاق ەكەنىن ٴتۇسىنىپ، ونىڭ جوعارى نورمالارىنا ساي ٶمىر سۇرۋگە ٴتيىسپىز (ەزەك. 40:1—48:35).
9 15-تاراۋ: ەحوبانىڭ يسرايل مەن ياھۋدانى جەزوكشەلەرگە تەڭەگەنى رۋحاني ازعىندىق ول ٷشىن قانشالىقتى جەركەنىشتى ەكەنىن ەسىمىزگە سالادى (ەزەك. 16، 23-تار.).
2-تاقىرىپ: تازا عيباداتىمىزدا بىرلىك ساقتاۋ
10—14. بۇل باسىلىمدا تازا عيباداتىمىزدا بىرلىك ساقتاۋىمىز كەرەكتىگىنە قالاي نازار اۋدارىلدى؟
10 8-تاراۋ: حالقىنا قامقور بولاتىن «ٴبىر باعۋشى» تاعايىندايتىنى تۋرالى ەحوبانىڭ ۋادەسى مىناعان نازار اۋدارادى: ٴبارىمىز يسانىڭ قول استىندا بىرلىك پەن تاتۋلىقتا قىزمەت ەتۋىمىز كەرەك (ەزەك. 34:23، 24؛ 37:24—28).
11 9-تاراۋ: قۇداي حالقىنىڭ بابىل تۇتقىندىعىنان ازات بولىپ، ٶز ەلدەرىنە ورالاتىنى جايلى پايعامبارلىقتاردىڭ استارىندا ەحوبانى قۋانتقىسى كەلەتىن ماسىحشىلەر ٷشىن ماڭىزدى حابار جاتىر. ەحوباعا تازا عيبادات ەتەتىندەر جالعان دىننەن شىعىپ، ونىڭ ارامدايتىن ىقپالىنان اۋلاق جۇرۋلەرى كەرەك. ٴتۇرلى ناسىلدەن، دىننەن، ەكونوميكالىق ٵرى الەۋمەتتىك جاعدايى ٵرتۇرلى ورتادان شىققانىمىزعا قاراماستان، قۇداي حالقى رەتىندە ٴبىزدى باسقالاردان ەرەكشە ەتىپ تۇرعان بىرلىگىمىزدى ساقتاۋىمىز كەرەك (ەزەك. 11:17، 18؛ 12:24؛ جوح. 17:20—23).
12 10-تاراۋ: قۋراپ قالعان سۇيەكتەرگە جان بىتكەنى تۋرالى ايان بىرلىككە كوڭىل بۇرادى. تازارعان ٵرى قالپىنا كەلگەن عيبادات ەتۋشىلەردىڭ اراسىندا بولىپ، ٴبىر اسكەر رەتىندە جۇمىلا ەڭبەكتەنۋ — نەتكەن زور مارتەبە! (ەزەك. 37:1—14).
13 12-تاراۋ: ەكى تاياقتىڭ بىرىگۋىنە قاتىستى پايعامبارلىق بىرلىككە ەرەكشە نازار اۋدارادى. مايلانعاندار مەن باسقا قويلاردىڭ وسى پايعامبارلىقتىڭ ورىندالۋىنا ۇلەس قوسىپ جاتقانى سەنىمىمىزدى قايرايدى. ٴدىني جانە ساياسي جاعىنان جىككە بولىنگەن وسى دۇنيەدە ٶمىر سۇرسەك تە، سۇيىسپەنشىلىك پەن ادالدىقتىڭ ارقاسىندا بىرلىگىمىز بۇزىلمايدى (ەزەك. 37:15—23).
14 16-تاراۋ: سياساۋىتى بار كىسى مەن قولدارىندا شوقپارى بار التى كىسى تۋرالى اياننىڭ استارىندا مىنانداي ماڭىزدى ەسكەرتۋ جاتىر: زور الاپاتتى تازا عيبادات ەتۋشىلەر رەتىندە وتكەرەتىندەر عانا قۇتقارىلۋ تاڭباسى قويىلاتىنداردىڭ قاتارىندا بولادى (مات. 24:21؛ ەزەك. 9:1—11).
3-تاقىرىپ: وزگەلەرگە سۇيىسپەنشىلىك تانىتۋ
15—18. نەگە ٴبىز ٵرى قاراي دا سۇيىسپەنشىلىك تانىتا بەرۋىمىز كەرەك جانە مۇنى قالاي ىستەي الامىز؟
15 4-تاراۋ: ٴتورت تىرشىلىك يەسى تۋرالى اياننان ەحوبانىڭ قاسيەتتەرى، سونىڭ ىشىندە ەڭ نەگىزگى قاسيەتى — سۇيىسپەنشىلىك جايلى بىلدىك. ٴسوزىمىز بەن ٸس-ارەكەتىمىزدەن سۇيىسپەنشىلىك ەسىپ تۇرسا، ٴبىزدىڭ قۇدايىمىز ەحوبا ەكەنىن كورسەتەمىز (ەزەك. 1:5—14؛ جوح. 1-ح. 4:8).
16 6، 11-تاراۋ: ەحوبا سۇيىسپەنشىلىكتىڭ قۇدايى بولعاندىقتان، ول ەزەكيەل سياقتى كۇزەتشىلەردى تاعايىنداپ وتىرعان. ەحوبا شايتاننىڭ جەردەگى بيلىگىنە بالتا شابىلعان كەزدە بىردە-ٴبىر ادام جويىلماسا ەكەن دەيدى (پەت. 2-ح. 3:9). ٴبىز بۇگىندەگى كۇزەتشىلەردىڭ ٸس-شاراسىن قولداۋ ارقىلى ەحوبانىڭ سۇيىسپەنشىلىگىن پاش ەتە الامىز (ەزەك. 33:1—9).
17 17، 18-تاراۋ: ەحوبا كوپ ادام ونىڭ راقىمىن ەلەمەيتىنىن جانە وعان عيبادات ەتەتىندەردى جويىپ جىبەرۋگە تىرىساتىنىن بىلەدى. «ماگوگ جەرىندەگى گوگ» شابۋىلداعان كەزدە، ەحوبانىڭ سۇيىسپەنشىلىگى وعان ادالدىق ساقتاپ جۇرگەن حالقىن قورعاۋعا قوزعاۋ سالادى. ٴبىز دە وزگەلەردى جاقسى كورگەندىكتەن، مۇمكىندىگىنشە كوپ ادامدى ەسكەرتۋگە تالپىنامىز. ٴبىز حالقىنا قىسىم جاسايتىنداردى ەحوبا جاقىندا جوياتىنىن ايتىپ ەسكەرتەمىز (ەزەك. 38:1—39:20؛ سال. 2-ح. 1:6، 7).
18 19، 20، 21-تاراۋ: تىرشىلىك دارىتاتىن وزەن جانە جەردىڭ ٴبولىنۋى تۋرالى ايانداردان ەحوبانىڭ ادامزاتقا دەگەن سۇيىسپەنشىلىگى انىق كورىنەدى. بۇل اياندار ەحوبانىڭ ٶز ۇلىن قۇرباندىققا بەرىپ، زور سۇيىسپەنشىلىك تانىتقانى قانداي يگىلىك اكەلگەنىن انىق كورسەتەدى. وسى قۇرباندىقتىڭ ارقاسىندا كۇنالارىمىز كەشىرىلەدى جانە قۇداي وتباسىنىڭ مۇشەلەرى رەتىندە كەمەلدى ٶمىردىڭ راقاتىن كورە الامىز. ادامدارعا دەگەن سۇيىسپەنشىلىگىمىزدى كورسەتۋدىڭ ەڭ باستى جولى — ۇلىنا سەنەتىندەرگە ەحوبانىڭ قانداي تاماشا بولاشاق دايىنداپ قويعانى جايلى وزگەلەرگە ايتۋ (ەزەك. 45:1—7؛ 47:1—48:35؛ ايان 21:1—4؛ 22:17).
اسقان كىشىپەيىلدىلىكتىڭ كورىنىسى
19. مىڭجىلدىق پاتشالىقتىڭ تۇسىندا يسا نە ىستەيدى؟ («سوڭعى سىناقتان ٶتۋ» دەگەن قورشاۋدى دا قاراڭىز.)
19 مىڭجىلدىق پاتشالىقتىڭ تۇسىندا يسا ومىردەن وتكەن سان ميللياردتاعان ادامدى قايتا ٴتىرىلتىپ، «ٶلىم» اتتى جاۋدىڭ اياۋسىز سالعان جاراسىن جازادى (قور. 1-ح. 15:26؛ مار. 5:38—42؛ ەل. ٸس. 24:15). تاريحقا ۇڭىلسەك، ونىڭ ٵربىر پاراعى ادامزاتتىڭ قايعىلى دا ازالى ومىرىنەن سىر شەرتەتىن وقيعالارعا تولى ەكەنىن كورەمىز. ال يسا وسى قاسىرەتتى وقيعالاردىڭ ٴبارىن ٶشىرىپ، قايتا تىرىلگەن ٵربىر ۇرپاقتىڭ ادامدارىنا ٶمىردى جاڭا پاراقتان باستاۋعا ٵرى ٶز تاريحتارىن تاماشا وقيعالارعا تولتىرۋعا مۇمكىندىك بەرەدى. يسا تولەم قۇرباندىعىن نەگىز ەتىپ، اۋرۋ، سوعىس، اپات پەن اشتىقتىڭ تيگىزگەن زاردابىن تۇگەلدەي جوق قىلادى. سونداي-اق ول بىزگە بار ازابىمىزدىڭ ٴتۇپتامىرىن — ادام اتادان مۇرا بولىپ قالعان كۇنانى — جويۋعا كومەكتەسەدى (ريم. 5:18، 19). يسا «ٸبىلىستىڭ ىستەرىن تالقانداپ»، تۇگىن قالدىرمايدى (جوح. 1-ح. 3:8). سودان كەيىن نە بولادى؟
قايتا تىرىلگەندەر ومىرلەرىن جاڭا پاراقتان باستايدى
20. يسا مەن 144 000 بيلەۋشى قالاي اسقان كىشىپەيىلدىلىك تانىتادى؟ (تاراۋدىڭ باسىنداعى سۋرەتتى قاراڭىز.)
20 قورىنتتىقتارعا 1-حات 15:24—28 وقىڭىز. بۇكىل ادامزات كەمەلدى ومىرگە جەتىپ، جەر بەتى ەحوبا و باستا نيەت ەتكەن جۇماققا اينالعاننان كەيىن، يسا مەن 144 000 بيلەۋشى اسقان كىشىپەيىلدىلىك تانىتادى: ولار پاتشالىقتى ەحوبانىڭ وزىنە تابىستايدى. مىڭ جىل بويى قۇزىرلارىندا بولعان بيلىكتى ولار ٶز ەرىكتەرىمەن تاپسىرادى. پاتشالىقتىڭ اكەلگەن بارلىق يگىلىكتەرى بولسا ماڭگىلىككە ۇلاساتىن بولادى.
سوڭعى سىناق
21، 22. ا) مىڭجىلدىقتىڭ سوڭىندا جەر بەتى قانداي بولادى؟ ٵ) ەحوبا شايتان مەن ونىڭ جىن-پەرىلەرىن نە ٷشىن بوساتادى؟
21 بۇدان كەيىن ەحوبا ٶزىنىڭ جەردەگى حالقىنا قانشالىقتى سەنىم ارتاتىنىن كورسەتىپ، ٴبىر جاعدايدىڭ ورىن الۋىنا جول بەرەدى. ول مىڭ جىل بويى ٴتۇپسىز تۇڭعيىقتا بولعان شايتان مەن ونىڭ جىن-پەرىلەرىن بوستاندىققا شىعارادى (ايان 20:1—3 وقىڭىز). ولاردىڭ بۇل جولى كورەتىن الەمى بۇرىنعىدان مۇلدەم وزگەشە بولادى. سەبەبى ارماگەددونعا دەيىنگى الەمدە ادامزاتتىڭ باسىم بولىگى شايتاننىڭ ارباۋىنا ەرىپ، جەككورۋشىلىك پەن الالاۋشىلىقتىڭ كەسىرىنەن جىك-جىككە ٴبولىنىپ كەتكەن بولاتىن (ايان 12:9). ال مىڭجىلدىقتىڭ سوڭىندا بۇكىل ادامزات ەحوباعا بىرلىگى جاراسقان ٴبىر وتباسىنداي عيبادات ەتەدى. جەر بەتى تاتۋلىقتىڭ نۇرىنا بولەنگەن جۇماققا اينالادى.
22 شايتان مەن ونىڭ جىن-پەرىلەرى سياقتى قىلمىسكەرلەردى ەحوبا تازارعان جەر بەتىنە نە ٷشىن بوساتادى؟ سەبەبى مىڭجىلدىقتىڭ سوڭىندا ٶمىر ٴسۇرىپ جاتقانداردىڭ اراسىندا ەحوباعا دەگەن ادالدىقتارى ەشقاشان سىنالماعان ادامدار بولادى. ولار ەحوبانى بىلمەي ومىردەن ٶتىپ، كەيىن جۇماقتا قايتا تىرىلگەندەر. ەحوبا ولاردى تىرىلتكەن كەزدە بارلىعىن رۋحاني جاعىنان دا، تاندىك جاعىنان دا قامقورلايدى. ولار جامان ورتا دەگەندى بىلمەي، تەك ەحوبانى سۇيەتىن ٵرى وعان عانا قىزمەت ەتەتىن ادامداردىڭ اراسىندا بولادى. شايتان ٵيۇپتىڭ نيەتىنە شەك كەلتىرگەندەي، بۇل ادامداردىڭ دا نيەتىنە شەك كەلتىرىپ، ولاردى قۇداي قورعاپ، باتاسىن توگىپ وتىرعاندىقتان عانا وعان قىزمەت ەتەدى دەپ ايىپتاۋى مۇمكىن (ٵيۇپ 1:9، 10). ەحوبا ەسىمىمىزدى ٶمىر كىتابىنا ٴبىرجولاتا جازباس بۇرىن، بىزگە اكەمىز ٵرى بيلەۋشىمىز رەتىندە وعان ادال ەكەنىمىزدى تولىق دالەلدەۋگە مۇمكىندىك بەرەدى (ايان 20:12، 15).
23. ٵربىر ادام قانداي تاڭداۋ الدىندا تۇراتىن بولادى؟
23 وزىنە بەرىلگەن قىسقا ۋاقىتتىڭ ىشىندە شايتان ادامزاتتى ازعىرىپ، ولاردى قۇدايدان بۇرىپ اكەتۋگە تىرىسادى. وسى سىناقتا ٵربىر ادام ادام مەن حاۋا سياقتى تاڭداۋ الدىندا تۇراتىن بولادى. ولار ەحوبانىڭ نورمالارىن مويىنداپ، بيلىگىن قولداپ، وعان عيبادات ەتەدى، يا بولماسا ەحوباعا قارسى شىعىپ، شايتاندى قولدايدى.
24. بۇلىك شىعاراتىندار نەگە «گوگ پەن ماگوگ» دەپ اتالادى؟
24 ايان 20:7—10 وقىڭىز. مىڭجىلدىقتىڭ سوڭىندا بۇلىك شىعاراتىندار «گوگ پەن ماگوگ» دەپ اتالادى. بۇل بۇلىكشىلەر ەزەكيەلدىڭ پايعامبارلىعىنداعى ادامدار، ياعني زور الاپاتتا قۇداي حالقىنا شابۋىلدايتىن ادامدار سياقتى ارەكەت ەتەدى. ەسىمىزدە بولسا، «ماگوگ جەرىندەگى گوگ» دەپ اتالعان سول توپ ەحوبانىڭ بيلىگىنە قارسى شىققان ٴتۇرلى حالىقتاردان تۇرعان ەدى (ەزەك. 38:2). ٴماسىحتىڭ بيلىگىنىڭ سوڭىندا بۇلىك شىعاراتىندار دا «حالىقتار» رەتىندە سۋرەتتەلگەن. بۇل — وتە قىزىقتى جايت. ويتكەنى مىڭجىلدىق بيلىكتىڭ تۇسىندا ەشكىم ەشقانداي حالىققا بولىنبەيدى. بارلىق ادامدار ٴبىر ۇكىمەتتىڭ، قۇداي پاتشالىعىنىڭ، ازاماتتارى بولىپ، ٴبىر رۋحاني حالىقتى قۇرايتىن بولادى. بۇل بۇلىكشىلەردىڭ ايان كىتابىندا «گوگ پەن ماگوگ» جانە «حالىقتار» دەپ اتالعانىنا قاراپ، شايتان قۇدايعا عيبادات ەتەتىن كەيبىر ادامداردىڭ اراسىنا ىرىتكى سالىپ، جىك-جىككە بولەتىنىن كورۋگە بولادى. ٴبىراق ەشكىم ەشكىمدى شايتاننىڭ جاعىنا شىعۋعا ماجبۇرلەمەيدى. ٵربىر كەمەلدى ادام ٶزى ٷشىن ٶزى تاڭداۋ جاسايدى.
«گوگ پەن ماگوگ» دەپ اتالاتىن بۇلىكشىلەر (24-ابزاستى قاراڭىز)
25، 26. شايتاننىڭ جاعىنا قانشا ادام شىعادى جانە ولارمەن نە بولادى؟
25 شايتاننىڭ جاعىنا قانشا ادام شىعادى؟ «ولاردىڭ سانى تەڭىز قۇمىنىڭ قيىرشىعىنداي» بولادى. بۇل سوزدەر ادامزاتتىڭ باسىم بولىگى بۇلىك شىعارادى دەگەندى بىلدىرمەيدى. نەگە بۇلاي دەيمىز؟ ەحوبانىڭ ىبىرايىمعا بەرگەن ۋادەسىن الايىقشى. ول ىبىرايىمنىڭ ۇرپاعى «تەڭىز جاعاسىنداعى قۇم قيىرشىقتارىنداي كوبەيەتىنىن» ايتقان (مۇس. 1-ج. 22:17، 18). دەسە دە ونىڭ ۇرپاعىن قۇرايتىنداردىڭ سانى بار بولعانى 144 001 بولدى (عال. 3:16، 29). ارينە، بۇل — كوپ سان. ٴبىراق بۇكىل ادامزاتتىڭ سانىنىڭ قاسىندا وتە از. تۋرا سول سياقتى، شايتاننىڭ جاعىنا شىعاتىنداردىڭ دا سانى سالىستىرمالى تۇردە سونشالىقتى كوپ بولمايدى. سوندىقتان بۇلىكشىلەر ەحوبانىڭ ادال قىزمەتشىلەرىنە اسا قاۋىپ توندىرە المايدى.
26 ەحوبا بۇلىك شىعارعانداردى تەز-اق قۇرتىپ جىبەرەدى. ولار شايتانمەن جانە ونىڭ جىن-پەرىلەرىمەن بىرگە ٴبىرجولا جويىلىپ كەتەدى. تەك ولاردىڭ جاساعان جامان تاڭداۋلارى مەن سونىڭ كەسىرىنەن تارتقان سالدارى عانا ماڭگىلىككە ەسىمىزدە قالاتىن بولادى (ايان 20:10).
27—29. سوڭعى سىناقتان ادال وتكەندەردى قانداي بولاشاق كۇتىپ تۇر؟
27 ال سوڭعى سىناقتان ادال وتكەندەردىڭ ەسىمدەرى «ٶمىر كىتابىنا» ٴبىرجولاتا جازىلادى (ايان 20:15). تەك ەحوبا عانا لايىق بولعاندىقتان، ونىڭ ادال ۇل-قىزدارىنىڭ ٴبارى ٴبىر وتباسى رەتىندە تەك وعان عانا عيبادات ەتەتىن بولادى.
28 ٴسىزدى بولاشاقتا قانداي تاماشا ٶمىر كۇتىپ تۇرعانىن ويلاپ كورىڭىزشى! ٴسىز ٵربىر ەڭبەگىڭىزدىڭ جەمىسىن كورەتىن بولاسىز، ىشكى الەمىڭىزدى بايىتاتىن دوستارىڭىز بولادى. ٶزىڭىز دە، جاقىندارىڭىز دا ەشقاشان قاسىرەت شەكپەيدى. بۇدان بىلاي ەحوبانىڭ الدىندا كەلىستىرۋشى ارقىلى ەمەس، كەمەلدى، كۇناسىز كۇيدە ٶزىڭىز تۇراتىن بولاسىز. ٵر ادامنىڭ قۇدايمەن دوستىعىنىڭ ەشبىر شەگى بولمايدى. بارىنەن دە ماڭىزدىسى — كوكتەگىلەر دە، جەردەگىلەر دە كەمەلدى تۇردە تازا عيبادات ەتەتىن بولادى. سول كەزدە تازا عيبادات تۇبەگەيلى قالپىنا كەلەدى!
كەمەلدىلىككە جەتكەندە، ەحوبانىڭ الدىندا ەشبىر كەلىستىرۋشىسىز، ٴمىنسىز كۇيدە ٶزىڭىز تۇراتىن بولاسىز (28-ابزاستى قاراڭىز)
29 وسى تاڭعاجايىپ ٶمىردى ٴسىز كورەسىز بە؟ ەگەر ەزەكيەل كىتابىنداعى نەگىزگى ٷش جايتتى ٵرى قاراي دا ىستەي بەرەر بولساڭىز، مىندەتتى تۇردە كورەسىز. ولار: 1) ەحوباعا قالتقىسىز بەرىلگەندىك تانىتۋ، 2) تازا عيباداتىمىزدا بىرلىك ساقتاۋ جانە 3) وزگەلەرگە سۇيىسپەنشىلىك كورسەتۋ. ەزەكيەلدىڭ پايعامبارلىقتارىنان تاعى ٴبىر اقىرعى ٵرى وتە ماڭىزدى جايتتى بىلەمىز. ول قانداي جايت؟
اقىرىندا كوكتەگى مەن جەردەگى جاراتىلىستاردىڭ ٴبارى بىرلىكتە تازا عيبادات ەتىپ، زور شاتتىققا كەنەلەدى (27—29-ابزاستاردى قاراڭىز)
«ەحوبا ەكەنىمدى بىلەتىن بولادى»
30، 31. ا) «ولار مەنىڭ ەحوبا ەكەنىمدى بىلەتىن بولادى» دەگەن سوزدەر قۇدايدىڭ جاۋلارى ٷشىن نەنى بىلدىرەدى؟ ٵ) ال قۇدايدىڭ حالقى ٷشىن نەنى بىلدىرەدى؟
30 ەزەكيەل كىتابىندا قۇدايدىڭ «ولار مەنىڭ ەحوبا ەكەنىمدى بىلەتىن بولادى» دەگەن سوزدەرى قايتا-قايتا كەزدەسەدى (ەزەك. 6:10؛ 39:28). بۇل سوزدەر قۇدايدىڭ جاۋلارى ٷشىن سوعىس پەن ٶلىمدى بىلدىرەدى. ولار ەحوبانىڭ بار ەكەنىن مويىنداپ قانا قويماي، ونىڭ ۇلى ەسىمىنىڭ «ول بولعىزادى» دەگەن ماعىناسىن تۇسىنۋگە ٴماجبۇر بولادى. «اسكەرباسى ەحوبا» جاۋلارىمەن «مىقتى جاۋىنگەر» رەتىندە شايقاسادى (سام. 1-ج. 17:45؛ مۇس. 2-ج. 15:3). ولار ەحوبا جايىندا مىنا ماڭىزدى شىندىقتى تىم كەش تۇسىنەدى: ەحوباعا ٶز نيەتىن جۇزەگە اسىرۋعا ەش نارسە كەدەرگى بولا المايدى.
31 ال قۇداي حالقى ٷشىن «ولار مەنىڭ ەحوبا ەكەنىمدى بىلەتىن بولادى» دەگەن سوزدەر بەيبىتشىلىك پەن ٶمىردى بىلدىرەدى. بولعىزۋشى قۇداي ەحوبا و باستاعى نيەتىنە ساي، ٴبىزدى ۇل-قىزدارى رەتىندە ونىڭ قاسيەتتەرىن كەمەلدى تۇردە تانىتاتىنداي ەتەدى (مۇس. 1-ج. 1:26). قازىردىڭ وزىندە ەحوبا ٴبىزدى اكەمىز رەتىندە جاقسى كورىپ، باعۋشىمىز رەتىندە قورعاپ ٴجۇر. ال الداعى ۋاقىتتا ول پاتشامىز رەتىندە جەڭىسكە جەتەتىن بولادى. سول ۋاقىت كەلگەنشە، ەزەكيەلدىڭ پايعامبارلىعىن جۇرەگىمىزگە توقىپ الىپ، ٵر كۇنى ەحوبانىڭ كىم ەكەنىن ٵرى ونىڭ قانداي ەكەنىن بىلەتىنىمىزدى سوزىمىزبەن دە، ىسىمىزبەن دە كورسەتە بەرەيىك. سوندا زور الاپات باستالعاندا، ەش قورىقپايتىن بولامىز. «قۇتقارىلۋىمىزدىڭ جاقىن» ەكەنىن بىلگەندىكتەن، ەڭسەمىزدى تۇزەپ، باسىمىزدى كوتەرىپ تۇرامىز (لۇقا 21:28). ال ازىرگە بارلىق ادامدارعا بارىپ، عيبادات ەتۋگە لايىق قۇدايدى ٵرى ەڭ ۇلى ەسىمنىڭ يەسى — ەحوبانى تانىپ-ٴبىلىپ، ونى جاقسى كورۋگە كومەكتەسە بەرەيىك (ەزەك. 28:26).
^ 5-ابزاس مۇنداعى تاراۋلار وسى باسىلىمنىڭ تاراۋلارىنا نۇسقايدى.
