8-تاراۋ
«ٴبىر باعۋشى تاعايىندايمىن»
ويباعدار: ٴماسىح جايلى ٴتورت پايعامبارلىق پەن ولاردىڭ ورىندالۋى
1—3. ەزەكيەلدىڭ جۇرەگىن سىزداتقان نە جانە ەحوبا وعان رۋحتىڭ جەتەلەۋىمەن نە جازدىردى؟
ەزەكيەلدىڭ بابىلعا جەر اۋدارىلعانىنا، مىنە، التىنشى جىل *. جىراقتا جاتقان تۋعان ەلى ياھۋداداعى بيلىكتىڭ مۇشكىل حالىن ويلاسا، پايعامباردىڭ جۇرەگى سىزداپ قويا بەرەدى. ول بىرنەشە پاتشانىڭ اۋىسقانىنا كۋا بولعان ەدى.
2 ەزەكيەل ادال پاتشا جوسيانىڭ تۇسىندا دۇنيەگە كەلگەن. جوسيا ياھۋدا جەرىن ٴتاڭىر مۇسىندەرىنەن تازارتىپ، تازا عيباداتتى قالپىنا كەلتىرۋگە كوپ كۇش سالعان ەدى. ەزەكيەل بۇل تۋرالى بىلگەندە، قۋانعان بولار (شەج. 2-ج. 34:1—8). ٴبىراق، وكىنىشكە قاراي، جوسيانىڭ جاساعان وزگەرىستەرى ۇزاققا سوزىلمادى. ويتكەنى ودان كەيىنگى پاتشالاردىڭ كوبىسى قايتادان پۇتتارعا تابىنىپ كەتتى. بۇل وپاسىز پاتشالاردىڭ تۇسىندا حالىق تا رۋحاني جاعىنان جانە مورالدىق جاعىنان ابدەن قۇلدىرادى. سوندا جاعداي مۇلدەم وڭالماي ما؟ ارينە، جوق!
3 ەحوبا ادال پايعامبارى ەزەكيەلگە رۋحىن قوندىرىپ، ٴبىرقاتار پايعامبارلىق جازدىردى. سولاردىڭ العاشقىسى ٴماسىح جايلى، ياعني تازا عيباداتتى ٴبىرجولاتا قالپىنا كەلتىرەتىن جانە ەحوبانىڭ قويلارىن ايالاپ قامقورلايتىن بيلەۋشى ٵرى باعۋشى جايىندا ەدى. ٴبىز بۇل پايعامبارلىقتاردى مەيلىنشە تەرەڭ زەرتتەگەنىمىز ٴجون. ويتكەنى ماڭگىلىك بولاشاعىمىز سولاردىڭ ورىندالۋىمەن تىكەلەي بايلانىستى. ولاي بولسا، قازىر ەزەكيەل كىتابىنداعى ٴماسىح جايلى ٴتورت پايعامبارلىققا توقتالايىق.
«جاس وسكىننىڭ» «كەرەمەت قاراعايعا» اينالۋى
4. ەزەكيەل ەحوبادان قانداي پايعامبارلىق الدى جانە بۇل پايعامبارلىق نەدەن باستالدى؟
4 شامامەن ب.ز.ب. 612-جىلى ەحوبا ەزەكيەلگە ٴماسىحتىڭ بيلىگى قانشالىقتى اۋقىمدى بولاتىنىن جانە ونىڭ پاتشالىعى نە ٷشىن سەنىم ارتۋعا تۇرارلىق ەكەنىن اڭعارتاتىن پايعامبارلىق بەردى. بۇل پايعامبارلىق ٴبىر جۇمباقتان باستالدى. جەر اۋدارىلعان حالىققا ايتىلعان بۇل جۇمباق ياھۋدا بيلەۋشىلەرىنىڭ وپاسىزدىعىن اشكەرەلەدى، سونداي-اق ٵدىل بيلەۋشى ماسىحكە دەگەن زارۋلىكتى كورسەتتى (ەزەك. 17:1، 2).
5. جۇمباقتىڭ مازمۇنى قانداي؟
5 ەزەكيەل 17:3—10 وقىڭىز. جۇمباقتىڭ مازمۇنى مىناداي: ٴبىر «ۇلكەن بۇركىت» قاراعاي اعاشىنىڭ باسىنداعى «ەڭ بيىك وسكەن بۇتاقشاسىن» سىندىرىپ الادى دا، ونى «ساۋداگەرلەردىڭ قالاسىنا» اپارىپ وتىرعىزادى. سوسىن بۇركىت «سول ەلدەن تۇقىم الىپ»، ونى سۋ جاعاسىنداعى قۇنارلى جەرگە ەگەدى. تۇقىم ٶسىپ، جايقالعان جۇزىمگە اينالادى. بۇدان كەيىن تاعى ٴبىر «ۇلكەن بۇركىت» شىعادى. الگى ٴجۇزىمنىڭ «سول بۇركىتكە اڭسارى اۋادى». ول تامىرىن سوعان قاراي سوزىپ، سۋى مول باسقا جەرگە وتىرعىزسا ەكەن دەپ اڭسايدى. سوندا ەحوبا ٴجۇزىمنىڭ بۇل ارەكەتىن ايىپتاپ، ونىڭ تامىرىمەن جۇلىنىپ، «تولىعىمەن قۋراپ» قالاتىنىن ايتادى.
ٴبىرىنشى ۇلكەن بۇركىت بابىل پاتشاسى ناۆۋحودونوسوردى بەينەلەدى (6-ابزاستى قاراڭىز)
6. جۇمباق نەنى بىلدىرەدى؟
6 بۇل جۇمباق نەنى بىلدىرەدى؟ (ەزەكيەل 17:11—15 وقىڭىز). ب.ز.ب. 617-جىلى بابىل پاتشاسى ناۆۋحودونوسور (ٴبىرىنشى ۇلكەن بۇركىت) يەرۋساليمدى قورشاۋعا الدى. ول ياھۋدا پاتشاسى ەحونيانى (ەڭ بيىك وسكەن بۇتاقشانى) تاعىنان ٴتۇسىرىپ، بابىلعا (ساۋداگەرلەردىڭ قالاسىنا) اكەتتى. ناۆۋحودونوسور سەدەكيانى (سول ەلدەن، ياعني ياھۋدادان العان پاتشا تۇقىمىن) يەرۋساليمدە پاتشا ەتىپ، تاققا وتىرعىزدى. ياھۋدانىڭ بۇل جاڭا پاتشاسى بابىلعا ادالدىقپەن باعىناتىنىن قۇداي اتىمەن انت ەتكەن ەدى (شەج. 2-ج. 36:13). الايدا سەدەكيا بەرگەن سەرتىن بۇزىپ، بابىلعا قارسى باس كوتەردى. ول مىسىر پەرعاۋىنىنان (ەكىنشى ۇلكەن بۇركىتتەن) قالىڭ اسكەر سۇرادى. ٴبىراق مۇنىسىنان تۇك شىقپادى. سوزىندە تۇرماعانى ٷشىن، ەحوبا سەدەكيانى جاۋاپقا تارتتى (ەزەك. 17:16—21). اقىر سوڭىندا سەدەكيا تاعىنان ايىرىلىپ، بابىلداعى تۇرمەدە ٶلىم قۇشتى (ەرم. 52:6—11).
7. پايعامبارلىق ٴمانى بار وسى جۇمباقتان قانداي ساباق الامىز؟
7 پايعامبارلىق ٴمانى بار وسى جۇمباقتان قانداي ساباق الامىز؟ بىرىنشىدەن، ٴبىز تازا عيبادات ەتۋشىلەر بولعاندىقتان، بەرگەن ۋادەمىزدە تۇرۋىمىز كەرەك. يسا: «سەندەردىڭ «ٴيا» دەگەندەرىڭ «ٴيا»، ال «جوق» دەگەندەرىڭ «جوق» بولسىن»،— دەگەن (مات. 5:37). مىسالى، سوت الدىندا كۋالىك ەتكەندە شىندىقتى ايتۋعا انت بەرسەك، بۇنداي انتىمىزعا نەمقۇرايدى قاراماعانىمىز ٴجون. ەكىنشىدەن، كىمگە سەنىم ارتاتىنىمىزعا مۇقيات بولۋىمىز قاجەت. كيەلى كىتاپ: «بەكزادالارعا ارقا سۇيەمەڭدەر، ەش قۇتقارا المايتىن ادام بالاسىنا دا سەنىم ارتپاڭدار»،— دەپ ەسكەرتەدى (ٴزاب. 146:3).
8—10. ەحوبا بولاشاق بيلەۋشى ٴماسىحتى قالاي سيپاتتادى جانە بۇل پايعامبارلىق قالاي ورىندالۋدا؟ («ٴماسىح تۋرالى پايعامبارلىق. كەرەمەت قاراعاي اعاشى» دەگەن قورشاۋدى دا قاراڭىز.)
8 الايدا ٴبىزدىڭ تولىق سەنىم ارتۋىمىزعا لايىق ٴبىر بيلەۋشى بار. ەحوبا باسقا جەرگە وتىرعىزىلعان بۇتاقشا جايلى ايتقاننان كەيىن، بولاشاق بيلەۋشى ٴماسىح جايلى پايعامبارلىقتى دا ٴدال سولاي جۇمباقتاپ ايتتى.
9 پايعامبارلىق (ەزەكيەل 17:22—24 وقىڭىز). بۇل پايعامبارلىقتا ارەكەت ەتۋشى جاق — ەندى ۇلكەن بۇركىتتەر ەمەس، ەحوبانىڭ ٶزى. ول «ٴبىر بيىك قاراعايدىڭ» جاس وسكىنىن سىندىرىپ الىپ، ونى «بيىك، اسقار تاۋدىڭ باسىنا» وتىرعىزادى. جاس وسكىن جايقالىپ ٶسىپ، «كەرەمەت قاراعايعا» اينالادى. ونى «ٵرتۇرلى قۇستار» پانالاپ، سايا تابادى. «دالا اعاشتارىنىڭ ٴبارى» وسى كەرەمەت اعاشتى جايقالتىپ وسىرگەن ەحوبانىڭ ٶزى ەكەنىن بىلەتىن بولادى.
10 ورىندالۋى. ەحوبا ٶزىنىڭ ۇلى يسا ٴماسىحتى ٴداۋىتتىڭ پاتشا اۋلەتىنەن (بيىك قاراعايدان) الىپ، كوكتەگى سيون تاۋىنا (بيىك، اسقار تاۋعا) وتىرعىزدى (ٴزاب. 2:6؛ ەرم. 23:5؛ ايان 14:1). وسىلاي ەحوبا جاۋلارى «ەڭ كىشىك ادام» دەپ قاراعان ۇلىنا «ارعى اتاسى ٴداۋىتتىڭ تاعىن سيلاپ»، ونى جوعارىلاتتى (دان. 4:17؛ لۇقا 1:32، 33). كەرەمەت قاراعاي اعاشىنا تەڭەلگەن پاتشا يسا ٴماسىح بولاشاقتا بۇكىل جەر بەتىنە كوكتەن بيلىك جۇرگىزىپ، كۇللى ازاماتتارىنا باتا جاۋدىرادى. ول سەنىم ارتۋعا تۇراتىن بيلەۋشى! يسانىڭ پاتشالىعىنىڭ ساياسىندا مويىنسۇنعىش ادامدار بۇكىل جەر شارى بويىنشا «قاۋىپسىز ٶمىر كەشەدى، ەشبىر پالەدەن قورىقپاي، الاڭسىز جۇرەدى» (ناق. س. 1:33).
11. «كەرەمەت قاراعايعا» اينالاتىن «جاس وسكىن» تۋرالى پايعامبارلىقتان نە ۇيرەنەمىز؟
11 ۇيرەنەرىمىز. «جاس وسكىننىڭ» «كەرەمەت قاراعايعا» اينالۋى جايىنداعى بۇل تاماشا پايعامبارلىق ٴبىزدىڭ كىمگە سەنىم ارتۋىمىز كەرەكتىگىن ناقتى كورسەتەدى. ٴبىزدىڭ ادامي ۇكىمەتتەردەن پانا ىزدەپ، ولاردىڭ اسكەري كۇشىنە ارقا سۇيەگەنىمىز ناعىز اقىماقتىق بولار ەدى. شىنىمەن قاۋىپسىز بولعىمىز كەلسە، پاتشا يسا ماسىحكە تولىق سەنىم ارتقانىمىز ابزال. ويتكەنى پاتشامىزدىڭ قۋاتتى قولىنداعى كوكتەگى ۇكىمەت — ادامزاتتىڭ جالعىز ٷمىتى (ايان 11:15).
ٴتاجدىڭ «زاڭدى يەسى»
12. ەحوبانىڭ داۋىتپەن جاساسقان كەلىسىمىن ۇمىتپاعانى نەدەن كورىندى؟
12 قۇداي ەكى بۇركىت جايلى جۇمباقتىڭ ٴمانىن اشىپ بەرگەن كەزدە، ەزەكيەل ٴداۋىت پاتشانىڭ اۋلەتىنەن شىققان سەدەكيا پاتشا تاجىنەن ايىرىلىپ، بابىلعا ايدالاتىنىن ٴتۇسىندى. سوندا پايعامبار: «قۇدايدىڭ داۋىتپەن جاساسقان كەلىسىمىمەن نە بولماق؟ قۇداي ونىڭ اۋلەتىنەن ٴبىر ۇرپاق شىعىپ، ماڭگى بيلىك ەتەتىنىن ۋادە ەتكەن جوق پا ەدى؟!»— دەپ ويلانعان شىعار (سام. 2-ج. 7:12، 16). ەزەكيەلدىڭ كوكەيىندە وسىنداي سۇراق تۋىنداعان بولسا، كوپ كۇتتىرمەي-اق ونىڭ جاۋابى بەلگىلى بولدى. شامامەن ب.ز.ب. 611-جىلى، ياعني ياھۋديلەردىڭ جەر اۋدارىلعانىنا جەتى جىل بولعاندا، ەحوبا ەزەكيەلگە قايتادان «ٴسوزىن ارنادى» (ەزەك. 20:2). بۇل كەزدە سەدەكيا پاتشا ياھۋدا ەلىندە ٵلى بيلىك ەتىپ وتىرعان ەدى. ەحوبا ەزەكيەلگە ماسىحكە قاتىستى تاعى ٴبىر پايعامبارلىق ايتىپ، داۋىتپەن جاساسقان كەلىسىمىن ەش ۇمىتپاعانىن كورسەتتى. بۇل پايعامبارلىق بولاشاق بيلەۋشى ٴماسىح ٴداۋىتتىڭ مۇراگەرى رەتىندە بيلىك ەتۋگە قۇقىلى ەكەنىن ايقىن ەتتى.
13، 14. ەزەكيەل 21:25—27 تارماقتاردا قانداي پايعامبارلىق جازىلعان، ٵرى ول قالاي ورىندالدى؟
13 پايعامبارلىق (ەزەكيەل 21:25—27 وقىڭىز). ەحوبا «يسرايلدىڭ زۇلىم باسشىسى» قالاي جازالاناتىنىن ەزەكيەل ارقىلى انىق تا ايقىن جەتكىزدى. ەحوبا ايتقانداي، بۇل باسشىنىڭ «شالماسى» مەن «ٴتاجى» (پاتشالىق بيلىكتىڭ سيمۆولى) ودان تارتىپ الىنباق ەدى. سودان كەيىن «تومەن تۇرعان» بيلەۋشىلەر جوعارىلاتىلىپ، ال «جوعارى تۇرعاندارى» تومەندەتىلمەك-ٴتىن. ٴبىراق جوعارىلاتىلعان بيلەۋشىلەر ٴتاجدىڭ «زاڭدى يەسى» كەلگەنشە عانا بيلىك ەتپەك ەدى. ەحوبا پاتشالىقتى سوعان تابىستايتىن بولادى.
14 ورىندالۋى. ب.ز.ب. 607-جىلى بابىلدىقتار يەرۋساليمدى قۇلاتىپ، تاجىنەن ايىرىلعان سەدەكيانى تۇتقىندىققا اكەتكەندە، يەرۋساليمدەگى ياھۋدانىڭ «جوعارى تۇرعان» پاتشالىعى تومەندەتىلدى. سول جىلدان باستاپ يەرۋساليمدە ٴداۋىت پاتشانىڭ اۋلەتىنەن ەشكىم بيلىك ەتپەدى. ال «تومەن تۇرعان» باسقا ۇلتتار بولسا جوعارىلاتىلىپ، ادامزاتقا ٶز بيلىگىن جۇرگىزدى. ٴبىراق ولاردىڭ بيلىگى شەكتەۋلى ۋاقىتقا عانا جالعاستى. «باسقا ۇلتتارعا بەلگىلەنگەن ۋاقىت» 1914-جىلى ەحوبا پاتشالىق بيلىكتى يسا ماسىحكە تابىستاعان كەزدە اياقتالدى (لۇقا 21:24). يسا ٴداۋىت پاتشانىڭ ۇرپاعى بولعاندىقتان، ٴماسىحتىڭ پاتشالىعىنىڭ «زاڭدى يەسى» ەدى * (مۇس. 1-ج. 49:10). وسىلاي ەحوبا ٴداۋىتتىڭ مۇراگەرى ماڭگىلىك پاتشالىق ەتەدى دەگەن نىق ۋادەسىن يسا ارقىلى ورىندادى (لۇقا 1:32، 33).
يسا — قۇداي پاتشالىعىنىڭ زاڭدى پاتشاسى (15-ابزاستى قاراڭىز)
15. پاتشامىز يسا ٴماسىح نەگە تولىق سەنىم ارتۋىمىزعا لايىق؟
15 ۇيرەنەرىمىز. پاتشامىز يسا ٴماسىح تولىق سەنىم ارتۋىمىزعا لايىق. سەبەبى ادامدار سايلايتىن نەمەسە بيلىكتى وزدەرى كۇشپەن تارتىپ الاتىن بيلەۋشىلەردەن ايىرماشىلىعى، يسانى تاڭداعان دا، زاڭدى يەسى رەتىندە وعان پاتشالىقتى بەرگەن دە — ەحوبانىڭ ٶزى (دان. 7:13، 14). مۇنداي پاتشا ٴبىزدىڭ تولىق سەنىم ارتۋىمىزعا ابدەن لايىق!
«قىزمەتشىم ٴداۋىت... ولارعا باعۋشى بولادى»
16. ەحوبا قويلارىنا قالاي قارايدى، ال «يسرايل باعۋشىلارى» قالاي قاراعان؟
16 ەڭ جوعارعى باعۋشى ەحوبا قويلارى ٷشىن، ياعني جەردەگى قىزمەتشىلەرى ٷشىن كوپ قام جەيدى (ٴزاب. 100:3). ول وتارىن جەردەگى كومەكشى باعۋشىلارعا سەنىپ تاپسىرىپ، ولاردىڭ قويلارعا قالاي قارايتىنىن ٴجىتى باقىلايدى. ەزەكيەلدىڭ زامانىندا بيلىك ەتكەن «يسرايل باعۋشىلارى» بولسا وتارعا «قاتىگەزدىكپەن ۇستەمدىك ەتىپ، قانادى». سونىڭ كەسىرىنەن قويلار ابدەن ازىپ-توزىپ، كوبىسى تازا عيباداتتى تاستاپ كەتتى. بۇل ەحوبانىڭ جانىنا قاتتى باتتى (ەزەك. 34:1—6).
17. ەحوبا قويلارىن قالاي قۇتقاردى؟
17 ەحوبا يسرايلدىڭ قاتىگەز بيلەۋشىلەرىمەن نە ىستەمەك ەدى؟ «ولاردى جاۋاپقا تارتامىن»،— دەدى ەحوبا. سوسىن: «مەن قويلارىمدى... قۇتقارامىن»،— دەپ ۋادە ەتتى (ەزەك. 34:10). ەحوبا ٵردايىم سوزىندە تۇرادى (ەشۋا 21:45). ول ب.ز.ب. 607-جىلى بابىل اسكەرى ارقىلى يسرايلدىڭ ٶزىمشىل باعۋشىلارىن بيلىكتەن شەتتەتىپ، ٶز قويلارىن قۇتقاردى. ال جەتپىس جىلدان كەيىن ەحوبا قوي تارىزدەس قىزمەتشىلەرىن بابىلدىڭ قولىنان دا قۇتقاردى. ولار تازا عيباداتتى قالپىنا كەلتىرە الۋلارى ٷشىن حالقىن وتانىنا قايتاردى. ٴبىراق ەحوبانىڭ قويلارى الەمدىك ۇكىمەتتەردىڭ قول استىندا قالا بەرگەندىكتەن، ولار ٵلى دە قورعانسىز ەدى. ويتكەنى «باسقا ۇلتتارعا بەلگىلەنگەن ۋاقىت» ٵلى ٴبىرتالاي عاسىرعا جالعاسپاق ەدى (لۇقا 21:24).
18، 19. يەرۋساليم جويىلعاننان كەيىن ٴبىر جىلداي ۋاقىت وتكەن سوڭ، ەزەكيەل قانداي پايعامبارلىق جازدى؟ (تاراۋدىڭ باسىنداعى سۋرەتتى قاراڭىز.)
18 يەرۋساليم جويىلعاننان كەيىن ٴبىر جىلداي ۋاقىت وتكەن سوڭ، ەڭ جوعارعى باعۋشى ەحوبا قويلارىنىڭ ماڭگىلىك بولاشاعى ٷشىن قام جەيتىنىن كورسەتىپ، ٴبىر پايعامبارلىق ايتتى. ەزەكيەلگە جازدىرعان بۇل پايعامبارلىقتا بولاشاق بيلەۋشى ٴماسىح ەحوبانىڭ قويلارىن قالاي باعاتىنى سۋرەتتەلەدى.
19 پايعامبارلىق (ەزەكيەل 34:22—24 وقىڭىز). «ولاردىڭ ۇستىنەن ٴبىر باعۋشى تاعايىندايمىن. ول قىزمەتشىم ٴداۋىت بولماق»،— دەدى ەحوبا. «ٴبىر باعۋشى»، «قىزمەتشىم» دەگەن سوزدەردىڭ جەكەشە تۇردە ايتىلۋى بولاشاق بيلەۋشى ٴداۋىت پاتشانىڭ تاعىندا ماڭگى وتىراتىن جالعىز مۇراگەر بولاتىنىنا نۇسقايدى. ٵرى باعۋشى، ٵرى بيلەۋشى بولاتىن بۇل مۇراگەر قۇدايدىڭ وتارىن باعىپ، ازىعىن بەرەدى، سونداي-اق «ولاردىڭ باسشىسى بولادى». ەحوبا ٶزىنىڭ قويلارىمەن «تاتۋلىق كەلىسىمىن جاساسادى». ول «باتالاردى جاۋىن سياقتى جاۋدىرىپ»، وتارى قاۋىپسىز ورتادا مولشىلىقتىڭ راقاتىن كورەدى. تاتۋلىق ادامدار اراسىندا عانا ەمەس، ادامدار مەن جانۋارلار اراسىندا دا ورنايدى (ەزەك. 34:25—28).
20، 21. ا) قۇدايدىڭ «ٴبىر باعۋشى تاعايىندايمىن، ول قىزمەتشىم ٴداۋىت بولماق» دەگەن پايعامبارلىعى قالاي ورىندالدى؟ ٵ) ەزەكيەلدىڭ «تاتۋلىق كەلىسىمى» تۋرالى پايعامبارلىعى بولاشاقتا قالاي ورىندالادى؟
20 ورىندالۋى. ەحوبا بۇل بيلەۋشىنى «قىزمەتشىم ٴداۋىت» دەپ اتاۋىمەن ٴداۋىتتىڭ ۇرپاعىنان شىعاتىن ٴتاجدىڭ زاڭدى يەسى يساعا نۇسقادى (ٴزاب. 89:35، 36). جەردە جۇرگەن كەزىندە يسا «قويلارى ٷشىن جانىن قيىپ»، ٶزىنىڭ «ىزگى باعۋشى» ەكەنىن دالەلدەدى (جوح. 10:14، 15). قازىر ول — كوكتەگى «ۇلى باعۋشى» (ەۆر. 13:20). 1914-جىلى ەحوبا يسانى پاتشا ەتىپ، وعان جەردەگى قويلارىن باعىپ، ولارعا ازىعىن بەرۋدى تاپسىردى. سودان كەيىن كوپ ۇزاماي، بيلىككە جاڭا كەلگەن پاتشا 1919-جىلى «ادال دا اقىلدى قۇلدى» تاعايىنداپ، ولارعا «ۇيىندەگى باسقا قۇلدارعا» — كوكتە نە جەردە ٶمىر سۇرۋگە ٷمىتى بار ادال قىزمەتشىلەرگە — اس-سۋ بەرۋدى تاپسىردى (مات. 24:45—47). ٴماسىحتىڭ جەتەلەۋىمەن ادال دا اقىلدى قۇل قۇدايدىڭ وتارىن رۋحاني اس-سۋمەن مولىنان قامتاماسىز ەتۋدە. وسى اس-سۋدىڭ ارقاسىندا ولار كۇننەن-كۇنگە گۇلدەنىپ جاتقان رۋحاني جۇماقتا تاتۋ-ٴتاتتى ٵرى قاۋىپسىز ٶمىر كەشۋدە.
21 «تاتۋلىق كەلىسىمى» مەن جاۋىن سياقتى جاۋاتىن باتالار تۋرالى ەزەكيەل ايتقان پايعامبارلىق بولاشاقتا قالاي ورىندالادى؟ الداعى جاڭا دۇنيەدە ەحوباعا تازا عيبادات ەتەتىن ادامدار «تاتۋلىق كەلىسىمىنىڭ» ارقاسىندا مولىنان توگىلەتىن باتالاردىڭ يگىلىگىن كورەدى. بۇكىل جەر بەتى جۇماققا اينالىپ، ادال ادامدار سوعىس، قىلمىس، اشارشىلىق، اۋرۋ-سىرقاۋ مەن جابايى اڭداردان بۇدان بىلاي زارداپ شەكپەيدى (يشايا 11:6—9؛ 35:5، 6؛ 65:21—23). بولاشاقتا قۇدايدىڭ قويلارى ماڭگى جاسايتىنى، «قاۋىپسىزدىكتە ٶمىر كەشەتىنى، ٵرى ولاردى ەشكىم قورقىتپايتىنى» جۇرەگىمىزگە جىلى تيەدى، سولاي ەمەس پە؟! (ەزەك. 34:28).
قۇدايدىڭ وتارىنا وزگەلەر قالاي قارايتىنىن كوكتەگى باعۋشى يسا ٴجىتى باقىلايدى (22-ابزاستى قاراڭىز)
22. يسا قويلارىنا قالاي قارايدى جانە كومەكشى باعۋشىلاردىڭ مىندەتىن اتقارىپ جۇرگەندەر وعان قالاي ەلىكتەسە بولادى؟
22 ۇيرەنەرىمىز. يسا دا اكەسى سياقتى قويلارىنىڭ قامىن ويلايدى. باعۋشى ٵرى پاتشا بولعاندىقتان، ول اكەسىنىڭ وتارى رۋحاني توقشىلىقتا ٴجۇرىپ، رۋحاني جۇماقتا تاتۋ ٵرى قاۋىپسىز بولۋلارى ٷشىن بار جاعدايدى جاسايدى. وسىنداي قامقور بيلەۋشىنىڭ قاراماعىندا بولۋ نەتكەن عانيبەت! كومەكشى باعۋشىلاردىڭ مىندەتىن اتقارىپ جۇرگەندەر دە يسا سياقتى، قويلاردىڭ قامىن ويلاۋ كەرەك. اقساقالدار قۇدايدىڭ وتارىن «شىن كوڭىلمەن، بار ىنتا-جىگەرمەن» باعىپ، ولارعا ۇلگى-ونەگە بولۋلارى كەرەك (پەت. 1-ح. 5:2، 3). ولار ەحوبانىڭ بىردە-ٴبىر قويىنا ٴجابىر كورسەتپەگەندەرى ٴجون. ەسىمىزدە بولسا، ەحوبا ەزەكيەلدىڭ كەزىندەگى يسرايلدىڭ قاتىگەز باعۋشىلارى جايىندا: «مەن... ولاردى جاۋاپقا تارتامىن»،— دەگەن بولاتىن (ەزەك. 34:10). راسىندا دا، ەڭ جوعارعى باعۋشى قويلارىنا وزگەلەر قالاي قاراپ جاتقانىن ٴجىتى باقىلايدى. ونىڭ ۇلى دا ٴدال سولاي ەتەدى.
«قىزمەتشىم ٴداۋىت ماڭگىلىككە ولاردىڭ باسشىسى بولادى»
23. ەحوبا يسرايل حالقىنا قاتىستى قانداي ۋادە بەردى جانە سول ۋادەسىن قالاي ورىندادى؟
23 ەحوبا قىزمەتشىلەرىنىڭ بىرلىكتە عيبادات ەتكەندەرىن قالايدى. حالقىنىڭ بىرلىگىن قالپىنا كەلتىرەتىنى جايلى پايعامبارلىعىندا ەحوبا ەكى رۋلى ياھۋدا پاتشالىعى مەن ون رۋلى يسرايل پاتشالىعىنا نۇسقاپ: «ەكەۋى مەنىڭ قولىمدا ٴبىرتۇتاس تاياق بولادى»،— دەگەن. وسىلاي ولاردى بىرىكتىرىپ، قايتادان «ٴبىر حالىق ەتەتىنىن» ۋادە ەتتى (ەزەك. 37:15—23). بۇل پايعامبارلىق ب.ز.ب. 537-جىلى قۇداي يسرايل حالقىن ۋادە ەتىلگەن جەرگە قايتارىپ، ارالارىندا بىرلىك ورناتقاندا ورىندالدى *. الايدا بۇل بولاشاقتا عالامات كولەمدە ورنايتىن مىزعىماس بىرلىكتىڭ نىشانى عانا ەدى. يسرايلدىڭ باسىن بىرىكتىرەتىنىن ۋادە ەتكەن سوڭ، ەحوبا بولاشاق بيلەۋشىنىڭ جەرجۇزى بويىنشا شىنايى عيبادات ەتۋشىلەردىڭ اراسىندا ماڭگىلىك بىرلىك ورناتاتىنىن پايعامبارلىق ەتتى.
24. ەحوبا بولاشاق بيلەۋشى ٴماسىحتى قالاي سيپاتتادى جانە بۇل پاتشانىڭ بيلىگى قانداي بولادى؟
24 پايعامبارلىق (ەزەكيەل 37:24—28 وقىڭىز). ەحوبا بيلەۋشى ماسىحكە نۇسقاپ، ونى تاعى دا «قىزمەتشىم ٴداۋىت»، «باعۋشى»، «باسشى» دەپ اتادى. ٴبىراق بۇل جولى ەحوبا ونى «پاتشا» دەپ تە اتادى (ەزەك. 37:22). بۇل پاتشانىڭ بيلىگى قانداي بولادى؟ ونىڭ بيلىگى ماڭگى تۇرادى. «ماڭگى باقي»، «ماڭگىلىككە» دەگەن سوزدەر ونىڭ تۇسىندا توگىلەتىن باتالار ەشقاشان بىتپەيتىنىن بىلدىرەدى *. بۇل پاتشانىڭ بيلىگى بىرلىك اكەلەدى. ادال ازاماتتارى «ٴبىر پاتشاعا» باعىنىپ، ٴبىر «شەشىمدى ۇستانىپ»، جەر بەتىندە بىرلىكتە ٶمىر سۇرەدى. بۇل پاتشانىڭ تۇسىندا ازاماتتارى ەحوبا قۇدايعا جاقىن بولا تۇسەدى. قۇداي ولارمەن «تاتۋلىق كەلىسىمىن جاساسادى». ەحوبا ولاردىڭ قۇدايى، ال ولار ونىڭ حالقى بولادى. ونىڭ «عيباداتحاناسى ارالارىنا ماڭگىگە ورنايدى».
25. پاتشا ٴماسىح تۋرالى پايعامبارلىق قالاي ورىندالدى؟
25 ورىندالۋى. 1919-جىلى مايلانعان ادال ماسىحشىلەر وزدەرىنىڭ «باعۋشىسى» — ۋادە ەتىلگەن پاتشا يسا ٴماسىحتىڭ قول استىنا بىرىكتى. كەيىنىرەك «ٵربىر ۇلتتان، رۋدان، حالىقتان جانە تىلدەن شىققان» ۇلى جاماعات وسى مايلانعان باۋىرلاستارىنا قوسىلدى (ايان 7:9). ٴسۇيتىپ، بارلىعى «ٴبىر باعۋشىسى بار ٴبىر وتار بولدى» (جوح. 10:16). كوكتە نە جەردە ٶمىر سۇرۋگە ۇمىتتەنبەسىن، ولاردىڭ ٴبارى ەحوبانىڭ «شەشىمدەرىنە»، ياعني زاڭدارىنا مويىنسۇنادى. سونىڭ ارقاسىندا ولار بىرلىگى جاراسقان ٴبىرتۇتاس حالىق بولىپ، رۋحاني جۇماقتا بىرگە ٶمىر كەشۋدە. ەحوبا باتاسىن بەرگەنىنىڭ ارقاسىندا ولاردىڭ اراسىندا تاتۋلىق پەن «عيباداتحانا»، ياعني تازا عيبادات بار. ەحوبا ولاردىڭ قۇدايى، ال ولار ونىڭ عيبادات ەتۋشىلەرى. ولار ەحوباعا قىزمەت ەتەتىندەرىن قازىر دە، ماڭگىلىك بويى دا ماقتان ەتە بەرمەك!
26. رۋحاني جۇماقتاعى بىرلىگىمىزگە قالاي ۇلەس قوسا الاسىز؟
26 ۇيرەنەرىمىز. ەحوباعا تازا عيبادات ەتەتىن دۇنيەجۇزىندەگى باۋىرلاستارمەن بىرلىكتە بولۋ نەتكەن مارتەبە! الايدا بۇل جاۋاپكەرشىلىك تە جۇكتەيدى: ٴبىز وسى ىنتىماق-بىرلىكتى ساقتاۋعا ۇلەس قوسۋىمىز قاجەت. نانىم-سەنىمىمىز دە، ٴجۇرىس-تۇرىسىمىز دا بىردەي بولۋ ٷشىن ٴبىز ٶز تاراپىمىزدان كۇش سالۋىمىز كەرەك (قور. 1-ح. 1:10). سول سەبەپتەن دە ٴبىز ٴبىر رۋحاني اس-سۋ قابىلدايمىز، جازبالارداعى ٴبىر نورمالاردى ۇستانامىز جانە ٴبىر ماڭىزدى ىسكە، ياعني پاتشالىقتى ۋاعىزداۋ مەن شاكىرت دايىنداۋ ىسىنە اتسالىسامىز. دەسە دە ٴبىزدىڭ بىرلىگىمىزدىڭ نەگىزگى قازىعى — سۇيىسپەنشىلىك. سۇيىسپەنشىلىكتىڭ كەشىرىمشىلدىك، جاناشىرلىق، مەيىرىمدىلىك سياقتى ٴتۇرلى قىرلارىن دامىتىپ، ٸس جۇزىندە تانىتساق، بىرلىگىمىز ودان سايىن مىعىم بولادى. ويتكەنى سۇيىسپەنشىلىك «ادامداردى تولىقتاي بىرىكتىرەدى» (قول. 3:12—14؛ قور. 1-ح. 13:4—7).
ەحوبا سۇيىسپەنشىلىككە بولەنگەن دۇنيەجۇزىلىك باۋىرلاستىققا باتاسىن توگۋدە (26-ابزاستى قاراڭىز)
27. ا) ەزەكيەل كىتابىنداعى ماسىحكە قاتىستى پايعامبارلىقتار سىزگە قالاي اسەر ەتتى؟ ٵ) كەلەسى تاراۋلاردا نە قاراستىرامىز؟
27 ەزەكيەل كىتابىندا جازىلعان ٴماسىح تۋرالى پايعامبارلىقتارعا قانشالىقتى ريزامىز دەسەڭىزشى! سولاردى وقىپ، وي جۇگىرتەتىن بولساق، پاتشامىز ٴماسىح يسانىڭ تولىق سەنىم ارتۋعا لايىق ەكەنىنە، بيلىك ەتۋگە قۇقىلى ەكەنىنە، ٴبىزدى قامقورلىقپەن باعاتىنىنا جانە ارامىزداعى بىرلىكتى ماڭگىلىك بويى ساقتايتىنىنا كوزىمىز جەتە تۇسەدى. وسىنداي پاتشانىڭ ازاماتى بولۋ ٴبىز ٷشىن زور مارتەبە! مىنانى ۇمىتپايىق: ٴماسىح تۋرالى بۇل پايعامبارلىقتار — ەزەكيەل كىتابىندا ٶربيتىن نەگىزگى تاقىرىپتىڭ، ياعني قۇدايدىڭ قالپىنا كەلتىرۋ شاراسىنىڭ اجىراماس بولىگى. سەبەبى ەحوبا ٶز حالقىن بىرگە جيناپ، ارالارىندا تازا عيباداتتى قايتا قالپىنا كەلتىرۋ ٷشىن يسا ٴماسىحتى قولدانۋدا (ەزەك. 20:41). كەلەسى تاراۋلاردا ٴبىز بۇل كەرەمەت تاقىرىپتىڭ ەزەكيەل كىتابىندا قالاي ٶربيتىنىن كورەمىز.
^ 1-ابزاس ياھۋديلەر تۇتقىندا بولعان كەزەڭ ب.ز.ب. 617-جىلى، ياعني العاشقى تۇتقىندار بابىلعا اكەتىلگەن جىلى باستالدى. دەمەك، مۇنداعى التىنشى جىل — ب.ز.ب. 612-جىل.
^ 14-ابزاس يسانىڭ داۋىتتەن تاراعانىن كيەلى كىتاپتاعى كيەلى رۋحتىڭ جەتەلەۋىمەن جازىلعان شەجىرە ايعاقتايدى (مات. 1:1—16؛ لۇقا 3:23—31).
^ 23-ابزاس ەزەكيەلدىڭ ەكى تاياق جايىنداعى پايعامبارلىعى مەن ونىڭ ورىندالۋى وسى كىتاپتىڭ 12-تاراۋىندا قاراستىرىلادى.
^ 24-ابزاس ٴبىر ەڭبەككە ساي، ەۆرەي تىلىنەن اۋدارىلعان «ماڭگى باقي»، «ماڭگىلىك» دەگەن سوزدەردىڭ «اۋىسپايتىن»، «تۇراقتى»، «شەكسىز»، «مىزعىماس بەرىك» دەگەن ماعىنالارى دا بار.
