9-تاراۋ
«مەن ولارعا ٴبىرتۇتاس جۇرەك بەرەمىن»
ويباعدار: قۇدايدىڭ قايتا قالپىنا كەلتىرۋ شاراسى جانە سول تۋرالى پايعامبارلىقتاردىڭ ەزەكيەل كىتابىندا ٶربۋى
1—3. بابىلدىقتار ەحوبانىڭ قىزمەتشىلەرىن قالاي كەلەكە-مازاق ەتكەن جانە نەگە؟
ٶزىڭىزدى ٴبىر ساتكە بابىلدا تۇرىپ جاتقان ياھۋدي سياقتى ەلەستەتىپ كورىڭىزشى. حالقىڭىزدىڭ جەر اۋدارىلعانىنا، مىنە، جارتى عاسىرداي ۋاقىت بولدى. ٴسىز ادەتتەگىدەي دەمالىس كۇنى باسقا دا ادال ياھۋديلەرمەن بىرگە ەحوباعا عيبادات ەتۋ ٷشىن كەزدەسۋگە بارا جاتىرسىز. ىعى-جىعى كوشەلەرمەن ٴجۇرىپ، ۇلكەن عيباداتحانالار مەن سانسىز كوپ قاسيەتتى ورىنداردىڭ قاسىنان وتەسىز. سول جەرلەردە ادامدار ابىر-سابىر بولىپ، ماردۋك سياقتى تاڭىرلەرىنە قۇرباندىقتار شالىپ، ماداقتاۋ اندەرىن ايتىپ جاتىر.
2 سول ادامداردان جىراق كەتىپ، وقشاۋ ٴبىر جەردە كىشكەنتاي توپپەن قاۋىشاسىز *. قالاداعى سۋ كانالدارىنىڭ بىرىنە كەلىپ، جاعاسىندا ٴبارىڭىز بىرگە دۇعا ەتىپ، ماداق جىرلارىن ايتىپ، قۇداي سوزىنە وي جۇگىرتىپ وتىرسىزدار. دۇعا ايتىلىپ جاتقاندا، جاعالاۋداعى قايىقتاردىڭ سىقىرلاعان دىبىسى عانا ەستىلەدى. ٴسىز وسىنداي تىپ-تىنىش جەر تابىلعانىنا ىشتەي قۋانىپ قوياسىز. ٴبىراق جەرگىلىكتى بىرەۋلەر بايقاپ قالىپ، ادەتتەگىدەي كەزدەسۋدىڭ بەرەكەسىن قاشىرىپ جۇرمەسە ەكەن دەگەن ۋايىمىڭىز دا بار. سوندا ولار كەزدەسۋدى نە ٷشىن بۇزعىسى كەلەدى؟
3 بابىلدىقتار كوپتەگەن سوعىستاردا جەڭىسكە جەتىپ، تالاي جاۋلارىن تىزە بۇكتىرگەن. ولار سونىڭ ٴبارى ٶز تاڭىرلەرىنىڭ ارقاسى دەپ بىلەدى. ال ەندى ولار يەرۋساليمنىڭ جەرمەن-جەكسەن بولعانىنا قاراپ تاڭىرلەرى ماردۋك ەحوبادان الدەقايدا كۇشتى دەگەنگە سەنىمدى. سول ٷشىن دە ولار ٴسىزدىڭ قۇدايىڭىزدى دا، ونىڭ حالقىن دا كۇلكى-مازاق ەتەدى. كەيدە مىسقىلداپ: «سيوننىڭ ٴبىر ٵنىن شىرقاپ بەرىڭدەر»،— دەپ تالاپ ەتەدى (ٴزاب. 137:3). ٴزابۇر جىرلارىنىڭ كوبىسى سيوننىڭ جەڭىسى، ياعني ەحوبانىڭ جاۋلارىن تالقانداعان يەرۋساليمنىڭ جەڭىسى جايلى. بابىلدىقتار اسىرەسە سول جىرلاردى كەلەكە ەتكەندى ۇناتاتىن ٴتارىزدى. ونىڭ ۇستىنە، باسقا جىرلاردا بابىلدىقتاردىڭ وزدەرى جايىندا ايتىلادى. سولاردىڭ بىرىندە بىلاي دەلىنگەن: «ۇلتتار... يەرۋساليمدى ٴبىر توبە ۇيىندىگە اينالدىردى... ماڭايىمىزداعىلار مازاقتاپ، كۇلكى ەتتى» (ٴزاب. 79:1، 3، 4).
4، 5. ەزەكيەل ٷمىت بەرەتىن قانداي پايعامبارلىق جازعان جانە وسى تاراۋدا نەنى قاراستىرامىز؟ (تاراۋدىڭ باسىنداعى سۋرەتتى قاراڭىز.)
4 بابىلدىقتار از بولعانداي، جولدان تايعان ياھۋديلەر دە ەحوبا مەن ونىڭ پايعامبارلارىنا دەگەن سەنىمىڭىزدى كۇلكىگە اينالدىرىپ، مازاق ەتەدى. سونىڭ بارىنە قاراماستان، ٶزىڭىز دە، وتباسىڭىز دا تازا عيبادات ەتۋدەن جۇبانىش تاۋىپ جۇرسىزدەر. باۋىرلارىڭىزبەن بىرگە دۇعا ەتىپ، بىرگە ماداق اندەرىن شىرقاۋ كوڭىلىڭىزدى مارقايتادى. ال قۇداي ٴسوزىن وقۋ جانىڭىزعا جاي بەرەدى (ٴزاب. 94:19؛ ريم. 15:4). بۇگىن توبىڭىزداعى بىرەۋ كەزدەسۋگە ٴبىر شيىرشىق الا كەلىپتى. وندا ەزەكيەلدىڭ پايعامبارلىقتارى جازىلىپتى. وسى پايعامبارلىقتار وقىلىپ جاتقاندا، ەحوبانىڭ ٶز حالقىن وتانىنا قايتاراتىنى جايلى ۋادەسىن ەستيسىز. بۇل ۋادە قۇلاعىڭىزعا مايداي جاعىپ بارادى. كۇندەردىڭ كۇنىندە وتباسىڭىزبەن بىرگە ٶز ەلىڭىزگە ورالىپ، قايتا قالپىنا كەلتىرۋ شاراسىنا ۇلەس قوساتىنىڭىزدى ويلاساڭىز، جۇرەگىڭىز تەبىرەنىپ قويا بەرەدى.
5 ەزەكيەل ايتقان پايعامبارلىقتار قۇدايدىڭ قايتا قالپىنا كەلتىرۋ شاراسى جايلى ۋادەلەرگە تۇنىپ تۇر. قازىر سولارعا ٴبىراز توقتالايىق. بۇل ۋادەلەر جەر اۋدارىلعان ياھۋديلەردىڭ كەزىندە قالاي ورىندالدى؟ ال ٴبىزدىڭ زامانىمىزعا قانداي قاتىسى بار؟ بۇدان بولەك كەيبىر پايعامبارلىقتاردىڭ بولاشاقتا اقىرعى رەت ورىندالاتىنىنا دا توقتالامىز.
«ولار جەر اۋدارىلىپ، تۇتقىن بولادى»
6. ەحوبا بۇلىكشىل حالقىن قالاي ەسكەرتىپ وتىردى؟
6 ەحوبا حالقىن بۇلىكشىلدىگى ٷشىن قالاي جازالايتىنىن ەزەكيەل ارقىلى انىق ايتتى. ەحوبا: «ولار جەر اۋدارىلىپ، تۇتقىن بولادى»،— دەدى (ەزەك. 12:11). وسى كىتاپتىڭ 6-تاراۋىنان بىلگەنىمىزدەي، ەزەكيەل بۇل ۇكىمدى ٴتىپتى قويىلىم رەتىندە كورسەتكەن. الايدا مۇنداي ەسكەرتۋلەر ٴبىرىنشى رەت ايتىلىپ جاتقان جوق-تىن. ەحوبا سوناۋ مۇسانىڭ كەزىنەن باستاپ، ياعني وسىدان شامامەن مىڭ جىل بۇرىن حالقىن ەسكەرتىپ، بۇلىكشىل، قىڭىر بولۋلارىن قويماسا، تۇبىندە وزگە ەلگە ايدالاتىندارىن ايتقان (مۇس. 5-ج. 28:36، 37). مۇنداي ەسكەرتۋلەردى يشايا مەن ەرەميا پايعامبارلار دا ايتقان (يشايا 39:5—7؛ ەرم. 20:3—6).
7. ەحوبا حالقىن قالاي جازالادى؟
7 ٴبىراق بۇل ەسكەرتۋلەردى حالىق قۇلاعىنا ىلمەدى. بۇعان ەحوبانىڭ جۇرەگى قاتتى اۋىردى. جامان باعۋشىلاردىڭ ىقپالىمەن حالىق بۇلىك شىعارىپ، وپاسىزدىق جاساپ، پۇتتارعا تابىنىپ، ابدەن ٴبۇلىندى. سوندىقتان ەحوبا ولاردى اشتىققا ۇشىراتتى. «اعى مەن بالى اعىل-تەگىل مول» جەردە اشتىقتان ازاپ شەككەنى حالىق ٷشىن ناعىز ماسقارا ەدى، ٵرى وسىدان ولاردىڭ قۇدايدىڭ ىقىلاسىنان ايىرىلعانى انىق كورىندى (ەزەك. 20:6، 7). ٴسۇيتىپ، ٶزى ۇزاق ۋاقىت بۇرىن ەسكەرتكەندەي، ەحوبا قىڭىر حالقىنىڭ جەر اۋدارىلىپ كەتۋىنە جول بەردى. ب.ز.ب. 607-جىلى بابىل پاتشاسى ناۆۋحودونوسور يەرۋساليمگە سوڭعى رەت شابۋىلداپ، قالا مەن ونداعى عيباداتحانانىڭ تاس-تالقانىن شىعاردى. ال امان قالعان مىڭداعان ياھۋدي بابىلعا ايدالدى. سول جەردە ولار، وسى تاراۋدىڭ باسىندا ايتىلعانداي، كەلەكە-مازاققا قالىپ، قۋعىنعا ۇشىرادى.
8، 9. قۇداي جولدانتايۋشىلىققا قاتىستى ماسىحشىلەر قاۋىمىنا قانداي ەسكەرتۋلەر ايتتى؟
8 بابىلداعى ياھۋديلەر مەن يسانىڭ ٸزباسارلارىنىڭ اراسىندا قانداي ۇقساستىق بولدى؟ ەجەلگى ياھۋديلەرگە سياقتى، I عاسىرداعى ماسىحشىلەرگە دە الدىن الا ەسكەرتۋلەر بەرىلدى. جەردەگى قىزمەتىنىڭ باسىندا يسا ولارعا: «جالعان پايعامبارلاردان ساقتانىپ جۇرىڭدەر! ولار سەندەرگە قوي تەرىسىن جامىلىپ كەلەدى، ٴبىراق شىن مانىندە ولار اش قاسقىرلار»،— دەگەن (مات. 7:15). جىلدار وتە ەلشى پاۋىل دا رۋحتىڭ جەتەلەۋىمەن وسىعان ۇقساس ەسكەرتۋ ايتىپ: «مەن كەتكەن سوڭ، ارالارىڭا زۇلىم قاسقىرلار كىرىپ، وتاردى ايامايتىنىن بىلەمىن. سونداي-اق شاكىرتتەردى وزدەرىمەن اكەتۋ ٷشىن ٶز ىشتەرىڭنەن دە جالعان ىلىمدەردى تاراتاتىندار شىقپاق»،— دەگەن (ەل. ٸس. 20:29، 30).
9 سول كەزدەگى ماسىحشىلەرگە وسىنداي ادامداردى انىقتاپ، ولاردان ساقتانۋ ٷشىن نە ىستەۋ كەرەكتىگى دە ايتىلدى. ال اقساقالدارعا جولدان تايعانداردى قاۋىمنان شىعارۋ تۋرالى نۇسقاۋلار بەرىلدى (ٴتىم. 1-ح. 1:19؛ ٴتىم. 2-ح. 2:16—19؛ پەت. 2-ح. 2:1—3؛ جوح. 2-ح. 10). ٴبىراق كوپ ماسىحشىلەر ەجەلگى يسرايلدىكتەر مەن ياھۋديلەر سياقتى، بۇل ەسكەرتۋلەرگە بىرتە-بىرتە دەن قويماي كەتتى. ٴسۇيتىپ، I عاسىردىڭ سوڭىنا تامان جولدانتايۋشىلىق قاۋىمدا تامىر جايا باستادى. سول ۋاقىتتا كوزى ٴتىرى ەلشىلەردىڭ سوڭعىسى بولعان جوحان قاۋىمنىڭ قالاي ٴبۇلىنىپ، وندا بۇلىكشىلدىك رۋحىنىڭ قالاي جايلاي باستاعانىن ٶز كوزىمەن كوردى. ول جولدانتايۋشىلىقتى تىزگىندەپ تۇرعان جالعىز ەلشى ەدى (سال. 2-ح. 2:6—8؛ جوح. 1-ح. 2:18). ال ول قايتىس بولعان سوڭ نە بولدى؟
10، 11. يسانىڭ بيداي مەن ارامشوپ تۋرالى استارلى اڭگىمەسى II عاسىردان باستاپ قالاي ورىندالدى؟
10 ەلشى جوحاننىڭ ولىمىنەن كەيىن يسانىڭ بيداي مەن ارامشوپ تۋرالى استارلى اڭگىمەسى ورىندالا باستادى (ماتاي 13:24—30 وقىڭىز). يسا الدىن الا ايتقانداي، شايتان قاۋىمنىڭ ىشىنە «ارامشوپتىڭ»، ياعني جالعان ماسىحشىلىكتىڭ تۇقىمىن سەپتى. ٴسۇيتىپ، قاۋىمدا جولدانتايۋشىلىق ٶرشىپ كەتتى. پۇتقا تابىنۋشىلىق، جالعان دىندەردىڭ سالت-جورالارى مەن مەيرامدارى، قۇدايدان بەزگەن ٴپالساپاشىلار مەن جالعان دىندەردىڭ ىلىمدەرى قاۋىمدى ابدەن لاستادى. ٶزىنىڭ ۇلى يسا باستاما بەرگەن قاۋىمنىڭ وسىلاي بۇلىنگەنى ەحوباعا قانشالىقتى اۋىر ٴتيدى دەسەڭىزشى! ول بۇعان قانداي شارا قولداندى؟ ەحوبا ٶز حالقىنىڭ ەجەلگى وپاسىز يسرايل سياقتى تۇتقىنعا تۇسۋىنە جول بەردى. ب.ز. II عاسىرىنان باستاپ بيداي ىسپەتتى ماسىحشىلەر ارامشوپتەي قاۋلاعان جالعان ماسىحشىلەردىڭ اراسىندا سيرەپ، بىلىنبەي كەتتى. ناتيجەسىندە ولار جالعان دىندەر يمپەرياسىنا — ۇلى بابىلعا تۇتقىن بولدى. ال جالعان ماسىحشىلەر بولسا وسى بۇلىنگەن يمپەريامەن بىتە قايناسىپ، وركەندەپ جاتتى. وسىلاي ماسىحشىلەر الەمى پايدا بولدى.
11 ماسىحشىلەر الەمى ۇستەمدىك ەتكەن سول رۋحاني قاراڭعى عاسىرلاردا يسانىڭ استارلى اڭگىمەسىندە ايتىلعان «بيداي» ىسپەتتى شىنايى ماسىحشىلەر جوق ەمەس-ٴتىن. ەزەكيەل 6:9 دا ايتىلعان جەر اۋدارىلعان ياھۋديلەر سياقتى ولار دا شىنايى قۇدايدى ەستەرىنە الدى. ماسىحشىلەر الەمىنىڭ جالعان ىلىمدەرىنە تايسالماي قارسى تۇرعاندارى دا بولدى. ولار كەلەكە-مازاق پەن قۋعىنعا ۇشىرادى. ەحوبا ٶز حالقىن جالعان دىندەردىڭ قۇرساۋىندا ٴبىرجولاتا قالدىرىپ كەتتى مە؟ جوق. ەجەلگى يسرايلدىڭ جاعدايىنداعىداي، ەحوبا قاھارىن ٴتيىستى دەڭگەيدە، قاجەتتى ۋاقىتقا دەيىن عانا توكتى (ەرم. 46:28). ول ٴتىپتى حالقىنا ٷمىت تە بەردى. قازىر بابىلعا جەر اۋدارىلعان ەجەلگى ياھۋديلەردىڭ كەزىنە قايتا ورالىپ، ەحوبانىڭ ولارعا قانداي ٷمىت بەرگەنىن كورەيىك.
ۇلى بابىل شىنايى ماسىحشىلەردى عاسىرلار بويى قۋعىندادى (10، 11-ابزاستى قاراڭىز)
«اشۋىمدى باسىپ، قاھارىمدى قايتارامىن»
12، 13. ەحوبانىڭ جەر اۋدارىلعان حالقىنا قايناعان قاھارىنان قايتۋىنىڭ سەبەبى نەدە؟
12 ەحوبا حالقىنا اشۋىن توگەتىنىن ايتقانىمەن، ٵدىل قاھارى ماڭگى جالعاسپايتىنىن دا ۋادە ەتكەن ەدى. مىسالى، مىنا ٴبىر سوزىندە ول: «اشۋىمدى باسىپ، قاھارىمدى قايتارامىن دا، جانىم جاي تابادى. قاھارىمدى توگىپ بىتكەندە، ولار مەنىڭ، ياعني ەحوبانىڭ، مۇنى قالتقىسىز بەرىلگەندىكتى تالاپ ەتكەندىكتەن ايتقانىمدى بىلەتىن بولادى»،— دەگەن (ەزەك. 5:13). ەحوبانىڭ قاھارىنان قايتۋىنىڭ سەبەبى نەدە؟
13 جەر اۋدارىلعان وپاسىز ياھۋديلەردىڭ اراسىندا ادال جاندار دا بولدى. بۇعان قوسا، ەحوبا تۇتقىندا جۇرگەن حالقىنىڭ كەيبىرى وكىنەتىنىن ەزەكيەل ارقىلى ايتقان. وكىنگەن بۇل ياھۋديلەر قۇدايعا قارسى بۇلىك شىعارعاندارى ٷشىن جانە جەركەنىشتى ىستەرمەن اينالىسقاندارى ٷشىن قاتتى ۇيالىپ، ەحوبادان راقىم ەتۋىن سۇراپ جالبارىنباق ەدى (ەزەك. 6:8—10؛ 12:16). ادال ياھۋديلەردىڭ اراسىندا ەزەكيەلمەن بىرگە دانيال مەن ونىڭ ٷش دوسى دا بولدى. دانيال ۇزاق جاساپ، بابىلداعى تۇتقىندىقتىڭ قالاي باستالىپ، قالاي بىتكەنىن ٶز كوزىمەن كوردى. دانيالدىڭ يسرايلدىڭ كۇناسى ٷشىن قاتتى وكىنىپ، وپىق جەيتىنى جايىندا شىن جۇرەكتەن ايتقان دۇعاسى دانيال كىتابىنىڭ 9-تاراۋىندا جازىلعان. بۇل دۇعاسىندا ول ٶزىنىڭ عانا ەمەس، ەحوبانىڭ كەشىرىمىنە ٴزارۋ بولعان، ونىڭ باتاسىن اڭساعان تۇتقىنداعى مىڭداعان ياھۋديدىڭ سەزىمىن جەتكىزدى. ال قۇداي حالقىنىڭ ازات بولىپ، تازا عيبادات قالپىنا كەلەتىنى جايلى ەزەكيەل ايتقان ۋادەلەردى ەستىگەندە، ولار ٴبىر قاناتتانىپ قالسا كەرەك!
14. ەحوبا حالقىن وتانىنا نە ٷشىن قايتارماق ەدى؟
14 الايدا ەحوبانىڭ ٶز حالقىن ازات ەتىپ، تازا عيباداتتى قالپىنا كەلتىرۋىنە سەبەپ بولعان نارسە بۇل عانا ەمەس ەدى. ەحوبا ولاردى ازات ەتىلۋگە لايىق بولعاندىقتان ەمەس، ٶز ەسىمىن بارلىق حالىقتاردىڭ الدىندا كيەلى ەتەتىن ۋاقىتى كەلگەندىكتەن تۇتقىننان بوساتپاق ەدى (ەزەك. 36:22). ال بابىلدىقتار ماردۋك سياقتى ازعىن دا زۇلىم تاڭىرلەرى الەمنىڭ ٵمىرشىسى ەحوبامەن سالىستىرۋعا دا كەلمەيتىنىن ٴبىرجولاتا تۇسىنبەك ەدى! قازىر ەحوبا ەزەكيەلگە جەر اۋدارىلعان ياھۋديلەرگە ارنالعان قانداي بەس ۋادە جازدىرعانىنا كوڭىل بۇرايىق. ٴبىز الدىمەن ادال ياھۋديلەردىڭ كەزىندە وسى ۋادەلەردىڭ ٵرقايسىسى قالاي ورىندالعانىنا توقتالامىز. سوسىن ولاردىڭ كەڭ كولەمدە قالاي ورىندالعانىنا نازار اۋدارامىز.
15. وتانىنا ورالعان حالىقتىڭ عيباداتى قانداي بولماق ەدى؟
15 1-ۋادە. بۇدان بىلاي ەشكىم پۇتقا تابىنبايدى، جالعان ٴدىننىڭ جەركەنىشتى ىستەرىمەن دە اينالىسپايدى (ەزەكيەل 11:18؛ 12:24 وقىڭىز). وسى باسىلىمنىڭ 5-تاراۋىنان بىلگەنىمىزدەي، يەرۋساليم مەن ونداعى عيباداتحانا جالعان ٴدىننىڭ ىستەرىمەن ارامدالعان بولاتىن. پۇتقا تابىنىپ كەتكەن حالىق ابدەن ٴبۇلىنىپ، ەحوبادان الىستاپ كەتكەن ەدى. ٴبىراق ەحوبا جەر اۋدارىلعان حالقىنا ٷمىت بەرىپ، كەلەشەكتە قايتادان كىرشىكسىز تازا عيبادات ەتەتىن ۋاقىت كەلەتىنىن ەزەكيەل ارقىلى ۋادە ەتتى. ال قۇدايدىڭ قالپىنا كەلتىرۋ شاراسىمەن بايلانىستى قالعان باتالاردىڭ ٴبارى وسى نەگىزگى جايتپەن — تازا عيباداتتىڭ قالپىنا كەلۋىمەن — تىكەلەي بايلانىستى ەدى.
16. ەحوبا ياھۋديلەرگە تۋعان جەرلەرىنە قاتىستى قانداي ۋادە بەردى؟
16 2-ۋادە. حالىق ٶز وتانىنا ورالادى. ەحوبا جەر اۋدارىلعان ياھۋديلەرگە: «سەندەردى... جيناپ الىپ، يسرايل جەرىن بەرەمىن»،— دەدى (ەزەك. 11:17). ونىڭ بۇل ۋادەسى وتە ەرەكشە ۋادە بولدى! ويتكەنى قۇدايدىڭ حالقىن تابالاعان بابىلدىقتار ولاردى ەلدەرىنە ەشقاشان جىبەرمەيتىندەي كورىنگەن ەدى (يشايا 14:4، 17). حالىق وتانىنا ورالعان سوڭ ادال بولىپ قالا بەرسە، قۇنارلى جەرلەرى مول ٶنىم بەرىپ، ولار ەڭبەكتەرىنىڭ راقاتىن ٵرى قاراي دا كورمەك ەدى. اشتىقتان زارداپ شەگىپ ماسقارا بولۋ ەندى وتكەننىڭ ەلەسى عانا بولماق ەدى (ەزەكيەل 36:30 وقىڭىز).
17. ەحوبا قۇرباندىقتارعا قاتىستى قانداي ۋادە بەردى؟
17 3-ۋادە. ەحوبانىڭ قۇرباندىق وشاعىندا سي-تارتۋلار قايتادان ۇسىنىلاتىن بولادى. وسى كىتاپتىڭ 2-تاراۋىنان كورگەنىمىزدەي، مۇسا زاڭى بويىنشا، قۇرباندىق شالۋ مەن سي-تارتۋلار اكەلۋ تازا عيباداتتىڭ اجىراماس بولىگى بولاتىن. تۇتقىننان ورالعان حالىق مويىنسۇنعىش بولىپ، رۋحاني تازالىق ساقتاپ جۇرسە، ەحوبا ولاردىڭ ۇسىنعان سي-تارتۋىن ٵرى قاراي دا قابىلداي بەرمەك ەدى. وسىلاي حالىق كۇنالارى كەشىرىلىپ، قۇدايمەن تىعىز قارىم-قاتىناستا بولا الاتىن. ەحوبا: «كۇللى يسرايل ٷيى سول ەلدە تۇگەلدەي ماعان قىزمەت ەتەتىن بولادى. سول جەردە ولارعا ىقىلاسىمدى ٴتۇسىرىپ، ساداقالارى مەن ەڭ جاقسى سي-تارتۋلارىن — بارلىق قاسيەتتى نارسەلەرىن قابىل الامىن»،— دەپ ۋادە ەتتى (ەزەك. 20:40). تازا عيبادات راسىندا دا قالپىنا كەلىپ، قۇداي حالقىنا مول باتا توگىلمەك ەدى.
18. ەحوبا حالقىن باعۋعا قاتىستى قانداي ۋادە بەردى؟
18 4-ۋادە. جامان باعۋشىلار بولمايدى. قۇداي حالقى ٴبىرىنشى كەزەكتە زۇلىم جەتەكشىلەرىنىڭ كەسىرىنەن قۇلدىراپ كەتكەن ەدى. ەحوبا بۇل جاعدايدى تۇزەتۋدى ۋادە ەتتى. ول جامان باعۋشىلارعا قاتىستى: «ولاردى جاۋاپقا تارتامىن دا، بۇدان بىلاي قويلارىمدى باققىزبايمىن... قويلارىمدى باعۋشىلاردىڭ ارانىنان قۇتقارامىن»،— دەدى. ال ادال حالقى جايىندا: «قويلارىمدى... ٶزىم قامقورلايمىن»،— دەپ ۋادە ەتتى (ەزەك. 34:10—12). ەحوبا بۇل ۋادەسىن ٶزى باعۋشى ەتىپ قوياتىن ادال دا سەنىمدى ەر ادامدار ارقىلى جۇزەگە اسىرماق ەدى.
19. ەحوبا حالقىنىڭ اراسىنداعى بىرلىك جايىندا قانداي ۋادە بەردى؟
19 5-ۋادە. ەحوباعا عيبادات ەتۋشىلەردىڭ اراسىندا بىرلىك بولادى. بابىلعا ايدالار الدىنداعى ۋاقىتتا قۇداي حالقىنىڭ جىككە ٴبولىنىپ كەتكەنى ارالارىنداعى ادال قىزمەتشىلەرگە اۋىر تيسە كەرەك. جالعان پايعامبارلار مەن زۇلىم باعۋشىلاردىڭ ىرقىنا جىعىلعان حالىق ەحوبانىڭ اتىنان سويلەگەن ادال پايعامبارلارعا قارسى شىقتى. ولار ٴتىپتى توپ-توپ بولىپ ٶزارا دا جاۋلاستى. سوندىقتان بولار، ەحوبانىڭ: «مەن ولارعا ٴبىرتۇتاس جۇرەك بەرىپ، جاڭا رۋح دارىتامىن»،— دەگەن ۋادەسى قايتا قالپىنا كەلتىرۋ شاراسىنىڭ ەڭ جاعىمدى قىرى بولعان (ەزەك. 11:19). ەلدەرىنە قايتا ورالعان سوڭ، ياھۋديلەر ەحوبا قۇدايمەن دە، ٶزارا دا بىرلىك ساقتاي بەرسە، ەشقانداي جاۋعا جەڭىلمەي، قاۋىپسىز ٶمىر كەشە بەرمەك ەدى. ولار ەندى ەحوبانىڭ ەسىمىنە كىر كەلتىرىپ، ونى ماسقارا قىلماي، كەرىسىنشە، ٴبىرتۇتاس حالىق رەتىندە وعان قايتادان داڭق اكەلمەك ەدى.
20، 21. قۇدايدىڭ جەر اۋدارىلعان ياھۋديلەرگە قاتىستى بەرگەن ۋادەلەرى قالاي ورىندالدى؟
20 جەر اۋدارىلعان ياھۋديلەرگە قاتىستى بۇل بەس ۋادە ورىندالدى ما؟ كەزىندە ەشۋانىڭ مىنا ٴبىر ايتقان سوزدەرى ەسىمىزدە شىعار: «ەحوبا بەرگەن ىزگى ۋادەلەردىڭ ەشقايسىسى بەكەر بولماعانىن جاقسى بىلەسىڭدەر. ولاردىڭ بىردە-ٴبىرى ورىندالماي قالعان جوق — ٴبارى دە ورىندالدى» (ەشۋا 23:14). ەشۋانىڭ كەزىندەگىدەي، بۇل جولى دا ەحوبا ٶز سوزىنە ادال ەكەنىن دالەلدەدى.
21 ياھۋديلەر پۇتقا تابىنۋشىلىق پەن جالعان ٴدىننىڭ بارلىق ىستەرىن تاستاپ، ەحوبامەن قارىم-قاتىناستارىن تۇزەدى. ولار وتاندارىنا ورالىپ، جەرلەرىن وڭدەدى، ٴماندى دە ماعىنالى ٶمىر كەشتى. ولار ەڭ الدىمەن يەرۋساليمدەگى قۇرباندىق وشاعىن قايتا سوعىپ، ەحوباعا ۇنامدى قۇرباندىقتار ۇسىندى (ەزرا 3:2—6). ەحوبا ولارعا قامقور رۋحاني باعۋشىلار بەردى. بۇل باعۋشىلاردىڭ ىشىندە ٴدىني قىزمەتكەر ٵرى كوشىرمەشى ەزرا، امىرشىلەردەن نەحەميا مەن زوروبابەل، باس ٴدىني قىزمەتكەر ەشۋا جانە باتىل پايعامبارلاردان حاگەي، زاكاريا مەن مالاحي بولدى. حالىق ەحوبانىڭ جەتەلەۋىمەن ٴجۇرىپ، نۇسقاۋلارىنا مويىنسۇنعان كەزدىڭ بارىندە بۇرىن-سوڭدى بولماعان بىرلىكتىڭ راقاتىن كوردى (يشايا 61:1—4؛ ەرەميا 3:15 وقىڭىز).
22. نەگە ەحوبانىڭ ۋادەلەرىنىڭ ورىندالۋى بولاشاقتاعى كول-كوسىر باتالاردىڭ نىشانى عانا بولدى؟
22 قايتا قالپىنا كەلتىرۋ شاراسىنا قاتىستى ەحوبانىڭ ۋادەلەرى ورىندالعاندا، ياھۋديلەردىڭ زور باقىتقا بولەنگەنىندە ٴسوز جوق! ٴبىراق بۇل بولاشاقتا توگىلەتىن كول-كوسىر باتالاردىڭ نىشانى عانا بولدى. نەگە بۇلاي دەيمىز؟ جوعارىدا بايقاعانىمىزداي، ەحوبانىڭ ٶز حالقىنا قويعان شارتى بولعان: ولار مويىنسۇنعىش بولىپ قالسا عانا، ەحوبا وسى ۋادەلەرىن ٵرى قاراي دا جۇزەگە اسىرا بەرمەك ەدى. وكىنىشكە قاراي، ياھۋديلەر ۋاقىت وتە ٴتىلازارلىق تانىتىپ، قايتادان بۇلىك شىعاردى. وسىلاي ەحوبانىڭ قويعان شارتىن بۇزدى. ٴبىراق ەشۋا ايتقانداي، ەحوبانىڭ ٴسوزى ەشقاشان ورىندالماي قالمايدى. سوندىقتان بۇل ۋادەلەر بولاشاقتا الدەقايدا ۇلكەن كولەمدە، ۇزاق ۋاقىتقا ورىندالماق ەدى. قازىر وسى جايلى قاراستىرىپ كورەيىك.
«سەندەرگە ىقىلاسىمدى تۇسىرەمىن»
23، 24. «بارلىق نارسەلەر قالپىنا كەلەتىن ۋاقىت» قاشان جانە قالاي باستالدى؟
23 كيەلى كىتاپتى زەرتتەۋشىلەر رەتىندە ٴبىز 1914-جىلى وسى زۇلىم دۇنيەنىڭ اقىرى، ياعني سوڭعى كۇندەر باستالعانىن بىلەمىز. الايدا ٴبىز بۇعان ەش قامىقپايمىز. ويتكەنى 1914-جىلى عاجايىپ ۋاقىت، ياعني «بارلىق نارسەلەر قالپىنا كەلەتىن ۋاقىت» باستالدى (ەل. ٸس. 3:21). نەگە بۇلاي دەيمىز؟ بىلەتىنىمىزدەي، 1914-جىلى كوكتە يسا تاققا وتىرىپ، ٴماسىحتىڭ پاتشالىعىنىڭ پاتشاسى بولدى! بۇل وقيعانىڭ قۇدايدىڭ قالپىنا كەلتىرۋ شاراسىمەن قانداي بايلانىسى بار؟ ەسىمىزدە بولسا، ەحوبا ٴداۋىتتىڭ پاتشا تاعى ماڭگى تۇراتىنىن ۋادە ەتكەن ەدى (شەج. 1-ج. 17:11—14). ٴبىراق ب.ز.ب. 607-جىلى بابىلدىقتار يەرۋساليمدى كۇيرەتكەن كەزدە، ٴداۋىتتىڭ اۋلەتىنەن شىققان پاتشالاردىڭ بيلىگى توقتاپ قالدى.
24 ۋاقىت وتە ٴداۋىتتىڭ ۇرپاعىنان «ادام ۇلى»، ياعني يسا ٴماسىح شىقتى! سوندىقتان ول ٴداۋىتتىڭ پاتشا تاعىنىڭ زاڭدى مۇراگەرى ەدى (مات. 1:1؛ 16:13—16؛ لۇقا 1:32، 33). 1914-جىلى ەحوبا يسانى كوكتە پاتشا تاعىنا وتىرعىزعان كەزدە، «بارلىق نارسەلەر قالپىنا كەلەتىن ۋاقىت» باستالدى! وسىدان باستاپ ەحوبا ٶزىنىڭ قالپىنا كەلتىرۋ شاراسىن جالعاستىرۋ ٷشىن وسى كەمەلدى پاتشانى قولداندى.
25، 26. ا) قۇداي حالقى ۇلى بابىلدىڭ قۇرساۋىنان قاشان ازات بولدى جانە بۇلاي دەۋگە قانداي نەگىز بار؟ («نەگە 1919-جىل؟» دەگەن قورشاۋدى قاراڭىز.) ٵ) 1919-جىلدان باستاپ نە ورىندالا باستادى؟
25 ٴماسىح پاتشا بولعان سوڭ، بىردەن اكەسىمەن بىرگە جەر بەتىندەگى قۇداي حالقىنىڭ عيباداتىن تەكسەرۋگە كىرىستى (مالح. 3:1—5). يسا الدىن الا ايتقانداي، ۇزاق ۋاقىت بويى بيداي مەن ارامشوپتى، ياعني مايلانعان شىنايى ماسىحشىلەر مەن جالعان ماسىحشىلەردى اجىراتۋ مۇمكىن بولمادى *. الايدا 1914-جىلى وراق كەزى باستالعاندا، ولاردىڭ ارا-جىگى انىق كورىندى. 1914-جىلعا دەيىن ادال كيەلى كىتاپ زەرتتەۋشىلەرى ونداعان جىلدار بويى ماسىحشىلەر الەمىنىڭ سوراقى كۇنالارى مەن وتىرىگىن اشكەرەلەپ، بۇلىنگەن بۇل ۇيىمنان بولەكتەنە باستاعان ەدى. وسى كەزدە ەحوبانىڭ تازا عيباداتتى قالپىنا كەلتىرەتىن ۋاقىتى كەلدى. 1919-جىلدىڭ باسىندا، ياعني «وراق كەزى» باستالعاننان كەيىن نەبارى بىرنەشە جىل وتكەن سوڭ، قۇداي حالقى ۇلى بابىلدىڭ قۇرساۋىنان تولىقتاي ازات بولدى! (مات. 13:30).
26 بۇدان كەيىن قۇدايدىڭ قالپىنا كەلتىرۋ شاراسى تۋرالى ەزەكيەل ايتقان پايعامبارلىقتار تاريحتا بۇرىن-سوڭدى بولماعان ۇلكەن كولەمدە ورىندالا باستادى. قازىر جوعارىدا قاراستىرعان بەس ۋادەنىڭ ۇلكەن كولەمدە قالاي جۇزەگە اسقانىن كورەيىك.
27. قۇداي حالقى پۇتقا تابىنۋشىلىقتان قالاي تازاردى؟
27 1-ۋادە. پۇتقا تابىنۋشىلىق پەن جالعان ٴدىننىڭ جەركەنىشتى ىستەرى بولمايدى. XIX عاسىردىڭ سوڭى مەن XX عاسىردىڭ باسىندا ادال ماسىحشىلەر كىشكەنە توپتار قۇردى. ولار جالعان ٴدىننىڭ ىلىمدەرى مەن ىستەرىنەن ارىلا باستادى. ۇشتىك، توزاق وتى، ادامنىڭ ولمەيتىن جانى بار دەگەن سياقتى ىلىمدەر جالعان دىننەن شىققانىن ٵرى جازبالارعا قايشى ەكەنىن دە انىقتادى. سۋرەتتەر مەن مۇسىندەرگە عيبادات ەتۋ ناعىز پۇتقا تابىنۋشىلىق ەكەنى ايقىن بولدى. ۋاقىت وتە ولار ايقىشتى قولدانۋ دا پۇتقا تابىنۋعا جاتاتىنىن ٴتۇسىندى (ەزەك. 14:6).
28. ەحوبانىڭ حالقى قاي ماعىنادا وتاندارىنا ورالدى؟
28 2-ۋادە. قۇداي حالقى رۋحاني وتانىنا ورالادى. ادال ماسىحشىلەر ۇلى بابىلدىڭ جالعان دىندەرىنەن بولەك كەتكەندە، رۋحاني اس-سۋ ەشقاشان سارقىلمايتىن ٵرى قۇدايدىڭ نۇرى جاۋعان رۋحاني مەكەنگە اياق باستى (ەزەكيەل 34:13، 14 وقىڭىز). وسى باسىلىمنىڭ 19-تاراۋىنان كورەتىنىمىزدەي، ەحوبا بۇل مەكەنگە باتاسىن ٷيىپ-توگىپ بەرگەننىڭ ارقاسىندا ول جەردە بۇرىن-سوڭدى بولماعانداي رۋحاني مولشىلىق بار (ەزەك. 11:17).
29. 1919-جىلى ۋاعىز ٸسى قالاي العا باستى؟
29 3-ۋادە. ەحوبانىڭ قۇرباندىق وشاعىندا سي-تارتۋلار قايتادان ۇسىنىلاتىن بولادى. I عاسىردا شىنايى ماسىحشىلەر قۇدايعا قۇرباندىققا كادىمگى مال ەمەس، ودان دا قۇندى سي-تارتۋ ۇسىنۋ كەرەكتىگىن ٴتۇسىندى. ولار ەحوبانى اۋىزدارىمەن ماداقتاپ، باسقالارعا ول تۋرالى ۋاعىزداۋ كەرەك ەدى (ەۆر. 13:15). عاسىرلارعا جالعاسقان تۇتقىندىق كەزىندە مۇنداي قۇرباندىق اكەلۋگە ەشقانداي شارا جاسالمادى. ٴبىراق قۇداي حالقى تۇتقىندىقتىڭ سوڭىنا تامان ماداقتاۋ قۇرباندىعىن ۇسىنۋدى باستاپ كەتتى. ولار بەلسەنە ۋاعىزداپ، قاۋىم كەزدەسۋلەرىندە قۇدايدى قۋانىشپەن ماداقتاپ ٴجۇردى. 1919-جىلدان باستاپ «ادال دا اقىلدى قۇل» ۋاعىزداۋ ىسىنە ەرەكشە ٴمان بەرىپ، ونىڭ تۇبەگەيلى اتقارىلۋىن قامدادى (مات. 24:45—47). قۇدايدىڭ كيەلى ەسىمىن داڭقتاعان ٵرى كۇن ساناپ كوبەيگەن جاريالاۋشىلاردىڭ ماداقتاۋ قۇرباندىقتارى ەحوبانىڭ قۇرباندىق وشاعىندا اسىپ-تاسىپ توگىلىپ جاتتى!
30. يسا وتارىنىڭ قامى ٷشىن نە ىستەدى؟
30 4-ۋادە. جامان باعۋشىلار بولمايدى. يسا ٴماسىح قۇداي حالقىن ماسىحشىلەر الەمىنىڭ زۇلىم ٵرى تەك قارا باسىن ويلاعان جالعان باعۋشىلارىنىڭ قۇرساۋىنان شىعارىپ الدى. ال ٴماسىحتىڭ وتارىندا وسى جالعان باعۋشىلار سياقتى ارەكەت ەتكەندەر مىندەتتەرىنەن بوساتىلدى (ەزەك. 20:38). ىزگى باعۋشى يسا ٶز وتارىنىڭ قامى ٷشىن بارلىق جاعدايدى جاسادى. 1919-جىلى ول ادال دا اقىلدى قۇلدى تاعايىندادى. مايلانعان ماسىحشىلەردەن تۇراتىن بۇل شاعىن توپ رۋحاني اس-سۋ بەرۋدى قولعا الىپ، قۇداي حالقىن بارىنشا قامقورلادى. ۋاقىت وتە اقساقالدار دا «قۇدايدىڭ وتارىن» باعۋدى ۇيرەنىپ، ولارعا ۇلكەن قولعابىس بولدى (پەت. 1-ح. 5:1، 2). كيەلى رۋحتىڭ جەتەلەۋىمەن جازىلعان ەزەكيەل 34:15، 16 داعى سوزدەر وسى ٴماسىحشى باعۋشىلارعا قاتىستى ٴجيى قولدانىلادى. وسىلاي ولار ەحوبا قۇداي مەن يسا ٴماسىح ورناتقان ٴتارتىپتى ەستەرىنەن شىعارمايدى.
31. ەحوبا ەزەكيەل 11:19 داعى پايعامبارلىقتى قالاي ورىندادى؟
31 5-ۋادە. ەحوباعا عيبادات ەتۋشىلەردىڭ اراسىندا بىرلىك بولادى. عاسىرلار وتە ماسىحشىلەر الەمى ون مىڭداعان اعىمعا تارماقتالىپ، ٴبىر-بىرىنە قاراما-قايشى سانسىز كوپ توپتار مەن سەكتالارعا جىكتەلىپ كەتتى. ال ەحوبانىڭ حالقىنىڭ اراسىندا تاماشا بىرلىك بار. ەحوبا «مەن ولارعا ٴبىرتۇتاس جۇرەك بەرەمىن» دەگەن ۋادەسىن تاڭعاجايىپ جولمەن جۇزەگە اسىرۋدا (ەزەك. 11:19). بۇكىل جەرجۇزى بويىنشا ٴتۇرلى ناسىلدەن، دىننەن، ەكونوميكالىق جانە الەۋمەتتىك جاعدايى ٵرتۇرلى ورتادان شىققان ميلليونداعان ادام يسانىڭ سوڭىنان ەرىپ كەلەدى. ولاردىڭ بارلىعى بىردەي ٴتالىم الادى جانە دۇنيەجۇزى بويىنشا جۇمىلا ٴبىر ٸستى اتقارادى. يسا ولەر الدىنداعى ٴتۇنى قۇدايعا بەرىلە دۇعا ەتىپ، ٸزباسارلارىنىڭ اراسىندا بىرلىك بولۋىن تىلەگەن ەدى (جوحان 17:11، 20—23 وقىڭىز). ٴبىزدىڭ كۇنىمىزدە ەحوبا ونىڭ وسى تىلەگىن كەڭ كولەمدە ورىنداۋدا.
32. قايتا قالپىنا كەلتىرۋ شاراسى تۋرالى پايعامبارلىقتار ورىندالعان ۋاقىتتا ٶمىر ٴسۇرۋ ٴسىزدى قانداي سەزىمگە بولەيدى؟ («تۇتقىندىق پەن قالپىنا كەلتىرۋ جايلى پايعامبارلىقتار» دەگەن قورشاۋدى دا قاراڭىز.)
32 قۇدايدىڭ قايتا قالپىنا كەلتىرۋ شاراسى جۇزەگە اسقان وسى ٴبىر كەرەمەت ۋاقىتتا ٶمىر ٴسۇرۋ ٴبىز ٷشىن زور قۋانىش! بۇگىندە ٴبىز ەزەكيەل ايتقان پايعامبارلىقتاردىڭ ورىندالىپ جاتقانىن عيباداتىمىزدىڭ ٵربىر تۇسىنان كورىپ ٴجۇرمىز. ەحوبا قازىر ٶزىنىڭ حالقىنا ريزا ەكەنىنە دە سەنىمدىمىز. سەبەبى ول ەزەكيەل ارقىلى: «سەندەرگە ىقىلاسىمدى تۇسىرەمىن»،— دەگەن (ەزەك. 20:41). رۋحاني تۇتقىندىقتان ازات بولعان، دۇنيەجۇزى بويىنشا ٴبىراۋىزدان ەحوبانى ماداقتاپ، رۋحاني توقشىلىقتا جۇرگەن حالىقتىڭ اراسىندا بولۋ نەتكەن زور مارتەبە دەسەڭىزشى؟! ايتسە دە ەحوبانىڭ قايتا قالپىنا كەلتىرۋ شاراسى مۇنىمەن بىتكەن جوق. بۇل شاراعا قاتىستى پايعامبارلىقتاردىڭ كەيبىرى الدا ٵلى وراسان زور كولەمدە ورىندالادى.
«قاڭىراپ قالعان جەر ەدەم باعىنداي بولادى»
33—35. ا) ەزەكيەل 36:35 تەگى پايعامبارلىقتىڭ جەر اۋدارىلعان ياھۋديلەر ٷشىن قانداي ٴمانى بولدى؟ ٵ) بۇل پايعامبارلىقتىڭ ەحوبانىڭ بۇگىندەگى حالقى ٷشىن قانداي ٴمانى بار؟ («بارلىق نارسەلەر قالپىنا كەلەتىن ۋاقىت» دەگەن قورشاۋدى دا قاراڭىز.)
33 جوعارىدا كورگەنىمىزدەي، «بارلىق نارسەلەر قالپىنا كەلەتىن ۋاقىت» 1914-جىلى يسا تاققا وتىرىپ، ٴداۋىتتىڭ پاتشالار اۋلەتى قالپىنا كەلگەندە باستالدى (ەزەك. 37:24). سودان كەيىن ەحوبا ٴماسىحتى قولدانىپ، عاسىرلار بويى رۋحاني تۇتقىندا بولعان حالقىنىڭ اراسىندا تازا عيباداتتى قالپىنا كەلتىرۋگە كىرىستى. الايدا ٴماسىحتىڭ قايتا قالپىنا كەلتىرۋ ٸسى وسىمەن شەكتەلە مە؟ ارينە، جوق! بۇل ٸس بولاشاقتا عاجايىپ تۇردە ٶز جالعاسىن تاپپاق. وسى جايىندا ەزەكيەلدىڭ پايعامبارلىقتارىندا ەگجەي-تەگجەيلى جازىلعان.
34 مىسالى، رۋحتىڭ جەتەلەۋىمەن جازىلعان مىنا سوزدەرگە نازار اۋدارىڭىزشى: «سوندا جۇرت: «قاڭىراپ قالعان جەر ەدەم باعىنداي بولىپ كەتىپتى»،— دەيتىن بولادى» (ەزەك. 36:35). بۇل ۋادەنى ەزەكيەل مەن جەر اۋدارىلعان باسقا ياھۋديلەر قالاي ٴتۇسىندى؟ ولار تۋعان جەرلەرى تۋرا ماعىنادا ەحوبا و باستا ٶزى جاساعان باققا، ياعني جۇماققا اينالادى دەپ كۇتپەگەنى انىق (مۇس. 1-ج. 2:8). قايتا، ولار ەحوبا تۋعان جەرلەرىنىڭ شۇرايلى دا قۇنارلى بولاتىنىن ۋادە ەتىپ جاتقانىن ٴتۇسىندى.
35 ال بىزدەر ٷشىن بۇل ۋادەنىڭ قانداي ٴمانى بار؟ ٴبىز بۇل ۋادە تۋرا ماعىنادا ٴدال قازىر، ياعني شايتان ٸبىلىس بيلەگەن وسى زۇلىم زاماندا ورىندالادى دەپ كۇتپەيمىز. ٴبىراق ونىڭ رۋحاني ماعىنادا جۇزەگە اسىپ جاتقانىن تۇسىنەمىز. ەحوبانىڭ قىزمەتشىلەرى بولعاندىقتان، ٴبىز قالپىنا كەلگەن رۋحاني جۇماقتا، ياعني قاسيەتتى قىزمەت ٶمىرىمىزدىڭ مانىنە اينالعان رۋحاني ورتادا ٶمىر كەشۋدەمىز. بۇل جۇماق بارعان سايىن گۇلدەنىپ، كوركەيگەن ۇستىنە كوركەيۋدە. ال بولاشاعىمىز جايىندا نە دەۋگە بولادى؟
36، 37. بولاشاقتا جۇماقتا قانداي ۋادەلەر ورىندالادى؟
36 ۇلى ارماگەددون سوعىسىنان كەيىن يسا قايتا قالپىنا كەلتىرۋ ٸسىن جەر بەتىندە دە جۇرگىزە باستايدى. مىڭجىلدىق بيلىگىنىڭ تۇسىندا ادامزات يسانىڭ باسشىلىعىمەن جەر پلانەتاسىن ەحوبا و باستان نيەت ەتىپ كەلگەن ەدەم باعىنا، ياعني جۇماققا اينالدىرادى! (لۇقا 23:43). سول شاقتا ادامداردىڭ ٴبارى ىنتىماق-بىرلىكتە ٶمىر ٴسۇرىپ، جەر بەتىن كۇتىپ-باپتايتىن بولادى. ولارعا ەشكىم دە، ەش نارسە دە قاۋىپ توندىرمەيدى. «مەن ولارمەن تاتۋلىق كەلىسىمىن جاساسىپ، ەلدەرىنەن جابايى اڭداردى قۋىپ شىعارامىن. وسىلاي ولار يەن دالادا بەيقام جاتىپ، ورماندا دا الاڭداماي ۇيىقتايتىن بولادى» دەگەن ۋادە جۇزەگە اسقان كەزدى كوز الدىڭىزعا ەلەستەتىپ كورىڭىزشى! (ەزەك. 34:25).
37 ٴسىز عالامات جەر شارىنىڭ كەز كەلگەن بۇرىشىنا ەش قورقىنىشسىز بارا الاسىز. سىزگە ەشقانداي جىرتقىش اڭ تيىسپەيدى. تىنىشتىعىڭىزدى بۇزاتىن دا ەشتەڭە بولمايدى. نۋ ورماندا ٴبىر ٶزىڭىز ەمىن-ەركىن قىدىرىپ، سۇلۋلىعىمەن تامساندىرعان تابيعاتتى تاماشالاي الاسىز. سول جەردە ٴتىپتى ۇيىقتاپ كەتسەڭىز دە، سىزگە ەشقانداي قاۋىپ تونبەيدى. تاڭەرتەڭ جاقسى تىنىعىپ، جاڭا كۇشپەن وياناسىز!
«ورماندا دا الاڭداماي ۇيىقتايتىن» كەز كەلەدى! (36، 37-ابزاستى قاراڭىز)
38. ەزەكيەل 28:26 داعى ۋادە ورىندالاتىن كەزدى ٴسىز قالاي ەلەستەتەسىز؟
38 ٴبىز مىنا ٴبىر ۋادەنىڭ دە جۇزەگە اسقانىنا كۋا بولامىز: «ولار سول جەردە قاۋىپسىز ٶمىر ٴسۇرىپ، ۇيلەر سالىپ، جۇزىمدىكتەر وتىرعىزادى. مەن وزدەرىن مازاق ەتكەن اينالاسىنداعى حالىقتارعا شىعارعان ۇكىمىمدى جۇزەگە اسىرعاندا، ٶز حالقىم قاۋىپسىز ٶمىر كەشەدى. سوندا ولار مەنىڭ قۇدايلارى ەحوبا ەكەنىمدى بىلەتىن بولادى» (ەزەك. 28:26). ەحوبانىڭ جاۋلارى قۇرىپ جوق بولعان سوڭ، جەر بەتىندە مامىراجاي تىنىشتىق پەن قاۋىپسىزدىك ورنايدى. جەردى كۇتىپ-باپتاي ٴجۇرىپ، ٴبىز ٶزىمىز ٷشىن، جاقىن ادامدارىمىز ٷشىن جايلى ۇيلەر سوعىپ، جايقالعان جۇزىمدىكتەر وتىرعىزامىز.
39. ەزەكيەلدىڭ جۇماققا قاتىستى ايتقان پايعامبارلىقتارى جۇزەگە اساتىنىنا نە ٷشىن سەنىمدى بولا الاسىز؟
39 بۇل ۋادەلەردىڭ جۇزەگە اسۋى سىزگە جاي عانا ارمان سياقتى كورىنە مە؟ سولاي كورىنگەن بولسا، «بارلىق نارسەلەر قالپىنا كەلەتىن ۋاقىت» باستالعالى بەرى نەندەي جايتتارعا كۋا بولعانىڭىزدى ويدا ۇستاڭىز. شايتاننىڭ بارىنشا قارسىلاسقانىنا قاراماستان، يسا ەحوبانىڭ كۇشىمەن وسى سۇم زاماننىڭ ابدەن قۇلدىراپ كەتكەن كەزەڭىندە تازا عيباداتتى قالپىنا كەلتىردى. بۇل قۇدايدىڭ ەزەكيەل ارقىلى ايتقان ۋادەلەرىنىڭ بارلىعى مىندەتتى تۇردە ىسكە اساتىنىنىڭ بۇلتارتپاس دالەلى!
^ 2-ابزاس جەر اۋدارىلعان ياھۋديلەردىڭ كوبىسى بابىل قالاسىنىڭ شەت جاقتارىنداعى ايماقتاردا تۇرعان. مىسالى، ەزەكيەل ياھۋديلەرمەن بىرگە كەبار وزەنىنىڭ ماڭىندا ٶمىر سۇرگەن (ەزەك. 3:15). ٴبىراق كەيبىر ياھۋديلەر قالانىڭ وزىندە تۇرعان. ولاردىڭ اراسىندا «پاتشا اۋلەتى مەن اقسۇيەك تۇقىمىنان شىققاندار» دا بولدى (دان. 1:3، 6؛ پات. 2-ج. 24:15).
^ 25-ابزاس مىسالى، XVI عاسىردا رەفورماتورلاردىڭ اراسىندا كىمدەر مايلانعان ماسىحشىلەر بولعانىن ٴبىز ناقتى ايتا المايمىز.
