12-تاراۋ
«مەن ولاردى... ٴبىر حالىق ەتەمىن»
ويباعدار: ەحوبانىڭ ٶز حالقىن جينايتىنى تۋرالى ايتقان ۋادەسى؛ ەكى تاياق جايلى پايعامبارلىق
1، 2. ا) تۇتقىنداعى ياھۋديلەر ەزەكيەلگە نە ٷشىن سەسكەنە قاراپ قالدى؟ ٵ) حالىقتى تاڭعالدىرعان نە؟ ب) ٴبىز قانداي سۇراقتاردى قاراستىرامىز؟
ەزەكيەل قۇدايدىڭ تاپسىرۋىمەن بابىلداعى تۇتقىندارعا قويىلىم رەتىندە ٴبىرتالاي پايعامبارلىق كورسەتكەن ەدى. ولاردىڭ ٴبىرىنشىسى دە، ەكىنشىسى دە، ودان كەيىنگىلەرى دە ۇكىم جايلى بولاتىن (ەزەك. 3:24—26؛ 4:1—7؛ 5:1؛ 12:3—6). راسىندا دا، ەزەكيەل قويىلىم رەتىندە كورسەتكەن پايعامبارلىقتاردىڭ ٴبارى ياھۋديلەرگە شىعارىلعان قاھارلى ۇكىمنەن تۇردى.
2 ەندى، مىنە، ەزەكيەل قايتادان جۇرت الدىنا شىقتى. ول حالىققا تاعى ٴبىر پايعامبارلىق كورسەتپەكشى. سوندا ولار: «ول تاعى قانداي سۋىق حابار ايتپاقشى؟»— دەپ، وعان سەسكەنە قاراپ قالسا كەرەك. ٴبىراق ەزەكيەل بۇل جولى حالىقتى تاڭعالدىرىپ، مۇلدەم باسقا پايعامبارلىق كورسەتتى. ونىڭ كورسەتكەنى ۇكىم حابارى ەمەس، ٷمىت حابارى بولىپ شىقتى (ەزەك. 37:23). ەزەكيەل تۇتقىندارعا نە كورسەتتى؟ ونىڭ حابارىنىڭ ٴمانى قانداي ەدى؟ بۇل حاباردىڭ بۇگىندەگى قۇداي قىزمەتشىلەرىنە قانداي قاتىسى بار؟ قازىر وسى سۇراقتارعا توقتالايىق.
«ەكەۋى مەنىڭ قولىمدا ٴبىرتۇتاس تاياق بولادى»
3. ا) «ياھۋداعا» دەپ جازىلعان تاياق نەنى بەينەلەدى؟ ٵ) نەلىكتەن «ەفرەم تاياعى» ون رۋلى پاتشالىقتى بەينەلەدى دەۋگە بولادى؟
3 ەحوبا ەزەكيەلگە ەكى تاياق الىپ، بىرەۋىنە «ياھۋداعا» دەپ، ال ەكىنشىسىنە «جۇسىپكە، ياعني ەفرەم تاياعىنا» دەپ جازۋدى بۇيىردى (ەزەكيەل 37:15، 16 وقىڭىز). بۇل ەكى تاياق نەنى بەينەلەدى؟ «ياھۋداعا» دەپ جازىلعان تاياق ياھۋدا مەن بەنيامين حالقىنان تۇراتىن ەكى رۋلى پاتشالىقتى بەينەلەدى. بۇل پاتشالىقتا ياھۋدادان تاراعان پاتشالار بيلىك ەتتى. ولار يەرۋساليمدەگى عيباداتحانادا قىزمەت ەتكەن ٴدىني قىزمەتكەرلەرمەن تىعىز قارىم-قاتىناس جاسادى (شەج. 2-ج. 11:13، 14؛ 34:30). وسىلايشا ياھۋدا پاتشالىعى داۋىتتەن تاراعان پاتشالار مەن لەۋىدەن تاراعان ٴدىني قىزمەتكەرلەردەن تۇردى. ال «ەفرەم تاياعى» ون رۋلى يسرايل پاتشالىعىن بەينەلەدى. نەگە ولاي دەيمىز؟ ون رۋلى پاتشالىقتىڭ ەڭ ٴبىرىنشى پاتشاسى ەروبوعام ەفرەم رۋىنان شىققان. ال ۋاقىت وتە يسرايلدە ەفرەم رۋىنىڭ ۇستەمدىگى ارتا ٴتۇستى (مۇس. 5-ج. 33:17؛ پات. 1-ج. 11:26). ەسكەرەتىن جايت، ون رۋلى يسرايل پاتشالىعىندا داۋىتتەن تاراعان پاتشالار مەن لەۋىدەن تاراعان ٴدىني قىزمەتكەرلەر بولماعان.
4. ەزەكيەلدىڭ ەكى تاياقتى قوسىپ ۇستاۋى نە نارسەگە نۇسقادى؟ (تاراۋدىڭ باسىنداعى سۋرەتتى قاراڭىز.)
4 كەيىن ەزەكيەل ەحوبانىڭ نۇسقاۋىمەن ەكى تاياقتى «ٴبىر-بىرىمەن قوسىپ، ٴبىرتۇتاس ەتىپ ۇستادى». ونى سەسكەنە باقىلاپ تۇرعان جۇرت ودان: «بۇنىڭ ٴمانى نەدە؟»— دەپ سۇراي باستادى. ەزەكيەل بۇل قويىلىم ەحوبانىڭ ٶزى ارەكەت ەتەتىنىنە نۇسقايتىنىن ايتتى. ەحوبا وسى ەكى تاياققا قاتىستى: «ەكەۋى مەنىڭ قولىمدا ٴبىرتۇتاس تاياق بولادى»،— دەگەن (ەزەك. 37:17—19).
5. ەزەكيەلدىڭ ەكى تاياقپەن كورسەتكەن قويىلىمى نەنى ٴبىلدىردى؟ («ەكى تاياقتىڭ بىرىگۋى» دەگەن قورشاۋدى دا قاراڭىز.)
5 بۇدان كەيىن ەحوبا ەكى تاياقتىڭ بىرىگۋى نەنى بىلدىرەتىنىن ٴتۇسىندىردى (ەزەكيەل 37:21، 22 وقىڭىز). جەر اۋدارىلعان ەكى رۋلى ياھۋدا پاتشالىعىنىڭ ادامدارى مەن ون رۋلى يسرايل (ەفرەم) پاتشالىعىنىڭ ادامدارى يسرايل جەرىنە ورالىپ، ەكەۋى «ٴبىر حالىق» بولماق ەدى (ەرم. 30:1—3؛ 31:2—9؛ 33:7).
6. ەزەكيەل كىتابىنىڭ 37-تاراۋىندا ٴبىر-ٴبىرىن تولىقتىراتىن قانداي پايعامبارلىقتار جازىلعان؟
6 ەزەكيەل كىتابىنىڭ 37-تاراۋىندا ايتىلعان ەكى پايعامبارلىق ٴبىر-ٴبىرىن كەرەمەت تولىقتىرادى! ەحوبا ٶلى كۇيدە بولعان حالقىنا جان ٴبىتىرىپ قانا قويماي (1—14-تارماقتار)، ولاردى ٴبىرتۇتاس تا ەتە الادى (15—28-تارماقتار). بۇل ەكى پايعامبارلىقتان شىعاتىن ٴتۇيىن: حالقىن تۇتقىندىقتان ازات ەتۋ دە، ولاردى بىرىكتىرۋ دە ەحوبانىڭ قولىنان كەلەدى.
ەحوبا حالقىن قالاي جيناپ الدى؟
7. شەجىرەلەر 1-جازبا 9:2، 3 تەگى سوزدەردەن «قۇدايدىڭ قولىنان ٴبارى كەلەتىنى» قالاي كورىنەدى؟
7 ادامي تۇرعىدان قاراعاندا، تۇتقىنداردىڭ ازات ەتىلۋى جانە ٴبىرتۇتاس حالىق بولۋى مۇمكىن ەمەستەي كورىندى *. «بىراق قۇدايدىڭ قولىنان ٴبارى كەلەدى» (مات. 19:26). ەحوبا ٶزىنىڭ ايتقان پايعامبارلىعىن ورىندادى. ب.ز.ب. 537-جىلى ياھۋديلەر بابىلدىڭ تۇتقىندىعىنان بوسادى. سودان كەيىن ەكى پاتشالىقتىڭ دا ادامدارى يەرۋساليمگە ورالىپ، شىنايى عيباداتتى قالپىنا كەلتىرۋگە قولعابىس ەتتى. «ياھۋدا، بەنيامين، ەفرەم جانە ماناسا ۇرپاقتارىنىڭ كەيبىرى» يەرۋساليمگە قونىس تەپكەنىن كيەلى جازبالار راستايدى (شەج. 1-ج. 9:2، 3؛ ەزرا 6:17). ەحوبا الدىن الا ايتقانداي، ون رۋلى يسرايل پاتشالىعىنىڭ ادامدارى ەكى رۋلى ياھۋدا پاتشالىعىنىڭ ادامدارىنا قوسىلىپ، ەكەۋى ٴبىرتۇتاس بولدى.
8. ا) يشايا قانداي پايعامبارلىق ايتقان؟ ٵ) ەزەكيەل 37:21 دەگى سوزدەردەن قانداي ەكى ماڭىزدى جايتتى اڭعارۋعا بولادى؟
8 شامامەن 200 جىلداي ۋاقىت بۇرىن يشايا پايعامبار يسرايل مەن ياھۋدا حالقى تۇتقىندىقتان بوساعاننان كەيىن بىرىگەتىنىن ايتىپ كەتكەن ەدى. ول ەحوبا «يسرايلدىڭ شاشىراپ كەتكەن حالقى» مەن «ياھۋدانىڭ بىتىراپ كەتكەن حالقىن جەردىڭ ٴتورت بۇرىشىنان»، سونىڭ ىشىندە «اسسيريادان» دا جيناپ الاتىنىن پايعامبارلىق ەتكەن (يشايا 11:12، 13، 16). ەحوبا ٶزى ۋادە ەتكەندەي، «يسرايلدىكتەردى تاراپ كەتكەن حالىقتاردىڭ اراسىنان الىپ شىقتى» (ەزەك. 37:21). بۇل سوزدەردەن ەكى ماڭىزدى جايتتى اڭعارامىز. بىرىنشىدەن، ەحوبا تۇتقىنداردى «ياھۋدا» مەن «ەفرەم» دەپ بولەك-بولەك اتاماي، ولاردى ەندى ٴبىر توپ رەتىندە «يسرايلدىكتەر» دەپ اتادى. ەكىنشىدەن، مۇندا يسرايلدىكتەردىڭ ٴبىر عانا بابىل ەلىنەن ەمەس، ٴتۇرلى حالىقتاردىڭ اراسىنان، ياعني «جان-جاقتان» جينالاتىنى ايتىلدى.
9. ەحوبا ەلىنە ورالعان تۇتقىنداردى ٴبىرتۇتاس ەتۋ ٷشىن نە ىستەدى؟
9 تۇتقىندار يسرايل ەلىنە ورالعاننان كەيىن، ەحوبا ولاردى ٴبىرتۇتاس ەتۋ ٷشىن نە ىستەدى؟ ول يسرايلدىكتەردىڭ اراسىندا زوروبابەل، باس ٴدىني قىزمەتكەر ەشۋا، ەزرا جانە نەحەميا سياقتى رۋحاني باعۋشىلار تاعايىندادى. سونداي-اق ەحوبا ولارعا حاگەي، زاكاريا، مالاحي دەگەن پايعامبارلاردى جىبەردى. وسى ادال كىسىلەر حالىقتى قۇداي زاڭدارىن ۇستانۋعا تالپىندىرۋ ٷشىن بار كۇشتەرىن سالدى (نەح. 8:2، 3). بۇعان قوسا، حالقىنىڭ جاۋلارى قاستاندىق ويلاستىرعاندا، ەحوبا ولاردىڭ جوسپارلارىن بۇزىپ، يسرايلدى قورعاپ وتىردى (ەست. 9:24، 25؛ زاك. 4:6).
ەحوبا حالقىن ٴبىرتۇتاس ەتۋ ٷشىن، رۋحاني باعۋشىلار تاعايىندادى (9-ابزاستى قاراڭىز)
10. شايتان اقىرى ٶز دەگەنىنە قالاي جەتتى؟
10 ٴبىر وكىنىشتىسى، ەحوبا يسرايلدىكتەر ٷشىن سۇيىسپەنشىلىكپەن قانشا شارا جاساسا دا، ولاردىڭ كوبىسى تازا عيباداتتى ۇستانباي كەتتى. ولاردىڭ نە ىستەگەندەرى كيەلى جازبالاردىڭ تۇتقىندار ەلدەرىنە ورالعاننان كەيىن جازىلعان كىتاپتارىندا ايتىلادى (ەزرا 9:1—3؛ نەح. 13:1، 2، 15). ەلدەرىنە كەلگەلى ٴجۇز جىل وتەر-وتپەس، يسرايلدىكتەر تازا عيباداتتان مۇلدەم الشاقتاپ كەتتى. ٴتىپتى ەحوبا ولاردى: «ماعان بەت بۇرىڭدار»،— دەپ شاقىرۋعا ٴماجبۇر بولدى (مالح. 3:7). يسا جەرگە كەلگەن كەزدە ياھۋديلەردىڭ ٴدىنى بىرنەشە سەكتاعا ٴبولىنىپ ۇلگەرگەن ەدى. ال جەتەكشىلەرى بولسا وپاسىز باعۋشىلار بولاتىن (مات. 16:6؛ مار. 7:5—8). شايتان بىرلىكتىڭ تولىق ورناۋىنا مۇرشا بەرمەي، ٶز دەگەنىنە جەتتى. ٴبىراق ەحوبانىڭ بىرلىككە قاتىستى پايعامبارلىعى ٴبارىبىر ورىندالماق ەدى. قالايشا؟
«قىزمەتشىم ٴداۋىت ولاردىڭ پاتشاسى بولادى»
11. ا) ەحوبا بىرلىك تۋرالى پايعامبارلىعىنا قاتىستى نەنى ايان ەتتى؟ ٵ) شايتان كوكتەن قۋىلعان سوڭ، قايتادان نە ىستەگىسى كەلدى؟
11 ەزەكيەل 37:24 وقىڭىز. ەحوبا ٶزىنىڭ بىرلىك تۋرالى پايعامبارلىعى «قىزمەتشىسى ٴداۋىت»، ياعني يسا ٴماسىح پاتشا بولعان كەزدە عانا تولىق ورىندالماق ەكەنىن ايان ەتتى. ال يسا ٴماسىح 1914-جىلى بيلىك ەتە باستادى * (سام. 2-ج. 7:16؛ لۇقا 1:32). بۇل ۋاقىتقا دەيىن كادىمگى يسرايلدى «قۇدايدىڭ يسرايلى» الماستىرىپ قويعان ەدى (ەرم. 31:33؛ عال. 3:29؛ 6:16). شايتان كوكتەن قۋىلعان سوڭ، قايتادان قۇداي حالقىنىڭ بىرلىگىن بۇزۋعا كوشتى (ايان 12:7—10). مىسالى، 1916-جىلى راسسەلل باۋىرلاس قايتىس بولعاندا، شايتان وسى مۇمكىندىكتى پايدالانىپ، جولدانتايۋشىلار ارقىلى مايلانعانداردىڭ اراسىنا ىرىتكى سالۋعا تىرىستى. الايدا كوپ ۇزاماي جولدانتايۋشىلار ۇيىمنان كەتىپ قالدى. شايتان العان بەتىنەن قايتپاي، ۇيىمعا جەتەكشىلىك ەتكەن ەر باۋىرلاستاردى تۇرمەگە جاپقىزدى. ٴبىراق بۇل ارەكەتى دە ەحوبانىڭ حالقىن قۇرتا المادى. مايلانعان باۋىرلاستار ەحوباعا دەگەن ادالدىقتارىنان اينىماي، بىرلىكتەرىن ساقتاپ قالدى.
12. شايتاننىڭ رۋحاني يسرايلدىڭ اراسىنا ىرىتكى سالماق بولعان جوسپارى نەگە ىسكە اسپاي قالدى؟
12 كادىمگى يسرايلدەن ايىرماشىلىعى — رۋحاني يسرايل ارالارىنا ىرىتكى سالماق بولعان شايتاننىڭ ايلا-امالدارىنا بەرىلمەدى. شايتاننىڭ جوسپارى نەگە ىسكە اسپاي قالدى؟ ويتكەنى مايلانعان ماسىحشىلەر ەحوبانىڭ نورمالارىن بارىنشا ۇستاندى. سونىڭ ارقاسىندا ولار شايتانعا قارسى سوعىستا جەڭىسكە جەتىپ كەلە جاتقان پاتشا يسا ٴماسىحتىڭ قورعانىشىندا بولدى (ايان 6:2).
ەحوبا قىزمەتشىلەرىن «ٴبىرتۇتاس» ەتەدى
13. ەكى تاياقتىڭ بىرىگۋى جايلى پايعامبارلىق قانداي ماڭىزدى شىندىقتى ايقىن ەتەدى؟
13 ەكى تاياقتىڭ بىرىگۋى جايلى پايعامبارلىقتىڭ ٴبىزدىڭ كۇندەرىمىزگە قانداي قاتىسى بار؟ ەسىمىزدە بولسا، بۇل پايعامبارلىقتىڭ ٴمانى ەكى توپتىڭ ٴبىرتۇتاس بولۋى تۋرالى ەدى. ٴبىراق بارىنەن دە ماڭىزدىسى، بۇل بىرلىكتى ەحوبانىڭ ٶزى ورناتپاق ەدى. ەندەشە، ەكى تاياقتىڭ بىرىگۋى جايلى وسى پايعامبارلىق تازا عيبادات جايلى مىنا ٴبىر ماڭىزدى شىندىقتى ايقىن ەتەدى: ەحوبانىڭ ٶزى قىزمەتشىلەرىن «ٴبىرتۇتاس» ەتەدى (ەزەك. 37:19).
14. ەكى تاياقتىڭ بىرىگۋى جايلى پايعامبارلىق 1919-جىلدان باستاپ كەڭ كولەمدە قالاي ورىندالا باستادى؟
14 1919-جىلدان باستاپ، ياعني قۇداي حالقى رۋحاني تازارىپ، رۋحاني جۇماققا اياق باسقاننان كەيىن، ەكى تاياقتىڭ بىرىگۋى جايلى پايعامبارلىق كەڭ كولەمدە ورىندالا باستادى. سول ۋاقىتتا بىرىككەن قۇداي حالقىنىڭ باسىم بولىگى كوكتە پاتشا ٵرى ٴدىني قىزمەتكەر بولۋعا ٷمىتتى ەدى (ايان 20:6). بەينەلەپ ايتقاندا، بۇل مايلانعاندار «ياھۋدانىڭ» تاياعى، ياعني داۋىتتەن تاراعان پاتشالار مەن لەۋىدەن تاراعان ٴدىني قىزمەتكەرلەردەن تۇراتىن حالىق ەدى. الايدا ۋاقىت وتە بۇل رۋحاني ياھۋديلەرگە جەردە ٶمىر سۇرۋگە ۇمىتتەنەتىن ادامدار كوپتەپ قوسىلدى. بۇل ادامدار «ەفرەم تاياعىن»، ياعني ارالارىندا داۋىتتەن تاراعان پاتشالار مەن لەۋىدەن تاراعان ٴدىني قىزمەتكەرلەر بولمايتىن حالىقتى ٴبىلدىردى. بۇل ەكى توپ ەحوبانىڭ حالقى رەتىندە ٴبىر پاتشانىڭ، يسا ٴماسىحتىڭ، قول استىندا بىرلىكتە قىزمەت ەتۋدە (ەزەك. 37:24).
«ولار مەنىڭ حالقىم بولماق»
15. ەزەكيەل 37:26، 27 دە ايتىلعان پايعامبارلىق بۇگىندە قالاي ورىندالىپ جاتىر؟
15 ەزەكيەلدىڭ پايعامبارلىعىنان كورىنەتىندەي، مايلانعاندارعا كوپ ادام قوسىلىپ، ٴبارى بىرگە تازا عيبادات ەتەتىن بولادى. ەحوبا ٶز حالقىنىڭ سانىن كوبەيتەتىنىنە نۇسقاپ: «ولاردى... ٶسىرىپ-وندىرەمىن»،— دەگەن. سونداي-اق: «كيەلى شاتىرىم سولاردىڭ ۇستىندە بولادى»،— دەپ ايتقان (ەزەك. 37:26، 27). بۇل سوزدەر ەزەكيەلدەن كەيىن شامامەن 700 جىلدان سوڭ ٶمىر سۇرگەن ەلشى جوحاننىڭ پايعامبارلىعىن ەسىمىزگە سالادى. ول تاقتا وتىرعان قۇداي «ۇلى جاماعاتتىڭ» «ۇستىنەن ٶز شاتىرىن تىگەتىنىن» ايتقان (ايان 7:9، 15). بۇگىندە مايلانعاندار مەن ۇلى جاماعات ٴبىر حالىق رەتىندە قۇدايدىڭ شاتىرىنىڭ استىنان پانا تابۋدا.
16. رۋحاني يسرايل مەن جەردە ٶمىر سۇرۋگە ۇمىتتەنەتىن ادامداردىڭ بىرىگەتىنىنە قاتىستى زاكاريا قانداي پايعامبارلىق ايتتى؟
16 وتانىنا ورالعان تۇتقىنداردىڭ اراسىندا بولعان زاكاريا دا رۋحاني ياھۋديلەر مەن جەردە ٶمىر سۇرۋگە ٷمىتى بار ادامداردىڭ بىرىگەتىنى تۋرالى پايعامبارلىق ەتكەن. ول بىلاي دەگەن: «بارلىق حالىقتاردان شىققان ون ادام ياھۋديدىڭ ەتەگىنە جارماسىپ، وعان: «ٴبىز سەنىمەن بارامىز، ويتكەنى قۇداي سەنىڭ حالقىڭمەن بىرگە ەكەنىن ەستىدىك»،— دەيتىن بولادى» (زاك. 8:23). مۇنداعى «ياھۋدي» دەگەن ٴسوز جەكە ٴبىر ادامعا ەمەس، كوپ ادامعا، ياعني «حالىققا» نۇسقايدى. بۇل «حالىق» بۇگىندە مايلانعانداردىڭ تامتىعىن، ياعني رۋحاني ياھۋديلەردى بەينەلەيدى (ريم. 2:28، 29). ال «ون ادام» جەردە ٶمىر سۇرۋگە ٷمىتى بار ادامداردى بىلدىرەدى. ولار مايلانعانداردىڭ «ەتەگىنە جارماسىپ»، ولاردىڭ سوڭىنان ەرەدى (يشايا 2:2، 3؛ مات. 25:40). تارماقتاعى «ەتەگىنە جارماسىپ» جانە «سەنىمەن بارامىز» دەگەن سوزدەر ەكى توپتىڭ تولىقتاي بىرلىكتە بولاتىنىنا نۇسقايدى.
17. يسا بۇگىندە ارامىزدا ورناعان بىرلىكتى قالاي سيپاتتاعان؟
17 يسا ٶزىنىڭ قويلارى (مايلانعاندار) مەن «باسقا قويلار» (جەردە ٶمىر سۇرۋگە ۇمىتتەنەتىندەر) ٴبىر باعۋشىسى بار «ٴبىر وتار» بولاتىندىعىن ايتقاندا، ەزەكيەلدىڭ وسى پايعامبارلىعىن ويدا تۇتسا كەرەك (جوح. 10:16؛ ەزەك. 34:23؛ 37:24، 25). يسانىڭ وسى سوزدەرى مەن ەجەلدە پايعامبارلاردىڭ ايتىپ كەتكەندەرى كوكتە نە جەردە ٶمىر سۇرۋگە ۇمىتتەنبەيىك — ٴبارىمىزدىڭ ارامىزداعى تاڭعاجايىپ بىرلىكتى تاماشا سيپاتتايدى! جالعان ٴدىن سانسىز كوپ اعىمدارعا تارماقتالىپ، جىك-جىككە ٴبولىنىپ جاتقاندا، ٴبىز عاجايىپ بىرلىكتىڭ قۇشاعىندا تاتۋ-ٴتاتتى ٶمىر كەشۋدەمىز.
بۇگىندە مايلانعاندار مەن ۇلى جاماعات «ٴبىر وتار» رەتىندە ەحوباعا بىرلىكتە عيبادات ەتىپ ٴجۇر (17-ابزاستى قاراڭىز)
«عيباداتحانامدى ارالارىنا ماڭگىگە ورناتامىن»
18. ەزەكيەل 37:28 دەن كورىنەتىندەي، قۇداي حالقىنىڭ «وسى دۇنيەلىك» بولماۋى نەگە ماڭىزدى؟
18 بىرلىككە قاتىستى ايتقان پايعامبارلىعىنىڭ سوڭىندا ەزەكيەل ٴبىزدىڭ ارامىزداعى بىرلىكتىڭ مىزعىماستاي بەرىك بولاتىنىنا نازار اۋداردى (ەزەكيەل 37:28 وقىڭىز). قۇداي حالقىنىڭ اراسىنداعى بىرلىكتىڭ سىرى — ولاردىڭ «ارالارىنا» ەحوبانىڭ عيباداتحاناسى، ياعني تازا عيبادات ورناعان. ولار وزدەرىن كيەلى ساقتاسا عانا، ياعني وزدەرىن شايتاننىڭ دۇنيەسىنەن بولەك ۇستاعان جاعدايدا عانا، بۇل عيباداتحانا ارالارىندا قالا بەرمەك (قور. 1-ح. 6:11؛ ايان 7:14). يسا دا وسى دۇنيەلىك بولماۋدىڭ ماڭىزدىلىعىن ەرەكشە اتاپ وتكەن. ولەر الدىنداعى ٴتۇنى شاكىرتتەرى ٷشىن بار جۇرەگىمەن دۇعا ايتقان كەزدە ول: «كيەلى اكە... ولاردى قورعاي كور. وسىلاي... ولار بىرلىكتە بولسىن... ولار وسى دۇنيەلىك ەمەس. ولاردى شىندىعىڭ ارقىلى قاسيەتتى ەتە كور»،— دەگەن (جوح. 17:11، 16، 17). يسانىڭ «بىرلىكتە بولۋ» مەن «وسى دۇنيەلىك» بولماۋدى قالاي بايلانىستىرعانى — نازار اۋدارارلىق جايت.
19. ا) «قۇدايعا ەلىكتەيتىنىمىزدى» قالاي كورسەتە الامىز؟ ٵ) ولەر الدىنداعى ٴتۇنى يسا بىرلىككە قاتىستى قانداي ماڭىزدى جايتقا نازار اۋداردى؟
19 يسانىڭ قۇدايدى «كيەلى اكە» دەپ اتاعانى تەك وسى تارماقتا عانا كەزدەسەدى. راسىندا دا، ەحوبا — شەكسىز تازا ٵرى ٵدىل قۇداي. ول ەجەلدە يسرايلگە: «مەن كيەلى بولعاندىقتان، سەندەر دە كيەلى بولىڭدار»،— دەپ بۇيىرعان (مۇس. 3-ج. 11:45). «قۇدايعا ەلىكتەيتىندىكتەن»، ٴبىز دە ونىڭ وسى بۇيرىعىن ورىنداپ، بارلىق جاعىنان كيەلى بولعىمىز كەلەدى (ەفەس. 5:1؛ پەت. 1-ح. 1:14، 15). «كيەلى» ٴسوزى ادامدارعا قاتىستى قولدانىلعان كەزدە ادەتتە «بولەكتەپ الۋ» دەگەن ماعىنانى بىلدىرەدى. سوندىقتان دا ولەر الدىنداعى ٴتۇنى يسا شاكىرتتەرى وزدەرىن جىك-جىككە بولىنگەن وسى دۇنيەدەن بولەك ۇستاسا عانا، بىرلىكتەرىن ساقتاي الاتىندارىنا نازار اۋدارعان.
«ولاردى... زۇلىمنان قورعاي كور»
20، 21. ا) قۇدايدىڭ ٴبىزدى قورعايتىنىنا دەگەن سەنىمىمىزدى نە نارسە نىعايتادى؟ ٵ) ٴسىز نە نارسەگە بەكىندىڭىز؟
20 بۇگىندە جەرجۇزىندەگى ەحوبا كۋاگەرلەرىنىڭ اراسىنداعى تاماشا بىرلىك — ەحوبا يسانىڭ «ولاردى... زۇلىمنان قورعاي كور» دەگەن وتىنىشىنە جاۋاپ بەرگەنىنىڭ دالەلى (جوحان 17:14، 15 وقىڭىز). قۇداي حالقىنىڭ بىرلىگىن ويران ەتكىسى كەلگەن شايتاننىڭ ارەكەتىنەن تۇك شىقپاعانى ەحوبا ٴبىزدى قورعايتىنىنا دەگەن سەنىمىمىزدى ودان سايىن نىعايتادى. ەزەكيەلدىڭ پايعامبارلىعىندا ەكى تاياق ەحوبانىڭ قولىندا ٴبىرتۇتاس بولاتىنى ايتىلعان ەدى. حالقىن كەرەمەت تۇردە بىرىكتىرىپ، قورعاپ وتىرعان ەحوبانىڭ ٶزى بولعاندىقتان، شايتان ٶز دەگەنىنە جەتە المايدى.
21 ولاي بولسا، ارامىزداعى باعا جەتپەس بىرلىككە ٶز ۇلەسىمىزدى قوسۋ ٷشىن ٵرى قاراي دا ايانباي كۇش سالايىق. بۇل ٷشىن ٵرقايسىسىمىز ەحوبانىڭ رۋحاني عيباداتحاناسىندا ۇنەمى تازا عيبادات ەتىپ ٴجۇرۋىمىز كەرەك. بۇل عيبادات نەنى قامتيتىنىن كەلەسى ەكى تاراۋدان بىلەتىن بولامىز.
^ 7-ابزاس ەزەكيەل وسى پايعامبارلىقتى الاردان ەكى عاسىرداي بۇرىن، ون رۋلى پاتشالىقتىڭ ادامدارى («ەفرەم تاياعى») اسسيرياعا جەر اۋدارىلىپ كەتكەن بولاتىن (پات. 2-ج. 17:23).
^ 11-ابزاس بۇل پايعامبارلىق وسى باسىلىمنىڭ 8-تاراۋىندا ەگجەي-تەگجەيلى قاراستىرىلعان.
