قورشاۋ ا15
اپالى-ٴسىڭلىلى ەكى جەزوكشە
ەزەكيەل كىتابىنىڭ 23-تاراۋىندا قۇداي ٶزىنىڭ ادالدىق ساقتاماعان حالقىن وتكىر سوزدەرمەن ايىپتاعانى جايلى وقيمىز. 16-تاراۋداعىداي، بۇل تاراۋدا دا جەزوكشە جايلى مىسال كەلتىرىلەدى. وندا يەرۋساليم ٴسىڭلىسى، ال ساماريا اپكەسى دەپ اتالعان. ەكى تاراۋدا دا ٴسىڭلىسى جەزوكشە اپكەسىنىڭ ٸزىن قۋىپ، ٴتىپتى زۇلىمدىعى مەن ازعىندىعى جاعىنان ودان اسىپ تۇسكەنى جايلى ايتىلادى. 23-تاراۋدا ەحوبا بۇل اپالى-سىڭلىلىلەردىڭ ەسىمدەرىن اتايدى: يسرايلدىڭ ون رۋلى پاتشالىعىنىڭ استاناسى ساماريانى بىلدىرەتىن اپكەسىنىڭ اتى — وحولا. ال ياھۋدانىڭ استاناسى يەرۋساليمدى بىلدىرەتىن ٴسىڭلىسىنىڭ اتى — وحوليبا * (ەزەك. 23:1—4).
بۇل ەكى تاراۋدىڭ باسقا دا ۇقساستىقتارى بار. ولاردىڭ ىشىندە باستى ۇقساستىعى مىناۋ: ونداعى جەزوكشەلەر العاشىندا ەحوبانىڭ ايەلى بولعان، ال كەيىن وعان وپاسىزدىق جاساعان. سونداي-اق بۇل ەكى تاراۋدا دا ولاردىڭ قايتا قالپىنا كەلەتىندەرى جايلى ٷمىت حابارى بار. بۇل ٷمىت 23-تاراۋدان اسا انىق بايقالمايدى. دەگەنمەن ونداعى ەحوبانىڭ: «سوراقى قىلىقتارىڭ مەن جەزوكشەلىگىڭدى تىيامىن»،— دەگەن سوزدەرى 16-تاراۋداعى ٷمىت حابارىنا ۇقساس (ەزەك. 16:16، 20، 21، 37، 38، 41، 42؛ 23:4، 11، 22، 23، 27، 37).
ولار ماسىحشىلەر الەمىن بىلدىرە مە؟
بۇعان دەيىن ٴبىزدىڭ ادەبيەتتەردە وحولا مەن وحوليبا دەگەن اپالى-سىڭلىلىلەر ماسىحشىلەر الەمىنىڭ، اسىرەسە كاتوليك پەن پروتەستانت اعىمدارىنىڭ تۇپبەينەسى دەپ ايتىلىپ كەلدى. الايدا دۇعا ەتە وتىرىپ وي جۇگىرتۋدىڭ جانە زەرتتەۋدىڭ ناتيجەسىندە مىناداي سۇراقتار تۋىندادى: قاشان ماسىحشىلەر الەمى قانداي دا ٴبىر ماعىنادا ەحوبانىڭ ايەلى بولىپ ەدى؟ قاشان ونىمەن كەلىسىمگە تۇرىپ ەدى؟ ەشقاشان! قۇداي يسانى كەلىستىرۋشىسى رەتىندە قولدانىپ، رۋحاني يسرايلمەن «جاڭا كەلىسىم» جاساسقان كەزدە ماسىحشىلەر الەمى ٵلى پايدا بولماعان ەدى (ەرم. 31:31؛ لۇقا 22:20). ونىڭ ۇستىنە، ماسىحشىلەر الەمى ەشقاشان مايلانعان ماسىحشىلەردەن تۇراتىن رۋحاني حالىقتىڭ ٴبىر بولىگى بولعان ەمەس. ماسىحشىلەر الەمى ەلشىلەر قايتىس بولعان سوڭ ٴبىرشاما ۋاقىت وتكەننەن كەيىن ب.ز. IV عاسىرىندا پايدا بولدى. جولدان تايعان ٵرى بۇلىنگەن بۇل ۇيىم يسانىڭ بيداي مەن ارامشوپ جايلى پايعامبارلىعىندا ايتىلعان «ارامشوپتەن»، ياعني جالعان ماسىحشىلەردەن قۇرالدى (مات. 13:24—30).
اپالى-ٴسىڭلىلى ەكى جەزوكشە ماسىحشىلەر الەمىن ٴبىلدىرۋى مۇمكىن ەمەس ەكەنىنىڭ تاعى ٴبىر سەبەبى — ەحوبا ادالدىق ساقتاماعان يەرۋساليم مەن ساماريانىڭ قايتا قالپىنا كەلۋگە ۇمىتتەرى بار ەكەنىن ايتقان (ەزەك. 16:41، 42، 53—55). ال كيەلى كىتاپتا ماسىحشىلەر الەمىنىڭ وسىنداي ٷمىتى بار دەپ ايتىلا ما؟ جوق! ونىڭ دا، ۇلى بابىلدى قۇرايتىن وزگە دىندەردىڭ دە ەشقانداي ٷمىتى جوق.
سونىمەن، جوعارىدان وحولا مەن وحوليبا ماسىحشىلەر الەمىنىڭ تۇپبەينەسى ەمەس ەكەنىن كوردىك. الايدا ەكەۋىنىڭ مىسالى ەحوبانىڭ حالقىمىز دەي تۇرا، ونىڭ كيەلى ەسىمىن قورلايتىن جانە تازا عيباداتقا قاتىستى ورناتقان نورمالارىن اياقاستى ەتەتىن ادامدارعا ونىڭ قالاي قارايتىنىن تۇسىنۋگە كومەكتەسەدى. وسى رەتتە ماسىحشىلەر الەمىنىڭ ايىبى وتە اۋىر، ويتكەنى ونىڭ سانسىز كوپ شىركەۋلەرى وزدەرىن قۇدايدىڭ وكىلىمىز دەيدى. بۇل بىلاي تۇرسىن، ولار ەحوبانىڭ سۇيىكتى ۇلى يسا ٴماسىحتى كوسەمىمىز دەي تۇرا، ونى ٷش بەتى بار ۇشتىك قۇدايىنىڭ ٴبىرى دەپ ۇيرەتەدى، ٵرى ونىڭ «وسى دۇنيەلىك» بولماۋعا قاتىستى انىق تالابىنا مويىنسۇنبايدى (جوح. 15:19). ماسىحشىلەر الەمى پۇتقا تابىنۋشىلىق پەن ساياسي ىستەرگە قويماي ارالاسۋىمەن ٶزىنىڭ «ۇلى جەزوكشەنىڭ» ٴبىر بولىگى ەكەنىن دالەلدەدى (ايان 17:1). جالعان دىندەر يمپەرياسى جويىلاتىنداي، ونى دا جويىلۋ كۇتىپ تۇرعانى ٴشۇباسىز!
^ 3-ابزاس بۇل ەسىمدەردىڭ ماعىناسى بار. وحولا دەگەن «ونىڭ [عيبادات ەتەتىن] شاتىرى» دەگەندى بىلدىرەدى. بۇل ەسىم يسرايل حالقى يەرۋساليمدەگى ەحوبانىڭ عيباداتحاناسىنا بارماي، ٶز عيبادات ورىندارىن تۇرعىزىپ العانىنا نۇسقايدى. ال وحوليبا دەگەن «مەنىڭ [عيبادات ەتەتىن] شاتىرىم ونىڭ ىشىندە» دەگەندى بىلدىرەدى. بۇل ەحوبانىڭ عيبادات ٷيى يەرۋساليمدە بولعانىنا نۇسقايدى.