قورشاۋ ٵ1
ەزەكيەل كىتابىنا شولۋ
ەزەكيەل كىتابىنداعى تاراۋلاردى بىلايشا توپتاستىرۋعا بولادى:
1—3-تاراۋلار
ب.ز.ب. 613-جىلى بابىلدا جەر اۋدارىلعان ياھۋديلەرمەن بىرگە جۇرگەندە، ەزەكيەل ەحوبادان ايان الادى. ەحوبا ونى كەبار وزەنىنىڭ ماڭىندا تۇرىپ جاتقان ياھۋديلەرگە پايعامبارلىق ايتۋعا جىبەرەدى.
4—24-تاراۋلار
ب.ز.ب. 613—609-جىلدار ارالىعىندا ەزەكيەل يەرۋساليمگە جانە ونىڭ بۇلىكشى، پۇتقا تابىنۋشى حالقىنا قارسى ۇكىمدەر ايتادى.
25—32-تاراۋلار
ب.ز.ب. 609-جىلى بابىلدىقتار يەرۋساليمدى اقىرعى رەت قورشاۋعا الادى. وسى جىلدان باستاپ ەزەكيەل يەرۋساليمنىڭ جان-جاعىنداعى دۇشپان ەلدەرگە قارسى ۇكىم ايتا باستايدى. ولار: اممون، مواب، ەدوم، ٴفىلىستىر، تير، سيدون جانە مىسىر.
33—48-تاراۋلار
ب.ز.ب. 606-جىلى يەرۋساليم مەن عيباداتحانا قيراپ جاتقان كەزدە، جات ەلدە جۇرگەن ەزەكيەل حالىقتىڭ نازارىن ٷمىت بەرەتىن حابارعا بۇرادى. بۇل — ەحوبا قۇدايعا تيەسىلى تازا عيباداتتىڭ قالپىنا كەلەتىنى جايىنداعى حابار.
ەزەكيەل كىتابى حرونولوگيالىق رەتپەن ٵرى تاقىرىپ بويىنشا جازىلعان. يەرۋساليم مەن ونداعى عيباداتحانانىڭ قيرايتىنى جونىندەگى پايعامبارلىقتار تازا عيباداتتىڭ قالپىنا كەلەتىنى جايىنداعى پايعامبارلىقتاردان بۇرىن جازىلعان. مۇنداي رەتپەن جازىلعانى بەكەر ەمەس، ويتكەنى تازا عيباداتتىڭ قالپىنا كەلەتىنى جايلى ايتىلعانىنىڭ ٶزى ونىڭ توقتاپ قالعانىن كورسەتەدى.
يەرۋساليمگە قارسى ايتقان ۇكىمى مەن تازا عيباداتتىڭ قالپىنا كەلەتىنى جايلى پايعامبارلىعىنىڭ ورتاسىندا ەزەكيەل دۇشپان حالىقتارعا ۇكىم ايتقان (25—32-تاراۋلار). دۇشپاندارعا ايتىلعان سول ۇكىم حابارى جايىندا ٴبىر زەرتتەۋشى عالىم بىلاي دەيدى: «قۇدايدىڭ ٶز حالقىنا قاھارىن توگەتىنى تۋرالى پايعامبارلىق پەن ولارعا قايتا مەيىرىمىن توگەتىنى تۋرالى پايعامبارلىقتىڭ اراسىندا وسى ۇكىمنىڭ ايتىلعانى وتە ورىندى. ويتكەنى دۇشپان حالىقتاردىڭ جازالانۋى قۇداي حالقىنىڭ قۇتقارىلۋىنىڭ ٴبىر بەلگىسى ەدى».