باسقارۋشى كەڭەستىڭ حاتى
قادىرمەندى جاريالاۋشى!
ەلەستەتىپ كورىڭىزشى، ٴسىز ٴزايتۇن تاۋىندا تۇرعان ەلشىلەردىڭ ٴبىرىسىز. كەنەت الدىڭىزدا يسا پايدا بولدى. كوككە كوتەرىلەر الدىندا ول: «وزدەرىڭە كيەلى رۋح قونعاندا كۇش-قۋاتقا يە بولىپ، يەرۋساليمدە، بۇكىل ياھۋدەيا مەن ساماريادا جانە جەردىڭ قيىر شەتىنە دەيىن مەن جايلى كۋالىك ەتەسىڭدەر»،— دەدى (ەل. ٸس. 1:8). مۇنى ەستىگەندە نە سەزىنەر ەدىڭىز؟
بالكىم، بۇل تاپسىرما سىزگە الىنباس قامالداي كورىنەر. ٴسىز: «ساۋساقپەن سانارلىقتاي از عانا شاكىرت قالايشا جەردىڭ قيىر شەتىنە دەيىن كۋالىك بەرمەكشى؟»— دەپ ويلارسىز. ودان قالسا، يسانىڭ ولەر ٴتۇنى ايتقان مىنا ەسكەرتۋى دە ويىڭىزعا ورالاتىن شىعار: «قۇل قوجايىنىنان ۇلكەن ەمەس. ولار مەنى قۋدالاسا، سەندەردى دە قۋدالايدى. ال ەگەر مەنىڭ سوزدەرىمدى ۇستانسا، سەندەردىكىن دە ۇستانادى. ولار وسىنىڭ ٴبارىن سەندەرگە مەنىڭ اتىما بولا ىستەيدى، سەبەبى مەنى جىبەرگەندى بىلمەيدى» (جوح. 15:20، 21). وسىنى ويلاعاندا، «قارسىلىقتار مەن قۋعىن-سۇرگىنگە قاراماي، قالاي تۇبەگەيلى كۋالىك بەرەمىن؟» دەپ ۋايىمدارسىز.
مۇنداي سۇراقتار ٴبىزدىڭ دە سانامىزدا تۋىندايدى. بىزگە دە، ەحوبا كۋاگەرلەرىنە، «جەردىڭ قيىر شەتىنە دەيىن» «بارلىق حالىقتارعا» تۇبەگەيلى كۋالىك بەرۋ ٸسى تاپسىرىلعان (مات. 28:19، 20). بۇل ٸستى قالاي اتقارا الامىز، اسىرەسە قۋعىن-سۇرگىن كەزىندە؟
ەلشىلەردىڭ ىستەرى كىتابى ٴبىرىنشى عاسىرداعى ەلشىلەر مەن وزگە دە ماسىحشىلەر ەحوبانىڭ كومەگىمەن تاپسىرمالارىن قالاي اتقارعانى جايلى كوڭىل باۋرايتىن وقيعالارعا تولى. قولىڭىزداعى وسى كىتاپ كوز ىلەسپەس جىلدامدىقپەن وربىگەن سول قىزىقتى وقيعالارعا تەرەڭ بويلاۋعا ارنالعان. ونى وقۋ بارىسىندا قۇدايدىڭ ٴبىرىنشى عاسىرداعى قىزمەتشىلەرى مەن بۇگىنگى حالقىنىڭ اراسىندا كوپ ۇقساستىق بار ەكەنىن كورىپ تاڭعالاسىز. ٴسىز ۋاعىز ٸسىمىز عانا ەمەس، ونىڭ قالاي ۇيىمداستىرىلعانى دا ۇقساس ەكەنىن بايقايسىز. بۇل ۇقساستىقتار جايلى وي جۇگىرتسەڭىز، ەحوبا الىگە دەيىن ٶزىنىڭ جەردەگى ۇيىمىن جەتەلەپ كەلە جاتقانىنا كوزىڭىز جەتە تۇسەدى.
ەلشىلەردىڭ ىستەرى كىتابىن زەرتتەي كەلە ەحوبانىڭ سىزگە دە كومەكتەسەتىنىنە، كيەلى رۋحىمەن قولداپ-دەمەيتىنىنە سەنىمىڭىز ارتا تۇسەدى دەپ ۇمىتتەنەمىز جانە سول ٷشىن دۇعا ەتەمىز. بۇل كىتاپتاعى ويلار سىزگە ٵرى قاراي دا قۇداي پاتشالىعى جايلى «تۇبەگەيلى كۋالىك بەرۋگە» جانە وزگەلەردى قۇتقارىلۋ جولىنا باعىتتاۋعا سەرپىن بەرگەي! (ەل. ٸس. 28:23؛ ٴتىم. 1-ح. 4:16).
باۋىرلاستارىڭىز،
ەحوبا كۋاگەرلەرىنىڭ باسقارۋشى كەڭەسى
