8-تاراۋ
»قاۋىمدار تىنىش كۇندەردى باستان كەشىردى»
وزبىر قۋدالاۋشى ساۋل وتتاي جالىنداعان قىزمەتشىگە اينالدى
ەلشىلەردىڭ ىستەرى 9:1—43-نەگىزدەلگەن
1، 2. ساۋل داماسكىگە نە ٷشىن بارا جاتتى؟
بەت-جۇزدەرى قارا بۇلتتاي تۇنەرگەن جولاۋشىلار زىميان نيەتتەرىن ىسكە اسىرۋ ٷشىن داماسك قالاسىنا جاقىنداپ كەلەدى. ولار وزدەرى جەك كورەتىن يسانىڭ شاكىرتتەرىن ۇيلەرىنەن كۇشتەپ شىعارىپ، قول-اياقتارىن بايلاپ، قورلاپ، يەرۋساليمگە جوعارعى كەڭەستىڭ الدىنا سۇيرەپ الىپ كەلمەكشى.
2 بۇل توپتىڭ جەتەكشىسى — ونسىز دا قولى قانعا مالىنعان ساۋل a. جاقىندا عانا ول ٶزى سياقتى فاناتتاردىڭ يسانىڭ ادال شاكىرتى ستەپاندى تاسپەن اتقىلاپ ولتىرگەنىن ماقۇلداپ، قاراپ تۇردى (ەل. ٸس. 7:57—8:1). ول يسانىڭ يەرۋساليمدەگى ٸزباسارلارىن قۋدالاعاندى از كورىپ، قۋعىن-سۇرگىندى باسقا جەرلەردە دە ٶرشىتۋدى كوزدەدى. ول «جول» دەپ اتالاتىن قاۋىپتى سەكتانىڭ كوزىن قۇرتقىسى كەلدى (ەل. ٸس. 9:1، 2؛ «ساۋلدىڭ العان وكىلەتتىگى» دەگەن قورشاۋدى قاراڭىز).
3، 4. ا) ساۋلمەن قانداي جاعداي بولدى؟ ٵ) ٴبىز قانداي سۇراقتاردى تالقىلايمىز؟
3 كەنەت كوكتەن ساۋلە ٴتۇسىپ، ساۋلدىڭ اينالاسىن جارقىراتىپ جىبەردى. قاسىنداعى سەرىكتەرى جارىقتى كورگەندە، قورقىپ كەتكەندەرى سونشا — تىلدەرى بايلانىپ سويلەي الماي قالدى. ال ساۋلدىڭ كوزى كورمەي قالىپ، جەرگە قۇلاپ ٴتۇستى. سول كەزدە كوكتەن: «ساۋل، ساۋل، مەنى نەگە قۋدالاپ ٴجۇرسىڭ؟»— دەگەن داۋىستى ەستىدى. ساۋل نە بولىپ جاتقانىن تۇسىنبەي: «ٴسىز كىمسىز؟»— دەپ سۇرادى. «مەن ٶزىڭ قۋدالاپ جۇرگەن يسامىن» دەگەن جاۋاپتى ەستىگەندە، ونىڭ توبەسىنە جاي تۇسكەندەي بولدى (ەل. ٸس. 9:3—5؛ 22:9).
4 يسانىڭ ساۋلعا ايتقان العاشقى سوزدەرىنەن نە بىلەمىز؟ ساۋل يسانىڭ شاكىرتى بولعاندا ورىن العان وقيعالاردان قانداي ساباق الامىز؟ سول جاعدايدان كەيىن ورناعان تىنىش كۇندەردى قاۋىمدار قالاي پايدالاندى جانە ٴبىز بۇدان نە ۇيرەنەمىز؟
«مەنى نەگە قۋدالاپ ٴجۇرسىڭ؟» (ەل. ٸس. 9:1—5)
5، 6. يسانىڭ ساۋلعا ايتقان سوزىنەن نە بىلەمىز؟
5 يسا ساۋلدى داماسكىگە بارار جولدا توقتاتقاندا، ول «نەگە مەنىڭ شاكىرتتەرىمدى قۋدالاپ ٴجۇرسىڭ؟» دەپ ەمەس، «نەگە مەنى قۋدالاپ ٴجۇرسىڭ؟» دەپ ايتتى (ەل. ٸس. 9:4). دەمەك، شاكىرتتەرى جاپا شەككەندە، يسا ٶزى جاپا شەككەندەي بولادى (مات. 25:34—40، 45).
6 ەگەر ماسىحكە سەنگەنىڭىز ٷشىن قيىندىق كورىپ جۇرسەڭىز، ٴبىر نارسەگە سەنىمدى بولىڭىز: ەحوبا مەن يسا ٴسىزدىڭ جاعدايىڭىزدى جاقسى بىلەدى (مات. 10:22، 28—31). بالكىم، قيىندىقتارىڭىز ازىرگە وزگەرىسسىز قالا بەرەتىن شىعار. بىراق ەستە ۇستاڭىز، يسا ستەپاننىڭ ٶلىمىن ساۋل قالاي قۇپتاپ تۇرعانىن، يەرۋساليمدەگى شاكىرتتەردى ۇيلەرىنەن قالاي سۇيرەپ شىعارعانىن — ٴبارىن-ٴبارىن كورىپ تۇردى (ەل. ٸس. 8:3). ايتكەنمەن ول شاكىرتتەرىنە اراشا تۇسكەن جوق. بىراق ەحوبا ٴماسىح ارقىلى ستەپانعا جانە باسقا دا شاكىرتتەرگە ادال بولىپ قالۋعا كۇش بەردى.
7. قۋعىن-سۇرگىنگە توتەپ بەرۋ ٷشىن نە ىستەۋىڭىز كەرەك؟
7 ٴسىز دە قۋعىن-سۇرگىنگە توتەپ بەرە الاسىز. ول ٷشىن بىلاي ىستەڭىز: 1) قانداي جاعداي بولماسىن، ادالدىق ساقتاۋعا ٴتاستۇيىن بەكىنىڭىز. 2) ەحوبادان كومەك سۇراڭىز (ٴفىلىپ. 4:6، 7). 3) كەك الۋعا تىرىسپاڭىز، ونى ەحوباعا تاپسىرىڭىز (ريم. 12:17—21). 4) ەحوبا قيىندىعىڭىزدان قۇتقارعانعا دەيىن، وعان توزۋگە كۇش بەرەتىنىنە سەنىڭىز (ٴفىلىپ. 4:12، 13).
«باۋىرلاسىم ساۋل،... يەمىز يسا مەنى جىبەردى» (ەل. ٸس. 9:6—17)
8، 9. اناني تاپسىرما العاندا، نە سەزىنسە كەرەك؟
8 يسا ساۋلدىڭ «ٴسىز كىمسىز؟» دەگەن سۇراعىنا جاۋاپ بەرگەننەن كەيىن، وعان: «تۇر دا، قالاعا بار. نە ىستەۋىڭ كەرەك ەكەنى ساعان سول جەردە ايتىلادى»،— دەدى (ەل. ٸس. 9:6). سوندا قاسىنداعىلار كوزى كورمەي قالعان ساۋلدى داماسكىگە جەتەكتەپ باردى. ول سول جەردە ٷش كۇن بويى ورازا تۇتىپ، دۇعا ەتتى. سول ارالىقتا يسا داماسكىدەگى «ياھۋديلەردىڭ ٴبارى ماقتاپ جۇرەتىن» اناني دەگەن شاكىرتكە ساۋل تۋرالى ايتىپ بەردى (ەل. ٸس. 22:12).
9 سول كەزدە اناني نە كۇلەرىن، نە جىلارىن بىلمەي قالعان شىعار. قاۋىمنىڭ باسى، قايتا تىرىلگەن يسا ٴماسىحتىڭ ٶزى ونىمەن سويلەسىپ، ارنايى تاپسىرما بەرىپ تۇر. بۇل، ارينە، اسقاق مارتەبە بولعانمەن، وڭاي تاپسىرما ەمەس-ٴتىن. ساۋلمەن سويلەسۋ كەرەكتىگىن بىلگەندە، اناني: «يەم، بۇل كىسىنىڭ يەرۋساليمدەگى قاسيەتتىلەرىڭىزگە تالاي قاستاندىق جاساعانىن كوپ ادامنان ەستىدىم. ول مۇندا ٴسىزدىڭ اتىڭىزدى اتاپ شاقىرعانداردى تۇتقىنداۋعا جوعارعى ٴدىني قىزمەتكەرلەردەن وكىلەتتىك الىپ كەلىپتى»،— دەدى (ەل. ٸس. 9:13، 14).
10. يسانىڭ انانيمەن قالاي سويلەسكەنىنەن نە تۇيەمىز؟
10 اناني ٶز ۋايىمىن ايتقاندا، يسا ونى جازعىرعان جوق. قايتا، وعان نە ىستەۋ كەرەكتىگىن انىق ٴتۇسىندىردى. يسا انانيگە وسىنداي ەرەكشە تاپسىرمانى نە ٷشىن بەرىپ جاتقانىنىڭ سەبەبىن ايتىپ، وعان قۇرمەت كورسەتتى. ساۋل تۋرالى ول مىنانى ايتتى: «مەن ونى ٶز اتىمدى باسقا حالىقتارعا، پاتشالارعا جانە يسرايل ۇلدارىنا جاريالاۋ ٷشىن تاڭداپ الدىم. وعان ٶز اتىم ٷشىن قانشا ازاپ شەگۋى ٴتيىس ەكەنىن بىلدىرەمىن» (ەل. ٸس. 9:15، 16). اناني بىردەن يسانىڭ ايتقانىن ىستەپ، قۋدالاۋشى ساۋلدى ىزدەپ تاپتى. ٴسۇيتىپ، وعان: «باۋىرلاسىم ساۋل، كوزىڭ اشىلىپ، كيەلى رۋحقا كەنەلۋىڭ ٷشىن ساعان جولدا كورىنگەن يەمىز يسا مەنى جىبەردى»،— دەدى (ەل. ٸس. 9:17).
11، 12. يسا، اناني جانە ساۋل ۇشەۋىمەن بولعان جاعدايدان نە ۇيرەنەمىز؟
11 يسا، اناني جانە ساۋل ۇشەۋىمەن بولعان جاعدايدان بىرنەشە جايتتى اڭعارامىز. مىسالى، يسا ٶزى ۋادە ەتكەندەي، ۋاعىز ىسىنە بەلسەندى تۇردە جەتەكشىلىك ەتۋدە (مات. 28:20). البەتتە، بۇگىندە ول بىزبەن تىكەلەي سويلەسىپ، باسشىلىق بەرمەيدى. بىراق «ادال دا اقىلدى قۇل» ارقىلى ول ٵلى دە ۋاعىز ٸسىن باسقارىپ كەلەدى (مات. 24:45—47). باسقارۋشى كەڭەس ٴماسىح جايلى كوبىرەك بىلگىسى كەلەتىندەردى ىزدەپ تابۋ ٷشىن جاريالاۋشىلار مەن ٸزاشارلاردى جىبەرەدى. الدىڭعى تاراۋدان بىلگەنىمىزدەي، قۇدايدان كومەك سۇراپ دۇعا ەتكەندەردىڭ كوبىسى ەحوبا كۋاگەرلەرىن كەزدەستىرگەن (ەل. ٸس. 9:11).
12 اناني مويىنسۇنىپ، بەرىلگەن تاپسىرمانى ورىندادى، سول ٷشىن جارىلقاندى. ال ٴسىز قورقىپ، قوبالجىساڭىز دا، تۇبەگەيلى كۋالىك بەرۋ تاپسىرماسىن بويسۇنۋشىلىقپەن اتقاراسىز با؟ كەيبىرەۋلەر ۇيدەن ۇيگە ٴجۇرىپ، بەيتانىس ادامدارمەن سويلەسۋگە قورقادى. ال تاعى بىرەۋلەر ٷشىن جۇمىستا، كوشەدە، تەلەفونمەن نە حاتپەن ۋاعىزداۋ قيىن. اناني قورقىنىشىن جەڭە بىلگەندىكتەن، ساۋلعا كيەلى رۋحتى يەمدەنۋگە كومەكتەسە الدى b. اناني نەنىڭ ارقاسىندا تاپسىرماسىن ٴساتتى ورىنداي الدى؟ ول يساعا سەنىم ارتتى جانە ساۋلعا باۋىرلاس دەپ قارادى. ٴبىز دە ۋاعىز ىسىنە يسا جەتەكشىلىك ەتىپ جاتقانىنا سەنىم ارتساق، ادامدارعا جاناشىرلىق تانىتساق جانە قىزمەتتە سەس كورسەتكەندەردىڭ وزىنە بولاشاق باۋىرلاس دەپ قاراساق، اناني سياقتى قورقىنىشىمىزدى سابىرعا جەڭدىرە الامىز (مات. 9:36).
«يسانىڭ قۇداي ۇلى ەكەنىن ۋاعىزداي باستادى» (ەل. ٸس. 9:18—30)
13، 14. كيەلى كىتاپتى زەرتتەپ، بىراق ٵلى شومىلدىرۋ راسىمىنەن وتپەگەن بولساڭىز، ساۋلدان قانداي ۇلگى الا الاسىز؟
13 ساۋل دەرەۋ بىلگەنىنە ساي ارەكەت ەتتى. ول جانارى قالپىنا كەلگەن سوڭ، شومىلدىرۋ راسىمىنەن ٶتىپ، داماسكىدەگى شاكىرتتەرمەن قويان-قولتىق ارالاستى. مۇنىمەن شەكتەلمەي، «بىردەن ٴماجىلىسحانالاردا يسانىڭ قۇداي ۇلى ەكەنىن ۋاعىزداي باستادى» (ەل. ٸس. 9:20).
14 ەگەر ٴسىز كيەلى كىتاپتى زەرتتەپ، بىراق ٵلى شومىلدىرۋ راسىمىنەن وتپەگەن بولساڭىز، ساۋل سياقتى بىلگەندەرىڭىزگە ساي دەرەۋ ارەكەت ەتەسىز بە؟ ارينە، ساۋل ٴماسىحتىڭ كەرەمەت جاساعانىن ٶز كوزىمەن كوردى، ٵرى بۇل ونى ٸس-ارەكەتكە تالپىندىردى. بىراق يسانىڭ كەرەمەتتەرىن كورگەن جالعىز ول ەمەس ەدى. مىسالى، ٴبىر توپ پارىزشىل يسانىڭ قولى سەمىپ قالعان ادامدى ساۋىقتىرعانىن كوردى. سونداي-اق كوپتەگەن ياھۋديلەر يسانىڭ ەلازاردى تىرىلتكەنىنە كۋا بولدى. سوندا دا يسانىڭ بۇل كەرەمەتتەرىنە ولاردىڭ جۇرەكتەرى سەلت ەتپەدى، ٴتىپتى وعان قارسى شىقتى (مار. 3:1—6؛ جوح. 12:9، 10). ال ساۋل بولسا تەرىس جولدان قايتىپ، وزگەردى. سەبەبى ول ادامنان ەمەس، قۇدايدان قورىقتى جانە يسانىڭ كورسەتكەن راقىمىن جوعارى باعالادى (ٴفىلىپ. 3:8). ٴسىزدىڭ دە كوزقاراسىڭىز ساۋلدىكىندەي بولسا، ۋاعىزعا قاتىسۋدان، شومىلدىرۋ راسىمىنەن وتۋدەن ەش تارتىنبايسىز.
15، 16. ساۋل ٴماجىلىسحانالاردا نە ىستەدى جانە داماسكىدەگى ياھۋديلەر ونىڭ ايتقان حابارىن قالاي قابىلدادى؟
15 ساۋلدىڭ يسا تۋرالى ٴماجىلىسحانالاردا ۋاعىزداي باستاعانىن كورگەندە، كەيبىرى تاڭعالسا، كەيبىرى جاعاسىن ۇستادى. بۇعان اشۋى كەلگەندەر دە بولدى. «مىناۋ يەرۋساليمدە وسى ەسىمدى اتاعاندارعا قىرعيداي تيگەن كىسى ەمەس پە؟»— دەستى ولار (ەل. ٸس. 9:21). ساۋل «يسانىڭ ٴماسىح ەكەنىن قيسىندى تۇردە دالەلدەپ»، وعان نە ٷشىن سەنگەنىن ٴتۇسىندىرىپ بەردى (ەل. ٸس. 9:22). بىراق قانشا جەردەن قيسىندى دالەل كەلتىرگەنمەن، جۇرتتىڭ ٴبارىن بىردەي سەندىرە المايسىڭ. ەگەر ادام سالت-داستۇرگە جابىسىپ قالعان بولسا ياكي كەۋدەسىنە نان پىسكەن وركوكىرەك بولسا، قيسىندى دالەلىڭە پىسقىرىپ تا قارامايدى. الايدا ساۋل العان بەتىنەن قايتقان جوق.
16 ارادان ٷش جىل وتسە دە، داماسكىدەگى ياھۋديلەر ٵلى دە ساۋلعا قارسىلاسىپ جاتتى. اقىر سوڭىندا، ولار ساۋلدى ولتىرۋگە ٴسوز بايلاستى (ەل. ٸس. 9:23؛ قور. 2-ح. 11:32، 33؛ عال. 1:13—18). بۇل جايلى ٴبىلىپ قويعاندا، ساۋل پاراساتتىلىق تانىتىپ، قالادان كەتپەك بولدى. شاكىرتتەرى ونى ٴتۇن ىشىندە قالا قابىرعاسىنداعى تەرەزەدەن سەبەتپەن تومەن ٴتۇسىرىپ جىبەردى (ەل. ٸس. 9:25). لۇقا «شاكىرتتەرى» دەپ ايتقانىنا قاراعاندا، داماسكىدەگىلەردىڭ كەيبىرى ساۋلدىڭ حابارىنا قۇلاق اسىپ، ٴماسىحتىڭ ٸزباسارى بولعان.
17. ا) كيەلى كىتاپتاعى شىندىقتاردى ادامدار قالاي قابىلداپ جاتادى؟ ٵ) ٴبىز نە ىستەي بەرۋىمىز كەرەك جانە نەگە؟
17 بالكىم، ٴسىز كيەلى كىتاپتاعى قيسىندى شىندىقتاردى ٷي ىشىندەگىلەرىڭىزگە، دوستارىڭىز بەن باسقا دا ادامدارعا ايتقاندا، ٴبارى جاقسى قابىلدايدى دەپ ويلاعان شىعارسىز. قابىلداعاندارى دا بار شىعار، بىراق كوبىسى ولاي ەتپەگەن بولار. ٴتىپتى تۋعاندارىڭىز ٴسىزدى قاس دۇشپانداي كورگەن شىعار (مات. 10:32—38). الايدا جازبالاردى جاقسىلاپ ٴتۇسىندىرۋدى ۇيرەنە بەرسەڭىز ٵرى ٴجۇرىس-تۇرىسىڭىز ماسىحشىگە ساي بولسا، قارسى بولعانداردىڭ ٶزى كەلە-كەلە ويىن وزگەرتۋى مۇمكىن (ەل. ٸس. 17:2؛ پەت. 1-ح. 2:12؛ 3:1، 2، 7).
18، 19. ا) بارنابا ساۋلعا قالاي كومەكتەستى جانە مۇنىڭ ناتيجەسى قانداي بولدى؟ ٵ) بارنابا مەن ساۋلعا قالاي ەلىكتەسەك بولادى؟
18 ساۋل يەرۋساليمگە كەلگەندە، شاكىرتتەر ونىڭ يسانىڭ ٸزباسارى بولعانىنا سەنە قويمادى. بۇل تۇسىنىكتى دە. بىراق بارنابا ساۋلدىڭ شىنىمەن شاكىرت بولعانىنا كوزدەرىن جەتكىزگەندە، ەلشىلەر وعان سەندى. ٴسۇيتىپ، ساۋل ولارمەن ٴبىراز ۋاقىت بولدى (ەل. ٸس. 9:26—28). ساۋل قىراعى، پاراساتتى بولعان، بىراق ىزگى حاباردى ايتۋدان ۇيالماعان (ريم. 1:16). ول يەرۋساليمدە، ياعني بۇرىن ٶزى يسا ٴماسىحتىڭ شاكىرتتەرىن قاتتى قۋدالاعان جەردە تايسالماي ۋاعىزدادى. سەنگەن كۇرەسكەرلەرى ٴماسىحتىڭ ٸزباسارى بولىپ كەتكەنىن ەستىگەندە، يەرۋساليمدەگى ياھۋديلەردىڭ جانى شىعا جازدادى. سودان ونى ولتىرمەك بولدى. «بۇنى ٴبىلىپ قويعان باۋىرلاستار ونى كەسارياعا اپارىپ، ٵرى قاراي تارسقا اتتاندىردى» (ەل. ٸس. 9:30). ساۋل يسانىڭ قاۋىم ارقىلى بەرگەن باسشىلىعىنا مويىنسۇنعان. مۇنىڭ پايداسى وزىنە دە، قاۋىمعا دا ٴتيدى.
19 بايقاساڭىز، بارنابا ساۋلعا ٶزى كومەككە كەلدى. ناتيجەسىندە، ەحوبانىڭ وسى ەكى جالىندى قىزمەتشىسى كەرەمەت دوس بولىپ كەتتى. بارنابا سەكىلدى، ٴسىز دە قاۋىمداعى جاڭا جاريالاۋشىلارمەن ۋاعىزعا شىعىپ، ولاردىڭ رۋحاني وسۋىنە كومەكتەسەسىز بە؟ وسىلاي ەتسەڭىز، باتاعا كومىلەسىز. ال ەندى جاريالاۋشى بولساڭىز، ساۋل ىسپەتتى كومەكتى قابىلدايسىز با؟ تاجىريبەلى جاريالاۋشىلارمەن قىزمەتتەسسەڭىز، ۋاعىزداۋ شەبەرلىگىڭىزدى شىڭدايسىز، قۋانىشىڭىزدى ەسەلەيسىز جانە ومىرلىك دوستار تاباسىز.
«كوپتەگەن ادام يەمىزگە سەندى» (ەل. ٸس. 9:31—43)
20، 21. قۇدايدىڭ بۇرىنعى جانە قازىرگى قىزمەتشىلەرى «تىنىش كۇندەردى» قالاي پايدالاندى؟
20 ساۋل ٴماسىحشى بولعاننان كەيىن جانە يەرۋساليمنەن امان-ەسەن كەتكەن سوڭ، «بۇكىل ياھۋدەيا، عاليلەيا مەن ساماريا وڭىرىندەگى قاۋىمدار تىنىش كۇندەردى باستان كەشىردى» (ەل. ٸس. 9:31). شاكىرتتەر وسى «قولايلى» ۋاقىتتى قالاي پايدالاندى؟ (ٴتىم. 2-ح. 4:2). ەلشىلەردىڭ ىستەرىندە قاۋىمداردىڭ «سەنىمدەرى نىعايا تۇسكەندەرى» ايتىلعان. ەلشىلەر مەن باسقا دا جاۋاپتى باۋىرلاستار شاكىرتتەردىڭ سەنىمىن قاتايتقاندىقتان جانە جەتەكشىلىكتى قولعا العاندىقتان، قاۋىمدار «ەحوبانى قاستەرلەدى ٵرى كيەلى رۋح ارقىلى جىگەرلەندى». مىسالى، پەتىر سول ۋاقىتتا سارون جازىعىنداعى ليددا قالاسىنا بارىپ، شاكىرتتەردى نىعايتتى. ونىڭ ەڭبەگىنىڭ ناتيجەسىندە سارون جازىعىندا تۇراتىنداردىڭ كوپشىلىگى «يەمىزگە سەندى» (ەل. ٸس. 9:32—35). سول كەزدە شاكىرتتەر باسقا نارسەگە الاڭداماي، ۋاقىتى مەن كۇشىن ٴبىر-ٴبىرىن قامقورلاۋعا ٵرى ىزگى حاباردى تاراتۋعا جۇمسادى. وسىلاي قاۋىمداعىلاردىڭ «قاتارلارى كوبەيە بەردى».
21 XX عاسىردىڭ سوڭىنا قاراي ەحوبا كۋاگەرلەرى دە كوپ ەلدەردە «تىنىش كۇندەردى» باستان كەشىردى. ونداعان جىلدار بويى قۇداي حالقىن قاتاڭ قىسپاققا العان رەجيمدەر توقتادى، ال ۋاعىز ىسىنە تيىم سالىنعان كەيبىر ەلدەردە ۋاعىزداۋ جەڭىلدەدى، ٴتىپتى تولىق اشىلدى. ون مىڭداعان كۋاگەر اشىق ۋاعىزداۋدىڭ مۇمكىندىگىن جىبەرمەي، كەرەمەت جەتىستىكتەرگە جەتتى.
22. قولدا بار بوستاندىقتى قالايشا ۇتىمدى پايدالانا الاسىز؟
22 ەگەر ٴسىز ٴدىني سەنىم بوستاندىعى بار ەلدە تۇرىپ جاتساڭىز، وسى ەركىندىكتى دۇرىس پايدالانىپ ٴجۇرسىز بە؟ مۇنداي كەزدە شايتان ٴسىزدى ادەتتە پاتشالىقتى ەمەس، دۇنيە-مۇلىكتى ويلاۋعا ەلىكتىرگىسى كەلەدى (مات. 13:22). بايقاڭىز، كوڭىلىڭىز وسىنداي نارسەلەرگە اۋىپ كەتپەسىن. كەز كەلگەن تىنىش ۋاقىتتى ۇتىمدى، ۇتقىر پايدالانۋعا تىرىسىڭىز. تىنىش كەزدى تۇبەگەيلى كۋالىك بەرۋدىڭ جانە قاۋىمدى نىعايتۋدىڭ مۇمكىندىگى دەپ ٴبىلىڭىز. ۇمىتپاڭىز، جاعداي اياق استىنان وزگەرىپ كەتۋى مۇمكىن.
23، 24. ا) تابيتانىڭ وقيعاسىنان قانداي وي تۇيەمىز؟ ٵ) ٴبىزدىڭ شەشىمىمىز قانداي بولۋ كەرەك؟
23 قازىر تابيتا نە دوركا دەپ اتالاتىن شاكىرتپەن نە بولعانىن كورەيىك. ول ليدداعا جاقىن جەردەگى يوپپە قالاسىندا تۇردى. بۇل ادال باۋىرلاس قولدا بارىن جانە ۋاقىتىن اقىلمەن جۇمساپ، «مۇقتاجدىق كورگەندەرگە قايىرىمدىلىق كورسەتىپ، كوپ يگى ىستەر جاسايتىن». بىراق ٴبىر كۇنى ول قاتتى اۋىرىپ، قايتىس بولادى c. ونىڭ ولىمىنە يوپپەدەگى شاكىرتتەر، اسىرەسە ونىڭ كوپ جاقسىلىعىن كورگەن جەسىرلەر قاتتى قايعىرادى. ونىڭ دەنەسى جەرلەۋگە دايىندالىپ جاتقان ۇيگە پەتىر كەلىپ، يسا ٴماسىحتىڭ ەلشىلەرىنىڭ اراسىندا ٵلى ەشكىم جاساماعان كەرەمەتتى جاسايدى. ول دۇعا ەتەدى دە، تابيتانى ولىمنەن ٴتىرىلتىپ جىبەرەدى. پەتىر جەسىرلەر مەن باسقا دا شاكىرتتەردى شاقىرىپ، تابيتانى كورسەتكەن كەزدە، ولاردىڭ قالاي قۋانعانىن كورسەڭىز عوي! بۇل وقيعا ولاردىڭ بويىنا جىگەر قۇيىپ، الداعى قيىندىقتارعا دايىندادى. تابيتانىڭ تىرىلگەنى جايلى «بۇكىل يوپپەگە ٴمالىم بولىپ، كوپتەگەن ادام يەمىزگە سەندى» (ەل. ٸس. 9:36—42).
تابيتاعا قالاي ەلىكتەي الامىز؟
24 تابيتامەن بولعان كوڭىل قوزعارلىق وقيعادان ەكى ماڭىزدى ويدى تۇيەمىز: 1) ٶمىر قامشىنىڭ سابىنداي قىسقا. ەندەشە، كوزىمىز تىرىسىندە قۇدايدىڭ الدىندا جاقساتقا يە بولۋعا بار كۇشىمىزدى سالايىق (ۋاع. 7:1). 2) قايتا ٴتىرىلۋ مىندەتتى تۇردە بولادى. ەحوبا تابيتانىڭ جاساعان بارلىق جاقسىلىعىن كوردى، سول ٷشىن ونى جارىلقاپ، ٴتىرىلتتى. ٴبىزدىڭ دە اۋىر ەڭبەگىمىزدى ول ەشقاشان ۇمىتپايدى. ال ەگەر ارماگەددونعا دەيىن ومىردەن وزىپ جاتساق، ٴبىزدى قايتا تىرىلتەدى (ەۆر. 6:10). ولاي بولسا، «قيىن» ۋاقىتتا ٶمىر سۇرسەك تە، «تىنىش» ۋاقىتتى باستان كەشسەك تە، ٴماسىح جايلى تۇبەگەيلى كۋالىك بەرۋدى ەش توقتاتپايىق (ٴتىم. 2-ح. 4:2).
a «پارىزشىل ساۋل» دەگەن قورشاۋدى قاراڭىز.
b ادەتتە كيەلى رۋح دارىتاتىن سيلار ەلشىلەر ارقىلى بەرىلەتىن. بىراق وسى ەرەكشە جاعدايدا يسا ٶزى تاڭداپ العان ساۋلعا كيەلى رۋح دارىتۋدى انانيعا تاپسىردى. ساۋل ٴماسىحشى بولعاننان كەيىن 12 ەلشىمەن تەك ٴبىراز ۋاقىتتان كەيىن عانا كورىستى. سوعان دەيىن ول قۇلشىنا ۋاعىزداي بەرگەن دەۋگە بولادى. ساۋل وسى تاپسىرمانى ورىنداي الۋ ٷشىن يسا اناني ارقىلى وعان قاجەتتى كۇش بەردى.
c «قايىرىمدىلىق كورسەتىپ، كوپ يگى ىستەر جاساعان» تابيتا» دەگەن قورشاۋدى قاراڭىز.
