12-تاراۋ
«ەحوبا بەرگەن بيلىكپەن باتىل سويلەدى»
پاۋىل مەن بارنابا كىشىپەيىلدىلىك، تاباندىلىق پەن باتىلدىق تانىتتى
ەلشىلەردىڭ ىستەرى 14:1—28 نەگىزدەلگەن
1، 2. پاۋىل مەن بارنابا ليسترادا بولعاندا، قانداي جاعدايلار ورىن الدى؟
ليسترادا ادامدار اپىر-توپىر بولىپ جاتىر. تۋىلعاننان جۇرە المايتىن كىسى ەكى بەيتانىس ادامنىڭ ٶزىن ساۋىقتىرعانىنا ٴماز-مەيرام. بۇنى كورگەن حالىق قايران قالىپ جاتىر، ال زەۆستىڭ ٴدىني قىزمەتكەرى جۇرت قۇداي ساناعان وسى ەكى كىسىنىڭ باسىنا گۇلدەستە كيگىزبەكشى. ٴدىني قىزمەتكەر قۇرباندىققا شالعالى جاتقان بۇقالاردىڭ موڭىرەگەن داۋسى ەستىلەدى. ال پاۋىل مەن بارنابانىڭ جانايقايى شىعىپ، جۇرتتى توقتاتۋعا تىرىسىپ باعۋدا. ولار كيىمدەرىن جىرتىپ، قالىڭ توبىرعا قاراي ۇمتىلىپ، وزدەرىنە تابىنباۋدى جالبارىنىپ ٶتىندى. ٴسۇيتىپ، ەلشىلەر جۇرتتى ارەڭ دەگەندە توقتاتتى.
2 سوسىن پيسيدياداعى انتيوحيا مەن يقونيادان ياھۋدي قارسىلاستار كەلدى. ولار ەلشىلەرگە قىپ-قىزىل جالا جاۋىپ، ليسترا تۇرعىندارىنىڭ ساناسىن ۋلادى. كەشە عانا ولارعا تابىنباق بولعان جۇرت ەندى بۇگىن پاۋىلعا اتىلىپ، ونى ەسىنەن تانعانشا تاسپەن اتقىلاپ تاستادى. اشۋلارى باسىلعان سوڭ، پاۋىلدى ٶلىپ قالدى دەپ، قالانىڭ سىرتىنا سۇيرەپ شىعاردى.
3. بۇل تاراۋدا قانداي سۇراقتار قاراستىرىلادى؟
3 بۇنداي قيىن جاعدايعا ەلشىلەر قالاي تاپ بولدى؟ بارنابامەن، پاۋىلمەن جانە ليسترانىڭ بىردە كول، بىردە ٴشول تۇرعىندارىمەن بولعان وقيعادان بۇگىنگى جاريالاۋشىلار نە ۇيرەنە الادى؟ «ەحوبا بەرگەن بيلىكپەن باتىل سويلەپ»، قىزمەتتە تاباندىلىق تانىتقان بارنابا مەن پاۋىلعا اقساقالدار قالاي ەلىكتەي الادى؟ (ەل. ٸس. 14:3).
«كوپتەگەن ياھۋديلەر مەن گرەكتەر سەندى» (ەل. ٸس. 14:1—7)
4، 5. پاۋىل مەن بارنابا نە ٷشىن يقونياعا باردى جانە ول جەردە نە بولدى؟
4 وسىدان بىرنەشە كۇن بۇرىن پيسيدياداعى انتيوحيا قالاسىندا كەيبىر ياھۋديلەر پاۋىل مەن بارناباعا قارسى شىعىپ، قالادان قۋىپ شىققان ەدى. بولعان جاعدايعا رۋحى جىعىلماعان ەلشىلەر ىزگى حابارعا قۇلاق اسپاعان تۇرعىندارعا ەسكەرتۋ رەتىندە «اياقتارىنىڭ شاڭىن قاعىپ تاستادى» (ەل. ٸس. 13:50—52؛ مات. 10:14). بۇل ادامدار قۇداي الدىندا وزدەرى جاۋاپ بەرەتىنىن ٴتۇسىنىپ، پاۋىل مەن بارنابا ول جەردەن تىپ-تىنىش كەتىپ قالدى (ەل. ٸس. 18:5، 6؛ 20:26). قۋانىشتارىن سوندىرمەي، ەكى ميسسيونەر ۋاعىزدارىن جالعاستىرا بەردى. ولار وڭتۇستىك-شىعىسقا قاراي 150 شاقىرىمداي جول ٴجۇرىپ، تاۆر جانە سۇلتان تاۋ جوتالارىنىڭ اراسىنداعى جەرى قۇنارلى ٴبىر ايماققا كەلىپ جەتتى.
5 الدىمەن پاۋىل مەن بارنابا يقونياعا ايالدادى. يقونيادا گرەك مادەنيەتى ساقتالىپ قالعان ەدى، ٵرى ول ريم پروۆينسياسى عالاتيانىڭ نەگىزگى قالالارىنىڭ ٴبىرى بولعان a. مۇندا ىقپالدى ياھۋديلەر مەن ياھۋدي ٴدىنىن قابىلداعاندار وتە كوپ ەدى. ەلشىلەر، ادەتى بويىنشا، ٴماجىلىسحاناعا بارىپ، ۋاعىزداي باستادى (ەل. ٸس. 13:5، 14). ولاردىڭ ايتقاندارى «كەرەمەت بولعانى سونشا — كوپتەگەن ياھۋديلەر مەن گرەكتەر سەندى» (ەل. ٸس. 14:1).
6. نەنىڭ ارقاسىندا پاۋىل مەن بارنابا شەبەر تالىمگەر بولا الدى جانە ولارعا قالاي ەلىكتەي الاسىز؟
6 پاۋىل مەن بارنابانىڭ ايتقاندارى نەلىكتەن ادامدارعا قاتتى اسەر ەتتى؟ ويتكەنى پاۋىلدىڭ جازبالارعا نەگىزدەلگەن ۇلكەن ٴبىلىم قورجىنى بولدى. ول شەبەرلىكپەن تاريحتان، پايعامبارلىقتاردان جانە مۇسا زاڭىنان مالىمەتتەر كەلتىرىپ، يسانىڭ ۋادە ەتىلگەن ٴماسىح ەكەنىن دالەلدەگەن (ەل. ٸس. 13:15—31؛ 26:22، 23). ال بارنابانىڭ قالاي سويلەگەنىنەن ادامدارعا جۇرەگى ەلجىرەپ تۇراتىنى كورىنگەن (ەل. ٸس. 4:36، 37؛ 9:27؛ 11:23، 24). دەگەنمەن ەكەۋى دە ٶز اقىل-سانالارىنا ەمەس، «ەحوبا بەرگەن بيلىككە» جۇگىنگەن. وسى ەكى ميسسيونەرگە ۋاعىز ىسىندە قالاي ەلىكتەي الاسىز؟ بۇل ٷشىن قۇداي سوزىمەن جاقسى تانىس بولىڭىز. تىڭداۋشىلارىڭىزعا اسەر ەتەدى-اۋ دەگەن تارماقتاردى تاڭداڭىز. ۋاعىزداعان ادامدارىڭىزدى جۇباتۋدىڭ جولدارىن ىزدەڭىز. سونداي-اق ٴتالىمىڭىزدى ارقاشان ٶز دانالىعىڭىزعا ەمەس، قۇداي سوزىنە نەگىزدەڭىز.
7. ا) ىزگى حاباردىڭ اسەرى قانداي؟ ٵ) ىزگى حابارعا قۇلاق اسقانىڭىز ٷشىن وتباسىڭىز ەكىگە بولىنگەن بولسا، نەنى ەستە ۇستاعانىڭىز ٴجون؟
7 بىراق پاۋىل مەن بارنابانىڭ ايتقان سوزدەرىن يقونيا تۇرعىندارىنىڭ ٴبارى بىردەي جاقتىرا قويمادى. لۇقا بىلاي دەپ جازعان: «سەنبەگەن وزگە ياھۋديلەر باسقا ۇلت ادامدارىن ۇگىتتەپ، باۋىرلاستارعا قارسى قويدى». بىراق پاۋىل مەن بارنابا كەتىپ قالماي، شىندىقتى قورعاۋلارى كەرەكتىگىن ٴتۇسىندى. سوندىقتان «سول جەردە ٴبىرتالاي ۋاقىت بولىپ،.. باتىل سويلەدى». ناتيجەسىندە، «قالا حالقى ەكىگە ٴبولىنىپ، بىرەۋلەرى ياھۋديلەردى، ال ەكىنشىلەرى ەلشىلەردى جاقتادى» (ەل. ٸس. 14:2—4). بۇگىندە دە ىزگى حابار ادامدارعا ٴدال سولاي اسەر ەتەدى. ول كەيبىرەۋلەردى بىرىكتىرسە، وزگەلەردى، كەرىسىنشە، بولەدى (مات. 10:34—36). ەگەر ىزگى حابارعا قۇلاق اسقانىڭىز ٷشىن ٴسىزدىڭ وتباسىڭىز دا ەكىگە بولىنگەن بولسا، مۇنداي قارسىلىق كوبىنەسە قاۋەسەت سوزدەن يا قىپ-قىزىل جالادان بولاتىنىن ۇمىتپاڭىز. ٴسىزدىڭ جاقسى ٴجۇرىس-تۇرىسىڭىز بۇنداي وتىرىكتەردىڭ ۋىتىن قايتارىپ، سىزگە قارسى بولعانداردىڭ ۋاقىت وتە جۇرەكتەرى ٴجىبۋى مۇمكىن (پەت. 1-ح. 2:12؛ 3:1، 2).
8. پاۋىل مەن بارنابا يقونيادان نەگە كەتىپ قالدى جانە ولاردان قانداي ساباق الامىز؟
8 ٴبىراز ۋاقىتتان كەيىن يقونياداعى قارسىلاستار بىرىگىپ، پاۋىل مەن بارنابانى تاسپەن ۇرماق بولدى. بىراق ولار مۇنى ٴبىلىپ قويىپ، باسقا اۋماقتا ۋاعىزداۋدى شەشتى (ەل. ٸس. 14:5—7). بۇگىندەگى پاتشالىقتىڭ جاريالاۋشىلارى دا وسىلاي پاراساتتىلىقپەن ارەكەت ەتەدى. ەگەر ادامدار ٴبىز جايلى نە حابارىمىز جايلى جامان سوزدەر ايتىپ جاتسا، ٴبىز باتىل سويلەيمىز (ٴفىلىپ. 1:7؛ پەت. 1-ح. 3:13—15). ال بىزگە قول كوتەرەيىن دەپ جاتقانىن بايقاساق، اقىلسىز ارەكەت ەتپەيمىز. سەبەبى ٶزىمىزدىڭ دە، وزگە باۋىرلاستاردىڭ دا ومىرىنە قاۋىپ توندىرگىمىز كەلمەيدى (ناق. س. 22:3).
«ٴتىرى قۇدايعا بەت بۇرىڭىزدار» (ەل. ٸس. 14:8—19)
9، 10. ليسترا قاي جەردە ورنالاسقان جانە ول جەردىڭ تۇرعىندارى قانداي بولعان؟
9 سوسىن پاۋىل مەن بارنابا ليستراعا قاراي جول تارتتى. بۇل ريم كولونياسى يقونيانىڭ وڭتۇستىك-باتىسىندا 30 شاقىرىمداي جەردە ەدى. ليسترا قالاسىنىڭ پيسيدياداعى انتيوحيامەن كوپ ۇقساستىعى بولعان. بىراق ليسترادا انتيوحياداعىداي ياھۋديلەردىڭ مىقتى قاۋىمداستىعى بولماعان. ول جەردىڭ تۇرعىندارى گرەكشە سويلەي العانمەن، ولاردىڭ انا ٴتىلى ليكاون ٴتىلى بولعان. قالادا ٴماجىلىسحانا بولماعاندىقتان بولار، پاۋىل مەن بارنابا كوپشىلىك جەرلەردە ۋاعىزداي باستادى. ەسىمىزدە بولسا، پەتىر يەرۋساليمدە تۋىلعاننان جۇرە المايتىن كىسىنى ساۋىقتىرعان ەدى. ونىڭ كەرەمەتىنەن كەيىن كوپشىلىك يساعا سەندى (ەل. ٸس. 3:1—10). ال پاۋىل ٴدال وسىنداي كەرەمەتتى ليسترادا جاسادى (ەل. ٸس. 14:8—10). بىراق پاۋىلدىڭ كەرەمەتىنىڭ ناتيجەسى مۇلدەم باسقا بولدى.
10 تاراۋدىڭ باسىندا ايتىلعانداي، جۇرە المايتىن كىسى ساۋىعىپ كەتكەندە، ليستراداعى جالعان قۇدايلارعا تابىناتىن جۇرت بىردەن قاتە تۇجىرىم جاسادى. ولار بارنابانى باس قۇدايلارى زەۆس، ال پاۋىلدى زەۆستىڭ ۇلى ٵرى قۇدايلاردىڭ حابارشىسى گەرمەس دەپ ويلاپ قالدى. ( «ليسترا قالاسى جانە زەۆس پەن گەرمەسكە قۇلشىلىق» دەگەن قورشاۋدى قاراڭىز.). بىراق بارنابا مەن پاۋىل جۇرتقا جالعان قۇدايلاردىڭ بيلىگىمەن ەمەس، جالعىز شىنايى قۇداي ەحوبانىڭ بيلىگىمەن سويلەپ، كەرەمەت جاساعانىن تۇسىندىرگىسى كەلدى (ەل. ٸس. 14:11—14).
«وسى تۇككە تۇرمايتىن نارسەلەردى تاستاپ،.. ٴتىرى قۇدايعا بەت بۇرىڭىزدار» (ەلشىلەردىڭ ىستەرى 14:15).
11—13. ا) پاۋىل مەن بارنابا ليسترانىڭ تۇرعىندارىنا نە دەدى؟ ٵ) ولاردىڭ ايتقان سوزدەرىنەن الاتىن العاشقى ساباعىمىز قانداي؟
11 وسىنداي كۇردەلى جاعدايعا قاراماستان، پاۋىل مەن بارنابا ٴبارىبىر دە ادامداردىڭ جۇرەگىنە شىندىقتى جەتكىزۋگە تىرىستى. لۇقا جازعان وسى وقيعادان ەلشىلەردىڭ جالعان قۇدايلارعا تابىناتىندارعا ىزگى حاباردى قالاي ٴتيىمدى جەتكىزگەنىن بىلەمىز. پاۋىل مەن بارنابا تىڭدارماندارىنىڭ جۇرەك قىلىن شەرتۋ ٷشىن بىلاي دەدى: «بۇلارىڭىز نە؟ ٴبىز دە سىزدەر سياقتى پەندەمىز عوي. وسى تۇككە تۇرمايتىن نارسەلەردى تاستاپ، كوك پەن جەردى، تەڭىزدى جانە سونداعىلاردىڭ ٴبارىن جاراتقان ٴتىرى قۇدايعا بەت بۇرۋلارىڭىز ٷشىن، سىزدەرگە ىزگى حاباردى جاريالاۋعا كەلدىك. بۇرىنىراقتا قۇداي بارلىق حالىقتاردىڭ ٶز بەتىمەن جۇرۋىنە جول بەرگەن، سويتسە دە يگى ىستەرىمەن ٶزى جايلى كۋالىك بەرۋىن توقتاتپادى: اسپاننان جاۋىن جاۋدىرىپ، مەزگىلىمەن مول ٶنىم بەردى جانە كول-كوسىر اس-سۋ سيلاپ، جۇرەكتەرىڭىزدى قۋانىشقا تولتىرىپ كەلدى» (ەل. ٸس. 14:15—17).
12 وسى اسەرلى سوزدەردەن قانداي ساباق الامىز؟ بىرىنشىدەن، پاۋىل مەن بارنابا وزدەرىن تىڭداۋشىلارىنان جوعارى قويماعان. ولار وزدەرىندە جوقتى بار ەتىپ كورسەتۋگە تىرىسپادى. قايتا، ٴدال سولار سياقتى وزدەرىنىڭ دە كەمشىلىكتەرى بار ەكەنىن كىشىپەيىلدىلىكپەن مويىندادى. راس، پاۋىل مەن بارنابا كيەلى رۋحتى يەمدەنگەن بولاتىن ٵرى جالعان تالىمدەردەن ازات ەدى. ونىڭ ۇستىنە، ولاردا ماسىحپەن بىرگە بيلىك ەتۋ ٷمىتى بولدى. بىراق ەكەۋى ليسترانىڭ تۇرعىندارى دا ماسىحكە مويىنسۇنسا، ٴدال وسى سيلاردى يەمدەنە الاتىنىن بىلگەن.
13 ۋاعىزدا ٴبىز ادامدارعا قالاي قارايمىز؟ ولاردى وزىمىزبەن تەڭ سانايمىز با؟ وزگەلەرگە قۇداي سوزىندەگى شىندىقتى بىلۋگە كومەكتەسكەندە، پاۋىل مەن بارنابا سياقتى وزىمىزگە ماداق ىزدەۋدەن اۋلاقپىز با؟ وسى ورايدا ٴحىح عاسىردىڭ سوڭى مەن حح عاسىردىڭ باسىندا ۋاعىز ىسىنە جەتەكشىلىك ەتكەن چارلز تەيز راسسەلل باۋىرلاس بىزگە جاقسى ۇلگى قالدىرعان. ول بىلاي دەگەن: «ٴبىز ٶزىمىز ٷشىن دە، جاساعاندارىمىز ٷشىن دە ەشقانداي سي-قۇرمەت كۇتپەيمىز. بىرەۋدىڭ ٴبىزدى «اسا مارتەبەلىم» نە «راۆۆي» دەپ اتاعانىن دا قالامايمىز». ٴيا، راسسەلل باۋىرلاس پاۋىل مەن بارنابا سەكىلدى كىشىپەيىل بولعان. ۋاعىزداعاندا ٴبىزدىڭ دە ماقساتىمىز — ٶزىمىزدى كورسەتۋ ەمەس، ادامدارعا «ٴتىرى قۇدايعا» بەت بۇرۋعا كومەكتەسۋ.
14—16. پاۋىل مەن بارنابانىڭ ليسترا تۇرعىندارىنا ايتقان سوزىنەن الار ەكىنشى جانە ٷشىنشى ساباعىمىز قانداي؟
14 پاۋىل مەن بارنابانىڭ ايتقان سوزدەرىنەن الار ەكىنشى ساباعىمىز قانداي؟ ەكەۋى دە يكەمدەلگىش بولعان. يقونياداعى ياھۋديلەر مەن ياھۋدي ٴدىنىن قابىلداعاندارمەن سالىستىرعاندا، ليسترا تۇرعىندارى جازبالار جايلى، قۇدايدىڭ يسرايلمەن قارىم-قاتىناسى جايلى وتە از، ٴتىپتى مۇلدەم بىلمەگەن. نەگىزى، ولار ەگىنشىلىكپەن اينالىساتىن. ليسترانىڭ كليماتى ەگىن ەگۋگە قولايلى، جەرى وتە قۇنارلى بولعان. سوندىقتان بۇل جەردىڭ حالقى ٶنىم جيناۋ سياقتى ماۋسىمداردا جاراتۋشىنىڭ قاسيەتتەرى جايىندا بىلە الاتىن. ميسسيونەرلەر وسى جايتتى تىلگە تيەك ەتىپ، ادامداردى ويلانۋعا تالپىندىردى (ريم. 1:19، 20).
15 ٴبىز دە يكەمدەلگىش بولا الامىز با؟ مىسالى، ديقاننىڭ بىرنەشە ەگىستىگى بار دەلىك. ول بارىنە ٴبىر تۇقىم سەپكەنىمەن، ٴارقايسىسىنىڭ توپىراعىن ٵرتۇرلى جولمەن دايىندايدى. ويتكەنى ٴبىر ەگىستىگىندەگى توپىراق جۇمساق بولسا، وزگەسى كوبىرەك وڭدەۋدى تالاپ ەتۋى مۇمكىن. سول سياقتى، ٴبىزدىڭ سەبەتىن تۇقىمىمىز ٴبىر: قۇداي سوزىندەگى پاتشالىق جايلى حابار. الايدا ٴبىز پاۋىل مەن بارناباعا ەلىكتەپ، ۋاعىزدايتىن ادامدارىمىزدىڭ جاعدايىن، ٴدىنىن ەسكەرۋىمىز كەرەك. سوندا ىزگى حاباردى ولارعا بەيىمدەلىپ جەتكىزەمىز (لۇقا 8:11، 15).
16 پاۋىل مەن بارنابا جانە ليسترا تۇرعىندارىنان الار ٷشىنشى ساباعىمىز قانداي؟ قانشا كۇش سالساق تا، كەيدە ٴبىز سەپكەن تۇقىم «ۇرلانۋى» يا ول «تاستاق جەرگە» ٴتۇسۋى مۇمكىن (مات. 13:18—21). ٴسىز سەپكەن تۇقىممەن دە وسىلاي بولسا، ۇنجىرعاڭىز تۇسپەسىن. ويتكەنى پاۋىل ريمدەگى شاكىرتتەرگە ايتقانداي، «ٴارقايسىسىمىز [ونىڭ ىشىندە ٴبىز ۋاعىزداعان ادامدار دا بار] ٶز ٸس-ارەكەتىمىز ٷشىن قۇداي الدىندا ەسەپ بەرەمىز» (ريم. 14:12).
«ولاردى... ەحوبانىڭ قامقورلىعىنا تاپسىردى» (ەل. ٸس. 14:20—28)
17. دەربەدەن كەيىن پاۋىل مەن بارنابا قايدا باردى جانە نەگە؟
17 پاۋىلدى ٶلىپ قالدى دەپ ويلاپ، ليسترانىڭ سىرتىنا شىعارىپ تاستاعاننان كەيىن، شاكىرتتەر كەلدى دە، ونى تۇرعىزىپ، تۇنەيتىن جەر تاۋىپ بەردى. ەرتەسىنە پاۋىل مەن بارنابا 100 شاقىرىمداي جەردەگى دەربەگە اتتاندى. ونىڭ دەنەسى جول بويى قالاي سىرقىراعانى ايتپاسا دا تۇسىنىكتى. ويتكەنى بىرنەشە ساعات بۇرىن ول ابدەن تاسپەن اتقىلانعان ەدى عوي! دەسە دە پاۋىل مەن بارنابا ەش مويىمادى. ەكەۋى دەربەگە جەتكەندە، «ٴبىراز ادامدى شاكىرت ەتتى». كەيىن ۇيلەرىنە، ياعني سيرياداعى انتيوحياعا، قىسقا جولمەن قايتۋدىڭ ورنىنا، «ليسترا، يقونيا مەن [پيسيدياداعى] انتيوحياعا قايتا ورالدى». نەلىكتەن؟ «شاكىرتتەردى نىعايتىپ، سەنىمدەرىندە بەرىك تۇرۋعا شاقىرۋ» ٷشىن (ەل. ٸس. 14:20—22). نەتكەن تاماشا ۇلگى دەسەڭىزشى! ولار قاۋىمدى وزدەرىنەن جوعارى قويدى. بۇگىندە اۋداندىق باقىلاۋشىلار مەن ميسسيونەرلەر وسى جانقيار ەلشىلەرگە ەلىكتەپ ٴجۇر.
18. اقساقالدار قالاي تاعايىندالادى؟
18 شاكىرتتەردى سوزدەرىمەن جانە ۇلگىلەرىمەن نىعايتۋدان بولەك، پاۋىل مەن بارنابا «ٵر قاۋىمعا اقساقالدار تاعايىندادى». ەكى ەلشى ميسسيونەرلىك ساپارعا «كيەلى رۋحتىڭ امىرىمەن» جىبەرىلسە دە، ولار اقساقالداردى دۇعا ەتىپ، ورازا تۇتىپ تاعايىنداپ، «ەحوبانىڭ قامقورلىعىنا تاپسىردى» (ەل. ٸس. 13:1—4؛ 14:23). بۇگىندە دە اقساقالدار وسىلاي تاعايىندالادى. جەرگىلىكتى اقساقالدار كەڭەسى ەر باۋىرلاستىڭ جازبالارداعى تالاپتارعا ساي كەلەتىن-كەلمەيتىنىن دۇعا ەتىپ قاراستىرادى (ٴتىم. 1-ح. 3:1—10، 12، 13؛ تيت. 1:5—9؛ جاق. 3:17، 18؛ پەت. 1-ح. 5:2، 3). ونىڭ تاعايىندالۋى قانشا ۋاقىت ٴماسىحشى بولعانىنا بايلانىستى ەمەس. كيەلى رۋح ومىرىنە اسەر ەتىپ جاتقانى ەر باۋىرلاستىڭ سوزىنەن، ٴجۇرىس-تۇرىسى مەن جاقساتىنان كورىنىپ تۇرۋ كەرەك. ول جازبالارداعى باقىلاۋشىلارعا قويىلاتىن تالاپتارعا ساي كەلسە، قاۋىمدا باعۋشى بولىپ قىزمەت ەتە الادى (عال. 5:22، 23). اقساقالداردى اۋداندىق باقىلاۋشىلار تاعايىندايدى (تىموتەگە 1-حات 5:22 سالىستىرىڭىز).
19. اقساقالدار نەنى ەستە ۇستايدى جانە ولار پاۋىل مەن بارناباعا قالاي ەلىكتەيدى؟
19 تاعايىندالعان اقساقالدار قاۋىمعا قالاي قارايتىندارى ٷشىن قۇداي الدىندا جاۋاپ بەرەتىندەرىن ەستە ۇستايدى (ەۆر. 13:17). ولار پاۋىل مەن بارنابا ىسپەتتى ۋاعىز ىسىندە جەتەكشىلىكتى قولعا الادى. سونداي-اق اقساقالدار سوزدەرىمەن باۋىرلاستارىنىڭ كوڭىلىنە قۋات قۇيادى، ٵرى ولار جەكە باستارىنان بۇرىن قاۋىمنىڭ قاجەتتىلىگىن ويلايدى (ٴفىلىپ. 2:3، 4).
20. باۋىرلاستاردىڭ ادال ەڭبەكتەرى جايلى وقىعانىمىزدىڭ قانداي پايداسى بار؟
20 اقىرىندا، پاۋىل مەن بارنابا توقتايتىن جەرلەرى سيرياداعى انتيوحياعا ورالعاندا، باۋىرلاستارعا «قۇدايدىڭ وزدەرى ارقىلى كوپ نارسە ىستەگەنىن جانە باسقا ۇلتتاردىڭ سەنىمدى قابىلداۋىنا جول اشقانىن ايتىپ بەردى» (ەل. ٸس. 14:27). باۋىرلاستاردىڭ ادال ەڭبەكتەرى مەن ەحوبا ولاردى قالاي جارىلقاعانى جايلى وقىعاندا، ٴبىز دە «ەحوبا بەرگەن بيلىكپەن باتىل سويلەۋگە» تالپىنامىز.
a «يقونيا — فريگيانىڭ قالاسى» دەگەن قورشاۋدى قاراڭىز.
