4-تاراۋ
«ارنايى ٴبىلىمى جوق قاراپايىم ادامدار»
ەلشىلەر باتىل ارەكەت ەتىپ، ەحوبانىڭ باتاسىن كوردى
ەلشىلەردىڭ ىستەرى 3:1—5:11 نەگىزدەلگەن
1، 2. عيباداتحانا قاقپاسىنىڭ قاسىندا پەتىر مەن جوحان قانداي كەرەمەت جاسادى؟
تۇستەن كەيىنگى مەزگىل. كۇن شاڭقايىپ تۇر. قۇدايدى قاستەرلەيتىن ياھۋديلەر مەن ٴماسىحتىڭ شاكىرتتەرى عيباداتحانا اۋلاسىنا جينالۋدا. كوپ ۇزاماي «دۇعا ەتەتىن ۋاقىت» بولادى a (ەل. ٸس. 2:46؛ 3:1). قالىڭ جۇرتپەن بىرگە پەتىر مەن جوحان عيباداتحانانىڭ «كورىكتى» دەپ اتالاتىن قاقپاسىنا قاراي بەتتەپ كەلەدى. گۋ-گۋ اڭگىمە ايتىپ، تىپىرلاي ٴجۇرىپ بارا جاتقان ادامدار اراسىنان تۋىلعاننان جۇرە المايتىن ورتا جاسار قايىرشىنىڭ داۋىسى ەستىلەدى (ەل. ٸس. 3:2؛ 4:22).
2 پەتىر مەن جوحان قاسىنا كەلگەندە، قايىرشى ٶزىنىڭ جاتتاندى سوزدەرىن ايتىپ، قايىر سۇرادى. ونىڭ قايىر-ساداقا دامەتكەن ٴتۇرىن كورگەن ەلشىلەر توقتادى دا، پەتىر وعان: «مەندە كۇمىس تە، التىن دا جوق. بىراق نەم بار، سونىمدى بەرەيىن: نازارەتتىك يسا ٴماسىحتىڭ اتىنان ايتامىن، تۇرەگەل دە، ٴجۇرىپ كەت!»— دەدى. ٴسۇيتىپ، پەتىر ونى قولىنان ۇستاپ تۇرعىزدى. بۇل كىسى ومىرىندە ٴبىرىنشى رەت اياعىنا تىك تۇردى! (ەل. ٸس. 3:6، 7). سول كەزدە جۇرتتىڭ قالاي تاڭعالعانىن ەلەستەتىپ كورىڭىزشى! قايىرشى ساۋىققان اياقتارىنان كوز الماي، اياعىن ٴتاي-ٴتاي باسىپ، العاشقى قادامدارىن جاساپ كوردى. سوسىن قۋانعانىنان بىرەسە ٴجۇرىپ، بىرەسە اسىر سالا سەكىرىپ، قۇدايدى بار داۋىسىمەن ماداقتادى!
3. اياعى ساۋىققان كىسى مەن جينالعان حالىق قانداي قىمبات سيعا يە بولا الار ەدى؟
3 مۇنى كورگەندە، حالىق ٶز كوزدەرىنە وزدەرى سەنبەي، «سۇلەيمەن باعانالارى» دەپ اتالاتىن جەردە تۇرعان پەتىر مەن جوحانعا جۇگىرىپ كەلدى. كەزىندە يسا ٴدال وسى جەردە تۇرىپ، ٴتالىم بەرگەن بولاتىن. پەتىر ولارعا بولعان جاعدايدىڭ ٴتۇپ ٴمانىن ٴتۇسىندىردى (جوح. 10:23). ول حالىققا جانە اياعى ساۋىققان كىسىگە كۇمىستەن دە، التىننان دا قىمبات سيعا يە بولا الاتىندارىن ايتتى. وسى سيدىڭ ارقاسىندا ولار وكىنىپ، كۇنالارى كەشىرىلىپ، ەحوبا تاعايىنداعان «ٶمىر بەرەتىن باس جەتەكشىنىڭ»، يسا ٴماسىحتىڭ، ٸزباسارلارى بولا الار ەدى. ٴيا، بۇل — تاندىك ساۋىعۋدان الدەقايدا ارتىق سي! (ەل. ٸس. 3:15).
4. ا) جۇرە المايتىن كىسىنىڭ ساۋىققانى نەگە اكەپ سوقتى؟ ٵ) قانداي ەكى سۇراققا جاۋاپ الامىز؟
4 بۇل نە دەگەن عاجاپ كۇن! جۇرە المايتىن ادام ساۋىعىپ، ٴجۇرىپ كەتتى. ال مىڭداعان ادامعا رۋحاني ساۋىعىپ، قۇدايدىڭ الدىندا تازا ٴجۇرىپ-تۇرۋعا مۇمكىندىك بەرىلدى (قول. 1:9، 10). بىراق وسى وقيعالاردان كەيىن قولىندا بيلىگى بارلار يسانىڭ ادال شاكىرتتەرىنە تىستەرىن قايراپ، قارسى شىقتى. ولار شاكىرتتەرگە يسانىڭ «پاتشالىق تۋرالى ۋاعىزداڭدار» دەگەن تاپسىرماسىن ورىنداۋعا كەدەرگى جاساۋعا تىرىستى (ەل. ٸس. 1:8). «ارنايى ٴبىلىمى جوق قاراپايىم ادامدار» پەتىر مەن جوحاننىڭ قالاي ۋاعىزداعانىنان جانە قىزمەتكە دەگەن كوزقاراسىنان نە ۇيرەنەمىز؟ b (ەل. ٸس. 4:13) ال ولاردىڭ جانە باسقا دا شاكىرتتەردىڭ قارسىلىق كورگەندە قالاي ارەكەت ەتكەنىنەن شە؟
«ٶز كۇشىمىزدىڭ ارقاسىندا» ەمەس (ەل. ٸس. 3:11—26)
5. پەتىردىڭ حالىققا قالاي سويلەگەنىنەن نە ۇيرەنەمىز؟
5 حالىقتىڭ الدىندا تۇرعان پەتىر مەن جوحان ولاردىڭ اراسىندا يسانى ٶلتىرۋدى تالاپ ەتكەن ادامدار بولۋى مۇمكىن ەكەنىن بىلگەن (مار. 15:8—15؛ ەل. ٸس. 3:13—15). سوعان قاراماستان پەتىر تاۋداي باتىلدىق تانىتىپ، الگى جۇرە الماعان كىسىنى يسانىڭ اتىمەن ساۋىقتىرعانىن ايتتى. ول ەش جاسقانباي، حالىقتىڭ ٴماسىحتىڭ ولىمىنە كىنالى ەكەنىن اشىق ايتتى. بىراق پەتىر ولاردى جەك كورمەدى، ويتكەنى ولار مۇنى «بىلمەستىكپەن جاساعان» ەدى (ەل. ٸس. 3:17). ولاردى «اعايىندار» دەپ اتادى، ٵرى پاتشالىق تۋرالى حاباردىڭ جاقسى تۇستارىنا كوڭىل بۇردى. ەگەر وكىنىپ، ماسىحكە سەنىم ارتاتىن بولسا، ولار ٷشىن «ەحوبانىڭ قايتا نىعايتاتىن ۋاقىتى كەلەر ەدى» (ەل. ٸس. 3:19). ٴبىز دە قۇدايدىڭ ۇكىمىن باتىل ٵرى تىكە ايتۋدان قورىقپاۋىمىز كەرەك. بىراق ادامدارعا دورەكىلىك تانىتىپ، سوتتاماۋىمىز كەرەك. مۇنىڭ ورنىنا، پەتىر سياقتى ولارعا بولاشاق باۋىرلارىمىز دەپ قاراپ، پاتشالىق حابارىنىڭ جاقسى تۇستارىنا نازار اۋدارعانىمىز دۇرىس.
6. پەتىر مەن جوحان قالاي كىشىپەيىلدىلىك پەن قاراپايىمدىلىق تانىتتى؟
6 ەلشىلەر قاراپايىم ٵرى كىشىپەيىل بولعان. ولار كەرەمەتتى ٶزىمىز جاسادىق دەمەگەن. قايتا، پەتىر حالىققا: «بۇل ادام ٶز كۇشىمىزدىڭ نە قۇدايعا شىن بەرىلگەنىمىزدىڭ ارقاسىندا ٴجۇرىپ كەتكەندەي، نەسىنە بىزگە تەسىلە قارايسىزدار؟»— دەدى (ەل. ٸس. 3:12). پەتىر مەن وزگە ەلشىلەر قىزمەتتە جەتكەن ٵربىر جەتىستىگى وزدەرىنىڭ ەمەس، قۇدايدىڭ كۇشىنىڭ ارقاسىندا ەكەنىن مويىنداعان. وسىلاي ولار كىشىپەيىلدىلىكپەن بار ماداقتى ەحوبا مەن يساعا جاۋدىرعان.
7، 8. ا) ٴبىز ادامدارعا قانداي سي ۇسىنا الامىز؟ ٵ) «بارلىق نارسەلەر قالپىنا كەلەدى» دەگەن ۋادە قالاي ورىندالۋدا؟
7 ىزگى حاباردى ۋاعىزداعاندا، ٴبىزدىڭ دە كىشىپەيىل بولعانىمىز ماڭىزدى. ارينە، بۇگىندە قۇداي رۋحى بىزگە كەرەمەت تۇردە ساۋىقتىرۋ قابىلەتىن دارىتپايدى. دەسە دە ٴبىز ادامدارعا قۇدايعا جانە ماسىحكە سەنىم تانىتۋعا كومەكتەسە الامىز. ٴبىز دە ولارعا كەزىندە پەتىر تىڭداۋشىلارىنا ۇسىنعان سيدى، ياعني كۇنالارى كەشىرىلىپ، قۇدايدىڭ ىقىلاسىنا يە بولۋ مۇمكىندىگىن، ۇسىنا الامىز. وسى سيدى قابىل الىپ، جىل سايىن ٴجۇز مىڭداعان ادام شومىلدىرۋ راسىمىنەن ٶتىپ، ٴماسىحتىڭ شاكىرتى بولۋدا.
8 ٴبىز پەتىر ايتقان «بارلىق نارسەلەر قالپىنا كەلەتىن ۋاقىتتا» ٶمىر ٴسۇرىپ جاتىرمىز. «ەجەلدە قۇدايدىڭ قاسيەتتى پايعامبارلارى ارقىلى ايتقان» وسى سوزدەرى جۇزەگە اسىپ، 1914-جىلى كوكتە پاتشالىق ورنادى (ەل. ٸس. 3:21؛ ٴزاب. 110:1—3؛ دان. 4:16، 17). سودان كوپ ۇزاماي، ٴماسىح جەردەگى رۋحاني قالپىنا كەلتىرۋ ىسىنە جەتەكشىلىك ەتە باستادى. ناتيجەسىندە، ميلليونداعان ادام رۋحاني جۇماققا كەلىپ، قۇداي پاتشالىعىنىڭ ازاماتتارى بولدى. ولار «ەسكى بولمىستارىنان ارىلىپ، قۇدايدىڭ ەركىنە ساي جاراتىلعان... جاڭا بولمىسقا يە بولدى» (ەفەس. 4:22—24). قايىرشىنىڭ ساۋىققانى ىسپەتتى، بۇل عالامات ٸس تە ادامنىڭ ەمەس، قۇدايدىڭ رۋحىنىڭ ارقاسىندا جۇزەگە اسۋدا. وزگەلەرگە ٴتالىم بەرگەندە ٴبىز دە پەتىر سياقتى قۇداي ٴسوزىن باتىل ٵرى ۇتىمدى قولدانۋىمىز كەرەك. ادامدارعا ٴماسىحتىڭ شاكىرتى بولۋعا كومەكتەسسەك، بۇل ٶزىمىزدىڭ ەمەس، قۇداي رۋحىنىڭ ارقاسىندا ەكەنىن ۇمىتپايىق.
«ٷنسىز قالا المايمىز» (ەل. ٸس. 4:1—22)
9—11. ا) پەتىر مەن جوحاننىڭ ايتقاندارى ياھۋدي جەتەكشىلەرىنە قالاي اسەر ەتتى؟ ٵ) ەلشىلەر نە ىستەۋگە بەكىندى؟
9 پەتىردىڭ بايانداماسىن ەستىگەندە جانە ساۋىققان قايىرشىنىڭ سەكىرىپ، قۋانىپ جۇرگەنىن كورگەندە، جۇرت ٴبىراز دۇرلىكتى. سوندا نە بولىپ جاتقانىن ٴبىلۋ ٷشىن عيباداتحانانىڭ قاۋىپسىزدىگىنە جاۋاپتى باس ساقشى مەن جوعارعى ٴدىني قىزمەتكەرلەر جەتىپ كەلدى. بۇل كىسىلەر ساددۋكەيلەر بولعانعا ۇقسايدى. ساددۋكەيلەر ريمدىكتەرمەن ىمىرادا بولۋعا تىرىسقان باي ٵرى ساياسي ىقپالى كۇشتى سەكتا بولعان. ولار پارىزشىلداردىڭ جانى سۇيگەن اۋىزشا زاڭدارىن مويىنداماعان جانە قايتا ٴتىرىلۋ ٸلىمىن كەلەكە-مازاق ەتكەن c. ەندەشە، يسانىڭ قايتا تىرىلگەنى تۋرالى ەش تايسالماي ايتىپ تۇرعان پەتىر مەن جوحانعا ولاردىڭ نەگە ىزاسى كەلگەنى تۇسىنىكتى-اق!
10 اشۋعا مىنگەن قارسىلاستار پەتىر مەن جوحاندى تۇرمەگە جاپتى دا، كەلەسى كۇنى ياھۋديلەردىڭ جوعارعى سوتىنا سۇيرەپ اپاردى. وزدەرىن ٴبىلىمدار ساناعان بۇل بيلەۋشىلەردىڭ كوزىندە پەتىر مەن جوحان «ارنايى ٴبىلىمى جوق قاراپايىم ادامدار» ەدى. ولاردىڭ ويىنشا، ەشقانداي بەدەلدى ٴدىني مەكتەپتە وقىماعاندىقتان، بۇل ەكەۋىنىڭ عيباداتحانادا ٴبىلىم بەرۋگە قۇقى جوق. دەگەنمەن ولاردىڭ زور سەنىممەن، باتىل ٵرى اشىق سويلەپ تۇرعاندارى سوتتى قايران قالدىردى. پەتىر مەن جوحانعا وسىلاي سويلەۋگە نە كومەكتەستى؟ ونىڭ ٴبىر سەبەبى — ولار كەزىندە «يسامەن بىرگە جۇرگەن» (ەل. ٸس. 4:13). ال ۇستازدارى يسا «ٴدىن مۇعالىمدەرى سياقتى ەمەس، بيلىگى بار ادامداي ٴتالىم بەرگەن» (مات. 7:28، 29).
11 سوت ەلشىلەرگە ۋاعىزداۋعا تيىم سالدى. سول قوعامدا سوتتىڭ شەشىمى بۇلجىتپاي ورىندالاتىن. بىرنەشە اپتا بۇرىن يسا ٴدال وسى سوتتىڭ الدىندا تۇرعاندا، ولار: «ول ولىمگە لايىق!»— دەپ ەدى (مات. 26:59—66). بىراق بۇل پەتىر مەن جوحاننىڭ ۇرەيىن ۇشىرمادى. ولار داۋلەتتى، ٴبىلىمدار، ىقپالدى وسى ادامدارعا ەش سەسكەنبەي، بىراق ىزەتپەن بىلاي دەدى: «قۇدايدى ەمەس، سىزدەردى تىڭداعانىمىز ونىڭ الدىندا ٴجون بولار ما ەكەن؟ مۇنى وزدەرىڭىز ويلاپ كورىڭىزدەر. ال ٴبىز كورىپ-ەستىگەنىمىز جايلى ٷنسىز قالا المايمىز» (ەل. ٸس. 4:19، 20).
12. باتىلدىعىمىزدى قامشىلاپ، سەنىمدىلىگىمىزدى ارتتىرۋعا نە كومەكتەسەدى؟
12 ٴسىز دە ەلشىلەر سياقتى ۋاعىزدا باتىل بولا الاسىز. قىزمەتتە باي، ٴبىلىمدى، بەدەلدى ادامداردى كەزدەستىرگەندە، ۋاعىزداۋدان تارتىناسىز با؟ ٷي ىشىڭىزدەگىلەر، سىنىپتاستارىڭىز، ارىپتەستەرىڭىز سەنىمىڭىزدى مازاق ەتكەندە، نە سەزىنەسىز؟ قورقىپ قالاسىز با؟ سولاي بولسا، ٴسىز قورقىنىشىڭىزدى جەڭە الاسىز. يسا جەردە بولعاندا ەلشىلەرىنە سەنىمدەرىن قايسارلىقپەن جانە قۇرمەتپەن قورعاۋدى ۇيرەتكەن (مات. 10:11—18). ول قايتا تىرىلگەننەن كەيىن شاكىرتتەرىنە «وسى زامان اياقتالعانشا ٵر كۇنى» ولارمەن بىرگە بولاتىنىن ۋادە ەتتى (مات. 28:20). يسانىڭ باسشىلىعىمەن بۇگىندە «ادال دا اقىلدى قۇل» بىزگە سەنىمىمىزدى قالاي قورعاۋدى ۇيرەتۋدە (مات. 24:45—47؛ پەت. 1-ح. 3:15). بۇنى ولار «ماسىحشىلىك ٶمىرىمىز بەن قىزمەتىمىز» سياقتى قاۋىم كەزدەسۋلەرى، كيەلى كىتاپقا نەگىزدەلگەن ادەبيەتتەر مەن jw.org تور بەكەتىندەگى «كيەلى كىتاپ. سۇراقتار مەن جاۋاپتار» سياقتى ماتەريالدار ارقىلى ۇيرەتىپ جاتىر. ٴسىز وسى شارالاردىڭ تولىق پايداسىن كورىپ ٴجۇرسىز بە؟ وسىلاي ەتسەڭىز، باتىلدىعىڭىز قامشىلانىپ، سەنىمدىلىگىڭىز كۇشەيەدى. سوندا ەلشىلەردىڭ جاعدايىنداعىداي، ٴسىزدى دە ەستىپ-بىلگەن رۋحاني اسىل شىندىقتاردى ايتۋدان ەشكىم توقتاتا المايدى.
ەستىپ-بىلگەن رۋحاني اسىل شىندىقتارىڭىزدى ەشتەڭەگە قاراماي ايتا بەرىڭىز
«ٴبارى بىرگە قۇدايعا... داۋىستاپ دۇعا ەتتى» (ەل. ٸس. 4:23—31)
13، 14. قارسىلىق كورگەندە نە ىستەۋىمىز كەرەك جانە نەگە؟
13 تۇتقىننان بوساي سالا، پەتىر مەن جوحان قاۋىمداعى باۋىرلاستارمەن كەزدەستى. ٴبارى بىرگە «قۇدايعا داۋىستاپ دۇعا ەتىپ»، ۋاعىزدى توقتاتپاۋ ٷشىن باتىلدىق سۇرادى (ەل. ٸس. 4:24). باسقا-باسقا، پەتىر قۇدايدىڭ ەركىن ورىنداعاندا ٶز كۇشىنە سەنۋ قانشالىقتى اقىماقتىق ەكەنىن جاقسى بىلگەن. سەبەبى وسىدان بىرنەشە-اق اپتا بۇرىن ول يساعا: «باسىڭىزعا تۇسكەن جاعدايعا بولا ٴبارى تاستاپ كەتسە دە، مەن ٴسىزدى ەشقاشان تاستامايمىن!»— دەگەن ەدى ٶز-وزىنە تىم سەنىمدى بولىپ. الايدا يسا ايتقانداي-اق، ول ادامداردان قورقىپ، دوسىن ٵرى ۇستازىن تاستاپ كەتتى. بىراق پەتىر بۇل قاتەلىگىنەن ۇلكەن ساباق الدى (مات. 26:33، 34، 69—75).
14 ٴماسىح جايلى كۋالىك بەرۋ ٷشىن قۇر قۇلشىنىستىڭ ٶزى جەتكىلىكسىز. قارسىلاستار سەنىمىڭىزدى سىندىرعىسى نە ۋاعىزىڭىزدى دوعارتقىسى كەلگەندە، پەتىر مەن جوحانعا ۇقساپ، ەحوبادان كۇش سۇراپ، دۇعا ەتىڭىز. قاۋىمنان قولداۋ ىزدەڭىز. اقساقالدار مەن باسقا دا رۋحاني تولىسقان باۋىرلاستارعا قيىندىقتارىڭىز جايلى ايتىپ بەرىڭىز. ولار ٴسىز ٷشىن دۇعا ەتەدى. ال ٵدىل ادامنىڭ دۇعاسىنىڭ اسەرى وراسان زور (ەفەس. 6:18؛ جاق. 5:16).
15. ٴبىر كەزدەرى ۋاعىزداۋدى توقتاتىپ قويعاندار نەگە ەڭسەلەرىن تۇسىرمەۋ كەرەك؟
15 ەگەر ٴبىر كەزدەرى قىسىمدى كوتەرە الماي، ٴبىراز ۋاقىت ۋاعىزداماي قويساڭىز، رۋحىڭىز جىعىلماسىن. ەسىڭىزدە بولسا، يسا قايتىس بولعاننان كەيىن، ەلشىلەرى ۋاعىزدى توقتاتىپ قويعان ەدى. بىراق كوپ ۇزاماي قايتادان قولعا الدى (مات. 26:56؛ 28:10، 16—20). بۇرىنعى قاتەلىكتەرىڭىزدى ويلاپ، ەڭسەڭىز ەزىلە بەرمەسىن. ودان گورى سول جاعدايدان ساباق الىپ، ونى باسقالاردى نىعايتۋ ٷشىن قولدانىڭىز.
16، 17. يەرۋساليمدەگى شاكىرتتەر ايتقان دۇعادان ۇيرەنەرىمىز بار ما؟
16 بيلىك باسىنداعىلار قىسىم كورسەتكەندە، نە دەپ دۇعا ەتۋىمىز كەرەك؟ شاكىرتتەردى ەسكە الىڭىزشى، ولار قۇدايدان سىناقتارىنان قۇتقارۋدى سۇراعان جوق. سەبەبى ولار يسانىڭ: «ولار مەنى قۋدالاسا، سەندەردى دە قۋدالايدى»،— دەگەن ٴسوزىن ويدا ۇستاعان (جوح. 15:20). بۇل ادال شاكىرتتەر ٴبارىن ەحوباعا تاپسىرىپ، قارسىلاستاردىڭ «قوقان-لوقىسىنا نازار سالشى» دەپ دۇعا ەتكەن (ەل. ٸس. 4:29). نەگىزى، ولار جاعدايعا كەڭىنەن قاراي العان: بۇل قۋدالاۋلار پايعامبارلىقتىڭ ورىندالۋى ەكەنىن جاقسى تۇسىنگەن. يسا ۇيرەتكەن دۇعادان ولار جۇمىر باستى بيلەۋشىلەر نە ايتىپ، نە قويماسىن، قۇدايدىڭ ەركى ەشتەڭەگە قاراماي «جەر بەتىندە دە ورىندالاتىنىن» بىلگەن (مات. 6:9، 10).
17 قۇدايدىڭ ەركىن ورىنداۋ ٷشىن شاكىرتتەر ەحوباعا بىلاي دەپ دۇعا ەتتى: «قۇلدارىڭا ٴسوزىڭدى باتىل جاريالاي بەرۋگە كۇش دارىتا كور». ەحوبا ولاردىڭ بۇل ٶتىنىشىن بىردەن ورىندادى. «ولار جينالىپ وتىرعان ٷي سىلكىنىپ كەتتى. بارلىعى كيەلى رۋحقا كەنەلىپ، قۇداي ٴسوزىن باتىلدىقپەن جاريالاي باستادى» (ەل. ٸس. 4:29—31). ٴيا، قۇداي ەركىنىڭ جۇزەگە اسۋىنا ەشتەڭە كەسە كولدەنەڭ تۇرا المايدى (يشايا 55:11). قانداي قيىندىق بولماسىن، قارسىلاستارىمىز قانشالىقتى كۇشتى بولماسىن، ەحوباعا جالبارىنىپ دۇعا ەتسەك، ول بىزگە ٶز ٴسوزىن تايسالماي ۋاعىزداي بەرۋگە كۇش دارىتادى. بۇعان ەش كۇمانىڭىز بولماسىن.
«ادامدارعا ەمەس، قۇدايدىڭ وزىنە وتىرىك ايتتى» (ەل. ٸس. 4:32—5:11)
18. يەرۋساليمدەگى قاۋىم مۇشەلەرى ٴبىر-بىرىنە قالاي كومەكتەستى؟
18 يەرۋساليمدە جاڭا قۇرىلعان قاۋىمنىڭ مۇشەلەرىنىڭ سانى از ۋاقىت ىشىندە 5000 نان اسىپ جىعىلدى d. شاكىرتتەر ٴتۇرلى ورتادان شىققان بولسا دا، «وي-نيەتى ٴبىر بولدى» (ەل. ٸس. 4:32؛ قور. 1-ح. 1:10). ولار ەحوبادان قىزمەتتەرىنە باتا سۇراپ قانا قويعان جوق. ٴبىر-ٴبىرىن رۋحاني جاعىنان نىعايتىپ، قاجەت بولسا، ماتەريالدىق جاعىنان دا كومەكتەسىپ ٴجۇردى (جوح. 1-ح. 3:16—18). مىسالى، ەلشىلەر بارنابا دەپ اتاپ كەتكەن ٴجۇسىپ دەگەن شاكىرت ٶز جەرىن ساتىپ، تۇسكەن اقشانىڭ ٴبارىن ساداقا ەتتى. بۇل قاراجات الىستان كەلىپ، جاڭا سەنىمدەرى جايلى كوبىرەك ٴبىلۋ ٷشىن يەرۋساليمدە قالىپ قويعان ادامداردىڭ مۇقتاجىنا جاراتىلماق ەدى.
19. ەحوبا اناني مەن ٴزاپيرانى نەگە ولىمگە ۇشىراتتى؟
19 اناني مەن ٴزاپيرا ەسىمدى ەرلى-زايىپتى دا مەنشىگىندەگى جەرىن ساتىپ، تۇسكەن اقشانى الىپ كەلدى. ولار بارلىق اقشانى بەرگەندەي سىڭاي تانىتتى. بىراق «تۇسكەن اقشانىڭ ٴبىر بولىگىن جاسىرىپ قويعان» ەدى (ەل. ٸس. 5:2). ەحوبا ولاردى ولىمگە ۇشىراتتى. نەگە؟ ولار جەتكىلىكتى اقشا بەرمەگەندىكتەن ەمەس، نيەتتەرى جامان بولعاندىقتان جانە الداعاندىقتان. ٴيا، ەكەۋى «ادامدارعا ەمەس، قۇدايدىڭ وزىنە وتىرىك ايتتى» (ەل. ٸس. 5:4). يسا ايىپتاعان ەكىجۇزدىلەر سياقتى، اناني مەن ٴزاپيرا قۇدايدىڭ ىقىلاسىنا يە بولۋدان گورى جۇرت كوزىنە ٴتۇسۋدى ويلادى (مات. 6:1—3).
20. ەحوباعا بەرگەندە، نيەتىمىز قانداي بولۋ كەرەك؟
20 يەرۋساليمدەگى جۇرەگى جومارت، قولى اشىق شاكىرتتەرگە ەلىكتەپ، بۇگىندە ميلليونداعان ەحوبا كۋاگەرى دۇنيەجۇزىلىك ۋاعىز ىسىنە ساداقالارىمەن قولداۋ كورسەتەدى. بۇل ىسكە «وسىنشا ۋاقىتىڭدى بەر، وسىنشا اقشا بەر» دەپ ەشكىم ماجبۇرلەمەيدى. ويتكەنى ەحوبا ٴبىزدىڭ «ەش قينالماي، زورلىقسىز بەرگەنىمىزدى» قالايدى (قور. 2-ح. 9:7). راسىمەن دە، ەحوبا ٷشىن قانشا بەرگەنىمىز ەمەس، قانداي نيەتپەن بەرگەنىمىز ماڭىزدى (مار. 12:41—44). ٴبىز ەحوباعا قىزمەت ەتكەندە جۇرت كوزىنە ٴتۇسۋدى يا اتىمىزدى شىعارۋدى ويلاپ، اناني مەن ٴزاپيرا سياقتى بولعىمىز كەلمەيدى. قايتا، پەتىرگە، جوحان مەن بارناباعا ەلىكتەگىمىز كەلەدى. ولار سياقتى ٴبىزدى دە ەحوباعا قىزمەت ەتۋگە قۇدايعا جانە ادامدارعا دەگەن سۇيىسپەنشىلىك تالپىندىرعاي! (مات. 22:37—40).
a عيباداتحانادا تاڭعى جانە كەشكى قۇرباندىقتار ۇسىنىلعان كەزدە دۇعا ايتىلاتىن. كەشكى قۇرباندىق «توعىزىنشى ساعاتتا»، ياعني تۇستەن كەيىنگى ۇشتەر شاماسىندا ۇسىنىلعان.
b «بۇرىن بالىقشى بولعان پەتىر جىگەرلى ەلشىگە اينالدى» جانە «جوحان — يسانىڭ جاقسى كورگەن شاكىرتى» دەگەن قورشاۋلاردى قاراڭىز.
c «باس ٴدىني قىزمەتكەر مەن جوعارعى ٴدىني قىزمەتكەرلەر» دەگەن قورشاۋدى قاراڭىز.
d ب.ز. 33-جىلى يەرۋساليمدە نەبارى 6000 داي پارىزشىل بولسا كەرەك. ال ساددۋكەيلەردىڭ سانى ازىراق بولعان كورىنەدى. بۇل وسى ەكى توپتىڭ يسانىڭ تالىمدەرىنە نەگە سونشالىقتى قارسى بولعانىنىڭ تاعى ٴبىر سەبەبى بولۋى مۇمكىن.
