28-تاراۋ
«جەردىڭ قيىر شەتىنە دەيىن»
ەحوبا كۋاگەرلەرى ٴبىرىنشى عاسىرداعى يسانىڭ ٸزباسارلارى باستاعان ٸستى ٵرى قاراي جالعاستىرۋدا
1. ەرتەدەگى ماسىحشىلەر مەن بۇگىنگى ەحوبا كۋاگەرلەرىنىڭ قانداي ۇقساستىقتارى بار؟
ولار ۇلكەن ىنتا-ىقىلاسپەن ۋاعىزدادى. كيەلى رۋحتىڭ كومەگى مەن باعىت-باعدارىن شىن جۇرەكپەن قابىلدادى. قۋعىن-سۇرگىن دە ولاردىڭ اۋزىنا قاقپاق بولا المادى. قۇدايدىڭ ولارعا توككەن باتاسىن ايتساڭىزشى! وسىنىڭ ٴبارىن ەرتەدەگى ماسىحشىلەر باستارىنان وتكىزدى. بۇگىنگى ەحوبا كۋاگەرلەرى تۋرالى دا ٴدال وسىلاي دەي الامىز.
2، 3. ەلشىلەردىڭ ىستەرى كىتابى نەسىمەن ەرەكشە؟
2 قىزىقتى وقيعالارعا تولى ەلشىلەردىڭ ىستەرى كىتابى ٴسىزدىڭ سەنىمىڭىزدى ٴبىر قاتايتىپ تاستاعان بولار. بۇل — ەرەكشە كىتاپ. سەبەبى وسى كىتاپتا عانا العاشقى ماسىحشىلەردىڭ تاريحى باياندالادى.
3 ەلشىلەردىڭ ىستەرىندە 95 ادامنىڭ، 32 جەردىڭ، 54 قالا مەن 9 ارالدىڭ اتاۋى كەزدەسەدى. كىتاپتا قاراپايىم حالىق، تاكاپپار ٴدىني جەتەكشىلەر، اتاققۇمار ساياساتكەرلەر مەن وزبىر قۋعىنداۋشىلار تۋرالى ٴسوز ەتىلگەن. ال ەڭ ماڭىزدىسى، بۇل كىتاپ I عاسىرداعى ٴسىزدىڭ باۋىرلاستارىڭىز جايىندا. ولار وتقا دا، سۋعا دا تۇسە ٴجۇرىپ، ىزگى حاباردى ىستىق ىقىلاسپەن جاريالاي بەردى.
4. ەلشى پاۋىل، تابيتا جانە باسقا دا ەرتەدەگى ادال كۋاگەرلەرمەن ارامىزدى نە جالعاپ تۇر؟
4 كەۋدەسىندە وتى بار ەلشىلەر پەتىر مەن پاۋىلدىڭ، سۇيىكتى دارىگەر لۇقانىڭ، جانى جومارت بارنابا مەن جۇرەكجۇتقان ستەپاننىڭ، مەيىرىمى مول تابيتا مەن قوناقشىل ٴلۇديانىڭ جانە باسقا دا ادال كۋاگەرلەردىڭ زامانىنان بەرى 2000 جىلداي ۋاقىت ٶتتى. بىراق ولارمەن ارامىزدى جالعاپ تۇرعان ٴبىر ٸس بار. ول — يسا تاپسىرعان شاكىرت دايىنداۋ ٸسى (مات. 28:19، 20). بىزدە وسى ىسكە ۇلەسكەر بولۋ قۇرمەتى بار!
«جەردىڭ قيىر شەتىنە دەيىن» (ەلشىلەردىڭ ىستەرى 1:8).
5. يسانىڭ ەرتەدەگى ٸزباسارلارى ۋاعىز ٸسىن قاي جەردەن باستادى؟
5 يسانىڭ ٸزباسارلارىنا بەرگەن تاپسىرماسى جايلى ويلانىپ كورەيىكشى. ول: «وزدەرىڭە كيەلى رۋح قونعاندا كۇش-قۋاتقا يە بولىپ، يەرۋساليمدە، بۇكىل ياھۋدەيا مەن ساماريادا جانە جەردىڭ قيىر شەتىنە دەيىن مەن جايلى كۋالىك ەتەسىڭدەر»،— دەگەن (ەل. ٸس. 1:8). الدىمەن، كيەلى رۋح شاكىرتتەرگە «يەرۋساليمدە» ۋاعىزداۋعا كۇش بەردى (ەل. ٸس. 1:1—8:3). سودان كەيىن كيەلى رۋحتىڭ جەتەلەۋىمەن «بۇكىل ياھۋدەيا مەن ساماريادا» كۋالىك ەتتى (ەل. ٸس. 8:4—13:3). ال سوسىن ولار ىزگى حاباردى «جەردىڭ قيىر شەتىنە دەيىن» جاريالاي باستادى (ەل. ٸس. 13:4—28:31).
6، 7. ۋاعىز ىسىندە العاشقى شاكىرتتەرگە قاراعاندا، بىزدە قانداي ارتىقشىلىق بار؟
6 بىلە بىلسەك، I عاسىرداعى باۋىرلاستارىمىز ۋاعىزداعاندا، قولدارىندا كيەلى كىتاپ بولماعان. ماتايدىڭ ىزگى حابارى، كەم دەگەندە، ب.ز. 41-جىلى عانا جازىلىپ بىتكەن. ال پاۋىلدىڭ كەيبىر حاتتارى شامامەن ب.ز. 61-جىلى ەلشىلەردىڭ ىستەرى كىتابى اياقتالماي تۇرىپ جازىلعان. العاشقى شاكىرتتەردىڭ قولىندا تولىق كيەلى جازبالارى دا، قىزىعۋشى ادامدارعا قالدىراتىن ادەبيەتتەرى دە بولماعان. يسانىڭ شاكىرتى بولماي تۇرىپ، ياھۋدي ماسىحشىلەر ەۆرەي جازبالارىن ٴماجىلىسحانالاردا ەستىگەن (قور. 2-ح. 3:14—16). ولار جازبالاردى قۇلاقتارىنا قۇيىپ الۋى كەرەك ەدى، سەبەبى قىزمەتتە جازبا ورىندارىن ادامدارعا جاتقا ايتاتىن.
7 بۇگىندە كوپشىلىگىمىزدىڭ جەكە كيەلى كىتابىمىز بار جانە كيەلى كىتاپقا نەگىزدەلگەن ادەبيەتتەرىمىز دە كول-كوسىر. ٴبىز ىزگى حاباردى ۋاعىزداپ، كوپتەگەن تىلدە، 240 ەل مەن اۋماقتا شاكىرت دايىنداپ ٴجۇرمىز.
ٴبىزدى كيەلى رۋح قۋاتتايدى
8، 9. ا) كيەلى رۋحتىڭ كومەگىمەن يسانىڭ شاكىرتتەرى نە ىستەدى؟ ٵ) كيەلى رۋحتىڭ كومەگىمەن ادال قۇل نەندەي دۇنيەلەر شىعارىپ جاتىر؟
8 يسا شاكىرتتەرىنە كۋالىك ەتۋدى تاپسىرعاندا: «وزدەرىڭە كيەلى رۋح قونعاندا كۇش-قۋاتقا يە بولاسىڭدار»،— دەگەن بولاتىن. قۇداي رۋحىنىڭ باعىتتاۋىمەن يسانىڭ ٸزباسارلارى، ٴتۇپتىڭ تۇبىندە، بۇكىل جەر بەتىنە كۋالىك بەرۋ كەرەك ەدى. وسى كيەلى رۋحتىڭ ارقاسىندا پەتىر مەن پاۋىل اۋرۋلاردى ساۋىقتىردى، جىنداردى قۋىپ شىعاردى، ٴتىپتى قايتىس بولعانداردى ٴتىرىلتتى! بىراق كيەلى رۋح ولارعا ودان دا ماڭىزدى سەبەپپەن بەرىلدى. ەلشىلەر مەن باسقا دا شاكىرتتەر وسى رۋحتىڭ ارقاسىندا ادامدارعا ماڭگىلىك ومىرگە جەتەلەيتىن تۋرا ٴبىلىمدى ايتىپ جەتكىزە الدى (جوح. 17:3).
9 ب.ز. 33-جىلى ەلۋىنشى كۇن مەيرامىندا يسانىڭ شاكىرتتەرى «رۋحتىڭ دارىتۋىمەن ٵرتۇرلى تىلدەردە سويلەي باستادى». وسىلاي ولار كوپ تىلدە «قۇدايدىڭ عاجاپ ىستەرى جايلى» جاريالادى (ەل. ٸس. 2:1—4، 11). ارينە، ٴبىز تاڭعاجايىپ تۇردە ٵرتۇرلى تىلدە سويلەپ كەتپەيمىز. الايدا كيەلى رۋحتىڭ كومەگىمەن ادال قۇل ٴتۇرلى تىلدەردە كيەلى كىتاپ ادەبيەتتەرىن شىعارىپ جاتىر. مىسالى، «كۇزەت مۇناراسى» مەن «ويانىڭدار!» جۋرنالىنىڭ اي سايىن ميلليونداعان داناسى باسىلادى. ال jw.org ۆەب-سايتىمىزدا كيەلى كىتاپ ادەبيەتتەرى مەن ۆيدەولار 1000 نان اسا تىلدە جارىق كورەدى. وسىنىڭ ارقاسىندا ٵربىر ۇلتتان، رۋدان جانە تىلدەن شىققان ادامدارعا «قۇدايدىڭ عاجاپ ىستەرى» جايلى ايتىپ ٴجۇرمىز (ايان 7:9).
10. 1989-جىلدان بەرى كيەلى كىتاپ اۋدارماسىنا قاتىستى قانداي ەڭبەك اتقارىلۋدا؟
10 1989-جىلدان بەرى ادال قۇل «كيەلى جازبالار. جاڭا دۇنيە اۋدارماسىنىڭ» كوپ تىلگە اۋدارىلۋىنا ايرىقشا ٴمان بەرىپ كەلەدى. وسى كيەلى كىتاپ قازىردىڭ وزىندە 200 دەن استام تىلگە اۋدارىلدى ٵرى 10 ميلليونداعان داناسى باسىپ شىعارىلدى. الداعى ۋاقىتتا بۇل سان كوبەيمەسە، ازايمايدى. بۇل ەڭبەك تەك قۇداي مەن كيەلى رۋحتىڭ ارقاسىندا عانا اتقارىلۋدا.
11. ادەبيەتتەر اۋدارىلۋ ٷشىن نە ىستەلىنىپ جاتىر؟
11 ادەبيەتتەرىمىزدى مىڭداعان ەرىكتى باۋىرلاس 150 دەن استام ەل مەن اۋماقتا اۋدارىپ جاتىر. ٴبىز بۇعان تاڭعالمايمىز، سەبەبى دۇنيەجۇزى بويىنشا ەحوبا قۇداي، كوكتە ورناعان پاتشالىق پەن ونىڭ پاتشاسى جايلى «تۇبەگەيلى كۋالىك بەرىلۋ» ٷشىن ۇيىمدى كيەلى رۋحتىڭ ٶزى جەتەلەپ كەلەدى. ال جەر بەتىندە باسقا مۇنداي ۇيىم جوق! (ەل. ٸس. 28:23).
12. پاۋىل مەن باسقا دا ماسىحشىلەر نەنىڭ ارقاسىندا ۋاعىزداي الدى؟
12 پاۋىل پيسيدياداعى انتيوحيادا ياھۋديلەر مەن باسقا ۇلت ادامدارىنا ۋاعىزداعاندا، «ماڭگى ومىرگە ىڭعاي تانىتقانداردىڭ بارلىعى يسانىڭ ٸزباسارى بولدى» (ەل. ٸس. 13:48). لۇقا ەلشىلەردىڭ ىستەرى كىتابىنىڭ سوڭىندا جازعانداي، پاۋىل «باتىلدىقپەن ٵرى ەش بوگەتسىز قۇداي پاتشالىعى تۋرالى ۋاعىزداعان» (ەل. ٸس. 28:31). ول قاي جەردە ۋاعىزدادى؟ سول كەزدەگى دۇنيەجۇزىلىك يمپەريانىڭ استاناسى ريمدە! راسىندا دا، يسانىڭ العاشقى شاكىرتتەرى بايانداما ايتسا دا نە باسقا تاسىلدەردى قولدانسا دا، كۋالىك بەرۋ ٸسىنىڭ ٴبارىن كيەلى رۋحتىڭ كومەگىمەن جانە باعىتتاۋىمەن اتقارا الدى.
قۋعىنعا قاراماي ۋاعىزداي بەرەمىز
13. قۋعىندالىپ جاتساق، نە سەبەپتى دۇعا ايتۋىمىز كەرەك؟
13 العاشقى شاكىرتتەر قۋعىن-سۇرگىنگە ۇشىراعاندا، ەحوبادان جالبارىنىپ باتىلدىق سۇراعان. سوندا ولار كيەلى رۋحقا كەنەلىپ، قۇداي ٴسوزىن تايسالماي جاريالاي باستادى (ەل. ٸس. 4:18—31). قۋعىنعا قاراماستان ۋاعىزداي بەرۋ ٷشىن ٴبىز دە ەحوبادان دانالىق پەن كۇش سۇراۋىمىز كەرەك (جاق. 1:2—8). قۇداي كيەلى رۋحىن بەرەتىندىكتەن، پاتشالىق تۋرالى حاباردى ۋاعىزداي بەرەمىز. بۇل ٸستى ەشتەڭە دە توقتاتا المايدى: قاتتى قارسىلىق تا، اياۋسىز قۋعىن دا. ٴبىز قۋدالانىپ جاتساق، ىزگى حاباردى جاريالاۋ ٷشىن مىندەتتى تۇردە كيەلى رۋح، دانالىق پەن باتىلدىق سۇراۋىمىز قاجەت (لۇقا 11:13).
14، 15. ا)«ستەپاننىڭ ولىمىنەن كەيىن باستالعان قۋعىن-سۇرگىن» قانداي ناتيجە اكەلدى؟ ٵ) ٴبىزدىڭ كۇنىمىزدە سىبىردەگى كوپتەگەن ادام شىندىقتى قالاي ەستىدى؟
14 ەرجۇرەك ستەپان جاۋ قولىنان ولگەنگە دەيىن كەرەمەت كۋالىك بەرگەن (ەل. ٸس. 6:5؛ 7:54—60). سودان كەيىن «قاتتى قۋعىن» بولىپ، ەلشىلەردەن باسقا شاكىرتتەردىڭ ٴبارى ياھۋدەيا مەن ساماريا ايماعىنا بىتىراپ كەتتى. بىراق بۇل ۋاعىز ٸسىن اۋىزدىقتاي المادى. مىسالى، ٴفىلىپ سامارياعا بارىپ، «ٴماسىح جايلى ۋاعىزدادى» جانە مۇنىڭ جەمىسى كەرەمەت بولدى (ەل. ٸس. 8:1—8، 14، 15، 25). سونداي-اق كيەلى كىتاپتا بىلاي دەلىنگەن: «ستەپاننىڭ ولىمىنەن كەيىن باستالعان قۋعىن-سۇرگىن كەزىندە جان-جاققا بىتىراپ كەتكەن شاكىرتتەر سوناۋ فينيكيا، كيپر مەن انتيوحياعا دەيىن جەتىپ، حاباردى تەك ياھۋديلەرگە عانا ايتۋمەن بولدى. الايدا ولاردىڭ ىشىندەگى كيپرلىك جانە كۇرەنەلىك كەيبىر كىسىلەر انتيوحياعا كەلدى دە، گرەكشە سويلەيتىن ادامدارمەن اڭگىمەلەسىپ، ولارعا يەمىز يسا تۋرالى ىزگى حاباردى جاريالاي باستادى» (ەل. ٸس. 11:19، 20). ٴيا، سول كەزدە قۋعىن-سۇرگىن پاتشالىق جايلى حاباردىڭ ٶرىسىن كەڭەيتۋگە سەپ بولدى.
15 ٴبىزدىڭ زامانىمىزدا دا بۇرىنعى كەڭەس وداعىندا وسىعان ۇقساس جاعداي بولعان. اسىرەسە 1950-جىلدارى مىڭداعان ەحوبا كۋاگەرى سىبىرگە ايدالدى. ولار ٴسىبىردىڭ ٵر ٴتۇرلى جەرىنە ايدالعاندىقتان، ىزگى حابار سول بايتاق ولكەدە كەڭ قۇلاش جايدى. سونشاما كوپ كۋاگەردىڭ 10000 شاقىرىمداي جەرگە بارىپ ۋاعىزداۋ ٷشىن قاراجات تابۋى ەكىتالاي ەدى. ال ۇكىمەت ولاردى وزدەرى تەگىن جىبەردى. ٴبىر باۋىرلاس ايتپاقشى، «بيلىكتەگىلەردىڭ ٶزى سىبىردەگى مىڭداعان اقجۇرەك ادامنىڭ شىندىقتى بىلۋىنە مۇرىندىق بولدى».
ەحوبا كول-كوسىر باتاسىن توكتى
16، 17. ەلشىلەردىڭ ىستەرى كىتابى ەحوبا ۋاعىز ىسىنە باتاسىن بەرگەنىن قالاي ايعاقتايدى؟
16 العاشقى ماسىحشىلەردى ەحوبا ٴسوزسىز جارىلقادى. پاۋىل مەن وزگەلەر ەگىپ، سۋارسا، «ٶسىرىپ جاتقان — قۇداي» ەدى (قور. 1-ح. 3:5، 6). ەلشىلەردىڭ ىستەرى كىتابى ۋاعىز ٸسىنىڭ ەحوبانىڭ باتاسىمەن وركەندەگەنىن ايعاقتايدى. مىسالى، «قۇداي ٴسوزى كەڭىنەن تاراپ، يەرۋساليمدە شاكىرتتەردىڭ سانى بارعان سايىن كوبەيە بەردى» (ەل. ٸس. 6:7). ماسىحشىلەر كوپ جەردە ۋاعىزداعاندىقتان، «بۇكىل ياھۋدەيا، عاليلەيا مەن ساماريا وڭىرىندەگى قاۋىمدار تىنىش كۇندەردى باستان كەشىرىپ، سەنىمدەرى نىعايا ٴتۇستى. بارلىعى ەحوبانى قاستەرلەگەندىكتەن ٵرى كيەلى رۋح ارقىلى جىگەرلەنگەندىكتەن قاتارلارى كوبەيە بەردى» (ەل. ٸس. 9:31).
17 سيرياداعى انتيوحيادا ياھۋديلەر مەن گرەكشە سويلەيتىن ادامدار وجەت كۋاگەرلەردەن شىندىقتى ەستىدى. «ەحوبا ولارعا جار بولعاندىقتان، كوپتەگەن ادام يەمىزگە سەنىپ، وعان بەت بۇردى»،— دەيدى كيەلى كىتاپ (ەل. ٸس. 11:21). سول قالادا تاعى قانداي ٶسىم بولعانى جايلى بىلاي دەپ وقيمىز: «ەحوبانىڭ ٴسوزى ودان ٵرى تاراپ، سەنۋشىلەردىڭ سانى كوبەيە بەردى» (ەل. ٸس. 12:24). پاۋىل مەن وزگەلەر باسقا ۇلت ادامدارىنا تابان اۋدارماي ۋاعىزداعاندىقتان، «ەحوبانىڭ ٴسوزى زور قارقىنمەن تاراپ، ىقپالى ارتا بەردى» (ەل. ٸس. 19:20).
18، 19. ا) ەحوبانىڭ بىزگە «جار بولىپ» جاتقانىنا نەگە سەنىمدىمىز؟ ٵ) ەحوبا ٶز حالقىن قولدايتىنىنا مىسال كەلتىرىڭىز.
18 بۇگىندە ەحوبا بىزگە دە «جار بولىپ» كەلەدى. سوندىقتان دا تالايلار شىندىقتى قابىلداپ، ومىرلەرىن قۇدايعا باعىشتاپ، شومىلدىرۋ راسىمىنەن وتۋدە. بۇعان قوسا، تەك ەحوبانىڭ كومەگى مەن باتاسىنىڭ ارقاسىندا عانا بىزدەر قاتتى قارسىلىقتار مەن قۋعىن-سۇرگىنگە توتەپ بەرىپ كەلەمىز. سونداي-اق قىزمەتىمىزدى پاۋىل مەن باسقا دا العاشقى شاكىرتتەر سياقتى ٵلى دە ٴساتتى اتقارىپ ٴجۇرمىز (ەل. ٸس. 14:19—21). ەحوبا بىزگە كومەك قولىن سوزۋعا ٵردايىم اسىق. تار قىسپاق كورگەن كەزىمىزدىڭ بارىندە ەحوبا ٴبىزدى «ماڭگى قولىمەن» سۇيەپ، دەمەيدى (مۇس. 5-ج. 33:27). سونداي-اق ول ۇلى ەسىمى ٷشىن حالقىن ەشقاشان تاستامايدى (سام. 1-ج. 12:22؛ ٴزاب. 94:14).
19 وسىعان ٴبىر مىسال: ەكىنشى دۇنيەجۇزىلىك سوعىس كەزىندە نەمىستەر حارولد ابت باۋىرلاسىمىزدى ۋاعىزداعانى ٷشىن زاكسەنحاۋزەن كونسلاگەرىنە جىبەرەدى. 1942-جىلى مامىردا گەستاپو ونىڭ ۇيىنە بارادى دا، ايەلى ەلزانى تۇتقىنداپ، ال كىشكەنتاي قىزىن تارتىپ الادى. ەلزا ٴتۇرلى كونسلاگەرلەردە وتىرىپ شىعادى. ول بىلاي دەدى: «كونسلاگەرلەردە وتىرعان جىلدارى مەن مىنا ٴبىر ماڭىزدى شىندىقتى ٴتۇسىندىم: تولارساقتان ساز كەشىپ، قيىندىق كورگەن ساتتە ەحوبانىڭ رۋحى ايرىقشا كۇش بەرەدى ەكەن! تۇتقىنعا الىنعانعا دەيىن ٴبىر ايەل باۋىرلاستىڭ حاتىن وقىعان ەدىم. ول اۋىر سىناقتا ەحوبانىڭ رۋحى جۇرەگىڭە تىنىشتىق ۇيالاتاتىنىن جازعان ەدى. سوندا «ٵي، مىنا باۋىرلاس اسىرەلەپ ايتىپ جاتىر-اۋ» دەپ ويلادىم. بىراق باسىما قيىن كۇن تۋعاندا، شىن ايتامىن، بۇل سوزدەردىڭ راستىعىنا ٴجۇز پايىز كوزىم جەتتى. سول كەزدە جۇرەگىمدە قانداي تىنىشتىق بولعانىن سوزبەن جەتكىزە المايمىن. ٶز باسىڭنان وتپەيىنشە، بۇعان سەنۋ قيىن».
تۇبەگەيلى كۋالىك بەرۋدەن جالىقپاڭىز!
20. پاۋىل ۇيقاماقتا وتىرعاندا نە ىستەدى جانە بۇل كەيبىر باۋىرلاستارىمىزدى قالاي جىگەرلەندىرەدى؟
20 ەلشىلەردىڭ ىستەرى كىتابى پاۋىلدىڭ قۇلشىنىسپەن «قۇداي پاتشالىعى تۋرالى ۋاعىزداپ» جاتقانىمەن اياقتالادى (ەل. ٸس. 28:31). ول ۇيقاماقتا وتىرعاندىقتان، ريمدە ۇيدەن ۇيگە ٴجۇرىپ ۋاعىزداي المادى. ايتكەنمەن وزىنە كەلگەندەردىڭ بارىنە جاپپاي كۋالىك بەردى. بۇگىنگى تاڭدا كەيبىر ارداقتى باۋىرلاستارىمىز، بالكىم، توسەككە تاڭىلعاندىقتان بولار، ۇيدەن شىعا المايدى نەمەسە قارتتار ۇيىندە تۇرادى. بىراق ولاردىڭ ەحوباعا دەگەن سۇيىسپەنشىلىگى مەن كۋالىك ەتۋگە دەگەن ىقىلاستارى وتتاي ىستىق. ٴبىز كوكتەگى اكەمىزگە دۇعا ەتىپ، شىندىققا سۋساپ جۇرگەن ٵرى قۇدايدىڭ كەرەمەت نيەتتەرى جايلى بىلگىسى كەلەتىن ادامداردى سول باۋىرلاستارعا جولىقتىرشى دەپ سۇرايمىز.
21. نەگە ۋاعىز ٸسىن شۇعىل تۇردە اتقارۋىمىز كەرەك؟
21 بىراق كوپشىلىگىمىز ۇيدەن ۇيگە ٴجۇرۋ مەن قىزمەتتىڭ باسقا دا تۇرلەرىنە قاتىسا الامىز. ەندەشە، ٵربىرىمىز پاتشالىقتىڭ جاريالاۋشىلارى رەتىندە مىندەتىمىزدى اتقارىپ، «جەردىڭ قيىر شەتىنە دەيىن» كۋالىك بەرۋ ٷشىن الدىمىزعا جان سالمايىق. بۇل — شۇعىل اتقارىلاتىن ماڭىزدى ٸس، سەبەبى ٴماسىحتىڭ وسىندا بولۋىنىڭ «بەلگىسى» الاقانعا سالعانداي انىق كورىنىپ تۇر (مات. 24:3—14). ٴبىز ٴبىر سەكۋندتى دا قۇر جىبەرىپ العىمىز كەلمەيدى. ويتكەنى ٴدال قازىر «يەمىزدىڭ ىسىندە» اتقاراتىن جۇمىس كوپ (قور. 1-ح. 15:58).
22. ەحوبانىڭ كۇنىن كۇتە ٴجۇرىپ، نە ىستەۋگە بەكىنەيىك؟
22 «ەحوبانىڭ ۇلى دا عالامات كۇنىن» كۇتە ٴجۇرىپ، ادالدىقپەن جانە قايسارلىقپەن ٵرى قاراي دا كۋالىك بەرۋگە مىقتاپ بەكىنەيىك (جوەل 2:31). بەرەيالىقتار سياقتى، «قۇداي ٴسوزىن زور ىقىلاسپەن قابىل الاتىن» تالاي جاندى ٵلى كەزدەستىرەمىز (ەل. ٸس. 17:10، 11). سول سەبەپتى «جارايسىڭ، جاقسى دا ادال قۇل!» دەگەن ٴسوزدى ەستىگەنشە، كۋالىك بەرۋدەن تالمايىق! (مات. 25:23). ەگەر شاكىرت دايىنداۋ ىسىنە بىلەك تۇرە قاتىسساق جانە ەحوباعا دەگەن ادالدىعىمىزدان ەشقاشان اينىماساق، قۇداي پاتشالىعى جايلى «تۇبەگەيلى كۋالىك بەرۋگە» اتسالىسقانىمىز ٷشىن ماڭگى باقي قۋانىپ شاتتانامىز!
