5-تاراۋ
قۇدايدىڭ كەرەمەت قاسيەتتەرى
كيەلى جازبالاردان قۇدايدىڭ كوپتەگەن تاماشا قاسيەتتەرى جايلى بىلە الامىز. سولاردىڭ ىشىندە قۇدىرەت، ادىلدىك، دانالىق پەن سۇيىسپەنشىلىك ونىڭ باستى ٴتورت قاسيەتى بولىپ تابىلادى. ەندى وسىلاردىڭ ٵرقايسىسىنا جەكە توقتالىپ وتەيىك.
قۇدىرەتى شەكسىز قۇداي
قۇدايدىڭ قۇدىرەتى زور
ەحوبا قۇداي ىبىرايىم پايعامبارعا: «مەن قۇدىرەتى شەكسىز قۇدايمىن»،— دەگەن (مۇسانىڭ 1-جازباسى 17:1). ونىڭ قۇدىرەتى تەڭدەسسىز ٵرى ەش سارقىلمايدى. ول وسى قۇدىرەتىمەن بۇكىل الەمدى جاراتتى.
قۇداي ەشقاشان قۇدىرەتىن بۇرىس قولدانبايدى. ونى ٵردايىم يگەرە بىلەدى جانە ورنىمەن قولدانادى. سونداي-اق قۇدىرەتىن كورسەتكەندە، ادىلدىگىن، دانالىعى مەن سۇيىسپەنشىلىگىن دە قوسا تانىتادى.
ەحوبا ٶزىنىڭ ادال قىزمەتشىلەرىنە مولىنان كۇش بەرەدى. بۇل تۋرالى جازبالاردا بىلاي دەلىنگەن: «ەحوبا وزىنە بار جۇرەگىمەن بەرىلگەندەردى قولداۋ ٷشىن، بۇكىل جەر بەتىن مۇقيات باقىلاپ وتىر» (شەجىرەلەر 2-جازبا 16:9). وسىنداي قۇدىرەتى زور، سويتسە دە قامقور قۇدايعا جاقىنداعىڭىز كەلە مە؟
ادىلدىكتىڭ قۇدايى
ەحوبا قۇداي «ادىلدىكتى سۇيەدى» (ٴزابۇر 37:28). ول ٶزىنىڭ ٴمىنسىز تالاپتارىنا ساي، ٵرقاشان تۋرا دا ٵدىل ارەكەت ەتەدى.
قۇداي ەشكىمدى الالامايدى
قۇداي ادىلەتسىزدىكتى جەك كورەدى. «ول ەشكىمدى الالامايدى، پارا دا المايدى» (مۇسانىڭ 5-جازباسى 10:17). باسقالارعا ٴجابىر كورسەتەتىندەردى ونىڭ جانى جاراتپايدى، ال «جەسىرلەر مەن جەتىمدەر» سياقتى قورعانسىزدارعا پانا بولادى (مۇسانىڭ 2-جازباسى 22:22). قۇداي ادامنىڭ بەت-جۇزىنە قارامايدى. جازبالاردان بىلاي دەپ وقيمىز: «قۇداي ەشكىمدى الالامايدى... ول وزىنەن قورقاتىن جانە ٵدىل ارەكەت ەتەتىن ٵربىر ادامدى، قاي ۇلتتان شىقسا دا، قابىل الادى» (ەلشىلەردىڭ ىستەرى 10:34، 35).
ەحوبا قۇداي ادىلدىگىن بايسالدىلىقپەن تانىتادى: ول تىم جۇمساق نە تىم قاتال ەمەس. كۇناسىنا ەش وكىنبەيتىندەردى جازالايدى، ال وكىنەتىندەرگە زور مەيىرىمىن كورسەتەدى. «ەحوبا مەيىرىمدى دە جاناشىر، اشۋلانۋعا اسىقپايدى، اينىماس سۇيىسپەنشىلىگى مول. ول قاتەلىكتى جىپكە تىزبەيدى، ماڭگى اشۋلانا دا بەرمەيدى. ٴبىزدى كۇنالارىمىزعا قاراپ جازالامايدى، ەسەمىزدى دە زاڭسىزدىعىمىزعا ساي قايتارمايدى» (ٴزابۇر 103:8—10). قۇداي ٶز قىزمەتشىلەرىنىڭ ادال ىستەرىن ۇمىتپايدى ٵرى سول ٷشىن باتاسىن بەرەدى. وسىنداي ٵدىل قۇداي سەنىم ارتۋعا تۇرارلىق ەمەس پە؟!
دانا قۇداي
كيەلى جازبالار دا قۇدايدىڭ دانالىعىن پاش ەتەدى
ەحوبا قۇداي — دانالىقتىڭ قاينار كوزى. كيەلى جازبالاردا: «و، نەتكەن زور قۇدايدىڭ باتالارى! نەتكەن مول دانالىعى مەن ٴبىلىمى!»— دەپ ورىندى ايتىلعان (ريمدىكتەرگە 11:33). ونىڭ دانالىعى شەكسىز ٵرى تەڭدەسى جوق.
قۇدايدىڭ دانالىعىن ونىڭ جاراتقاندارىنان كورۋگە بولادى. ٴزابۇر كىتابىندا بىلاي دەلىنگەن: «ۋا، ەحوبا، ىستەرىڭ نەتكەن كوپ دەسەڭشى! سەن ولاردىڭ ٴبارىن دانالىقپەن جاسادىڭ» (ٴزابۇر 104:24).
كيەلى جازبالار دا قۇداي دانالىعىن پاش ەتەدى. ٴداۋىت پاتشا: «ەحوبانىڭ ەسكەرتۋلەرى سەنىمدى، تاجىريبەسىزدى دانا قىلادى»،— دەپ جازعان (ٴزابۇر 19:7). ويلاپ كورىڭىزشى، ٴسىز قۇدايدىڭ شەكسىز دانالىعىنان سۋسىنداي الاسىز! وسى مۇمكىندىكتى پايدالانعىڭىز كەلە مە؟
«قۇداي — سۇيىسپەنشىلىك»
ەحوبا قۇدايدىڭ نەگىزگى قاسيەتى — سۇيىسپەنشىلىك. جازبالاردا: «قۇداي — سۇيىسپەنشىلىك»،— دەلىنگەن (جوحاننىڭ 1-حاتى 4:8). ول نە ىستەسە دە، سۇيىسپەنشىلىكتى ارقاۋ ەتەدى.
قۇداي بىزگە سۇيىسپەنشىلىگىن ٴتۇرلى جولمەن كورسەتەدى. ول بىزگە بار جاقسىنى بەرەدى. ونىڭ سوزىندە بىلاي دەلىنگەن: «يگى ىستەرىمەن ٶزى جايلى كۋالىك بەرۋىن توقتاتپادى: اسپاننان جاۋىن جاۋدىرىپ، مەزگىلىمەن مول ٶنىم بەردى جانە كول-كوسىر اس-سۋ سيلاپ، جۇرەكتەرىڭدى قۋانىشقا تولتىرىپ كەلدى» (ەلشىلەردىڭ ىستەرى 14:17). راسىندا دا، «يگى دە كەمەلدى سيدىڭ ٴبارى كوكتەن، اسپان شىراقتارىن جاراتقان اكەدەن كەلەدى» (جاقىپ 1:17). اسا قۇندى سي بولىپ تابىلاتىن جازبالار ارقىلى قۇداي ٶزى جايلى شىندىقتى اشادى، سونداي-اق سۇيىسپەنشىلىككە تولى زاڭدارى مەن تالاپتارىن ۇيرەتەدى. يسا پايعامبار قۇدايعا سيىنعاندا: «سەنىڭ ٴسوزىڭ — شىندىق»،— دەپ ايتقان (جوحان 17:17).
قۇدايدىڭ جاراتقاندارىنان ونىڭ دانالىعى كورىنەدى
قۇداي ٴبىز قيىندىق كورگەندە دە، قول ۇشىن بەرەدى. ٴزابۇر كىتابىندا «بار اۋىرتپالىعىڭدى ەحوباعا ارت، ول سەنى دەمەيدى. ٵدىل جاننىڭ قۇلاۋىنا ول ەشقاشان جول بەرمەيدى» دەگەن سوزدەر بار (ٴزابۇر 55:22). سونىمەن قاتار قۇداي كۇنالارىمىزدى كەشىرەدى. بۇل جايىندا: «ۋا، ەحوبا، سەن ىزگى ٵرى كەشىرۋگە دايىنسىڭ، وزىڭە ارقا سۇيەيتىندەردىڭ ەشقايسىسىنان اينىماس سۇيىسپەنشىلىگىڭدى ايامايسىڭ»،— دەپ وقيمىز (ٴزابۇر 86:5). ول ٴتىپتى بىزگە ماڭگىلىك ٶمىر سيلاماق. ونىڭ سوزىندە: «قۇداي ولاردىڭ كوزىندەگى ٵربىر جاستى ٴسۇرتىپ تاستايدى، ەندى قايتىپ ٶلىم، جوقتاۋ، زار ەڭىرەۋ مەن اۋرۋ بولمايدى»،— دەلىنگەن (ايان 21:4). قۇدايدىڭ سۇيىسپەنشىلىگى سىزگە قالاي اسەر ەتەدى؟ ٴسىزدىڭ دە وعان سۇيىسپەنشىلىك كورسەتكىڭىز كەلە مە؟
قۇدايعا جاقىنداڭىز
قۇدايعا جاقىنداۋ ٷشىن وعان سيىنۋ جانە ونىڭ قاسيەتتەرى تۋرالى وي جۇگىرتۋ ماڭىزدى
قۇداي ٶزىن جاقسىراق بىلگەنىڭىزدى قالايدى. ونىڭ سوزىندە «قۇدايعا جاقىنداڭدار، سوندا ول دا سەندەرگە جاقىندايدى» دەگەن شاقىرۋ بار (جاقىپ 4:8). قۇداي ىبىرايىم پايعامباردى ٶزىنىڭ «دوسى» دەپ اتاعان (يشايا 41:8). ول سىزبەن دە دوس بولۋدى قالايدى.
قۇداي جايلى نەعۇرلىم كوپ بىلسەڭىز، وعان سوعۇرلىم جاقىنداي تۇسەسىز ٵرى باقىتتى بولاسىز. كيەلى جازبالاردا باقىتتى ادامدى بىلاي دەپ سيپاتتايدى: «ول ەحوبانىڭ زاڭىنان قۋانىش تابادى، ونىڭ زاڭىن كۇنى-ٴتۇنى كۇبىرلەپ وقيدى» (ٴزابۇر 1:1، 2). سوندىقتان جازبالاردى وقىپ-ٴبىلۋدى جالعاستىرا بەرىڭىز. قۇدايدىڭ قاسيەتتەرى مەن جاراتقاندارى تۋرالى وي جۇگىرتىڭىز. بىلگەندەرىڭىزدى ومىردە قولدانۋ ارقىلى قۇدايعا دەگەن سۇيىسپەنشىلىگىڭىزدى كورسەتىڭىز. ونىڭ سوزىندە: «قۇدايدى ٴسۇيۋ دەگەنىمىز — ونىڭ وسيەتتەرىن ورىنداۋ. ال ولاردى ورىنداۋ قيىن ەمەس»،— دەپ ايتىلعان (جوحاننىڭ 1-حاتى 5:3). سونداي-اق ٴزابۇر كىتابىنىڭ جىرشىسى سياقتى: «ماعان جولدارىڭدى كورسەتشى، ۋا، ەحوبا، جولدارىڭمەن ٴجۇرۋدى ۇيرەتشى. شىندىعىڭدا جۇرۋگە كومەكتەسشى»،— دەپ قۇدايعا سيىنىپ، دۇعا ەتسەڭىز بولادى (ٴزابۇر 25:4، 5). سوندا قۇدايدىڭ «ٵرقايسىمىزدان الىس ەمەس» ەكەنىنە كوزىڭىز جەتەدى (ەلشىلەردىڭ ىستەرى 17:27).
