7-تاراۋ
قۇدايدىڭ پايعامبارلار ارقىلى بەرگەن ۋادەسى
ەجەلدەگى پايعامبارلار قۇدايعا سەنەتىندەرىن كورسەتە بىلگەن: ولار قۇدايدىڭ بەرگەن ۋادەلەرىنە سەنىپ، مۇنى بۇكىل ٶمىر سالتتارىمەن كورسەتكەن. ول قانداي ۋادەلەر ەدى؟
ادام اتا مەن حاۋا انانىڭ ەدەم باعىندا شىعارعان بۇلىگىنەن سوڭ-اق قۇداي ٴبىر «ۇرپاقتى» جىبەرەتىنىن ۋادە ەتتى. ول «ۇرپاق» ٸبىلىس شايتاندى بەينەلەيتىن «جىلاننىڭ» باسىن مىجىپ، ونى ٴبىرجولاتا جويۋى كەرەك ەدى (مۇسانىڭ 1-جازباسى 3:14، 15؛ ايان 12:9، 12). ۋادە ەتىلگەن «ۇرپاق» كىم بولماق؟
وسى العاشقى پايعامبارلىقتى ايتقان سوڭ، شامامەن 2000-جىلدان كەيىن ەحوبا قۇداي اتالمىش «ۇرپاق» ىبىرايىم پايعامباردىڭ ٷرىم-بۇتاعىنان شىعاتىنىن ايتقان. ول ىبىرايىمعا: «مەنىڭ سوزىمە قۇلاق اسقانىڭ ٷشىن، سەنىڭ ۇرپاعىڭ ارقىلى جەر بەتىندەگى بارلىق حالىقتارعا باتام قونادى»،— دەدى (مۇسانىڭ 1-جازباسى 22:18).
ب.ز.ب. 1473-جىلى قۇداي مۇسا پايعامبارعا «ۇرپاق» جايلى كوبىرەك مالىمەت بەردى. مۇسا يسرايل ۇلدارىنا بىلاي دەدى: «ەحوبا قۇدايلارىڭ سەندەر ٷشىن باۋىرلارىڭنىڭ اراسىنان مەن سياقتى ٴبىر پايعامبار شىعارادى. سونى تىڭداڭدار!» (مۇسانىڭ 5-جازباسى 18:15). وسىلايشا كەلەتىن پايعامبار دا، مۇسا سياقتى، ىبىرايىمنىڭ ۇرپاقتارىنىڭ اراسىنان شىقپاق ەدى.
سونداي-اق ول پايعامبار ٴداۋىت پاتشانىڭ اۋلەتىنەن شىعىپ، ۇلى پاتشا بولۋ كەرەك-ٴتىن. قۇداي داۋىتكە: «مەن ارتىڭنان ٴبىر ۇرپاعىڭدى، ٶز ۇلىڭدى تاعايىنداپ، ونىڭ پاتشالىق بيلىگىن نىعايتامىن. مەن ونىڭ پاتشالىق تاعىن بەرىك ەتىپ، ماڭگىگە ورنىقتىرامىن» (سامۋيلدىڭ 2-جازباسى 7:12، 13). سونىمەن قاتار قۇداي ٴداۋىتتىڭ وسى ۇرپاعى «تىنىشتىق بەكزاداسى» دەپ اتالاتىنىن اشتى. سوسىن، بىلاي دەدى: «ول ٴداۋىتتىڭ تاعى مەن پاتشالىعىن يەمدەنىپ، بيلىگى كەڭ جايىلادى، سوندا ماڭگىلىك بويى تىنىشتىق ورنايدى. پاتشالىق بيلىگى قازىردەن باستاپ ماڭگى باقي ادىلدىك پەن تۋرالىق ارقىلى بەرىك ورنىعىپ، نىعايۋ ٷشىن سولاي بولادى» (يشايا 9:6، 7). شىنىندا دا، وسى ٵدىل باسشى بۇكىل دۇنيەجۇزىنە تىنىشتىق پەن ادىلدىكتى ورناتار ەدى. ٴبىراق ول قاشان كەلۋگە ٴتيىس ەدى؟
كەيىنىرەك جابىرەيىل پەرىشتە دانيال پايعامبارعا مىنانى ايتتى: «سەن مىنانى ٴبىلىپ، ۇعىپ ال: يەرۋساليمدى قالپىنا كەلتىرىپ، قايتا تۇرعىزۋ جايلى جارلىق شىققاننان باستاپ ٴماسىح كوسەم كەلگەنگە دەيىن 7 اپتا جانە 62 اپتا وتەدى» (دانيال 9:25). بۇل 69 جىلدىق اپتا (ٵر اپتا 7 جىلدان تۇرادى) 483 جىلدى قۇرايدى. وسى كەزەڭ ب.ز.ب. 455-جىلدان باستالىپ، ب.ز. 29-جىلى اياقتالدى a.
وسىندا ايتىلعان ٴماسىح، ياعني مۇسا ىسپەتتى پايعامبار جانە كوپتەن كۇتكەن «ۇرپاق»، شىنىمەن ب.ز. 29-جىلى كەلدى مە؟ كەلىڭىز، كورەيىك.
a ەحوبا كۋاگەرلەرى باسىپ شىعارعان «ماڭگى باقي ٶمىردىڭ راقاتىن كورىڭىز!» كىتابىنىڭ 255-بەتىندەگى 2-تۇسىندىرمەنى قاراڭىز.