9-تاراۋ
يسا ٴماسىح قانداي ۇلگى قالدىردى؟
قۇداي ٴماسىحتى بارلىق حالىقتارعا باسشى رەتىندە تاعايىندايتىنىن الدىن الا ايتقان. ول بىزگە شىن مانىندە قانداي باسشى كەرەك ەكەنىن بىلەدى، سوندىقتان ەڭ جاقسى باسشىنى تاعايىندادى. ٴماسىح قانداي باسشى بولار ەدى؟ كەرەمەت ساياساتكەر مە؟ مىقتى قولباسشى ما؟ الدە ويشىل ٴپالساپاشى ما؟ كيەلى جازبالارعا ساي، ٴماسىح ەرەكشە پايعامبار بولۋ كەرەك-ٴتىن. بۇل پايعامبار يسا ەدى (ماتاي 23:10).
قۇداي يسانىڭ قاسيەتتى ٵرى ٴمىنسىز بولىپ تۋىلۋىنا قام جاسادى. كەيىن يسانىڭ ٶزى دە شايتاننىڭ تۋرا جولدان تايدىرماق بولعان ارەكەتىنىڭ بارىنە قارسى تۇرا ٴبىلدى. ول سوزىمەن دە، ىسىمەن دە قۇدايدىڭ قۇدىرەتىن، ادىلدىگىن، دانالىعى مەن سۇيىسپەنشىلىگىن كەرەمەت تۇردە پاش ەتتى. يسانىڭ ۇلگىسىنەن ٴبىز نەگە ۇيرەنە الاتىنىمىزدى كورەيىك.
يسا ادامدارعا ايانباي كومەكتەسكەن
ول قۇداي بەرگەن قۇدىرەتىن ادامدارعا كومەكتەسۋ ٷشىن قولدانعان. يسا شىن كوڭىلدەن ادامداردىڭ قامىن ويلاپ، ٶز كۇشىن ولاردىڭ مۇقتاجدىعىن قاناعاتتاندىرۋ ٷشىن ايانباي قولدانعان. «حالىقتى اياپ تۇرمىن... جەيتىن ەشتەڭەلەرى جوق»،— دەدى ول (مارقا 8:2). سوسىن، كەرەمەت جاساپ، وزىنەن ٴتالىم الۋعا كەلگەن قالىڭ جۇرتتى تاماقتاندىردى.
سونداي-اق ول بارلىق جەردى ارالاپ، ٴتالىم بەرىپ، «ادامداردى ٴتۇرلى اۋرۋ-سىرقاۋدان ساۋىقتىرىپ ٴجۇردى» (ماتاي 4:23). ونىڭ سوڭىنان كوپ ادامنىڭ ەرگەنى جانە «بۇكىل حالىقتىڭ يساعا قولىن تيگىزۋگە ۇمتىلعانى» تاڭعالدىرمايدى، «ويتكەنى ودان قۇدىرەت شىعىپ، ٴبارىن دە ساۋىقتىرىپ جاتتى» (لۇقا 6:19). شىندىعىندا دا، يسا «وزىنە قىزمەت ەتكىزۋگە ەمەس، ٶزى قىزمەت ەتىپ، كوپتەگەن ادامدار ٷشىن جانىن تولەم رەتىندە بەرۋگە كەلدى» (ماتاي 20:28) a. بۇگىندە وسىنداي جانقيارلىق رۋح تانىتاتىن باسشىلار بار ما؟
ول بالالاردى جاقسى كورگەن
ول قۇدايدىڭ ادىلدىگىن تانىتتى. يسا قۇداي زاڭىنىڭ ٴمانىن جاقسى ٴتۇسىنىپ، سونداعى تالاپتارعا ساي ارەكەت ەتكەن. ول جازبالارداعى: «وزىڭنىڭ ەركىڭدى ورىنداۋعا قۇشتارمىن، ۋا، قۇدايىم. زاڭىڭدى جۇرەگىمنىڭ تۇكپىرىندە ۇستايمىن»،— دەپ الدىن الا ايتىلعان سوزدەرگە ساي ٶمىر كەشكەن دەۋگە بولادى (ٴزابۇر 40:8). قۇدايعا ەلىكتەپ، يسا ەشكىمدى باي-كەدەي، ايەل-ەركەك، بالا نە ەرەسەك دەپ الالاماي، بارىنە بىردەي سي-قۇرمەت كورسەتكەن. بىردە اتا-انالار بالالارىن يساعا اكەلگەندە، شاكىرتتەرى بۇعان قارسىلىق بىلدىرەدى. الايدا يسا: «بالالاردىڭ ماعان كەلۋىنە جول بەرىڭدەر، ولارعا كەدەرگى جاساماڭدار. ويتكەنى قۇداي پاتشالىعى وسىندايلار ٷشىن»،— دەيدى (مارقا 10:14).
ول قۇدايدان كەلگەن دانالىقتى پاش ەتتى. يسا ادامداردى جاقسى تۇسىنگەن. ويتكەنى «ٵربىر ادامنىڭ جۇرەگىن كورە» بىلگەن (جوحان 2:25). يسانىڭ جاۋلارى ونى تۇتقىنداۋ ٷشىن كىسىلەرىن جىبەرگەندە، ٴتىپتى ولاردىڭ ٶزى: «ەشكىم ول سياقتى سويلەگەن ەمەس!»— دەپ تاڭعالعان. يسا مۇنداي دانالىققا قايدان يە بولدى؟ ول: «ٸلىمىم — مەنىكى ەمەس، مەنى جىبەرگەندىكى»،— دەپ ٴتۇسىندىردى (جوحان 7:16، 46).
اۋرۋلارعا جانى اشىپ، ولاردى ساۋىقتىرعان
ول قۇدايدىڭ سۇيىسپەنشىلىگىن كورسەتتى. يسا سونداي-اق ادامدارعا زور جاناشىرلىق تانىتقان. بىردە «ٷستى-باسىن الاپەس باسقان» ٴبىر كىسى ودان: «يەم، قالاساڭىز بولعانى، مەنى ايىقتىرىپ تازارتا الاسىز»،— دەپ جالبارىنادى. ونى اياپ كەتكەن يسا «قولىن سوزىپ، ونىڭ دەنەسىنە تيگىزدى دە: «قالايمىن، تازار!»— دەيدى. سول ساتتە ول الاپەسىنەن تازاردى» (لۇقا 5:12، 13؛ مارقا 1:41، 42). يسا شىنىمەن سول بايعۇس كىسىنىڭ قاسىرەتىن جەڭىلدەتكىسى كەلگەن!
يسا پايعامبار ٴسىزدىڭ دە قامىڭىزدى ويلاي ما؟ ونىڭ ٶزى بىلاي دەگەن: «بەينەت شەككەندەر مەن ەڭسەلەرىن اۋىر جۇك باسقاندار، بارلىعىڭ دا ماعان كەلىڭدەر، مەن جاندارىڭدى سەرگىتەمىن. مويىنتۇرىعىمدى الىپ، مەنەن ۇيرەنىڭدەر، ويتكەنى مەن جۇمساق ٵرى كىشىپەيىلمىن. سوندا جاندارىڭ سەرگيدى» (ماتاي 11:28، 29).
راسىندا دا، يسا پايعامبار ەڭ جاقسى باسشى بولعاندىقتان، ٴبىزدى: «مەنەن ۇيرەنىڭدەر»،— دەپ شاقىرۋدا. ٴسىز ونىڭ شىن جۇرەكتەن ايتقان وسى شاقىرۋىن قابىل الاسىز با؟ بۇل شاقىرۋ باقىتتى ومىرگە جەتەلەيدى.
a تولەم تۋرالى كوبىرەك مالىمەتتى «ماڭگى باقي ٶمىردىڭ راقاتىن كورىڭىز!» كىتابىنىڭ 27-تاراۋىنان قاراڭىز.
قىزىقتى بولار مالىمەتتەر
كىتاپتار مەن كىتاپشالار
