ون بەسىنشى تاراۋ
قۇدايعا ۇنايتىن عيبادات
1. قۇدايعا قانداي عيبادات ۇنايتىنىن كىم ايتا الادى؟
كوپ دىندەر قۇداي تۋرالى شىندىقتى ۇيرەتەمىز دەيدى. ٴبىراق ٵر ٴدىن قۇدايدىڭ قانداي ەكەندىگىنە، وعان قالاي سيىنۋ كەرەكتىگىنە قاتىستى ٵرتۇرلى نارسەگە ۇيرەتەدى. ولاي بولسا، قۇدايعا قانداي عيبادات ۇنايدى؟ بۇل سۇراققا ەحوبا قۇداي عانا جاۋاپ بەرە الادى.
2. ەحوباعا قانداي عيبادات ۇنامدى ەكەنىن قايدان بىلۋگە بولادى؟
2 ەحوبا وزىنە قالاي عيبادات ەتۋىمىز كەرەكتىگىن كيەلى كىتاپقا جازدىرعان. سوندىقتان كيەلى كىتاپتى وقىپ-زەرتتەي بەرىڭىز. ەحوبا سىزگە وندا جازىلعانداردى تۇسىنۋگە جانە ومىرىڭىزدە قولدانۋعا كومەكتەسەدى. ويتكەنى ول ٴسىزدىڭ قامىڭىزدى ويلايدى (يشايا 48:17).
3. قۇداي ٴبىزدىڭ نە ىستەگەنىمىزدى قالايدى؟
3 كەيبىر ادامداردىڭ ويىنشا، قۇدايعا بارلىق دىندەر ۇناي بەرەدى. ٴبىراق يسا بۇلاي دەپ ۇيرەتپەگەن. ول: «ماعان «يەم! يەم!» دەيتىندەر ەمەس، كوكتەگى اكەمنىڭ ەركىن ورىندايتىندار عانا كوك پاتشالىعىنا كىرەدى»،— دەگەن. دەمەك، بىزگە قۇدايدىڭ ەركى نەدە ەكەنىن ٴبىلىپ، سوعان ساي ارەكەت ەتۋ قاجەت. بۇلاي ەتكەنىمىز وتە ماڭىزدى، سەبەبى قۇدايدىڭ ەركىن ورىندامايتىن ادامداردى يسا «زاڭسىزدىق جاساۋشىلارعا»، ياعني قىلمىسكەرلەرگە تەڭەگەن (ماتاي 7:21—23).
4. قۇدايدىڭ ەركىن ورىنداۋ تۋرالى يسا نە ايتقان؟
4 يسا قۇدايدىڭ ەركىنە ساي ارەكەت ەتۋ ٵردايىم وڭاي بولا بەرمەيتىنىن ايتقان. ول بىلاي دەگەن: «تار قاقپا ارقىلى كىرىڭدەر، سەبەبى جويىلۋعا اپاراتىن قاقپا كەڭ، جول دا داڭعىل، ونىمەن جۇرەتىندەر كوپ. ال ومىرگە اپاراتىن قاقپا دا، جول دا تار. ونى تاباتىندار از» (ماتاي 7:13، 14). تار جول، ياعني قۇدايعا ۇنامدى تۇردە عيبادات ەتۋ ماڭگى ومىرگە اپارادى. ال كەڭ جول، ياعني قۇدايعا ۇنامسىز جولمەن عيبادات ەتۋ ولىمگە اپارادى. ٴبىراق ەحوبا ەشكىمنىڭ ولگەنىن قالامايدى. ول ٵربىر ادامعا ٶزى تۋرالى ٴبىلىم الۋعا مۇمكىندىك بەرىپ وتىر (پەتىردىڭ 2-حاتى 3:9).
قۇدايعا ۇنامدى تۇردە عيبادات ەتۋ
5. قۇدايعا ۇنامدى تۇردە عيبادات ەتەتىندەردى قالاي اجىراتۋعا بولادى؟
5 يسا قۇدايعا ۇنامدى جولمەن قۇلشىلىق ەتەتىندەردى باسقالاردان قالاي اجىراتۋعا بولاتىنىن ايتقان. مۇنى ولاردىڭ سەنەتىن ىلىمدەرى مەن ٸس-ارەكەتتەرىنەن بايقاۋعا بولادى. يسا: «ولاردى جەمىستەرىنەن تانيسىڭدار»،— دەدى. ول شىنايى ٴدىندى جاقسى اعاشقا تەڭەپ: «ٵربىر جاقسى اعاش جاقسى جەمىس بەرەدى»،— دەدى (ماتاي 7:16، 17). ٴبىراق بۇل قۇدايدىڭ قىزمەتشىلەرى ٴمىنسىز بولادى دەگەندى بىلدىرمەيدى. دەگەنمەن ولار دۇرىس ارەكەت ەتۋگە ٵرقاشان كۇش سالادى. ال ەندى قۇدايدىڭ شىنايى قىزمەتشىلەرىن ەرەكشەلەندىرەتىن بىرنەشە جايتقا توقتالىپ وتەيىك.
6، 7. شىنايى عيبادات نەگە كيەلى كىتاپقا نەگىزدەلۋى كەرەك؟ يسا بىزگە قانداي ۇلگى قالدىردى؟
6 ٴبىزدىڭ ىلىمدەرىمىز كيەلى كىتاپقا نەگىزدەلگەن. كيەلى كىتاپتا بىلاي دەپ جازىلعان: «كيەلى جازبالاردىڭ ٴبارى قۇداي رۋحىنىڭ جەتەلەۋىمەن جازىلعان، ٵرى ٴتالىم بەرۋگە، اشكەرەلەۋگە، تۇزەتۋگە، ٵدىل تالاپتارعا ساي تاربيەلەۋگە ٴتيىمدى. وسىلاي قۇداي ادامى بارىنشا جارامدى، ياعني كەز كەلگەن يگى ىسكە تولىقتاي دايار بولادى» (تىموتەگە 2-حات 3:16، 17). ەلشى پاۋىل: «بىزدەن ەستىگەن قۇداي ٴسوزىن ادامنىڭ ەمەس، قۇداي ٴسوزى رەتىندە — شىنىمەن دە بۇل سولاي — قابىلداعاندارىڭ ٷشىن ۇنەمى قۇدايعا العىس ايتامىز»،— دەپ جازعان (سالونيكالىقتارعا 1-حات 2:13). شىنايى عيبادات قۇدايدىڭ ٴسوزى كيەلى كىتاپقا عانا نەگىزدەلۋى كەرەك. ول ادامداردىڭ ويىنا، سالت-جورالارعا نە تاعى باسقا نارسەلەرگە نەگىزدەلمەيدى.
7 يسانىڭ ۇيرەتكەندەرىنىڭ ٴبارى قۇدايدىڭ سوزىنەن الىنعان (جوحان 17:17 وقىڭىز). ول ۇنەمى جازبالاردان ۇزىندىلەر كەلتىرگەن (ماتاي 4:4، 7، 10). قۇدايدىڭ شىنايى قىزمەتشىلەرى دە يسانى ۇلگى ەتىپ، كيەلى كىتاپتا جازىلعاندارعا ساي ٴتالىم بەرەدى.
8. يسا قۇدايعا عيبادات ەتۋ تۋرالى نە دەگەن؟
8 ٴبىز تەك ەحوباعا عيبادات ەتەمىز. ٴزابۇر 83:18 دە: «ادامدار سەنىڭ ەسىمىڭ ەحوبا ەكەنىن، بۇكىل جەر بەتىن بيلەيتىن جالعىز قۇداي تاعالا ەكەنىڭدى ٴبىلسىن»،— دەلىنگەن. يسا ادامداردىڭ شىنايى قۇدايدى بىلگەنىن قالاپ، ولارعا ونىڭ ەسىمىن ايتقان (جوحان 17:6 وقىڭىز). ول: «ەحوبا قۇدايىڭا عيبادات ەتىپ، تەك سوعان عانا قىزمەت ەت!»— دەگەن (ماتاي 4:10). قۇدايدىڭ قىزمەتشىلەرى رەتىندە ٴبىز دە يسا سياقتى، تەك ەحوباعا عيبادات ەتەمىز. ٴبىز قۇدايدى ەسىمىمەن اتايمىز، سونداي-اق باسقالارعا ونىڭ ەسىمى جايلى جانە بولاشاقتا ادامزات ٷشىن نە ىستەيتىنى جايلى ايتامىز.
9، 10. ٴبىر-ٴبىرىمىزدى جاقسى كورەتىنىمىز نەدەن كورىنەدى؟
9 ٴبىز ٴبىر-ٴبىرىمىزدى شىن جاقسى كورەمىز. يسا شاكىرتتەرىن ٴبىر-ٴبىرىن جاقسى كورۋگە شاقىرعان (جوحان 13:35 وقىڭىز). ٴبىز قاي جەردەن، قانداي مادەنيەتتەن شىقپايىق، باي نە كەدەي بولمايىق، ٴبىر-ٴبىرىمىزدى شىن جاقسى كورەمىز (قولوستىقتارعا 3:14). سوندىقتان ٴبىز سوعىسپايمىز، ەشكىمدى ولتىرمەيمىز. كيەلى كىتاپتا: «قۇدايدىڭ بالالارى مەن ٸبىلىستىڭ بالالارىن مىنادان بىلۋگە بولادى: ٵدىل ارەكەت ەتپەيتىن كىسى دە، باۋىرلاسىن سۇيمەيتىن كىسى دە قۇدايدان ەمەس»،— دەپ جازىلعان. ول جەردە: «ٴبىز ٴبىر-ٴبىرىمىزدى سۇيۋگە ٴتيىسپىز. ٸنىسىن جاۋىزدىقپەن ولتىرگەن زۇلىمنىڭ ادامى قابىل سياقتى بولماۋىمىز كەرەك»،— دەگەن سوزدەر دە بار (جوحاننىڭ 1-حاتى 3:10—12؛ 4:20، 21).
10 ٴبىز ٴبىر-بىرىمىزگە كومەكتەسىپ، قولداۋ ٷشىن ۋاقىتىمىزدى، كۇش پەن قولدا بارىمىزدى ەش ايامايمىز (ەۆرەيلەرگە 10:24، 25). ٴبىز «بارىنە جاقسىلىق جاساي بەرۋگە» دايىنبىز (عالاتتىقتارعا 6:10).
11. ٴبىز نەگە يسا ماسىحكە مويىنسۇنامىز؟
11 ٴبىز يسا ٴماسىح ارقىلى عانا قۇتقارىلا الامىز دەپ سەنگەندىكتەن، وعان مويىنسۇنامىز. كيەلى كىتاپتا يسا تۋرالى: «ودان باسقا ٴبىزدى ەشكىم قۇتقارا المايدى، ويتكەنى ٴبىزدى قۇتقاراتىن ەسىم جەردەگىلەردىڭ ەشقايسىسىنا بەرىلگەن جوق»،— دەپ جازىلعان (ەلشىلەردىڭ ىستەرى 4:12). وسى باسىلىمنىڭ 5-تاراۋىنان ەحوبا يسانى مويىنسۇنعىش ادامدار ٷشىن جانىن قۇربان ەتۋگە جىبەرگەنىن بىلدىك (ماتاي 20:28). سونىمەن قاتار ەحوبا ونى بولاشاقتا جەر بەتىنە بيلىك ەتۋ ٷشىن پاتشا ەتىپ تاڭدادى. سوندىقتان ماڭگى ٶمىر سۇرگىمىز كەلسە، يساعا مويىنسۇنۋىمىز كەرەك (جوحان 3:36 وقىڭىز).
12. ٴبىز نەگە ساياساتقا ارالاسپايمىز؟
12 ٴبىز ساياساتقا ارالاسپايمىز. يسا ساياساتقا ارالاسپاعان. ول ريم ٵمىرشىسى پيلاتتىڭ الدىندا تۇرعاندا: «مەنىڭ پاتشالىعىم وسى دۇنيەلىك ەمەس»،— دەپ ايتقان (جوحان 18:36 وقىڭىز). يسا سياقتى ٴبىز دە قۇدايدىڭ كوكتەگى پاتشالىعىنا ادالمىز. سوندىقتان قاي مەملەكەتتە تۇرمايىق، ساياساتقا ارالاسپايمىز. الايدا كيەلى كىتاپتا «ٵربىر ادام بيلىك باسىنداعىلارعا باعىنسىن» دەگەن تالاپ بار (ريمدىكتەرگە 13:1). وسىعان ساي، ٴبىز تۇرىپ جاتقان ەلىمىزدىڭ زاڭدارىنا باعىنامىز. ٴبىراق مەملەكەت زاڭى قۇدايدىڭ زاڭىنا قايشى كەلىپ جاتسا، يسانىڭ ەلشىلەرى سياقتى، «بيلەۋشى رەتىندە ٴبىرىنشى كەزەكتە ادامعا ەمەس، قۇدايعا مويىنسۇنامىز» (ەلشىلەردىڭ ىستەرى 5:29؛ مارقا 12:17).
13. ٴبىز ادامدارعا قۇداي پاتشالىعى تۋرالى نە ايتامىز؟
13 ٴبىز ادامزاتتىڭ قيىندىقتارىن تەك قۇداي پاتشالىعى شەشە الادى دەپ سەنەمىز. يسا پاتشالىق جايلى ىزگى حاباردىڭ بۇكىل جەردە ۋاعىزدالاتىنىن ايتقان (ماتاي 24:14 وقىڭىز). قۇداي پاتشالىعى ەشقانداي ۇكىمەتتىڭ قولىنان كەلمەيتىن نارسەلەردى ىسكە اسىرادى (ٴزابۇر 146:3). يسا وسى پاتشالىق تۋرالى: «سەنىڭ پاتشالىعىڭ كەلسىن! سەنىڭ ەركىڭ كوكتەگىدەي جەر بەتىندە دە ورىندالسىن!»— دەپ دۇعا ەتۋدى تاپسىرعان (ماتاي 6:10). كيەلى كىتاپتا ايتىلعانداي، قۇداي پاتشالىعى ادامداردىڭ بارلىق ۇكىمەتىن قيراتىپ، «ٶزى ماڭگى تۇرادى» (دانيال 2:44).
14. كىمدەر قۇدايعا ۇنامدى تۇردە عيبادات ەتەدى دەپ ويلايسىز؟
14 وسى تاراۋدان بىلگەنىمىزدەي، قۇدايدىڭ شىنايى قىزمەتشىلەرى كيەلى كىتاپقا نەگىزدەپ ٴتالىم بەرەدى. ولار باسقالارعا قۇدايدىڭ ەسىمى جايلى ايتادى، ٴبىر-ٴبىرىن شىن جاقسى كورەدى. سونىمەن قاتار قۇدايدىڭ يسانى ادامزاتتى قۇتقارۋ ٷشىن جىبەرگەنىنە سەنەدى. ولار ساياساتقا ارالاسپايدى جانە قۇداي پاتشالىعى عانا ادامزاتتىڭ قيىندىقتارىن شەشە الادى دەپ ۋاعىزدايدى. كىمدەر وسىلاي ىستەپ ٴجۇر دەۋگە بولادى؟ ارينە، تەك ەحوبا كۋاگەرلەرى (يشايا 43:10—12).
ٴسىز نە ىستەيسىز؟
15. عيباداتىمىز قۇدايعا ۇنامدى بولسىن دەسەك، نە ىستەگەنىمىز ٴجون؟
15 عيباداتىمىز قۇدايعا ۇنامدى بولۋ ٷشىن، ونىڭ بار ەكەنىنە سەنۋ جەتكىلىكسىز. ويتكەنى بۇعان جىندار دا سەنەدى، ٴبىراق قۇدايعا مويىنسۇنبايدى (جاقىپ 2:19). سوندىقتان ٴبىز قۇدايدىڭ بار ەكەنىنە سەنىپ قانا قويماي، ونىڭ ايتقاندارىن ورىنداۋىمىز كەرەك.
16. جالعان دىننەن نەگە باس تارتۋىمىز كەرەك؟
16 قۇداي عيباداتىمىزدى قابىلداۋى ٷشىن، جالعان دىننەن شىعۋىمىز كەرەك. يشايا پايعامبار: «ونىڭ اراسىنان شىعىڭدار، وزدەرىڭدى تازا ساقتاڭدار!»— دەپ جازعان (يشايا 52:11؛ قورىنتتىقتارعا 2-حات 6:17). سوندىقتان ٴبىز جالعان دىنمەن بايلانىسى بار كەز كەلگەن نارسەدەن باس تارتۋىمىز كەرەك.
17، 18. «ۇلى بابىل» دەگەن نە؟ نەگە ودان تەز ارادا شىعۋ كەرەك؟
17 جالعان ٴدىن دەگەن نە؟ قۇداي سوزىنە قايشى نارسەگە ۇيرەتەتىن كەز كەلگەن ٴدىن جالعان بولىپ تابىلادى. جالعان دىندەردىڭ بارلىعى كيەلى كىتاپتا «ۇلى بابىل» دەپ اتالادى (ايان 17:5). سەبەبى توپان سۋدان كەيىن بابىل قالاسىندا كوپتەگەن جالعان ىلىمدەر پايدا بولدى. كەيىن وسى ىلىمدەر بۇكىل جەر بەتىنە تاراپ كەتتى. مىسالى، بابىلدىقتار ٷش قۇدايدان تۇراتىن قۇدايلارعا تابىنعان. بۇگىندە دە كوپ دىندەر قۇداي ٷش تۇلعادان تۇرادى دەپ ۇيرەتەدى. ٴبىراق كيەلى كىتاپ ٴبىر عانا قۇداي بار ەكەنىن جانە يسا قۇداي ەمەس، قۇدايدىڭ ۇلى ەكەنىن انىق كورسەتەدى (جوحان 17:3). بابىلدىقتار ادام ولگەن سوڭ، ونىڭ جانى ٶمىر سۇرە بەرەدى نەمەسە توزاقتا ازاپ شەگەدى دەپ تە سەنگەن. ٴبىراق مۇنىڭ ٴبارى وتىرىك (14، 17، 18-تۇسىندىرمەلەردى قاراڭىز).
18 قۇداي جالعان دىندەردىڭ ٴبارى جاقىندا جويىلاتىنىن ايتقان (ايان 18:8). سوندىقتان ودان تەز ارادا شىعۋ كەرەك. ەحوبا ٵلى كەش بولماي تۇرعاندا ٴسىزدىڭ جالعان دىننەن شىققانىڭىزدى قالايدى (ايان 18:4).
ەحوباعا قىزمەت ەتسەڭىز، ونىڭ دۇنيەجۇزىلىك وتباسىنا قوسىلاسىز
19. ەحوبا وزىنە قىزمەت ەتۋدى شەشكەن ادامدى قالاي قامقورلايدى؟
19 جالعان دىننەن شىعىپ، ەحوباعا عيبادات ەتۋدى شەشسەڭىز، دوستارىڭىز بەن تۋىستارىڭىز مۇنى تۇسىنبەي، بۇل شەشىمىڭىزگە ٴتىپتى قارسى بولۋى مۇمكىن. ٴبىراق ەحوبا ٴسىزدى كومەكسىز قالدىرمايدى. ٴسىز ميلليونداعان ادامنان تۇراتىن دۇنيەجۇزىلىك وتباسىنىڭ ٴبىر مۇشەسى بولاسىز. سونداي-اق قۇداي ورناتاتىن جاڭا دۇنيەدە ماڭگى ٶمىر ٴسۇرۋ ۇمىتىنە يە بولاسىز (مارقا 10:28—30). ەحوباعا قىزمەت ەتۋىڭىزگە قارسى بولعان كەيبىر دوستارىڭىز بەن تۋىستارىڭىز بولسا ۋاقىت وتە كيەلى كىتاپتى زەرتتەي باستاۋى مۇمكىن.
20. ەحوباعا ۇنايتىنداي عيبادات ەتۋ نەلىكتەن ماڭىزدى؟
20 جاقىندا قۇداي دۇنيەدەگى زۇلىمدىقتىڭ بارلىعىن جويادى. ٴسۇيتىپ، جەر بەتىنە قۇداي پاتشالىعى بيلىك ەتەدى (پەتىردىڭ 2-حاتى 3:9، 13). بۇل ٴبىر تاماشا كەز بولايىن دەپ تۇر! سول كەزدە ٵربىر ادام ەحوباعا ۇنامدى تۇردە عيبادات ەتەتىن بولادى. ولاي بولسا، قازىردەن باستاپ ەحوباعا ۇنايتىنداي عيبادات ەتىڭىز.
قىزىقتى بولار مالىمەتتەر
ٴجيى قويىلاتىن سۇراقتار
ەحوبا كۋاگەرلەرى ادامداردى ٶز دىندەرىنە كۇشتەپ كىرگىزە مە؟
ەحوبا كۋاگەرلەرىنىڭ ۋاعىز ٸسىن جۇرگىزۋى جۇرتتى ٶز دىندەرىنە تارتۋعا جاتا ما؟ ولار باسقالاردى ٶز دىندەرىنە كۇشتەپ كىرگىزۋگە تىرىسا ما؟
