60-تاراۋ
يسانىڭ ۇلىلىعىنىڭ كورىنىسى
ماتاي 16:28—17:13 مارقا 9:1—13 لۇقا 9:27—36
-
يسانىڭ سىرت كورىنىسى وزگەرىسكە ٴتۇستى
-
ەلشىلەر قۇدايدىڭ داۋسىن ەستىدى
حەرمون تاۋىنان 25 شاقىرىمداي جەردەگى ٴفىلىپ كەسارياسىندا يسا حالىققا ٴتالىم بەرىپ وتىر. ول ەلشىلەرىنە: «سەندەرگە شىندىعىن ايتامىن، وسىندا تۇرعانداردىڭ كەيبىرەۋى ادام ۇلىنىڭ ٶز پاتشالىعىندا كەلە جاتقانىن كورمەيىنشە، ولمەيدى»،— دەگەن كەرەمەت جاڭالىق ايتتى (ماتاي 16:28).
شاكىرتتەر يسانىڭ مۇنىمەن نە ايتقىسى كەلگەنىن بىلگىسى كەلگەن بولار. شامامەن ٴبىر اپتادان كەيىن يسا ٷش ەلشىسىن — پەتىر، جاقىپ پەن جوحاندى — ەرتىپ، ٴبىر بيىك تاۋعا كوتەرىلدى. تۇنگى ۋاقىت بولسا كەرەك، ۇشەۋىن ۇيقى قىستى. ٴبىر كەزدە دۇعا ەتىپ جاتقان يسانىڭ سىرت كورىنىسى وزگەرىسكە ٴتۇستى. ەلشىلەردىڭ الدىندا ونىڭ بەت الپەتى كۇندەي جارقىراپ، كيىمى اپپاق بولىپ ساۋلە شاشتى.
كەنەت مۇسا مەن ٸلياس بولىپ كورىنگەن ەكى ادام پايدا بولدى. ولار يسامەن «ونىڭ يەرۋساليم قالاسىندا وسى دۇنيەدەن كەتۋى ٴتيىس» ەكەنى جونىندە سويلەستى (لۇقا 9:30، 31). يسانىڭ كەتۋى ونىڭ ٶلىپ، كەيىن قايتا ٴتىرىلۋىن بىلدىرسە كەرەك. بۇل جايلى ول جاقىندا عانا ايتقان بولاتىن (ماتاي 16:21). ۇشەۋىنىڭ اڭگىمەسىنەن يسانىڭ ازاپتالىپ مىندەتتى تۇردە ولەتىنى كورىنەدى. بۇل پەتىردىڭ وسىنىڭ الدىندا ايتقان وتىنىشىنە كەرەعار جايت ەدى.
ۇيقىلارى اشىلىپ كەتكەن ٷش ەلشى كورىپ-ەستىگەندەرىنە اڭ-تاڭ. كورىنىس شىن مانىندە بولىپ جاتقانداي اسەر قالدىرعانى سونشا — پەتىر اڭگىمەگە كىرىسىپ كەتتى. ول: «ۇستاز، وسىندا بولعانىمىز قانداي جاقسى! ٴبىز بىرەۋىن سىزگە، بىرەۋىن مۇساعا، تاعى بىرەۋىن ٸلياسقا ارناپ ٷش كۇركە جاسايىق»،— دەدى (مارقا 9:5). پەتىر بۇل سۇراقتى كورىنىستىڭ ۋاقىتىن سوزعىسى كەلگەندىكتەن قويعان بولۋى مۇمكىن.
پەتىر ٴسوزىن اياقتاماي جاتىپ، ٴبىر نۇرلى بۇلت ولاردى وراپ الدى. بۇلتتىڭ اراسىنان: «بۇل — مەنىڭ سۇيىكتى ۇلىم. مەن وعان ريزامىن! ونى تىڭداڭدار!»— دەگەن داۋىس شىقتى. مۇنى ەستىگەن ەلشىلەردىڭ زارە-قۇتى قالماي، ەكپەتتەرىنەن جەرگە جىعىلا كەتتى. سوندا يسا قاستارىنا كەلىپ: «تۇرىڭدار، قورىقپاڭدار»،— دەدى (ماتاي 17:5—7). باستارىن كوتەرگەندە، ولار يسادان باسقا ەشكىمدى كورمەدى. كورىنىس عايىپ بولعان. سول كۇنى تاۋدان ٴتۇسىپ كەلە جاتقاندا، يسا ولارعا: «ادام ۇلى ولىمنەن قايتا تىرىلگەنشە، بۇل كورىنىس تۋرالى ەشكىمگە ٴتىس جارماڭدار»،— دەپ تاپسىردى (ماتاي 17:9).
كورىنىستە ٸلياستىڭ پايدا بولعانى ەلشىلەردە سۇراق تۋدىردى. ولار: «نەگە ٴدىن مۇعالىمدەرى الدىمەن ٸلياس كەلۋ كەرەك دەيدى؟»— دەپ سۇرادى. سوندا يسا: «ٸلياس كەلدى دە، ٴبىراق ولار ونى تانىمادى»،— دەپ جاۋاپ بەردى (ماتاي 17:10—12). يسا بۇل جەردە ٸلياس دەپ ٴدال سونداي قىزمەت اتقارعان شومىلدىرۋ ٴراسىمىن جاساۋشى جاقيانى ايتتى. ٸلياس ەلىشەگە جول دايىنداعانداي، جاقيا ماسىحكە جول دايىنداعان ەدى.
يسا مەن ەلشىلەردى وسى كورىنىس نىعايتقانى ٴسوزسىز. بۇل ٴماسىحتىڭ پاتشالىقتاعى سالتاناتىنىڭ كورىنىسى ەدى. وسىلايشا، يسانىڭ ٶزى ۋادە ەتكەندەي، شاكىرتتەر «ادام ۇلىنىڭ ٶز پاتشالىعىندا كەلە جاتقانىنىڭ» كۋاسى بولدى (ماتاي 16:28). باسقاشا ايتقاندا، ولار «ونىڭ ۇلىلىعىن ٶز كوزىمەن كوردى». پارىزشىلدار قۇدايدىڭ تاڭداعان پاتشاسى ەكەنىن دالەلدەۋىن تالاپ ەتكەندە، يسا ولارعا ەشقانداي بەلگى كورسەتپەگەن. ال جاقىن شاكىرتتەرىنىڭ الدىندا سىرت كورىنىسىن وزگەرتۋ ارقىلى ولارعا پاتشالىققا قاتىستى پايعامبارلىقتاردىڭ ورىندالاتىنىن دالەلدەدى. سوندىقتان پەتىر كەيىننەن: «پايعامبارلىق سوزگە دەگەن سەنىمىمىز بۇرىنعىدان دا ارتا ٴتۇستى»،— دەپ جازعان (پەتىردىڭ 2-حاتى 1:16—19).