48-تاراۋ
كەرەمەتتەر جاساعان يسانى ٴتىپتى نازارەتتە مويىندامادى
ماتاي 9:27—34؛ 13:54—58 مارقا 6:1—6
-
يسا زاعيپ جانە مىلقاۋ كىسىلەردى ساۋىقتىردى
-
نازارەتتىكتەر ونى مويىندامادى
يسانىڭ كۇنى تىنىمسىز قىزمەت ەتۋمەن وتۋدە. دەكاپوليس ولكەسىنەن كەلگەندە، ول قان كەتىپ اۋىرعان ايەلدى ساۋىقتىردى جانە جايىردىڭ قىزىن ٴتىرىلتتى. ٵلى كەش باتقان جوق. ول جايىردىڭ ۇيىنەن كەتىپ بارا جاتقاندا، سوڭىنان ەكى زاعيپ كىسى ىلەستى. ولار: «ٴداۋىتتىڭ ۇلى، بىزگە راقىم ەتە كورىڭىز!»— دەپ ايعايلادى (ماتاي 9:27).
زاعيپ كىسىلەر يسانى «ٴداۋىتتىڭ ۇلى» دەۋىمەن ونىڭ ٴداۋىت تاعىنىڭ مۇراگەرى ٵرى ٴماسىح ەكەنىنە سەنەتىندەرىن كورسەتتى. يسا ولاردىڭ تاباندىلىعىن سىناعىسى كەلسە كەرەك، ەستىمەگەن سىڭاي تانىتتى. ٴبىراق ولار تاباندى بولدى. يسا ۇيگە كىرگەندە، ولار دا ىشكە كىردى. يسا: «كوزدەرىڭدى اشا الاتىنىما سەنەسىڭدەر مە؟»— دەپ سۇرادى. ولار: «ٴيا، يەم»،— دەپ سەنىمدى جاۋاپ قاتتى. سوندا يسا ولاردىڭ كوزدەرىنە قولىن تيگىزىپ: «سەنىمدەرىڭە ساي بولسىن!»— دەدى (ماتاي 9:28، 29).
سول زامات ەكەۋىنىڭ دە كوزدەرى كورەتىن بولدى. يسا ولارعا دا بۇل جايلى ەشكىمگە ٴتىس جارماۋدى بۇيىردى. ٴبىراق قۋانعانىنان ولار بولعان وقيعانى كوپ ۇزاماي-اق بارىنە ايتا باستادى.
كوزدەرى اشىلعان بۇل كىسىلەر يسانىڭ قاسىنان كەتكەن سوڭ، ادامدار بويىن جىن بيلەگەن مىلقاۋ كىسىنى ەرتىپ اكەلدى. يسا ونىڭ بويىنان جىندى قۋعاندا، ول سويلەي باستادى. بۇعان قايران قالعان جۇرت: «يسرايلدە مۇنداي نارسە ەشقاشان بولعان ەمەس!»— دەستى. سول جەردە پارىزشىلدار دا تۇر ەدى. كەرەمەت ٴجايتتاردىڭ ورىن العانىن جوققا شىعارا الماعان سوڭ، ولار: «ول جىنداردى جىنداردىڭ ٵمىرشىسىنىڭ كۇشىمەن قۋىپ شىعارادى»،— دەپ يساعا بۇرىنعى ايىپتى تاعى تاقتى (ماتاي 9:33، 34).
وسى وقيعادان كەيىن كوپ ۇزاماي يسا شاكىرتتەرىمەن بىرگە نازارەتتەگى ۇيىنە ورالدى. شامامەن ٴبىر جىل بۇرىن ول قالاداعى ٴماجىلىسحانادا ٴتالىم بەرگەن. العاشىندا تاڭعالىپ تىڭداعان جۇرت، كەيىننەن ايتقاندارىنا اشۋلانىپ، ونى ولتىرمەك بولعان. قازىر يسا جەرلەستەرىنە تاعى دا كومەكتەسىپ كورمەك.
دەمالىس كۇنى يسا ٴماجىلىسحاناعا كەلىپ، ٴتالىم بەرە باستادى. ونى تىڭداعان كوپ ادام تاڭدانىپ: «وعان بۇنداي دانالىق پەن قۇدىرەتتى ىستەر جاسايتىن قابىلەت قايدان بىتكەن؟»— دەپ سۇرادى. سوسىن ٴبىر-بىرىنە: «ول اعاش ۇستاسىنىڭ ۇلى ەمەس پە؟ اناسىنىڭ اتى ٴماريام، ال باۋىرلارى جاقىپ، ٴجۇسىپ، شيمون مەن ياھۋدا عوي؟ قارىنداستارى دا ارامىزدا تۇرادى ەمەس پە؟ وندا مۇنىڭ ٴبارى وعان قايدان بىتكەن؟»— دەستى (ماتاي 13:54—56).
جەرلەستەرى يسانى قاراپايىم ادام دەپ ەسەپتەگەن شىعار. «كوز الدارىندا وسكەن بالا قالايشا ٴماسىح بولا قالدى»،— دەپ ويلاعان دا بولار. سوندىقتان يسانىڭ زور دانالىعى مەن قۇدىرەتتى ىستەرىن كورسە دە، ونى مويىندامادى. يسانى جاقسى بىلگەندىگى ٴتىپتى تۋىستارىنا دا كەدەرگى جاسادى. سوندىقتان يسا: «پايعامباردى وزگە جەردە قادىرلەسە دە، ٶز ەل-جۇرتى مەن ٷي ٸشى قادىرلەمەس»،— دەدى (ماتاي 13:57).
مۇنداعى ادامداردىڭ سەنىمنەن جۇرداي بولعانىنا يسا قايران قالدى. سوندىقتان وسكەن جەرىندە «بىرنەشە ناۋقاسقا عانا قولىن قويىپ ەمدەگەننەن» باسقا ەشقانداي قۇدىرەتتى ىستەر جاسامادى (مارقا 6:5، 6).
