41-تاراۋ
كەرەمەتتەر كىمنىڭ قۇدىرەتىمەن جاسالدى؟
ماتاي 12:22—32 مارقا 3:19—30 لۇقا 8:1—3
-
يسانىڭ ەكىنشى ۋاعىز ساپارى
-
جىنداردى قۋىپ شىعاردى جانە كەشىرىلمەيتىن كۇنا جايلى ەسكەرتتى
شيمون ەسىمدى پارىزشىلدىڭ ۇيىندە كەشىرىمدى بولۋدى ۇيرەتكەننەن كەيىن، يسا تاعى دا ۋاعىزداۋ ساپارىمەن عاليلەياعا جول تارتتى. بۇل ونىڭ قىزمەتىنىڭ ەكىنشى جىلى. يسا جالعىز ەمەس، وعان ون ەكى شاكىرتى مەن «جىندارىنان ارىلعان ٵرى اۋرۋلارىنان ايىققان» ٴبىراز ايەل ەرىپ ٴجۇردى (لۇقا 8:2). ولاردىڭ اراسىندا ماعدالالىق ٴماريام، سۋزاننا جانە يرود انتيپاستىڭ ٷي باسقارۋشىسى حۋزانىڭ ايەلى جوحاننا دا بار.
يسا جايلى ەستىگەن ادامدار كوبەيگەن سايىن، ونىڭ ىستەرى تۋرالى كوزقاراستار ٵرتۇرلى بولىپ، داۋ-داماي كۇشەيە ٴتۇستى. يسا جىن بيلەگەن سوقىر ٵرى مىلقاۋ ادامدى ايىقتىرعاندا، بۇل جاعداي ايقىن كورىندى. الگى كىسى جىننان ارىلعاندا، قايتادان كورەتىن، سويلەي الاتىن بولدى. بۇعان جۇرت قايران قالىسىپ: «ٴداۋىت ۇلى وسى شىعار؟»— دەستى (ماتاي 12:23).
يسا توقتاعان ۇيدىڭ ماڭايىنا جينالعان جۇرتتىڭ كوپتىگى سونشا — ونىڭ شاكىرتتەرىمەن اس ىشۋگە مۇرشاسى بولمادى. جۇرتتىڭ ٴبارى بىردەي يسانى «ٴداۋىت ۇلى» دەپ ەسەپتەمەدى. سوناۋ يەرۋساليمنەن كەلگەن ٴدىن مۇعالىمدەرى مەن پارىزشىلدار يسادان ٴتالىم الۋدى دا، ونى قولداۋدى دا قالامادى. قايتا، ولار جۇرتقا «ونىڭ بويىن بەلزەبۇل بيلەپ العان»، «جىنداردىڭ امىرشىسىمەن» بايلانىسى بار دەپ ايتىپ ٴجۇردى (مارقا 3:22). حالىقتى دۇرلىكتىرگەن بۇل سوزدەردى ەستىگەن تۋىستارى يسانى اكەتپەك بولدى. ولار نەگە بۇلاي ىستەگىسى كەلدى؟
يسانىڭ تۋعان ىنىلەرى ونىڭ قۇداي ۇلى ەكەنىنە ٵلى دە سەنبەيتىن (جوحان 7:5). حالىق اراسىندا وسىنشاما شۋ شىعۋىنا يسانىڭ سەبەپشى بولىپ وتىرعانىنا ولار اڭ-تاڭ. ويتكەنى نازارەتتە بىرگە وسكەن يسانىڭ بولمىسىنا مۇنداي نارسە جات ەدى. سوندىقتان ولار يسانى «اقىلىنان اداسىپتى» دەپ ويلادى (مارقا 3:21).
الايدا ونىڭ ىستەرى نەنى دالەلدەيدى؟ يسا جاڭا عانا ادامنىڭ بويىنان جىندى قۋىپ شىقتى. سودان ول كورەتىن جانە سويلەي الاتىن بولدى. بۇل جايتتى ەشكىم جوققا شىعارا المايدى. سوندىقتان ٴدىن مۇعالىمدەرى مەن پارىزشىلدار يسانىڭ بەدەلىن تۇسىرمەك بولىپ: «ول جىنداردى جىنداردىڭ ٵمىرشىسى بەلزەبۇلدىڭ كۇشىمەن قۋىپ شىعارادى»،— دەپ جالعان ايىپ تاقتى (ماتاي 12:24).
يسا ٴدىن مۇعالىمدەرى مەن پارىزشىلداردىڭ ارام پيعىلىن ٴبىلىپ، بىلاي دەدى: «جىككە بولىنگەن ٵربىر پاتشالىق كۇيرەيدى، جىككە بولىنگەن ٵربىر قالا نە وتباسى دا ويران بولادى. تاپ سولاي، ەگەر شايتان شايتاندى قۋىپ شىعارسا، وندا ٶزارا جىككە بولىنگەنى. ولاي بولسا، ونىڭ پاتشالىعى قالايشا جويىلماي، بەرىك تۇرا الادى؟» (ماتاي 12:25، 26).
بۇل قيسىنمەن كىم داۋلاسا الادى؟! پارىزشىلدار كەيبىر ياھۋديلەردىڭ دە جىنداردى قۋىپ شىعاراتىنىن بىلەتىن (ەلشىلەردىڭ ىستەرى 19:13). سوندىقتان يسا ولاردان: «ەگەر مەن جىنداردى بەلزەبۇلدىڭ كۇشىمەن قۋىپ شىعاراتىن بولسام، وندا سەندەردىڭ شاكىرتتەرىڭ ولاردى كىمنىڭ كۇشىمەن شىعارادى؟»— دەپ سۇرادى. وسىلاي تاعىلعان ايىپتىڭ وزدەرىنە دە قاتىستى ەكەنىن كورسەتتى. سوسىن يسا: «ال مەن جىنداردى قۇدايدىڭ رۋحىمەن قۋىپ شىعاراتىن بولسام، وندا قۇداي پاتشالىعىنىڭ سەندەرگە كەلىپ قالعانى»،— دەدى (ماتاي 12:27، 28).
يسانىڭ جىنداردى قۋىپ شىعارعانى شايتاننان ۇستەم ەكەنىن دالەلدەيدى. سول ٷشىن يسا مىناداي مىسال كەلتىردى: «كۇشتىنىڭ ۇيىنە كىرىپ مۇلكىن توناعىسى كەلگەن ادام ونىڭ ٶزىن بايلاپ تاستامايىنشا، قالاي توناماق؟ بايلاپ تاستاعاننان كەيىن عانا، ونىڭ ٷيىن تونايدى عوي. كىم مەنىڭ جاعىمدا بولماسا، سول ماعان قارسى. كىم مەنىمەن بىرگە جيناماسا، سول شاشادى» (ماتاي 12:29، 30). ٴدىن مۇعالىمدەرى مەن پارىزشىلدار يساعا قارسى شىعۋلارىمەن شايتاننىڭ جاقتاستارى ەكەنىن دالەلدەپ وتىر. ولار ەحوبانىڭ ٶزى قولداۋ كورسەتىپ وتىرعان ۇلىنان ادامداردى الشاقتاتۋدا نەمەسە «شاشۋدا».
يسا شايتاننىڭ جاقتاستارىن ەسكەرتىپ: «ادام قانداي كۇنا جاساماسىن، قانداي قورلايتىن ٴسوز ايتپاسىن — بارلىعى كەشىرىلەدى. الايدا كىمدە-كىم كيەلى رۋحقا قارسى قورلايتىن سوزدەر ايتسا، وعان ەشقاشان كەشىرىم بولمايدى، ونىڭ كۇناسى ماڭگى موينىندا قالادى»،— دەدى (مارقا 3:28، 29). قۇداي رۋحىمەن جاسالىپ جاتقان ىستەردى شايتاندىكى دەپ ولار ٶز باستارىنا قانداي پالە تىلەپ وتىر دەسەڭىزشى!
