33-تاراۋ
يشايانىڭ پايعامبارلىعى ورىندالدى
ماتاي 12:15—21 مارقا 3:7—12
-
جۇرت يساعا ەنتەلەپ، ونى ىعىستىردى
-
يشايا پايعامبارلىعىن ورىندادى
پارىزشىلدار مەن يرودتىڭ جاقتاستارى وزىنە قاستاندىق ويلاستىرىپ جاتقانىن بىلگەندە، يسا شاكىرتتەرىمەن عاليلەيا تەڭىزى جاققا كەتىپ قالدى. ونىڭ سوڭىنان قالىڭ جۇرت ىلەستى. عاليلەيادان، تير مەن سيدون قالالارىنان، يوردان وزەنىنىڭ شىعىس جاعىنان، يەرۋساليمنەن جانە سولتۇستىكتەگى يدۋمەيادان دا جۇرت اعىلىپ كەلىپ جاتتى. يسا كەلگەندەردىڭ كوبىن ساۋىقتىردى. سودان اۋىر دەرتكە شالدىققانداردىڭ كوبى يسانىڭ قول تيگىزگەنىن كۇتپەي، وزدەرى «قول تيگىزبەك بولىپ ەنتەلەپ جاتتى» (مارقا 3:9، 10).
جينالعان جۇرتتىڭ كوپتىگى سونشا — يسا شاكىرتتەرىنە ٴبىر كىشكەنە قايىقتى دايىن ۇستاۋدى تاپسىردى. ول ادامداردىڭ اراسىندا قىسىلىپ قالماس ٷشىن، جاعادان ارىرەك ٴجۇزىپ بارماق ەدى. سونداي-اق قايىقتا وتىرىپ جۇرتقا ٴتالىم بەرۋگە جانە ارعى جاعاعا ٶتىپ، كوبىرەك ادامعا كومەكتەسۋگە دە بولاتىن.
شاكىرت ماتاي يسانىڭ قىزمەتىنەن «يشايا پايعامبار ارقىلى ايتىلعان سوزدەردىڭ» ورىندالىپ جاتقانىن بايقادى (ماتاي 12:17). بۇل قانداي پايعامبارلىق؟
«مىنە، مەنىڭ تاڭداپ العان قىزمەتشىم! مەن ونى جاقسى كورەمىن ٵرى وعان ريزامىن! وعان رۋحىمدى قوندىرامىن. ول حالىقتارعا ادىلدىكتىڭ نە ەكەنىن تۇسىندىرەتىن بولادى. ول ايتىسپايدى، ايقايلامايدى، ۇلكەن كوشەلەردە دە ەشكىم ونىڭ داۋسىن ەستىمەيدى. ادىلدىكتى جەڭىسكە جەتكىزبەيىنشە، مايىسقان قامىستى سىندىرمايدى، قوڭىرسي جانعان بىلتەنى دە سوندىرمەيدى. ونىڭ ەسىمىنە حالىقتار ٷمىت ارتاتىن بولادى» (ماتاي 12:18—21؛ يشايا 42:1—4).
يسا — قۇدايدىڭ سۇيىكتى قىزمەتشىسى. ول ادامدارعا ناعىز ادىلدىكتىڭ نە ەكەنىن اشتى. مۇنى جالعان ٴدىني ادەت-عۇرىپتار كومەسكىلەپ تاستاعان ەدى. پارىزشىلدار قۇداي زاڭىن ٶز تۇسىنىكتەرىنە نەگىزدەپ، بۇرىس قولدانعاندىقتان، دەمالىس كۇنى ٴتىپتى اۋرۋ ادامعا كومەكتەسپەيتىن بولعان! ال يسا قۇدايدىڭ دۇرىس كوزقاراسىن كورسەتۋىمەن جانە ٶزىنىڭ قۇداي رۋحىمەن ارەكەت ەتەتىنىن پاش ەتۋىمەن حالىقتى جالعان ادەت-عۇرىپتاردىڭ اۋىرتپالىعىنان بوساتتى. سول ٷشىن دە ٴدىنباسىلارى ونى ولتىرگىسى كەلدى. قانداي وكىنىشتى!
پايعامبارلىقتاعى «ول ايتىسپايدى، ايقايلامايدى، ۇلكەن كوشەلەردە دە ەشكىم ونىڭ داۋسىن ەستىمەيدى» دەگەن سوزدەر نەنى بىلدىرەدى؟ يسا ساۋىقتىرعان ادامدارىنا — قۋىپ شىعارعان جىن-پەرىلەرگە دە — «ٶزىنىڭ كىم ەكەنىن ايتۋعا» تىيىم سالدى (مارقا 3:12). ويتكەنى ول حالىقتىڭ ٶزى جايلى كوشەلەردە جارنامالاپ ايتىلعان سوزدەردەن جانە بۇرمالانعان حاباردان ەستىپ-بىلگەنىن قالامادى.
سونداي-اق يسا جۇبانىش بەرەتىن حاباردى قامىس سياقتى مايىسىپ، ەڭسەلەرى تۇسكەن ادامدارعا جەتكىزدى. ولار سىعىرايعان بىلتەگە ۇقساپ، ومىردەگى سوڭعى جالىنى وشكەلى تۇرعانداي ەدى. يسا مايىسقان قامىستى سىندىرمادى، قوڭىرسي جانعان بىلتەنى دە سوندىرمەدى. قايتا، جۇمساقتىقپەن ٵرى سۇيىسپەنشىلىكپەن مومىن جانداردىڭ بويىن جازىپ سەرگىتتى. شىنىندا دا، حالىقتار يساعا ٷمىت ارتا الادى!
