34-تاراۋ
يسا ون ەكى ەلشىسىن تاڭدادى
مارقا 3:13—19 لۇقا 6:12—16
-
12 ەلشى
شومىلدىرۋ ٴراسىمىن جاساۋشى جاقيا ادامدارعا يسانى قۇدايدىڭ توقتىسى دەپ تانىستىرعانىنا ٴبىر جارىم جىلداي بولدى. يسا ۋاعىز ٸسىن باستاعاندا، ٵندىر، شيمون پەتىر، جوحان، بالكىم جاقىپ (جوحاننىڭ باۋىرى)، ٴفىلىپ جانە ناتانايىل دەپ تە اتالعان بارتالاماي سياقتى اقپەيىل ادامدار وعان شاكىرت بولىپ ەرگەن. كەيىنىرەك ماسىحكە باسقا دا كوپ ادام ەرىپ ٴجۇردى (جوحان 1:45—47).
ەندى، يسا شاكىرتتەرىنىڭ اراسىنان ەلشىلەر تاڭداماقشى. بۇلار ونىڭ جاقىن دوستارى بولماق ٵرى ەرەكشە دايىندىقتان وتپەك. يسا ولاردى تاڭداماس بۇرىن تاۋعا كوتەرىلدى. بۇل عاليلەيا تەڭىزى مەن قاپارناۋمعا جاقىن ماڭداعى تاۋ بولۋى مۇمكىن. ول سول جەردە ٴتۇنى بويى دۇعا ەتىپ، قۇدايدان دانالىق پەن باتا سۇراسا كەرەك. كەلەسى كۇنى ول شاكىرتتەرىن شاقىرىپ، ارالارىنان ون ەكىسىن ەلشى ەتىپ تاڭدادى.
ەلشىلەردىڭ التاۋى — جوعارىدا ەسىمى اتالعاندار. سونداي-اق سالىق كەڭسەسىندە وتىرعاندا شاقىرىلعان ماتاي. قالعان بەسەۋىنىڭ ەسىمدەرى — تادەي دەپ تە اتالاتىن ياھۋدا (جاقىپتىڭ ۇلى)، كانانەي شيمون، توما، الپەي ۇلى جاقىپ جانە ياھۋدا يسقاريوت (ماتاي 10:2—4؛ لۇقا 6:16).
بۇل ون ەكى شاكىرت يسامەن بىرگە ساپار شەككەن ادامدار. يسا ولاردى جاقسى تانيدى. كەيبىرەۋلەرى ونىڭ تۋىستارى. مىسالى، جاقىپ پەن جوحان يسانىڭ بولەلەرى بولعانعا ۇقسايدى. الپەي يسانىڭ وگەي اكەسى جۇسىپتىڭ باۋىرى دەگەن تۇجىرىم راس بولسا، ونىڭ ۇلى جاقىپ تا يسانىڭ باۋىرى.
يسا ٷشىن ەلشىلەرىنىڭ ەسىمدەرىن ەستە ساقتاۋ، ارينە، قيىن بولماعان. ال سىزگە شى؟ ولاردىڭ ەسىمدەرىن ەستە ساقتاۋدىڭ ٴبىر جولى مىناداي: ەكى شيمون، ەكى جاقىپ، ەكى ياھۋدا. شيمون پەتىردىڭ باۋىرى — ٵندىر، زەبەدەي ۇلى جاقىپتىڭ باۋىرى — جوحان. سەگىز ەلشىنىڭ ەسىمدەرى وسىنداي. قالعان تورتەۋى: سالىق جيناعان ماتاي، كەيىن كۇماندانعان توما، اعاشتىڭ استىندا وتىرعاندا شاقىرىلعان ناتانايىل جانە ونىڭ دوسى ٴفىلىپ.
ون ٴبىر ەلشى يسانىڭ وسكەن ولكەسى عاليلەيادان. ناتانايىل قانادان. ٴفىلىپ، پەتىر، ٵندىر بولسا نەگىزىنەن بەتسايدادان. كەيىنىرەك پەتىر مەن ٵندىر قاپارناۋمعا كوشتى. ماتاي دا سول قالادا تۇرعان بولسا كەرەك. جاقىپ پەن جوحان قاپارناۋمنىڭ وزىندە نە ماڭىندا تۇرىپ، بالىقشىلىقتى كاسىپ ەتكەن. يساعا ساتقىندىق جاساعان ياھۋدا يسقاريوت قانا ياھۋدەيادان بولعانعا ۇقسايدى.
