13-تاراۋ
يسا سىناققا توتەپ بەردى
ماتاي 4:1—11 مارقا 1:12، 13 لۇقا 4:1—13
-
شايتان يسانى سىنادى
يسا جاقيانىڭ قولىنان شومىلدىرۋ راسىمىنەن وتە سالىسىمەن، قۇداي رۋحى ونى ياھۋدەيا شولىنە اپاردى. وعان كوپ نارسە تۋرالى ويلانۋ كەرەك. يسا شومىلدىرۋ راسىمىنەن وتكەندە، «كوك اشىلعان» بولاتىن (ماتاي 3:16). سوندىقتان ول كوكتە ىستەگەندەرى مەن ۇيرەنگەندەرىن ەسكە تۇسىرە الادى. شىنىندا دا، ونىڭ وي ەلەگىنەن وتكىزەتىن جايتتارى كوپ.
يسا ٴشول دالادا 40 كۇن، 40 ٴتۇن بولدى. سول كۇندەرى ول ٴنار تارتپادى. يسا قاتتى اشىققاندا، شايتان ٸبىلىس سىناۋ ٷشىن كەلىپ، وعان: «ەگەر قۇدايدىڭ ۇلى بولساڭ، مىنا تاستار نانعا اينالسىن دەپ بۇيىر»،— دەدى (ماتاي 4:3). كەرەمەت جاساۋ كۇشىن جەكە باسىنىڭ قالاۋى ٷشىن قولدانۋدىڭ دۇرىس ەمەس ەكەنىن بىلگەندىكتەن، يسا بۇل ۇسىنىستان باس تارتتى.
ٸبىلىس سىناۋىن توقتاتقان جوق. ول تاعى دا كەلىپ، يسانى عيباداتحانانىڭ ۇستىنەن تومەن قاراي سەكىرۋگە ازعىرماق بولدى. ٴبىراق يسا مۇنداي اسەرلى ارەكەتكە بارۋدان دا باس تارتتى. ول جازبالاردان ٷزىندى كەلتىرىپ، قۇدايدى بۇلاي سىناۋدىڭ دۇرىس ەمەس ەكەنىن كورسەتتى.
سوسىن شايتان يسانى ٷشىنشى رەت سىنادى. ول يساعا قانداي دا ٴبىر جولمەن الەمنىڭ بارلىق پاتشالىقتارى مەن ولاردىڭ ٴسان-سالتاناتىن كورسەتىپ: «ەگەر الدىما جىعىلىپ، ماعان ٴبىر رەت تابىنساڭ، وسىنىڭ ٴبارىن ساعان بەرەمىن»،— دەدى. ال يسا بىردەن: «كەت قاسىمنان، شايتان!»— دەدى (ماتاي 4:8—10). يسا عيباداتتىڭ تەك ەحوباعا تيەسىلى ەكەنىن بىلگەندىكتەن، بۇرىس نارسە جاساۋعا ازعىرىلمادى. وسىلايشا ول قۇدايعا ادالدىق ساقتادى.
وسى سىناقتاردان جانە يسانىڭ جاۋاپتارىنان بىرنەشە جايتتى بىلدىك. شايتان — كوزگە كورىنبەيتىن، شىنىمەن بار تۇلعا. كەيبىرەۋلەر ويلايتىنداي، ول ادامنىڭ بويىنداعى جاي زۇلىمدىق ەمەس. سونداي-اق وسى وقيعادان كورىنەتىندەي، دۇنيەدەگى ۇكىمەتتەر شايتاننىڭ بيلىگىندە، ياعني ونىڭ ۋىسىندا. بۇلاي بولماعان جاعدايدا، شايتاننىڭ ۇسىنىسى يسا ٷشىن ناعىز سىناق بولماس ەدى.
شايتاننىڭ يساعا قانداي سىي بەرۋگە دايىن بولعانىنا نازار اۋدارايىقشى. ٴبىر رەت تابىنعانى ٷشىن شايتان وعان الەمنىڭ بارلىق پاتشالىقتارىنا دەيىن بەرمەك بولدى. شايتان ٴبىزدى دە وسىلاي ازعىرۋعا تىرىسادى. ول وسى دۇنيەنىڭ بايلىعىنا، بيلىگى مەن دارەجەسىنە يە بولۋ مۇمكىندىكتەرىمەن ٴبىزدى ەلىكتىرۋى مۇمكىن. سوندىقتان يساعا ەلىكتەپ، كەز كەلگەن سىناقتا قۇدايعا ادالدىق ساقتاعانىمىز ابزال! ٸبىلىس يسانىڭ قاسىنان «قولايلى ۋاقىتقا» دەيىن كەتىپ قالدى (لۇقا 4:13). ٴبىزدىڭ جاعدايىمىزدا دا وسىلاي بولۋى مۇمكىن، سوندىقتان ٵرقاشان سەرگەك جۇرەيىك.