137-تاراۋ
قايتا تىرىلگەن يسانى جۇزدەگەن شاكىرتى كوردى
ماتاي 28:16—20 لۇقا 24:50—52 ەلشىلەردىڭ ىستەرى 1:1—12؛ 2:1—4
-
يسا كوپ ادامعا كورىندى
-
ول كوككە كوتەرىلىپ كەتتى
-
يسا 120 شاكىرتىنە كيەلى رۋحتى توكتى
يسا قايتا تىرىلگەن سوڭ، 11 ەلشىسىن عاليلەياداعى تاۋدىڭ باسىنا جينادى. سول جەرگە باسقا شاكىرتتەرى دە كەلدى — شامامان 500 ادام. ولاردىڭ اراسىندا يسانىڭ قايتا تىرىلگەنىنە كۇمانداناتىندار دا بار (ماتاي 28:17؛ قورىنتتىقتارعا 1-حات 15:6). سوندىقتان يسا ٶزىنىڭ شىنىمەن ٴتىرى ەكەنىن دالەلدەيتىن ماڭىزدى نارسە ايتپاق.
يسا قۇدايدىڭ كوكتەگى جانە جەردەگى بار بيلىكتى وزىنە بەرگەنىن ٴتۇسىندىرىپ، بىلاي دەدى: «سوندىقتان بارىڭدار دا، بارلىق حالىقتاردان شاكىرتتەر دايىنداپ، ولاردى اكەنىڭ، ۇلدىڭ جانە كيەلى رۋحتىڭ اتىنان شومىلدىرۋ راسىمىنەن وتكىزىڭدەر، ارى مەن سەندەرگە بۇيىرعانداردىڭ ٴبارىن ۇستانۋدى ۇيرەتىڭدەر»،— دەپ تاپسىردى (ماتاي 28:18—20). ٴيا، يسا ٴتىرى ارى ىزگى حاباردى جاريالاۋ ٸسىنىڭ قامىن ويلاۋدا.
يسا شاكىرت دايىنداۋ ٸسىن بارلىق ٸزباسارىنا — ەرلەر، ايەلدەر مەن بالالارعا — تاپسىردى. ارينە، قارسىلاستار ۋاعىز بەن ٴتالىم بەرۋ ىسىنە كەدەرگى جاساۋعا تىرىسىپ باعادى. الايدا يسا شاكىرتتەرىنە: «ماعان كوك پەن جەردەگى بارلىق بيلىك بەرىلگەن»،— دەدى. مۇنىڭ ولارعا قانداي قاتىسى بار؟ «مەن وسى زامان اياقتالعانشا، ٵر كۇنى سەندەرمەن بىرگەمىن»،— دەدى ول. يسا ىزگى حاباردى ۋاعىزدايتىن ٸزباسارلارىنا تاڭعاجايىپ ىستەر جاسايتىن قابىلەت ەمەس، قولداۋ كورسەتەتىن كيەلى رۋح بەرەدى.
يسا قايتا تىرىلگەن سوڭ، 40 كۇن بويى شاكىرتتەرىنە ٴتۇرلى ادامي دەنەدە كورىنىپ ٴجۇردى. ول «ەلشىلەرىنە كوپتەگەن سەنىمدى دالەلدەر ارقىلى ٶزىنىڭ ٴتىرى ەكەنىن كورسەتتى» جانە «قۇداي پاتشالىعى جايلى» نۇسقاۋلار بەردى (ەلشىلەردىڭ ىستەرى 1:3؛ قورىنتتىقتارعا 1-حات 15:7).
ەلشىلەر ٵلى عاليلەيادا بولسا كەرەك. يسا ولارعا يەرۋساليمگە بارۋدى بۇيىردى. كەيىن ولارمەن قالادا كەزدەسىپ، بىلاي دەدى: «يەرۋساليمنەن ەشقايدا كەتپەي، اكەمنىڭ ۋادەسى ورىندالاتىن ۋاقىتتى كۇتىڭدەر. سەندەرگە بۇل جايلى ايتقانمىن. جاقيا سۋعا شومىلدىرعان ەدى، ال سەندەر بىرەر كۇننەن كەيىن كيەلى رۋحپەن شومىلدىرىلاسىڭدار» (ەلشىلەردىڭ ىستەرى 1:4، 5).
ٴبىراز ۋاقىتتان سوڭ يسا ەلشىلەرىمەن تاعى كەزدەستى. ولاردى ەرتىپ، ٴزايتۇن تاۋىنىڭ شىعىس بەتكەيىندەگى بەتانياعا دەيىن باردى (لۇقا 24:50). ٶزىنىڭ كەتۋى جايلى يسا كوپ نارسە ايتسا دا، كەيبىرەۋى ٵلى دە پاتشالىق جەر بەتىندە ورنايدى دەپ ويلاپ ٴجۇر (لۇقا 22:16، 18، 30؛ جوحان 14:2، 3).
سودان ەلشىلەرى: «يەم، يسرايلگە پاتشالىقتى قازىر قايتا ورناتاسىز با؟»— دەپ سۇرادى. سوندا يسا جاي عانا: «اكەنىڭ قۇزىرىنداعى ۋاقىتتار مەن مەرزىمدەردى سەندەرگە ٴبىلۋدىڭ قاجەتى جوق»،— دەپ جاۋاپ بەردى. سوسىن تاپسىرىلعان ٸستى اتقارۋ كەرەكتىگىنە باسا نازار اۋدارىپ: «وزدەرىڭە كيەلى رۋح قونعاندا كۇش-قۋاتقا يە بولىپ، يەرۋساليمدە، بۇكىل ياھۋدەيا مەن ساماريادا جانە جەردىڭ قيىر شىتىنە دەيىن مەن جايلى كۋالىك ەتەسىڭدەر»،— دەدى (ەلشىلەردىڭ ىستەرى 1:6—8).
ەلشىلەر ٴزايتۇن تاۋىندا قايتا تىرىلگەن يسامەن تۇرعاندا، ول كوز الدارىندا كوككە كوتەرىلدى دە، بۇلتتىڭ اراسىنا كىرىپ، كوزدەن عايىپ بولدى. قايتا تىرىلگەن سوڭ ول ٴتۇرلى ادامي دەنەدە كورىنىپ جۇرگەن بولسا، ەندى ادامي دەنەسى عايىپ بولىپ، رۋحاني جاراتىلىس رەتىندە كوككە كوتەرىلدى (قورىنتتىقتارعا 1-حات 15:44، 50؛ پەتىردىڭ 1-حاتى 3:18). ادال ەلشىلەر جوعارى قاراپ تۇرعاندا، قاستارىندا «اق جامىلعى كيگەن ەكى كىسى» پايدا بولدى. بۇلار ادامي دەنەدە كورىنىپ تۇرعان پەرىشتەلەر ەدى. ولار ەلشىلەرگە: «عاليلەيالىقتار، نەمەنەگە كوككە كوز الماي قاراپ تۇرسىڭدار؟ كوككە الىنعان يسا سەندەردىڭ كوزدەرىڭشە قالاي كوتەرىلسە، ٴدال سولاي قايتىپ كەلەدى»،— دەدى (ەلشىلەردىڭ ىستەرى 1:10، 11).
يسا جەر-جاھانعا جار سالماي، ادال شاكىرتتەرىنىڭ كوز الدىندا كوككە كوتەرىلدى. ول «قالاي كوتەرىلسە، ٴدال سولاي قايتىپ كەلەدى»، ياعني ول پاتشالىقتاعى بيلىككە كەلگەندە، دۇنيەجۇزىنە جار سالمايدى. مۇنى ادال ٸزباسارلارى عانا تۇسىنەتىن بولادى.
ەلشىلەر يەرۋساليمگە قايتىپ ورالدى. كەيىنگى كۇندەرى ولار باسقا شاكىرتتەرمەن باس قوسىپ ٴجۇردى. كەزدەسۋلەرگە «يسانىڭ باۋىرلارى، اناسى ٴماريام» دا كەلەتىن (ەلشىلەردىڭ ىستەرى 1:14). جينالعان توپ قايتا-قايتا دۇعا ەتتى. وتىنىشتەرىنىڭ ٴبىرى ياھۋدا يسقاريوتتىڭ ورنىنا باسقا ادامدى ون ەكىنشى ەلشى ەتىپ تاڭداۋعا قاتىستى (ماتاي 19:28). ولار يسانىڭ ىستەرىن جانە قايتا تىرىلگەنىن ٶز كوزىمەن كورگەن شاكىرتتەردىڭ ٴبىرىن تاڭداعىسى كەلەدى. قۇدايدىڭ ەركىن ٴبىلۋ ٷشىن، ولار جەرەبە تاستادى. بۇل كيەلى كىتاپتا جەرەبە تاستاۋ جايلى ايتىلعان سوڭعى وقيعا بولدى (ٴزابۇر 109:8؛ ناقىل سوزدەر 16:33). اقىر سوڭىندا، ماتيا تاڭدالىپ، «11 ەلشىنىڭ قاتارىنا قوسىلدى». ول يسانىڭ ۋاعىزعا جىبەرگەن 70 شاكىرتىنىڭ ٴبىرى ەدى (ەلشىلەردىڭ ىستەرى 1:26).
يسا كوككە كوتەرىلگەننەن ون كۇن وتكەندە، ب.ز. 33-جىلىنىڭ ەلۋىنشى كۇن مەيرامى باستالدى. يەرۋساليمدەگى ٴبىر ٷيدىڭ جوعارعى بولمەسىنە 120 شاكىرت جينالدى. كەنەتتەن قاتتى جەل سوققانداي شۋ ەستىلىپ، ٷيدىڭ ٸشى جاڭعىرىپ كەتتى. ٵرقايسىسىنىڭ ۇستىنەن تىلگە ۇقساعان وت جالىندارى كورىندى. سوندا شاكىرتتەر ٵرتۇرلى تىلدە سويلەي باستادى. بۇل ۋادە ەتىلگەن كيەلى رۋحتىڭ توگىلۋى ەدى! (جوحان 14:26).
