109-تاراۋ
يسا ٴدىني قارسىلاستارىنا سوگىس ايتتى
ماتاي 22:41—23:24 مارقا 12:35—40 لۇقا 20:41—47
-
ٴماسىح كىمنىڭ ۇلى؟
-
يسا قارسىلاستارىنىڭ ەكىجۇزدىلىگىن اشكەرەلەدى
قارسىلاستارى يسانىڭ ٴماسىح ەمەستىگىن دالەلدەي المادى. ونى ريمدىكتەردىڭ قولىنا تاپسىرۋ ٷشىن سوزدەن ۇستاماق بولعان ارەكەتتەرى دە ساتسىزدىككە ۇشىرادى (لۇقا 20:20). ٵلى دە 11-نيسان كۇنى، يسا عيباداتحانادا. ەندى ول تىزگىندى ٶز قولىنا الدى. ٶزىنىڭ كىم ەكەنىن اشۋ ٷشىن، ولارعا: «ٴماسىح تۋرالى نە ويلايسىڭدار، ول كىمنىڭ ۇلى؟»— دەپ سۇراق قويدى (ماتاي 22:42). ٴماسىحتىڭ ٴداۋىت پاتشانىڭ اۋلەتىنەن شىعاتىنى بارىنە بەلگىلى. سوندىقتان ولار: «ٴداۋىتتىڭ»،— دەپ جاۋاپ بەردى (ماتاي 9:27؛ 12:23؛ جوحان 7:42).
«ەندەشە، نەگە ٴداۋىت كيەلى رۋحتىڭ جەتەلەۋىمەن ونى يەم دەپ اتايدى؟ ول: — ەحوبا مەنىڭ يەمە بىلاي دەدى: «جاۋلارىڭدى اياعىڭنىڭ استىنا سالىپ بەرگەنىمشە، وڭ جاعىمدا وتىر»،— دەگەن عوي. ەگەر ٴداۋىت ونى يەم دەپ اتاسا، قالايشا ول ونىڭ ۇلى بولادى؟»— دەپ سۇرادى يسا (ماتاي 22:43—45).
پارىزشىلداردا ٷن جوق. ويتكەنى ولار ٴداۋىتتىڭ اۋلەتىنەن بىرەۋ شىعىپ، وزدەرىن ريم بيلىگىنەن بوساتادى دەپ كۇتىپ جۇرگەن. الايدا يسا ٴداۋىتتىڭ ٴزابۇر 110:1، 2 دە جازىلعان سوزدەرىن كەلتىرىپ، ٴماسىحتىڭ جاي ادامي بيلەۋشى ەمەس ەكەنىن دالەلدەدى. ول — ٴداۋىتتىڭ يەسى جانە قولىنا بيلىك بەرىلگەنشە، قۇدايدىڭ وڭ جاعىندا وتىراتىن تۇلعا. يسانىڭ بۇل سوزىنە قارسىلاستارى ەشتەڭە ايتا الماي قالدى.
يسانى شاكىرتتەرى مەن باسقا ادامدار دا تىڭداپ تۇر. ەندىگى ٴسوزىن ول سولارعا بۇرىپ، ٴدىن مۇعالىمدەرى مەن پارىزشىلداردان ساقتاندىردى. ولار قۇداي زاڭىنا ۇيرەتۋ ٷشىن «مۇسانىڭ ورنىنا وتىرىپ العان» ەدى. سودان يسا تىڭداۋشىلارىنا: «ولاردىڭ ايتقاندارىنىڭ ٴبارىن ورىنداڭدار، ٴبىراق ىستەگەندەرىن ىستەمەڭدەر. ويتكەنى ولار ايتادى، ٴبىراق ىستەمەيدى»،— دەگەن نۇسقاۋ بەردى (ماتاي 23:2، 3).
يسا بۇل كىسىلەردىڭ ەكى جۇزدىلىگىنە دالەل كەلتىرىپ: «تۇمارلارىن ۇلكەيتىپ، كيىمدەرىنىڭ شاشاقتارىن ۇزارتادى»،— دەدى. كەيبىر ياھۋديلەر ماڭدايىنا نە بىلەگىنە كىشكەنتاي قوراپشا بايلاپ جۇرەتىن. ونىڭ ىشىندە زاڭ ٷزىندىسى بولعان. پارىزشىلدار وزدەرىن زاڭدى ورىنداۋدا قۇلشىنىستى ەتىپ كورسەتۋ ٷشىن، قوراپشانى ۇلكەيتىپ الاتىن. سونداي-اق ولار «كيىمدەرىنىڭ شاشاقتارىن دا ۇزارتاتىن». راس، يسرايلدىكتەر كيىمدەرىنىڭ ەتەگىنە شاشاق جاساۋ كەرەك بولعان (مۇسانىڭ 4-جازباسى 15:38—40). الايدا پارىزشىلدار ونى ادەيىلەپ، «جۇرتتىڭ كوزىنە ٴتۇسۋ ٷشىن» ۇزارتاتىن (ماتاي 23:5).
جۇرتتىڭ الدىندا بەدەلدى بولۋدى يسانىڭ شاكىرتتەرى دە قالاپ كەتۋى مۇمكىن ەدى. سوندىقتان يسا ولارعا كەڭەس بەرىپ: «سەندەر وزدەرىڭدى «ۇستاز» دەپ اتاتپاڭدار، سەبەبى ۇستازدارىڭ بىرەۋ-اق، ال سەندەر ٶزارا باۋىرلاسسىڭدار. سونىمەن قاتار جەر بەتىندەگى ەشكىمدى «اكە» دەپ اتاماڭدار، سەبەبى اكەلەرىڭ بىرەۋ-اق. ول — كوكتەگى اكەلەرىڭ. وزدەرىڭدى «كوسەم» دەپ تە اتاتپاڭدار، ويتكەنى كوسەمدەرىڭ بىرەۋ-اق. ول — ٴماسىح»،— دەدى. ولاي بولسا، شاكىرتتەر وزدەرىن قالاي ۇستاۋلارى كەرەك؟ «ارالارىڭداعى ەڭ ۇلىلارىڭ سەندەرگە قىزمەتشى بولسىن. ٶزىن جوعارىلاتقان اركىم تومەندەتىلەدى، ال ٶزىن تومەن تۇتقان اركىم جوعارىلاتىلادى»،— دەدى يسا (ماتاي 23:8—12).
بۇدان كەيىن يسا ەكىجۇزدى ٴدىن مۇعالىمدەرى مەن پارىزشىلدارعا بىلاي دەپ قاتاڭ سوگىس ايتتى: «ٴدىن مۇعالىمدەرى مەن پارىزشىلدار، ەكىجۇزدىلەر، سەندەر قاسىرەتكە قالاسىڭدار! ويتكەنى جۇرت ٷشىن كوك پاتشالىعىنىڭ ەسىگىن قۇلىپتاپ قويىپ، وزدەرىڭ دە كىرمەيسىڭدەر، كىرگىسى كەلەتىندەردى دە كىرگىزبەيسىڭدەر» (ماتاي 23:13).
يسا پارىزشىلداردى ەحوبانىڭ كوزىندە قۇندى بولعان جايتتاردى ەلەمەي، قيسىنسىز ەرەجەلەر ورناتىپ العانى ٷشىن ايىپتادى. مىسالى ولار: «ەگەر بىرەۋ عيباداتحانامەن انت ەتسە، ونى ورىنداۋعا مىندەتتى ەمەس، ال عيباداتحانا التىنىمەن انت ەتسە، ونى ورىنداۋعا مىندەتتى»،— دەيتىن. وسىلايشا ەحوباعا عيبادات ەتۋ ورنىنىڭ ماڭىزدى رولىنە ەمەس، ونداعى التىنعا كوبىرەك ٴمان بەرۋىمەن وزدەرىنىڭ رۋحاني سوقىر ەكەنىن كورسەتتى. ولار «مۇسا زاڭىنداعى ادىلدىك، مەيىرىمدىلىك جانە ادالدىق سياقتى اناعۇرلىم ماڭىزدى نارسەلەردى ەلەمەي» قويدى (ماتاي 23:16، 23؛ لۇقا 11:42).
يسا پارىزشىلداردى «ماسانى ٴسۇزىپ تاستاپ، تۇيەنى تۇگىمەن جۇتاتىن سوقىر جەتەكشىلەر» دەپ اتادى (ماتاي 23:24). ولار ٴدىني تۇرعىدان ارام بولىپ ەسەپتەلەتىن ماسانى شاراپتان ٴسۇزىپ الىپ تاستايتىن. سۇيتە تۇرا ماسادان الدەقايدا ۇلكەن ٵرى ارام بولىپ ەسەپتەلگەن تۇيەنى جۇتقان سياقتى، زاڭنىڭ وتە ماڭىزدى تالاپتارىنا نەمقۇرايدى قارايتىن (مۇسانىڭ 3-جازباسى 11:4، 21—24).
