75-تاراۋ
شىنايى باقىتتىڭ قاينار كوزى
-
يسا جىنداردى قۇدايدىڭ قۇدىرەتىمەن قۋىپ شىعاردى
-
يسا ادامدى نە باقىتتى ەتەتىنىن ٴتۇسىندىردى
يسا قازىر عانا دۇعاعا قاتىستى ٴتالىمىن قايتالاعان بولاتىن. بۇل ونىڭ قىزمەت بارىسىندا قايتالاپ ايتقان جالعىز تاقىرىبى ەمەس. عاليلەيادا كەرەمەتتەر جاساعان سوڭ، وعان جىنداردىڭ ٵمىرشىسىنىڭ كۇشىن قولدانادى دەگەن ايىپ تاعىلعان بولاتىن. ياھۋديلەر سول ايىپتى قازىر قايتادان تاعىپ وتىر.
يسا ادامدى مىلقاۋ ەتكەن جىندى قۋىپ شىعارعاندا، جۇرت تاڭعالدى. ال قارسىلاستارى وعان جالعان ايىپ تاعىپ: «ول جىنداردى جىنداردىڭ ٵمىرشىسى بەلزەبۇلدىڭ كۇشىمەن قۋىپ شىعارادى»،— دەدى (لۇقا 11:15). باسقالارى بولسا يسانىڭ ٴماسىح ەكەنىنە كوبىرەك دالەل العىسى كەلىپ، كوكتەن بەلگى كورسەتۋىن تالاپ ەتتى.
مۇنى ولار سىناۋ ٷشىن ايتىپ تۇرعانىن تۇسىنگەن يسا عاليلەيادا ايتقان جاۋابىن قايتالادى. جىككە بولىنگەن پاتشالىقتىڭ كۇيرەيتىنىن ايتقان سوڭ، ول: «سول سياقتى، شايتان ٶزارا جىككە بولىنسە، ونىڭ پاتشالىعى قالايشا بەرىك تۇرا الادى؟»— دەدى. سوسىن: «ال مەن جىنداردى قۇدايدىڭ رۋحىمەن قۋىپ شىعاراتىن بولسام، وندا قۇداي پاتشالىعىنىڭ سەندەرگە كەلىپ قالعانى»،— دەپ اشىق ايتتى (لۇقا 11:18—20).
«قۇدايدىڭ رۋحىمەن» (ٴتۇپ نۇسقادا سوزبە-ٴسوز «قۇدايدىڭ ساۋساعىمەن») دەگەن يسانىڭ ٴسوزى تىڭداۋشىلاردىڭ ەسىنە يسرايلدىڭ تاريحىن سالسا كەرەك. ەجەلدە پەرعاۋىننىڭ ابىزدارى مۇسا جاساعان كەرەمەتتى كورىپ: «بۇل — قۇدايدىڭ قۇدىرەتىمەن جاسالعان ٸس!»— دەپ داۋىستاعان بولاتىن. سونداي-اق ەكى تاس تاقتاشاداعى ون زاڭ دا «قۇدايدىڭ قولىمەن» جازىلعان ەدى (مۇسانىڭ 2-جازباسى 8:19؛ 31:18 سىلتەمەنى قاراڭىز). يسا دا قۇدايدىڭ رۋحىمەن نەمەسە قۇدىرەتىمەن جىنداردى قۋىپ، ناۋقاستاردى ساۋىقتىردى. دەمەك، قۇداي پاتشالىعى قارسىلاستارعا دا كەلگەنى. سەبەبى پاتشالىقتىڭ تاعايىندالعان پاتشاسى يسا ولاردىڭ كوز الدىندا قۇدىرەتتى ىستەر جاساپ جاتتى.
يسانىڭ جىنداردى قۋىپ شىعارا الاتىنى شايتاننان كۇشتىرەك ەكەنىن دالەلدەيدى. ويتكەنى ادام كۇشتىرەك بولسا عانا بىرەۋدىڭ ۇيىنە كىرىپ، يەسىن بايلاپ تاستاي الادى. يسا بويىنان جىنى قۋىلعان ادام جايلى مىسالىن قايتالادى. ەگەر ادام بويىن جاقسى نارسەمەن تولتىرماسا، الگى جىن جەتەۋىن ەرتىپ، قايتا ورالادى. سوندا ادامنىڭ كەيىنگى جاعدايى باستاپقىدان دا مۇشكىل بولادى (ماتاي 12:22، 25—29، 43—45). يسرايل حالقى ٴدال وسىنداي مۇشكىل كۇيدە ەدى.
ٴبىر ۋاقىتتا يسانى تىڭداپ تۇرعان ايەلدەردىڭ ٴبىرى: «سەنى قۇرساعىندا كوتەرگەن ٵرى ەمىزگەن ايەل باقىتتى!»— دەپ داۋىستادى. ياھۋدي ايەلدەرى پايعامباردىڭ — بۇل جاعدايدا ٴماسىحتىڭ — اناسى بولۋدى ۇلكەن مارتەبە سانايتىن. سوندىقتان مىناداي كەرەمەت ۇستازدىڭ اناسى بولعان ٴماريام ەرەكشە باقىتتى دەگىسى كەلسە كەرەك. الايدا يسا ادامدى شىن مانىندە نەنىڭ باقىتتى ەتەتىنىن ٴتۇسىندىرىپ: «جوق، قۇداي ٴسوزىن ەستىپ، ونى ورىندايتىندار باقىتتى!»— دەپ ايەلدىڭ ويىن تۇزەتتى (لۇقا 11:27، 28). يسا ٴماريامعا ەرەكشە قۇرمەت كورسەتىلۋ كەرەك دەگەن ويعا مەڭزەيتىن ٴسوز ايتقان ەمەس. ادامدى شىنايى باقىتقا بولەيتىن — تۋىستىق بايلانىس، يا بولماسا جەتىستىكتەر ەمەس، قۇدايدىڭ ادال قىزمەتشىسى بولۋ.
يسا كوكتەن بەلگى سۇراعان عاليلەيالىقتاردى قالاي ايىپتاسا، بۇل جەردىڭ ادامدارىن دا سولاي ايىپتادى. ولارعا: «ٴجۇنىس پايعامباردىڭ بەلگىسىنەن باسقا بەلگى كورسەتىلمەيدى»،— دەدى. كەزىندە ٴجۇنىس ٷش كۇن بالىقتىڭ ىشىندە بولۋىمەن جانە باتىل ۋاعىزداۋىمەن وكىنگەن نينەۆيالىقتار ٷشىن بەلگى بولعان. «ٴبىراق مۇندا جۇنىستەن دە زور بىرەۋ بار»،— دەدى يسا (لۇقا 11:29—32). سونداي-اق يسا ٶزىنىڭ سۇلەيمەننەن دە — شەبا ەلىنىڭ پاتشايىمى ىزدەپ كەلگەن ٴدانىشپاننان دا — زور تۇلعا ەكەنىن ايتتى.
«شام جاققان ادام،— دەدى يسا، — ونى جاسىرىن جەرگە نەمەسە ىدىسپەن بۇركەپ قويمايدى. قايتا، ۇيگە كىرگەندەر جارىقتى كورە الۋ ٷشىن شامدالعا قويادى» (لۇقا 11:33). يسا مۇنداي ادامدارعا ٴتالىم بەرۋ مەن كەرەمەتتەر كورسەتۋدى جانىپ تۇرعان شامدى بۇركەۋمەن بىردەي دەگىسى كەلگەن شىعار. ويتكەنى ولار «كوزدەرىن ٴبىر-اق نارسەگە تىكپەگەندىكتەن»، يسا جاساعان ىستەردىڭ ماقساتىن ۇعا المادى.
يسا الگىندە عانا ادامدى مىلقاۋ ەتكەن جىندى قۋىپ شىعارىپ، ساۋىقتىرعان بولاتىن. بۇل كەرەمەت ادامداردى قۇدايدى ماداقتاۋعا جانە ەحوبانىڭ ٸسىن جاريالاۋعا تالپىندىرۋ كەرەك ەدى. سوندىقتان يسا ٶزىن سىناماق بولعاندارعا بىلاي دەپ ەسكەرتتى: «بايقاڭدار، بويلارىڭداعى جارىق قاراڭعىلىق بولىپ جۇرمەسىن! ەگەر دەنەلەرىڭ تۇگەلدەي جارىق بولىپ، ەش قاراڭعى جەرى قالماسا، وندا ول ساۋلەسىن شاشىپ تۇرعان شام ىسپەتتى تۇگەلدەي جارىق بولادى» (لۇقا 11:35، 36).
