9-تاراۋ
يسا نازارەتتە ەرجەتتى
-
ٴجۇسىپ پەن ٴماريامنىڭ ۇلكەن وتباسى
-
يسانىڭ كاسىپتى مەڭگەرۋى
يسا شاعىن دا قاراپايىم نازارەت قالاسىندا ەرجەتىپ كەلەدى. بۇل قالا ياھۋدەيانىڭ سولتۇستىگىندەگى عاليلەيانىڭ قىراتتى ايماعىندا، عاليلەيا دەگەن ۇلكەن كولدىڭ باتىس جاعىندا ورنالاسقان.
ٴجۇسىپ پەن ٴماريام مىسىردان كوشىپ كەلگەندە، يسا شامامەن ەكى جاستا ەدى. سول كەزدە ول وتباسىندا جالعىز بالا بولاتىن. كەيىن ٴماريام مەن ٴجۇسىپتىڭ جاقىپ، ٴجۇسىپ، شيمون جانە ياھۋدا دەگەن ۇلدارى جانە بىرنەشە قىزى دۇنيەگە كەلدى. وسىلايشا يسانىڭ ٴبىر انادان تۋعان كەم دەگەندە التى ٸنى-قارىنداسى بولدى.
يسانىڭ باسقا دا تۋىستارى بار. الدىڭعى تاراۋلاردان ەلدىڭ وڭتۇستىگىندەگى ياھۋدەيا ولكەسىندە تۇراتىن ەلىزابەت پەن ونىڭ ۇلى جاقيا جايلى بىلگەن ەدىك. ال جاقىن ماڭدا، عاليلەيانىڭ وزىندە يسانىڭ ناعاشى اپاسى سالوما مەن ونىڭ كۇيەۋى زەبەدەي تۇرادى. ٴماريام مەن سالوما اپەكەلى-ٴسىڭلى بولسا كەرەك. سالومانىڭ ۇلدارى جاقىپ پەن جوحان يسانىڭ بولەلەرى. يسا بالالىق شاعىندا ولارمەن قانشالىقتى ارالاسقانى بەلگىسىز. ٴبىراق ەسەيگەندە ەكەۋى يساعا سەرىك بولىپ، ەلشىلەرى رەتىندە قىزمەت ەتتى.
ٴجۇسىپ ۇلكەيىپ جاتقان وتباسىن اسىراۋ ٷشىن، اعاش ۇستاسى رەتىندە تىنباي ەڭبەك ەتتى. ول يسانى ٶز ۇلىنداي تاربيەلەگەندىكتەن، جۇرت ونى «اعاش ۇستاسىنىڭ ۇلى» دەپ ٴبىلدى (ماتاي 13:55). ٴجۇسىپ يساعا ٶز كاسىبىن دە ۇيرەتتى. ونى جاقسى مەڭگەرگەندىكتەن، يسانى دا جۇرت كەيىن «اعاش ۇستاسى» دەپ اتادى (مارقا 6:3).
ٴجۇسىپتىڭ وتباسىندا ەحوباعا عيبادات ەتۋ باستى ورىندا تۇردى. ٴجۇسىپ پەن ٴماريام قۇداي زاڭىن ۇستانىپ، بالالارىنا «ۇيدە وتىرعاندا دا، جول جۇرگەندە دە، جاتقاندا دا، تۇرعاندا دا» رۋحاني ٴتالىم-تاربيە بەردى (مۇسانىڭ 5-جازباسى 6:6—9). ٴجۇسىپ وتباسىمەن نازارەتتەگى ٴماجىلىسحاناعا جۇيەلى تۇردە بارىپ تۇرعانى انىق. ويتكەنى جازبالاردا يسا جايلى: «ول ادەتىنشە دەمالىس كۇنى ٴماجىلىسحاناعا باردى»،— دەپ ايتىلعان (لۇقا 4:16). سونداي-اق بۇل وتباسى جىل سايىن يەرۋساليمدەگى ەحوبانىڭ عيباداتحاناسىنا ساپار شەگىپ، زور قۋانىشقا بولەنەتىن.
