92-تاراۋ
ساۋىققان وننىڭ بىرەۋى عانا ريزاشىلىق ٴبىلدىردى
-
يسا ون الاپەستى ساۋىقتىردى
يسا جوعارعى كەڭەستىڭ جوسپارىن بۇزىپ، يەرۋساليمنەن سولتۇستىك-شىعىسقا، ەفرەم قالاسىنا كەتىپ قالدى. سول جاقتا ول شاكىرتتەرىمەن بىرگە ٴبىراز ۋاقىت بولدى (جوحان 11:54). ب.ز. 33-جىلىنىڭ قۇتقارىلۋ مەيرامى جاقىنداعاندىقتان، يسا تاعى دا جولعا شىقتى. ول يەرۋساليمگە سولتۇستىكتەگى ساماريا مەن عاليلەيا ارقىلى ٴجۇردى. بۇل ونىڭ وسى وڭىرگە سوڭعى رەت كەلۋى.
ساپارىنىڭ باسىندا يسا اۋىل-اۋىلدى ارالاپ ٴجۇرىپ، ۇستەرىن الاپەس باسقان ون كىسىنى كەزدەستىردى. بۇل جۇقپالى اۋرۋ، ٵرى ونىڭ كەيبىر تۇرىنەن ادامنىڭ قۇلاقتارى، ساۋساقتارى مەن باشپايلارى ٴشىرىپ ٴتۇسىپ قالاتىن (مۇسانىڭ 4-جازباسى 12:10—12). مۇسا زاڭىنىڭ تالابى بويىنشا، الاپەس جۇقتىرعان ادام الىستان: «تازا ەمەسپىن! تازا ەمەسپىن!»— دەپ ايعايلاپ جۇرەتىن جانە وقشاۋ جەردە ٶمىر سۇرەتىن (مۇسانىڭ 3-جازباسى 13:45، 46).
سودان ون كىسى يساعا جولاماي، الىسىراق جەردەن: «يسا، ۇستاز، بىزگە راقىمىڭىزدى تۇسىرە كورىڭىز!»— دەپ ايعايلادى. يسا ولاردى كورگەندە: «بارىپ، وزدەرىڭدى ٴدىني قىزمەتكەرلەرگە كورسەتىڭدەر»،— دەپ نۇسقاۋ بەردى (لۇقا 17:13، 14). وسىلايشا يسا مۇسا زاڭىن قۇرمەتتەيتىنىن كورسەتتى. ال زاڭ بويىنشا ٴدىني قىزمەتكەر ساۋىققان ادامدى قاراپ شىعىپ، تازا دەپ جاريالايتىن. سودان كەيىن عانا ول جۇرتتىڭ اراسىنا كەلىپ تۇرا الاتىن (مۇسانىڭ 3-جازباسى 13:9—17).
الاپەس ون كىسى يسانىڭ كەرەمەت جاساۋعا قۇدىرەتى جەتەتىنىنە سەنىمدى بولدى. سوندىقتان ساۋىقپاي جاتىپ-اق ٴدىني قىزمەتكەرگە كورىنبەك بولىپ كەتتى. جولدا ولاردىڭ يساعا دەگەن سەنىمدەرى اقتالىپ، دەنەلەرى الاپەستەن تازاردى. ولار قۇلانتازا ساۋىعىپ كەتتى!
الاپەستەن ساۋىققان توعىز كىسى ارى قاراي كەتە بەردى. ال ساماريالىق كىسى كەرى قايتتى. نەگە؟ سەبەبى ول يسانىڭ ىستەگەنىنە تەرەڭ ريزاشىلىق سەزىندى. بۇل كەرەمەتتىڭ شىن مانىندە قۇدايدىڭ قۇدىرەتىمەن جاسالعانىن تۇسىنگەن ول بار داۋسىمەن قۇدايعا ماداق ايتتى (لۇقا 17:15). يسانى تاپقاندا، ونىڭ اياعىنا جىعىلىپ، ريزاشىلىق ٴبىلدىردى.
سوندا يسا اينالاسىندا تۇرعاندارعا قاراپ: «ساۋىققاندار ون كىسى ەمەس پە ەدى، توعىزى قايدا؟ قۇدايدى ماداقتاۋعا باسقا ۇلتتىق مىنا كىسىدەن باسقا ەشكىم قايتىپ كەلمەدى مە؟»— دەپ سۇرادى. سوسىن ساماريالىق كىسىگە: «تۇر دا، قايتا بەر. سەنىمىڭنىڭ ارقاسىندا ايىقتىڭ!»— دەدى (لۇقا 17:17—19).
يسا الاپەس ون كىسىنى ساۋىقتىرۋىمەن ٶزىن ەحوبا قۇداي قولدايتىنىن كورسەتتى. ون كىسىنىڭ بىرەۋى يسا ارقىلى ساۋىعىپ قانا قويعان جوق، ول ٶمىر جولىنا اياق باسقانعا ۇقسايدى. قازىرگى كۇندە قۇداي يسا ارقىلى مۇنداي كەرەمەتتەردى جاسامايدى. دەگەنمەن يساعا سەنۋ ارقىلى ٴبىز ٶمىر جولىنا — ماڭگىلىك ومىرگە — اياق باسا الامىز. ساماريالىق كىسى سياقتى ٴبىز دە ريزاشىلىق ٴبىلدىرىپ ٴجۇرمىز بە؟