87-تاراۋ
ادىلەتسىز بايلىقپەن وزدەرىڭە دوستار تابىڭدار
-
ادىلەتسىز ٷي باسقارۋشى تۋرالى استارلى اڭگىمە
-
بايلىقتى دوستار تابۋ ٷشىن جۇمساۋ
يسانىڭ الگىندە عانا ايتقان اداسقان ۇل تۋرالى استارلى اڭگىمەسىنەن سالىق جيناۋشىلار، ٴدىن مۇعالىمدەرى مەن پارىزشىلدار قۇدايدىڭ شىن وكىنگەن كۇناكارلاردى كەشىرۋگە دايىن ەكەنىن تۇسىنۋلەرى كەرەك ەدى (لۇقا 15:1—7، 11). ەندى يسا ٴسوزىن شاكىرتتەرىنە ارناپ تاعى ٴبىر استارلى اڭگىمە ايتىپ بەردى. بۇل — باي كىسى مەن ونىڭ شارۋاسىن دۇرىس اتقارماعان ٷي باسقارۋشىسى جايلى وقيعا.
بىرەۋلەر باي كىسىگە ٷي باسقارۋشىسىنىڭ دۇنيە-مۇلىكتى شاشىپ جاتقانىن جەتكىزەدى. سوندا قوجايىن ٷي باسقارۋشىسىن شاقىرىپ الىپ، جۇمىستان شىعاراتىنىن ايتادى. سوندا ول ەرتەڭگى كۇنىن ويلاپ: «قوجايىنىم مەنى جۇمىستان بوساتپاق، ەندى نە ىستەسەم ەكەن؟ جەر قازۋعا كۇشىم جەتپەيدى، ال قايىر سۇراۋعا ۇيالامىن»،— دەيدى. اقىرىندا امالىن تاپقان ول ىشتەي: «جۇمىستان بوساپ قالعانىمدا، جۇرتتىڭ ەسىگى ماعان اشىق بولۋ ٷشىن نە ىستەۋ كەرەكتىگىن بىلەمىن»،— دەدى. ٴسويتىپ، قوجايىنىنا قارىز بولعانداردى ٴبىر-بىردەن شاقىرىپ: «قوجايىنىما قانشا قارىزسىڭ؟»— دەپ سۇراي باستايدى (لۇقا 16:3—5).
ٴبىرىنشىسى: «2200 ليتر ٴزايتۇن ماي قارىزبىن»،— دەپ جاۋاپ بەردى. قارىز بولعان بۇل كىسى ۇلكەن ٴزايتۇن باعىنىڭ يەسى نەمەسە ماي ساتاتىن ساۋداگەر بولسا كەرەك. سودان وعان ٷي باسقارۋشى: «كەلىسىم شارتىڭدى ال دا، وتىرا قالىپ، 1100 دەپ جاز»،— دەدى (لۇقا 16:6).
باسقا بىرەۋىنەن: «سەن قانشا قارىزسىڭ؟»— دەپ سۇراعاندا، ول: «1000 پۇت بيداي»،— دەپ جاۋاپ بەردى. سوندا ٷي باسقارۋشى: «كەلىسىم شارتىڭدى ال دا، 800 دەپ جاز»،— دەدى. وسىلايشا ول قارىزدى 20 پايىزعا ازايتادى (لۇقا 16:7).
ٷي باسقارۋشىسى قوجايىنىنىڭ قارجىسىنا ٵلى دە جاۋاپتى بولعاندىقتان، باسقالاردىڭ قارىزىن ازايتۋعا قۇقىعى بار ەدى. ول وسى مۇمكىندىكتى قولدانىپ، وزىنە دوستار تاۋىپ الدى. ويتكەنى جۇمىسىنان ايىرىلعان كەزدە، جاساعان جاقسىلىعى وزىنە قايتار ەدى.
بۇل قوجايىننىڭ قۇلاعىنا جەتكەندە، ول تاڭعالدى. ٴسويتىپ، قانداي دا ٴبىر شىعىن كورسە دە، ادىلەتسىز ٷي باسقارۋشىسىن اقىل تاۋىپ كەتكەنى ٷشىن ماقتادى. يسا ٴسوزىن جالعاپ: «وسى دۇنيەنىڭ ادامدارى زامانداستارىمەن ارالاسقاندا، جارىقتىڭ ادامدارىنا قاراعاندا اقىلدىراق ارەكەت ەتەدى»،— دەدى (لۇقا 16:8).
ٷي باسقارۋشىنىڭ ارەكەتىن يسا قۇپتاعان جوق، ٵرى ىسكەرلىك ماسەلەدە قۋلىق جاساۋعا شاقىرعان جوق. ولاي بولسا، يسا نە ايتقىسى كەلدى؟ «ادىلەتسىز بايلىقپەن وزدەرىڭە دوستار تابىڭدار، سوندا بايلىقتارىڭ تاۋسىلعاندا، ولار سەندەردى ماڭگىلىك مەكەندەرگە قابىلدايدى»،— دەدى ول (لۇقا 16:9). دەمەك، يسا شاكىرتتەرىن كورەگەندىكپەن جانە اقىلمەن ارەكەت ەتۋگە شاقىرىپ تۇر. قۇدايدىڭ قىزمەتشىلەرى، ياعني «جارىقتىڭ ادامدارى»، بولاشاقتاعى ماڭگى ٶمىر سىيىن ەستە ۇستاي وتىرىپ، دۇنيە-مۇلىكتەرىن اقىلمەن قولدانۋلارى كەرەك.
كوكتەگى پاتشالىققا كىم كىرەتىنىن نەمەسە جەردە ورنايتىن جۇماقتا كىم ٶمىر سۇرەتىنىن شەشەتىن — تەك ەحوبا قۇداي مەن ونىڭ ۇلى يسا. ال ٴبىز پاتشالىق ٸسىن دۇنيە-مۇلكىمىزبەن قولداۋ ارقىلى ولارمەن دوستىق قارىم-قاتىناس دامىتۋىمىز كەرەك. سوندا التىن، كۇمىس نە باسقا دا دۇنيەمىزدەن ايىرىلساق تا، ماڭگىلىك بولاشاعىمىزدان ايىرىلمايمىز.
سونداي-اق يسا اقشا مەن دۇنيە-مۇلىكتى جۇمساۋدا ادال بولعان ادامدار الدەقايدا ماڭىزدى ىستە دە ادال بولاتىنىنا نازار اۋداردى. سودان كەيىن ول: «ادىلەتسىز بايلىقتى قولدانۋدا سەنىمدى بولماساڭدار، كىم سەندەرگە شىنايى بايلىقتى [پاتشالىقتىڭ مۇددەسىن] سەنىپ تاپسىرادى؟!»— دەگەن سۇراق قويدى (لۇقا 16:11).
يسا مۇنىمەن نە ايتقىسى كەلدى؟ شاكىرتتەر «ماڭگىلىك مەكەندەرگە قابىلدانعىسى» كەلسە، ولاردان كوپ نارسە تالاپ ەتىلەدى. ادام «ادىلەتسىز بايلىقتىڭ»، ياعني دۇنيە-مۇلىكتىڭ قۇلى بولا تۇرا، قۇدايعا ادال قىزمەت ەتە المايدى. سوندىقتان يسا: «ەشبىر قىزمەتشى ەكى قوجايىنعا بىردەي قۇل بولا المايدى: بىرەۋىن جەك كورىپ، ەكىنشىسىن جاقسى كورەدى، نەمەسە بىرەۋىن جاقىن تارتىپ، ال ەكىنشىسىنە نەمكەتتى قارايدى. سەندەر قۇدايعا جانە بايلىققا بىردەي قىزمەت ەتە المايسىڭدار»،— دەپ تۇجىرىمدادى (لۇقا 16:9، 13).
