9 تاراۋ
ازعىرۋلارعا قارسى تۇر
بىرەۋ ساعان جامان نارسە ىستەۋدى ۇسىنعان با؟ ~ ول ساعان: «نە، قورقاقسىڭ با؟»— دەپ ايتتى ما؟ الدە: «بۇل جامان ەمەس، قايتا، قىزىق بولادى!»— دەپ كوندىرگىسى كەلدى مە؟ ~ ەگەر بىرەۋ ساعان وسىلاي ايتسا، ول سەنى ازعىرىپ جاتىر.
بىرەۋ ٴبىزدى ازعىرعاندا نە ىستەۋىمىز كەرەك؟ ونىڭ ايتقانىنا كونىپ، بۇرىس نارسەنى ىستەۋىمىز كەرەك پە؟ ~ بۇلاي ەتۋ ەحوباعا ۇنامايدى. ٴبىراق بۇعان كىمنىڭ قۋاناتىنىن بىلەسىڭ بە؟ ~ ٴيا، ٸبىلىس شايتان قۋانادى.
شايتان — ەحوبانىڭ جاۋى، ول — ٴبىزدىڭ دە جاۋىمىز. ونىڭ دەنەسى بىزگە كورىنبەيدى، ويتكەنى ول — رۋح. ٴبىراق شايتان ٴبىزدى كورە الادى. بىردە ٸبىلىس ۇلى ۇستازىمىز يسامەن سويلەسىپ، ونى ازعىرۋعا تىرىسقان. سول كەزدە يسا قالاي ارەكەت ەتتى ەكەن؟ مۇنى قاراستىرساق، ازعىرۋعا كەزىككەندە، قالاي دۇرىس ارەكەت ەتۋ كەرەكتىگىن بىلەتىن بولامىز.
يسا ارقاشان قۇدايدىڭ ەركىن ورىنداۋدى قالاعان. ول مۇنى جۇرتقا اشىق كورسەتىپ، يوردان وزەنىندە شومىلدىرۋ راسىمىنەن ٶتتى. كوپ ۇزاماي شايتان يسانى ازعىرۋعا كىرىستى. كيەلى كىتاپتا يسا سۋدان شىققاندا، وعان «اسپاننىڭ اشىلعانى» ايتىلعان (ماتاي 3:16). بۇل يسانىڭ كوكتە قۇدايمەن بىرگە وتكىزگەن ٶمىرىن ەسىنە تۇسىرە باستاعانىن ٴبىلدىرۋى مۇمكىن.
يسا شومىلدىرۋ راسىمىنەن وتكەن سوڭ، ەسىنە تۇسە باستاعان نارسەلەرى جايلى ويلانۋ ٷشىن ٴشول دالاعا كەتەدى. سول جەردە ول قىرىق كۇن، قىرىق
ٴتۇن بولادى. وسىنشاما ۋاقىت بويى تاماق جەمەگەندىكتەن، يسانىڭ قارنى اشادى. ٴدال وسى ٴساتتى پايدالانىپ، شايتان يسانى ازعىرۋعا تىرىسادى.شايتان يساعا: «ەگەر قۇدايدىڭ ۇلى بولساڭ، مىنا تاستاردى نانعا اينالدىر»،— دەدى. اشىعىپ تۇرعاندا، ٴدامدى نانعا نە جەتسىن! يسا تاستاردى نانعا اينالدىرا الار ما ەدى؟ ~ ٴيا، ويتكەنى ول قۇدايدىڭ ۇلى بولعان جانە بويىندا ەرەكشە كۇش بار ەدى.
ەگەر سەندە وسىنداي كۇش بولسا، ٸبىلىستىڭ ايتقانىن ىستەر مە ەدىڭ؟ ~ يسانىڭ قارنى اش بولعان. سوندىقتان ٴبىر-اق رەت تاستى نانعا اينالدىرسا، ەشتەڭە بولماس ەدى عوي، سولاي ەمەس پە؟ ~ ٴبىراق يسا ەحوبادان العان كۇشتى بۇلاي قولدانۋ دۇرىس ەمەس ەكەنىن تۇسىنگەن. ويتكەنى بۇل كۇش وعان ٶز پايداسىنا قولدانۋ ٷشىن ەمەس، ادامداردى ەحوباعا جاقىنداتۋ ٷشىن بەرىلگەن ەدى.
يسا كيەلى كىتاپتان تارماق كەلتىرىپ، شايتانعا: «ادام نانمەن عانا ەمەس، ەحوبانىڭ اۋزىنان شىققان ٵربىر سوزىمەن دە ٶمىر ٴسۇرۋى ٴتيىس»،— دەدى. يسا ٷشىن ەحوباعا ۇنايتىندى ىستەۋ تاماق جەۋدەن دە ماڭىزدى بولدى.
ٴبىراق ٸبىلىس ازعىرۋىن توقتاتپادى. ول يسانى يەرۋساليمدەگى عيباداتحانانىڭ ەڭ بيىك جەرىنە شىعارىپ، بىلاي دەدى: «قۇدايدىڭ ۇلى بولساڭ، تومەنگە سەكىر.
ويتكەنى كيەلى جازبادا پەرىشتەلەردىڭ سەنى امان الىپ قالاتىنى جازىلعان عوي».شايتان نەگە بۇلاي دەدى، قالاي ويلايسىڭ؟ ~ ول يسانى اقىماقتىق جاساۋعا ازعىرعىسى كەلدى. ٴبىراق يسا تاعى دا شايتاندى تىڭداماي، وعان بىلاي جاۋاپ بەردى: «قۇدايىڭ ەحوبانى سىناۋشى بولما!» دەپ تە جازىلعان عوي». يسا ٶمىرىن ادەيى قاتەرگە تىگىپ، ەحوبانى سىناۋ دۇرىس ەمەس ەكەنىن بىلگەن.
ٴبىراق شايتان قايتپادى. ول ەندى يسانى وتە بيىك تاۋعا اكەلىپ، الەمنىڭ پاتشالىقتارىن، ياعني مەملەكەتتەرىن، سونداي-اق ولاردىڭ كەرەمەت جەتىستىكتەرىن كورسەتتى. سودان سوڭ يساعا: «الدىما جىعىلىپ، ماعان ٴبىر رەت تابىنساڭ، وسىنىڭ ٴبارىن ساعان بەرەمىن»،— دەدى.
ٸبىلىستىڭ ۇسىنىسى جايلى ويلانىپ كورەيىكشى. بارلىق پاتشالىقتار شىنىمەن شايتاندىكى مە؟ ~ يسا مۇنى جوققا شىعارعان جوق. ەگەر شايتاندىكى بولماسا، يسا مۇنى مىندەتتى تۇردە ايتار ەدى. دەمەك، دۇنيەدەگى بارلىق حالىقتىڭ بيلەۋشىسى — شىنىمەن شايتان. كيەلى كىتاپتا دا ول «وسى دۇنيەنىڭ بيلەۋشىسى» دەپ اتالعان (جوحان 12:31).
ەگەر ٸبىلىس: «ماعان تابىن، سوندا قالاعانىڭدى بەرەم»،— دەپ ساعان ۋادە ەتسە، سەن نە ىستەر ەدىڭ؟ ~ ٸبىلىس نە ۇسىنسا دا، وعان تابىنۋ دۇرىس ەمەس ەكەنىن يسا بىلگەن. سوندىقتان وعان: «كەت قاسىمنان، شايتان! كيەلى جازبادا «ەحوبا قۇدايىڭا عيبادات ەتىپ، تەك سوعان عانا قاسيەتتى قىزمەت اتقار!» دەپ جازىلعان عوي»،— دەپ جاۋاپ قايتاردى (ماتاي 4:1—10؛ لۇقا 4:1—13).
ٴبىز دە ازعىرۋلارعا كەزىگىپ جاتامىز. سولاردىڭ كەيبىرەۋىن ايتا الاسىڭ با؟ ~ مىسالى، اناڭ شايعا تورت نەمەسە باۋىرساق ٴپىسىردى دەلىك. داستارقانعا وتىرعانشا، ونى جەۋگە رۇقسات بەرمەدى. ال سەنىڭ قارنىڭ قاتتى اشىپ تۇر، سوندىقتان كىشكەنە ٷزىپ الىپ جەي سالعىڭ كەلەدى. وسىنداي ساتتە اناڭنىڭ ٴتىلىن الاسىڭ با؟ ~ ەگەر ٴتىلىن الماساڭ، وندا شايتانعا ۇنايتىندى ىستەگەنىڭ.
يسانىڭ ارەكەتىن ەسىڭە ٴتۇسىرشى. قارنى قاتتى اشسا دا، ول قۇدايعا ۇنايتىندى ىستەدى. ويتكەنى بۇل وعان تاماق جەۋدەن ماڭىزدى ەدى. سەن دە اناڭنىڭ ايتقانىن ىستەسەڭ، يسا سياقتى بولاسىڭ.
ٴبىر بالا ساعان ٴدارى سياقتى تۇيىرشىك ۇسىنۋى مۇمكىن. ونىڭ ەش زيانى جوق، قايتا راقاتتانىپ، ٶزىڭدى جاقسى سەزىنىپ قالاسىڭ دەيتىن شىعار. ٴبىراق، شىن مانىندە، ول ەسىرتكى بولۋى مۇمكىن. ودان سەن قاتتى
اۋىرىپ، ٴتىپتى ٶلىپ كەتۋىڭ مۇمكىن. باسقا ٴبىر بالا ساعان تەمەكى تارتىپ نەمەسە ناسىباي اتىپ كورەيىك دەيتىن شىعار. ولاردىڭ قۇرامىندا دا ەسىرتكى بار. سونداي كەزدە سەن نە ىستەيسىڭ؟ ~شايتاننىڭ يساعا عيباداتحانادان سەكىر دەگەنى ەسىڭدە عوي. سوندا يسا ٶمىرىن قاتەرگە تىككەن جوق. ەگەر سەنى بىرەۋ قاۋىپتى ىسكە يتەرمەلەسە، نە ىستەيسىڭ؟ ~ يسا شايتاندى تىڭدامادى. سەن دە جامان نارسە ىستەۋگە يتەرمەلەيتىن ادامداردى تىڭداماۋىڭ كەرەك.
ٴبىر كۇنى الدەكىم سەنى قايسىبىر زاتقا تابىنۋعا يتەرمەلەۋى مۇمكىن. مۇنداي جاعداي مەكتەپتە وتكىزىلەتىن مەرەكەلەردە ورىن الۋى ىقتيمال. ٴبىراق زاتقا تابىنۋدى كيەلى كىتاپ ايىپتايتىنىن بىلەسىڭ (مىسىردان شىعۋ 20:4، 5). ال مۇعالىمدەر بۇدان باس تارتساڭ، سەنى مەكتەپتەن شىعارىپ جىبەرەمىز دەپ قورقىتۋى مۇمكىن. سوندا سەن نە ىستەيسىڭ؟ ~
بارلىعى دۇرىس نارسەنى ىستەپ جاتسا، ونى ىستەۋ بىزگە دە وڭاي. ال ادامدار ٴبىزدى بۇرىس نارسەگە يتەرمەلەسە، دۇرىس نارسەنى ىستەۋ وتە قيىن. كەيدە ولار ٶز ىستەرىنىڭ ەش جاماندىعى جوق دەپ ايتادى. سونداي كەزدە قۇدايدىڭ نە ويلايتىنىن ٴبىلۋ ماڭىزدى. ويتكەنى ول بىزدەن الدەقايدا اقىلدى.
باسقالار نە ايتسا دا، قۇدايعا ۇنامايتىن نارسەنى ەشقاشان ىستەمەۋىمىز كەرەك. سوندا ٴبىز شايتاندى ەمەس، ٵردايىم قۇدايدى قۋانتاتىن بولامىز.
بىرەۋ ازعىرعاندا، قالاي قارسى تۇرۋعا بولاتىنىن كەلەسى تارماقتاردان بىلەسىڭ: زابۋر 1:1، 2؛ ناقىل سوزدەر 1:10، 11؛ ماتاي 26:41 جانە تىموتەگە 2-حات 2:22.