20 تاراۋ
بارىنەن الدا بولعىڭ كەلە مە؟
بارىنەن الدا بولۋعا تىرىساتىن بالانى بىلەسىڭ بە؟ ~ ول باسقالاردى يتەرىپ، كەزەكتە ٴبىرىنشى بولىپ تۇرىپ الاتىن شىعار. بىرەۋدىڭ وسىلاي ەتكەنىن كورگەنسىڭ بە؟ ~ ۇلى ۇستاز ٴتىپتى ۇلكەن ادامداردىڭ دا باسقالاردان الدا نەمەسە ٴبىرىنشى بولۋعا ۇمتىلاتىنىن كورگەن. ٴبىراق ول مۇندايدى ۇناتپاعان. وسى وقيعانىڭ قالاي بولعانىن كورەيىك.
بارىنەن ٴبىرىنشى بولۋعا تىرىساتىن بالانى كورگەنسىڭ بە؟
كيەلى كىتاپتا ٴبىر پارىزشىلدىڭ يسانى تاماققا شاقىرعانى ايتىلعان. ول كىسى بەدەلدى ٴدىنباسى بولاتىن. يسا سول ۇيگە كەلگەندە، قوناقتاردىڭ وتىراتىن ورىندى قالاي تاڭداپ جاتقانىن باقىلايدى. سوسىن، ولارعا ٴبىر اڭگىمە ايتىپ بەرەدى. ونى ساعان ايتىپ بەرەيىن بە؟ ~
يسا بىلاي دەدى: «بىرەۋ تويعا شاقىرسا، ەڭ قۇرمەتتى ورىنعا جانتايما». ونىڭ نەگە بۇلاي دەگەنىن بىلەسىڭ بە؟ ~ تويعا ودان الدەقايدا قۇرمەتتى قوناق كەلىپ قالۋى مۇمكىن ەدى. مۇنى سۋرەتتەن كورىپ تۇرسىڭ. ٶزى تورگە وتىرىپ العان ادامعا ٷي يەسى: «مىنا كىسىگە ورنىڭدى بەر، ٶزىڭ انا جەرگە بارىپ وتىر»،— دەيدى. سوندا بۇل قوناق ٶزىن قالاي سەزىنەدى؟ ~ ول ۇيالىپ قالادى. ويتكەنى وعان ٴبارىنىڭ كوزىنشە تومەنگى ورىنعا بارىپ وتىرۋعا تۋرا كەلەدى.
يسا ەڭ قۇرمەتتى ورىنعا وتىرۋدى قالاۋ دۇرىس ەمەس ەكەنىن كورسەتتى. سوندىقتان بىلاي دەدى: «قايتا، قوناققا شاقىرىلعاندا، ەڭ تومەنگى ورىنعا بارىپ جانتاي. سوندا سەنى شاقىرعان كىسى كەلىپ: — دوسىم، جوعارى شىق،— دەگەندە، بۇكىل قوناقتاردىڭ الدىندا مارتەبەڭ ٶسىپ قالادى» (لۇقا 14:1، 7—11).
يسا قۇرمەتتى ورىنعا نەمەسە تورگە وتىرىپ العان كىسى جايلى اڭگىمەسىمەن بىزگە قانداي ٴتالىم بەرگىسى كەلدى؟
وسى اڭگىمەنىڭ ٴمانىن ٴتۇسىندىڭ بە؟ ~ جاقسىراق ٴتۇسىنۋىڭ ٷشىن ٴبىر مىسال كەلتىرەيىك. ايالداماعا لىق تولى اۆتوبۋس كەلىپ توقتادى دەلىك. سەن وعان قىسىلىپ-قىمتىرىلىپ ٴمىنىپ الدىڭ. ىشتە ٴبىر ورىننىڭ بوساعانىن كورگەندە، دەرەۋ ٶزىڭ وتىرىپ الىپ، ۇلكەن كىسىنى تۇرعىزىپ قويار ما ەدىڭ؟ ~ بۇلاي ەتكەنىڭ يساعا ۇناي ما؟ ~
ٴبىراق كەيبىرەۋلەر ٴبىزدىڭ نە ىستەپ جاتقانىمىز يساعا ٴبارىبىر دەپ ويلايتىن شىعار. سەن دە سولاي ويلايسىڭ با؟ ~ پارىزشىلدىڭ ۇيىنە بارعاندا، يسا قوناقتاردىڭ قالاي ورىن تاڭداپ جاتقانىن باقىلاعان. ولاي بولسا، ول قازىر دە ادامداردىڭ نە ىستەپ جاتقانىن باقىلايدى، سولاي ەمەس پە؟ ~ قازىر يسا كوكتە، سوندىقتان ٴبىزدى توبەدەن باقىلاۋ وعان الدەقايدا ىڭعايلى.
بىرەۋ باسقالاردىڭ الدىندا بولۋعا تىرىسسا، جاعىمسىز جاعداي ورىن الۋى مۇمكىن. مىسالى، بۇدان ادامدار داۋلاسۋى نەمەسە اشۋلانۋى مۇمكىن. كەيدە وسىنداي جاعداي بالالار اۆتوبۋسقا ٴمىنىپ جاتقاندا بايقالادى. اۆتوبۋستىڭ ەسىگى اشىلا سالىسىمەن، ولار ىشكە ٴبىرىنشى بولىپ كىرۋگە ۇمتىلادى. ويتكەنى تەرەزەنىڭ جانىنداعى جاقسىراق ورىنعا وزدەرى وتىرىپ العىسى كەلەدى. بۇل نەگە اكەپ سوعادى؟ ~ جاقسى بولىپ كورىنگەن ورىنعا وتىرا الماي قالعانداردى ىزالاندىرادى.
باسقالاردىڭ الدىندا بولۋدى قالاۋدىڭ ٶزى دە كوپ قيىندىق تۋدىرادى. مۇنداي قالاۋ يسانىڭ ەلشىلەرىنىڭ اراسىندا قيىندىق تۋعىزعان. وسى كىتاپتىڭ 6 تاراۋىنان بىلگەنىمىزدەي، ەلشىلەر قايسىمىزدىڭ جولىمىز ۇلكەن دەپ داۋلاسقان بولاتىن. سوندا يسا نە ىستەدى؟ ~ ٴيا، ول ەلشىلەرىنىڭ كوزقاراسىن تۇزەتتى. ٴبىراق كەيىنىرەك ولار تاعى داۋلاستى. داۋدىڭ نەدەن باستالعانىن كورەيىك.
يسا قاسىنا ەلشىلەرىن جانە باسقا ادامداردى ەرتىپ، يەرۋساليمگە سوڭعى رەت بارا جاتقان. جولدا ول ەلشىلەرىنە ٶزىنىڭ پاتشالىعى جايلى كوپ نارسەنى تۇسىندىرەدى. سودان جاقىپ پەن جوحان يسامەن بىرگە بيلىك ەتۋ جايلى ارمانداي باستادى. ولار ٴتىپتى بۇل ارماندارىن انالارى سالوميگە ايتادى (ماتاي 27:56؛ مارقا 15:40). كەيىن سالومي يسانىڭ قاسىنا كەلىپ، اياعىنا جىعىلادى دا، ٶتىنىش بىلدىرەدى.
يسا ودان: «نە قالايسىڭ؟»— دەپ سۇرادى. سالومي يسا پاتشا تاعىنا وتىرعاندا، ۇلدارىن ەكى جاعىنا — ٴبىرىن وڭ، ٴبىرىن سول جاعىنا — وتىرعىزۋىن ٶتىندى. انالارى ارقىلى جاقىپ پەن جوحاننىڭ يسادان نە سۇراعانىن بىلگەندە، باسقا ەلشىلەر قانداي سەزىمدە بولدى دەپ ويلايسىڭ؟ ~
سالومي يساعا قانداي ٶتىنىش ايتتى، مۇنىڭ ناتيجەسىندە نە بولدى؟
ٴيا، ولار جاقىپ پەن جوحانعا قاتتى اشۋلاندى. سوندىقتان يسا ەلشىلەرىنىڭ بارىنە جاقسى كەڭەس بەردى. ول وسى دۇنيەنىڭ بيلەۋشىلەرى كۇشتى ٵرى بەدەلدى بولۋدى ۇناتاتىنىن ايتتى. ولار باسقالاردان جوعارى بولىپ، باسقالاردىڭ وزدەرىنە باعىندىرعىسى كەلەدى. ٴبىراق يسا ٸزباسارلارىنىڭ وسىنداي بولعانىن قالامادى. سوندىقتان ولارعا: «كىم باستىلارىڭ بولعىسى كەلسە، سول سەندەرگە قۇل بولۋ كەرەك»،— دەدى. مىنە قىزىق! (ماتاي 20:20—28).
سەن قۇلدىڭ كىم ەكەنىن بىلەسىڭ بە؟ ~ ول — باسقالارعا قىزمەت ەتەتىن ادام، ٴبىراق ول بىرەۋدىڭ وزىنە قىزمەت ەتۋىن كۇتپەيدى. قۇل قۇرمەتتى ورىندا ەمەس، ەڭ تومەنگى ورىندا وتىرادى. سونداي-اق ول ەڭ ماڭىزدى ادام رەتىندە ەمەس، قايتا، ەڭ ماڭىزسىز ادام رەتىندە ارەكەت ەتەدى. سوندىقتان يسا ەڭ باستى بولۋدى قالايتىن ادام باسقالارعا قۇل سياقتى قىزمەت ەتۋ كەرەك دەدى. وسىنى سەن دە ۇمىتپا.
يسانىڭ وسى سوزدەرىنەن قانداي ٴتالىم الامىز؟ ~ قۇل توردەگى ورىنعا كىم وتىرۋ كەرەك دەپ قوجايىنىمەن داۋلاسا ما؟ تاماقتى الدىمەن كىم جەۋ كەرەك دەپ ايتىسا ما؟ قالاي ويلايسىڭ؟ ~ يسا ايتقانداي، قۇل ارقاشان جولدى ٶز قوجايىنىنا بەرەدى (لۇقا 17:7—10).
سونىمەن، بارىنەن الدا بولۋعا ۇمتىلۋدىڭ ورنىنا نە ىستەۋىمىز كەرەك ەكەن؟ ~ دۇرىس، باسقالارعا قىزمەت ەتۋىمىز كەرەك. ياعني جولدى الدىمەن باسقالارعا بەرگەن ٴجون. سونداي-اق باسقالاردى وزىمىزدەن جوعارى ساناۋىمىز كەرەك. وسىلاي ىستەۋدىڭ قانداي جولدارىن بىلەسىڭ؟ ~ وسى كىتاپتىڭ 40، 41-بەتتەرىن اشىپ قاراشى. سۋرەتتە باسقالارعا قىزمەت ەتىپ، ولاردى وزىڭنەن جوعارى سانايتىنىڭدى ٴبىلدىرۋدىڭ بىرنەشە جولى كورسەتىلگەن.
ۇلى ۇستازدىڭ باسقالارعا قىزمەت ەتىپ، قۇرمەت كورسەتكەنى ەسىڭدە شىعار. جەردە بولعان سوڭعى كەشىندە، ول ٴتىپتى تىزەرلەپ وتىرىپ، ەلشىلەرىنىڭ اياقتارىن جۋعان. ەگەر ٴبىز دە بارىنەن الدا بولۋعا ۇمتىلماي، قايتا، ادامدارعا قىزمەت ەتسەك، ۇلى ۇستازىمىزدى جانە ەحوبا قۇدايىمىزدى قۋانتامىز.
بارىنەن الدا بولۋعا ۇمتىلماۋ جايلى كەلەسى تارماقتاردان وقىپ كورەيىك: لۇقا 9:48؛ ريمدىكتەرگە 12:3 جانە فىلىپىلىكتەرگە 2:3، 4.
قىزىقتى بولار مالىمەتتەر
ەحوبانىڭ دوسى بول
جاقسىلىق جاساعان باقىتتى
وزگەلەرگە ٴتۇرلى جولمەن جاقسىلىق جاساۋعا بولادى. سولاردىڭ كەيبىرى قانداي؟
ەحوبانىڭ دوسى بول
جومارت بولىپ، بارىڭمەن ٴبولىس
ايان مەن مارجان ويىنشىقتارىمەن بولىسكەندە، ويىندارى قالاي قىزىق بولا تۇسكەنىن كور.
