19 تاراۋ
توبەلەسۋگە بولا ما؟
دورەكى جانە سوتقار ۇلدار مەن قىزداردى بىلەسىڭ بە؟ ~ ولارمەن دوس بولعىڭ كەلە مە؟ الدە مەيىرىمدى، تاتۋلىقتى قالايتىن بالالارمەن دوستاسقان ۇناي ما؟ ~ ۇلى ۇستاز بىلاي دەگەن: «تاتۋلاستىرۋشىلار باقىتتى، ويتكەنى ولار قۇدايدىڭ بالالارى دەپ اتالادى» (ماتاي 5:9).
كەيدە بىرەۋلەر اشۋىمىزعا تيەتىن قىلىق جاساپ جاتادى، كەلىسەسىڭ عوي؟ ~ سوندا ولارعا ەسەسىن قايتارعىمىز كەلەدى. بىردە يەرۋساليمگە بارا جاتقان يسانىڭ شاكىرتتەرىمەن وسىنداي جاعداي بولدى. سونى ساعان ايتىپ بەرەيىنشى.
ٴبىراز جول جۇرگەننەن كەيىن يسا الدارىندا جاتقان ساماريا اۋىلىنا بىرنەشە شاكىرتىن جىبەرىپ، توقتايتىن ورىن دايىنداتپاق بولادى. ٴبىراق ساماريالىقتار جولاۋشىلاردى ٴدىنى باسقا بولعاندىقتان قابىل العىسى كەلمەيدى. ولار يەرۋساليمگە عيبادات ەتۋگە باراتىنداردى جاقتىرمايتىن.
ساماريالىقتاردىڭ سازايىن تارتقىزۋ ٷشىن جاقىپ پەن جوحان نە ىستەگىسى كەلدى؟
ەگەر سەن شاكىرتتەردىڭ ورنىندا بولساڭ، نە ىستەر ەدىڭ؟ اشۋلانار ما ەدىڭ؟ ولاردىڭ سازايىن بەرگىڭ كەلەر مە ەدى؟ ~ شاكىرت جاقىپ پەن جوحان وسىلاي ىستەگىسى كەلدى. ٴسۇيتىپ، يساعا: «كوكتەن وت ٴتۇسىپ، ولاردى جويسىن دەپ بۇيىرعانىمىزدى قالايسىڭ با؟»— دەپ سۇرادى. بۇل ەكەۋىنىڭ قىزۋقاندى مىنەزىنە قاراپ، يسا ولاردى «كۇن كۇركىرىنىڭ ۇلدارى» دەپ اتاعان. ٴبىراق يسا ولارعا بۇلاي ىستەۋ دۇرىس بولمايتىنىن ايتتى (لۇقا 9:51—56؛ مارقا 3:17).
كەيدە ادامدار بىزگە دورەكىلىك كورسەتۋى مۇمكىن. مىسالى، بالالار ساعان: «ٴبىزدىڭ قاسىمىزدان كەت، سەنىمەن وينامايمىز!»— دەپ ايتاتىن شىعار. سونداي كەزدە ٶزىڭدى جامان سەزىنىپ قالاسىڭ، سولاي عوي؟ سوندىقتان ولارعا ەرەگىسىپ، كەك قايتارعىڭ كەپ كەتەدى. ٴبىراق بۇل دۇرىس پا؟ ~
كيەلى كىتابىڭدى قولىڭا الشى. ناقىل سوزدەردىڭ 24 تاراۋىنىڭ 29 تارماعىن اشىپ وقيىق. وندا بىلاي دەلىنگەن: «مىنانى ايتۋشى بولما: ول نە ىستەسە ماعان، مەن دە سونى ىستەيمىن وعان، ىسىنە قاراپ مەن ونىڭ قارىمتاسىن قالاي دا قايتاراتىن بولامىن!»
بۇل سوزدەر نەنى بىلدىرەدى دەپ ويلايسىڭ؟ ~ بۇل باسقالارعا كەك قايتارۋعا تىرىسپاۋ كەرەك دەگەندى بىلدىرەدى. جاماندىققا جاماندىقپەن قايتارماۋىمىز كەرەك. ال ەگەر بىرەۋ سەنى توبەلەسكە ارانداتسا شە؟ نەمەسە سەنى مازاقتاسا، اشۋىڭا تيەتىن سوزدەر ايتسا، نە قورقاقسىڭ دەپ كۇلسە شە؟ سوندا نە ىستەۋىڭ كەرەك؟ توبەلەسە كەتكەنىڭ دۇرىس بولا ما؟ ~
كەل، ەندى ماتاي 5 تاراۋ، 39 تارماقتى اشىپ وقيىق. مۇندا يسا بىلاي دەدى: «زۇلىم ادامعا قارسىلاسپا. بىرەۋ وڭ جاعىڭنان سالىپ جىبەرسە، وعان سول جاعىڭدى دا توس». قالاي ويلايسىڭ، يسا وسى سوزدەرمەن نە ايتقىسى كەلدى؟ بىرەۋ سەنى ٴبىر جاعىڭنان ۇرسا، وعان ەكىنشى جاعىڭدى دا ۇرعىز دەپ ايتقىسى كەلدى مە؟ ~
جوق، يسا بۇلاي دەگەن جوق. ويتكەنى جاقتان سالىپ جىبەرۋ دەگەن جۇدىرىقپەن ۇرىپ، ادامدى جاراقاتتاۋ دەگەندى بىلدىرمەيدى. قايتا، بۇل — ٴتۇرتىپ نە يتەرىپ جىبەرۋ سياقتى توبەلەسكە شاقىراتىن ارەكەت. وسىلاي ٴتيىسىپ جاتقان ادام سەنى اشۋلاندىرعىسى كەلەدى. ەگەر اشۋعا بەرىلىپ، ونى دا يتەرىپ جىبەرسەڭ، اقىرىندا نە بولادى؟ ~ توبەلەس باستالادى.
ٴبىراق يسا ٸزباسارلارىنىڭ توبەلەسكەنىن قالامادى. سوندىقتان بىرەۋ بەتىمىزدەن شاپالاقپەن سالىپ قالسا، وعان ەسەسىن قايتارماۋىمىز قاجەت. ياعني اشۋعا بەرىلىپ، توبەلەسىپ كەتپەۋىمىز كەرەك. ال ەگەر توبەلەسەتىن بولساق، توبەلەستى باستاعان سوتقاردان ەش ايىرماشىلىعىمىز جوق ەكەنىن كورسەتەمىز.
جاعداي ۋشىعىپ بارا جاتسا، نە ىستەگەن دۇرىس؟ ~ ەڭ دۇرىسى — سول جەردەن كەتىپ قالۋ. كەتۋگە تىرىسقاندا، باسقا بالالار سەنى ٴبىر-ەكى رەت ٴتۇرتىپ نە يتەرىپ جىبەرەتىن شىعار. ٴبىراق بۇدان ٵرى ەشتەڭە بولا قويماس. الايدا كەتىپ قالۋ السىزدىك دەپ ويلاما. قايتا، بۇل سەنىڭ دۇرىس نارسە ىستەۋ كەرەك بولعاندا باتىل ەكەنىڭدى كورسەتەدى.
بىرەۋ بىزبەن توبەلەسكىسى كەلسە، نە ىستەۋىمىز كەرەك؟
ال ەگەر سەن توبەلەسىپ، ونى جەڭسەڭ، ٵرى قاراي نە بولادى دەپ ويلايسىڭ؟ ~ جەڭىلگەن بالا بىرنەشە دوسىن ەرتىپ كەلىپ، سەنى تاياقپەن ۇرۋى نە پىشاقتاپ كەتۋى مۇمكىن. يسانىڭ توبەلەسكەنىمىزدى نەلىكتەن قالامايتىنىن ەندى ٴتۇسىندىڭ بە؟ ~
بىرەۋلەردىڭ توبەلەسىپ جاتقانىن كورىپ قالساق، نە ىستەۋىمىز كەرەك؟ ەكەۋىنىڭ بىرەۋىن جاقتاۋ كەرەك پە؟ ~ مۇنداي جاعدايدا نەنىڭ دۇرىس بولاتىنىن كيەلى كىتاپتان بىلەمىز. ناقىل سوزدەردىڭ 26 تاراۋىنىڭ 17 تارماعىن اشا قويشى. وندا بىلاي دەلىنگەن: «جولشىباي وزگەنىڭ جانجالىنا ارالاسقان، ۇقسايدى [ادامعا] ٴيتتىڭ قۇلاعىنان تارتقان».
بىرەۋدىڭ توبەلەسىنە ارالاسۋ نەلىكتەن ٴيتتى قۇلاعىنان ۇستاۋمەن تەڭ؟ بۇل جاقسىلىققا اپارمايدى، سوندىقتان توبەلەسكە ارالاسپا!
ٴيتتىڭ قۇلاعىنان ۇستاپ الساڭ، نە بولاتىنىن ويلاپ كورشى. ونىڭ قۇلاعى اۋىرادى دا، سەنى تىستەپ العىسى كەلىپ جۇلقىنادى. جۇلقىنعاندا بوساپ كەتپەس ٷشىن، ونى قاتتىراق ۇستاۋىڭ كەرەك بولادى. بۇدان يت ودان سايىن ىزالانادى. ال بوساتىپ جىبەرسەڭ، ٶزىڭدى قاۋىپ الادى. ٴبىراق ونى قۇلاعىنان ۇزاق ۇستاپ تۇرا بەرمەيسىڭ عوي؟! ~
توبەلەسىپ جاتقاندارعا ارالاسقاندا دا وسىنداي قيىندىققا كەزىگەمىز. ويتكەنى ٴبىز توبەلەستى كىم جانە نەگە باستاعانىن بىلمەيمىز. بالكىم، تاياق جەپ جاتقان ادام ۇرلىق جاساعان شىعار. وعان كومەكتەسسەك، ۇرىعا كومەكتەسكەن بولامىز. ال بۇل دۇرىس ەمەس، كەلىسەسىڭ عوي؟
سونىمەن، بىرەۋلەردىڭ توبەلەسىپ جاتقانىن كورسەڭ، نە ىستەۋىڭ كەرەك؟ ~ مەكتەپتىڭ جانىندا بولسا، جۇگىرىپ بارىپ، مۇعالىمگە ايتۋعا بولادى. مەكتەپتەن تىس جەردە بولسا، اتا-اناڭدى نەمەسە ساقشىلار قىزمەتكەرلەرىن شاقىرساڭ بولادى. بىرەۋلەر ٴتىپتى بىزبەن توبەلەسكىسى كەلسە دە، تاتۋلىق ساقتاۋعا تىرىسۋىمىز كەرەك.
توبەلەسىپ جاتقان بالالاردى كورسەڭ، نە ىستەۋىڭ كەرەك؟
يسانىڭ شىنايى شاكىرتتەرى ۇرىس-توبەلەستەن اۋلاق ٴجۇرۋ ٷشىن، قولدارىنان كەلگەننىڭ ٴبارىن ىستەيدى. وسىلايشا ٴبىز دۇرىس نارسە ىستەۋدە باتىل ەكەنىمىزدى كورسەتەمىز. ونىڭ ۇستىنە كيەلى كىتاپتا يسانىڭ شاكىرتتەرى «جانجالداسپاي، بارىنە مەيىربان» بولۋ كەرەكتىگى ايتىلعان (تىموتەگە 2-حات 2:24).
توبەلەسۋدەن اۋلاق بولۋعا كومەكتەسەتىن جاقسى كەڭەستەردى قاراستىرايىق: ريمدىكتەرگە 12:17—21 جانە پەتىردىڭ 1-حاتى 3:10، 11.
