25 تاراۋ
جاماندىق جاسايتىندار وزگەرە الا ما؟
ادامدار ارقاشان جاقسىلىق جاسايتىن بولسا، ٶمىر كەرەمەت بولار ەدى، سولاي ەمەس پە؟ ~ وكىنىشكە قاراي، ادامدار بارلىق ۋاقىتتا جاقسى نارسە ىستەي بەرمەيدى. كەيدە ٴبىز جاقسىلىق جاساعىمىز كەلسە دە، جامان نارسە ىستەپ قويامىز. نەگە ەكەنىن بىلەسىڭ بە؟ ~ ويتكەنى ٴبارىمىز دە كۇناكارمىز. الايدا كەيبىرەۋلەر وتە كوپ زۇلىمدىق ىستەيدى. ولار ادامداردى جەك كورەدى جانە ولارعا ادەيىلەپ قيانات جاسايدى. سەنىڭشە، وسىنداي ادامدار وزگەرىپ، مەيىرىمدى بولا الا ما؟ ~
سۋرەتتەگى شەتتە تۇرعان ادامعا قاراشى. ول ستەپاندى ۇرىپ جاتقان ادامداردىڭ سىرت كيىمدەرىن كۇزەتىپ تۇر. ونىڭ ەۆرەيشە ەسىمى — ساۋل، ال ريمدىك ەسىمى — پاۋىل. ول ۇلى ۇستازدىڭ شاكىرتى ستەپاندى ٶلتىرىپ جاتقانىنا قۋانىپ تۇر. كەل، ساۋلدىڭ وسىنداي جاماندىققا نەگە بارعانىن كورەيىك.
ساۋل پارىزشىلدار دەپ اتالاتىن ياھۋديلەردىڭ ٴدىني توبىنىڭ مۇشەسى بولاتىن. پارىزشىلدار قۇداي ٴسوزىن وقىسا دا، كەيبىر ٴدىني جەتەكشىلەر ۇيرەتەتىن ىلىمدەرگە كوبىرەك سەنەتىن. وسى جايت ساۋلدىڭ جاماندىق جاساۋىنا سەبەپ بولدى.
ستەپان يەرۋساليمدە تۇتقىندالعاندا، ساۋل دا سول جەردە ەدى. ستەپان سوت الدىنا اپارىلدى. سوت مۇشەلەرىنىڭ كەيبىرى پارىزشىلدار بولاتىن. ستەپانعا قانشاما جالا جابىلسا دا، ول قورىقپادى. قايتا، باتىلدىقپەن سويلەپ، ەحوبا قۇداي مەن يسا تۋرالى كەرەمەت كۋالىك بەردى.
ٴبىراق ونىڭ ايتقانىن سوت مۇشەلەرى تىڭداعىلارى كەلمەدى. ويتكەنى ولار يسا تۋرالى بۇعان دەيىن دە كوپ ەستىگەن. ونىڭ ۇستىنە، يسانى تاياۋدا عانا وزدەرى ولتىرگەن بولاتىن. الايدا ەحوبا يسانى قايتا ٴتىرىلتىپ، كوككە الىپ كەتتى. وسى وقيعادان كەيىن پارىزشىلدار جامان ويلارىن وزگەرتۋ كەرەك ەدى، ٴبىراق ولار يسانىڭ شاكىرتتەرىن قۋدالاۋعا كىرىستى.
قۋدالاۋشىلار ستەپاندى قالا سىرتىنا سۇيرەپ الىپ شىعاردى. ٴسۇيتىپ، ونى قورشاپ الىپ، تاس لاقتىرا باستادى. سۋرەتتەن كورىپ تۇرعانىڭداي، ساۋل بۇل ٸستى سىرتتان باقىلاپ تۇردى. ول ستەپاندى ٶلتىرۋ دۇرىس دەپ ويلادى.
نەگە ساۋل ستەپاندى ٶلتىرۋ كەرەك دەپ ويلادى؟
ساۋلدىڭ نەگە بۇلاي ويلاعانىن بىلەسىڭ بە؟ ~ ول ٶمىر بويى پارىزشىل بولعان، ٵرى پارىزشىلدار دۇرىس نارسەگە ۇيرەتەدى دەپ سەنگەن. سوندىقتان ولاردى ۇلگى تۇتىپ، ىستەرىن قايتالاۋعا تىرىسقان (ەلشىلەردىڭ ىستەرى 7:54—60).
ستەپاندى ولتىرگەن سوڭ، ساۋل نە ىستەدى؟ ~ ول يسانىڭ قالعان شاكىرتتەرىن قۇرتۋعا تىرىستى. ولاردىڭ ۇيلەرىنە باسا كوكتەپ كىرىپ، ايەلى بولسىن، ەركەگى بولسىن، سىرتقا سۇيرەتىپ شىعاردى. سوسىن، ولاردى تۇرمەگە جاپتى. سول سەبەپتەن شاكىرتتەردىڭ كوبىسى يەرۋساليمنەن كەتۋگە ٴماجبۇر بولدى. ٴبىراق ولار يسا تۋرالى ۋاعىزداۋلارىن توقتاتپادى (ەلشىلەردىڭ ىستەرى 8:1—4).
ساۋل يسانىڭ شاكىرتتەرىن ودان بەتەر جەك كورە باستادى. سوندىقتان ول قايافا ەسىمدى باس ٴدىني قىزمەتكەرگە بارىپ، داماسك قالاسىنداعى ماسىحشىلەردى تۇتقىنداۋعا رۇقسات الادى. سونداعى ونىڭ ماقساتى ماسىحشىلەردى يەرۋساليمگە اكەلىپ جازالاۋ بولاتىن. ٴبىراق داماسكىگە بارا جاتقان جولدا ٴبىر عاجايىپ جايت ورىن الدى.
ساۋلعا سويلەگەن كىم جانە ول وعان نە تاپسىرىپ جاتىر؟
كۇتپەگەن جەردەن كوكتەن ساۋلە ٴتۇسىپ: «ساۋل، ساۋل، مەنى نەگە قۋدالاپ ٴجۇرسىڭ؟»— دەگەن داۋىس ەستىلدى. بۇل كوكتەن سويلەپ تۇرعان يسانىڭ داۋسى ەدى. قاتتى جارىقتىڭ اسەرىنەن ساۋلدىڭ كوزى كورمەي قالدى. سوندىقتان داماسكىگە ونى قاسىنداعى سەرىكتەرى ەرتىپ اپاردى.
ٷش كۇننەن كەيىن يسا داماسكىدەگى اناني ەسىمدى شاكىرتىنە ايان بەردى. وعان ساۋلعا بارۋدى، ٵرى كوزىن اشىپ، ٴبارىن ٴتۇسىندىرۋدى بۇيىردى. اناني ٴبارىن يسانىڭ ايتقانىنداي ىستەدى. سوندا ساۋل يسا تۋرالى شىندىقتى ەستىپ، ونى بىردەن قابىلدادى. سودان كەيىن ونىڭ كوزى قايتادان اشىلدى. اقىر سوڭىندا ساۋل ٶمىرىن تۇبەگەيلى وزگەرتىپ، قۇدايدىڭ ادال قىزمەتشىسى بولدى (ەلشىلەردىڭ ىستەرى 9:1—22).
ساۋلدىڭ نەگە جاماندىق جاساعانىن ەندى ٴتۇسىندىڭ بە؟ ~ ويتكەنى ادامدار وعان دۇرىس ەمەس نارسەنى ۇيرەتكەن. قۇدايعا سەنەمىز دەپ ايتقانىمەن، ونىڭ ٴتىلىن المايتىن ادامدارعا ەلىكتەگەن. سونداي-اق قۇداي سوزىنەن گورى ادامداردىڭ ايتقانىن ارتىق كورەتىن توپتىڭ مۇشەسى بولعان. باسقا پارىزشىلدار قۇدايعا قارسىلاسۋىن توقتاتپاسا دا، نەگە ساۋل ٶمىرىن وزگەرتىپ، جاقسى ادام بولدى، بىلەسىڭ بە؟ ~ ساۋل شىندىقتى جەك كورمەگەن. سوندىقتان ول شىندىقتى بىلگەندە، دۇرىس نارسەنى ىستەۋگە دايىن بولعان.
كەيىنىرەك ساۋلدىڭ كىم بولعانىن بىلەسىڭ بە؟ ~ ٴيا، ول يسانىڭ ەلشىسى بولدى، ٵرى پاۋىل دەپ اتالىپ كەتتى. ەسىڭدە شىعار، باسقا جازۋشىلارمەن سالىستىرعاندا ول كيەلى كىتاپتىڭ كوپ بولىگىن جازعان ەدى.
باسقا ادامدار دا ساۋل سياقتى وزگەرە الادى. ٴبىراق بۇل وڭاي ەمەس، ويتكەنى ادامداردى جاماندىق جاساۋعا يتەرمەلەيتىن بىرەۋ بار. ونىڭ كىم ەكەنىن بىلەسىڭ بە؟ ~ يسا ونىڭ كىم ەكەنىن ساۋلعا ايتقان. داماسكىگە بارا جاتقان جولدا يسا وعان كورىنىپ، كوكتەن بىلاي دەگەن: «ادامدار تۇنەكتەن جارىققا، شايتاننىڭ بيلىگىنەن قۇدايعا بەت بۇرۋلارى ٷشىن، سەنى ولاردىڭ كوزىن اشسىن دەپ جىبەرەمىن» (ەلشىلەردىڭ ىستەرى 26:17، 18).
دەمەك، ادامداردى جاماندىققا يتەرمەلەيتىن شايتان ٸبىلىس ەكەن. ال دۇرىس نارسەنى ىستەۋ قيىن ەكەنىن بايقاعانسىڭ با؟ ~ ٴبارىمىز دە بايقاعانبىز. بىزگە دۇرىس نارسەنى ىستەۋگە كەدەرگى جاسايتىن — شايتان. تاعى نە كەدەرگى جاسايدى دەپ ويلايسىڭ؟ ~ بويىمىزداعى تۋا بىتكەن كۇنا كەدەرگى جاسايدى.
كۇنانىڭ كەسىرىنەن بىزگە جاقسى نارسەدەن گورى جامان نارسەنى ىستەۋ وڭاي. ولاي بولسا، ٴبىز نە ىستەۋىمىز كەرەك؟ ~ دۇرىس نارسە ىستەۋ ٷشىن بار كۇشىمىزدى سالۋىمىز كەرەك. سوندا ادامداردى جاقسى كورەتىن يسا بىزگە كومەكتەسەدى.
يسا جەردە بولعان كەزىندە، جاماندىق جاساۋدى قويىپ، ومىرلەرىن وزگەرتكەن ادامدارعا سۇيىسپەنشىلىك تانىتقان. ويتكەنى ولارعا وزگەرۋدىڭ قانشالىقتى قيىن بولعانىن تۇسىنگەن. سول زاماندا كوپ ەركەكپەن جىنىستىق قاتىناسقا تۇسەتىن ايەلدەر بولعان. ارينە، ولاردىڭ بۇل ٸسى دۇرىس ەمەس ەدى. كيەلى كىتاپ مۇنداي ايەلدەردى جەزوكشە دەپ اتايدى.
يسا جامان ىسپەن اينالىسقان مىنا ايەلدى نەگە كەشىردى؟
بىردە يسا پارىزشىلدىڭ ۇيىندە وتىرعاندا، وعان وسىنداي ايەلدەردىڭ ٴبىرى كەلەدى. ول يسانىڭ قاسىنا كەلىپ جىلاي باستايدى. ونىڭ اياعىنا تامعان كوز جاسىن ٶز شاشىمەن ٴسۇرتىپ، ٴيىسماي جاعادى. وسىلاي ول ٶز كۇناسىنا قاتتى وكىنەتىنىن كورسەتتى. سوندىقتان يسا ونى كەشىردى. ٴبىراق پارىزشىلدار ونى كەشىرمەۋ كەرەك دەپ ەسەپتەدى (لۇقا 7:36—50).
يسانىڭ ولارعا نە دەگەنىن بىلەسىڭ بە؟ ~ «جەزوكشەلەر قۇداي پاتشالىعىنا سەندەردەن بۇرىن كىرەدى»،— دەدى (ماتاي 21:31). يسانىڭ بۇلاي دەۋىنىڭ سەبەبى — كەيبىر جەزوكشە ايەلدەر يساعا سەنىپ، ومىرلەرىن وزگەرتكەن ەدى. ال پارىزشىلدار بولسا يسانىڭ شاكىرتتەرىنە جاماندىق جاساۋىن توقتاتپادى.
ولاي بولسا، كيەلى كىتاپتى وقىعاندا، قانداي دا ٴبىر ٸسىمىزدىڭ دۇرىس ەمەس ەكەنىن تۇسىنسەك، بىردەن وزگەرىس جاساۋىمىز كەرەك. بۇعان قوسا ەحوبانىڭ بىزدەن نە قالايتىنىن ٴبىلىپ، سونى ورىنداۋعا دايىن بولۋىمىز قاجەت. سوندا ەحوبا قاتتى قۋانادى، ٵرى بىزگە ماڭگىلىك ٶمىر سيلايدى.
جاماندىق ىستەمەۋگە كەلەسى تارماقتار كومەكتەسەدى. كەل، بىرگە وقىپ كورەيىك: زابۋر 118:9—11، ناقىل سوزدەر 3:5—7 جانە 12:15.
